Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "aivaan"

Nazm MATCHES FOR "aivaan"

Nazm

mere hamdam mere dost!

gar mujhe is kaa yaqii.n ho mire hamdam mire dost
gar mujhe is kaa yaqii.n ho ki tire dil kii thakan
tirii aa.nkho.n kii udaasii tere siine kii jalan
merii dil-juu.ii mire pyaar se miT jaa.egii
gar miraa harf-e-tasallii vo davaa ho jis se
jii uThe phir tiraa uj.Daa hu.aa be-nuur dimaaG
terii peshaanii se Dhal jaa.e.n ye tazliil ke daaG
terii biimaar javaanii ko shifaa ho jaa.e
gar mujhe is kaa yaqii.n ho mire hamdam mare dost
roz o shab shaam o sahar mai.n tujhe bahlaataa rahuu.n
mai.n tujhe giit sunaataa rahuu.n halke shiirii.n
aabshaaro.n ke bahaaro.n ke chaman-zaaro.n ke giit
aamad-e-sub.h ke, mahtaab ke, sayyaaro.n ke giit
tujh se mai.n husn-o-mohabbat kii hikaayaat kahuu.n
kaise maGruur hasiinaa.o.n ke barfaab se jism
garm haatho.n kii haraarat me.n pighal jaate hai.n
kaise ik chehre ke Thahre hu.e maanuus nuquush
dekhte dekhte yak-laKHt badal jaate hai.n
kis tarah aariz-e-mahbuub kaa shaffaaf bilor
yak-ba-yak baada-e-ahmar se dahak jaataa hai
kaise gulchii.n ke liye jhuktii hai KHud shaaKH-e-gulaab
kis tarah raat kaa aivaan mahak jaataa hai
yuu.nhii gaataa rahuu.n gaataa rahuu.n terii KHaatir
giit buntaa rahuu.n baiThaa rahuu.n terii KHaatir
par mire giit tire dukh kaa mudaavaa hii nahii.n
naGma jarraah nahii.n muunis-o-Gam KHvaar sahii
giit nashtar to nahii.n marham-e-aazaar sahii
tere aazaar kaa chaara nahii.n nashtar ke sivaa
aur ye saffaak masiihaa mire qabze me.n nahii.n
is jahaa.n ke kisii zii-ruuh ke qabze me.n nahii.n
haa.n magar tere sivaa tere sivaa tere sivaa

Faiz Ahmad Faiz
Nazm

muhasara

tamaam suufii o saalik sabhii shuyuuKH o imaam
umiid-e-lutf pe aivaan-e-kaj-kulaah me.n hai.n
mo.azzaziin-e-adaalat bhii half uThaane ko
misaal-e-saa.il-e-mubarram nashista raah me.n hai.n

Ahmad Faraz
Nazm

farar

kitnii be-kaar umiido.n kaa sahaaraa le kar
mai.n ne aivaan sajaa.e the kisii kii KHaatir
kitnii be-rabt tamannaa.o.n ke mub.ham KHaake
apne KHvaabo.n me.n basaa.e the kisii kii KHaatir

Sahir Ludhianvi
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

ek darKHwast

zindagii ke jitne darvaaze hai.n mujh pe band hai.n
dekhnaa hadd-e-nazar se aage ba.Dh kar dekhnaa bhii jurm hai
sochnaa apne aqiido.n aur yaqiino.n se nikal kar sochnaa bhii jurm hai
aasmaa.n-dar-aasmaa.n asraar kii parte.n haTaa kar jhaa.nknaa bhii jurm hai
kyuu.n bhii kahnaa jurm hai kaise bhii kahnaa jurm hai
saa.ns lene kii to aazaadii mayassar hai magar
zinda rahne ke liye insaan ko kuchh aur bhii darkaar hai
aur is kuchh aur bhii kaa tazkira bhii jurm hai
ai KHudaavandaan-e-aivaan-e-aqaa.ed
ai hunar-mandaan-e-aa.iin-o-siyaasat
zindagii ke naam par bas ik inaayat chaahiye
mujh ko in saare jaraa.em kii ijaazat chaahiye

Ahmad Nadeem Qasmi
Nazm

apni malka-e-suKHan se

ai sham-e-'josh' o mash.al-e-aivaan-e-aarzuu
ai mehr-e-naaz o maah-e-shabistaan-e-aarzuu
ai jaan-e-dard-mandii o iimaan-e-aarzuu
ai sham-e-tuur o yuusuf-e-kan.aan-e-aarzuu
zarre ko aaftaab to kaa.nTe ko phuul kar
ai ruuh-e-sher sajda-e-shaa.ir qubuul kar

Josh Malihabadi
Nazm

ai mere watan ke KHush-nawao

ik umr ke baa'd tum mile ho
ai mere vatan ke KHush-navaa.o
har hijr kaa din thaa hashr kaa din
dozaKH the firaaq ke alaa.o
ro.uu.n ki ha.nsuu.n samajh na aa.e
haatho.n me.n hai.n phuul dil me.n ghaa.o
tum aa.e to saath hii tumhaare
bichh.De hu.e yaar yaad aa.e
ik zaKHm pe tum ne haath rakkhaa
aur mujh ko hazaar yaad aa.e
vo saare rafiiq paa-ba-jaulaa.n
sab kushta-e-daar yaad aa.e
ham sab kaa hai ek hii qabiila
ik dasht ke saare ham-safar hai.n
kuchh vo hai.n jo duusro.n kii KHaatir
aashufta-nasiib o dar-ba-dar hai.n
kuchh vo hai.n jo KHil.at-o-qabaa se
aivaan-e-shahii me.n mo'tabar hai.n
suqraat o masiih ke fasaane
tum bhii to bahut sunaa rahe the
mansuur o husain se aqiidat
tum bhii to bahut jataa rahe the
kahte the sadaaqate.n amar hai.n
auro.n ko yahii bataa rahe the
aur ab jo hai.n jaa-ba-jaa saliibe.n
tum baa.nsuriyaa.n bajaa rahe ho
aur ab jo hai karbalaa kaa naqsha
tum mad.h-e-yaziid gaa rahe ho
jab sach tah-e-teG ho rahaa hai
tum sach se nazar churaa rahe ho
jii chaahtaa hai ki tum se puuchhuu.n
kyaa raaz is ijtinaab me.n hai
tum itne kaThor to nahii.n the
ye be-hisii kisii hisaab me.n hai
tum chup ho to kis tarah se chup ho
jab KHalq-e-KHudaa azaab me.n hai
socho to tumhe.n milaa bhii kyaa hai
ik luqma-e-tar qalam kii qiimat
Gairat ko faroKHt karne vaalo
ik kaasa-e-zar qalam kii qiimat
pindaar ke taajiro bataa.o
darbaan kaa dar qalam kii qiimat
naadaa.n to nahii.n ho tum ki samjhuu.n
Gaflat se ye zahr gholte ho
thaame hu.e maslahat kii miizaan
har sher kaa vazn taulte ho
aise me.n sukuut, chashm-poshii
aisaa hai ki jhuuT bolte ho
ik umr se adl o sidq kii laash
Gaasib kii saliib par ja.Dii hai
is vaqt bhii tum Gazal-saraa ho
jab zulm kii har gha.Dii ka.Dii hai
ja.ngal pe lapak rahe hai.n shole
taa.uus ko raqs kii pa.Dii hai
hai sab ko aziiz kuu-e-jaanaa.n
is raah me.n sab jiye mare hai.n
haa.n merii bayaaz-e-sher me.n bhii
barbaadi-e-dil ke marsiye hai.n
mai.n ne bhii kiyaa hai TuuT kar ishq
aur ek nahii.n ka.ii kiye hai.n
lekin Gam-e-aashiqii nahii.n hai
aisaa jo subuk-sarii sikhaa.e
ye Gam to vo KHush-ma.aal Gam hai
jo koh se juu-e-shiir laa.e
teshe kaa hunar qalam ko baKHshe
jo qais ko kohkan banaa.e
ai hiila-garaan-e-shahr-e-shiirii.n
aayaa huu.n pahaa.D kaaT kar mai.n
hai be-vatanii gavaah merii
har-chand phiraa huu.n dar-ba-dar mai.n
bechaa na Guruur-e-nai-navaazii
aisaa bhii na thaa subuk hunar me.n
tum bhii kabhii ham-navaa the mere
phir aaj tumhe.n ye kyaa hu.aa hai
miTTii ke vaqaar ko na becho
ye ahd-e-sitam jihaad kaa hai
daryuuza-garii ke maqbaro.n se
zindaa.n kii fasiil KHushnumaa hai
kab ek hii rut rahii hamesha
ye zulm kii fasl bhii kaTegii
jab harf kahegaa qum-be-iznii
martii hu.ii KHaak jii uThegii
lailaa-e-vatan ke pairahan me.n
baaruud kii buu nahii.n rahegii
phir baa.ndhe.nge abru.o.n ke dohe
phir mad.h-e-ruKH-o-dahan kahe.nge
Thahraa.e.nge un labo.n ko matlaa
jaanaa.n ke liye suKHan kahe.nge
afsaana-e-yaar o qissa-e-dil
phir anjuman anjuman kahe.nge

Ahmad Faraz
Nazm

naya janm

abhii ik saal guzraa hai yahii mausam yahii din the
magar mai.n apne kamre me.n bahut afsurda baiThaa thaa
na ko.ii saa.nvle mahbuub kii yaado.n kaa afsaana
na aivaan-e-zamistaa.n kii taraf jaane kii kuchh KHvaahish
kisii ne haal puuchhaa to bahut hii be-niyaazii se
kahaa jii haa.n KHudaa kaa shukr hai mai.n KHairiyat se huu.n
ko.ii ye puuchhtaa kyuu.n aaj kal ko.ii Gazal likkhii
na jaane baat kyaa hai in dino.n kuchh aisaa lagtaa hai
tumhaarii har Gazal me.n miir kaa andaaz miltaa hai
har ik misre se jaise dhiimii dhiimii aa.nch uThtii hai
tumhaare sher pa.Dh kar jaane kyuu.n mahsuus hotaa hai
ki ko.ii saaz par maddham suro.n me.n gungunaataa hai
magar ik baat puuchhuu.n tum KHafaa to ho na jaa.oge
ye aaKHir kyaa sabab hai aaj kal nazme.n nahii.n likhte
tumhaarii aap-biitii bhii abhii tak naa-mukammal hai
ise to naaqidaan-e-fan ne sunte hii saraahaa hai
mai.n sab suntaa magar ye dil hii dil me.n sochtaa rahtaa
mire ahbaab kyaa jaane.n ki mujh par kyaa guzartii hai
mire afkaar pe ye kaisii viiraanii sii chhaa.ii hai
bahut kuchh sochtaa huu.n phir bhii ab sochaa nahii.n jaataa
bahut kuchh chaahtaa huu.n phir bhii ko.ii bas nahii.n chaltaa
magar is bebasii me.n bhii mire dil kii ye haalat thii
kabhii jab ko.ii achchhii chiiz pa.Dhne ke liye miltii
to pahro.n ruuh par ik vajd kii sii kaifiyat hotii
rago.n me.n merii jaise KHuu.n kii gardish tez ho jaatii
lahuu kaa ek ik qatra ye kahtaa mai.n to zinda huu.n
mirii paamaaliyo.n me.n pal rahii hai ik tavaanaa.ii
yahii aalam rahaa to jaane mai.n kis roz uTh baiThuu.n
basant aayaa to yuu.n aayaa ki mai.n bhii jaise uTh baiThaa
saveraa hote hii har samt se jho.nke havaa.o.n ke
na.ii KHushbuu liye mujh ko jagaane ke liye aa.e
jidhar bhii aa.nkh uThaataa huu.n shafaq kii muskuraahaT hai
vahii suuraj hai lekin aur hii kuchh jagmagaahaT hai
na jaane kaise kaise phuul ab mujh ko bulaate hai.n
na jaane kitne kitne rang se dil ko lubhaate hai.n
fazaa me.n duur tak phaile hu.e vo khet sarso.n ke
ye kahte hai.n ki ab armaa.n nikaalo apne barso.n ke
tumhaare saamne phailaa hu.aa maidaan saaraa hai
ko.ii aavaaz detaa hai ki aa.o tum hamaare ho
mirii dhartii ke beTe merii duniyaa ke dulaare ho
tumhaarii aa.nkh me.n jo KHvaab so.e hai.n vo mere hai.n
tumhaare ashk ne jo biij bo.e hai.n vo mere hai.n
isii vaadii me.n phir se lauT kar ab tum ko aanaa hai
tumhaarii hii ye bastii hai tumhii.n ko phir basaanaa hai
ab is bastii me.n rakhte hii qadam kuchh aisaa lagtaa hai
ki is kaa zarra zarra patta patta kuchh nayaa saa hai
har ik raste pe jaise kuchh na.e chehre se milte hai.n
yahii jii chaahtaa hai jo mile ab us se ye puuchhe.n
tumhaaraa naam kyaa hai? tum kahaa.n ke rahne vaale ho
kuchh aisaa jaan pa.Dtaa hai ki pahle bhii mile hai.n ham
rahe hai.n saath yaa ik duusre ko jaante hai.n ham
agar tum saath the to tum bhii shaayad dost the mere
mujhe yaad aayaa dono.n saath hii college me.n pa.Dhte the
vo saare dosto.n kaa jam.a honaa mere kamre me.n
vo gap shap qahqahe vo apne apne ishq ke qisse
vo miiras road kii baate.n vo charche KHuub-ruuyo.n ke
kabhii aavaaragardii apnii un viiraan sa.Dko.n kii
kabhii baato.n me.n raate.n kaaTnaa sunsaan jaa.Do.n kii
kabhii vo chaandnii me.n apnaa yuu.n hii ghuumte rahnaa
kabhii vo chaa.e kii mezo.n pe ghanTo.n baiThnaa sab kaa
vo baate.n ilm-o-hikmat kii kabhii shikve-shikaayat kii
tumhe.n to yaad hogaa un me.n hii ik dost shaa.ir thaa
zaraa dekho to mujh ko Gaur se shaayad vo mai.n hii thaa
bahut din me.n mile hai.n ham to aa.o aaj jii bhar kar
ha.nse.n bole.n kahii.n aavaaragardii ke liye nikle.n
chale.n aur chal ke saare dosto.n ko phir bulaa laa.e.n
sajaa.e.n aaj phir mahfil kahii.n piine pilaane kii
mai.n tum ko aaj apnii kuchh na.ii baate.n bataa.uu.ngaa
mai.n tum ko aaj apnii kuchh na.ii nazme.n sunaa.uu.ngaa

Khalilur Rahman Azmi
Nazm

aaj

saathiyo! mai.n ne barso.n tumhaare liye
chaa.nd taaro.n bahaaro.n ke sapne bune
husn aur ishq ke giit gaataa rahaa
aarzuu.o.n ke aivaa.n sajaataa rahaa
mai.n tumhaaraa muGannii tumhaare liye
jab bhii aayaa na.e giit laataa rahaa
aaj lekin mire daaman-e-chaak me.n
gard-e-raah-e-safar ke sivaa kuchh nahii.n
mere barbat ke siine me.n naGmo.n kaa dam ghuT gayaa
taane.n chiiKHo.n ke ambaar me.n dab ga.ii hai.n
aur giito.n ke sur hichkiyaa.n ban ga.e hai.n
mai.n tumhaaraa muGannii huu.n naGma nahii.n huu.n
aur naGme kii taKHliiq kaa saaz-o-saamaa.n
saathiyo! aaj tum ne bhasm kar diyaa hai
aur mai.n apnaa TuuTaa hu.aa saaz thaame
sard laasho.n ke ambaar ko tak rahaa huu.n
mere chaaro.n taraf maut kii vahshate.n naachtii hai.n
aur insaa.n kii haivaaniyat jaag uThii hai
barbariyat ke KHuu.n-KHaar ifriit
apne naapaak jab.Do.n ko khole
KHuun pii pii ke Gurraa rahe hai.n

Sahir Ludhianvi
Nazm

hum log

dil ke aivaa.n me.n liye gul-shuda sham.o.n kii qataar
nuur-e-KHurshiid se sahme hu.e uktaa.e hu.e
husn-e-mahbuub ke sayyaal tasavvur kii tarah
apnii taariikii ko bhe.nche hu.e lipTaa.e hu.e

Faiz Ahmad Faiz
Nazm

fareb

(1)
naa-gahaa.n shor hu.aa
lo shab-e-taar-e-Gulaamii kii sahar aa pahu.nchii
u.ngliyaa.n jaag uThii.n
barbat o taa.uus ne a.ng.Daa.ii lii
aur mutrib kii hathelii se shu.aa.e.n phuuTii.n
khil ga.e saaz me.n naGmo.n ke mahakte hu.e phuul
log chillaa.e ki fariyaad ke din biit ga.e
raahzan haar ga.e
raah-rau jiit ga.e
qaafile duur the manzil se bahut duur magar
KHud-farebii kii ghanii chhaa.nv me.n dam lene lage
chun liyaa raah ke rezo.n ko KHazaf-rezo.n ko
aur samajh baiThe ki bas la.al-o-javaahar hai.n yahii
raahzan ha.nsne lage chhup ke kamii.n-gaaho.n me.n
ham-nashii.n ye thaa fara.ngii kii firaasat kaa tilism
rahbar-e-qaum kii naakaara qayaadat kaa fareb
ham ne aazurdagii-e-shauq ko manzil jaanaa
apnii hii gard-e-sar-e-raah ko mahmil jaanaa
gardish-e-halqa-e-gardaab ko saahil jaanaa
ab jidhar dekho udhar maut hii ma.nDlaatii hai
dar-o-diivaar se rone kii sadaa aatii hai
KHvaab zaKHmii hai.n uma.ngo.n ke kaleje chhalnii
mere daaman me.n hai.n zaKHmo.n ke dahakte hu.e phuul
KHuun me.n luTh.De hu.e phuul
mai.n jinhe.n kuucha-o-baazaar se chun laayaa huu.n
qaum ke raahbaro raahzano.n
apne aivaan-e-hukuumat me.n sajaa lo in ko
apne guldaan-e-siyaasat me.n lagaa lo in ko
apnii sad-saala tamannaa.o.n kaa haasil hai yahii
mauj-e-paayaab kaa saahil hai yahii
tum ne firdaus ke badle me.n jahannam le kar
kah diyaa ham se gulistaa.n me.n bahaar aa.ii hai
chand sikko.n ke evaz chand milo.n kii KHaatir
tum ne naamuus-e-shahiidaan-e-vatan bech diyaa
baaGbaa.n ban ke uThe aur chaman biich diyaa
(2)
kaun aazaad hu.aa?
kis ke maathe se siyaahii chhuuTii
mere siine me.n abhii dard hai mahkuumii kaa
mother-e-hind ke chehre pe udaasii hai vahii

Ali Sardar Jafri
Nazm

sahafi se

naam se peshtar lagaa ke amiir
har musalmaan ko banaa ke faqiir
qasr-o-aivaa.n me.n ho qayaam-paziir
aur KHutbo.n me.n de 'umar' kii misaal
ab qalam se izaar-band hii Daal

Habib Jalib
Nazm

inqalab

chho.D de mutrib bas ab lillaah piichhaa chho.D de
kaam kaa ye vaqt hai kuchh kaam karne de mujhe
terii taano.n me.n hai zaalim kis qayaamat kaa asar
bijliyaa.n sii gir rahii hai.n KHirman-e-idraak par
ye KHayaal aataa hai rah rah kar dil-e-betaab me.n
bah na jaa.uu.n phir tire naGmaat ke sailaab me.n
chho.D kar aayaa huu.n kis mushkil se mai.n jaam-o-subuu!
aah kis dil se kiyaa hai mai.n ne KHuun-e-aarzuu
phir shabistaan-e-tarab kii raah dikhlaataa hai tuu
mujh ko karnaa chaahtaa hai phir KHaraab-e-ra.ng-o-buu
mai.n ne maanaa vajd me.n duniyaa ko laa saktaa hai tuu
mai.n ne ye maanaa Gam-e-hastii miTaa saktaa hai tuu
mai.n ne ye maanaa Gam-e-hastii miTaa saktaa hai tuu
mai.n ne maanaa terii mausiiqii hai itnii pur-asar
jhuum uThte hai.n farishte tak tire naGmaat par
haa.n ye sach hai zamzame tere machaate hai.n vo dhuum
jhuum jaate hai.n manaazir, raqs karte hai.n nujuum
tere hii naGme se vaabasta nashaat-e-zindagii
tere hii naGme se kaif-o-imbisaat-e-zindagii
terii saut-e-sarmadii baaG-e-tasavvuf kii bahaar
tere hii naGmo.n se be-KHud aabid-e-shab-zinda-daar
bulbule.n naGma-saraa hai.n terii hii taqliid me.n
tere hii naGmo.n se dhuume.n mahfil-e-naahiid me.n
mujh ko tere sehr-e-mausiiqii se kab inkaar hai
mujh ko tere lahn-e-daa.uudii se kab inkaar hai
bazm-e-hastii kaa magar kyaa rang hai ye bhii to dekh
har zabaa.n par ab salaa-e-ja.ng hai ye bhii to dekh
farsh-e-giitii se sakuu.n ab maa.il-e-parvaaz hai
abr ke pardo.n me.n saaz-e-ja.ng kii aavaaz hai
phe.nk de ai dost ab bhii phe.nk de apnaa rubaab
uThne hii vaalaa hai ko.ii dam me.n shor-e-inqalaab
aa rahe hai.n ja.ng ke baadal vo ma.nDlaate hu.e
aag daaman me.n chhupaa.e KHuun barsaate hu.e
koh-o-sahraa me.n zamii.n se KHuun ublegaa abhii
ra.ng ke badle gulo.n se KHuun Tapkegaa abhii
ba.Dh rahe hai.n dekh vo mazduur darraate hu.e
ik junuu.n-a.ngez lai me.n jaane kyaa gaate hu.e
sar-kashii kii tund aa.ndhii dam-ba-dam cha.Dhtii hu.ii
har taraf yalGaar kartii har taraf ba.Dhtii hu.ii
bhuuk ke maare hu.e insaa.n kii fariyaado.n ke saath
faaqa-masto.n ke jilau me.n KHaana-barbaado.n ke saath
KHatm ho jaa.egaa ye sarmaaya-daarii kaa nizaam
ra.ng laane ko hai mazduuro.n kaa josh-e-intiqaam
gir pa.De.nge KHauf se aivaan-e-ishrat ke sutuu.n
KHuun ban jaa.egii shiisho.n me.n sharaab-e-laala-guu.n
KHuun kii buu le ke jangal se havaa.e.n aa.e.ngii
KHuu.n hii KHuu.n hogaa nigaahe.n jis taraf bhii jaa.e.ngii
jho.npa.Do.n me.n KHuu.n, mahal me.n KHuu.n, shabistaano.n me.n KHuu.n
dasht me.n KHuu.n, vaadiyo.n me.n KHuu.n, bayaabaano.n me.n KHuu.n
pur-sukuu.n sahraa me.n KHuu.n, betaab dariyaa.o.n me.n KHuu.n
dair me.n KHuu.n, masjid me.n KHuu.n, kaliisaa.o.n me.n KHuu.n
KHuun ke dariyaa nazar aa.e.nge har maidaan me.n
Duub jaa.e.ngii chaTaane.n KHuun ke tuufaan me.n
KHuun kii ra.ngiiniyo.n me.n Duub jaa.egii bahaar
reg-e-sahraa par nazar aa.e.nge laakho.n laala-zaar
KHuun se ra.ngii.n fazaa-e-bostaa.n ho jaa.egii
nargis-e-maKHmuur chashm-e-KHuu.n-fishaa.n ho jaa.egii
kohsaaro.n kii taraf se ''surKH-aa.ndhii'' aa.egii
jaa-ba-jaa aabaadiyo.n me.n aag sii lag jaa.egii
to.D kar be.Dii nikal aa.e.nge zindaa.n se asiir
bhuul jaa.e.nge ibaadat KHaanqaaho.n me.n faqiir
hashr-dar-aaGosh ho jaa.egii duniyaa kii fazaa
dau.Dtaa hogaa har ik jaanib farishta maut kaa
surKH ho.nge KHuun ke chhii.nTo.n se baam-o-dar tamaam
Garq ho.nge aatishii.n malbuus me.n manzar tamaam
is tarah legaa zamaana ja.ng kaa KHuunii.n sabaq
aasmaa.n par KHaak hogii, farq par ra.ng-e-shafaq
aur is ra.ng-e-shafaq me.n baa-hazaaraa.n aab-o-taab!
jagmagaa.egaa vatan kii hurriyat kaa aaftaab

Asrarul Haq Majaz
Nazm

jawan aag

kab talak is se bachaa.oge tum apne daamaa.n
ye javaa.n aag jalaa degii tumhaare aivaa.n

Habib Jalib
Nazm

zalzala

ek shab halkii sii jumbish mujhe mahsuus hu.ii
mai.n ye samjhaa mire shaano.n ko hilaataa hai ko.ii
aa.nkh uThaa.ii to ye dekhaa ki zamii.n hiltii hai
jis jagah shai ko.ii rakkhii hai vahii.n hiltii hai
sahn-o-diivaar kii jumbish hai to dar hilte hai.n
baahar aayaa to ye dekhaa ki shajar hilte hai.n
ko.ii shai jumbish-e-paiham se nahii.n hai mahruum
ek taaqat hai pas-e-parda magar naa-maaluum
chand lamhe bhii ye naira.ngii-e-aalam na rahii
zalzala KHatm hu.aa jumbish-e-paiham na rahii
hairat-e-diid se a.ngusht-ba-dandaa.n thaa mai.n
shaahid-e-jalva-e-qahhaarii-e-yazdaa.n thaa mai.n
daf.atan ek sadaa aah-o-fuGaa.n kii aa.ii
mere allaah ye gha.Dii kis pe musiibat laa.ii
gul kiyaa zalzala-e-qahr ne kis ghar kaa charaaG
kis pe Dhaayaa ye sitam kis ko diyaa hijr kaa daaG
jaa ke nazdiik ye nazzaara-e-hirmaa.n dekhaa
ek hasiina ko ba-sad haal-e-pareshaa.n dekhaa
baizavii shakl me.n the husn ke jalve pinhaa.n
aa.nkh me.n sehr bharaa thaa magar aa.nsuu the ravaa.n
mai.n ne ghabraa ke ye puuchhaa ki ye haalat kyuu.n hai
terii hastii hadaf-e-ra.nj-o-musiibat kyuu.n hai
bolii ai shaa.er-e-ra.ngiin-tabii.at mat puuchh
roz-o-shab dil pe guzartii hai qayaamat mat puuchh
log duniyaa ko tirii mujh ko zamii.n kahte hai.n
ahl-e-zar mujh ko mohabbat me.n hasii.n kahte hai.n
mai.n unhii.n husn-parasto.n kii huu.n ta.Dpaa.ii hu.ii
tujh se kahne ko ye raaz aa.ii huu.n ghabraa.ii hu.ii
zar-parasto.n se hai.n bad-dil mirii duniyaa ke Gariib
hai.n giraftaar-e-salaasil mirii duniyaa ke Gariib
mujh se ye taaza balaa.e.n nahii.n dekhii jaatii
zaalimo.n kii ye jafaa.e.n nahii.n dekhii jaatii.n
chaahtii huu.n mire ushshaaq me.n kuchh farq na ho
muft me.n kashtii-e-ehsaas-e-vafaa Garq na ho
ek vo jis ko mayassar ho.n imaaraat-o-naqiib
ek vo jis ko na ho phuu.ns kaa chhappar bhii nasiib
saahab-e-daulat-o-zii-rutba-o-zardaar ho ek
be-navaa Gam-zada-o-bekas-o-laachaar ho ek
ek muKHtaar ho, aura.ng-e-jahaa.nbaanii kaa
ik muraqqa.a ho Gam-o-ra.nj-o-pareshaanii kaa
saKHt nafrat hai mujhe apne parastaaro.n se
chhiin lete hai.n mujhe mere talab-gaaro.n se
chiira-dastii kaa miTaa detii hai.n sab jaah-o-jalaal
haif-sad-haif ki haa.il hai Gariibo.n kaa KHayaal
ye na hote to dikhaatii mai.n qayaamat kaa samaa.n
ye na hote to miTaatii mai.n Guruur-e-insaa.n
ek karvaT me.n badal detii nizaam-e-aalam
ik ishaare hii me.n ho jaatii hai ye mahfil barham
ik tabassum se jahaa.n barq-ba-daamaa.n hotaa
na ye aaraa.ishe.n hotii.n na ye saamaa.n hotaa
har adaa puuchhtii sarmaaya-parasto.n ke mizaaj
kuchh to farmaa.iye hazrat ki hai.n kis haal me.n aaj
lakh-pati sa.nkh-patii be-sar-o-saamaa.n hote
jaan bach jaa.e bas is baat ke KHvaahaa.n hote
barsar-e-KHaak nazar aate hai.n qasr-o-aivaa.n
ashk-e-KHuunii.n se mire aur bhii uThte tuufaa.n
merii aaGosh me.n sab ahl-e-sitam aa jaate
mere bartaav se bas naak me.n dam aa jaate
ba.az ke mu.nh Gam-e-aalaam se kaale kartii
ba.az ko maut kii devii ke havaale kartii
KHuun-e-zardaar hii mazduur kii mazduurii hai
mai.n jo KHaamosh huu.n ye baa.is-e-majbuurii hai
merii aaGosh me.n jaabir bhii hai.n majbuur bhii hai.n
mere daaman hii se vaabasta ye mazduur bhii hai.n
zabt kartii huu.n jo Gam aataa hai sah jaatii huu.n
josh aataa hai magar kaa.np ke rah jaatii huu.n

Shakeel Badayuni
Nazm

gurez

miraa junuun-e-vafaa hai zavaal-aamaada
shikast ho gayaa teraa fusuun-e-zebaa.ii
un aarzuu.o.n pe chhaa.ii hai gard-e-maayuusii
jinho.n ne tere tabassum me.n parvarish paa.ii
fareb-e-shauq ke ra.ngii.n tilism TuuT ga.e
haqiiqato.n ne havaadis se phir jilaa paa.ii
sukuun-o-KHvaab ke parde sarakte jaate hai.n
dimaaG-o-dil me.n hai.n vahshat kii kaar-farmaa.ii
vo taare jinme.n mohabbat kaa nuur taabaa.n thaa
vo taare Duub ga.e le ke ra.ng-o-ra.anaa.ii
sulaa ga.ii thii.n jinhe.n terii multafit nazre.n
vo dard jaag uThe phir se le ke a.ng.Daa.ii
ajiib aalam-e-afsurdagii hai ruu-ba-faroG
na jab nazar ko taqaazaa na dil tamannaa.ii
tirii nazar tire gesuu tirii jabii.n tire lab
mirii udaas-tabii.at hai sab se uktaa.ii
mai.n zindagii ke haqaa.eq se bhaag aayaa thaa
ki mujh ko KHud me.n chhupaa.e tirii fusuu.n-zaa.ii
magar yahaa.n bhii ta.aaqub kiyaa haqaa.eq ne
yahaa.n bhii mil na sakii jannat-e-shakebaa.ii
har ek haath me.n le kar hazaar aa.iine
hayaat band dariicho.n se bhii guzar aa.ii
mire har ek taraf ek shor guu.nj uThaa
aur us me.n Duub ga.ii ishrato.n kii shahnaa.ii
kahaa.n talak kare chhup-chhup ke naGma-pairaa.ii
vo dekh saamne ke pur-shikoh aivaa.n se
kisii kiraa.e kii la.Dkii kii chiiKH Takraa.ii
vo phir samaaj ne do pyaar karne vaalo.n ko
sazaa ke taur par baKHshii taviil tanhaa.ii
phir ek tiira-o-taariik jho.npa.Dii ke tale
sisakte bachche pe beva kii aa.nkh bhar aa.ii
vo phir bikii kisii majbuur kii javaa.n beTii
vo phir jhukaa kisii dar par Guruur-e-barnaa.ii
vo phir kisaano.n ke majme.a pe gun-mashiino.n se
huquuq-yaafta tabqe ne aag barsaa.ii
sukuut-e-halqa-e-zindaa.n se ek guu.nj uThii
aur is ke saath mire saathiyo.n kii yaad aa.ii
nahii.n nahii.n mujhe yuu.n multafit nazar se na dekh
nahii.n nahii.n mujhe ab taab-e-naGma-pairaa.ii
miraa junuun-e-vafaa hai zavaal-aamaada
shikast ho gayaa teraa fusuun-e-zebaa.ii

Sahir Ludhianvi
Nazm

sayyad se aaj hazrat-e-waiz ne ye kaha

sayyad se aaj hazrat-e-vaa.iz ne ye kahaa
charchaa hai jaa-ba-jaa tire haal-e-tabaah kaa
samjhaa hai tuu ne nature o tadbiir ko KHudaa
dil me.n zaraa asar na rahaa laa-ilaah kaa
ho tujh se tark-e-saum-o-salaat-o-zakaat-o-haj
kuchh Dar nahii.n janaab-e-risaalat-panaah kaa
shaitaan ne dikhaa ke jamaal-e-uruus-e-dahr
banda banaa diyaa hai tujhe hubb-e-jaah kaa
us ne diyaa javaab ki maz.hab ho yaa rivaaj
raahat me.n jo muKHil ho vo kaa.nTaa hai raah kaa
afsos hai ki aap hai.n duniyaa se be-KHabar
kyaa jaaniye jo rang hai shaam-o-pagaah kaa
europe kaa pesh aa.e agar aap ko safar
guzre nazar se haal re.aayaa-o-shaah kaa
vo aab-o-taab-o-shaukat-e-aivaan-e-khusravii
vo mahakmo.n kii shaan vo jalva sipaah kaa
aa.e nazar uluum-e-jadiidah kii raushnii
jis se KHajil ho nuur ruKH-e-mehr-o-maah kaa
daavat kisii amiir ke ghar me.n ho aap kii
kam-sin miso.n se zikr ho ulfat kaa chaah kaa
nau-KHez dil-fareb gul-andaam naaznii.n
aariz pe jin ke baar ho daaman nigaah kaa
rukiye agar to ha.ns ke kahe ik but-e-hasii.n
sun maulvii ye baat nahii.n hai gunaah kaa
us vaqt qibla jhuk ke karuu.n aap ko salaam
phir naam bhii huzuur jo le.n KHaanqaah kaa
patluun-o-koT-o-ba.ngla-o-biscuit kii dhun ba.ndhe
saudaa janaab ko bhii ho turkii kulaah kaa
mimbar pe yuu.n to baiTh ke goshe me.n ai janaab
sab jaante hai.n va.az savaab-o-gunaah kaa

Akbar Allahabadi
Nazm

miTTi ka diya

jhuTpuTe ke vaqt ghar se ek miTTii kaa diyaa
ek bu.Dhiyaa ne sar-e-rah laa ke raushan kar diyaa
taaki rah-giir aur pardesii kahii.n Thokar na khaa.e.n
raah se aasaa.n guzar jaa.e har ek chhoTaa ba.Daa
ye diyaa behtar hai un jhaa.Do.n se aur us lamp se
raushnii mahlo.n ke andar hii rahii jin kii sadaa
gar nikal kar ik zaraa mahlo.n se baahar dekhiye
hai a.ndheraa ghup dar-o-diivaar par chhaayaa hu.aa
surKH-ruu aafaaq me.n vo rahnumaa miinaar hai.n
raushnii se jin kii mallaaho.n ke be.De paar hai.n

Altaf Hussain Hali
Nazm

dard-e-mushtarak

aaj mai.n soch rahaa huu.n shab-e-tanhaa.ii me.n
kis qadar talKH javaanii kii luTii yaade.n hai.n
dekh is daur me.n aivaan-e-mohabbat ke liye
kaisii kaisii Gam-o-andoh kii buniyaade.n hai.n
kal tire diida-e-hairaa.n se lahuu phuuTaa thaa
aaj mere lab-e-KHaamosh pe fariyaade.n hai.n

Qateel Shifai
Nazm

chhabbis january

aivaan-e-farruKHii kii taamiir-e-nau mubaarak
aa.iin-e-zindagii kii tadbiir-e-nau mubaarak
har zarra-e-vatan ko tanviir-e-nau mubaarak
bhaarat ke har bashar ko tauqiir-e-nau mubaarak
roz-e-sa.iid aayaa chhabbiis january kaa
daur-e-jadiid laayaa bhaarat kii bartarii kaa

Tilok Chand Mahroom
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now