کی تلاش کا نتیجه | موضو - نظم, صفحہ dhaa.d

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "dhaa.d"

نظم کے متعلقہ نتیجہ "dhaa.d"

نظم

ہم دیکھیں گے
لازم ہے کہ ہم بھی دیکھیں گے
وہ دن کہ جس کا وعدہ ہے
جو لوح ازل میں لکھا ہے
جب ظلم و ستم کے کوہ گراں
روئی کی طرح اڑ جائیں گے
ہم محکوموں کے پاؤں تلے
جب دھرتی دھڑ دھڑ دھڑکے گی
اور اہل حکم کے سر اوپر

فیض احمد فیض

نظم

خدا ایک ہے یوں تو واوین میں صاف لکھا ہوا ہے
مگر زیر واوین بھی چھوٹی چھوٹی بہت تختیاں ہیں
جلی حرف جن کے بہت امتوں کا پتہ دے رہے ہیں
جو یہ تختیاں اپنی گردن میں لٹکائے
زنار پہنے ہوئے کوئی تسبیح تھامے
اپنی گرد سفر کے دھند میں لپٹے چلے جا رہے ہیں
زیتون کی شاخ تلسی کے پتے
ہوا میں اڑے جا رہے ہیں
چیونٹیوں کی قطاریں قرن در قرن
مختلف پیچ در پیچ راہوں سے گزری چلی جا رہی ہیں
سیکڑوں سر کٹے دھڑ بہت راستوں پر پڑے ہیں

اختر الایمان

نظم

دوست ہیں اپنے بھائی بھلکڑ
باتیں ان کی ساری گڑبڑ
راہ چلیں تو رستہ بھولیں
بس میں جائیں تو بستہ بھولیں
پورب جائیں پچھم پہنچیں
منزل پر اپنی کم پہنچیں
ٹوپی ہے تو جوتا غائب
جوتا ہے تو موزہ غائب
پیالی میں ہے چمچہ الٹا
پھیر رہے ہیں کنگھا الٹا
کام ہے ان کا سارا الٹا
اور تو اور پجامہ الٹا
لوٹ پڑیں گے چلتے چلتے
چونک اٹھیں گے بیٹھے بیٹھے
سودا دے کر دام نہ دیں گے
دام دئے تو چیز نہ لیں گے
کوئی پکارے دام تو لاؤ
کوئی کہے بنڈل تو اٹھاؤ
تیرنے جائیں گھڑی بھول آئیں
باغ میں جائیں چھڑی بھول آئیں
وہ تو یہ کہئے کہ خدا نے
جوڑ دئے ہیں اعضا تن سے
باندھ رکھے ہیں سب کل پرزے
ورنہ ہر روز آپ یہ سنتے
گر گئی میری داہنی چھنگلی
ڈھونڈ رہا ہوں بیچ کی انگلی
کیا کہئے اوسان ہیں غائب
کل سے دونوں کان ہیں غائب
ایک تو صابن دان میں پایا
ایک نہ جانے کس نے اڑایا
ران ایک لپٹی شال سے نکلی
ناک بندھی رومال میں نکلی
تم نے تو نہیں دیکھی بھائی
کھونٹی پر تھی کھال ہماری
بھولے کہیں سر اور کہیں دھڑ
ہائے بچارے بھائی بھلکڑ

شان الحق حقی

نظم

مری رگوں میں خنک سوئیاں پروتا ہوا
برہنہ لاشوں کے انبار پر سے ہوتا ہوا
ہوا کا ہاتھ بہت سرد، موت جیسا سرد
وہ جا رہا ہے، وہ دروازے سر پٹکنے لگے
وہ بلب ٹوٹ گیا، سائے ساتھ چھوڑ گئے
وہ ناچتے ہوئے بھیجے کسی رقیق سے تر
وہ رینگتے ہوئے بازو، وہ چیختے ہوئے سر
وہ ہونٹ نیم تراشیدہ، دانت نکلے ہوئے
وہ نصف دھڑ چلے آتے ہیں رقص کرتے ہوئے
وہ جسم سہمے ہوئے بند مرتبانوں میں
جو بات کی تو انہیں تیز و ترش زہر ملا
جو چپ ہوئے تو انہیں سولیوں پہ ٹانگ دیا
چھپی ہیں سیکڑوں بد روحیں ان فضاؤں میں
وہ گھورتی ہوئی آنکھیں کہیں خلاؤں میں
زمیں کے مالک دیرینہ کی تلاش میں ہیں
جراحتوں کے نشاں ہر خمیدہ لاش میں ہیں
اور اک صدا چلی آتی ہے، ہر جراحت سے
یہ سارے زخم مقدر ہوئے ہیں موت کے بعد
سکون لفظ و بیان و سکوت صوت کے بعد

ساقی فاروقی

نظم

جاؤ جاؤ مجھے نیند آئی ہے سونے دو مجھے
دن گزر جاتا ہے لفظوں کا تعاقب کرتے
اور جب رات کو تھک ہار کے گر پڑتا ہوں
تم چلے آتے ہو اخبار لئے
تم کو اب یاد نہیں
کل کے اخبار میں بھی تھیں یہی ساری خبریں
بلکہ پرسوں سے یہی خبریں دھڑا دھڑ ہر اک اخبار میں چھپتی ہیں
پڑھی جاتی ہیں
کل کی خبریں بھی لگے ہاتھ سنا ڈالو ابھی
پھر کہیں جا کے مرو تم بھی مجھے سونے دو
صبح کو پھر مجھے لفظوں کے تعاقب میں نکلنا ہوگا

راہی معصوم رضا

نظم

حلوۂ بے دودھ کی تھالوں کا بحر بیکراں
کشتیاں بہتی ہیں یا آ جا رہی ہیں مہریاں
سالموں کے ساتھ ہیں ٹوٹے کھلونے کھانڈ کے
مور کا سر شیر کا دھڑ پاؤں غائب سانڈ کے
صحن میں کھیلیں بتاشے ابر سے برسے ہوئے
برتنوں کے پاس پتل رات کے پرسے ہوئے

شاد عارفی

نظم

یہ لوٹ مار دھاڑ یہ
خدا کو ناپسند ہے
ہر آن چھیڑ چھاڑ یہ
خدا کو ناپسند ہے
فساد یہ بگاڑ یہ
خدا کو ناپسند ہے

مائل خیرآبادی

نظم

ایک دن حضرت حافظ نے یہ دیکھا منظر
طوق زریں سے مزین ہے ہمہ گردن خر
اور چھکڑے میں جتا رینگ رہا ہے تازی
زخم ہی زخم ہے کوڑے کا ز سر تا بہ کمر
تھے جو مرحوم بڑے سادہ دل و نیک مزاج
''ایں چہ شوریست'' کہا اور گرے چکرا کر
وہ تو اس غم کو لیے خلد بریں میں پہنچے
کئی صدیوں کا زمانے نے لگایا چکر
آج ہم پر بھی مگر جبر نظارہ ہے وہی
وہی نیرنگ تماشا وہی نیرنگ نظر
وہ چراگاہ سیاست ہو کہ میدان ادب
طوق زریں ہے وہی اور وہی گردن خر
اختیارات کی کرسی پہ خران فربہ
متمکن نظر آتے ہیں بہ صد کر و فر
ایک کرسی پہ کسی طرح اچک کر پہنچے
اور پھر دھڑ سے کھلے کشف و کرامات کے در
پھر تو بقراطؔ اور ارسطوؔئے زمانہ ہیں وہ
علم و حکمت میں نہیں پھر کوئی ان کا ہمسر
پھر تو صحرائے جہالت بھی ہے دریائے علوم
پھر تو اس بے ہنری میں بھی ہیں سو سو جوہر
خواہ دو حرف بھی تعلیم نہ حاصل کی ہو
طوق زریں کے کرشمے سے بنے دانشور
کوئی جلسہ ہو وہ ''مہمان خصوصی'' ہوں گے
کوئی موقع ہو دھڑلے سے وہ دیں گے لیکچر
وہ زمیں کے ہوں مسائل کے خلا کی باتیں
مثل مقراض زباں چلتی رہے گی فر فر
عالم و فاضل و دانشور و اہل حکمت
سب نظر آئیں گے قدموں پہ جھکائے ہوئے سر
طوق زریں کا جو اس کو نہ کرشمہ کہیے
ناطقہ سر بہ گریباں کہ اسے کیا کہیے

رضا نقوی واہی

نظم

بن لادن
تورا بورا میں ہوتا
تو ایسی محشری مار
جس سے
پہاڑ سرمہ بن گئے
زمین راکھ ہو گئی
آسمان سیاہ پڑ گیا
کب کا ختم ہو چکا ہوتا
مگر کرۂ ارض پر جگہ جگہ
ہیبت ناک آتشیں پھنکاریں
کربناک دل دوز چیخیں
اس حقیقت کی غماز ہیں
کہ بن لادن
مرا نہیں
زندہ ہے
یہ پھنکاریں اور چیخیں
اس بات کی بھی دلیل ہیں
کہ لادن
تورا بورا کے علاوہ
دوسرے خطوں میں بھی موجود ہے
سوال یہ ہے کہ
لادن ختم کیوں نہیں ہوا
کیا وہ واقعی اتنا زبردست ہے
کہ سارے جہان کی مجموعی طاقت بھی
اس کے آگے ہیچ ہے
کیا اس نے آب حیات پی لی ہے
کہ کبھی مر نہیں سکتا
کیا وہ قفس بن گیا ہے
کہ اپنی خاکستر سے پھر پیدا ہو جاتا ہے
کیا وہ شد سکندری ہے
کہ یاجوج ماجوج کی زبانیں
اسے پوری طرح چاٹ نہیں پاتیں
کیا وہ راون ہے
کہ اس کا ایک سر افغانستان میں
تو باقی نو دوسرے جہاں میں
اور کیا اس نے کوئی وردان پا لیا ہے
کہ سر کٹ کر پھر دھڑ سے آ لگتا ہے
کیا وہ بھیشم پتامہ ہے
کہ اپنی اچھا کے بغیر مر نہیں سکتا
کیا اس نے اپنا کلون بنا لیا ہے
کہ اس کا خاتمہ نا ممکن ہو گیا ہے
سوال یہ بھی ہے
کہ میزائلوں کا نشانہ چوک کیوں جاتا ہے
کیا ان کے پرزے ڈھیلے ہیں
کہ وہ اپنا توازن کھو بیٹھتی ہیں
بے سمتی کا شکار ہو جاتی ہیں
کیا وہ اندھی ہیں
کہ بن لادن کو دیکھ نہیں پاتیں
کیا ان کی بینائی کمزور ہے
کہ وہ لادن اور غیر‌‌ لادن میں تمیز نہیں کر پاتیں
بن لادن کوئی سچ تو نہیں
کہ شکونی کی چال اس کے آگے ناکام ہو جائے
وہ لاکشا گرہ سے بچ کر نکل جائے
اگیات باس سے واپس آ جائے
اس کا چیر ہرن نہ ہو سکے
تیروں کی شیا پر زندہ رہ جائے
کہیں ایسا تو نہیں
کہ میزائلیں اسے مارنا ہی نہیں چاہتیں
اگر ایسا ہے
تو یہ محشری مار
کس کے لیے
یہ مسلسل یلغار
کیوں
حیران و پریشان ارجن
کروک شیتر میں چیختا پھر رہا ہے
مگر آج کی مہابھارت میں
ان سوالوں کا جواب دینے والا
کوئی کرشن نہیں
کوئی کرشن نہیں

غضنفر

نظم

ہمارے اختیارات غصب کر لیے گئے ہیں
ان سر کٹے بدن والوں نے
انھوں نے بڑی دلجمعی سے
اپنے سر اپنے اپنے دھڑ سے الگ کروا لیے
تاکہ وہ پہچانے نہ جائیں
انھوں نے ہمیں منڈیروں پر بٹھا دیا ہے
تاکہ
جب ہوا تیز چلے تو ہم دوسری طرف بنی کھائی میں گر پڑیں
کبھی نہ اٹھنے کے لیے
وہ سمجھتے ہیں
وہ پہچانے نہیں جائیں گے
ایسا بھلا ہو سکتا ہے
مرنے سے پہلے ہم ان کے سر ڈھونڈ نکالیں گے
اور جب وہ ہوائیں چلیں گی
جو ہمارا ساتھ دیں گی
ہم ان کے سروں کو ان کے سامنے کچلیں گے
ورنہ ایک ترازو ہے
جس میں ایک طرف ان کے سر ہوں گے
اور ایک طرف ہم سب
موافق ہوا شاید ہمارا ساتھ دے

عذرا عباس

نظم

میں بھی یہاں
مضطرب اور بے حال
خستہ و پارینہ تختے پہ بہتا ہوا
ایک خفتہ جزیرے کے نزدیک
کیا دیکھتا ہوں
کہ وہ ایک پتھر پہ بیٹھی ہے
پانی پہ طاری ہے
اک کیف سا
چاندنی کی لپک
اور ہوا کی مدھر لے پہ
مچھلی سا نیچے کا دھڑ اس کا
شفاف پانی میں ہلتا ہے
ابریشمیں نور میں
عکس سیماب سا
اس کے گلنا چہرہ پہ کھلتا ہے
اب دیکھیے
مجھ سا مبہوت عاشق
اسے اپنی آغوش میں کیسے بھرتا ہے
غرقاب ہوتا ہے
مرتا ہے

رفیق سندیلوی

نظم

یہ ہمارا شہر جو شہر کلیمؔ و شادؔ ہے
دوست اس کا آج کل چرخ ستم ایجاد ہے
اک زمانہ تھا کہ گنگا کا یہ ہمسایہ نگر
شعر و حکمت کے لیے تھا درس گاہ معتبر
بھائی چارہ اور روا داری کا تھا ہر سو رواج
اپنے اپنے شغل میں مصروف رہتا تھا سماج
شاعران خوش نوا دن رات آتے تھے نظر
گنگناتے شعر کہتے ہر گلی کے موڑ پر
ایسے بے فکروں کو جن کی طبع موزوں ہی نہ تھی
شوق تھا کنکوے بازی کا، بجائے شاعری
ملک میں تحریک آزادی کا آیا دور جب
مشغلے تفریح کے، ڈھونڈے گئے کچھ اور تب
تھی کبھی تو بھوک ہڑتال اسٹرائک، مار دھاڑ
اور کبھی تھی نعرے بازی دھر اسے اس کو پچھاڑ
بعد آزادی نئی مصروفیت کا در کھلا
نیم تو ہے نیم ہی اس پر کریلا بھی چڑھا
اک نئی تحریک آئی لے کے کچھ تبدیلیاں
یعنی اب تفریح کا سامان نو ہیں ریلیاں
جس طرح ہوں کھیتیوں پر حملہ آور ٹڈیاں
یوں ہی اہل شہر کے حق میں ہیں لعنت ریلیاں
کرسیوں سے جو سیاست زادگاں محروم ہیں
ریلیاں ان کے لیے با مقصد و مفہوم ہیں
رنگ داروں کو ملا کر بھیڑ اکٹھی کی گئی
چپہ چپہ پر گلی کوچوں کے جو قابض ہوئی
دفعتاً مفلوج ہو کر رہ گیا ہر کام کاج
شہر میں چلتا رہا کچھ دیر تک راون کا راج
اتفاقاً گر کوئی دوکاں کھلی پائی گئی
خوب جی بھر کے وہ لوٹی اور جلوائی گئی
ہر در و دیوار کے نیچے کھٹالوں کی قطار
بیچ سڑکوں پر مویشی اور غلاظت کی بہار
اور اس منظر کے پیچھے ریلی بازوں کا ہجوم
تجھ کو لے آیا کہاں اے شہر تیرا بخت شوم

رضا نقوی واہی

نظم

سچ بتاؤ
جو کتابوں میں لکھا ہے
کیا وہ سب تم نے کہا ہے
جب اذیت جسم سے رسنے لگے گی
جب دعا کو اٹھنے والے ہاتھ
شل ہونے لگیں گے اور
شل ہوتے ہوئے ہاتھوں کو
کاٹ ڈالا جائے گا شانوں سے میرے
جب ثنا کی صوت
پھونک ڈالے گی لبوں کو
آرزو میں آبلوں سی
آنکھیں
نیزے پھوڑ دیں گے اور
گلا بنجر زمیں سا
کچھ نہ دے گا
دست صدا میں
کاٹ ڈالے گا کوئی سر دھڑ سے میرا
تم
سمٹ کر رنگ و بو میں
خاک و خوں میں
صور پھونکوگے
کن کہو گے
کیا تمہارا ہی کہا ہے
جو کتابوں میں لکھا ہے
سچ بتاؤ

شین کاف نظام

نظم

مٹی کی یہ سندر کایا مٹی کی ہی ساری مایا
کنکر پتھر سونا چاندی سولہ آنے مٹی کے
مٹی کے سب چہرے مہرے مٹی کے سب ننگے پاؤں
مٹی کی یہ زلفیں گھنیری سب کے شانے مٹی کے
مٹی کی ننھی سی کیاری مٹی کی مہکی پھلواری
مٹی کے یہ پھول یہ کلیاں سب کے دہانے مٹی کے
مٹی کے سب کھیت ہمارے مٹی کی پگڈنڈی بھی
مٹی کے ہریالے پودے دانے دانے مٹی کے
مٹی کے سب پنگھٹ اپنے مٹی کی سب سکھیاں
مٹی کے چمکیلے گگرے کون یہ جانے مٹی کے
مٹی کی ماں بہنیں اپنی مٹی کے ہیں بچے بالے
جھولا جھولیں سب مٹی کا سب کے ترانے مٹی کے
مٹی کی سی موہنی صورت مٹی کی یہ اپنی گڑیا
مٹی کے سب دلہن دولھا تانے بانے مٹی کے
مٹی کے سب دادی دادا مٹی کے سب نانی نانا
مٹی کے سب آنکھوں والے اندھے کانے سب مٹی کے
مٹی کے سب محل دو محلے مٹی کی چھوٹی سی کٹیا
مٹی کے سب یہ دیے یہ شمعیں سب پروانے مٹی کے
مٹی کی سب گلیاں اپنی مٹی کے سب گاؤں ہمارے
مٹی کے سب شہر بسے ہیں سب ویرانے مٹی کے
مٹی کے سب ساقی و دل بر مٹی کے سب شیشہ و ساغر
مٹی کے سب جام و سبو ہیں سب پیمانے مٹی کے
مٹی کے سب دیوتا دیوی مٹی کے سب گرجا مسجد
کیا سیتا کیا کالی ماتا سب افسانے مٹی کے
مٹی کی میٹھی سی بنسی مٹی کی چنچل رادھا
مٹی سے کرشن کنہیا سب کے گانے مٹی کے
مٹی کا بازار لگا ہے کورے کورے سے برتن
کس کی صراحی کس کا پیالہ سب پیمانے مٹی کے
مٹی کے چولھے پر ناچے سوندھی روٹی مٹی کی
جو کچھ چکی چاک‌ میں پیسے دانے دانے مٹی کے
مٹی کی خوشبو میں بسا ہے مٹی کا یہ ذرہ ذرہ
مٹی کو مٹی ہی پکارے حیلے بہانے مٹی کے
جھن جھن جھن جھن جھن جھن بجتی کوڑی مٹی کی
کھن کھن کھن کھن گیت سناتے آنے آنے مٹی کے
تاک دھنا دھن تاک دھنا دھن بولا طبلہ مٹی کا
ناچو ناچو ناچو ناچو سب رقصانے مٹی کے
دھما دھما دھو دھما دھما دھو دھمکا مٹی کا تانڈو
اس کے پیچھے یاہو یاہو سب مستانے مٹی کے
دھڑ دھڑ دھڑ دھڑ دھڑک رہی ہے ہر ہر چھاتی مٹی کی
سرسر سرسر سرک رہے ہیں سارے شانے مٹی کے
مٹی مٹی مٹی باجے باجے کوچ کا نقارا
گھر چل گھر چل گھر چل گھر چل او من مانے مٹی کے
مٹی مٹی مٹی مٹی مٹی لوری گاتی ہے
سو جا سو جا سو جا سو جا او دیوانے مٹی کے
مٹی کی چادر میں چھپیں گے قبر بنے گی مٹی کی

خلیل الرحمن اعظمی

نظم

ایک لڑکی مجھے اسکیچ کر رہی تھی
لڑکی کی ڈرائنگ اگرچہ اچھی نہیں تھی
لیکن اسے اس قدر منہمک دیکھ کر
میں بہت متائثر ہوا
مجھے خواہش ہوئی
کہ میں اس لڑکی کا بوسہ ہی لے لوں
مگر میرا دھڑ غائب تھا
میری ڈرائنگ اس لڑکی سے کہیں زیادہ بہتر تھی
اور میں اس کی چھاتیاں بنانا بھی چاہتا تھا
جو اس کے کھلے ہوئے گریبان سے جھانک رہی تھیں
لیکن میرا بقیہ جسم وہاں نہیں تھا
اسے شاید جنگلی جانور بھنبھوڑ رہے ہوں
ڈرائنگ میں معمولی دستگاہ رکھنے کے باوجود
لڑکی نے میرے چہرے کی اداسی کو
بھر پور طریقے سے کاغذ پر منتقل کر دیا تھا
لیکن وہ میرے نچلے دھڑ کو
بار بار کوشش کے باوجود
بنانے میں ناکام رہی تھی
مجھے لگا وہ میرے جسم کو
جنگلی جانوروں سے بچانے کی ہر ممکن کوشش کر رہی ہے
کیا اسے معلوم ہے
اگر وہ اس کشمکش میں کامیاب رہی
اور میرا جسم پوری طرح بازیاب کرا سکی
تو میرے ہاتھ
سب سے پہلے
کس چیز کو چھو لینا چاہیں گے

سعید الدین

نظم

میں اپنے خوں کو جواب دیتا ہوں
نچلا دھڑ میرے ساتھ رہنے دو
میرے حصہ ہے میرا میں ہے
کہ اپنے حیواں کی پہلی منزل سے چلنے والا
کہ اپنے انساں کی سیڑھیوں تک پہنچنے والا
مرا ہی جوہر تھا
شہد کا قطرہ قطرہ حیواں تھا
اپنے انساں کی سیڑھیوں سے بھی اور اونچا
وہ منصب نسل جو فرشتوں سے بالاتر ہے
جو میری آمد کا منتظر ہے
مرے ہی جوہر کے تیسرے آخری قدم کا امین ہوگا
مجھے خبر ہے
کہ آنے والوں کو
دشت امکاں میں اک نئے نقش پا کے ابدی وجود کا بھی یقین ہوگا

ستیہ پال آنند

نظم

ہر طرف کترنیں ہیں
وہ گڑیا یہیں تھی مگر اب دکھائی نہیں دے رہی
اور یہ دھاگے، یقیناً وہ گیسو ہیں جن کے لیے میری راتیں کٹیں
روئی دھنکی ہوئی ہے
کہیں خون کا کوئی دھبہ نہیں
اک طرف اس کی پوشاک ادھڑی پڑی ہے
ادھر اس کی آنکھیں، کٹے ابروؤں سے الگ،
خوف و دہشت میں لتھڑی ہوئی
ہر طرف کترنیں ہیں
بدن ریشہ ریشہ ہے
نیچے کا دھڑ چیل کوے اٹھا لے گئے
لبوں کا لہو جم گیا ہے
(لہو، جو یقیناً کسی اور کا ہے)
گلے پر کسی گرگ کے دانت کھینچے ہوئے ہیں
وہ گڑیا نہیں ہے مگر ہر طرف کترنیں ہیں
میں آئندہ گڑیا کی خاطر کپاس اور دھاگے نہیں لاؤں گا
کترنیں لے کے اپنی کسی اور جانب نکل جاؤں گا

تابش کمال

نظم

دم آ نہیں رہا
نفس نفس گھٹن قدم قدم تھکن
جلے ہوئے پر آسماں سے گر رہے ہیں
کباب ہو گئے ہیں کیا
پرکاش کے سوپن دیکھتے پرند
ٹھٹھر رہے ہیں زمہریر مردہ گھر میں دو دراز جسم
لبوں پہ پھیپھڑی بندھی ہوئی
اتر رہا ہے آنکھ میں سفید موتیا
دلوں کے سگ گلی میں بھونکتے ہیں
ڈھونڈھتے ہیں دامن آشنا مسافروں کے
سونگھتے ہیں پریت کی مہک
تھکن سے بیٹھتے ہیں ہار کر
کریدتی ہے خواب کی چڑیل
قبر سے نکالتی ہے داغ داغ دھڑ
کھروچتی ہے رات بھر کبود جلد
یہ خلفشار
جسم کے اجاڑ مرغزار میں کسی پرند کی پکار
درخت ڈھ چکے
سبھی پشو پکھیرو جا چکے
یہ آخری پرندہ کون ہے
ہما یا میں
یہ کون ہڈیاں چبا رہا ہے
دل کا ماس کھا رہا ہے
سینہ ریگزار
غموں کے اندھ کار میں اٹے نگر
یہ دل ہیں یا ہیں ریت میں دھنسے ہوئے کھنڈر

رضی حیدر گیلانی

نظم

کھڑکی کھڑکے کھڑ کھڑ کھڑ
دروازہ بھی دھڑ دھڑ دھڑ
سب نے کیا ہے دھوم مچائی
او ہو ہو کیا آندھی آئی

یاسر فاروق

نظم

سڑک صاف سیدھی ہے اور دھوپ ہے
دوپہر کا سفر
اک اکیلی سڑک پیر تسمہ بپا یوں چلی جا رہی ہے
کہ جیسے چلی ہی نہیں ایستادہ ہے بس
جیسے بے سر کے دھڑ اور کٹے پاؤں کے آدمی
آدمی تم بھی ہو آدمی میں بھی ہوں
اور تم نے بھرم رکھ لیا
تم نے اچھا کیا میری آنکھوں میں جھانکا نہیں
ورنہ ڈر جاتے تم
گہرے پانی کے نیچے بھی پانی تھا اوپر بھی پانی تھا
اور پانی میں اک سرخ
بے جگہ بے وجہ کھل گیا تھا یونہی

نسرین انجم بھٹی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے