خبر تحیر عشق سن نہ جنوں رہا نہ پری رہی

نہ تو تو رہا نہ تو میں رہا جو رہی سو بے خبری رہی

وہ عجب گھڑی تھی میں جس گھڑی لیا درس نسخۂ عشق کا

کہ کتاب عقل کی طاق پر جوں دھری تھی تیوں ہی دھری رہی

ڈوب جاتا ہے مرا جی جو کہوں قصۂ درد

نیند آتی ہے مجھی کوں مرے افسانے میں

دیکھا ہے جس نے یار کے رخسار کی طرف

ہرگز نہ جاوے سیر کوں گل زار کی طرف

فدا کر جان اگر جانی یہی ہے

ارے دل وقت بے جانی یہی ہے

عشق اور عقل میں ہوئی ہے شرط

جیت اور ہار کا تماشا ہے

دو رنگی خوب نہیں یک رنگ ہو جا

سراپا موم ہو یا سنگ ہو جا

شہ بے خودی نے عطا کیا مجھے اب لباس برہنگی

نہ خرد کی بخیہ گری رہی نہ جنوں کی پردہ دری رہی

مت کرو شمع کوں بد نام جلاتی وہ نہیں

آپ سیں شوق پتنگوں کو ہے جل جانے کا

کہتے ہیں تری زلف کوں دیکھ اہل شریعت

قربان ہے اس کفر پر ایمان ہمارا

بولتا ہوں جو وو بلاتا ہے

تن کے پنجرے میں اس کا طوطا ہوں

تمہاری زلف کا ہر تار موہن

ہوا میرے گلے کا ہار موہن

عشق دونوں طرف سوں ہوتا ہے

کیوں بجے ایک ہات سوں تالی

وقت ہے اب نماز مغرب کا

چاند رخ لب شفق ہے گیسو شام

عشق کا نام گرچہ ہے مشہور

میں تعجب میں ہوں کہ کیا شے ہے

ہجر کی راتوں میں لازم ہے بیان زلف یار

نیند تو جاتی رہی ہے قصہ خوانی کیجئے

کبھی تم موم ہو جاتے ہو جب میں گرم ہوتا ہوں

کبھی میں سرد ہوتا ہوں تو تم بھڑکاؤ کرتے ہو

نیاز بے خودی بہتر نماز خود نمائی سیں

نہ کر ہم پختہ مغزوں سیں خیال خام اے واعظ

نہیں بجھتی ہے پیاس آنسو سیں لیکن

کریں کیا اب تو یاں پانی یہی ہے

کیا پوچھتے ہو تم کہ ترا دل کدھر گیا

دل کا مکاں کہاں یہی دل دار کی طرف

نہ ملے جب تلک وصال اس کا

تب تلک فوت ہے مرا مطلب

مکتب عشق کا معلم ہوں

کیوں نہ ہوئے درس یار کی تکرار

جینا تڑپ تڑپ کر مرنا سسک سسک کر

فریاد ایک جی ہے کیا کیا خرابیوں میں

وصل کے دن شب ہجراں کی حقیقت مت پوچھ

بھول جانی ہے مجھے صبح کوں پھر شام کی بات

آنکھ اٹھاتے ہی مرے ہاتھ سیں مجھ کوں لے گئے

خوب استاد ہو تم جان کے لے جانے میں

مرہم ترے وصال کا لازم ہے اے صنم

دل میں لگی ہے ہجر کی برچھی کی ہول آج

کفر و ایماں دو ندی ہیں عشق کیں

آخرش دونو کا سنگم ہووے گا

تری ابرو ہے محراب محبت

نماز عشق میرے پر ہوئی فرض

زندگانی درد سر ہے یار بن

کوئی ہمارے سر کوں آ کر جھاڑ دے

نیند سیں کھل گئیں مری آنکھیں سو دیکھا یار کوں

یا اندھارا اس قدر تھا یا اجالا ہو گیا

کبھی لا لا مجھے دیتے ہو اپنے ہات سیں پیالا

کبھی تم شیشۂ دل پر مرے پتھراؤ کرتے ہو

سنا ہے جب سیں تیرے حسن کا شور

لیا زاہد نے مسجد کا کنارا

پکڑا ہوں کنارۂ جدائی

جاری مرے اشک کی ندی ہے

مشتاق ہوں تجھ لب کی فصاحت کا ولیکن

رانجھاؔ کے نصیبوں میں کہاں ہیرؔ کی آواز

روزہ داران جدائی کوں خم ابروئے یار

ماہ عید رمضاں تھا مجھے معلوم نہ تھا

مفتیٔ ناز نے دیا فتویٰ

خون عاشق حلال کرتا ہے

ڈورے نہیں ہیں سرخ تری چشم مست میں

شاید چڑھا ہے خون کسی بے گناہ کا

کھل گئے اوس کی زلف کے دیکھے

پیچ دستار زاہد مکار

جس کوں پیو کے ہجر کا بیراگ ہے

آہ کا مجلس میں اس کی راگ ہے

سراجؔ ان خوب رویوں کا عجب میں قاعدہ دیکھا

بلاتے ہیں دکھاتے ہیں لبھاتے ہیں چھپاتے ہیں

ہماری بات محبت سیں تم جو گوش کرو

تو اپنی پریم کہانی تمہیں سناؤں گا

نظر تغافل یار کا گلہ کس زباں سیں کروں بیاں

کہ شراب صد قدح آرزو خم دل میں تھی سو بھری رہی

کان میں ہے تیرے موتی آب دار

یا کسی عاشق کا آنسو بولنا

عبث ان شہریوں میں وقت اپنا ہم کئے ضائع

کسی مجنوں کی صحبت بیٹھ دیوانے ہوئے ہوتے

دل لے گیا ہے مجھ کوں دے امید دل دہی

ظالم کبھی تو لائے گا میرا لیا ہوا

مجھ رنگ زرد اوپر غصے سیں لال مت ہو

اے سبز شال والے اودے رومال والے

بت پرستوں کوں ہے ایمان حقیقی وصل بت

برگ گل ہے بلبلوں کوں جلد قرآن مجید

کیا ہے جب سیں عمل بے خودی کے حاکم نے

خرد نگر کی رعیت ہوئی ہے رو بگریز

تحقیق کی نظر سیں آخر کوں ہم نے دیکھا

اکثر ہیں مال والے کم ہیں کمال والے

حاکم عشق نے جب عقل کی تقصیر سنی

ہو غضب حکم دیا دیس نکالا کرنے