Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bartano.n"

Nazm MATCHES FOR "bartano.n"

Nazm

ek nazm kahin se bhi shurua ho sakti hai

ek nazm kahii.n se bhii shuruu.a ho saktii hai
juuto.n kii jo.Dii se
yaa qabr se jo baarish me.n baiTh ga.ii
yaa us phuul se jo qabr kii paa.iinii par khilaa
har ek ko kahii.n na kahii.n panaah mil ga.ii
chii.ntiyo.n ko jaa-e-namaaz ke niiche
aur la.Dkiyo.n ko mirii aavaaz me.n
murda bail kii khopa.Dii me.n gilahrii ne ghar banaa liyaa hai
nazm kaa bhii ek ghar hogaa
kisii jilaa-vatan kaa dil yaa intizaar kartii hu.ii aa.nkhe.n
ek pahiya hai jo banaane vaale se adhuuraa rah gayaa hai
ise ek nazm mukammal kar saktii hai
ek guu.njtaa hu.aa aasmaan nazm ke liye kaafii hotaa hai
lekin ye ek naashta-daan me.n baa-aasaanii samaa saktii hai
phuul aa.nsuu aur ghanTiyaa.n is me.n piro.ii jaa saktii hai.n
ise andhere me.n gaayaa jaa saktaa hai
tyauhaaro.n kii dhuup me.n sukhaayaa jaa saktaa hai
tum ise dekh saktii ho
KHaalii bartano.n KHaalii qabzo.n aur KHaalii gahvaaro.n me.n
tum ise sun saktii ho
haath-gaa.Diyo.n aur janaazo.n ke saath chalte hu.e
tum ise chuum saktii ho
bandar-gaaho.n kii bhii.D me.n
tum ise guu.ndh saktii ho
patthar kii maa.nd me.n
tum ise ugaa saktii ho
podiine kii kiyaariyo.n me.n
ek nazm
kisii bhii raat se taariik nahii.n kii jaa saktii
kisii talvaar se kaaTii nahii.n jaa saktii
kisii diivaar me.n qaid nahii.n kii jaa saktii
ek nazm
kahii.n bhii saath chho.D saktii hai
baadal kii tarah
havaa kii tarah
raaste kii tarah
baap ke haath kii tarah

Sarvat Husain
Nazm

use maine nahin dekha

vo kaisii hai
use mai.n ne nahii.n dekhaa
sunaa hai vo zamii.n-zaadii
dhanak se apne KHvaabo.n ke ufuq gul-ra.ng rakhtii hai
mire KHaashaak se aage kisii manzar me.n rahtii hai
havaa ke ghar me.n rahtii hai
vo kis suuraj kaa hissa hai
vo kis taare kii miTTii hai
use mai.n ne nahii.n dekhaa
mirii aa.nkho.n se le kar us kii aa.nkho.n tak kise ma.aluum hai
kitne sitaare hai.n
mujhe kyaa ilm vo kis rang ke kap.De pahantii hai
vo KHaalii bartano.n me.n apnaa din kaise biTaatii hai
vo KHushiyaa.n Dhuu.nDtii hai aur KHud ko band almaarii me.n rakh kar
bhuul jaatii hai
vo ghar ke lawn me.n baiThii bahut kuchh sochtii hogii
ki meraa rang kaisaa hai
mirii aa.nkho.n ke raushan qumqumo.n me.n taab kitnii hai
mirii shiryaan me.n sahme hu.e bachcho.n pe kyaa guzrii
vo kis raste pe chal nikle ki apne ghar nahii.n pahu.nche
vo akasr sochtii hogii
mire kamre me.n buu.Dhii faahisha tanhaa.ii ke hote
mire din kaise kaTte hai.n
mirii be-KHvaab raate.n kin KHayaalo.n me.n guzartii hai.n
kahaa.n ishq-e-gurezaa.n kii kahaanii KHatm hotii hai
vo ghar ke lawn me.n baiThii yahii kuchh sochtii hogii
ki mere naam ke piichhe mirii tasviir kaisii hai
mire KHat bhii nahii.n us ke tasarruf me.n
ki un ko khol kar mere badan ke raaz tak pahu.nche
mujhe us ne nahii.n dekhaa
na mai.n ne us ko dekhaa hai
na us ne mujh ko dekhaa hai
magar apnii mohabbat me.n ajab husn-e-tavaazun hai
vo akasr sochtii hogii
mai.n kitnaa apne daftar me.n huu.n kitnaa ghar kii KHalvat me.n
vo mujh ko mujh pe hii taqsiim kar ke dekhtii hogii
mujhe mahsuus hotaa hai
ko.ii dil chiirtii KHushbuu mujhe aavaaz detii hai
magar aavaaz ke piichhe ko.ii chehra nahii.n hotaa
vo mujh ko dekh letii hai
magar merii basaarat me.n mahak chehra nahii.n paatii
ki KHushbuu kis ne dekhii hai
sadaa ko kis ne pak.Daa hai
makaanii duuriyaa.n kaisii? zamaanii qurbate.n kaisii?
vo meraa jism hai lekin use mai.n ne nahii.n dekhaa

Abbas Tabish
Nazm

pahaDon ke beTe

vatan Dher ik an-ma.njhe bartano.n kaa
jise zindagii ke pasiino.n me.n Duubii hu.ii mehnate.n dar-ba-dar Dhuu.nDhtii hai.n
vatan vo musaafir a.ndheraa
jo uu.nche pahaa.Do.n se girtii hu.ii naddiyo.n ke kinaaro.n pe shaadaab shahro.n me.n ruk kar
kisii aahanii chhat se uThtaa dhu.aa.n ban gayaa hai

Majeed Amjad
Nazm

mazafat

chaa.nd sii raso.ii me.n
bartano.n ke aa.iine
dukh ko mu.nh chi.Dhaate hai.n

Ishrat Afreen
Nazm

achaar ka martaban

tumhaarii ammii ne apnii izzat ko martabaano.n me.n band kar ke
makaa.n kii chhat se laTakte chhii.nke me.n rakh diyaa thaa
tumhaarii ammii ne baar-haa tum se ye kahaa thaa
''achaar kachchaa hai' tel kii buu miTii nahii.n hai
abhii na ye martabaan kholo
havaa agar bartano.n me.n daaKHil hu.ii to ullii
tamaam phaa.nko.n kaa naas kar degii''
tum magar soch me.n pa.Dii ho
''na jaane ammii ko kyaa hu.aa hai
achaar kii phaa.nk hii to hai naa
na ko.ii hiiraa, na ko.ii motii, na ko.ii sone kii chiiz maa.ngii
na ko.ii kap.Daa na ko.ii lattaa na ko.ii saa.Dii''
tum apnii ma.asuum aur pyaarii sii a.nkh.Diyo.n me.n
hazaar shikve liye yuu.nhii sochtii rahogii
magar jo ek Dar tumhaarii ammii kii aa.nkh me.n aa ke bas gayaa hai
use kahaa.n tum samajh sakogii
abhii to tum bachpane kii sarhad phalaa.ngne hii kii fikr me.n ho
abhii to tum me.nDhiyaa.n banaatii ho, choTiyaa.n kas ke baa.ndhtii ho
kabhii kabhii tum sa.Dak pe jaa kar jhaga.Dte bachcho.n ko Daa.nTtii ho
to tum ko chunnii kaa hosh hotaa hai
aur na aa.nkho.n me.n Dar kisii kaa
agar kabhii tum zabaan kaa zaa.iqa badalne kaa soch hii lo
agar kabhii tum achaar kaa martabaan niiche utaar hii lo
nazar bachaa kar achaar baahar nikaal hii lo
to lamha bhar ke liye Thahar kar ye soch lenaa
tumhaarii ammii ne apnii izzat ko martabaano.n me.n band kar ke
makaa.n kii chhat se laTakte chhii.nke me.n rakh diyaa thaa

Fayyaz tahseen
Nazm

diwali

halva-e-be-duudh kii thaalo.n kaa bahr-e-be-karaa.n
kashtiyaa.n bahtii hai.n yaa aa jaa rahii hai.n mohriyaa.n
saalimo.n ke saath hai.n TuuTe khilaune khaand ke
mor kaa sar sher kaa dha.D paa.nv Gaa.eb saanD ke
sahn me.n khele.n bataashe abr se barse hu.e
bartano.n ke paas pattal raat ke parse hu.e

Shaad Aarfi
Nazm

ashk mere apne

jaa rahii huu.n mai.n
kar rahii huu.n tumhaaraa ghar tumhaare havaale
KHaalii ho jaa.egii har vo jagah
jo mere ashko.n se bharii hai abhii
le jaa.uu.ngii har ashk apne saath sameT kar
kuchh gamlo.n ke phuul pe
os se chamak rahe ho.nge
kuchh saj-dhaj ke baiThe ho.nge dahliiz pe
zard the jo kuchh jaane u.D ke kahaa.n gire ho.nge
kuchh miTTii ke andar biij ban kar gire the
ab vo kyaa ban ke uge ho.nge
mere ho.nTo.n se lipTe the jo
ab bhii Ta.nge ho.nge vahaa.n taale ban kar
kuchh tumhaare kaa.ndhe tak pahu.nch paane kii
jidd-o-jahd me.n juujh rahe ho.nge
kuchh puujaa-ghar ke diye ke saath jal rahe ho.nge
kuchh kitaabo.n ke dhule hu.e shabdo.n kii
siyaahii se jaa mile ho.nge
kuchh dhaar ban kar mere kaano.n se guzre ho.nge
piichhe se baalo.n me.n jaa chhupe ho.nge
kuchh takiye kii narm ruu.ii ne chuus liye ho.nge
raso.ii ghar kii bhaap me.n to kuchh
bartano.n me.n sa.De pa.De ho.nge
kuchh ma.asuum sahme hu.e chhup ke baiThe ho.nge
kuchh be-fikr haqiiqat se Tahal rahe ho.nge
kuchh buu.Dhe ashk na.e janmo.n ko aasraa de rahe ho.nge
kuchh tumhaarii KHidmat se thake
zamiin pe so rahe ho.nge
tapan se janme kuchh Dhuu.nDh rahe ho.nge ThanDak sii
kuchh diivaar pe lagii hamaarii tasviir tak rahe ho.nge
baaGii se kuchh tumhe.n chho.Dne kii zid pe a.De ho.nge
kuchh terii ek nazar kii pyaas liye
nazar-andaaz kha.De ho.nge
kuchh zehn me.n ho.nge mere jo bahnaa nahii.n jaante
kuchh hai aise jinhe.n Thaharnaa nahii.n aataa
unhii.n piyaa hai jiyaa hai mai.n ne
qisto.n me.n mile the mujhe
ek saath kaise le jaa.uu.ngii
aa.ngan bah jaa.egaa tumhaaraa
raaste bhii ye bahaa de.nge
par mere apne hai ye yaqiin hai mujhe
mere aaKHirii maqaam tak pahu.nchaa de.nge

Darshika wasani
Nazm

aaKHiri mukalima

le jaa.o daraKHto.n ko le jaa.o
mere kis kaam ke ye daraKHt
le jaa.o
mai.n to mar rahaa huu.n
mere saath jaane vaale
kuchh hii log to hai.n
mai.n ne baat kii in raasto.n se
ki jo raaste nahii.n the
phir mai.n nadii me.n Duub gayaa
mujhe nahii.n ma.aluum thaa ki mujhe is tarah
aarii se kaaT diyaa jaa.egaa
ki daraKHto.n me.n bhii
meraa shumaar nahii.n hogaa
mai.n nii.nd ke aaKHirii hisse me.n kha.Daa huu.n
ek mazduur
belche se merii tasviir banaa rahaa hai
raat guzar rahii hai
ki us ke guzarne se pahle bhii
ek raat guzar chukii hai
mai.n bhalaa kis raat kaa hisaab duu.n
mujhe maarne vaalo.n me.n
meraa lahuu bhii shaamil hogaa
ye mujhe ma.aluum nahii.n thaa
mai.n mar rahaa huu.n
ki mujhe maarne vaalii zaat
merii rii.Dh kii haDDii se
kalaam kar chukii hai
us ne mujhe baTan Taa.nkne vaalii ma.amuulii su.ii se chhed ke
jaa.nkanii se guzaar diyaa hai
magar us se pahle
mujh se ye bhii nahii.n puuchhaa
ki mai.n kisii jahaan me.n
zinda thaa bhii yaa nahii.n
qadiim kaa.nsii ke bartano.n
mere naam par bahaa.e hu.e
aa.nsu.o.n kaa ek KHazaana to mahfuuz hai
aur is KHazaane hii par to mai.n ne israar kiyaa
kyuu.nki mai.n jaantaa huu.n
ki ye duniyaa
keval ek chintaa ghar hai
is me.n hazaaro.n saal se rahne vaale ko bhii
rahne ke liye
ek pal bhii mayassar nahii.n
kyuu.nki ik ik pal kaa
daam chukaanaa pa.Dtaa hai
pahaa.D ek zarre ke haatho.n
bik jaataa hai
mai.n mar rahaa huu.n
magar is se pahle
mai.n ne ek iltijaa kii hai
ki mujhe ik ik pal kaa
daam chukaa ke marne diyaa jaa.e
mere naam ke
an-ginat naam darj hai.n
Thiik hai
mere vo tamaam alfaaz hii to
akaarat ga.e naa
jo mahz ek jhuuT ke naam
likhe ga.e
magar ab kuchh jaan.ne ke liye
rah kyaa gayaa hai
ki agar meraa sach itnaa ba.Daa thaa
tuu use chhoTaa karne ke liye
syaahii se bharii davaat
qalam-daan se pare
kyuu.n ulaT dii ga.ii
mai.n mar rahaa huu.n
magar mujhe ik ik pal kaa
daam chukaa ke marne diyaa jaa.e
aur ek daraKHt bhii
bach gayaa hai
to le jaa.o ise le jaa.o

Ahmad Hamesh
Nazm

saya-e-diwar

kaisaa sunsaan hai dasht-e-aavaargii
har taraf dhuup hai har taraf tishnagii
kaisii be-jaan hai mai-kade kii fazaa
jism kii sansanii ruuh kii KHastagii
is do-raahe pe kho.e ga.e hausle
is a.ndhere me.n gum ho ga.ii zindagii
ai Gam-e-aarzuu mai.n bahut thak gayaa
mujh ko de de vahii merii apnii galii
chhoTaa-moTaa magar KHuub-suurat saa ghar
ghar ke aa.ngan me.n KHushbuu sii phailii hu.ii
mu.nh dhulaatii savere kii pahlii kiran
saa.ebaa.n par amar-bel mahkii hu.ii
khi.Dkiyo.n par havaa.o.n kii aTkheliyaa.n
rauzan-e-dar se chhantii hu.ii raushnii
shaam ko halkaa halkaa uThtaa dhu.aa.n
paas chuulhe ke baiThii hu.ii lakshmii
ik a.ngiiThii me.n ko.ele dahakte hu.e
bartano.n kii suhaanii madhur raagnii
ras-bhare giit ma.asuum se qahqahe
raat ko chhat pe chhiTkii hu.ii chaa.ndnii
sub.h ko apne school jaate hu.e
mere nanhe ke chehre pe ik taazgii
rishte-naate mulaaqaate.n mehmaaniyaa.n
daavate.n jashn tyauhaar shaadii Gamii
jii me.n hai apnii aazaadiyaa.n bech kar
aaj le luu.n ye paabandiyo.n kii KHushii

Khalilur Rahman Azmi
Nazm

bolta kyun nahin

tuu ne kyuu.n apne gaalo.n pe sarso.n malii
tuu ne kyuu.n apnii aa.nkho.n me.n chuunaa bharaa
terii goyaa.ii kis dasht ke bhe.Diye le ga.e
boltaa kyuu.n nahii.n
boltaa kyuu.n nahii.n tifl-e-maasuum to kab se biimaar hai
kaisaa aazaar hai jis ne terii shabo.n se tirii nii.nd tere dino.n se
khilaune churaa.e
tuu soyaa nahii.n hai magar jaagtaa kyuu.n nahii.n
dekhtaa kyuu.n nahii.n tere baabaa ke baalo.n me.n khujlii hai aur u.ngliyaa.n jha.D chukii hai.n
hisaab-e-shab-o-roz karte hu.e
terii ammaa.n ke ra.asha-zada haath KHush-haaliyaa.n Dhuu.nDte Dhuu.nDte
in dhule bartano.n me.n pa.De rah ga.e
sub.h-e-taabiir ne shaaKH par sabz hone kii hasrat likhii
aa.nkh ko motiyaa de diyaa
dekhtaa kyuu.n nahii.n aaj baazaar me.n jashn-e-iflaas hai
shahr kii bhuuk chorii hu.ii
aur KHabro.n ne aKHbaar gum kar diyaa
log rote rahe
log ha.nste rahe
tere bistar pe ashko.n kii champaa khilii
aur tuu chup rahaa
tere maathe pe muskaan kaa itr chhi.Dkaa gayaa
aur tuu chup rahaa
merii ha.nDiyaa jalii
meraa chuulhaa bujhaa
merii jholii se harf-e-du.aa gir gayaa
mere bachche tuu lab kholtaa kyuu.n nahii.n
boltaa kyuu.n nahii.n

Jawayd Anwar
Nazm

alkubDe

ye kachhve kii
ulTii piiTh aisii
taKHtii kii kashtii me.n
pairo.n ke patvaar chalaate
humak humak andar aate
aur chiqo.n ke paas pahu.nch kar
taam chiinii bartano.n se
chapar chapar khaane khaate
aur daadii jaan ke saa.e se
sahj sahj baate.n karte jaate the
sola saal yahii ma.amuul rahaa
dildaarii aur shikam-purii kaa yahii usuul rahaa

Saqi Faruqi
Nazm

sannaTa

kisii ke paa.nv kii aahaT nahii.n
chuu.Diyo.n aur bartano.n kii khan-khanaahaT bhii nahii.n
suu.ii dhaage ek duuje se bhare baiThe hu.e hai.n
dhuul me.n lipTii kitaabe.n
mez par bikhrii pa.Dii hai.n
aur chuulhaa
lak.Diyo.n kii yaad me.n gum-sum
ek kone me.n pa.Daa hai
aur ik an-jaanaa saayaa
ghar kii chaukhaT par kha.Daa hai
ik hasii.n-tasviir jo diivaar par laTkii hu.ii hai
dekh kar mujh ko maluul
chupke chupke ro rahii hai
aur kaalii raat kaa pur-haul sannaaTaa
khilkhilaa kar ha.ns rahaa hai

Akhtar Rahi
Nazm

gul-e-daudi

almaarii me.n pa.De bartano.n ke saath
ek atiya-daan
jo sadqe ke sukuu.n se bharaa pa.Daa hai
aaj is me.n chand sikke
aur Daal diye jaa.e.nge
taaki balaa.e.n duur rahe.n
lekin balaa.o.n ko duur rakhnaa
itnaa aasaan kaise hai
ma.aluum nahii.n
kyaa andar kii balaa.o.n se
chhuTkaaraa paane kii
ko.ii aisii aasaan tadbiir
bhii maujuud hai
shaayad google karnaa pa.De
magar mai.n aaj ujlat me.n
ye garm juice kaa gilaas hii
halq me.n u.nDeluu.ngii aur
gum-shuda a.nguuThii ko
phir se Dhuu.nDne kii
koshish nahii.n karuu.ngii
kyuu.nki vo mujhe
be dhyaanii me.n
shiisha ghuurte hu.e
usii shelf par pa.Dii milegii
jahaa.n ek puraanaa toothbrush
aur TuuTii ho.ii
ka.nghii rakkhii hai

Sidra Afzal
Nazm

mazafat

chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n
aa.nsu.o.n kii bastii me.n
rasne-basne vaalo.n ko
kab ko.ii Garaz is se
kaarobaar-e-hastii me.n
naf' kyaa KHasaaraa kyaa
'umr ke KHazaane me.n
besh-o-kam kaa yaaraa kyaa
un kaa apnaa maslak hai
un kii apnii duniyaa hai
un gharo.n kii chaukhaT par
vaqt baa.ng detaa hai
mu.nh a.ndhere chakkii me.n
KHvaab piise jaate hai.n
chaa.nd sii raso.ii me.n
bartano.n ke aa.iine
dukh ko mu.nh chi.Dhaate hai.n
un gharo.n ke aangan me.n
din shuruu' hotaa hai
KHvaab kaate jaane se
zindagii kii Dorii me.n
sukh piro.e jaane se
aa.nkh ke kaToro.n me.n
Gam samo.e jaane se
mehrbaa.n mashaqqat ke
bojh Dho.e jaane se
din tuluu' hotaa hai
kyaariyo.n kii miTTii me.n
giit jab nahaate hai.n
rang chahchahaate hai.n
saath kii mu.nDero.n par
KHvaab par sukhaate hai.n
bachchiyaa.n KHayaalo.n me.n
apne ghar basaatii hai.n
mom ke gharo.ndo.n me.n
zindagii kii ha.nD-kuliyaa
dhuup se pakaatii hai.n
be-zabaan gu.Diyo.n se
jin kii aa.nkh dhaage kii
jin ke ho.nT resham ke
apne dil kii sab baate.n
baarhaa bataatii hai.n
aur rumuuz jiine ke
aap siikh jaatii hai.n
un gharo.n ke aa.ngan me.n
dopahar utartii hai
ek nannhii suu.ii kii
aa.nkh ke jharoke se
ik kiran ke mokhe se
dhuup ke hinaa.ii haath
tashtarii ba.Dhaate hai.n
chaahato.n ke miiThe rang
zaa.iqo.n ke naadiida
lams chho.D jaate hai.n
chuu.Diyaa.n khanaktii hai.n
haath baat karte hai.n
ang ang ha.nstaa hai
por por ke andar
dil dha.Dakne lagtaa hai
por por rotii hai
o.Dhnii bhigotii hai
KHvaab vo pa.Dosii hai
jis ke ujle kurte kaa
roz ik button TuuTe
dil ki vo mohalla hai
jis ke basne vaalo.n se
roz ik KHushii ruuThe
jaane kitne jismo.n ko
be-riyaa mohabbat kii
aag chaaT jaatii hai
jaane kitne nau-mauluud
KHvaab dafn hote hai.n
dil ke sard-KHaane me.n
jaane kitne rishto.n ko
dafn kar ke chupke se
vaqt ke gunaaho.n par
KHaak Daalii jaatii hai
un udaas galiyo.n me.n
sardiyo.n kii raato.n me.n
duur paar se aate
dil-navaaz giito.n ke
saa.nvle salone bol
chaa.nd ko rulaate hai.n
chaa.nd bholaa-bhaalaa hai
chaa.nd ko ye kyaa maa'luum
zindagii kii nauTankii
yuu.nhii chaltii rahtii hai
muflisii kii raqqaasa
taal par zamaane kii
jaane kitnii sadiyo.n se
ek jaise bolo.n par
raqs kartii rahtii hai
sub.h se zaraa pahle
bebasii ke bistar par
vo jo aa ke Dhahtii hai
bistaro.n ke sab paivand
us ko gudgudaate hai.n
be-sabab ha.nsaate hai.n
be-sabab rulaate hai.n
un galii mohallo.n me.n
raat jab utartii hai
maa.e.n apne bachcho.n ko
loriyaa.n sunaatii hai.n
apnii sard baa.nho.n kaa
paalnaa hilaatii hai.n
KHvaab vo dikhaatii hai.n
afsarii ke shaahii ke
KHvaab kaj-kulaahii ke
chaa.nd aur gulaab un ke
madrase jo jaate hai.n
qamchiyo.n se hotaa hai
bachpane kaa istiqbaal
phuul jaise jismo.n par
bed jab barastii hai
duur tak chaTaa.ii par
ik qataar me.n baiThe
lafz thartharaate hai.n
sab varaq kitaabo.n ke
aise pha.D.pha.Daate hai.n
jaise jaan khi.nchtii ho
un kii dars-gaaho.n me.n
qamchiyaa.n mu'allim hai.n
qamchiyaa.n mudarris hai.n
qamchiyaa.n raTaatii hai.n
sabr achchhii 'aadat hai
sabr aur qanaa'at se
zindagii sa.nvartii hai
un galii mohallo.n kaa
husn kam-suKHan bhii hai
aur bholaa-bhaalaa bhii
haa.n ye kam-suKHan la.Dkaa
bhiigtii maso.n ke saath
ghar se jab nikaltaa hai
'umr kii hade.n saarii
yuu.n phalaa.ng jaataa hai
muflisii havas-pesha
phuul jaise gaalo.n kaa
rang chuus letii hai
bholii-bhaalii baato.n se
ras nicho.D letii hai
aur phir zamaane ke
biich chho.D detii hai
peT be-hayaa dallaal
dar-ba-dar phiraataa hai
sau jatan sikhaataa hai
chhoTe chhoTe qasbo.n me.n
ghar ke saamne baiThii
siidhii-saadii ummiide.n
raah taktii rahtii hai.n
'umre.n biit jaatii hai
kuchh KHabar nahii.n miltii
Daakiyaa jab aataa hai
chaahato.n kii puu.njii me.n
ik raqam ba.Dhaataa hai
aur lauT jaataa hai
siidhii-saadii ummiide.n
ghar se jaane vaalo.n ko
ek jaise lafzo.n kii
bhejtii hai.n sauGaate.n
vaqt buu.Dhaa munshii hai
jis ko KHat kaa sab mazmuun
lafz lafz azbar hai
phir bhii puuchh letaa hai
aur kyaa likhuu.n bolo
phir se ab ke saavan me.n
saa.ibaa.n Tapaktaa hai
tan kii aur ik diivaar
Dhah ga.ii hai ab ke baar
siidhii-saadii ummiide.n
roz-o-shab kii chaukhaT par
'umr kaaT detii hai.n
jism KHaak ho jaa.e
jaan raakh ho jaa.e
peT to jahannum hai
ye javaan rahtaa hai
un kii aa.nkh kaa saavan
chaahe ko.ii mausam ho
mehrbaan rahtaa hai
chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n

Ishrat Afreen
Nazm

Dhaka se wapsi par

ham ki Thahre ajnabii itnii mudaaraato.n ke baa'd
phir bane.nge aashnaa kitnii mulaaqaato.n ke baa'd
kab nazar me.n aa.egii be-daaG sabze kii bahaar
KHuun ke dhabbe dhule.nge kitnii barsaato.n ke baa'd
the bahut bedard lamhe KHatm-e-dard-e-ishq ke
thii.n bahut be-mehr sub.he.n mehrbaa.n raato.n ke baa'd
dil to chaahaa par shikast-e-dil ne mohlat hii na dii
kuchh gile shikve bhii kar lete munaajaato.n ke baa'd
un se jo kahne ga.e the 'faiz' jaa.n sadqe kiye
an-kahii hii rah ga.ii vo baat sab baato.n ke baa'd

Faiz Ahmad Faiz
Nazm

magar zulm ke KHilaf

ham amn chaahte hai.n magar zulm ke KHilaaf
gar ja.ng laazmii hai to phir ja.ng hii sahii
zaalim ko jo na roke vo shaamil hai zulm me.n
qaatil ko jo na Toke vo qaatil ke saath hai
ham sar-ba-kaf uThe hai.n ki haq fata.h-yaab ho
kah do use jo lashkar-e-baatil ke saath hai
is Dha.ng par hai zor to ye Dha.ng hii sahii
zaalim kii ko.ii zaat na maz.hab na ko.ii qaum
zaalim ke lab pe zikr bhii in kaa gunaah hai
phaltii nahii.n hai shaaKH-e-sitam is zamiin par
taariiKH jaantii hai zamaana gavaah hai
kuchh kor-baatino.n kii nazar ta.ng hii sahii
ye zar kii ja.ng hai na zamiino.n kii ja.ng hai
ye ja.ng hai baqaa ke usuulo.n ke vaaste
jo KHuun ham ne nazr diyaa hai zamiin ko
vo KHuun hai gulaab ke phuulo.n ke vaaste
phuuTegii sub.h-e-amn lahuu-ra.ng hii sahii

Sahir Ludhianvi
Nazm

banjara-nama

ye khep bhare jo jaataa hai ye khep miyaa.n mat gin apnii
ab ko.ii gha.Dii pal saa'at me.n ye khep badan kii hai kafanii
kyaa thaal kaTorii chaa.ndii kii kyaa piital kii Dibyaa-Dhaknii
kyaa bartan sone chaa.ndii ke kyaa miTTii kii ha.nDiyaa chiinii
sab ThaaTh pa.Daa rah jaavegaa jab laad chale gaa banjaaraa

Nazeer Akbarabadi
Nazm

jamhuriyat

ye mile.n ye jaagiire.n
kis kaa KHuun piitii hai.n
baracko.n me.n ye fauje.n
kis ke bal pe jiitii hai.n
kis kii mehnato.n kaa phal
daashtaa.e.n khaatii hai.n
jho.npa.Do.n se rone kii
kyuu.n sadaa.e.n aatii hai.n
jab shabaab par aa kar
khet lahlahaataa hai
kis ke nain rote hai.n
kaun muskuraataa hai
kaash tum kabhii samjho
kaash tum kabhii samjho
kaash tum kabhii jaano
das karo.D insaano!
ilm-o-fan ke raste me.n
laaThiyo.n kii ye baa.De.n
collego.n ke la.Dko.n par
goliyo.n kii bauchhaa.De.n
ye kiraa.e ke GunDe
yaadgaar-e-shab dekho
kis qadar bhayaanak hai
zulm kaa ye Dhab dekho
raqs-e-aatish-o-aahan
dekhte hii jaa.oge
dekhte hii jaa.oge
hosh me.n na aa.oge
hosh me.n na aa.oge
ai KHamosh tuufaano!
das karo.D insaano!

Habib Jalib
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

kis se mohabbat hai

adaa.e.n le ke aa.ii hai vo fitrat ke KHazaano.n se
jagaa saktii hai mahfil ko nazar ke taazyaano.n se
vo malka hai KHiraaj us ne liye hai.n bostaano.n se
bas ik mai.n ne hii aksar kii hai.n naa-farmaaniyaa.n us kii

Asrarul Haq Majaz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now