Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "nuqsaa.n"

نظم کے متعلقہ نتیجہ "nuqsaa.n"

نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال
نظم

ہاں گاہے گاہے دید کی دولت ہاتھ آئی
یا ایک وہ لذت نام ہے جس کا رسوائی
بس اس کے سوا تو جو بھی ثواب کمایا ہے
سب مایا ہے
اک نام تو باقی رہتا ہے، گر جان نہیں
جب دیکھ لیا اس سودے میں نقصان نہیں
تب شمع پہ دینے جان پتنگا آیا ہے
سب مایا ہے

ابن انشا
نظم

ہاں عمر کا ساتھ نبھانے کے تھے عہد بہت پیمان بہت
وہ جن پہ بھروسہ کرنے میں کچھ سود نہیں نقصان بہت
وہ نار یہ کہہ کر دور ہوئی 'مجبوری ساجن مجبوری'
یہ وحشت سے رنجور ہوئے اور رنجوری سی رنجوری؟
اس روز ہمیں معلوم ہوا اس شخص کا مشکل سمجھانا
اس بستی کے اک کوچے میں اک انشاؔ نام کا دیوانا
گو آگ سے چھاتی جلتی تھی گو آنکھ سے دریا بہتا تھا
ہر ایک سے دکھ نہیں کہتا تھا چپ رہتا تھا غم سہتا تھا
نادان ہیں وہ جو چھیڑتے ہیں اس عالم میں نادانوں کو
اس شخص سے ایک جواب ملا سب اپنوں کو بیگانوں کو
'کچھ اور کہو تو سنتا ہوں اس باب میں کچھ مت فرمانا'
اس بستی کے اک کوچے میں اک انشاؔ نام کا دیوانا
اب آگے کا تحقیق نہیں گو سننے کو ہم سنتے تھے
اس نار کی جو جو باتیں تھیں اس نار کے جو جو قصے تھے
اک شام جو اس کو بلوایا کچھ سمجھایا بیچارے نے
اس رات یہ قصہ پاک کیا کچھ کھا ہی لیا دکھیارے نے
کیا بات ہوئی کس طور ہوئی اخبار سے لوگوں نے جانا
اس بستی کے اک کوچے میں اک انشا نام کا دیوانا

ابن انشا
نظم

ہم خوابوں کے بیوپاری تھے
پر اس میں ہوا نقصان بڑا
کچھ بخت میں ڈھیروں کالک تھی
کچھ اب کے غضب کا کال پڑا
ہم راکھ لیے ہیں جھولی میں
اور سر پہ ہے ساہوکار کھڑا
یاں بوند نہیں ہے ڈیوے میں
وہ باج بیاج کی بات کرے
ہم بانجھ زمین کو تکتے ہیں
وہ ڈھور اناج کی بات کرے
ہم کچھ دن کی مہلت مانگیں
وہ آج ہی آج کی بات کرے

احمد فراز
نظم

ہے دنیا جس کا ناؤں میاں یہ اور طرح کی بستی ہے
جو مہنگوں کو یہ مہنگی ہے اور سستوں کو یہ سستی ہے
یاں ہر دم جھگڑے اٹھتے ہیں ہر آن عدالت بستی ہے
گر مست کرے تو مستی ہے اور پست کرے تو پستی ہے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو اور کسی کا مان رکھے تو اس کو بھی ارمان ملے
جو پان کھلا دے پان ملے جو روٹی دے تو نان ملے
نقصان کرے نقصان ملے احسان کرے احسان ملے
جو جیسا جس کے ساتھ کرے پھر ویسا اس کو آن ملے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو اور کسی کی جاں بخشے تو اس کی بھی حق جان رکھے
جو اور کسی کی آن رکھے تو اس کی بھی حق آن رکھے
جو یاں کا رہنے والا ہے یہ دل میں اپنے جان رکھے
یہ ترت پھرت کا نقشہ ہے اس نقشے کو پہچان رکھے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو پار اتارے اوروں کو اس کی بھی پار اترنی ہے
جو غرق کرے پھر اس کو بھی ڈبکوں ڈبکوں کرنی ہے
شمشیر تبر بندوق سناں اور نشتر تیر نہرنی ہے
یاں جیسی جیسی کرنی ہے پھر ویسی ویسی بھرنی ہے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو اوپر اونچا بول کرے تو اس کا بول بھی بالا ہے
اور دے پٹکے تو اس کو بھی کوئی اور پٹکنے والا ہے
بے ظلم و خطا جس ظالم نے مظلوم ذبح کر ڈالا ہے
اس ظالم کے بھی لوہو کا پھر بہتا ندی نالا ہے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو مصری اور کے منہ میں دے پھر وہ بھی شکر کھاتا ہے
جو اور تئیں اب ٹکر دے پھر وہ بھی ٹکر کھاتا ہے
جو اور کو ڈالے چکر میں پھر وہ بھی چکر کھاتا ہے
جو اور کو ٹھوکر مار چلے پھر وہ بھی ٹھوکر کھاتا ہے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو اور کسی کو ناحق میں کوئی جھوٹی بات لگاتا ہے
اور کوئی غریب اور بیچارہ حق نا حق میں لٹ جاتا ہے
وہ آپ بھی لوٹا جاتا ہے اور لاٹھی پاٹھی کھاتا ہے
جو جیسا جیسا کرتا ہے پھر ویسا ویسا پاتا ہے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
جو اور کی پگڑی لے بھاگے اس کا بھی اور اچکا ہے
جو اور پہ چوکی بٹھلاوے اس پر بھی دھونس دھڑکا ہے
یاں پشتی میں تو پشتی ہے اور دھکے میں یاں دھکا ہے
کیا زور مزے کا جمگھٹ ہے کیا زور یہ بھیڑ بھڑکا ہے
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے
ہے کھٹکا اس کے ہاتھ لگا جو اور کسی کو دے کھٹکا
اور غیب سے جھٹکا کھاتا ہے جو اور کسی کے دے جھٹکا
چیرے کے بیچ میں چیرا ہے اور پٹکے بیچ جو ہے پٹکا
کیا کہیے اور نظیرؔ آگے ہے زور تماشا جھٹ پٹکا
کچھ دیر نہیں اندھیر نہیں انصاف اور عدل پرستی ہے
اس ہاتھ کرو اس ہاتھ ملے یاں سودا دست بہ دستی ہے

نظیر اکبرآبادی
نظم

علم ہے انساں کی تہذیب و تمدن کے لئے
یہ نہیں انسانی قدروں کے تلون کے لئے
علم ہے آپس میں اخلاص و اخوت کے لئے
یہ نہیں اوروں کے نقصان و ہلاکت کے لئے
علم ہے انسان کی بہبود و بقا کے واسطے
یہ نہیں انسانیت کی ابتلا کے واسطے
علم ہے انسان کی خود آگہی کے واسطے
اور انسانوں میں بھائی چارگی کے واسطے
علم سے روشن خیالی آتی ہے انسان میں
پختگی اخلاق میں تو تازگی ایمان میں
علم بڑھتا ہے کوئی اس کو گھٹا سکتا نہیں
یہ وہ دولت ہے جسے کوئی چرا سکتا نہیں
علم کو پھیلائیے اچھے مقاصد کے لئے
تاکہ دنیا کی ترقی کا نشانہ بڑھ سکے
علم چڑھتا آفتاب اور علم ہے باد مراد
علم زندہ باد اس کی آگہی پایندہ باد

فاروق شکیل
نظم

اگر میں یہ نظم نہ لکھتا
تو محبت ناراض ہو جاتی
اور کہتی کہ میں تمہارے ساتھ
سڑک پار نہیں کروں گی
چائے نہیں پیوں گی اور دفتر میں
کام نہیں کروں گی
محبت کی ناراضگی
کسی جنگ میں ہونے والے
نقصان سے زیادہ شدید ہوتی ہے
وہ اور بھی کچھ کہتی
جو مجھے سنائی نہ دیتا
اور میں اس کے نام ایک خط لکھتا
اگر میں وہ خط نہ لکھتا تو میرے دوست ناراض ہو جاتے
اور کہتے ہم اتوار کے دن تمہارے ساتھ
کرکٹ نہیں کھلیں گے
اور ان میں سے ایک
ریلوے لائن پار کرتے ہوئے خودکشی کر لیتا
اور ہمارے لائے ہوئے پھول
اپنی قبر پہ رکھنے سے انکار کر دیتا
اگر میں خط نہ لکھتا
اگر میں نظم نہ لکھتا
تو زندگی اپنا ذائقہ کس زبان پہ محسوس کرتی
خواب کس رسم الخط میں لکھے جاتے
موت کے راستے میں
بچھائی جانے والی بارودی سرنگ
کون سی سر زمین پہ تیار ہوتی
پناہ دینے کے لیے
ہمیشہ کس ملک کی سرحدیں کھلی رہتیں
دھماکے سے پھٹ جانے کے لیے
ہر بار کون سا دل آگے بڑھتا

ذیشان ساحل
نظم

بھلا کوئی ہوش مند مرضی سے
اپنا نقصان کیوں کرے گا

شعیب کیانی
نظم

بولا سگریٹ کہ بشر شکوہ کناں ہیں تیرے
در و دیوار پہ پیکوں کے نشاں ہیں تیرے
جو لپ اسٹک میں ہیں وہ جلوے کہاں ہیں تیرے
خود تو ہلکا ہے پہ نقصان گراں ہیں تیرے
نہ غذا میں نہ دوا میں ہے تو پھر کون ہے تو
تو ہلاکو ہے کہ تیمور کہ فرعون ہے تو

سید محمد جعفری
نظم

کبھی ایسا بھی ہوتا ہے
میں انجانے پتے پر ایک خط لکھ کر
سپرد ڈاک کرتی ہوں
جو دل میں معاملات دل ہیں سب
صد چاک کرتی ہوں
میں لکھ دیتی ہوں ان کے نام بھی جن سے شکایت ہے
بتا دیتی ہوں کس کس سے مجھے کتنی محبت ہے
تعارف ان کا بھی جن سے بہت نقصان پہنچا ہے
جنہیں پانے کو صحرا تک دل ویران پہنچا ہے
رقم کرتی ہوں کس کا دل دکھا ہے واقعی مجھ سے
بیاں کرتی ہوں کیوں روٹھی رہی ہے زندگی مجھ سے
غلطیاں ہیں جو میری سب سر اوراق رکھتی ہوں
اور ہر صفحے پہ اپنے دستخط مصداق رکھتی ہوں
مگر ایسا بھی ہوتا ہے
کوئی دستک سی ہوتی ہے
نہ جانے درمیان شب یہاں پر کون آتا ہے
مری دہلیز پر آ کر مرا خط ڈال جاتا ہے

اسنی بدر
نظم

جو لوگ ہوا کے ساتھی ہیں وہ اپنے خدا کے باغی ہیں
اس جرم بغاوت سے بڑھ کر ایمان کا نقصاں کیا ہوگا

ماہر القادری
نظم

میرے گاؤں میں آئی ریل
بچو نہیں یہ کوئی کھیل
بات ہے میرے بچپن کی
شاید انیس سو پچپن کی
میرے دل کی الجھن کی
گاؤں میں کیسے آئی ریل
بچو نہیں یہ کوئی کھیل
میرے دادا کہتے تھے
کلکتہ جو رہتے تھے
گاؤں والے ہنستے تھے
وہاں سڑک پر چلی ریل
بچو نہیں یہ کوئی کھیل
کلکتہ جانا تھا مشکل
ریل تو ملتی چل کر پیدل
تیس میل پر تھا جو سگنل
مشکل کو سب جاتے جھیل
بچو نہیں یہ کوئی کھیل
بڑے لوگ جب جانا سوچتے
رات میں بیل گاڑی کو جوتتے
راستے میں جب ڈاکو روکتے
چھوڑ کے گاڑی بھاگتے بیل
بچو نہیں یہ کوئی کھیل
آزادی نے داد مٹایا
گاؤں کو شہروں سے ملایا
امیدوں کا پھول کھلایا
سدا ہری رہے یہ بیل
بچو نہیں یہ کوئی کھیل
دلی میں ان شن ہوئے
ریل کے تب نقشے بنے
بابو جی جب بن گئے
مرکز میں وزیر ریل
بچو نہیں یہ کوئی کھیل
شہر سے سب کچھ ریل سے لاتے
ڈبوں کو نقصاں پہنچاتے
چوری کرتے پکڑے جاتے
جو پکڑائے جاتے جیل
بچو نہیں یہ کوئی کھیل
مشکل دن سب کٹ جاتے ہیں
لیکن وہ دن یاد آتے ہیں
اب تو سب کالج جاتے ہیں
پکڑ کے بامبے میل
بچو نہیں یہ کوئی کھیل

ابواللیث جاوید
نظم

سوچتا ہوں کہ مرے ملک کے لاکھوں بچے
روز آپس میں اسی طرح لڑا کرتے ہیں
فائدہ اس سے کسی کو بھی نہیں ہوتا ہے
کچھ نہ کچھ اپنا ہی نقصان کیا کرتے ہیں

کیف مرادآبادی
نظم

اب ان بوسیدہ کاغذ کے پلندوں کی
ضرورت کیا بچی ہے
ان لفافوں پر پتے سارے
پرانے ہو چکے ہیں
ان کو رکھنا کس لیے
بے رنگ تحریروں میں ڈوبے
ان خطوں کی کیوں حفاظت چاہئے
یہ پرانی فائلیں ضائع اگر ہو جائیں
تو نقصان کیا ہے
ہاتھ کیوں رکتے ہیں
ان کاغذ کے ٹکڑوں کو جلانے میں
اب ان کی معنویت کیا بچی ہے
اتنے ماہ و سال کے بعد
اس زمانے میں
مہک کیسی ہے ان میں
یا جو خوشبو سی لپکتی ہے
تو کیا ہے یہ رتوں کا خرخشہ اب کوئی رت ہوگی کہ جس نے
کاغذوں پر چھوڑ رکھا ہے اثر
برسوں گزرتے ہیں
نہیں، کچھ بھی نہیں یاد آتا ہے
لیکن یہ میرے ہاتھ ان کو چھوتے ہی
کیوں کانپنے لگتے ہیں
پہلے بھی تو بوسیدہ بہت کاغذ جلائے ہیں
نہ جانے ان پرانی فائلوں پر
کون سے گزرے ہوئے
لمحوں کے سائے ہیں

عین تابش
نظم

جب بھی جوتے خریدو
تو یہ دھیان رکھنا
بہت نرم ہوں
سخت چمڑا نہ ہو
اور بھاری نہ ہوں
عین ممکن ہے اک دن تمہیں اپنے لوگوں کے سینے پہ چلنا پڑے
ان کی روحیں کچلنا پڑیں ان کو تکلیف اتنی نہ ہو ان میں نفرت کے طوفان پلنے لگیں
زہر منہ سے اگلنے لگیں
جوتے کالے نہ ہوں
ورنہ ان کی سیاہی دل و جاں پہ جم جائے گی اور باطن میں کچھ خیر ہوگی
تو مر جائے گی
ان کی ایڑی میں نرمی ہو اتنی
اگر پاؤں دھرتی پہ مارو تو ان کی دھمک سے گو ذہنی خلیوں کو نقصان نہ ہو اور ہڈیاں نہ ہو
تسمے والے بھی جوتے نہ ہوں
ان سے سازش کے پھندے نہ بننے لگو اور پھانسی کی خاطر کہیں
اپنے محسن نہ چننے لگو
جب بھی جوتے خریدو

توقیر عباس
نظم

نقصان اٹھا کر بھی جو سچ بول رہا ہے
وہ اپنے لیے خلد کا در کھول رہا ہے
کیا منہ وہ قیامت میں دکھائے گا خدا کو
دکان پہ جو بیٹھ کے کم تول رہا ہے
جانچا گیا پرکھا گیا قرآن کا ہر بول
ہر عہد میں ہر ملک میں انمول رہا ہے
سنتا ہوں حدیثیں تو مجھے لگتا ہے ایسا
جیسے یہ کوئی کانوں میں رس گھول رہا ہے
یہ سن ہوا مائلؔ کا مگر باتیں ہیں ایسی
جیسے کوئی اک بچہ ہے جو بول رہا ہے

مائل خیرآبادی
نظم

تو نے آنے نہ دیا دنیا میں
میں ترے جسم کا ہی حصہ تھی
اس طرح کیوں مٹا دیا مجھ کو
میں محبت کا تیرے قصہ تھی
مجھ کو حصوں میں بانٹ ڈالا تھا
کتنے ٹکڑوں میں کاٹ ڈالا تھا
میرے ہونے سے ہوتا کیا نقصان
نوچ لی کیوں یہ تم نے ننھی جان
میرے ہونے سے کیا کمی ہوتی
میں ترے گھر کی لکشمی ہوتی
کچھ مقدر نہیں تھا کیا میرا
کیا مجھے حق نہیں تھا جینے کا
بانٹ لیتی میں تیری ہر مشکل
تیری آسان زندگی ہوتی
ہاتھ بنتی کبھی میں پاؤں ترے
میں ترے گھر کی روشنی ہوتی
بوجھ کیوں بیٹیاں سمجھتے ہیں
ہائے یہ دنیا والے کیسے ہیں
بیٹیاں ہی لگیں گی جب بھاری
ختم پھر کائنات ہے ساری

سیا سچدیو
نظم

کھیت میں چند مرغیاں ہم سن
چگ رہی تھیں خوشی خوشی اک دن
اور دو مرغے ایسے نظر آئے
لڑ رہے تھے جو ایک بھٹے پر
اتنے میں اک تیسرا مرغا
آ کے چپکے سے بھٹا لے بھاگا
رہ گئے دونوں ہو کے وہ خاموش
اور دونوں کو آیا اب یہ ہوش
ہم نہ لڑتے تو کرتے کیوں نقصان
سچ تو یہ ہے کہ ہیں بڑے نادان
اب جو پچھتائے فائدہ کیا ہے
پھوٹ کا بس یہی نتیجہ ہے
اس سے معلوم ہو گیا لڑکو
دو لڑیں تیسرے کا اچھا ہو
مل کے رہنے سے کام ہوتا ہے
یہی دستور کل جہاں کا ہے
اور لڑتے رہے اگر باہم
پا نہیں سکتے فائدہ کچھ ہم
یاد رکھو یہ بات جوہرؔ کی
یہ اڑاتا نہیں ہے بے پر کی

بنے میاں جوہر
نظم

گدھوں کے ہرکارے نے
راجہ کو بتایا
کہ دور کی ایک بستی
جلد ہی ان کی
خوراک بننے والی ہے
یہ سن کر راجہ اور اس کے ساتھیوں نے
اپنے محفوظ ٹھکانے چھوڑے
اور اس بستی کی جانب روانہ ہوئے
بستی کے چوکیدار نے
راجہ اور اس کے ساتھی گدھوں کو
اس شرط پر بستی میں اترنے کی اجازت دی
کہ وہ چوکیدار کو نقصان نہیں پہنچائیں گے
راجہ گدھ نے یہ شرط منظور کر لی
اور ساتھ ہی گدھوں کو حکم دیا
کہ اس سے پہلے
کہ وہ نیم جان بستی ہوش میں آنے لگے
سب اپنا اپنا پیٹ بھر لیں
اور محفوظ ٹھکانوں کی طرف لوٹ جائیں
لیکن اس مرتبہ
راجہ گدھ اور اس کے ساتھیوں نے
عجیب منظر دیکھا
زمین کے کیڑے مکوڑے
گدھوں کے آنے کا شور سن کر
واپس اپنے بلوں میں نہیں گئے
بلکہ انہوں نے
ایک حصار بنا لیا
اور گدھوں کی چیخ و پکار کے باوجود
وہاں سے بھاگنے کی بجائے
ان کے پنجوں سے لپٹ لپٹ کر
ان کے منہ میں آنے لگے
راجہ گدھ اور اس کے ساتھیوں کے لیے
یہ ایک بالکل نیا تجربہ تھا
گدھ جیسے ہی
زمین کی طرف آنے کی کوشش کرتے
بہت سے کیڑے مکوڑے اڑ کر
ان کی آنکھوں میں گھس جاتے
اور انہیں اندھا کر دیتے
گدھ اپنا توازن برقرار نہ رکھ پاتے
اور زمین پر آ گرتے
جیسے ہی گدھ زمین پر گرتے
بہت سے کیڑے مکوڑے ان پر سوار ہو کر
ان کے پروں کو ناکارہ بنا دیتے
یوں زمین پر گدھوں کے ڈھیر لگ گئے
یہ حال دیکھ کر
راجہ نے اپنے ساتھیوں کو حکم دیا
کہ جیسے تیسے جان بچا کر بستی سے نکل جائیں
اور خود سب سے پہلے بھاگ کھڑا ہوا
یہ دیکھ کر ایک کیڑے نے سر اٹھا کر پوچھا
اب کیا ہوگا
بڑی بی نے ورق گردانی کرتے ہوئے کہا
یہ تو صرف گدھ ہیں
تم اگر اپنے باپ کی بات مان لو
تو ہاتھی کو زمین پر گرا سکتے ہو

یشب تمنا
نظم

مجھ کو گر انتخاب کرنا ہو
میں اماوس کی رات کو چن لوں
چاند کی غیر حاضری میں یہ بات
صاف شاید زیادہ ہو ہم پہ
اپنا نقصان کر لیا ہے بہت
ہم نے ایجاد روشنی کر کے

سوپنل تیواری
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے