کی تلاش کا نتیجه | موضو - نظم, صفحہ .dnu

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ ".dnu"

نظم کے متعلقہ نتیجہ ".dnu"

نظم

تمہاری چشم توجہ کے منتظر ہیں ابھی
جلو میں نغمہ و رنگ و بہار و نور لئے
حیات گرم تگ و دو ہے میں نہیں تو کیا

ساحر لدھیانوی

نظم

میں جب طفل مکتب تھا، ہر بات، ہر فلسفہ جانتا تھا
کھڑے ہو کے منبر پہ پہروں سلاطین پارین و حاضر
حکایات شیرین و تلخ ان کی، ان کے درخشاں جرائم
جو صفحات تاریخ پر کارنامے ہیں، ان کے اوامر
نواہی، حکیموں کے اقوال، دانا خطیبوں کے خطبے
جنہیں مستمندوں نے باقی رکھا اس کا مخفی و ظاہر
فنون لطیفہ خداوند کے حکم نامے، فرامین
جنہیں مسخ کرتے رہے پیر زادے، جہاں کے عناصر
ہر اک سخت موضوع پر اس طرح بولتا تھا کہ مجھ کو
سمندر سمجھتے تھے سب علم و فن کا، ہر اک میری خاطر
تگ و دو میں رہتا تھا، لیکن یکایک ہوا کیا یہ مجھ کو
یہ محسوس ہوتا ہے سوتے سے اٹھا ہوں، ہلنے سے قاصر
کسی بحر کے سونے ساحل پہ بیٹھا ہوں گردن جھکائے
سر شام آئی ہے دیکھو تو ہے آگہی کتنی شاطر!

اختر الایمان

نظم

اس قوم کی فلاح ہے جام و سبو کے بیچ
تم انتخاب جا کے لڑو ہاؤ ہو کے بیچ
دشنام اور بلووں کے اور دو بہ دو کے بیچ
جیسے کہ کوئی بیٹھا ہو بزم عدو کے بیچ
''مستی سے درہمی ہے مری گفتگو کے بیچ''
''جو چاہو تم بھی مجھ کو کہو میں نشے میں ہوں''

سید محمد جعفری

نظم

مجھے تو فلسفۂ صبر بھی گوارا ہے
(اگرچہ اصل میں یہ قاتلوں کی منطق ہے)
مگر یہ فلسفہ اس دل کو کون سمجھائے
جو تیری یاد کے غم کو خدا سمجھتا ہے
اگر گئے ہوئے اک لمحہ مڑ کے آ سکتے
فنا کے بعد دوبارہ حیات اگر ہوتی
تو میں ضرور لپٹ کر تمہارے سینے سے
تمام قصۂ غم آنسوؤں میں برساتا
مگر مجھے تو خبر ہے کہ یہ نہیں ممکن
اسی لیے مرے دل میں الم بھی باقی ہے
تری جہاد مسلسل سی زندگی کی کتاب
مری حیات کے اک اک ورق پہ لکھی ہے
جو تو نے راہ میں چھوڑا تھا پرچم تگ و دو
حریف کچھ بھی کہیں آج میرے ہاتھ میں ہے
قرار خاطر محزوں اگر کوئی شے ہے
تو اسی کا خیال!

یحییٰ امجد

نظم

تماشا گہہ لالہ زار
عروس جواں سال فردا حجابوں میں مستور
گرسنہ نگہ زود کاروں سے رنجور
مگر اب ہمارے نئے خواب کابوس ماضی نہیں ہیں
ہمارے نئے خواب ہیں آدم نو کے خواب
جہان تگ و دو کے خواب
جہان تگ و دو مدائن نہیں
کاخ فغفور و کسریٰ نہیں
یہ اس آدم نو کا ماویٰ نہیں
نئی بستیاں اور نئے شہریار
تماشا گہہ لالہ زار!

ن م راشد

نظم

پر منظر غروب بہت دل نشیں ہے کیوں
مغرب کی شام اپنی سحر سے حسیں ہے کیوں
اس کشمکش میں دولت عقبیٰ بھی چھن گئی
ذوق جنوں سے وسعت صحرا بھی چھن گئی
صحرائے آرزو میں تگ و دو نہیں رہی
پائے طلب سے وادیٔ سینا بھی چھن گئی
تو نے تو قرطبہ میں نمازیں بھی کیں ادا
اپنی جبیں سے مسجد اقصیٰ بھی چھن گئی
کہسار روند ڈالے گئے کھیت ہو گئے
چٹان ہم ضرور تھے اب ریت ہو گئے
منزل پہ آ کے لٹ گئے ہم رہبروں کے ساتھ
بیمار بھی پڑے ہیں تو چارہ گروں کے ساتھ
غربت کدے میں کاش اتر آئے کہکشاں
آنکھیں فلک کی سمت ہیں بوجھل سروں کے ساتھ
اڑنا محال لوٹ کے آنا بھی ہے وبال
زخمی دعا خلا میں ہے ٹوٹے پروں کے ساتھ
اس رزم خیر و شر میں ہوا کون سرخ رو
ضرب کلیم کند ہے فرعون سرخ رو

ظہیر صدیقی

نظم

دوست رخصت ہو گئے
ان سے ملاقاتیں گئیں باتیں گئیں
شہر تھا آباد جن کے دم قدم سے
وہ ہماری چاندنی راتیں گئیں
مرنے والے مر گئے
زندہ مگر ہم بھی نہیں
وہ تو غسل آخری لے کر ہوئے پھر تازگی سے آشنا
نتھرے ستھرے اوڑھ کر اپنی سفیدی کے کفن
کافور کی خوشبو کو نتھنوں میں سمائے
سو گئے آرام سے ٹھنڈے بدن
اپنی اپنی قبر پر تکیہ کیے
وہ تھکن کی اس مسلسل سرسراہٹ سے تو اب آزاد ہیں
سانس کی زنجیر سے لٹکے ہوئے
جاگتے رہنے کی کاوش اور لگن
اس تگ و دو سے پرے آباد ہیں
اور ہم
جو اس کنارے پر کھڑے
روز و شب لہروں کا کرتے ہیں شمار
آپ بیتی روز سنتے ہیں
مگر خاموش ہیں
خامشی سے بہتا پانی
روز بہتا دیکھتے ہیں
ڈوب جانے کی مگر ہمت نہیں
کون جانے ڈوب ہی جائیں کہیں
ڈوب جاؤ یا چلے آؤ ادھر
باز آؤ اور پھر زندہ رہو
ساتواں در بھی کھلا ہے منتظر
داغ ہجرت دے گئے خوشبو کے پھول
کون اب بن کر چراغ راہ تم کو
ہاتھ سے انگلی پکڑ کر
طفل مکتب کی طرح لے کر بڑھے
اور یہ کہے
موت کا لمحہ ہماری زندگی کا آ گیا
جسم کی ٹھنڈک تو دستک دے رہی ہے
آؤ کچھ باتیں کریں
اور پھر چلیں
دوست رخصت ہو گئے

غالب احمد

نظم

عہد کہن گزر گیا لمحۂ نو عظیم ہے
آج کا سحر بے بدل آج کی لو عظیم ہے
عطر کی روح میں بسی عصر کے روپ میں رچی
پھوٹتی پو عظیم ہے یہ تگ و دو عظیم ہے
بحر جدید اوج موج اس میں گہر ہیں موج موج
سطح بہ سطح سب صدف نور کی رو عظیم ہے
تازہ ترین یہ جہاں تازہ نجوم و آسماں
ان کی جھلک جدا جدا ان کا جلو عظیم ہے
اور ہے اس کی تاب و تب اور ہے چال اور چھب
جو خد و خال ہوں سو ہوں آئنہ تو عظیم ہے

اختر عثمان

نظم

مرے ڈی این اے میں
اداکار لمحوں کا پیوند ہے
مرا فن مسلسل
ہدایات ہی کا تو پابند ہے

سدریٰ افضل

نظم

ایک ایسے سروے کے مطابق
جو میرے دوست
اپنے دل کو موصول ہونے والی
غیر ضروری خبروں کو جمع کر کے
مرتب کر رہے ہیں
شہر میں کوئی خودکشی نہیں کر رہا
محبت میں ناکامی پر فینائل پینے والی لڑکیاں
اور نوکری نہ ملنے پر
بڑے بھائی کے لائسنس یافتہ پستول سے
خودکشی کرنے والے لڑکے
بہت دن سے نظر نہیں آئے
دوپٹے کا پھندا بنا کر مر جانے والی
بے اولاد دلہنیں
اور طویل بیماری سے تنگ آ کر
خود کو جلا کر ہلاک کرنے والے
ادھیڑ عمر مریض
ناپید ہو گئے ہیں
شہر میں اب جس کو بھی خودکشی کرنی ہو
اسے بہت زیادہ تگ و دو نہیں کرنی پڑتی
وہ باہر نکلتا ہے
اور تھوڑی دیر کے لیے
نشانہ بازوں والی یلو کیب کا
انتظار کرتا ہے
یا جب اس کی سڑک کے دونوں طرف
خوب فائرنگ ہو رہی ہو
وہ بلا ارادہ بالکنی میں جا کے کھڑا ہو جاتا ہے
جب لوگ خودکشی کرنا چاہتے ہیں
یقین کیجئے
کسی جنسی امتیاز کے بغیر
رنگ، نسل اور زبان کے فرق کو خاطر میں نہ لاتے ہوئے
گولیاں ہر جگہ
انہیں ڈھونڈھ نکالتی ہیں

ذیشان ساحل

نظم

بجائے کوئی سر برآوردہ پتھر صفت شخصیت چاہنے کے
تمہاری معیت رفاقت تگ و دو کا انداز مانگوں

اختر الایمان

نظم

پھیلی ہے فضاؤں میں خوشی میری نظر کی
ہنستی نظر آتی ہیں فضائیں مرے گھر کی
دل شاد مرے اہل و عیال آج بہت ہیں
مصروف ہیں وہ بھی نہیں مصروف فقط میں
رکھی ہے سلیقے سے ہر اک کام کی چیز آج
مہمان مرے گھر میں ہیں کچھ میرے عزیز آج
شادی کا مکاں گھر مرا معلوم نہ ہو کیوں
مجمع ہو جب اتنا تو بھلا دھوم نہ ہو کیوں
بھائی بھی ہیں بہنوئی بھی بھاوج بھی بہن بھی
بیٹھا ہے بھتیجا بھی بھتیجے کی دلہن بھی
بچی ادھر اک بیٹھ کے تکتی ہے دلہن کو
کچھ طفل ستاتے ہیں ادھر اپنی بہن کو
بچوں پہ جھلک خاص ہے تنویر سحر کی
اٹھ بیٹھے ہیں سب سنتے ہی آواز گجر کی
دل کش یہ فضا صبح کی یہ نور کا تڑکا
بلبل کی طرح بول رہا ہے کوئی لڑکا
بے وجہ کوئی رونے پہ آمادہ ہوا ہے
حیرت سے نئے گر کو کوئی دیکھ رہا ہے
بیٹھا ہے یہ چپ دوڑ رہا ہے وہ خوشی سے
کھانے کے لیے ضد کوئی کرتا ہے ابھی سے
کرنا ہے جو سامان ضیافت کو فراہم
آ آ کے مرے کان میں کچھ کہتی ہیں بیگم
ہونا ہے جو خوبی سے ضیافت کا سرانجام
لڑکی کے ذریعے سے بھی پہنچاتی ہیں پیغام
آتی بھی ہیں جاتی بھی ہیں بیگم سوئے مطبخ
ماماؤں میں بے وقت جہاں ہوتی ہے چخ چخ
راحت نہ ملے کیوں انہیں ہلکی تگ و دو میں
سائے کی طرح ساتھ ہے لڑکی بھی جلو میں
ننھی ابھی اٹھی نہیں پہلو سے پھپھی کے
لیتی ہیں وہ رہ رہ کے مزے اس کی ہنسی کے
لڑکے مرے خوش ہو کے ادھر دیکھ رہے ہیں
اخلاص و محبت سے مخاطب ہوں جدھر میں
مجمع یہ عزیزوں کا محبت کی یہ باتیں
ان پیار کی باتوں میں نہ چوٹیں ہیں نہ گھاتیں
انوار تبسم کے تکلم سے ہیں پیدا
ضو صبح کی اس منظر دل کش پہ ہے شیدا
باتوں کا ابھی تھا طربی سلسلہ جاری
نرگس نے کہا آ کے ہے تیار نہاری

علی منظور حیدرآبادی

نظم

آج میں دور بہت دور نکل آیا ہوں
بے طلب تگ و دو
دل میں کاوش نہ تلاش
نہ کوئی خواہش مخفی نہ تمنائے معاش
ہوس خام نہ سودائے تمام
یوں ہی چلتا ہوا چلتا ہوا آ پہنچا ہوں
پے بہ پے گام بہ گام
کس قدر دور نکل آیا ہوں
اس سے پہلے بھی چلا ہوں میں نئی راہوں پر
شاہراہوں سے پرے
خار زاروں میں گھسٹتی ہوئی اک سرخ لکیر
اک سسکتی ہوئی دل دوز نفیر
سرسراتے ہوئے ملبوس
مہکتی ہوئی سانس
لذت و کرب کا مدھم بم و زیر
آج لیکن میں بہت دور نکل آیا ہوں
اور اک شام سر راہ گزار
وہ مری لغزش پا میری وہ بے راہروی
خود فراموش سبک دوش عمل
اپنے اجداد کے ناکردہ گناہوں کی عقوبت سے بری
اک ہرن چوکڑی بھرتا ہوا خاموش خرام
شام کے وقت سر راہ گزار
میں بہت دور بھٹک نکلا تھا
آج لیکن میں بہت دور نکل آیا ہوں
آپ سے آپ بہت دور بہت دور نکل آیا ہوں
شاہراہوں سے پرے دور گزر گاہوں سے
بے طلب بے تگ و دو
خانقاہوں سے الگ دور صنم خانوں سے
ہوس خام نہ سودائے تمام
یوں ہی چلتا ہوا چلتا ہوا آ پہنچا ہوں
پے بہ پے گام بہ گام
کس قدر دور بہت دور نکل آیا ہوں

محمد دین تاثیر

نظم

میں آخر کس کا جینا جی رہا ہوں
میں صحرا کا شجر ہوں
جس کی شاخیں گھونسلوں سے جھک گئی ہیں
کرائے کا مکاں ہوں
جس کے کمروں میں پرائے لوگ رہتے ہیں
فراز کوہ پر کوئی پرانا غار ہوں میں
ہوا سے گونجتا سایہ زدہ ویراں کھنڈر ہوں
کبھی ہوں ایستادہ اور کبھی مسمار ہوں میں
فصیل شہر ہوں یا سایۂ دیوار ہوں میں
مرے اندر سے ہی کوئی مجھے بتلائے
میں کیا ہوں؟
مرے خلیوں کے گیلے مرکزوں میں بند
ڈی این اے مرے ماں باپ کا ہے
جو اس کے گرد پانی ہے
وہ کس بے چین سیارے کے ساگر سے اٹھا ہے
میں کس کو بھوگتا ہوں
یہ آخر کون مجھ میں گونجتا ہے
سنسناتا ہے
میں آخر کس کا ہونا ہو رہا ہوں

وحید احمد

نظم

میں سوچ کے اک دوراہے پر
حیراں آزردہ آ پہنچا
یہ ساری تگ و دو تنہا تھی
اس موڑ پہ بھی تنہا پہنچا
لیکن اس تنہا منظر میں
اک چہرہ اور ابھر آیا
جو صاف نظر آیا نہ کبھی
اب اتنے قریب نظر آیا
وہ چہرا دشمن کا چہرا
اس روپ میں پہلی بار ملا
کبھی ذات کے ہر منظر میں مرے
کبھی منظر کے اس پار ملا
میں خوب اسے پہچان گیا
جس روپ میں وہ جس بار ملا
پھر اپنے دل پہ نظر جو کی
آمادہ پئے پیکار ملا
پھر میں نے کسی تاخیر بنا
اک وار بہت سفاک کیا
خود اپنا گریباں چاک کیا

پیرزادہ قاسم

نظم

زاہد بے ریا بنا ہے کوئی
اور بنا کوئی رند شاطر ہے
ہے تگ و دو جہاں میں جتنی بھی
صرف اک چیز ہی کی خاطر ہے

دھرم پال عاقل

نظم

مرے اس شہر کی رونق
بسیں رکشا ٹرامیں موٹریں
اور آدمی سیلاب کے مانند
سڑکیں ہمہماتی شور ہنگامہ تگ و دو
وقت کی گردش میں صبح و شام کا معمول ہے
مرے اس شہر کی رونق
اسکول نا آشنا لمحے ادھوری خواہش
خوابوں کے ویرانے
اندھیرے شب کے افسانے
مرے اس شہر کی رونق
حسیں بازار رونق دکانیں دل ربا چہرے
شگفتہ کونپلیں آسودہ جلوے
کرب کی لہریں
یہ کیسی کرب کی لہریں ہیں یا رب
شہر خوباں شہر مقتل بن گیا ہے
اور زندہ آدمی
قتل گاہ رہگزر پر
رکشوں' بسوں کاروں کے شور گراں میں
نیم جاں بے حال مردہ
کھو چکا ہے
اعتبار زندگی

صہبا لکھنوی

نظم

ادھر نہ آؤ
کہ یہ محل اب شکست شوکت کی داستاں ہے
کہ یہ محل اب شکست اقدار کا نشاں ہے
کہ یہ محل اب شکست افکار کی فغاں ہے
ادھر نہ دیکھو
کہ یہ کھنڈر ہے جنوں کا بھوتوں کا آستاں ہے
کہ یہ امنگوں کی بے بسی کی بڑی طویل ایک داستاں ہے
کہ یہ ہے مسکن سیاہ راتوں کا ، ہرطرف بس دھواں دھواں ہے
ادھر نہ جھانکو
شکستہ اینٹوں کی ان درازوں میں چاندنی بھی سسک رہی ہے
اندھیری راتوں کی کالی ناگن سیاہیوں میں چمک رہی ہے
کرن کرن کا لہو پئے ہے تو مست ہے اور بہک رہی ہے
جو پہلے تم اس محل میں آتے
تو رنگ و نغمہ کے سیل پر نور سے گزرتے
تو آرزو کی شراب میں ڈوبتے ابھرتے
رسیلی بانہوں میں میٹھے سپنوں کی، ڈوب کر کس سکوں سے مرتے
جو پہلے اس سمت سے گزرتے
تو آرزوؤں کے نغمۂ دل نشیں کو سنتے
بہت ہی روتے اور آنسوؤں سے کئی نئے خواب اپنے بنتے
اور ایک بے نام کیف مستی میں ڈوب کر اپنے سر کو دھنتے
جو پہلے اس در کو کھٹکھٹاتے
حسیں امیدوں کے پاسباں تم کو رنگ و بو کا پیام دیتے
ہرے بھرے سرو تم کو گلہائے آرزو کا سلام دیتے
یہ بام و در ہنس کے تم کو پریوں کے شاہزادے کا نام دیتے
اور اب جو آئے ہو کیا ملے گا ؟
نگار خانہ اجڑ چکا ہے ، وہ ساری محفل اکھڑ گئی ہے
وہ نکہت آرزو بھی دیوانہ وار ہر سوبھٹک رہی ہے
امیں تھی جو در د بیکراں کی وہ آہ گھٹ گھٹ کے مرچکی ہے
اور اب یہاں کس کو ڈھونڈتے ہو؟
یہاں پہ تم چیختے رہو گے ، جواب کوئی نہیں ملے گا
یہاں پہ تم ڈھونڈتے رہو گے پہ خواب کوئی نہیں ملے گا
یہاں پہ شعر و شراب و چنگ ورباب کوئی نہیں ملے گا
یہاں پہ کس کو بلارہے ہو؟
یہاں تمہاری صداؤں کے خول گونج بن کر اڑا کریں گے
وہ کھوکھلی گونج تم سے پوچھے گی''آپ یاں آ کے کیا کریں گے''
ڈرو گے خود اپنے سایے سے تم تو بھوت تم پر ہنسا کریں گے
ادھر نہ آؤ
ادھر نہ آؤ،یہاں پہ تم آ کے کیا کرو گے؟
یہاں پہ بھوتوں کا رقص دیکھو گے اور پھر آپ ہی ڈرو گے
ڈروگے یا کالے کالے سایوں کار قص
دیوار کی درازوں سے دیکھ کر تم بہت ہنسو گے
بہت ہنسو گے
یہ ایک دیوار قہقہہ ہے

سجاد باقر رضوی

نظم

زندگی جسم و دل و جاں کی منظم قوت
موت اظہار پریشانی‌ و لاچاری کا
موت صحراؤں میں بکھرے ہوئے ذروں کا غبار
زندگی نقش انہی ذروں کی چمن کاری کا
موت بے مائیگی دامان زمیں کی گویا
زندگی سلسلہ بادل کی گہر باری کا
زندگی قافلۂ سعی کی پیہم تگ و دو
موت دم بھر کے لئے وقفہ ہے بیکاری کا
زندگی کا جسے معلوم ہو مطلب اس کو
موت کا خوف نہ گردوں کی تبہ کاری کا

فضل الرحمٰن

نظم

پہاڑی کے اس پار کوئی دھنک ہے نہیں ہے
دھنک کے سرے پر کوئی جادو نگری پرستاں خزانہ مرا منتظر ہے
نہیں ہے
مجھے کوئی دھوکا نہیں ہے
سمندر کے اس پار سے آنے والی ہواؤں میں کوئی سندیسہ نہیں ہے
اگر کچھ نہیں ہے تو ساری تگ و دو یہ امروز و فردا کے سب سلسلے کس لئے ہیں
افق سے پرے مرغزاروں کی آخر حدوں تک پہنچنے کی خواہش
سرابوں کے دھندلے ہیولوں کا پیچھا
یہ سب کس لئے ہے
کسی خواب کی کوئی صورت نہیں ہے
خوشی کوئی تحفہ نہیں جو کرسمس کی شب کوئی چپکے سے دے جائے گا
میں ایلس نہیں ہوں الف لیلوی شاہزادی نہیں ہوں
میں عذراؔ ہوں
اور میرے اور زندگی کے تعلق سے جو بھی ہے دنیا میں وہ اصلیت ہے
مری شاعری گیت سنگیت
سب دل کے موسم
چاہنے چاہے جانے کی خواہش میں رشتوں کی سنگینیاں
کچھ رفاقت کے انمول موتی
محبت کی شبنم میں ڈوبی ہوئی ادھ کھلی زرد کلیاں
بزرگوں سے پائی ہوئی سب مقدس دعائیں
زندگانی کی سب دھوپ چھاؤں
خزانہ ہے میرا
دھنک رنگ مجھ میں سمائے ہوئے ہیں

عذرا نقوی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے