Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".rojn"

Nazm MATCHES FOR ".rojn"

Nazm

baiTha hai mere samne wo

baiThaa hai mere saamne vo
jaane kisii soch me.n pa.Daa hai
achchhii aa.nkhe.n milii hai.n us ko
vahshat karnaa bhii aa gayaa hai
bichh jaa.uu.n mai.n us ke raaste me.n
phir bhii kyaa is se faa.eda hai
ham dono.n hii ye to jaante hai.n
vo mere liye nahii.n banaa hai
mere liye us ke haath kaafii
us ke liye saaraa falsafa hai
merii nazro.n se hai pareshaa.n
KHud apnii kashish se hii KHafaa hai
sab baat samajh rahaa hai lekin
gum-sum saa mujh ko dekhtaa hai
jaise mele me.n ko.ii bachcha
apnii maa.n se bichha.D gayaa hai
us ke siine me.n chhup ke ro.uu.n
meraa dil to ye chaahtaa hai
kaisaa KHush-ra.ng phuul hai vo
jo us ke labo.n pe khil rahaa hai
yaa rab vo mujhe kabhii na bhuule
merii tujh se yahii du.aa hai

Fahmida Riaz
Nazm

man

ye dil ke mire Tuk.De
yuu.n ro.e.n mire hote
mai.n duur kha.Dii dekhuu.n
ye mujh se nahii.n hogaa

Habib Jalib
Nazm

ai mere watan ke KHush-nawao

ik umr ke baa'd tum mile ho
ai mere vatan ke KHush-navaa.o
har hijr kaa din thaa hashr kaa din
dozaKH the firaaq ke alaa.o
ro.uu.n ki ha.nsuu.n samajh na aa.e
haatho.n me.n hai.n phuul dil me.n ghaa.o
tum aa.e to saath hii tumhaare
bichh.De hu.e yaar yaad aa.e
ik zaKHm pe tum ne haath rakkhaa
aur mujh ko hazaar yaad aa.e
vo saare rafiiq paa-ba-jaulaa.n
sab kushta-e-daar yaad aa.e
ham sab kaa hai ek hii qabiila
ik dasht ke saare ham-safar hai.n
kuchh vo hai.n jo duusro.n kii KHaatir
aashufta-nasiib o dar-ba-dar hai.n
kuchh vo hai.n jo KHil.at-o-qabaa se
aivaan-e-shahii me.n mo'tabar hai.n
suqraat o masiih ke fasaane
tum bhii to bahut sunaa rahe the
mansuur o husain se aqiidat
tum bhii to bahut jataa rahe the
kahte the sadaaqate.n amar hai.n
auro.n ko yahii bataa rahe the
aur ab jo hai.n jaa-ba-jaa saliibe.n
tum baa.nsuriyaa.n bajaa rahe ho
aur ab jo hai karbalaa kaa naqsha
tum mad.h-e-yaziid gaa rahe ho
jab sach tah-e-teG ho rahaa hai
tum sach se nazar churaa rahe ho
jii chaahtaa hai ki tum se puuchhuu.n
kyaa raaz is ijtinaab me.n hai
tum itne kaThor to nahii.n the
ye be-hisii kisii hisaab me.n hai
tum chup ho to kis tarah se chup ho
jab KHalq-e-KHudaa azaab me.n hai
socho to tumhe.n milaa bhii kyaa hai
ik luqma-e-tar qalam kii qiimat
Gairat ko faroKHt karne vaalo
ik kaasa-e-zar qalam kii qiimat
pindaar ke taajiro bataa.o
darbaan kaa dar qalam kii qiimat
naadaa.n to nahii.n ho tum ki samjhuu.n
Gaflat se ye zahr gholte ho
thaame hu.e maslahat kii miizaan
har sher kaa vazn taulte ho
aise me.n sukuut, chashm-poshii
aisaa hai ki jhuuT bolte ho
ik umr se adl o sidq kii laash
Gaasib kii saliib par ja.Dii hai
is vaqt bhii tum Gazal-saraa ho
jab zulm kii har gha.Dii ka.Dii hai
ja.ngal pe lapak rahe hai.n shole
taa.uus ko raqs kii pa.Dii hai
hai sab ko aziiz kuu-e-jaanaa.n
is raah me.n sab jiye mare hai.n
haa.n merii bayaaz-e-sher me.n bhii
barbaadi-e-dil ke marsiye hai.n
mai.n ne bhii kiyaa hai TuuT kar ishq
aur ek nahii.n ka.ii kiye hai.n
lekin Gam-e-aashiqii nahii.n hai
aisaa jo subuk-sarii sikhaa.e
ye Gam to vo KHush-ma.aal Gam hai
jo koh se juu-e-shiir laa.e
teshe kaa hunar qalam ko baKHshe
jo qais ko kohkan banaa.e
ai hiila-garaan-e-shahr-e-shiirii.n
aayaa huu.n pahaa.D kaaT kar mai.n
hai be-vatanii gavaah merii
har-chand phiraa huu.n dar-ba-dar mai.n
bechaa na Guruur-e-nai-navaazii
aisaa bhii na thaa subuk hunar me.n
tum bhii kabhii ham-navaa the mere
phir aaj tumhe.n ye kyaa hu.aa hai
miTTii ke vaqaar ko na becho
ye ahd-e-sitam jihaad kaa hai
daryuuza-garii ke maqbaro.n se
zindaa.n kii fasiil KHushnumaa hai
kab ek hii rut rahii hamesha
ye zulm kii fasl bhii kaTegii
jab harf kahegaa qum-be-iznii
martii hu.ii KHaak jii uThegii
lailaa-e-vatan ke pairahan me.n
baaruud kii buu nahii.n rahegii
phir baa.ndhe.nge abru.o.n ke dohe
phir mad.h-e-ruKH-o-dahan kahe.nge
Thahraa.e.nge un labo.n ko matlaa
jaanaa.n ke liye suKHan kahe.nge
afsaana-e-yaar o qissa-e-dil
phir anjuman anjuman kahe.nge

Ahmad Faraz
Nazm

aurat aur namak

izzat kii bahut sii qisme.n hai.n
ghuu.nghaT thappa.D gandum
izzat ke taabuut me.n qaid kii meKHe.n Tho.nkii ga.ii hai.n
ghar se le kar footpath tak hamaaraa nahii.n
izzat hamaare guzaare kii baat hai
izzat ke neze se hame.n daaGaa jaataa hai
izzat kii kanii hamaarii zabaan se shuruu.a hotii hai
ko.ii raat hamaaraa namak chakh le
to ek zindagii hame.n be-zaa.iqa roTii kahaa jaataa hai
ye kaisaa baazaar hai
ki ra.ng-saaz hii phiikaa pa.Daa hai
KHalaa kii hathelii pe pata.nge.n mar rahii hai.n
mai.n qaid me.n bachche jantii huu.n
jaa.ez aulaad ke liye zamiin khilanDarii honii chaahiye
tum Dar me.n bachche jantii ho isii liye aaj tumhaarii ko.ii nasl nahii.n
tum jism ke ek band se pukaarii jaatii ho
tumhaarii haisiyat me.n to chaal rakh dii ga.ii hai
ek KHuubsuurat chaal
chhoTii muskuraahaT tumhaare labo.n pe taraash dii ga.ii hai
tum sadiyo.n se nahii.n ro.ii.n
kyaa maa.n aisii hotii hai
tumhaare bachche phiike kyo.n pa.De hai.n

Sara Shagufta
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

wahima

ham tujhe apnii sadaa.o.n me.n basaane vaale
itnaa chiiKHe.n ki tire vahm lipaT kar ro.e.n
par tire vahm bhii terii hii tarah qaatil hai.n
so vahii dard hai jaanaa.n kaho kaise so.e.n

Sohaib Mugheera Siddiqi
Nazm

KHak-e-dil

lucknow mere vatan mere chaman-zaar vatan
tere gahvaara-e-aaGosh me.n ai jaan-e-bahaar
apnii duniyaa-e-hasii.n dafn kiye jaataa huu.n
tuu ne jis dil ko dha.Dakne kii adaa baKHshii thii
aaj vo dil bhii yahii.n dafn kiye jaataa huu.n
dafn hai dekh miraa ahd-e-bahaaraa.n tujh me.n
dafn hai dekh mirii ruuh-e-gulistaa.n tujh me.n
merii gul-posh javaa.n-saal uma.ngo.n kaa suhaag
merii shaadaab tamannaa ke mahakte hu.e KHvaab
merii bedaar javaanii ke firozaa.n mah o saal
merii shaamo.n kii malaahat mirii sub.ho.n kaa jamaal
merii mahfil kaa fasaana mirii KHalvat kaa fusuu.n
merii diivaangii-e-shauq miraa naaz-e-junuu.n
mere marne kaa saliiqa mire jiine kaa shu.uur
meraa naamuus-e-vafaa merii mohabbat kaa Guruur
merii nabzo.n kaa tarannum mire naGmo.n kii pukaar
mere shero.n kii sajaavaT mire giito.n kaa si.ngaar
lucknow apnaa jahaa.n sau.np chalaa huu.n tujh ko
apnaa har KHvaab-e-javaa.n sau.np chalaa huu.n tujh ko
apnaa sarmaaya-e-jaa.n sau.np chalaa huu.n tujh ko
lucknow mere vatan mere chaman-zaar vatan
ye mire pyaar kaa madfan hii nahii.n hai tanhaa
dafn hai.n is me.n mohabbat ke KHazaane kitne
ek unvaan me.n muzmar hai.n fasaane kitne
ik bahan apnii rifaaqat kii qasam khaa.e hu.e
ek maa.n mar ke bhii siine me.n liye maa.n kaa gudaaz
apne bachcho.n ke la.Dakpan ko kaleje se lagaa.e
apne khilte hu.e ma.asuum shaguufo.n ke liye
band aa.nkho.n me.n bahaaro.n ke javaa.n KHvaab basaa.e
ye mire pyaar kaa madfan hii nahii.n hai tanhaa
ek saathii bhii tah-e-KHaak yahaa.n sotii hai
arsa-e-dahr kii be-rahm kashaakash kaa shikaar
jaan de kar bhii zamaane se na maane hu.e haar
apne tevar me.n vahii azm-e-javaa.n-saal liye
ye mire pyaar kaa madfan hii nahii.n hai tanhaa
dekh ik sham-e-sar-e-raah-guzar chaltii hai
jagmagaataa hai agar ko.ii nishaan-e-manzil
zindagii aur bhii kuchh tez qadam chaltii hai
lucknow mere vatan mere chaman-zaar vatan
dekh is KHvaab-gah-e-naaz pe kal mauj-e-sabaa
le ke nau-roz-e-bahaaraa.n kii KHabar aa.egii
surKH phuulo.n kaa ba.De naaz se guu.ndhe hu.e haar
kal isii KHaak pe gul-ra.ng sahar aa.egii
kal isii KHaak ke zarro.n me.n samaa jaa.egaa ra.ng
kal mire pyaar kii tasviir ubhar aa.egii
ai mirii ruuh-e-chaman KHaak-e-lahad se terii
aaj bhii mujh ko tire pyaar kii buu aatii hai
zaKHm siine ke mahakte hai.n tirii KHushbuu se
vo mahak hai ki mirii saa.ns ghuTii jaatii hai
mujh se kyaa baat banaa.egii zamaane kii jafaa
maut KHud aa.nkh milaate hu.e sharmaatii hai
mai.n aur in aa.nkho.n se dekhuu.n tujhe paivand-e-zamii.n
is qadar zulm nahii.n haa.e nahii.n haa.e nahii.n
ko.ii ai kaash bujhaa de mirii aa.nkho.n ke diye
chhiin le mujh se ko.ii kaash nigaahe.n merii
ai mirii sham-e-vafaa ai mirii manzil ke charaaG
aaj taariik hu.ii jaatii hai.n raahe.n merii
tujh ko ro.uu.n bhii to kyaa ro.uu.n ki in aa.nkho.n me.n
ashk patthar kii tarah jam se ga.e hai.n mere
zindagii arsa-gah-e-johd-e-musalsal hii sahii
ek lamhe ko qadam tham se ga.e hai.n mere
phir bhii is arsa-gah-e-johd-e-musalsal se mujhe
ko.ii aavaaz pe aavaaz diye jaataa hai
aaj sotaa hii tujhe chho.D ke jaanaa hogaa
naaz ye bhii Gam-e-dauraa.n kaa uThaanaa hogaa
zindagii dekh mujhe hukm-e-safar detii hai
ik dil-e-shola-ba-jaa.n saath liye jaataa huu.n
har qadam tuu ne kabhii azm-e-javaa.n baKHshaa thaa!
mai.n vahii azm-e-javaa.n saath liye jaataa huu.n
chuum kar aaj tirii KHaak-e-lahad ke zarre
an-ginat phuul mohabbat ke cha.Dhaataa jaa.uu.n
jaane is samt kabhii meraa guzar ho ki na ho
aaKHirii baar gale tujh ko lagaataa jaa.uu.n
lucknow mere vatan mere chaman-zaar vatan
dekh is KHaak ko aa.nkho.n me.n basaa kar rakhnaa
is amaanat ko kaleje se lagaa kar rakhnaa

Jan Nisar Akhtar
Nazm

kahani

nii.nd me.n kyaa kyaa dekhe.n, ta.Dpe.n, ro.e.n, uTh uTh jaa.e.n
so jaane kii golii khaa.e.n, injection lagvaa.e.n

Mustafa Zaidi
Nazm

bhuka bangal

puurab des me.n Duggii baajii phailaa sukh kaa haal
dukh kii aaganii kaun bujhaa.e suukh ga.e sab taal
jin haatho.n me.n motii ro le aaj vahii ka.ngaal
aaj vahii ka.ngaal
bhuukaa hai ba.ngaal re saathii bhuukaa hai ba.ngaal
piiTh se apne peT lagaa.e laakho.n ulTe khaaT
bhiik-ma.ngaa.ii se thak thak kar utre maut ke ghaaT
jiyan-maran ke Daa.nDe milaa.e baiThe hai.n chanDaal re saathii
baiThe hai.n chanDaal
bhuukaa hai ba.ngaal re saathii bhuukaa hai ba.ngaal
naddii naale galii Dagar par laasho.n ke ambaar
jaan kii aisii mah.ngii shai kaa ulaT gayaa bevpaar
muTThii bhar chaaval se ba.Dh kar sastaa hai ye maal re saathii
sastaa hai ye maal
bhuukaa hai ba.ngaal re saathii bhuukaa hai ba.ngaal
koThariyo.n me.n gaa.nje baiThe baniye saaraa anaaj
sundar-naarii bhuuk kii maarii beche ghar-ghar laaj
chaupaT-nagarii kaun sambhaale chaar taraf bhuu.nchaal
chaar taraf bhuu.nchaal
bhuukaa hai ba.ngaal re saathii bhuukaa hai ba.ngaal
purkho.n ne ghar baar luTaayaa chho.D ke sab kaa saath
maa.e.n ro.ii.n bilak bilak kar bachche bha.e anaath
sadaa suhaagan bidhuvaa baaje khole sar ke baal re saathii
khole sar ke baal
bhuukaa hai ba.ngaal re saathii bhuukaa hai ba.ngaal
aattii-pattii chabaa-chabaa kar juujh rahaa hai des
maut ne kitne ghuu.nghaT maare badle sau sau bhes
kaal bakaT phailaa.e rahaa hai biimaarii kaa jaal re saathii
biimaarii kaa jaal
bhuukaa hai ba.ngaal re saathii bhuukaa hai ba.ngaal

Wamiq Jaunpuri
Nazm

diwali

mai.n jo ro.uu.n bhii to ye vaqt ke andhe saathii
kisii bikhre hu.e motii ko nahii.n chun sakte

Qateel Shifai
Nazm

tum hanste kyun ho

kyaa ab raat aise hii
guzar jaa.egii
ye raat hii to hai
jo tahliil ho jaatii hai ek nuqte me.n
aur ghuumtii hai
mere gird kaale bhinbhinaate hu.e
bha.nvre kii tarah
vo mere kaano.n mirii aa.nkho.n
merii gardan aur mere ro.e.n ro.e.n me.n
bhinbhinaatii hai
merii baGlo.n ke baalo.n se ulajhtii hu.ii
mere jism ke kone khudro.n me.n
gudgudaatii hu.ii
ye raat mere uupar phail jaatii hai
achaanak
o.Dh letii hai mujhe
mere jism kii por por me.n
ek jal-tara.ng chhe.D detii hai
mai.n nii.nd me.n uThtii huu.n
miraa halq KHushk ho rahaa hai
paanii kaa ek gilaas ThanDaa yaKH
mere ho.nTo.n mere halq mere siine
ko tar kartaa hu.aa
mere jism kii jal-tara.ng me.n mil jaataa hai
mai.n darvaaze par dastak detii huu.n
tum sun rahe ho
raat kii jal-tara.ng mere jism se
phuuT rahii hai
darvaaza khultaa hai
mai.n tumhaare aadhe na.nge badan ko
daboch letii huu.n
tumhaarii naaf ke ga.Dhe me.n
naak kii nok ghuse.Dtii huu.n
tum muskuraa rahe ho
raat kii sharaarat mere jism par
phaile hu.e dekh kar
tum ha.nste
raat kono.n khudro.n me.n phail rahii hai
mai.n tumhaare kap.De utaar detii huu.n
aur vo khel kheltii huu.n
jo raat mere saath khel rahii thii
mai.n tumhaare jism ke gird
apnii zabaan apne daa.nto.n aur naaKHuno.n ke saath
bhinbhinaane lagtii huu.n
tum muskuraa rahe ho
tumhaarii muskuraahaT
mere jism kii poro.n ko aur khol rahii hai
mai.n zaKHmii kar detii huu.n tumhe.n
tum ha.ns rahe ho
raat ke paro.n pe savaar bha.nvre kii tarah
mujhe bhinbhinaate dekh kar
tumhaarii kushaada aa.nkho.n ke kone
phailne lagte hai.n
tumhaaraa jism aka.D jaataa hai
nahii.n aaj tum
tum khilkhilaate ho
mai.n tumhaare ak.De hu.e jism par
apnii khulii hu.ii poro.n ko rakh detii huu.n
tumhaaraa jism raat ke jhaag se bhar jaataa hai
tum ha.nste ho
ha.nste hii rahte ho

Azra Abbas
Nazm

ye bhi ghalat hai wo bhi ghalat

kal baazaar me.n bhayyaa shaafii
piine aa.e ThanDii coffee
ik do packet biscuit khaa.e
Thuu.ns ga.e do darjan toffee
aaluu chhole khaa kar bole
barfii ek kilo hai kaafii
ammii jii kii baat na maanii
abbuu se kii va.ada-KHilaafii
aisaa khaTkaa peT kaa maTkaa
allaah mu.aafii allaah mu.aafii
guDDuu kaa bhii haal sunaa.e.n
duudh piye.n na anDe khaa.e.n
phal tarkaarii ek na bhaa.e
Gusse me.n bas ho.nT chabaa.e.n
dekh ke dastar-KHvaan pe machhlii
paa.nv paTaKHte bhaage jaa.e.n
chaaval roTii gosht kii boTii
dekhe.n to naKHre dikhlaa.e.n
din kaa ho yaa raat kaa khaanaa
ro.e.n piiTe.n shor machaa.e.n
duble patle ruukhe suukhe
baat karo to la.Dne aa.e.n
itne halke phulke se hai.n
fan chale to u.D hii jaa.e.n

Ahmad Hatib Siddiqi
Nazm

bachcha mazdur

mai.n huu.n ik bachcha mazduur
bachpan se huu.n koso.n duur
sub.h se kaam pe jaataa huu.n
shaam ko vaapas aataa huu.n
mai.n bhii pa.Dhnaa chaahtaa huu.n
aage ba.Dhnaa chaahtaa huu.n
khel kuud ko vaqt nahii.n
kyaa jii mai.n bad-baKHt nahii.n
chaahtaa huu.n Gubbaare luu.n
ham-sin yaaro.n se kheluu.n
lekin kyaa kar saktaa huu.n
din bhar kaam pe rahtaa huu.n
kis se dil kii baat kahuu.n
kab tak mai.n KHud pe ro.uu.n
haalat se majbuur huu.n mai.n
aur bachcha mazduur huu.n mai.n
kaash ko.ii mujh ko samjhe
mujh se na bachpan chhiine

Ameen Hazin
Nazm

unhen mujhse shikayat hai

unhe.n mujh se shikaayat hai ki mai.n maazii me.n jiitii huu.n
mire ash.aar me.n aaseb hai.n guzre zamaano.n ke
vo kahte hai.n kii yaade.n saa.e kii maanind mere saath rahtii hai.n
ye sach hai is se kab inkaar hai mujh ko
mai.n aksar jaagte din me.n bhii aa.nkhe.n muu.nd letii huu.n
ko.ii suurat ko.ii aavaaz ko.ii zaa.iqa yaa lams jab jaaduu jagaataa hai
to gard-aaluud miinaa-taur tasviire.n achaanak bolne lagtii hai.n naaTak-manch sajtaa hai
kisii TuuTe hu.e sanduuq me.n rakkhe hu.e
bosiida maKHtuute se ko.ii daastaa.n tamsiil ban jaatii hai
jii uThte hai.n sab kirdaar maazii ke
sipaahii baadshaah KHil.at navaadir raqs-o-mausiiqii
kisii ke paa.nv me.n paa.el dhanak aa.nchal
kisii shamshiir kii bijlii ghanii barsaat kii badlii
kisii baara-darii me.n raag diipak kaa
kisii sehn-e-gulistaa.n me.n kadam ke pe.D par baiThii hu.ii chi.Diyaa.n
achaanak jaag jaatii hai.n
kisii gumnaam qasbe me.n ko.ii TuuTii hu.ii mehraab KHasta-haal-Dev.Dhii kii jhalak
ma.aduum kar detii hai hotel chaa.e-KHaane bas ke adde Dher kuu.De ke
ka.ii sadiyaa.n guzar jaatii hai.n sar se
aur ko.ii gum-gashta shahr-e-raftagaa.n bedaar hotaa hai
isii manzar kaa hissa ban ke mai.n tasviir ho jaatii huu.n kho jaatii huu.n maazii me.n
me.n aksar aabnaa-e-vaqt par kaaGaz kii naav Daal detii huu.n
to paanii apnaa rasta mo.D detaa hai
mai.n jab chaahuu.n
salonii saa.nvlii naT-khaT madhur yaade.n uThaa laa.uu.n la.Dakpan ke gharo.ndo.n se
mai.n jab chaahuu.n to kaalii koTharii me.n qaid
ranjiida pashemaa.n zaKHm-KHuurda-saa.ato.n biite dino.n ko pyaar se chhuu kar
dilaasa duu.n thapak kar loriyaa.n duu.n
KHuub ro.uu.n KHuub ro.uu.n shaant ho jaa.uu.n
ye maazii meraa maazii hai
faqat mere tasarruf me.n hai
merii milkiyyat hai meraa virsa hai
na meraa haal par bas hai
aur aane vaalaa kal bhii kis ne dekhaa hai

Azra Naqvi
Nazm

saugandhi

raat aa.e mirii haDDiyaa.n jaage.n
din jaage mai.n so.uu.n
apne ujaa.D badan se lag kar
kabhii ha.nsuu.n, kabhii ro.uu.n
ek bhayaanak sapnaa: aag me.n lipTii jaltii jaa.uu.n
cholii me.n a.Dse sikko.n ke sang pighaltii jaa.uu.n

Kumar Pashi
Nazm

diwangi

apne bachcho.n ko na ro.e.n
kisii bachche kii aa.nkho.n me.n
kabhii vahshat na dar aa.e

Ekram Khawar
Nazm

raqs

naach haa.n naach ki har shorish-o-ha.ngaama par
phail jaa.e tirii jhan-jhan kaa hasii.n pairaahan
naach haa.n naach ki siine me.n tire
ek motii kii tarah raaz zamaane kaa simaT kar rah jaa.e
baazu.o.n ko kabhii hone de daraaz
jam.a karne de KHad-o-KHaal kabhii apnii hasii.n aa.nkho.n ko
farsh-e-aavaaz pe rakh apne pur-asraar qadam
aur chamakte hu.e sa.ngiit kaa jaaduu pii jaa
naach sad-nashsha-o-shaadaabii se
naachtii jaa isii mastii me.n ki tuu ek ka.nval ban jaa.e
aur tujh ko kisii taalaab ke siine me.n utaar aa.e.n ham
bhuut aa kar tirii ra.ngat me.n baseraa kar le.n
aur ham
buu.Dhe daraKHto.n kii kuhan-saal laTaktii hu.ii shaaKHo.n
se lipaT kar ro.e.n
saal-haa-saal lipaT kar ro.e.n

Rajinder Manchanda Bani
Nazm

insan ki fariyaad

haa.n ai masaaf-e-hastii! mat puuchh mujh se kyaa huu.n
ik arsa-e-balaa huu.n ik luqma-e-fanaa huu.n
majbuuriyo.n ne Daalaa gardan me.n merii phandaa
KHud-karda-e-vafaa huu.n jaa.n-daada-e-razaa huu.n
sayyaad haadse kaa kartaa hai meraa piichhaa
murG-e-buriida-par huu.n said-e-shikasta-paa huu.n
hai zaat merii majma.a saarii buraa.iyo.n kaa
kahne ko mai.n ba.Daa huu.n lekin bahut buraa huu.n
aazaadiyo.n kii mujh par tohmat hii hai saraasar
mai.n qaidii-e-havas huu.n mai.n banda-e-havaa huu.n
ik baat ho bataa.uu.n ik dard ho sunaa.uu.n
ro.uu.n bhalaa kahaa.n tak kab tak pa.Daa karaahuu.n
kam-baKHt dil kuchh aisaa mai.n saath le ke aayaa
ik lamha jis ke haatho.n duniyaa me.n sukh na paayaa
jo josh is me.n uTThaa haalaat ne dabaayaa
jo sho.ala is me.n bha.Dkaa taqdiir ne bujhaayaa
ummiid kaa ye Guncha khilte kabhii na dekhaa
ye aarzuu kaa paudaa phaltaa nazar na aayaa
go is me.n maujzan thii qaum o vatan kii ulfat
lekin Garaz ne is ko kuchh aur hii sikhaayaa
hotii nahii.n rasaa.ii ummiid ke ufuq tak
tuul-e-amal ne is ko ik jaal me.n pha.nsaayaa
kii rahbarii KHirad ne har-chand rahnumaa.ii
is juhd par bhii lekin khultii nahii.n sachchaa.ii
paayaa na mai.n ne ab tak maqsad kaa apne saahil
kii bahr-e-ma.arfat me.n din raat aashnaa.ii
is justujuu me.n mai.n ne kii sair-e-tuur-o-aiman
parbat ko ghar banaayaa jangal se lau lagaa.ii
mandir ko jaa ke dekhaa girjaa me.n jaa ke Dhuu.nDaa
masjid ko chhaan maaraa us kii na diid paa.ii
jogii kaa ruup dhaaraa ban me.n kiyaa guzaaraa
tan par bhabhuut mal kar dhuunii bahut ramaa.ii
jap tap me.n umr apnii mai.n ne basar kii aksar
ban ban ke piir-e-raahib jaa KHaanqaah basaa.ii
suufii bhii ban ke dekhaa aur rind-e-be-riyaa bhii
kar naara-e-anaa-al-haq ik khalbalii machaa.ii
phirtii hai.n maarii maarii mushtaaq-e-jalva aa.nkhe.n
par ik jhalak se ba.Dh kar detaa nahii.n dikhaa.ii
uTh jaa nazar se merii haa.n ai hijaab-e-hastii
husn-e-azal nihaa.n hai zer-e-naqaab-e-hastii
ye zindagii-e-insaa.n ik KHvaab hai pareshaa.n
bedaarii-e-adam hai ta.abiir-e-KHvaab-e-hastii
dekhe.n agar to kyuu.n-kar ham jalva-e-ma.aarif
tuu zulmat-e-nazar hai ai aaftaab-e-hastii
taskii.n ko zahr-e-qaatil aab-o-havaa-e-aalam
raahat kaa dushman-e-jaa.n har inqalaab-e-hastii
ai tishna-e-haqiiqat dhoke me.n tuu na aanaa
ik daam-e-pur-KHatar hai mauj-e-saraab-e-hastii
chaahe agar rihaa.ii pesh-az-fanaa fanaa ho
paadaash-e-jurm-e-hastii hai ye azaab-e-hastii

Ghulam Bhik Nairang
Nazm

shana-ba-shana

mujhe kuchh nahii.n ma.aluum kyaa chaahtii ho tum mujh se
mere paas hai kyaa jo mai.n de saktaa huu.n kisii ko
tabl-o-alam hai paas apne na mulk-o-maal
aur phir ko.ii bahut KHaas chiiz hii honii chaahiye tumhe.n nazar karne ko to
kyaa nahii.n hai tumhaare paas pahle se
husn aisaa ki KHudaa bhii KHush ho gayaa hogaa tumhe.n banaa kar
raunaq sii lag jaatii hai baiTh jaatii ho jahaa.n
chaltii ho to saath chale.n sarv-o-sanobar
uupar se paayaa hai zehn-e-rasaa
mai.n to azal se martaa aayaa huu.n husn aur daanish ke imtizaaj par
mahz KHuub-suurat aurat kabhii na lubhaa sakii mujhe
na hii muta.assir kar sakii mujhe kam-shakl daanish-varii
mai.n aksar kahtaa huu.n tum me.n KHudaa ne jam.a kar diye hai.n chaa.nd aur suuraj
daastaano.n se maavaraa chande aaftaab chande mahtaab ko.ii hai to tum
aur phir tumhaarii aavaaz
pattharo.n ko pighlaa dene vaalaa gudaaz hai is me.n
boltii ho to charaaG se jal uThte hai.n mahfil me.n
kyuu.n sharminda kartii ho ye kah kar mujhe ki tumhe.n zaruurat hai merii
yaad aayaa ek roz kahaa thaa tum ne
har kisii ko ek shaana chaahiye jis par sar rakh ke ro sake vo
aur fikr na ho ki mazaaq u.Daayaa jaa.egaa is kaa yaa banaayaa jaa.egaa is baat kaa bata.nga.D
lekin merii jaan aisaa kaun saa dikh hai jo naubat aa ga.ii rone kii
kyaa kahte hai.n ro.e.n tumhaare dushman
go mai.n tumhaaraa dushman nahii.n lekin mai.n jo huu.n rone ke liye
mere shaane par sar rakh kar ro.ii.n agar tum
to tumhaare aa.nsuu na po.nchh sakuu.ngaa mai.n
mai.n to KHud bah jaa.uu.ngaa aa.nsu.o.n me.n
mujhe to is KHayaal hii se ronaa aa rahaa hai ki tumhaarii aa.nkho.n me.n bhare ho.n aa.nsuu
tumhe.n sach-much rotaa dekh kar kyaa haal hogaa meraa
haa.n ek suurat ho saktii hai albatta
tum ro lo mere shaane par sar rakh kar
aur mai.n ro luu.n tumhaare shaane par sar rakh kar
kyaa ye mumkin hai
shaana-ba-shaana

Mohammad Haneef Rame
Nazm

bhai-chaara

ja.ng chhi.Dii ho sarhad par yaa kahii.n lagii ho aag
puuraa ho armaan kisii kaa yaa so jaa.e.n bhaag
merii biin judaa hai sab se merii judaa hai raag
merii duniyaa khel tamaashaa mai.n huu.n munnaa pyaaraa
sab ke dil kii raahat huu.n mai.n sab kii aa.nkh kaa taaraa
mai.n ro.uu.n to mujh ko ghar ke saare log manaa.e.n
mai.n so.uu.n to mere sapno.n me.n pariyaa.n aa jaa.e.n
mai.n jaaguu.n to mujh ko ammii apne gale lagaa.e.n
mai.n gaa.uu.n to gaa.e jaise ye aalam hii saaraa
sab ke dil kii raahat huu.n mai.n sab kii aa.nkh kaa taaraa
duniyaa ke saare bachcho.n kaa yaksaa.n hai afsaana
mere hii jaisaa hai sab kii fitrat kaa paimaana
miltii-jultii sii aadat hai ronaa ho yaa gaanaa
merii manzil pyaar mohabbat meraa sapnaa nyaaraa
sab ke dil kii raahat huu.n mai.n sab kii aa.nkh kaa taaraa
merii duniyaa ja.ng nahii.n hai kaisii haathaa-paa.ii
ho ko.ii hinduu yaa muslim sikh ho yaa iisaa.ii
merii nazar me.n sab yaksaa.n hai.n sab hai.n mere bhaa.ii
mere jaise bachcho.n kaa maz.hab hai bhaa.ii-chaara
sab ke dil kii raahat huu.n mai.n sab kii aa.nkh kaa taaraa

Shaukat Pardesi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now