Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "مس"

Nazm MATCHES FOR "مس"

Nazm

mauzu-e-suKHan

gul hu.ii jaatii hai afsurda sulagtii hu.ii shaam
Dhul ke niklegii abhii chashma-e-mahtaab se raat
aur mushtaaq nigaaho.n kii sunii jaa.egii
aur un haatho.n se mas ho.nge ye tarse hu.e haat
un kaa aa.nchal hai ki ruKHsaar ki pairaahan hai
kuchh to hai jis se hu.ii jaatii hai chilman ra.ngii.n
jaane us zulf kii mauhuum ghanii chhaa.nv me.n
TimTimaataa hai vo aaveza abhii tak ki nahii.n
aaj phir husn-e-dil-aaraa kii vahii dhaj hogii
vahii KHvaabiida sii aa.nkhe.n vahii kaajal kii lakiir
ra.ng-e-rukHsaar pe halkaa saa vo Gaaze kaa Gubaar
sandalii haath pe dhu.ndlii sii hinaa kii tahriir
apne afkaar kii ash.aar kii duniyaa hai yahii
jaan-e-mazmuu.n hai yahii shaahid-e-ma.anii hai yahii
aaj tak surKH o siyah sadiyo.n ke saa.e ke tale
aadam o havvaa kii aulaad pe kyaa guzrii hai?
maut aur ziist kii rozaana saf-aaraa.ii me.n
ham pe kyaa guzregii ajdaad pe kyaa guzrii hai?
in damakte hu.e shahro.n kii faraavaa.n maKHluuq
kyuu.n faqat marne kii hasrat me.n jiyaa kartii hai
ye hasii.n khet phaTaa pa.Dtaa hai jauban jin kaa!
kis liye in me.n faqat bhuuk ugaa kartii hai
ye har ik samt pur-asraar ka.Dii diivaare.n
jal-bujhe jin me.n hazaaro.n kii javaanii ke charaaG
ye har ik gaam pe un KHvaabo.n kii maqtal-gaahe.n
jin ke partav se charaaGaa.n hai.n hazaaro.n ke dimaaG
ye bhii hai.n aise ka.ii aur bhii mazmuu.n ho.nge
lekin us shoKH ke aahista se khulte hu.e ho.nT
haa.e us jism ke kambaKHt dil-aavez KHutuut
aap hii kahiye kahii.n aise bhii afsuu.n ho.nge

Faiz Ahmad Faiz
Nazm

online aashiq

dil kaa paiGaam jab email se mil jaataa hai
mel har chauk pe female se mil jaataa hai

Khalid Irfan
Nazm

kisan

jis ke chhuu jaate hii misl-e-naazniin-e-mah-jabii.n
karvaTo.n par karvaTe.n letii hai lailaa-e-zamii.n

Josh Malihabadi
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

aag ke pas

piir-e-vaamaa.nda ko.ii
coat pe mehnat kii siyaahii ke nishaa.n
naujavaa.n beTe kii gardan kii chamak dekhtaa huu.n
ik raqaabat kii siyah lahr bahut tez
mire siina-e-sozaa.n se guzar jaatii hai
jis tarah taaq pe rakkhe hu.e gul-daa.n kii
mas-o-siim ke kaaso.n kii chamak
aur guluu uljhe hu.e taaro.n se bhar jaataa hai
ko.ele aag me.n jalte hu.e
kin yaado.n kii kis raat me.n
jal jaate hai.n
kyaa inhii kaano.n kii yaado.n me.n jahaa.n
saalhaa-saal ye aasuuda rahe
unhii be-aab daraKHto.n ke vo ja.ngal
jinhe.n piiraana-sarii baar hu.ii jaatii thii
ko.ele laakho.n baras daur ke KHvaabo.n me.n ulajh jaate hai.n

Noon Meem Rashid
Nazm

mear

ab to mas kartii hai jab aise ezaar-e-gul se
aisii aavaaz se guu.nj uThtii hai gulshan kii fazaa
jaise jalte hu.e jangal pe baras jaa.e ghaTaa

Ahmad Nadeem Qasmi
Nazm

aasifuddaula ka imambaada lucknow

aasafuddaula-e-marhuum kii ta.amiir-e-kuhan
jis kii san.at kaa nahii.n safha-e-hastii pe javaab
dekh sayyaah use raat ke sannaaTe me.n
mu.nh se apne mah-e-kaamil ne jab ulTii ho naqaab
dar-o-diivaar nazar aate hai.n kyaa saaf-o-subuk
sahar kartii hai nigaaho.n pe ziyaa-e-mahtaab
yahii hotaa hai gumaa.n KHaak se mas is ko nahii.n
hai sambhaale hu.e daaman me.n havaa-e-shaadaab
yak-ba-yak diida-e-hairaa.n ko ye shak hotaa hai
Dhal ke saa.nche me.n zamii.n par utar aayaa hai sahaab
be-KHudii kahtii hai aayaa ye fazaa me.n kyuu.n kar
kisii ustaad musavvir kaa hai ye jalva-e-KHvaab
ik ajab manzar-e-dil-giir nazar aataa hai
duur se aalam-e-tasviir nazar aataa hai

Chakbast Braj Narayan
Nazm

teri yaad

hafta pahle jab teraa
phone aayaa aur tuu ne kahaa
jaan-e-jaanaa.n i-miss-you
tab se jaane kyuu.n dil me.n
ek ajab sii halchal hai
dil ke dariyaa me.n jaise
kisii ne patthar phe.nk diyaa
mujh ko aisaa lagtaa hai
patthar terii yaad kaa thaa
jis ke girte hii paanii
bebas ho kar uchhal gayaa
aa.nkh kaToraa bhar aayaa
nahii.n yaqii.n to dekh aa kar
aaj bhii merii aa.nkho.n se
aksar paanii bahtaa hai
tum se kahtaa rahtaa hai
jaanaa.n
i-miss-you too

Imran Shanawar
Nazm

mohabbat

mohabbat kaifiyat hai
visaal aur hijr se lafzo.n ke daaman me.n ye puurii aa nahii.n saktii
mai.n kahtaa huu.n visaal
aur ho.nT bhii ik duusre se mas nahii.n hote
mai.n kitnaa hijr likhuu.n lafz to jo.De hii jaate hai.n
jo tujh me.n aur mujh me.n hai
vo duurii aa nahii.n saktii

Salman Haider
Nazm

hum na sahi

ham na sahii tum na sahii
magar ab bhii ko.ii la.Dkaa
kisii la.Dkii ke ghar ke saamne
chilchilaatii dhuup me.n kha.Daa hogaa
kisii bahaane
tum na sahii mai.n na sahii
magar ab bhii ko.ii la.Dkii
ghar kii khi.Dkii tak aane me.n
jhijaktii hogii
ki is paagal la.Dke kii
hausla-afzaa.ii na ho jaa.e
mai.n na sahii tum na sahii
magar vo la.Dkaa ab bhii
miss kartaa hogaa
vo chilchilaatii dhuup
aur vo la.Dkii ab bhii
miss kartii hogii
vo bebaak hausla

Subodh Lal Saqi
Nazm

gharib

us kii naazuk behis Tho.Dii ko apnii u.nglii kii sunahrii por se mas to kar aur
us se itnaa to puuchh achchhii billuu tuu kyo.n chup hai
aur jab vo mu.nh pher ke apnii aa.nkhe.n apne hii chehre pe jhukaa le
tuu hii ba.Dh kar us ke maathe ko apne ho.nTo.n se lagaa le haa.n aise hii

Majeed Amjad
Nazm

sawari unT ki hai

vahii siilan-zada uutaaq kaa gosha
jahaa.n mai.n ek shab us ko
larazte sansanaate zahr vaale
chobii tiiro.n kii ghanii baarish me.n
be-bas aur akelaa chho.D aayaa thaa
mujhe sab yaad hai qissa
baras kar abr bilkul tham chukaa thaa
aur KHalaa me.n chaa.nd
yuu.n lagtaa thaa jaise
taKHt par nau-umr shahzaada ho ko.ii
yuu.n havaa chehre ko mas kar ke guzartii thii
ki jaise reshmii.n kap.Daa ho ko.ii
apne ThanDe aur giile KHol ke andar
galii so.ii hu.ii thii
dam-ba-KHud saare makaa.n
aaise nazar aate the
jaise narm aur baariik kaaGaz ke bane ho.n
mom ke tarshe hu.e ho.n
ik ba.Dii tasviir me.n
jaise azal se iistaada ho.n!

Rafiq Sandelvi
Nazm

KHwaja-sara

chhail chhabiilaa
Thumak Thumak kar beach sa.Dak me.n
aatii jaatii har gaa.Dii se
bhiik kii puu.njii uchak rahaa hai
fiqre kaste collage ke nau-KHez javaano.n se hans hans kar
baate.n kartaa maTak rahaa hai
chauraahe kaa ishaara be-sharmii se ghuur rahaa hai
laal praanda lapak lapak kar
naqlii kuulho.n ko mas kartaa laTak rahaa hai
ja.alii Dhalvaano.n se vo ra.ngiin dupaTTa
ek taraf ko Dhalak rahaa hai
kaalii gaa.Dii vaalaa kitnii be-zaarii se
haath ko us ke jhaTak rahaa hai
pairo.n me.n ghu.ngruu chhankaataa
mardaana chehre par mal kar jhuuT kaa Gaaza
nisvaanii ra.ngo.n me.n luth.Daa ek hayuulaa
jism aur jins ke ghanchakkar me.n bhaTak rahaa hai

Mohammad Owais Malik
Nazm

aamad

kabhii KHushk mausam me.n purvaa jo chaltii
to banjar pahaa.Do.n ghane gard-aaluud shahro.n se katraa ke
ham tak pahu.nchtii
hame.n tund yaado.n ke girdaab mai.n
Duubte aur ubharte hu.e dekh kar ham se kahtii
mai.n un sab ke jismo.n se mas ho ke aa.ii huu.n
un ke pasiine kii KHushbuu ko
apne libaade me.n bhar kar
hathelii pe rakh kar mai.n laa.ii huu.n
kabhii surKH suuraj nikaltaa
to ham us se kahte
tumhaarii dahaktii hu.ii aa.nkh kaa raaz kyaa hai
vo kahtaa
mai.n in sab kii aa.nkho.n ke Gurfo.n se
ye saarii ujlii tamaazat churaataa rahaa huu.n
mai.n daryuuza-gar un charaaGo.n se KHud ko jalaataa rahaa huu.n
unhe.n ham ne Dhuu.nDaa
kabhii sabz shabnam ke chhii.nTo.n me.n taaro.n kii rotii hu.ii anjuman mai.n
kabhii sub.h kii qatl-gaah shab ke ghaayal badan me.n
unhe.n ham ne aavaaz dii kuu-ba-kuu
Gam me.n Duubii hu.ii bastiyo.n se aTe KHaak-daan-e-vatan me.n
magar vo nahii.n the kahii.n bhii nahii.n the
kahii.n un ke qadmo.n kii halkii sii aavaaz tak bhii nahii.n thii
phir ik roz dhartii kaa mausam jo badlaa
to baadal ne shaano.n se ham ko hilaa kar jagaayaa
kahaa un ke aane kaa paiGaam aayaa
chahakte parindo.n ne shaaKHo.n se u.D kar
havaa.o.n me.n ik daa.era saa banaayaa
kahaa un ke aane kaa paiGaam aayaa
dhanak saat ra.ngo.n me.n lipTii hu.ii
ik kamaa.n ban ke zaahir hu.ii
ham se kahne lagii apnii aa.nkho.n se dekhaa hai mai.n ne unhe.n
tez qadmo.n se aate hu.e
shaam ha.nsne lagii
us kii aa.nkho.n me.n KHushiyo.n ke aa.nsuu the
aariz pe shabnam
nagiino.n kii suurat chamakne lagii thii

Wazir Agha
Nazm

jangal ke raja ki shadi

jangal me.n mangal karvaayaa ik baaraat sajaa.ii
jangal ke raaja ne apnii shaadii KHuub rachaa.ii
me.nDak-jii ne band bajaayaa bhaaluu jii ne Dhol
giida.D saahab ne bhii gaa.e miiThe miiThe bol
bharii sabhaa me.n bandar jii ne bandrii ko nachvaayaa
ban kar shaahii bhaaT gad.he ne Dhe.nchuu.n raag sunaayaa
bane mahaashay bagule panDit kavve saahab naa.ii
jhii.ngar-jii ne biin sa.nbhaalii machchhar ne shahnaa.ii
jangal ke rahne vaalo.n ne mil kar dhuum machaa.ii
jangal ke raaja ne apnii shaadii KHuub rachaa.ii
miss billii ye bolii.n english biscuit laa.o myaa.un
mister kutte chiiKHe bhau.n bhau.n ruusii khaanaa khaa.uu.n
loma.D bole moTe moTe do murGe pakvaa.o
chuuhaa bolaa kaabul ke ba.Dhiyaa chilGoze laa.o
pidde saahab ne ma.ngvaa.e amrikan pakvaan
piddii bolii.n barfii laa.o ho made in japan
duur desh me.n bhej parinde har ik chiiz ma.ngaa.ii
jangal ke raaja ne apnii shaadii KHuub rachaa.ii

Farhat Qamar
Nazm

shab-gardon ke liye ek nazm

raat hai burda-farosh
us ke bahkaa.e hu.e hosh me.n kab aa.e hai.n
apne aa.nchal ke sitaare bhii jo niilaam kare
us kii baa.nho.n me.n jo bahkaa hai
vo sambhlaa hii nahii.n
us kii baato.n me.n jo aayaa
vo kabhii soyaa nahii.n
jis ke paikar ko havaa ne bhii kabhii mas na kiyaa
raat purkaar
fusuu.n-zaar
aur aashufta-mizaaj
jis kii aa.ankho.n ko kisii KHvaab ne bosa na diyaa
aisii dilkash ki misaal us kii muhaal
jis se ham-KHvaab ho be-KHvaabii muqaddar us kaa
jis ke ham-raah chale KHud ko bhulaa detaa hai
us ke bahkaa.e hu.e
'haafiz' o 'ruumii' o 'tabrez' hu.e

Faheem Shanas Kazmi
Nazm

KHidmat-e-adab

jab tak adab-baraa-e-adab kaa rahaa KHayaal
adbaar-o-muflisii se rahe ham shikasta-haal
saa.e kii tarah saath nahuusat lagii rahii
ik rog ban ke jaan se usrat lagii rahii
go shaa.erii kaa rang nikhartaa chalaa gayaa
shiiraaza-e-ma.aash bikhartaa chalaa gayaa
lekin KHudaa bhalaa kare ik mehrbaan kaa
jin ko adab-baraa-e-shikam kaa hai tajraba
mausuuf ne bataa.ii hame.n vo pate kii baat
ab din hai roz-e-iid to shab hai shab-e-baraat
all india mushaa.era majlis ke naam se
kholaa hai ik idaara-e-nau dhuum-dhaam se
karte hai.n shaa.erii ke evaz ab mushaa.era
is rozgaar se hai hame.n KHuub faa.eda
har tiin chaar maah ke vaqfe pe be-KHalal
apne programme pe karte hai.n ham amal
ya.anii mushaa.ere kaa chalaate hai.n kaarobaar
chhapvaa ke roz-naamo.n me.n jhuuTaa ye ishtihaar
'josh'-o-'firaaq'-o-'saahir' o 'parvez' shaahidii
'faiz'-o-'KHaliil'-o-'jazbii' o 'maKHduum'-o-'ja.afarii'
kursii-o-arsh-o-lauh-o-qalam sab hii aa.e.nge
taaza kalaam apnii zabaa.n se sunaa.e.nge
is ishtihaar me.n vo kashish hai ki ahl-e-zauq
lete hai.n daaKHle kaa ticket dau.D kar ba-shauq
circus me.n jis tarah se ho KHilqat kaa izhdihaam
yuu.nhii mushaa.ere me.n pahu.nchte hai.n KHaas-o-aam
sab log baiTh jaate hai.n farsh-e-zamii.n pe jab
mic pe jaa ke karte hai.n elaan ham ye tab
afsos hai ki aa na sake 'josh' aur 'firaaq'
ye moscow ravaana hu.e vo ga.e iraq
'jazbii' ko iKHtilaaj hai 'parvez' hai.n aliil
gaa.Dii zaraa sii chuuk se miss kar ga.e 'KHaliil'
bhejii hai 'faiz'-o-'saahir'-o-'maKHduum' ne KHabar
seat un ko mil sakii na havaa.ii jahaaz par
go ye KHabar dilo.n ko guzartii hai naagavaar
honaa hai jalsa-gaah me.n tho.Daa saa intishaar
le kar magar zehaanat-e-fitrii se kaam ham
dam-bhar me.n saama.iin ko karte hai.n raam ham
Dais pe tuk-farosho.n kaa rahtaa hai ik hujuum
filmii dhuno.n me.n gaane kii jin ke ba.Dii hai dhuum
jo KHud ticket KHariid ke aate hai.n bazm me.n
ham un se apnaa kaam chalaate hai.n bazm me.n
le le ke gaTkarii jo sunaate hai.n vo kalaam
u.Dte hai.n vaah vaah ke na.aro.n se saqf-o-baam
bazm-e-nashaat bantaa hai saaraa mushaa.era
hotaa hai kaamyaab hamaaraa mushaa.era
KHush-KHush gharo.n ko jaate hai.n huzzaar ik taraf
noTo.n kaa ham lagaate hai.n ambaar ik taraf
ye KHidmat-e-adab kaa tariiqa hai laa-javaab
pesha ye vo hai jis me.n munaafa hai be-hisaab

Raza Naqvi Vahi
Nazm

la-yaKHul

1
mirii KHalvat ke haale me.n tumhaaraa ye tilsmaatii badan
ik nuur me.n Duubaa hu.aa bahtaa hu.aa dhaaraa
ye madh-maataa ye KHud ko sar-ba-sar bhuulaa hu.aa
behad niraalaa an-chhu.aa saayaa
havaa ke narm so.e so.e lahje kii tarah mas ho ke
merii ruuh me.n aatish kaa bha.Dkaataa hu.aa saayaa
ye saayaa raushnii hii raushnii hai sar se paa.nv tak
ye saayaa zindagii hii zindagii hai sar se paa.nv tak
ye vasl-e-taam kaa lamha vo lamha hai
ki jab KHud vaqt ruk jaataa hai
jaise shaam ko dariyaa bhii ruk kar KHud faraamoshii ke gahre saa.ns lete hai.n

Tahseen Firaqi
Nazm

dawam

khile hu.e gulaab ruKH
hare bhare javaan tan
daraaz pe.D vaqt kii zamiin par kha.De hu.e
parkaash kii talaash me.n ummiid sii.nchte hu.e
lahak chahak fazaa.o.n me.n
damak ruvaa.n ruvaa.n
dil aur jigar tapaa.n tapaa.n
dahaktii shoKH hasrate.n
har ek mas gumaan
gudgudii me.n mail kii umang
ho.nT ke nishaan
aan aan gardano.n pe nuur ke
KHushbu.e.n nafas nafas
zulaal-e-KHizr kii miThaas
davaam thaa qadam qadam
kahaa.n ga.e

Razi Haider Gilani
Nazm

kabhi bhi lauT na paun

akele aur fursat me.n
kabhii sab chho.D jaa.e.n to
bas anjaane me.n tum yuu.nhii mujhe miss call de denaa
mujhe bas baat karnaa hai
mirii jaa.n baat aisii
jo kabhii na KHatm ho paa.e
ye KHvaahish hai
kisii din bas tirii aavaaz me.n ghul kar
mohabbat me.n kahii.n dhul kar
hayaat-e-jaavedaa.n paa.uu.n
hisaar-e-‘ishq me.n tere
kuchh is tarh bhaTak jaa.uu.n
kabhii bhii lauT na paa.uu.n
kabhii bhii lauT na paa.uu.n

Nadeem Najid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now