کچھ مہ جبیں لباس کے فیشن کی دوڑ میں

پابندیٔ لباس سے آگے نکل گئے

سرور جاں فزا دیتی ہے آغوش وطن سب کو

کہ جیسے بھی ہوں بچے ماں کو پیارے ایک جیسے ہیں

عید پر مسرور ہیں دونوں میاں بیوی بہت

اک خریداری سے پہلے اک خریداری کے بعد

مرغ پر فوراً جھپٹ دعوت میں ورنہ بعد میں

شوربہ اور گردنوں کی ہڈیاں رہ جائیں گی

فقط رنگ ہی ان کا کالا نہیں ہے

اسی قسم کی خوبیاں اور بھی ہیں

ایسے لگے ہے نوکری مال حرام کے بغیر

جیسے ہو داغؔ کی غزل بادہ و جام کے بغیر

راز و نیاز میں بھی اکڑ فوں نہیں گئی

وہ خط بھی لکھ رہا ہے تو چالان کی طرح

سارے شکوے دور ہو جائیں جو قدرت سونپ دے

میری دانائی تجھے اور تیری نادانی مجھے

کوئی خوش ذوق ہی شاہدؔ یہ نکتہ جان سکتا ہے

کہ میرے شعر اور نخرے تمہارے ایک جیسے ہیں

سپیشلسٹ پین کلر دے تو کون سا؟

''سارے جہاں کا درد ہمارے جگر میں ہے''

ہم نے تو انہیں جامعہ سے نقد خریدا

پھر کس طرح جعلی ہوئیں اسناد ہماری

اس دور کے مردوں کی جو کی شکل شماری

ثابت ہوا دنیا میں خواتین بہت ہیں

شاہدؔ صاحب کہلاتے ہیں مسٹر بھی مولانا بھی

حضرت دو کرداروں والے ہیرا پھیری کرتے ہیں

سینٹ کی کجلے کی اور غازے کی گلکاری کے بعد

وہ حسیں لگتی ہے لیکن کتنی تیاری کے بعد

محسوس ہوا سن کے تقاریر مغلظ

اب اہل سیاست میں بھی چرکین بہت ہیں

بجٹ کی کئی سختیاں اور بھی ہیں

''ابھی عشق کے امتحاں اور بھی ہیں''

میرے افسانے سناتی ہے محلے بھر کو

اک یہی بات ہے اچھی میری ہمسائی کی

ہے مبتلائے عشق بتاں میرا ڈاکٹر

جو مجھ میں وائرس ہے وہی چارہ گر میں ہے

عوام الناس کو ایسے دبوچا ہے گرانی نے

کہ جیسے کیٹ کے پنجے میں کوئی ریٹ ہوتا ہے

ایسے ملتا ہے چنریا سے ہیربینڈ کا رنگ

جس طرح سوٹ سے میچنگ ہے مری ٹائی کی

نہ کھینچو ابھی ہاتھ کھانے سے شاہدؔ

پلاؤ میں کچھ بوٹیاں اور بھی ہیں

خود افسانہ بنی بیٹھی ہے جو افسانہ پڑھتی تھی

یہی کالج ہے وہ ہم دم جہاں سلطانہ پڑھتی تھی

عقد ثانی کا مزا پوچھا تو بولے شیخ جی

ایسے لگتا ہے چکن چکھا ہے ترکاری کے بعد