Search result for ".hjdi" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".hjdi"

Nazm MATCHES FOR ".hjdi"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal

Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi

Nazm

abhi hum KHub-surat hain

abhii ham KHuub-suurat hai.n
hamaare jism auraaq-e-KHizaanii ho ga.e hai.n
aur ridaa-e-zaKHm se aaraasta hai.n
phir bhii dekho to
hamaarii KHush-numaa.ii par ko.ii harf
aur kashiida-qaamtii me.n KHam nahii.n aayaa
hamaare ho.nT zahriilii ruto.n se kaasnii hai.n
aur chehre ratjago.n kii sho.alagii se
aabnuusii ho chuke hai.n
aur zaKHmii KHvaab
naadiida jaziiro.n kii zamii.n par
is tarah bikhre pa.De hai.n
jis tarah tuufaa.n-zada kashtii ke Tuk.Do.n ko
samundar saahilo.n par phe.nk detaa hai
lahuu kii baarishe.n
yaa KHud-kushii kii KHvaahishe.n thii.n
is aziyyat ke safar me.n
kaun saa mausam nahii.n aayaa
magar aa.nkho.n me.n nam
lahje me.n sam
ho.nTo.n pe ko.ii naGma-e-maatam nahii.n aayaa
abhii tak dil hamaare
KHanda-e-tiflaa.n kii suurat be-kuduurat hai.n
abhii ham KHuub-suurat hai.n
zamaane ho ga.e
ham kuu-e-jaanaa.n chho.D aa.e the
magar ab bhii
bahut se aashnaa naa-aashnaa hamdam
aur un kii yaad ke maanuus qaasid
aur un kii chaahato.n ke hijr-naame
duur deso.n se hamaarii or aate hai.n
gulaabii mausamo.n kii dhuup
jab naurasta sabze par qadam rakhtii hu.ii
ma.muura-e-tan me.n dar aatii hai
tuu barfaanii badan me.n
juu-e-KHuu.n aahistagii se gungunaatii hai
udaasii kaa parinda
chup ke jangal me.n
sar-e-shaaKH-e-nihaal-e-Gam chahaktaa hai
ko.ii bhuulaa hu.aa bisraa hu.aa dukh
aabla bin kar Tapaktaa hai
to yuu.n lagtaa hai
jaise harf apne
zinda aavaazo.n kii suurat hai.n
abhii ham KHuub-suurat hai.n
hamaarii KHush-numaa.ii harf-e-haq kii ruu-numaa.ii hai
usii KHaatir to ham aashufta-jaa.n
ushshaaq kii yaado.n me.n rahte hai.n
ki jo un par guzartii hai vo kahte hai.n
hamaarii harf-saazii
ab bhii mahbuub-e-jahaa.n hai
shaa.erii shoriid-gaan-e-ishq ke vird-e-zabaa.n hai
aur gulaabo.n kii tarah shaadaa.n chehre
la.al o marjaa.n kii tarah lab
sandalii.n haatho.n se
chaahat aur aqiidat kii bayaazo.n par
hamaare naam likhte hai.n
sabhii dard-aashnaa
iisaar mashrab
ham-nafas ahl-e-qafas
jab maqtalo.n kii samt jaate hai.n
hamaare bait gaate hai.n
abhii tak naaz karte hai.n sab ahl-e-qaafila
apne hudii-KHvaano.n par aashufta-kalaamo.n par
abhii ham dastaKHat karte hai.n apne qatl-naamo.n par
abhii ham aasmaano.n kii amaanat
aur zamiino.n kii zaruurat hai.n
abhii ham KHuub-suurat hai.n

Ahmad Faraz

Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz

Nazm

alwida

la.Dakpan kii rafiiq ai ham-navaa-e-naGma-e-tiflii
hamaarii gyaarah saala zindagii kii dil-nashii.n vaadii
hamaare zehn kii taKH.iil kii ehsaas kii saathii
hamaare zauq kii rahbar hamaarii aql kii haadii

Abdul Ahad Saaz

Nazm

mazdur ki bansuri

mazduur hai.n ham, mazduur hai.n ham, majbuur the ham, majbuur hai.n ham
insaaniyat ke siine me.n ristaa hu.aa ik naasuur hai.n ham
daulat kii aa.nkho.n kaa surma bantaa hai hamaarii haDDii se
mandir ke diye bhii jalte hai.n mazduur kii pighlii charbii se
ham se baazaar kii raunaq hai, ham se chehro.n kii laalii hai
jaltaa hai hamaare dil kaa diyaa duniyaa kii sabhaa ujyaalii hai
daulat kii sevaa karte hai.n Thukraa.e hu.e ham daulat ke
mazduur hai.n ham, mazduur hai.n ham sautele beTe qismat ke
sone kii chaTaa.ii tak bhii nahii.n, ham zaat ke itne heTe hai.n
ye sejo.n par sone vaale shaayad bhagvaan ke beTe hai.n
ham me.n nahii.n ko.ii tabdiilii jaa.De kii paalii raato.n me.n
baisaakh ke tapte mausam me.n, saavan kii bharii barsaato.n me.n
kap.De kii zaruurat hii kyaa hai mazduuro.n ko, haivaano.n ko
kyaa bahs hai, sardii garmii se lohe ke bane insaano.n ko
hone do charaaGaa.n mahlo.n me.n, kyaa ham ko agar diivaalii hai
mazduur hai.n ham, mazduur hai.n ham, mazduur kii duniyaa kaalii hai
mazduur ke bachche takte hai.n jab hasrat se duukaano.n ko
mazduur kaa dil detaa hai du.aa devtaa.o.n ko, bhagvaano.n ko
khaayaa miTTii ke bartan me.n, so.e to bichhaune ko tarse
muKHtaaro.n par tanqiide.n hai.n, be-chaargiyaa.n majbuuro.n kii
suukhaa chehra dahqaano.n kaa, zaKHmii piiThe.n mazduuro.n kii
vo bhuuko.n ke an-daataa hai.n, haq un kaa hai be-daad kare.n
ham kis darvaaze par jaa.e.n kis se jaa kar fariyaad kare.n
baazaar-e-tamaddun bhii un kaa duniyaa-e-siyaasat bhii un kii
maz.hab kaa iraada bhii un kaa, duniyaa-e-siyaasat bhii un kii
paaband hame.n karne ke liye sau raahe.n nikaalii jaatii hai.n
qaanuun banaa.e jaate hai.n, zanjiire.n Dhaalii jaatii hai.n
phir bhii aaGaaz kii shoKHii me.n anjaam dikhaa.ii detaa hai
ham chup hai.n lekin fitrat kaa insaaf duhaa.ii detaa hai

Jameel Mazhari

Nazm

be-rozgar 2

go
ek
haDDii kii
aarzuu me.n
hazaar kutte jhaga.D rahe hai.n

Siraj Faisal Khan

Nazm

America ke kutte

haath me.n le ke tab-o-taab jahaa.n-baano.n kii
rassiyaa.n khii.nchte rahte hai.n ye insaano.n kii
haa.e vo kuttaa-shanaaso.n kii siyaasii chaale.n
jo faqat apnii baqaa ke liye kutte paale.n
saath kutte ke vo burgar kabhii pizza khaa le.n
aur hame.n dekhte hii aiD kii haDDii Daale.n

Khalid Irfan

Nazm

bachpane ki yaad

ai bachpane kii duniyaa to yaad aa rahii hai
dil se mirii sadaa-e-fariyaad aa rahii hai
raahat sunaa rahii thii afsaana saltanat kaa
thii maa.n kii god mujh ko kaashaana saltanat kaa
vo ghar ki duur jis se thii gardish-e-zamaana
aazaadiyo.n kaa merii aabaad aashiyaana
phirtii hai ab nazar me.n tasviir us makaa.n kii
arsh-e-barii.n se behtar thii sarzamii.n jahaa.n kii
naazuk-mizaaj ban kar vo ruuThnaa machalnaa
sehn-e-makaa.n me.n din bhar vo kuudnaa-uchhalnaa
allaah-re vo taKHayyul allaah-re saaz-o-saamaa.n
duniyaa kii saltanat thii is zindagii pe qurbaa.n
us ahd-e-aafyat me.n ik baar phir sulaa de
ai mere ahd-e-maazii phir ik jhalak dikhaa de
baaG-e-jahaa.n me.n rakkhaa un shaadiyo.n ne mujh ko
raahat kii loriyaa.n dii.n aazaadiyo.n ne mujh ko
be-fikr zindagii thii KHud hosh mujh ko kab thaa
ik kaif-e-be-KHudii thaa mast-e-mai-e-tarab thaa
ai umr-e-rafta tuu ne kii mujh se be-valfaaii
aa jaa palaT ke dam bhar mai.n huu.n tiraa fidaa.ii
dil me.n sharaarte.n thii.n kaise Gazab kii pinhaa.n
rag rag me.n bijliyaa.n thii.n josh-e-tarab kii pinhaa.n
huu.n apnii zindagii kaa andaaza karne vaalaa
jannat se laa ke tuu ne dozaKH me.n mujh ko Daalaa

Mirza Mohammad Hadi Aziz Lakhnavi

Nazm

september1965

kisii qasaa.ii ne
ik haDDii chhiil kar phe.nkii
galii ke mo.D se
do kutte bhuu.nkte uTThe
kisii ne paa.nv uThaa.e
kisii ne dum paTkii
bahut se kutte kha.De ho kar shor karne lage
na jaane kyuu.n miraa jii chaahaa
apne sab kap.De
utaar kar kisii chauraahe par kha.Daa ho jaa.uu.n
har ek chiiz pe jhapTuu.n
gha.Dii gha.Dii chillaa.uu.n

Nida Fazli

Nazm

be-yaqin bastiyan

vo ik musaafir thaa jaa chukaa hai
bataa gayaa thaa ki be-yaqiino.n kii bastiyo.n me.n kabhii na rahnaa
kabhii na rahnaa ki un pe itne azaab utre.nge jin kii gintii adad se baahar
vo apne murde tumhaare kaa.ndho.n pe rakh ke tum ko judaa kare.nge
tum un janaazo.n ko qarya qarya liye phiroge
falak bhii jin se naa-aashnaa hai jinhe.n zamiine.n bhii rad kare.ngii
vo kah gayaa thaa hamesha zillat se duur rahnaa
ki bad-nasiibo.n kaa rizq-e-avval unhii.n zamiino.n se paidaa hotaa hai
jin zamiino.n pe bhuurii giddho.n kii nochii haDDii ke reze bikhrii.n
tum apnii raa.e ko istaqaamat kii aab denaa
jise pahaa.Do.n kii KHushk sa.ngii.n bulandiyo.n se KHiraaj bheje.n
Gulaam zehno.n pe aisii laanat kii rasm rakhnaa
jo terii naslo.n phir un kii naslo.n phir un kii naslo.n talak bhii jaa.e
tumhe.n KHabar ho shariif logo.n kii uu.nchii gardan lachak se aise hii be-KHabar hai
savaad-e-Gurbat me.n KHema-gaaho.n kii jaise gaa.Dii ho.n KHushk chobe.n
kabhii na shaane jhukaa ke chalnaa
ki past-qaamat tumhaare qadmo.n se apne qadmo.n ko jo.D de.nge
vahii nahuusat tumhe.n KHaraabo.n kii paasbaanii ataa karegii
saraab-aa.nkho.n ke raasto.n se tumhaare gurdo.n me.n ret phe.nke.nge aur siine ko kaaT de.nge
vo kah gayaa thaa yahii vo illat ke maare vahshii hai.n jin kii apnii zabaa.n nahii.n hai
ye jhaag u.Daate hai.n apne jab.Do.n se lajlaje kaa to ga.Dga.DaahaT kaa shor uThtaa hai
aur badbuu bikhertaa hai
yahii vo bad-baKHt be-hunar aur be-yaqii.n hai.n ki jin kii diyat na KHuu.n-bahaa hai
so in kii qurbat se duur rahnaa najaat-e-dil kaa sabab banegaa
vo ik musaafir thaa kah gayaa hai

Ali Akbar Natiq

Nazm

KHiraj-aqidat

ik hudii-KHvaan-e-mohabbat ik naqiib-e-ittihaad
ik fidaa-e-soz-e-naaquus-o-azaa.n paidaa hu.aa

Asrarul Haq Majaz

Nazm

basti ki laDkiyon ke nam

chal ai nasiim-e-sahraa ruuh-o-ravaan-e-sahraa
meraa payaam le jaa suu-e-butaan-e-sahraa
sahraa.ii mahvasho.n kii KHidmat me.n jaa ke kahnaa
bhuule nahii.n tumhe.n ham ai duKHtaraan-e-sahraa
gar bas chale to aa.e.n aur dard-e-dil sunaa.e.n
tum ko gale lagaa.e.n ham phir miyaan-e-sahraa
tum najd me.n pareshaa.n shahro.n me.n ham hai.n hairaa.n
allaah kii amaa.n ho tum par butaan-e-sahraa
tum is tarah Gamo.n se behaal ho rahii ho
ham is taraf hai.n muztar daaman-kushaan-e-sahraa
ham paas aa.e.n kyuu.n kar tum ko bulaa.e.n kyuu.n kar
ye dukh miTaa.e.n kyuu.n kar vaamaa.ndgaan-e-sahraa
betaab hai.n alam se be-KHvaab ranj-o-Gam se
kyaa puuchhtii ho ham se ai dil-baraan-e-sahraa
tum yaad kar rahii ho bedaad kar rahii ho
barbaad kar rahii ho ai gul-ruKHaan-e-sahraa
ye kyaa kahaa ki tum ho ra.ngiiniyo.n ke KHuugar
Gamgii.n hai.n tum se ba.Dh kar ai Gam-kushaan-e-sahraa
ye raat ye ghaTaa.e.n ye shor ye havaa.e.n
bichh.De hu.e mile.nge kyuu.nkar miyaan-e-sahraa
shahro.n kii zindagii se ham ta.ng aa chuke hai.n
sahraa me.n phir bulaa lo ai sakinaan-e-sahraa
yaad-e-sumuum ho yaa sarsar ke tund tuufaa.n
Darte nahii.n kisii se dil-daadgaan-e-sahraa
aabaadiyo.n me.n haasil aazaadiyaa.n nahii.n hai.n
aa jaa.o tum hii u.D kar o taa.iraan-e-sahraa
sahraa kii vus.ato.n me.n ham ko na bhuul jaanaa
o duKHtaraan-e-sahraa o aahuvaan-e-sahraa
ai abr chup na rahnaa meraa fasaana kahnaa
mil jaa.e gar kahii.n vo sarv-e-ravaan-e-sahraa
dashtii kii dhun me.n saaqii ik naGma-e-iiraaqii
haa.n phir sunaa ba-yaad-e-gul-chehargaan-e-sahraa
aa.nkho.n me.n bas rahaa hai naqsh-e-butaan-e-sahraa
o daastaa.n-saraa chhe.D ik daastaan-e-sahraa
mastaana jaa rahaa hai phir karvaan-e-sahraa
haa.n jhuum kar hudii-KHvaa.n ik daastaan-e-sahraa
dehaat kii fazaa.e.n aa.nkho.n me.n phir rahii hai.n
dil me.n samaa rahii hai yaad-e-butaan-e-sahraa
nazro.n pe chhaa rahaa hai vo chaa.ndnii kaa manzar
sahraa me.n kheltii thii.n jab huuryaan-e-sahraa
vo chaa.ndnii kaa mausam vo be-KHudii kaa aalam
vo nuur kaa samundar reg-e-ravaan-e-sahraa
jalve mah-e-javaa.n ke vo ra.ng-e-kaarvaa.n ke
vo naGme saarbaa.n ke raqsaa.n miyaan-e-sahraa
kyuu.nkar na yaad aa.e.n vo siim-guu.n fazaa.e.n
vo aasmaan-e-sahraa maah-e-ravaan-e-sahraa
vo kam-sino.n ke gaane vo khel vo taraane
be-fikrii ke fasaane vird-e-zabaan-e-sahraa
kheto.n me.n ghuumte the har gul ko chuumte the
mastii me.n jhuumte the jab mai-kashaan-e-sahraa
vo gaa.nv vo fazaa.e.n vo fasl vo havaa.e.n
vo khet vo ghaTaa.e.n vo aasmaan-e-sahraa
phir yaad aa rahii hai.n phir dil dukhaa rahii hai.n
majnuu.n banaa rahii hai.n lailaa-vashaan-e-sahraa
raato.n ko chhup ke aanaa aur shaane ko hilaanaa
hai yaad vo jagaanaa ham ko miyaan-e-sahraa
vo un kii shoKH aa.nkhe.n vo un kii saada nazre.n
be-KHud banaa rahii hai.n doshiizgaan-e-sahraa
vo ishq-pesha huu.n mai.n jis ke javaan naGme
gaataa hai chaa.ndnii me.n har naujavaan-e-sahraa
ik badviyat kaa aashiq sahraa.iyat se be-KHud
'aKHtar' bhii apnii dhun me.n hai ik javaan-e-sahraa

Akhtar Shirani

Nazm

safir-e-laila-4

hariim-e-mahmil me.n aa gayaa huu.n salaam le lo
salaam le lo ki mai.n tumhaaraa amiin-e-qaasid KHajil musaafir azaa kii vaadii se lauT aayaa
mai.n lauT aayaa magar saraasiima is tarah se
ki pichhle qadmo.n palaT ke dekhaa na guzre rasto.n ke faaslo.n ko
jahaa.n pe mere nishaan-e-paa ab thake thake se gire pa.De the
hariim-e-mahmil me.n vo safiir-e-naved-parvar
jise zamaane ke past o baalaa ne itne qisse pa.Dhaa diye the
jo pahle qarno.n kii tiirgii ko ujaal dete
tumhe.n KHabar hai
ye meraa siina qadiim ahraam me.n akelaa vo ik haram thaa
aziim raazo.n ke kohna taabuut jis kii ka.Diyo.n me.n bas rahe the
unhii.n havaa.o.n kaa Dar nahii.n thaa
na sahraa-zaado.n ke naslii kaa hii un kii gird-e-KHabar ko pahu.nche
hariim-e-mahmil me.n vo amaanat kaa paasbaa.n huu.n
jo charm-e-aahuu ke narm kaaGaz pe likkhe naame ko le ke niklaa
vahii ki jis ke savaar hone ko tum ne baKHshaa jahaaz-e-sahraa
taviil raaho.n me.n KHaalii mashko.n kaa baar le kar hazaar sadiyaa.n safar me.n gardaa.n
kahii.n saraabo.n kii bahtii chaa.ndii kahii.n chaTaano.n kii saKHt qaashe.n
mayaan-e-raah-e-safar kha.De the jaka.Dne vaale nazar ke lobhii
magar na bhaTkaa bhaTakne vaalaa
jo dam liyaa to azaa me.n jaa kar
hariim-e-mahmil suno fasaane jo sun sako to
mai.n chalte chalte safar ke aaKHir pe aisii vaadii me.n jaa ke Thahraa
aur us pe guzre hariis lamho.n ke un nishaano.n ko dekh aayaa
jahaa.n ke naqshe biga.D ga.e hai.n
jahaa.n ke tabqe ulaT ga.e hai.n
vahaa.n kii fasle.n zaqquum kii hai.n
havaa.e.n kaalii hai.n raakh u.D kar kha.nDar me.n aise phunkaartii hai
ki jaise azhdar chahaar jaanib se jab.De khole Gadar machaate
zamii.n pe kiina nikaalte ho.n
kasiif zahro.n kii thailiyo.n ko Gazab se baahar uchhaalte ho.n
muhiib saa.e me.n devtaa.o.n kaa raqs jaarii thaa
TuuTe haatho.n kii haDDiyo.n se vo dohl-e-baatil ko piiTte the
za.iif kavvo.n ne ahl-e-qarya kii qabre.n khodii.n
tuu un ke naaKHun nahiif panjo.n se jha.D ke aise bikhar rahe the
chako.ndaro.n ne chabaa ke phe.nke ho.n jaise haDDii ke KHushk reze
hariim-e-mahmil vahii vo manzil thii jis ke siine pe mai.n tumhaarii nazar se pahu.nchaa uThaa.e mehr o vafaa ke naame
vahii.n pe baiThaa thaa sar-ba-zaanuu tumhaaraa mahram
kha.nDar ke bosiida pattharo.n par haziin o Gamgii.n
vahii.n pe baiThaa thaa
qatl-naamo.n ke mahzaro.n ko vo pa.Dh rahaa thaa
jo pastiyo.n ke kotaah haatho.n ne us kii qismat me.n likh diye the
hariim-e-mahmil mai.n apne naaqa se niiche utraa to mai.n ne dekhaa ki us kii aa.nkhe.n KHamosh o viiraa.n
Gubaar-e-sahraa mizha pe larzaa.n thaa ret diido.n me.n u.D rahii thii
magar sharaafat kii ek lau thii ki us ke chehre pe narm haala kiye hu.e thii
vo mere lahje ko jaantaa thaa
hazaar manzil kii duuriyo.n ke sataa.e qaasid ke ukh.De qadmo.n kii chaap sunte hii uTh kha.Daa thaa
dayaar-e-vahshat me.n bas rahaa thaa
pe terii saa.nso.n ke zer-o-bam se uThii haraarat se aashnaa thaa
vo kah rahaa thaa yahaa.n se jaa.o ki yaa.n KHaraabo.n ke kaar-KHaane hai.n
roz o shab ke jo silsile hai.n khule KHasaaro.n kii manDiyaa.n hai.n
vo Dar rahaa thaa tumhaaraa qaasid kahii.n KHasaaro.n me.n baT na jaa.e
hariim-e-mahmil mai.n kyaa bataa.uu.n vahii.n pe khoyaa thaa meraa naaqa
faqat KHaraabe ke chand lamhe hii us ke guude ko khaa ga.e the
usii maqaam-e-tilism-gar me.n vo ustaKHvaano.n me.n Dhal gayaa thaa
jahaa.n pe bikhraa pa.Daa thaa pahle tumhaare mahram kaa asp-e-taazii
aur ab vo naaqa ke ustuKHvaa.n bhii
tumhaare mahram ke asp-e-taazii ke ustaKHvaano.n me.n mil ga.e hai.n
hariim-e-mahmil vahii vo patthar the jin pe rakkhe the mai.n ne mehr o vafaa ke naame
jahaa.n pe zinda ruto.n me.n baa.ndhe the tum ne paimaan o ahd apne
magar vo patthar ki ab ajaa.ib kii kaargah hai.n
tumhaare naame kii us ibaarat ko khaa ga.e hai.n
shifaa ke haatho.n se jis ko tum ne raqam kiyaa thaa
so ab na naaqa na ko.ii naama na le ke aayaa javaab-e-naama
mai.n naa-muraad o KHajil musaafir
magar tumhaaraa amiin qaasid azaa kii vaadii se lauT aayaa
aur us najiib o kariim mahram-e-vafaa ke paikar ko dekh aayaa
jo aane vaale dino.n kii gha.Diyaa.n abad kii saa.nso.n se gin rahaa hai

Ali Akbar Natiq

Nazm

mir

shaahid-e-bazm-e-suKHan naazuura-e-ma.anii-taraaz
ai KHudaa-e-reKHta paiGambar-e-soz-o-gudaaz
yuusuf-e-mulk-e-ma.aanii piir-e-kan.aan-e-suKHan
hai tirii har bait ahl-e-dard ko bait-ul-huzan
ai shahiid-e-jalva-e-maanii faqiir-e-be-niyaaz
is tarah kis ne kahii hai daastaan-e-soz-o-saaz
hai adab urdu kaa naazaa.n jis pe vo hai terii zaat
sar-zamiin-e-sher par ai chashma-e-aab-e-hayaat
tafta-dil aashufta-sar aatish-navaa be-KHeshtan
aah terii siina-soz aur naala teraa dil-shikan
KHatm tujh par ho gayaa lutf-e-bayaan-e-aashiqii
marhabaa ai vaaqif-e-raaz-e-nihaan-e-aashiqii
sar-zamiin-e-sher ka.aba aur tuu is kaa KHaliil
shaaKH-e-tuubaa-e-suKHan par hamnavaa-e-jibra.iil
josh-e-istiGnaa tiraa tere liye vaj.h-e-nashaat
shaan-e-KHuddaarii tirii aa.iina-daar-e-ehtiyaat
bazm se guzraa kamaal-e-faqr dikhlaataa hu.aa
taaj-e-shaahii paa-e-istiGnaa se Thukraataa hu.aa
thaa dimaaG-o-dil me.n sahbaa-e-qanaat kaa suruur
thii javaab-e-satvat-e-shaahii tirii tab-e-Gayuur
mauja-e-bahr-e-qanaat terii abruu kii shikan
taKHt-e-shaahii par hasiir-e-faqr teraa KHanda-zan
thaa ye jauhar terii fitrii shaa.irii ke rutba-daa.n
izzat-e-fan thii tirii naazuk-mizaajii me.n nihaa.n
multafit kartaa tujhe kyaa aGniyaa kaa karr-o-farr
thaa tirii rag rag me.n durvesho.n kii sohbat kaa asar
dil tiraa zaKHmo.n se bazm-e-aashiqii me.n chuur hai
jis suKHan ko dekhiye ristaa hu.aa naasuur hai
bazm-gaah-e-husn me.n ik partav-e-faiz-e-jamaal
said-gaah-e-ishq me.n hai ek said-e-KHasta-haal
dekhnaa ho gar tujhe dekhe tire afkaar me.n
hai tirii tasviir tere KHuu.n-chakaa.n ash.aar me.n
sair ke qaabil hai dil sad-paara us naKHchiir kaa
jis ke har Tuk.De me.n ho paivast paikaa.n tiir kaa
aasmaan-e-sher par chamke hai.n sayyaare bahut
apnii apnii raushnii dikhlaa ga.e taare bahut
ahd-e-gul hai aur vahii ra.ngiinii-e-gulzaar hai
KHaak-e-hind ab tak agar dekho tajallii-zaar hai
aur bhii hai.n ma.arke me.n shahsavaar-e-yakka-taaz
aur bhii hai.n mai-kade me.n saaqiyaan-e-dil-navaaz
hai.n to paimaane vahii lekin vo mai miltii nahii.n
naGma-sanjo.n me.n kisii se terii lai miltii nahii.n
saahibaan-e-zauq ke siino.n me.n thii jis kii khaTak
tairte hai.n dil me.n vo sar-tez nashtar aaj tak
kaarvaan-e-rafta ko thaa terii yaktaa.ii pe naaz
asr-e-maujuuda ne bhii maanaa hai teraa imtiyaaz
ho ga.e hai.n aaj tujh ko ek sau baa.iis saal
to nahii.n zinda hai duniyaa me.n magar teraa kamaal
haq hai ham par yaad kar ke tujh ko ronaa chaahiye
maatam apnii naa-shanaasii kaa bhii honaa chaahiye
Dhuu.nDte hai.n qabr kaa bhii ab nishaa.n miltaa nahii.n
ai zamii.n tujh me.n hamaaraa aasmaa.n miltaa nahii.n

Mirza Mohammad Hadi Aziz Lakhnavi

Nazm

aatish-e-KHamosh

sar-chashma-e-aKHlaaq vafaa-kesh-o-vafaa-kosh
ai mashriq-e-ishraaq-e-safaa abr-e-KHataa-posh
yuu.n tere dil-e-saaf me.n ishraaq-e-mohabbat
jis tarah ki lau sub.h ko de durr-e-nayaa-gosh
mai.n kaun huu.n ik dil huu.n jise zabt ne maaraa
kar degii fanaa mujh ko mirii koshish-e-KHaamosh
vo dil huu.n ibaarat jo hai nazm-e-abadii se
ik KHuun kaa nuqta huu.n mai.n pur-ma.anii-o-pur-josh
jibriil mire saath rahe roz-e-azal se
mai-KHaan-e-irfaa.n me.n shab-o-roz qadah-nosh
kuchh mu.nh se nikal jaa.e.n na samjhii hu.ii baate.n
rahne do mujhe majlis-e-mai me.n yuu.nhii mad.hosh
sarsabz huu.n zaahir me.n magar ai dil-e-KHuu.n-garm
jis tarah hinaa me.n hai nihaa.n aatish-e-KHaamosh
dil par ye sitam kyuu.n na ho ham-jins pe taasiir
ka.aba isii Gam me.n nazar aataa hai siyah-posh
ayyuub nahii.n huu.n ko.ii ma.asuum nahii.n huu.n
taa-chand mazaalim pe rahuu.n saakit-o-KHamosh
hai.n jitne aqaarib vo aqaarib se hai.n bad-tar
ahbaab hai.n vo KHud-Garaz-o-zuud-faraamosh
dil saaf nahii.n sab hai.n suKHan-saaz-o-suKHan-chii.n
ye mehr to hai zahr agar niish me.n ho nosh
kahte hai.n jise dost vo is daur me.n anqaa
samjhe hai.n jise mehr vo is ahd me.n ruu-posh
kis daur me.n aa.e hai.n ham ai majlis-e-saaqii
jab ri.nd-e-KHaraabaat-nashii.n ho ga.e mad.hosh
dil kyaa mirii aa.nkho.n kaa hai TuuTaa hu.aa sotaa
tuufaan uThaa de.nge yahii chashma-e-KHas-posh
Thokar se jilaataa huu.n mazaamiin-e-kuhan ko
hai fitna-e-mahshar mirii utrii hu.ii paa-posh
ham-sa.ng javaahir kabhii patthar nahii.n hotaa
har chand taraashe ko.ii sannaa-e-safaa-kosh
go mujh ko KHudaa-daad tabii.at ne sa.nvaaraa
mujrim huu.n agar huu.n kabhii ehsaan-faraamosh
tarkash me.n mire tiir bahut kam hai.n magar hai.n
aise ki u.Daa de.n qadar-andaaz ke jo hosh
pindaar-e-KHudii hai aziiz un ko to hame.n kiyaa
ham ishq ke bande hai.n vafaa-kesh-o-vafaa-kosh

Mirza Mohammad Hadi Aziz Lakhnavi

Nazm

faisle ki ghaDi

baarishe.n phir zamiino.n se naaraaz hai.n
aur samundar sabhii KHushk hai.n
khurdurii saKHt banjar zamiino.n me.n kyaa bo.iye aur kyaa kaaTiye
aa.nkh kii os ke chand qatro.n se kyaa in zamiino.n ko sairaab kar paa.oge
gandum o jau ke KHosho.n kii KHushbuu tumhaaraa muqaddar nahii.n
aasmaano.n se tum ko raqaabat rahii
aur zamiino.n se tum be-ta.alluq rahe
rii.Dh kii ek haDDii pe tum ko bahut naaz thaa
ye gumaa.n bhii na thaa
ek din be-lahuu ye bhii ho jaa.egii
faisle kii gha.Dii aa ga.ii kuchh karo
titliyo.n ke sunahre hare surKH niile paro.n ke liye
aa.nkh kii os ke chand qatro.n se banjar zamii.n ke kisii goshe me.n
phuul phir se ugaane kii koshish karo

Shahryar

Nazm

qartaba ka muhasara

ai allaama aaj
tere kisaan kii kaafir beTii
apne giit utaar ke
merii samt se
apnaa biddat phere
isii niim-barahna KHuunii.n-manzar me.n
ugii hu.ii thii
vaadii ke diye me.n
sho.ale kii tarah
laraz rahii thii
is kii na.ngii piiTh par
tanii hu.ii spaini rii.Dh kii haDDii ke
aas paas
muztarib chuTkiyo.n bhare
rasiile kuulho.n ke
jalaalii tanaav ne
do nanhe nanhe qaus banaa diye the
jin me.n jaate din kii raushnii
paare kii tarah
phisal phisal kar jam.a ho rahii thii
aur un guu.nge halqo.n ke
ta.ng-daan me.n
jaan pa.D ga.ii thii
aaj unhii koso.n me.n
apnii aa.nkhe.n chho.D chalaa
aur apne Gam bhuul gayaa

Saqi Faruqi

Nazm

janm-ashTami

vaziir-chand ne puuchhaa zafar-alii-KHaa.n se
shrii-krishn se kyaa tum ko bhii iraadat hai
kahaa ye us ne vo the apne vaqt ke haadii
isii liye adab un kaa mirii sa.aadat hai
fasaad se unhe.n nafrat thii jo hai mujh ko bhii
aur us pe de rahii fitrat mirii shahaadat hai
hai is vatan me.n ik aisaa giroh bhii maujuud
shrii-krishn kii jo kar rahaa ibaadat hai
magar fasaad hai us kii sarisht me.n daaKHil
bichaare kyaa kare.n pa.D hii chukii ye aadat hai

Zafar Ali Khan

Nazm

pas-manzar

kis kii yaad chamak uTThii hai dhu.ndle KHaake hu.e ujaagar
yuu.nhii chand puraanii qabre.n khod rahaa huu.n tanhaa baiThaa
kahii.n kisii kaa maas na haDDii kahii.n kisii kaa ruup na chhaayaa
kuchh katbo.n par dhu.ndle dhu.ndle naam khude hai.n mai.n jiivan-bhar
in katbo.n in qabro.n hii ko apne man kaa bhed banaa kar
mustaqbil aur haal ko cho.De, dukh sukh sab me.n liye phiraa huu.n
maazii kii ghanghor ghaTaa me.n chupkaa baiThaa soch rahaa huu.n
kis kii yaad chamak uTThii hai, dhu.ndle KHaake hu.e ujaagar?
baiThaa qabre.n khod rahaa huu.n, huuk sii ban kar ek ik muurat
dard saa ban kar ek ik saayaa, jaag rahe hai.n duur kahii.n se
aavaaze.n sii kuchh aatii hai.n, ''guzre the ik baar yahii.n se''
hairat ban kar dekh rahii hai, har jaanii-pahchaanii suurat
goyaa jhuuT hai.n ye aavaaze.n, ko.ii mel na thaa in sab se
jin kaa pyaar kisii ke dil me.n apne ghaa.o chho.D gayaa hai
jin kaa pyaar kisii ke dil se saare rishte to.D gayaa hai
aur vo paagal in rishto.n ko baiThaa jo.D rahaa hai kab se!

Akhtarul Iman

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now