دلہن کی مہندی جیسی ہے اردو زباں کی شکل

خوشبو بکھیرتا ہے عبارت کا حرف حرف

میں تمہارے شہر کی تہذیب سے واقف نہ تھا

پتھروں سے کی نہیں تھی گفتگو پہلے کبھی

ہمیں قبول نہیں چھوٹا منہ بڑی باتیں

مثال بنتے ہیں اور پھر مثال دیتے ہیں

غزل میں جب تلک احساس کی شدت نہ ہو شامل

فقط الفاظ کی کاریگری محسوس ہوتی ہے

کوئی بھی شخص دنیا میں تمہیں چھوٹا نظر نہ آئے

تم اپنے سوچنے کا دائرہ اتنا بڑا کر لو

تو کہاں رہتی ہے پوچھا تھا کسی نے ایک دن

میں غموں کے ساتھ رہتی ہوں خوشی کہنے لگی

کوئی حیات کے معنی بتا کے سمجھائے

طویل کیا ہے بھلا مختصر کا کیا مطلب

ہم احتیاط کی ایسی مثال دیتے ہیں

تمہارا ذکر بھی آیا تو ٹال دیتے ہیں

اس سے میرا کوئی رشتہ نکلا

میرے جیسا وہ بھی تنہا نکلا

محبت تو کسی سے کر نہ پائے

کسی سے تم شکایت کیا کرو گے

پھر ایک بار گناہوں سے ہم نے کی توبہ

پھر ایک بار کیا ہم نے اپنا کام شروع

آندھیاں آئیں اٹھا کر لے گئیں سب بستیاں

میں نے اک دل میں بنایا تھا مکاں اچھا ہوا

حسین خواب کو سچا سمجھ رہا ہے کوئی

فقط گمان کو دنیا سمجھ رہا ہے کوئی

جب بھی کشتی بھنور میں آئی ہے

اک دعا بھی اثر میں آئی ہے

جہاں پہ ختم ہوا کرتی ہیں خرد کی حدیں

وہیں سے اصل میں ہوتا ہے دل کا کام شروع

سوال یہ نہیں کس کس کو کوئی سمجھائے

سوال یہ ہے کہ کیا کیا سمجھ رہا ہے کوئی

صرف کہنے کو ہے نئی دنیا

وہ ہی دستور ہے وہی دنیا