دلہن کی مہندی جیسی ہے اردو زباں کی شکل

خوشبو بکھیرتا ہے عبارت کا حرف حرف

میں تمہارے شہر کی تہذیب سے واقف نہ تھا

پتھروں سے کی نہیں تھی گفتگو پہلے کبھی

غزل میں جب تلک احساس کی شدت نہ ہو شامل

فقط الفاظ کی کاریگری محسوس ہوتی ہے

کوئی بھی شخص دنیا میں تمہیں چھوٹا نظر نہ آئے

تم اپنے سوچنے کا دائرہ اتنا بڑا کر لو

ہم احتیاط کی ایسی مثال دیتے ہیں

تمہارا ذکر بھی آیا تو ٹال دیتے ہیں

کوئی حیات کے معنی بتا کے سمجھائے

طویل کیا ہے بھلا مختصر کا کیا مطلب

ہمیں قبول نہیں چھوٹا منہ بڑی باتیں

مثال بنتے ہیں اور پھر مثال دیتے ہیں

اس سے میرا کوئی رشتہ نکلا

میرے جیسا وہ بھی تنہا نکلا

تو کہاں رہتی ہے پوچھا تھا کسی نے ایک دن

میں غموں کے ساتھ رہتی ہوں خوشی کہنے لگی

محبت تو کسی سے کر نہ پائے

کسی سے تم شکایت کیا کرو گے

پھر ایک بار گناہوں سے ہم نے کی توبہ

پھر ایک بار کیا ہم نے اپنا کام شروع

آندھیاں آئیں اٹھا کر لے گئیں سب بستیاں

میں نے اک دل میں بنایا تھا مکاں اچھا ہوا