Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "KHat"

Nazm MATCHES FOR "KHat"

Nazm

daraKHt-e-zard

nahii.n ma.aluum 'zaryuun' ab tumhaarii umr kyaa hogii
vo kin KHvaabo.n se jaane aashnaa naa-aashnaa hogii
tumhaare dil ke is duniyaa se kaise silsile ho.nge
tumhe.n kaise gumaa.n ho.nge tumhe.n kaise gile ho.nge
tumhaarii sub.h jaane kin KHayaalo.n se nahaatii ho
tumhaarii shaam jaane kin malaalo.n se nibhaatii ho
na jaane kaun doshiiza tumhaarii zindagii hogii
na jaane us kii kyaa baayastagii shaa.istagii hogii
use tum phone karte aur KHat likhte rahe hoge
na jaane tum ne kitnii kam Galat urdu likhii hogii
ye KHat likhnaa to daqyaanuus kii pii.Dhii kaa qissa hai
ye sinf-e-nasr ham naa-baaliGo.n ke fan kaa hissa hai
vo ha.nstii ho to shaayad tum na rah paate ho haalo.n me.n
ga.Dhaa nanhaa saa pa.D jaataa ho shaayad us ke gaalo.n me.n
gumaa.n ye hai tumhaarii bhii rasaa.ii naa-rasaa.ii ho
vo aa.ii ho tumhaare paas lekin aa na paa.ii ho
vo shaayad maa.ide kii gand biryaanii na khaatii ho
vo naan-e-be-KHamiir-e-maida kam-tar hii chabaatii ho
vo doshiiza bhii shaayad daastaano.n kii ho dil-daada
use ma.aluum hogaa 'zaal' thaa 'sohraab' kaa daadaa
tahamtan ya.anii 'rustam' thaa giraamii 'saam' kaa vaaris
giraamii 'saam' thaa sulb-e-nar-e-'maanii' kaa KHush-zaada
(ye merii ek KHvaahish hai jo mushkil hai)
vo 'najm'-aafa.ndi-e-marhuum ko to jaantii hogii
vo nauho.n ke adab kaa tarz to pahchaantii hogii
use kad hogii shaayad un sabhii se jo lapaa.Dii ho.n
na ho.nge KHvaab us kaa jo gavayye aur khilaa.Dii ho.n

Jaun Eliya
Nazm

aaKHiri mulaqat

kuchh chaa.nd chamakte gaalo.n ke
kuchh bha.nvre kaale baalo.n ke
kuchh naazuk shikne.n aa.nchal kii
kuchh narm lakiire.n kaajal kii
ik kho.ii ka.Dii afsaano.n kii
do aa.nkhe.n raushan-daano.n kii
ik surKH dulaa.ii goT lagii
kyaa jaane kab kii choT lagii
ik chhallaa phiikii ra.ngat kaa
ik loket dil kii suurat kaa
ruumaal ka.ii resham se ka.Dhe
vo KHat jo kabhii mai.n ne na pa.Dhe
mat roko inhe.n paas aane do
ye mujh se milne aa.e hai.n
me.n KHud na jinhe.n pahchaan sakuu.n
kuchh itne dhu.ndle saa.e hai.n

Jan Nisar Akhtar
Nazm

ye pichhle ishq ki baaten hain

KHat KHuun se likhne kii rasme.n
jab aam thii.n ham dil vaalo.n me.n

Mohsin Naqvi
Nazm

aaKHiri KHat

vo vaqt mirii jaan bahut duur nahii.n hai
jab dard se ruk jaa.e.ngii sab ziist kii raahe.n
aur had se guzar jaa.egaa andoh-e-nihaanii
thak jaa.e.ngii tarsii hu.ii naakaam nigaahe.n
chhin jaa.e.nge mujh se mire aa.nsuu mirii aahe.n
chhin jaa.egii mujh se mirii be-kaar javaanii

Faiz Ahmad Faiz
Nazm

alaw

mai.n ne maazii se ka.ii KHushk sii shaaKHe.n kaaTii.n
tum ne bhii guzre hu.e lamho.n ke patte to.De
mai.n ne jebo.n se nikaalii.n sabhii suukhii nazme.n
tum ne bhii haatho.n se murjhaa.e hu.e KHat khole
apnii in aa.nkho.n se mai.n ne ka.ii maa.nje to.De
aur haatho.n se ka.ii baasii lakiire.n phe.nkii.n
tum ne palko.n pe namii suukh ga.ii thii so giraa dii
raat bhar jo bhii milaa ugte badan par ham ko
kaaT ke Daal diyaa jalte alaa.o me.n use

Gulzar
Nazm

tere KHushbu mein base KHat

pyaar kii aaKHirii puu.njii bhii luTaa aayaa huu.n
apnii hastii ko bhii lagtaa hai miTaa aayaa huu.n
umr-bhar kii jo kamaa.ii thii ga.nvaa aayaa huu.n
tere KHat aaj mai.n ga.ngaa me.n bahaa aayaa huu.n
aag bahte hu.e paanii me.n lagaa aayaa huu.n

Rajendra Nath Rahbar
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

bahut dinon baad

bahut dino.n ba.ad
tere KHat ke udaas lafzo.n ne
terii chaahat ke zaa.iqo.n kii tamaam KHushbuu
mirii rago.n me.n u.nDel dii hai
bahut dino.n ba.ad
terii baate.n
tirii mulaaqaat kii dhanak se dahaktii raate.n
ujaa.D aa.nkho.n ke pyaas paataal kii taho.n me.n
visaal-va.ado.n kii chand chi.ngaariyo.n ko saa.nso.n kii aa.nch de kar
shariir sho.alo.n kii sar-kashii ke tamaam tevar
sikhaa ga.ii hai.n
tire mahakte mahiin lafzo.n kii aabshaare.n
bahut dino.n baa'd phir se
mujh ko rulaa ga.ii hai.n
bahut dino.n ba.ad
mai.n ne sochaa to yaad aayaa
ki mere andar kii raakh ke Dher par abhii tak
tire zamaane likhe hu.e hai.n
sabhii fasaane likhe hu.e hai.n
bahut dino.n ba.ad
mai.n ne sochaa to yaad aayaa
ki terii yaado.n kii kirchiyaa.n
mujh se kho ga.ii hai.n
tire badan kii tamaam KHushbuu
bikhar ga.ii hai
tire zamaane kii chaahatii.n
sab nishaaniyaa.n
sab sharaarte.n
sab hikaayate.n sab shikaayate.n jo kabhii hunar me.n
KHayaal thii.n KHvaab ho ga.ii hai.n
bahut dino.n ba.ad
mai.n ne sochaa to yaad aayaa
ki mai.n bhii kitnaa badal gayaa huu.n
bichha.D ke tujh se
ka.ii lakiiro.n me.n Dhal gayaa huu.n
mai.n apne cigarette ke be-iraada dhu.e.n kii suurat
havaa me.n tahliil ho gayaa huu.n
na Dhuu.nDh merii vafaa ke naqsh-e-qadam ke reze
ki mai.n to terii talaash ke be-kanaar sahraa me.n
vahm ke be-amaa.n baguulo.n ke vaar sah kar
udaas rah kar
na-jaane kis rah me.n kho gayaa huu.n
bichha.D ke tujh se tirii tarah kyaa bataa.uu.n mai.n bhii
na jaane kis kis kaa ho gayaa huu.n
bahut dino.n ba.ad
mai.n ne sochaa to yaad aayaa

Mohsin Naqvi
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

hasan kuza-gar (2)

ai jahaa.n-zaad,
nashaat us shab-e-be-raah-ravii kii
mai.n kahaa.n tak bhuuluu.n?
zor-e-mai thaa ki mere haath kii larzish thii
ki us raat ko.ii jaam giraa TuuT gayaa
tujhe hairat na hu.ii!
ki tire ghar ke dariicho.n ke ka.ii shiisho.n par
us se pahle kii bhii durze.n thii.n bahut
tujhe hairat na hu.ii!
ai jahaa.n-zaad,
mai.n kuuzo.n kii taraf apne taGaaro.n kii taraf
ab jo baGdaad se lauTaa huu.n
to mai.n sochtaa huu.n
sochtaa huu.n tuu mere saamne aa.iina rahii
sar-e-baazaar dariiche me.n sar-e-bistar-e-san.jaab kabhii
tuu mere saamne aa.iina rahii
jis me.n kuchh bhii nazar aayaa na mujhe
apnii hii suurat ke sivaa
apnii tanhaa.i-e-jaan-kaah kii dahshat ke sivaa!
likh rahaa huu.n tujhe KHat
aur vo aa.iina mere haath me.n hai
is me.n kuchh bhii nazar aataa nahii.n
ab ek hii suurat ke sivaa!
likh rahaa huu.n tujhe KHat
aur mujhe likhnaa bhii kahaa.n aataa hai?
lauh-e-aa.iinaa pe ashko.n kii phavvaro.n hii se
KHat kyuu.n na likhuu.n?
ai jahaa.n-zaad,
nashaat us shab-e-be-raah-ravii kii
mujhe phir laa.egii?
vaqt kyaa chiiz hai tuu jaantii hai?
vaqt ik aisaa pati.ngaa hai
jo diivaaro.n pe aa.iino.n pe
paimaano.n pe shiisho.n pe
mire jaam o subuu mere taGaaro.n pe
sadaa re.ngtaa hai

Noon Meem Rashid
Nazm

nai tahzib

na.e unvaan se ziinat dikhaa.e.nge hasii.n apnii
na aisaa pech zulfo.n me.n na gesuu me.n ye KHam ho.nge

Akbar Allahabadi
Nazm

andeshe

dil ne aise bhii kuchh afsaane sunaa.e ho.nge
ashk aa.nkho.n ne piye aur na bahaa.e ho.nge
band kamre me.n jo KHat mere jalaa.e ho.nge
ek ik harf jabii.n par ubhar aayaa hogaa

Kaifi Azmi
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

tumhein pyar hai, to yaqin do,

tumhe.n pyaar hai, to yaqiin do,
mujhe na kaho, tumhe.n pyaar hai, mujhe dekhne kii na zid karo,
tumhe.n fikr ho, mire haal kii,
ko.ii guftuguu ho malaal kii,
jo KHayaal ho, na kiyaa karo,
na kahaa karo mirii fikr hai
mai.n aziiz-tar huu.n jahaan se
yaa iimaan se, na kahaa karo,
na likhaa karo mujhe varaq par, kisii farsh par,
na udaas ho, na hii KHush raho
mujhe soch kar, yaa kharoch kar, merii yaad ko na aavaaz do,
mujhe KHat me.n likh ke KHudaa.o.n kaa na do vaasta
tumhe.n pyaar me.n na qaraar hai, mujhe is zabaa.n kaa yaqiin nahii.n
kuchh aur ho, jo sunaa na ho, jo kahaa na ho jo likhaa na ho
to yaqiin ho!
ruko aur tho.Daa saa zabt lo, mujhe soch lene ko vaqt do,
chalo yuu.n karo mire vaaste ki buland-o-baalaa imaarato.n kaa lo jaa.eza
jo falak ko bosa lagaa rahii ho.n imaarate.n,
jo tumhaare pyaar se le rahii ho.n mushaabahate.n
jo ho sab se ziyaada buland-o-baalaa alag-thalag
use sar karo,
use chhat talak, haa.n yahii.n ruko, ye vo hii hai chhat,
zaraa saa.ns lene ko qayaam lo, miraa naam lo,
to safar kii saarii thakan yahii.n pe utaar lo,
ab! mire tumhaare jo darmiyaa.n me.n hai faasla, vo zaraa saa hai,
vo miTaa sako, to Guruur Dhaatii bulandiyo.n ko phalaa.ng do!
tumhe.n pyaar hai to yaqiin do!!

Arif Ishtiaque
Nazm

tazad

yaziid naqsha-e-jaur-o-jafaa banaataa hai
husain us me.n KHat-e-karbalaa banaataa hai
yaziid mausam-e-isyaa.n kaa laa-'ilaaj maraz
husain KHaak se KHaak-e-shifaa banaataa hai
yaziid kaaKH-e-kasaafat kii Doltii buniyaad
husain husn kii hairat-saraa banaataa hai
yaziid tez havaa.o.n se jo.D to.D me.n gum
husain sar pe bahan ke ridaa banaataa hai
yaziid likhtaa hai taariikiyo.n ko KHat din bhar
husain shaam se pahle diyaa banaataa hai
yaziid aaj bhii bante hai.n log koshish se
husain KHud nahii.n bantaa KHudaa banaataa hai

Ghulam Mohammad Qasir
Nazm

barsat ki bahaaren

uu.nchaa makaan jis kaa hai pach khanaa sivaayaa
uupar kaa khan Tapak kar jab paanii niiche aayaa
us ne to apne ghar me.n hai shor-Gul machaayaa
muflis pukaarte hai.n jaane hamaaraa
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

hoga yun hi

mai.n tumhe.n ek KHat likhuu.ngaa
magar use Daak me.n nahii.n Daaluu.ngaa
mai.n banaa.uu.ngaa us kii ek naav
jis pe savaar kar ke apnii soch
Thel duu.ngaa barsaat ke paanii me.n
tumhaarii or
tum bhii ek KHat likhnaa
javaabii
magar use Daak me.n mat Daal denaa
naav pahu.nchne se pahle hii
jab Duub jaa.egii
tum tak nahii.n pahu.nch paa.egii
merii soch
tum jhujhlaanaa mujh par
aur Gusse me.n aa kar
phaa.D denaa us KHat ko
jo tum ne abhii nahii.n likhaa

Irshad Kamil
Nazm

use maine nahin dekha

vo kaisii hai
use mai.n ne nahii.n dekhaa
sunaa hai vo zamii.n-zaadii
dhanak se apne KHvaabo.n ke ufuq gul-ra.ng rakhtii hai
mire KHaashaak se aage kisii manzar me.n rahtii hai
havaa ke ghar me.n rahtii hai
vo kis suuraj kaa hissa hai
vo kis taare kii miTTii hai
use mai.n ne nahii.n dekhaa
mirii aa.nkho.n se le kar us kii aa.nkho.n tak kise ma.aluum hai
kitne sitaare hai.n
mujhe kyaa ilm vo kis rang ke kap.De pahantii hai
vo KHaalii bartano.n me.n apnaa din kaise biTaatii hai
vo KHushiyaa.n Dhuu.nDtii hai aur KHud ko band almaarii me.n rakh kar
bhuul jaatii hai
vo ghar ke lawn me.n baiThii bahut kuchh sochtii hogii
ki meraa rang kaisaa hai
mirii aa.nkho.n ke raushan qumqumo.n me.n taab kitnii hai
mirii shiryaan me.n sahme hu.e bachcho.n pe kyaa guzrii
vo kis raste pe chal nikle ki apne ghar nahii.n pahu.nche
vo akasr sochtii hogii
mire kamre me.n buu.Dhii faahisha tanhaa.ii ke hote
mire din kaise kaTte hai.n
mirii be-KHvaab raate.n kin KHayaalo.n me.n guzartii hai.n
kahaa.n ishq-e-gurezaa.n kii kahaanii KHatm hotii hai
vo ghar ke lawn me.n baiThii yahii kuchh sochtii hogii
ki mere naam ke piichhe mirii tasviir kaisii hai
mire KHat bhii nahii.n us ke tasarruf me.n
ki un ko khol kar mere badan ke raaz tak pahu.nche
mujhe us ne nahii.n dekhaa
na mai.n ne us ko dekhaa hai
na us ne mujh ko dekhaa hai
magar apnii mohabbat me.n ajab husn-e-tavaazun hai
vo akasr sochtii hogii
mai.n kitnaa apne daftar me.n huu.n kitnaa ghar kii KHalvat me.n
vo mujh ko mujh pe hii taqsiim kar ke dekhtii hogii
mujhe mahsuus hotaa hai
ko.ii dil chiirtii KHushbuu mujhe aavaaz detii hai
magar aavaaz ke piichhe ko.ii chehra nahii.n hotaa
vo mujh ko dekh letii hai
magar merii basaarat me.n mahak chehra nahii.n paatii
ki KHushbuu kis ne dekhii hai
sadaa ko kis ne pak.Daa hai
makaanii duuriyaa.n kaisii? zamaanii qurbate.n kaisii?
vo meraa jism hai lekin use mai.n ne nahii.n dekhaa

Abbas Tabish
Nazm

aaina-dar-aina

is baar vo milaa to ajab us kaa rang thaa
alfaaz me.n tara.ng na lahja daba.ng thaa
ik soch thii ki bikhrii hu.ii KHaal-o-KHat me.n thii
ik dard thaa ki jis kaa shahiid a.ng a.ng thaa
ik aag thii ki raakh me.n poshiida thii kahii.n
ik jism thaa ki ruuh se masruuf-e-ja.ng thaa

Himayat Ali Shayar
Nazm

izhaar aur rasai

ek zarra kaf-e-KHaakistar kaa
sharar-e-jasta ke maanind kabhii
kisii an-jaanii tamannaa kii KHalish se masruur
apne siine ke dahakte hu.e tannuur kii lau se majbuur
ek zarra ki hamesha se hai KHud se mahjuur
kabhii naira.ng-e-sadaa ban ke jhalak uThtaa hai
aab o rang o KHat o mehraab kaa paivand kabhii
aur bantaa hai ma.aanii kaa KHudaavand kabhii
vo KHudaavand jo paa-basta-e-aanaat na ho!

Noon Meem Rashid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now