Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".kulr"

Nazm MATCHES FOR ".kulr"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

dua

jin kaa dii.n pairvi-e-kizb-o-riyaa hai un ko
himmat-e-kufr mile jur.at-e-tahqiiq mile
jin ke sar muntazir-e-teG-e-jafaa hai.n un ko
dast-e-qaatil ko jhaTak dene kii taufiiq mile

Faiz Ahmad Faiz
Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

shikast-e-tauba

saaqii kii har nigaah pe bal khaa ke pii gayaa
lahro.n se kheltaa hu.aa lahraa ke pii gayaa
be-kaifiyo.n ke kaif se ghabraa ke pii gayaa
tauba ko to.D-taa.D ke tharraa ke pii gayaa
zaahid! ye terii shoKHii-e-rindaana dekhnaa
rahmat ko baato.n baato.n me.n bahlaa ke pii gayaa
sar-mastii-e-azal mujhe jab yaad aa ga.ii
duniyaa-e-e'tibaar ko Thukraa ke pii gayaa
aazurdagii-e-KHaatir-e-saaqii ko dekh kar
mujh ko ye sharm aa.ii ki sharmaa ke pii gayaa
ai rahmat-e-tamaam mirii har KHataa mu.aaf
mai.n intihaa-e-shauq me.n ghabraa ke pii gayaa
piitaa baGair izn ye kab thii mirii majaal
dar-parda chashm-e-yaar kii shah paa ke pii gayaa
us jaan-e-mai-kada kii qasam baarhaa 'jigar'
kul aalam-e-basiit pe mai.n chhaa ke pii gayaa

Jigar Moradabadi
Nazm

hasan kuza-gar(3)

jahaa.n-zaad
intizaar aaj bhii mujhe hai kyuu.n vahii magar
jo nau baras ke daur-e-naa-sazaa me.n thaa?
ab intizaar aa.nsu.o.n ke dajla kaa
na gumrahii kii raat kaa
shab-e-gunah kii lazzato.n kaa itnaa zikr kar chukaa
vo KHud gunaah ban ga.ii.n!
halab kii kaarvaa.n-saraa ke hauz kaa, na maut kaa
na apnii is shikast-KHurdaa zaat kaa
ik intizaar-e-be-amaa.n kaa taar hai ba.ndhaa hu.aa!
kabhii jo chand saaniye zamaan-e-be-zamaa.n me.n aa ke ruk ga.e
to vaqt kaa ye baar mere sar se bhii utar gayaa
tamaam rafta o guzishta suurto.n, tamaam haadso.n
ke sust qaafile
mire daruu.n me.n jaag uThe
mere daruu.n me.n ik jahaan-e-baaz-yaaftaa kii rel-pel jaag uThii
bahisht jaise jaag uThe KHudaa ke laa-shu.uur me.n!
mai.n jaag uThaa Gunuudgii kii ret par pa.Daa hu.aa
Gunuudgii kii ret par pa.De hu.e vo kuuze jo
mire vajuud se baruu.n
tamaam reza reza ho ke rah ga.e the
mere apne-aap se firaaq me.n
vo phir se ek kul bane (kisii navaa-e-saaz-gaar kii tarah)
vo phir se ek raqs-e-be-zamaa.n bane
vo ruuyat-e-azal bane!

Noon Meem Rashid
Nazm

yaad-e-aligarh

vo chaa.e kii pyaalii pe yaaro.n ke jalse
vo sardii kii raate.n vo zulfo.n ke qisse
kabhii tazkire husn-e-sho.ala-ruKHaa.n ke
mohabbat hu.ii thii kisii ko kisii se
har ik dil vahaa.n thaa nazar kaa nishaana
bahut yaad aataa hai guzraa zamaana
bahut apnaa andaaz thaa laa-ubaalii
kabhii the jalaalii kabhii the jamaalii
kabhii baat me.n baat yuu.nhii nikaalii
sar-e-raah ko.ii qayaamat uThaa lii
kisii ko la.Daanaa kisii ko bachaanaa
bahut yaad aataa hai guzraa zamaana
kabhii sachchii baato.n ko jhuuTaa bataayaa
kabhii jhuuTii baato.n ko sach kar dikhaayaa
kabhii raaz-e-dil kah ke us ko chhupaayaa
kabhii dosto.n me.n yuu.nhii kuchh u.Daayaa
bataa kar chhupaanaa chhupaa kar bataanaa
bahut yaad aataa hai guzraa zamaana
kabhii bazm-e-ahbaab me.n sho.ala-afshaa.n
kabhii union me.n the shamshiir-e-burraa.n
kabhii bazm-e-vaa.iz me.n the paa-ba-jaulaa.n
badalte the har roz taqdiir-e-dauraa.n
jahaa.n jaisii Daflii vahaa.n vaisaa gaanaa
bahut yaad aataa hai guzraa zamaana
zamaana thaa vo ek haivaaniyat kaa
vo daur-e-malaamat thaa shaitaaniyat kaa
hame.n dard thaa ek insaaniyat kaa
uThaa.e alam ham the haqqaaniyat kaa
ba.Dhe jaa rahe the magar baaGiyaana
bahut yaad aataa hai guzraa zamaana
muqaabil me.n aa.e jasaarat thii kis ko
ko.ii rok de ba.Dh ke himmat thii kis ko
pukaare ko.ii ham ko taaqat thii kis ko
ki har bul-havas ko the ham taaziyaana
bahut yaad aataa hai guzraa zamaana
KHayaalaat-e-pur-shauq kaa silsila thaa
badal de.n zamaane ko vo hausla thaa
har ik dil me.n paidaa nayaa valvala thaa
har ik gaam ahbaab kaa qaafila thaa
idhar da.avaa karnaa udhar kar dikhaanaa
bahut yaad aataa hai guzraa zamaana
vo shah-raah-e-marrice ke pur-pech chakkar
vo shamshaad building pe ik shor-e-mahshar
vo mub.ham sii baate.n vo poshiida nashtar
vo be-fikr duniyaa vo lafzo.n ke daftar
ki jin kaa siraa thaa na ko.ii Thikaana
bahut yaad aataa hai guzraa zamaana
kisii ko hu.ii thii kisii se mohabbat
ko.ii kar rahaa thaa kisii kii shikaayat
Garaz roz Dhaatii thii taaza qayaamat
kisii kii shabaahat kisii kii malaamat
kisii kii tasallii kisii kaa sataanaa
bahut yaad aataa hai guzraa zamaana
ko.ii Gam-zada thaa ko.ii ha.ns rahaa thaa
ko.ii husn-e-naahiid par mar miTaa thaa
ko.ii chashm-e-nargis kaa biimaar saa thaa
ko.ii bas yuu.nhii taaktaa jhaa.nktaa thaa
kabhii choT khaanaa kabhii muskuraanaa
bahut yaad aataa hai guzraa zamaana
vo har january me.n numaa.ish ke charche
vo pur-shauq aa.nkhe.n vo hairaan jalve
vo chakkar pe chakkar the baara-darii ke
vo hasrat ki sau baar mil kar bhii milte
hazaaro.n bahaano.n kaa vo ik bahaanaa
bahut yaad aataa hai guzraa zamaana
vo ruKH aaftaabii pe abruu hilaalii
vo timsaal-e-siimii.n vo husn-misaalii
shaguufo.n me.n khelii gulaabo.n me.n paalii
vo KHud ik adaa thii adaa bhii niraalii
nigaahe.n bachaa kar nigaahe.n milaa kar
bahut yaad aataa hai guzraa zamaana
vo har-chand mujh ko nahii.n jaantii thii
magar merii nazro.n ko pahchaantii thii
agarche mire dil me.n vo bas ga.ii thii
magar baat bas dil kii dil me.n rahii thii
magar aaj ahbaab se kyaa chhupaanaa
bahut yaad aataa hai guzraa zamaana
vo ik shaam barsaat kii din Dhalaa thaa
abhii raat aa.ii na thii jhuTpuTaa thaa
vo baad-e-bahaarii se ik gul khilaa thaa
dha.Dakte hu.e dil se ik dil milaa thaa
nazar sun rahii thii nazar kaa fasaana
bahut yaad aataa hai guzraa zamaana
javaanii adaa.o.n me.n bal khaa rahii thii
kahaanii nigaaho.n me.n lahraa rahii thii
mohabbat mohabbat ko samjhaa rahii thii
vo chashm-e-tamannaa jhukii jaa rahii thii
qayaamat se pahle qayaamat vo Dhaanaa
bahut yaad aataa hai guzraa zamaana
hame.n biitii baate.n jo yaad aa rahii thii.n
vo maKHmuur nazre.n jo sharmaa rahii thii.n
bahut aql-e-saada ko bahkaa rahii thii.n
ba.Dii be-niyaazii se farmaa rahii thii.n
unhe.n yaad rakhnaa hame.n bhuul jaanaa
bahut yaad aataa hai guzraa zamaana
ab vo uma.nge.n na dil me.n muraade.n
ab rah ga.ii.n chand maazii kii yaade.n
ye jii chaahtaa hai unhe.n bhii bhalaa de.n
Gam-e-zindagii ko kahaa.n tak du.aa de.n
haqiiqat bhii ab ban ga.ii hai fasaana
bahut yaad aataa hai guzraa zamaana
aligarh hai ba.Dh kar hame.n kul jahaa.n se
hame.n ishq hai apnii urdu zabaa.n se
hame.n pyaar hai apne naam-o-nishaa.n se
yahaa.n aa ga.e ham na jaane kahaa.n se
qasam de ke ham ko kasii kaa bulaanaa
bahut yaad aataa hai guzraa zamaana
mohabbat se yaksar hai anjaan duniyaa
ye viiraan bastii pareshaan duniyaa
kamaal-e-KHirad se ye hairaan duniyaa
KHud apne kiye par pashemaan duniyaa
kahaa.n le ke aayaa hame.n aab-o-daana
bahut yaad aataa hai guzraa zamaana

Aabidullah Ghazi
Nazm

mohabbat ki ek nazm

mirii zindagii me.n bas ik kitaab hai ik charaaG hai
ek KHvaab hai aur tum ho
ye kitaab o KHvaab ke darmiyaan jo manzile.n hai.n mai.n chaahtaa thaa
tumhaare saath basar karuu.n
yahii kul asaasa-e-zindagii hai isii ko zaad-e-safar karuu.n
kisii aur samt nazar karuu.n to mirii du.aa me.n asar na ho
mire dil ke jaada-e-KHush-KHabar pe ba-juz tumhaare kabhii kisii kaa guzar na ho
magar is tarah ki tumhe.n bhii us kii KHabar na ho

Iftikhar Arif
Nazm

taaruf

KHuub pahchaan lo asraar huu.n mai.n
jins-e-ulfat kaa talabgaar huu.n mai.n
ishq hii ishq hai duniyaa merii
fitna-e-aql se be-zaar huu.n mai.n
KHvaab-e-ishrat me.n hai.n arbaab-e-KHirad
aur ik shaa.ir-e-bedaar huu.n mai.n
chhe.Dtii hai jise mizraab-e-alam
saaz-e-fitrat kaa vahii taar huu.n mai.n
ra.ng nazzaara-e-qudrat mujh se
jaan-e-ra.ngiini-e-kohsaar huu.n mai.n
nashsha-e-nargis-e-KHuubaa.n mujh se
Gaaza-e-aariz-o-ruKHsaar huu.n mai.n
aib jo haafiz o KHayyaam mai.n thaa
haa.n kuchh is kaa bhii gunahgaar huu.n mai.n
zindagii kyaa hai gunaah-e-aadam
zindagii hai to gunahgaar huu.n mai.n
rashk-e-sad-hosh hai mastii merii
aisii mastii hai ki hushyaar huu.n mai.n
le ke niklaa huu.n guhar-haa-e-suKHan
maah o anjum kaa KHariidaar huu.n mai.n
dair o ka.aba me.n mire hii charche
aur rusvaa sar-e-baazaar huu.n mai.n
kufr o ilhaad se nafrat hai mujhe
aur maz.hab se bhii be-zaar huu.n mai.n
ahl-e-duniyaa ke liye na.ng sahii
raunaq-e-anjuman-e-yaar huu.n mai.n
ain is be-sar-o-saamaanii me.n
kyaa ye kam hai ki guhar-baar huu.n mai.n
merii baato.n me.n masiihaa.ii hai
log kahte hai.n ki biimaar huu.n mai.n
mujh se barham hai mizaaj-e-piirii
mujrim-e-shoKHi-e-guftaar huu.n mai.n
huur o Gilmaa.n kaa yahaa.n zikr nahii.n
nau-e-insaa.n kaa parastaar huu.n mai.n
mahfil-e-dahr pe taarii hai jumuud
aur vaarafta-e-raftaar huu.n mai.n
ik lapaktaa hu.aa sho.ala huu.n mai.n
ek chaltii hu.ii talvaar huu.n mai.n

Asrarul Haq Majaz
Nazm

mere bhi hain kuchh KHwab

kuchh KHvaab hai.n parda-e-anvaar magar un kii sahar gum
jis aag se uThtaa hai mohabbat kaa KHamiir us ke sharar gum
hai kul kii KHabar un ko magar juz kii KHabar gum
ye KHvaab hai.n vo jin ke liye martaba-e-diida-e-tar hech
dil hech hai sar itne baraabar hai.n ki sar hech
arz-e-hunar hech!

Noon Meem Rashid
Nazm

hazrat-e-insan

jahaa.n me.n daanish o biinish kii hai kis darja arzaanii
ko.ii shai chhup nahii.n saktii ki ye aalam hai nuuraanii
ko.ii dekhe to hai baariik fitrat kaa hijaab itnaa
numaayaa.n hai.n farishto.n ke tabassum-haa-e-pinhaanii
ye duniyaa daavat-e-diidaar hai farzand-e-aadam ko
ki har mastuur ko baKHshaa gayaa hai zauq-e-uryaanii
yahii farzand-e-aadam hai ki jis ke ashk-e-KHuunii.n se
kiyaa hai hazrat-e-yazdaa.n ne dariyaa.o.n ko tuufaanii
falak ko kyaa KHabar ye KHaak-daa.n kis kaa nasheman hai
Garaz anjum se hai kis ke shabistaa.n kii nigahbaanii
agar maqsuud-e-kul mai.n huu.n to mujh se maavaraa kyaa hai
mire ha.ngaama-haa-e-nau-ba-nau kii intihaa kyaa hai

Allama Iqbal
Nazm

jahan rehana rahti thi

shamiim-e-zulf se us kii mahak jaatii thii kul vaadii
nigaah-e-mast se us kii bahak jaatii thii kul vaadii
havaa.e.n par-fishaa.n ruuh-e-mai-o-mai-KHaana rahtii thii
yahii vaadii hai vo hamdam jahaa.n 'rehaana' rahtii thii

Akhtar Shirani
Nazm

zindagi

aa rahaa thaa mai.n ka.ii kuucho.n se Thokar khaa kar
ek aavaaz ne rokaa mujh ko
kisii miinaar se niiche aa kar
allaahu-akbar allaahu-akbar
hu.aa dil ko ye gumaa.n
ki ye pur-josh azaa.n
maut se degii amaa.n
phir to pahu.nchaa mai.n jahaa.n
mai.n ne dohraa.ii kuchh aise ye azaa.n
guu.nj uThaa saaraa jahaa.n
allaahu-akbar allaahu-akbar
isii aavaaz me.n ik aur bhii guu.njaa elaan
kullo-man-alaihaa-faan
ik taraf Dhal gayaa KHurshiid-e-jahaa.n-taab kaa sar
hu.aa faalij kaa asar
phaT ga.ii nas ko.ii shiryaano.n me.n KHuu.n jam saa gayaa
ho gayaa zaKHmii dimaaG
aisaa lagtaa thaa ki bujh jaa.egaa jaltaa hai jo sadiyo.n se charaaG
aaj a.ndheraa mirii nas nas me.n utar jaa.egaa
ye samundar jo ba.Dii der se tuufaanii thaa
aisaa ta.Dpaa ki mire kamre ke andar aayaa
aate aate vo mire vaaste amrit laayaa
aur lahraa ke kahaa
shiv ne ye bhejvaayaa hai lo piyo aur
aaj shiv ilm hai amrit hai amal
ab vo aasaa.n hai jo dushvaar thaa kal
raat jo maut kaa paiGaam liye aa.ii thii
biivii bachcho.n ne mire
us ko khi.Dkii se pare phe.nk diyaa
aur jo vo zahr kaa ik jaam liye aa.ii thii
us ne vo KHud hii piyaa
sub.h utrii jo samundar me.n nahaane ke liye
raat kii laash milii paanii me.n

Kaifi Azmi
Nazm

sham-e-ayaadat

ye kaun muskuraahaTo.n kaa kaarvaa.n liye hu.e
shabaab-e-sher-o-ra.ng-o-nuur kaa dhu.aa.n liye hu.e
dhu.aa.n ki barq-e-husn kaa mahaktaa sho.ala hai ko.ii
chaTiilii zindagii kii shaadmaaniyaa.n liye hu.e
labo.n se pa.nkhu.Dii gulaab kii hayaat maa.nge hai
ka.nval sii aa.nkh sau nigaah-e-mehrbaa.n liye hu.e
qadam qadam pe de uThii hai lau zamiin-e-rah-guzar
adaa adaa me.n be-shumaar bijliyaa.n liye hu.e
nikalte baiThte dino.n kii aahaTe.n nigaah me.n
rasiile ho.nT fasl-e-gul kii daastaa.n liye hu.e
KHutuut-e-ruKH me.n jalva-gar vafaa ke naqsh sar-ba-sar
dil-e-Ganii me.n kul hisaab-e-dostaa.n liye hu.e
vo muskuraatii aa.nkhe.n jin me.n raqs kartii hai bahaar
shafaq kii gul kii bijliyo.n kii shoKHiyaa.n liye hu.e
adaa-e-husn barq-paash shola-zan nazaara-soz
fazaa-e-husn uudii uudii bijliyaa.n liye hu.e
jagaane vaale naGma-e-sahar labo.n pe maujzan
nigaahe.n nii.nd laane vaalii loriyaa.n liye hu.e
vo nargis-e-siyaah-e-niim-baaz, mai-kada-ba-dosh
hazaar mast raato.n kii javaaniyaa.n liye hu.e
taGaaful-o-KHumaar aur be-KHudii kii oT me.n
nigaahe.n ik jahaa.n kii hoshiyaariyaa.n liye hu.e
harii-bharii rago.n me.n vo chahaktaa boltaa lahuu
vo sochtaa hu.aa badan KHud ik jahaa.n liye hu.e
za-farq taa-qadam tamaam chehra jism-e-naaznii.n
latiif jagmagaahaTo.n kaa kaarvaa.n liye hu.e
tabassumash takallume takallumash tarannume
nafas nafas me.n thartharaataa saaz-e-jaa.n liye hu.e
jabiin-e-nuur jis pe pa.D rahii hai narm chhuuT sii
KHud apnii jagmagaahTo.n kii kahkashaa.n liye hu.e
''sitaara-baar o mah-chakaa.n o KHuur-fishaa.n'' jamaal-e-yaar
jahaan-e-nuur kaarvaa.n-ba-kaarvaa.n liye hu.e
vo zulf-e-KHam-ba-KHam shamiim-e-mast se dhu.aa.n dhu.aa.n
vo ruKH chaman chaman bahaar-e-jaavedaa.n liye hu.e
ba-mastii-e-jamaal-e-kaa.enaat, KHvaab-e-kaa.enaat
ba-gardish-e-nigaah daur-e-aasmaa.n liye hu.e
ye kaun aa gayaa mire qariib uzv uzv me.n
javaaniyaa.n, javaaniyo.n kii aa.ndhiyaa.n liye hu.e
ye kaun aa.nkh pa.D rahii hai mujh par itne pyaar se
vo bhuulii sii vo yaad sii kahaaniyaa.n liye hu.e
ye kis kii mahkii mahkii saa.nse.n taaza kar ga.ii.n dimaaG
shabo.n ke raaz nuur-e-mah kii narmiyaa.n liye hu.e
ye kin nigaaho.n ne mire gale me.n baahe.n Daal dii.n
jahaan bhar ke dukh se dard se amaa.n liye hu.e
nigaah-e-yaar de ga.ii mujhe sukuun-e-be-karaa.n
vo be-kahii vafaa.o.n kii gavaahiyaa.n liye hu.e
mujhe jagaa rahaa hai maut kii Gunuudgii se kaun
nigaaho.n me.n suhaag-raat kaa samaa.n liye hu.e
mirii fasurda aur bujhii hu.ii jabii.n ko chhuu liyaa
ye kis nigaah kii kiran ne saaz-e-jaa.n liye hu.e
sute se chehre par hayaat rasmasaatii muskuraatii
na jaane kab ke aa.nsu.o.n kii daastaa.n liye hu.e
tabassum-e-sahar hai aspataal kii udaas shaam
ye kaun aa gayaa nashaat-e-be-karaa.n liye hu.e
tire na aane tak agarche mehrbaa.n thaa ik jahaa.n
mai.n ro ke rah gayaa huu.n sau Gam-e-nihaa.n liye hu.e
zamiin muskuraa uThii ye shaam jagmagaa uThii
bahaar lahlhaa uThii shamiim-e-jaa.n liye hu.e
fazaa-e-aspataal hai ki ra.ng-o-buu kii karvaTe.n
tire jamaal-e-laala-guu.n kii daastaa.n liye hu.e
'firaaq' aaj pichhlii raat kyuu.n na mar rahuu.n ki ab
hayaat aisii shaame.n hogii phir kahaa.n liye hu.e
(2)
magar nahii.n kuchh aur maslahat thii us ke aane me.n
jamaal-o-diid-e-yaar the nayaa jahaa.n liye hu.e
isii na.e jahaa.n me.n aadmii bane.nge aadmii
jabii.n pe shaahkaar-e-dahr kaa nishaa.n liye hu.e
isii na.e jahaa.n me.n aadmii bane.nge devtaa
tahaarato.n kaa farq-e-paak par nishaa.n liye hu.e
KHudaa.ii aadmii kii hogii is na.e jahaan par
sitaaro.n ke hai.n dil ye pesh-go.iiya.n liye hu.e
sulagte dil sharar-fishaa.n o sho.ala-baar barq-paash
guzarte din hayaat-e-nau kii surKHiyaa.n liye hu.e
tamaam qaul aur qasam nigaah-e-naaz-e-yaar thii
tuluu-e-zindagii-e-nau kii daastaa.n liye hu.e
nayaa janam hu.aa miraa ki zindagii na.ii milii
jiyuu.ngaa shaam-e-diid kii nishaaniyaa.n liye hu.e
na dekhaa aa.nkh uThaa ke ahd-e-nau ke parda-daaro.n ne
guzar gayaa zamaana yaad-e-raftagaa.n liye hu.e
ham inqilaabiyo.n ne ye jahaa.n bachaa liyaa magar
abhii hai ik jahaa.n vo bad-gumaaniyaa.n liye hu.e

Firaq Gorakhpuri
Nazm

saneha

dard-o-Gam-e-hayaat kaa darmaa.n chalaa gayaa
vo KHizr-e-asr-o-iisa-e-dauraa.n chalaa gayaa
hinduu chalaa gayaa na musalmaa.n chalaa gayaa
insaa.n kii justujuu me.n ik insaa.n chalaa gayaa
raqsaa.n chalaa gayaa na Gazal-KHvaa.n chalaa gayaa
soz-o-gudaaz o dard me.n Galtaa.n chalaa gayaa
barham hai zulf-e-kufr to iimaa.n hai sar-niguu.n
vo faKHr-e-kufr-o-naazish-e-iimaa.n chalaa gayaa
biimaar zindagii kii kare kaun dil-dahii
nabbaaz o chaarasaaz-e-mariizaa.n chalaa gayaa
kis kii nazar pa.Degii ab 'isyaa.n pe lutf kii
vo mahram-e-nazaakat-e-isyaa.n chalaa gayaa
vo raaz-daar-er-mahfil-e-yaaraa.n nahii.n rahaa
vo Gam-gusaar-e-bazm-e-ariifaa.n chalaa gayaa
ab kaafirii me.n rasm-o-raah-e-dilbarii nahii.n
iimaa.n kii baat ye hai ki iimaa.n chalaa gayaa
ik be-KHud-e-suruur-e-dil-o-jaa.n nahii.n rahaa
ik aashiq-e-sadaaqat-e-pinhaa.n chalaa gayaa
baa-chashm-e-nam hai aaj zuleKHaa-e-kaa.enaat
zindaa.n-shikan vo yuusuf-e-zindaa.n chalaa gayaa
ai aarzuu vo chashma-e-haivaa.n na kar talaash
zulmaat se vo chashma-e-haivaa.n chalaa gayaa
ab sang-o-KHisht o KHaak o KHazaf sar-buland hai.n
taaj-e-vatan kaa la.al-e-daraKHshaa.n chalaa gayaa
ab ahrman ke haath me.n hai teG-e-KHuu.n-chakaa.n
KHush hai ki dast-o-baazuu-e-yazdaa.n chalaa gayaa
dev-e-badii se maark-e-saKHt hii sahii
ye to nahii.n ki zor-e-javaanaa.n chalaa gayaa
kyaa ahl-e-dil me.n jazba-e-Gairat nahii.n rahaa
kyaa azm-e-sar-faroshii-e-mardaa.n chalaa gayaa
kyaa baaGiyo.n kii aatish-e-dil sard ho ga.ii
kyaa sarkasho.n kaa jazba-e-pinhaa.n chalaa gayaa
kyaa vo junuun-o-jazba-e-bedaar mar gayaa
kyaa vo shabaab-e-hashr-badaamaa.n chalaa gayaa
KHush hai badii jo daam ye nekii pe Daal ke
rakh de.nge ham badii kaa kaleja nikaal ke

Asrarul Haq Majaz
Nazm

inqalab

na taabnaakii-e-ruKH hai na kaakulo.n kaa hujuum
hai zarra zarra pareshaa.n kalii kalii maGmuum
hai kul jahaa.n muta.affin havaa.e.n sab masmuum
guzar bhii jaa ki tiraa intizaar kab se hai

Makhdoom Mohiuddin
Nazm

madrasa ali-gaDh

KHudaa alii-ga.Dh ke madrase ko tamaam amraaz se shifaa de
bhare hu.e hai.n raiis-zaade amiir-zaade shariif-zaade
latiif o KHush-vaz.a chust o chaalaak o saaf o paakiiza shaad-o-KHurram
tabii.ato.n me.n hai in kii jaudat dilo.n me.n in ke hai.n nek iraade
kamaal-e-mehnat se pa.Dh rahe hai.n kamaal-e-Gairat se pa.Dh rahe hai.n
savaar mashriq raah me.n hai.n to maGribii raah me.n piyaade
har ik hai in me.n kaa be-shak aisaa ki aap use chaahte hai.n jaisaa
dikhaave mahfil me.n qadd-e-ra.anaa jo aap aa.e.n to sar jhukaa de
faqiir maa.nge to saaf kah de.n ki tuu hai mazbuut jaa kamaa khaa
qubuul farmaa.e.n aap daavat to apnaa sarmaaya kul khilaa de
buto.n se in ko nahii.n lagaavaT miso.n kii lete nahii.n vo aahaT
tamaam quvvat hai sarf-e-KHvaandan nazar ke bhole hai.n dil ke saade
nazar bhii aa.e jo zulf-e-pechaa.n to samjhe.n ye ko.ii policy hai
electric light us ko samjhe.n jo barq-vash ko.ii kuude
nikalte hai.n kar ke Gol-bandii ba-naam-e-tahziib o dard-mandii
ye kah ke lete hai.n sab se chande jo tum hame.n do tumhe.n KHudaa de
unhe.n isii baat par yaqii.n hai ki bas yahii asl kaar-e-dii.n hai
isii se hogaa faroG-e-qaumii isii se chamke.nge baap daade
makaan-e-college ke sab makii.n hai.n abhii unhe.n tajrabe nahii.n hai.n
KHabar nahii.n hai ki aage chal kar hai kaisii manzil hai.n kaise jaade
dilo.n me.n in ke hai.n nuur-e-iimaa.n qavii nahii.n hai magar nigahbaa.n
havaa-e-mantiq adaa-e-tiflii ye sham.a aisaa na ho bujhaa de
fareb de kar nikaale matlab sikhaa.e tahqiir-e-diin-o-mazhab
miTaa de aaKHir ko diin-o-maz.hab numuud-e-zaatii ko go ba.Dhaa de
yahii bas 'akbar' kii iltijaa hai janaab baarii me.n ye du.aa hai
uluum o hikmat kaa dars in ko professor de.n samajh KHudaa de

Akbar Allahabadi
Nazm

aawara sajde

ik yahii soz-e-nihaa.n kul miraa sarmaaya hai
dosto mai.n kise ye soz-e-nihaa.n nazr karuu.n
ko.ii qaatil sar-e-maqtal nazar aataa hii nahii.n
kis ko dil nazr karuu.n aur kise jaa.n nazr karuu.n
tum bhii mahbuub mire, tum bhii ho dildaar mire
aashnaa mujh se magar tum bhii nahii.n, tum bhii nahii.n
KHatm hai tum pe masiihaa-nafasii, chaaragarii
mahram-e-dard-e-jigar tum bhii nahii.n tum bhii nahii.n
apnii laash aap uThaanaa ko.ii aasaan nahii.n
dast-o-baazuu mire naakaara hu.e jaate hai.n
jin se har daur me.n chamkii hai tumhaarii dahliiz
aaj sajde vahii aavaara hu.e jaate hai.n
dard-e-manzil thii, magar aisii bhii kuchh duur na thii
le ke phirtii rahii raste hii me.n vahshat mujh ko
ek zaKHm aisaa na khaayaa ki bahaar aa jaatii
daar tak le ke gayaa shauq-e-shahaadat mujh ko
raah me.n TuuT ga.e paa.nv to ma.aluum hu.aa
juz mire aur miraa raah-numaa ko.ii nahii.n
ek ke baa'd KHudaa ek chalaa aataa thaa
kah diyaa aql ne ta.ng aa ke KHudaa ko.ii nahii.n

Kaifi Azmi
Nazm

ustad

nek bachche dil se karte hai.n adab ustaad kaa
baap kii ulfat se behtar hai Gazab ustaad kaa
aam logo.n kii jahaalat duur karne ke liye
haq-ta.aalaa ne banaayaa hai sabab ustaad kaa
us kii barakat se jahaa.n me.n phailtii hai.n nekiyaa.n
kyo.n na phir ustaad se raazii ho rab ustaad kaa
kuchh na kuchh umda sabaq detii hai us kii zindagii
KHulq se KHaalii nahii.n hai ko.ii Dhab ustaad kaa
jis gha.Dii naadaan bachcho.n ko sikhaataa hai vo ilm
chuum lete hai.n farishte aa ke lab ustaad kaa
bas use pa.Dhne-pa.Dhaane se hamesha kaam hai
kitnaa achchhaa mashGala hai roz-o-shab ustaad kaa
KHvaah saarii umr us ke paa.nv dho dho kar piye
aadmii se haq adaa hotaa hai kab ustaad kaa
imtihaa.n me.n hal na ho jis dam ko.ii mushkil savaal
KHud pasando.n ko pataa chaltaa hai tab ustaad kaa
shukr ke jazbaat se gardan jhukaa letaa huu.n mai.n
yaad aataa hai mujhe ehsaan jab ustaad kaa
kal zamaane kii nigaaho.n me.n vo izzat paa.egaa
martaba pahchaan jaa.egaa jo ab ustaad kaa
us kii aalamgiir haisiyyat hai shaaho.n kii tarah
kul ajam ustaad kaa hai kul arab ustaad kaa
chal rahe hai.n aaj duniyaa me.n hazaaro.n mahkame
sach agar puuchho to hai ye 'faiz' sab ustaad kaa

Faiz Ludhianvi
Nazm

bewa ki KHud-kushi

ye a.ndherii raat ye saarii fazaa so.ii hu.ii
pattii pattii manzar-e-KHaamosh me.n kho.ii hu.ii
maujzan hai bahr-e-zulmat tiirgii kaa josh hai
shaam hii se aaj qindiil-e-falak KHaamosh hai
chand taare hai.n bhii to be-nuur pathraa.e hu.e
jaise baasii haar me.n ho.n phuul kumhlaa.e hu.e
khap gayaa hai yuu.n ghaTaa me.n chaa.ndnii kaa saaf ra.ng
jis tarah maayuusiyo.n me.n dab ke rah jaa.e uma.ng
umDii hai kaalii ghaTaa duniyaa Dubone ke liye
yaa chalii hai baal khole raa.nD rone ke liye
jitnii hai gunjaan bastii utnii hii viiraan hai
har galii KHaamosh hai har raasta sunsaan hai
ik makaa.n se bhii makii.n kii kuchh KHabar miltii nahii.n
chilmane.n uThtii nahii.n zanjiir-e-dar hiltii nahii.n
so rahe hai.n mast-o-be-KHud ghar ke kul piir-o-javaa.n
ho ga.ii hai.n band husn-o-ishq me.n sargoshiyaa.n
haa.n magar ik samt ik goshe me.n ko.ii nauhagar
le rahii hai karvaTo.n par karvaTe.n dil thaam kar
dil sambhaltaa hii nahi.n hai siina-e-sad-chaak me.n
phuul saa chehra aTaa hai bevgii kii KHaak me.n
u.D chalii hai ra.ng-e-ruKH ban kar hayaat-e-musta.aar
ho rahaa hai qalb-e-murda me.n javaanii kaa fishaar
hasrate.n dam to.Dtii hai.n yaas kii aaGosh me.n
saik.Do.n shikve machalte hai.n lab-e-KHaamosh me.n
umr aamaada nahii.n murda-parastii ke liye
baar hai ye zinda mayyat dosh-e-hastii ke liye
chaahtii hai laakh qaabuu dil pe paatii hii nahii.n
haa.e-re zaalim javaanii bas me.n aatii hii nahii.n
thartharaa kar girtii hai jab suune bistar par nazar
le ke ik karvaT paTak detii hai vo takiya pe sir
jab khanak uThtii hai.n sotii la.Dkiyo.n kii chuu.Diyaa.n
aah ban kar uThne lagtaa hai kaleja se dhu.aa.n
ho ga.ii beva kii KHaatir nii.nd bhii jaise haraam
muKHtasar saa ahd-e-vaslat de gayaa soz-e-davaam
dopahar kii chhaa.nv daur-e-shaadmaanii ho gayaa
pyaas bhii bujhne na paa.ii KHatm paanii ho gayaa
le rahii hai karvaTo.n par karvaTe.n baa-iztiraar
aag me.n paara hai yaa bistar pe jism-e-be-qaraar
pa.D ga.ii ik aah kar ke ro ke uTh baiThii kabhii
u.ngliyo.n me.n le ke zulf-e-KHam-ba-KHam ai.nThii kabhii
aa ke ho.nTo.n par kabhii maayuus aahe.n tham ga.ii.n
aur kabhii suunii kalaa.ii par nigaahe.n jam ga.ii.n
itnii duniyaa me.n kahii.n apnii jagah paatii nahii.n
yaas is had kii ki shauhar kii bhii yaad aatii nahii.n
aa rahe hai.n yaad paiham saas nando.n ke suluuk
phaT rahaa hai Gam se siina uTh rahii hai dil me.n huuk
apnii maa.n bahno.n kaa bhii aa.nkhe.n churaanaa yaad hai
aisii duniyaa me.n kisii kaa chho.D jaanaa yaad hai
baaGbaa.n to qabr me.n hai kaun ab dekhe bahaar
KHud usii ko tiir us ke karne vaale hai.n shikaar
jab nazar aataa nahii.n detaa ko.ii bekas kaa saath
zahr kii shiishii kii jaanib KHud-ba-KHud ba.Dhtaa hai haath
dil ta.Dap kar kah rahaa hai jald is duniyaa ko chho.D
chuu.Diyaa.n to.Dii.n to phir zanjiir-e-hastii ko bhii to.D
dam agar niklaa to kho.ii zindagii mil jaa.egii
ye nahi.n to KHair tanhaa qabr hii mil jaa.egii
vaa.n tujhe zillat kii nazro.n se na dekhegaa ko.ii
chaahe ha.nsnaa chaahe ronaa phir na rokegaa ko.ii
vaa.n sab ahl-e-dard hai.n sab saahab-e-insaaf hai.n
rahbar aage jaa chukaa raahe.n bhii terii saaf hai.n
dil inhii.n baato.n me.n uljhaa thaa ki dam ghabraa gayaa
haath le kar zahr kii shiishii labo.n tak aa gayaa
tilmilaatii aa.nkh jhapkaatii jhijaktii haa.nptii
pii ga.ii kul zahr aaKHir thartharaatii kaa.nptii
maut ne jhaTkaa diyaa kul uzv Dhiile ho ga.e
saa.ns ukh.Dii, nabz Duubii, ho.nT niile ho ga.e
aa.nkh jhapkii ashk Tapkaa hichkii aa.ii kho ga.ii
maut kii aaGosh me.n ik aah bhar kar so ga.ii
aur kar ik aah sulge hind kii rasmo.n kaa daam
ai javaanaa-marg beva tujh pe 'kaifii' kaa salaam

Kaifi Azmi
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now