Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "aslaaf"

Nazm MATCHES FOR "aslaaf"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

KHizr-e-rah

aa bataa.uu.n tujh ko ramz-e-aaya-e-innal-muluuk
saltanat aqvaam-e-Gaalib kii hai ik jaaduugarii
KHvaab se be-daar hotaa hai zaraa mahkuum agar
phir sulaa detii hai us ko hukmaraa.n kii saahirii
jaaduu-e-mahmuud kii taasiir se chashm-e-ayaaz
dekhtii hai halqa-e-gardan me.n saaz-e-dil-barii
KHuun-e-israa.iil aa jaataa hai aaKHir josh me.n
to.D detaa hai ko.ii muusaa tilism-e-saamarii
sarvarii zebaa faqat us zaat-e-be-hamtaa ko hai
hukmaraa.n hai ik vahii baaqii butaan-e-aazarii
az Gulaamii fitrat-e-aazaad raa rusvaa makun
taa-taraashii KHvaaja-e-az-barahman kaafir tirii
hai vahii saaz-e-kuhan maGrib kaa jamhuurii nizaam
jis ke pardo.n me.n nahii.n Gair-az-navaa-e-qaisarii
dev-e-istibdaad jamhuurii qabaa me.n paa-e-kuub
tuu samajhtaa hai ye aazaadii kii hai niilam-parii
majlis-e-aa.iin-o-islaah-o-ri.aayaat-o-huquuq
tibb-e-maGrib me.n maze miiThe asar KHvaab-aavarii
garmii-e-guftaar aazaa-e-majaalis al-amaa.n
ye bhii ik sarmaaya-daaro.n kii hai ja.ng-e-zargarii
is saraab-e-ra.ng-o-buu ko gulistaa.n samjhaa hai tuu
aah ai naadaa.n qafas ko aashiyaa.n samjhaa hai tuu
sarmaaya-o-mehnat

Allama Iqbal
Nazm

urdu ka janaza hai zara dhum se nikle

urdu kaa Gam-e-marg subuk bhii hai garaa.n bhii
hai shaamil-e-arbaab-e-azaa shaah-e-jahaa.n bhii
miTne ko hai aslaaf kii 'azmat kaa nishaa.n bhii
ye mayyat-e-Gam dehli-e-marhuum se nikle
urdu kaa janaaza hai zaraa dhuum se nikle

Rais Amrohvi
Nazm

miTTi ka diya

ham ne in aalii binaao.n se kiyaa akasr savaal
aashkaaraa jin se un ke baaniyo.n kaa hai jalaal
shaan-o-shaukat kii tumhaarii dhuum hai aafaaq me.n
duur se aa aa ke tum ko dekhte hai.n baa-kamaal
qaum ko is shaan-o-shaukat se tumhaarii kyaa milaa
do javaab is kaa agar rakhtii ho yaaraa-e-maqaal
sar-niguu.n ho kar vo sab bolii.n zabaan-e-haal se
ho sakaa ham se na kuchh al-infi.aal al-infi.aal
baaniyo.n ne thaa banaayaa is liye goyaa hame.n
ham ko jab dekhe.n KHalaf aslaaf ko royaa kare.n

Altaf Hussain Hali
Nazm

aap-biti

1
yuu.n to marne ke liye zahr sabhii piite hai.n
zindagii tere liye zahr piyaa hai mai.n ne
sham.a jaltii hai par ik raat me.n jal jaatii hai
yaa.n to ek umr isii tarah se jalte guzrii
kaun sii KHaak hai ye jaane kahaa.n kaa hai KHamiir
ik na.e saa.nche me.n har roz hii Dhalte guzrii
kis tarah mai.n ne guzaarii hai.n ye Gam kii gha.Diyaa.n
kaash mai.n aisii kahaanii ko sunaa bhii saktaa
ta.ana-zan hai.n jo mire haal pe arbaab-e-nashaat
un ko ik baar mai.n ai kaash rulaa bhii saktaa
mai.n ki shaa.er huu.n mai.n paiGaambar-e-fitrat huu.n
merii taKH.iil me.n hai ek jahaan-e-bedaar
dastaras me.n mirii nazzaara-e-gul-haa-e-chaman
mere idraak me.n hai.n kun-fayakuu.n ke asraar
mire ash.aar me.n hai qalb-e-hazii.n kii dha.Dkan
merii nazmo.n me.n mirii ruuh kii dil-doz pukaar
phir bhii rah rah ke khaTaktii hai mire dil me.n ye baat
ki mire paas to alfaaz kaa ik parda hai
sirf alfaaz se tasviir nahii.n ban saktii
sirf ehsaas me.n haalaat kii tafsiir kahaa.n
sirf fariyaad me.n zaKHmo.n kii vo zanjiir kahaa.n
aisii zanjiir ki ek ek ka.Dii me.n jis kii
kitnii kho.ii hu.ii KHushiyo.n ke manaazir pinhaa.n
kitnii bhuulii hu.ii yaado.n ke pur-asraar kha.nDar
kitne uj.De hu.e luuTe hu.e sunsaan nagar
kitne aate hu.e jaate hu.e chehro.n ke nuquush
kitne bante hu.e miTte hu.e lamhaat kaa raaz
kitnii uljhii hu.ii raaho.n ke nasheb aur faraaz
2
kyaa kahuu.n mujh ko kahaa.n laa.ii mirii umr-e-ravaa.n
aa.nkh kholii to har ik samt a.ndhero.n kaa samaa.n
re.ngtii uu.nghtii maGmuum sii ik raahguzaar
gard-e-aalaam me.n khoyaa hu.aa manzil kaa nishaa.n
gesuu-e-shaam se lipTii hu.ii Gam kii zanjiir
siina-e-shab se nikaltii hu.ii fariyaad-o-fuGaa.n
ThanDii ThanDii sii havaa.o.n me.n vo Gurbat kii thakan
dar-o-diivaar pe taariik se saa.e larzaa.n
kitnii kho.ii hu.ii biimaar o fasurda aa.nkhe.n
TimTimaate se diye chaar taraf nauha-kunaa.n
muzmahil chehre masaa.ib kii giraa.n-baarii se
dil-e-majruuh se uThtaa hu.aa Gamnaak dhu.aa.n
yahii taariikii-e-Gam to miraa gahvaara hai
mai.n isii kokh me.n thaa nuur-e-sahar ke maanind
har taraf sog me.n Duubaa hu.aa meraa maahaul
meraa uj.Daa hu.aa ghar 'miir' ke ghar ke maanind
ik taraf azmat-e-aslaaf kaa maathe pe Guruur
aur ik samt vo iflaas ke phaile hu.e jaal
bhuuk kii aag me.n jhulse hu.e saare armaa.n
qarz ke bojh se jiine kii uma.nge.n paamaal
vaqt kii dhund me.n lipTe hu.e kuchh pyaar ke giit
mehr o iKHlaas zamaane kii jafaa.o.n se niDhaal
bhaa.ii bhaa.ii kii mohabbat me.n niraale se shukuuk
nigah-e-Gair me.n jis tarah anokhe se savaal
''ek ha.ngaame pe mauquuf thii ghar kii raunaq''
muflisii saath liye aa.ii thii ik ja.ng-o-jidaal
faaqa-mastii me.n bikharte hu.e saare rishte
ta.ng-dastii ke sabab saarii fazaa.e.n behaal
ik jahannam kii tarah thaa ye miraa gahvaara
is jahannam me.n mere baap ne dam to.D diyaa
TuuT kar rah ga.e bachpan ke suhaane sapne
mujh se mu.nh pher liyaa jaise mirii shoKHii ne
mere ha.nste hu.e chehre pe udaasii chhaa.ii
jaise ik raat bhayaanak mire sar par aa.ii
raahe.n dushvaar magar raah-numaa ko.ii na thaa
saamne vus.at-e-aflaak KHudaa ko.ii na thaa
mere ajdaad kii miiraas ye viiraan saa ghar
jis ko ghere hu.e har samt tabaahii ke bha.nvar
jis kii chhat girtii hu.ii TuuTaa hu.aa darvaaza
har taraf jaise bikhartaa hu.aa ik shiiraaza
na kahii.n atlas-o-kamKHvaab na diibaa-o-hariir
har taraf mu.nh ko basore hu.e jaise taqdiir
mujh ko us ghar se mohabbat to bhalaa kyaa hotii
yaa.n agar dil me.n na jiine kii tamannaa hotii
ye samajh kar ki yahii hai mirii qismat kaa likhaa
us kii diivaar ke saa.e me.n lipTaa rahtaa
lekin is dil kii KHalish ne mujhe bedaar kiyaa
mujh ko haalaat se aamaada-e-paikaar kiyaa
be-kasii raKHt-e-safar ban kar mire saath chalii
yaad aa.ii thii mujhe gaa.nv kii ek ek galii
lahlahaatii hu.ii fasle.n vo mire aam ke baaG
vo makaano.n me.n larazte hu.e dhu.ndle se charaaG
duur tak paanii me.n phaile hu.e vo dhaan ke khet
aur taalaab-kinaare vo chamaktii hu.ii ret
mere ham-umr vo saathii vo mire ham-jolii
mere school ke vo dost mirii vo Tolii
ek baar un kii nigaaho.n ne mujhe dekhaa thaa
jaise ik baar mire dil ne bhii kuchh sochaa thaa
''mai.n ne jab vaadi-e-Gurbat me.n qadam rakkhaa thaa
duur tak yaad-e-vatan aa.ii thii samjhaane ko''

Khalilur Rahman Azmi
Nazm

aahang-e-nau

ai javaanaan-e-vatan ruuh javaa.n hai to uTho
aa.nkh us mahshar-e-nau kii nigaraa.n hai to uTho
KHauf-e-be-hurmatii-o-fikr-e-ziyaa.n hai to uTho
paas-e-naamuus-e-nigraan-e-jahaa.n hai to uTho
uTho naqqaara-e-aflaak bajaa do uTh kar
ek so.e hu.e aalam ko jagaa do uTh kar
ek ik samt se shab-KHuun kii tayyaarii hai
lutf kaa va.ada hai aur mashq-e-jafaa-kaarii hai
mahfil-e-ziist pe farmaan-e-qazaa jaarii hai
shahr to shahr hai gaa.nv pe bhii bambaarii hai
ye fazaa me.n jo garajte hu.e tayyaare hai.n
barsar-e-dosh-e-havaa maut ke harkaare hai.n
is taraf haatho.n me.n shamshiire.n hii shamshiire.n hai.n
us taraf zehn me.n tadbiire.n hii tadbiire.n hai.n
zulm par zulm hai.n taaziiro.n pe ta.aziire.n hai.n
sar pe talvaar hai aur paa.nv me.n zanjiire.n hai.n
ek ho ek ki ha.ngaama-e-mahshar hai yahii
arsa-e-ziist kaa hangaama-e-akbar hai yahii
apnii sarhad pe jo aGyaar chale aate hai.n
sho.ala-afshaa.n o sharar-baar chale aate hai.n
KHuun piite hu.e sarshaar chale aate hai.n
tum jo uTh jaa.o to be-kaar chale aate hai.n
KHuu.n jo bah niklaa hai us KHuu.n me.n bahaa do un ko
un kii khodii hu.ii KHandaq me.n giraa do un ko
ra.ng-e-gul-haa-e-gulistaan-e-vatan tum se hai
sorish-e-na.ara-e-rindaan-e-vatan tum se hai
nashsha-e-nargis-e-KHuubaan-e-vatan tum se hai
iffat-e-maah-e-jabiinaan-e-vatan tum se hai
tum ho Gairat ke amii.n tum ho sharaafat ke amii.n
aur ye KHatre me.n hai.n ehsaas tumhe.n hai ki nahii.n
ye darinde ye sharaafat ke puraane dushman
tum ki ho haamil-e-aadaab-o-rivaayaat-e-kuhan
jaada-paimaa ke liye KHizr ho tum ye rahzan
tum ho KHirman ke nigahbaan ye barq-e-KHirman
KHitta-e-paak me.n zinhaar na aane paa.e.n
aa hii jaa.e.n jo ye zinda to na jaane paa.e.n
mard-o-zan piir-o-javaa.n in ke mazaalim ke shikaar
KHuun-e-ma.asuum me.n Duubii hu.ii in kii talvaar
ye qayaamat ke havasnaak Gazab ke KHuu.n-KHaar
in ke isyaa.n kii na had hai na jaraa.em kaa shumaar
ye tarahhum se na dekhe.nge kisii kii jaanib
in kii topo.n ke dahan kar do unhii kii jaanib
ye to hai.n fitna-e-bedaar dabaa do in ko
ye miTaa de.nge tamaddun ko miTaa do in ko
phuu.nk do in ko jhulas do ki jilaa do in ko
shaan-e-shaayaan-e-vatan ho ye bataa do in ko
yaad hai tum ko kin aslaaf kii tum yaade.n ho
tum to KHaalid ke pisar bhiim kii aulaade.n ho
tum to tanhaa bhii nahii.n ho ka.ii dam-saaz bhii hai.n
ruus ke mard bhii hai.n chiin ke jaa.n-baaz bhii hai.n
kuchh na kuchh saath fara.ngii ke fusuu.n-saaz bhii hai.n
aur ham jaise bahut zamzama-pardaaz bhii hai.n
duur insaan ke sar se ye musiibat kar do
aag dozaKH kii bujhaa do ise jannat kar do

Asrarul Haq Majaz
Nazm

tarana-e-urdu

ta.amiir kii hai is kii KHud ko miTaa miTaa kar
aslaaf kaa nishaa.n hai urdu zabaa.n hamaarii

Shatir Hakeemi
Nazm

abhi kuchh kaam baqi hain

abhii to naa-mukammal nazm kaa ik aaKHirii misra kitaab-e-hijr me.n tahriir karnaa hai
KHas-o-KHaashaak-e-Gam aslaaf me.n taqsiim ho jaa.e.n to sar se bojh utre
qarz kaa jaama pahan kar ik na.e raste pe jaanaa kab munaasib hai
abhii Thahro
abhii ham ko jaziire me.n havaa ke sabz jho.nko.n se shajar kii baat karnaa hai
savero.n kii imaamat karne vaalii zau nigaaho.n me.n pirone tak Thahar jaa.o
a.ndhero.n me.n kisii lau ke binaa lambaa safar aaGaaz karnaa kab munaasib hai
abhii Thahro
hujuum-e-dil-baraa.n aadaab-e-girya se nahii.n vaaqif
dar-o-diivaar-e-hasrat me.n zaraa sii bhii.D lag jaa.e to chalte hai.n
KHabar bhejo
ki yuu.n chup-chaap mayyat kii tarah ghar se nikalnaa kab munaasib hai
zaraa Thahro
abhii kuchh kaam baaqii hai.n
zaraa ye kaam nimTaa le.n to chalte hai.n

Najeeb Ahmad
Nazm

ghaalib

tum ye kahte ho ki qaa.il nahii.n aslaaf kaa mai.n
sach hai ye daur bhii aslaaf parastii kaa nahii.n
aaj har jaam se labrez mai-e-hastii se
jaam-e-diiroz me.n ye baada-e-ra.ngii.n hai kahii.n

Saeed Arifi
Nazm

kis shan se jite the yahan KHwar hue kyun

izzat ke sadaaqat ke shahaadat ke qasiide
aslaaf ke kirdaar kii azmat ke qasiide
bhuule hu.e baiThe hai.n shujaa.at ke qasiide
ham pa.Dhne lage ahl-e-ra.uunat ke qasiide
ab apnaa zamiir apnaa yaqii.n bech rahe hai.n
ham luqma-e-tar ke liye dii.n bech rahe hai.n

Tariq Qamar
Nazm

wo jo kahin nahin hai

teraa ko.ii din nahii.n
teraa ko.ii ruup nahii.n
abuu-suifyaan kii hi.nda
is ra.ng-manch me.n
terii ko.ii jagah nahii.n
ajdaad ke intiqaam me.n
tuu kahaa.n hai
naslo.n kii KHuun-aashaam ja.ng me.n
tuu jaltii rahii
kaleja chabaane se husain kaa KHuun bahaane tak
zamiin-o-aasmaan tujhe malaamat karte rahe
bad-baKHt-o-shikast-KHurda
hi.nda bint-e-atba
teraa qabiila terii vahshat se pahchaanaa gayaa
teraa paagal-pan
terii vaj.h-e-shohrat hai
kisii faisle kisii raa.e me.n teraa ko.ii havaala nahii.n
tujhe vahshii banaane vaale tere adh mare aslaaf
terii kokh zahr-aaluud kar ke
tujhe be vajuud kar ke
zamiin par musallat rahe aaseb ban kar
bad-baKHt hi.nda
jo itnaa shu.uur tujhe hotaa
to samajh paatii
jabrii nizaam raa.ij karne ke liye
har baar kokh barbaad kii ga.ii

Injila Hamesh
Nazm

26 january

aaj chhabbiis hai
january kii magar
dil me.n tasviir
maazii kii mub.ham sii hai
aaj ke vaaste
apne aslaaf ne
kitnii qurbaaniyaa.n
dii thii.n magar
jin ko ham ne
faraamosh saa kar diyaa
un ke KHvaabo.n ko
mismaar saa kar diyaa hai
ab zaruurat hai
is baat kii
KHvaab bikhre jo hai.n
un kii yak-jaa.ii ho
ik na.e hind kii
phir se ta.amiir ho
musaavaat sab kaa muqaddar bane
sab se insaaf ho
sub.h kaa ujaalaa numuudaar ho

Moin Fayyazi
Nazm

rabta

ham ko jo mil gayaa tasalsul se
nazr-e-tuufaan-e-sa.ng to na kare.n
apne aslaaf se jo faiz milaa
us ko vahshat ba-ra.ng to na kare.n

Noor -e-Shama Noor
Nazm

ahsan taqwim

bustaan-e-vafaa dahr me.n aabaad hai ham se
din-raat zamaane ko KHudaa yaad hai ham se
taariiKH-e-junuu.n KHuun se kii ham ne nigaarish
aafaaq hai.n har masnad-e-irshaad hai ham se
raushan kiyaa zulmaat me.n qindiil-e-hunar ko
sahraa me.n chaman nuur kaa aabaad hai ham se
ham jannat-e-parvez ke hai.n husn-e-tafaaKHur
shiirii.n kii talab taisha-e-farhaad hai ham se
saa.nche me.n Gam-o-dard ke insaan ko Dhaalaa
shahkaar-e-jahaa.n-saaz bhii iijaad hai ham se
KHvaabiida shabistaa.n me.n azaa.n ham ne pukaarii
iimaan-saraa dahr kaa aabaad hai ham se
ham shahr-e-tafalsuf me.n hai.n tadriis kii tanviir
shamshiir ba-kaf baazuu-e-faulaad hai ham se
ta.amiir kiyaa teshaa-e-fan se chaman-e-dahr
tanqiid-e-haq-aasaar bhii iijaad hai ham se
me.amaar-e-yaqii.n-saaz hai.n darvesh ke aadaab
baaqii abhii ta.aliim-e-KHudaa-daad hai ham se
iKHlaas ke motii se bharaa daaman-e-aGyaar
iqliim-e-jahaa.n me.n adl-o-raad hai ham se
aivaan-e-zar-o-siim me.n mahshar hu.aa barpaa
KHaa.if hama-tan lashkar-e-shaddaad hai ham se
maahaul-e-zamaana hai alamnaak-o-jigar-doz
qaa.em vale kuchh rahmat-e-javvaad hai ham se
sar-baazii-e-paiham se hai gulzaar murattab
sar-chashma-e-anvaar kii buniyaad hai ham se
ham ahsan-e-taqviim ke hai.n boltii tafsiir
ra.ngiin-e-dil-e-getii kii ruudaad hai ham se
baKHshii hai Gulaamo.n ko bhii ahraar kii jur.at
duniyaa kaa giraftaar bhii aazaad hai ham se
ham miT ga.e duniyaa se to duniyaa nahii.n hogii
har zarra hai raushan to jahaa.n shaad hai ham se
ilhaad kii zulmat se zamaane ko nikaalaa
aslaaf kii mahfil abhii aabaad hai ham se
sar-mastii-e-kirdaar se raKHshanda hai aafaaq
mahfuuz abhii maKHzan-e-ajdaad hai ham se
tahziib-o-tamaddun kaa sabaq ham ne pa.Dhaayaa
har husn-e-jahaa.n-saaz kii iijaad hai ham se
'bebaak' kahaa.n gosh-bar-aavaaz zamaana
kuchh millat-e-ma.asuum kii fariyaad hai ham se

Bebak Bhojpuri
Nazm

safar par nikla musafir palaT kar apne ghar ko aa jata hai

safar par niklaa musaafir palaT kar apne ghar ko aa jaataa hai
zamiin daa.ere me.n ghuum kar phir usii maqaam se apne safar kii ibtidaa kartii hai
vaqt ek tez raftaar gho.Daa hai
jo haal ko maazii me.n tabdiil kartaa mustaqbil kii taraf dau.Daa chalaa jaa rahaa hai
kumhaar kaa chaak ghuum rahaa hai
aur
kumhaar ke mashshaaq haath miTTii se muKHtalif paikar taraash rahe hai.n
tahziib-o-tamaddun intihaa ko pahu.nch kar phir apnii ibtidaa ko palaTte hai.n
tumhaarii pasand naa-pasand par tumhaare aslaaf asar-andaaz hai.n
aadmii apne sanskaaro.n se ba.ndhaa hai
ye kaal-chakr
kumhaar kaa ghuumtaa hu.aa pahiya
tumhaarii tahqiiq-e-tajdiid hai tumhaare pahlo.n kii
har mukammal naa-mukammal hai
har taKHliiq
ek tajassus naa-mukammal se mukammal kii taraf
zindagii
ikaa.ii me.n ikaa.ii ke jam.a kaa amal
laa-mahduud tak

Javed Nadeem
Nazm

hubb-e-watan

ham azmat-e-aslaaf ko kyo.n bhuul ga.e hai.n
ham me.n na vo Gairat na hamiyyat na vo iisaar

Ameer Chand Bahar
Nazm

dayar-e-watan

tere aslaaf kii nishaanii hai
is se vaabasta zindagaanii hai
chaa.nd taare ko lag na jaa.e gahan
ye hai meraa vatan tumhaaraa vatan

Begum Sultana Zakir Ada
Nazm

chhalni chhalni saeban

tamaazat se mahruum afkaar ke zard suuraj ugal kar
sabhii apne aslaaf kii khopa.Diyo.n kii maalaa.e.n pahne
ajanme hu.e apne bachcho.n kii shaklo.n ko
baaruud ke Dher par rakh rahe hai.n
vo bachche jinhe.n janm lenaa pa.Daa thaa
vo apne gharo.n me.n a.ndhere sajaa kar
charaaGo.n ko apnii hii qabro.n pe rakhne
chale aa rahe hai.n
yahaa.n maa.n ke siine se ukh.Dii hu.ii
chhaatiyaa.n
milk powder se bharne
na.ii nasl baazaar me.n aa chukii hai
kitaabo.n ke ambaar se ugne vaalii
ye tahziib
apne KHudaa.o.n ko aavaaz dene lagii hai
magar amn kii saarii jebe.n hai.n KHaalii
vo saare KHudaa Gair-mahfuuz hai.n

Tanha Timmapuri
Nazm

allama iqbaal

hai.n zehn me.n aslaaf ke sab kaar-e-numaayaa.n
jo shaan hai momin kii vo 'iqbaal' kaa iimaa.n

Fatima wasia Jayasi
Nazm

ehtiraaz

kahaa.n hai.n vo log
jin se bazm-e-hayaat me.n ik sarod saa thaa
mohabbato.n kaa vujuud saa thaa
dilo.n me.n kaif-o-suruur saa thaa
jo 'ijz se bhii hasiin thaa vo Guruur saa thaa
zabaan jin kii guhar-fishaa.n thii bayaan jin kaa qaraar-e-jaa.n thaa
unhii kii ham nasl hai.n magar ham bhaTak ga.e hai.n
dilo.n ko apne junuun-e-ranjish
KHuluus-o-mehr-o-vafaa se 'aarii hai rishta-daarii
na dost-daarii na Gam-gusaarii
na 'aajizii hai na inkisaarii
dilo.n me.n buGz-o-hasad ke sho'le bha.Dak rahe hai.n
jhulas rahii hai.n qanaa'at-o-shukr kii ridaa.e.n
havas ke baadal baras rahe hai.n
dilo.n me.n armaan-e-zar-parastii machal rahe hai.n
sharaarat-e-nafs 'uruuj par hai
dilo.n se rishto.n ke faaslo.n ko ba.Dhaa rahii hai
hamaare aslaaf kii amaanat
hamaare haatho.n se jaa rahii hai
vo qaum hai.n ham jo apnii tahziib aur qadre.n ga.nvaa rahii hai

Ashhar Nadeemi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now