Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bos"

Nazm MATCHES FOR "bos"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

mujhe sochne de

merii naakaam mohabbat kii kahaanii mat chhe.D
apnii maayuus uma.ngo.n kaa fasaana na sunaa
zindagii talKH sahii zahr sahii sam hii sahii
dard o aazaar sahii jabr sahii Gam hii sahii
lekin is dard-o-Gam o jabr kii vus.at ko to dekh
zulm kii chhaa.nv me.n dam to.Dtii KHilqat ko to dekh
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D
jalsa-gaaho.n me.n ye dahshat-zada sahme amboh
rahguzaaro.n pe falaakat-zada logo.n ke giroh
bhuuk aur pyaas se pazh-murda siyah-faam zamii.n
tiira-o-taar makaa.n muflis o biimaar makii.n
nau-e-insaa.n me.n ye sarmaaya o mehnat kaa tazaad
amn o tahziib ke parcham tale qaumo.n kaa fasaad
har taraf aatish o aahan kaa ye sailaab-e-aaziim
nit-na.e tarz pe hotii hu.ii duniyaa taqsiim
lahlahaate hu.e kheto.n pe javaanii kaa samaa.n
aur dahqaan ke chhappar me.n na battii na dhu.aa.n
ye falak-bos mile.n dilkash o siimii.n baazaar
ye Galaazat pe jhapaTte hu.e bhuuke naadaar
duur saahil pe vo shaffaaf makaano.n kii qataar
sarsaraate hu.e pardo.n me.n simaTte gulzaar
dar-o-diivaar pe anvaar kaa sailaab-e-ravaa.n
jaise ik shaa.er-e-mad.hosh ke KHvaabo.n kaa jahaa.n
ye sabhii kyuu.n hai ye kyaa hai mujhe kuchh sochne de
kaun insaa.n kaa KHudaa hai mujhe kuchh sochne de
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D

Sahir Ludhianvi
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

yas

barbat-e-dil ke taar TuuT ga.e
hai.n zamii.n-bos raahato.n ke mahal
miT ga.e qissa-haa-e-fikr-o-amal!
bazm-e-hastii ke jaam phuuT ga.e
chhin gayaa kaif-e-kausar-o-tasniim
zahmat-e-girya-o-bukaa be-suud
shikva-e-baKHt-e-naa-rasaa be-suud
ho chukaa KHatm rahmato.n kaa nuzuul
band hai muddato.n se baab-e-qubuul
be-niyaaz-e-du.aa hai rabb-e-kariim
bujh ga.ii sham-e-aarzuu-e-jamiil
yaad baaqii hai be-kasii kii daliil
intazaa-e-fuzuul rahne de
raaz-e-ulfat nibaahane vaale
baar-e-Gam se karaahne vaale
kaavish-e-be-husuul rahne de

Faiz Ahmad Faiz
Nazm

hum

jahaa.n pahaa.Do.n ke aasmaa.n-bos silsile hai.n
vahaa.n kabhii bahr maujzan the
jahaa.n bayaabaa.n me.n ret u.Dtii hai
baad-e-masmuum guu.njtii hai
vahaa.n kabhii sabza-zaar-o-gul-gasht kaa samaa.n thaa
buland-o-baalaa haqiir-o-hech
is shikast-o-ta.amiir ke tasalsul me.n bah rahe hai.n
shikast-o-ta.amiir ke tasalsul me.n tuu hai mai.n huu.n

Zia Jalandhari
Nazm

luDhakta patthar

raat ke haath ne kirno.n kaa galaa ghuu.nT diyaa
jaise ho jaa.e zamii.n-bos shivaala ko.ii
ye ghaTaa-Top a.ndheraa ye ghanaa sannaaTaa
ab ko.ii giit hai baaqii na ujaalaa ko.ii

Qateel Shifai
Nazm

machhli ki bu

bistar me.n leTe leTe
us ne sochaa
''mai.n moTaa hotaa jaataa huu.n
kal mai.n apne niile suiT ko
alter karne
darzii ke haa.n de aa.uu.ngaa
nayaa suiT do-chaar mahiine baa'd sahii!
darzii kii duukaan se lag kar
jo hotel hai
us hotel kii
machhlii testy hotii hai
kal khaa.uu.ngaa
lekin machhlii kii buu saalii
haatho.n me.n bas jaatii hai
kal saabun bhii laanaa hai
ghar aate
letaa aa.uu.ngaa
ab ke ''yardley'' laa.uu.ngaa
office me.n kal kaam bahut hai
boss agar naaraaz hu.aa to
do din kii chhuTTii le luu.ngaa
aur agar mood hu.aa to
chhe ke show me.n
''raam-aur-shyaam'' bhii dekh aa.uu.n gaa
picture achchhii hai saalii
nau se baara
club ramii
do din se luck achchhaa hai
kal bhii saaTh ruupe jiitaa thaa
aaj bhii tiis ruupe jiitaa huu.n
aur ummiid hai
kal bhii jiit ke aa.uu.ngaa
bas ab nii.nd aa.e to achchhaa
kal bhii
jiit ke
nii.nd aa.e to
ikkaa-dukkii nahla-dahla
ii.nT kii begam
machhlii kii buu
taash ke patte
joker joker
suiT pahan kar
moTaa-tag.Daa joker....
itnaa bahut saa soch ke vo
soyaa thaa magar
phir na uThaa!!
duusre din jab
us kaa janaaza
darzii kii duukaan ke paas se guzraa to
hotel se machhlii kii buu
duur duur tak aa.ii thii!!!

Mohammad Alvi
Nazm

banaras

bhaTaktii hu.ii vaqt kii aatmaa.e.n
tire ghaaT ke pattharo.n kii zabaa.n se
yugo.n kii sadaa.o.n kii suurat ubhar kar
ghulii jaa rahii hai bujhe paaniyo.n me.n
tirii saa.ns kii shaah-raaho.n par phuuTii
vahii ta.ng galiyaa.n, vo galiyo.n me.n galiyaa.n!
ki jaise rago.n kaa bune jaal ko.ii
jahaa.n laakh bhaTko, na ko.ii safar ho
safar faasla hai, safar marhala hai
yahii.n par hayaat aur yahii.n par fanaa hai
isii marhale se isii, faasle se
ik imkaan ban kar jo bahtaa hai paanii
sabhii apnii apnii qadaamat ke aasaar
dhiire se us me.n bahaane lage hai.n
sabhii apnii falak-bos tanhaa.ii
tire ufuq par sajaane lage hai.n
ko.ii raag KHaamosh gaane lage hai.n
muqaddas bayaabaan, jismo.n ke markaz!
tirii ruuh ke be-karaa.n sard, kone me.n
sadiyaa.n Galaazat kiye jaa rahii hai.n
banaaras tirii sab mujarrad adaa.e.n
hasii.n maut paa kar jiye jaa rahii hai!

Riyaz Latif
Nazm

iqbaal ka sher

bebaak nigaaho.n kaa falak-bos ishaara
sa.ngiin chaTaano.n se guzartaa hu.aa dhaaraa

Maikash Akbarabadi
Nazm

pahla jashn-e-azadi

ai hind ke baashindo aa.o uj.Daa gulzaar sajaa Daale.n
ab daur-e-Gulaamii KHatm hu.aa ik taaza jahaa.n kii binaa Daale.n
ab hind kii aslii iid hu.ii jo aazaadii kii diid hu.ii
pa.Dh pa.Dh ke namaaz-e-aazaadii ab ruuThe hu.o.n ko manaa Daale.n
kashtii bhii na.ii dariyaa bhii nayaa saahil bhii nayaa mallaah bhii na.e
ab kar ke bharosa himmat par tuufaan me.n raah banaa Daale.n
hai.n ranj-o-KHusuumat ik ro.Daa raah-e-aazaadii me.n ab bhii
ham ranj puraane duur kare.n bichh.Do.n ko gale se lagaa Daale.n
jo mulk thaa sone kii chi.Diyaa bandhan ne use paamaal kiyaa
Gurbat ko yahaa.n se duur kare.n phir duudh kii nahre.n banaa Daale.n
phir bos se yodhdhaa paidaa ho.n jo hind kii qismat jaag uThe
ik baar zamaane par sikka phir maadar-e-hind biThaa Daale.n
is buu.Dhe himaala parbat se phir nuur kaa chashma-e-ahl uThe
is mel-o-mohabbat ke jal se har baashii ko nahlaa Daale.n
ye hind kii aazaadii goyaa kul mashriq kii aazaadii hai
phir mashriq mashriq ban jaa.e jo zulm ke daur miTaa Daale.n
'anvar' kii du.aa hai ai maulaa phir hind kii qismat jaag uThe
bichh.De aapas me.n mil jaa.e.n ham ruuThe hu.e ko manaa Daale.n

kanval Dibaivi
Nazm

dar-madh-am

bole ki raaz-vaaz to kuchh bhii nahii.n hai bas
sunday kii shaam paa.nch baje izn-e-aam hai

Khalid Mahmood
Nazm

qaumi tarana

pyaaraa hindustaan hamaaraa pyaaraa hindostaan
jaan fidaa hai is par apnii dil is par qurbaan
mulk nahii.n ye hai jannat kaa dilkash ek makaan
pyaaraa hindustaan hamaaraa pyaaraa hindostaan
pyaare pyaare dariyaa is ke pyaarii pyaarii nahre.n
pyaare pyaare chashme is ke pyaarii pyaarii lahre.n
pyaare pyaare manzar pyaarii pyaarii is kii shaan
pyaaraa hindustaan hamaaraa pyaaraa hindustaan
pyaarii khetii-baa.Dii pyaarii pyaarii paidaavaar
pyaarii pyaarii aab-o-havaa hai pyaarii is kii bahaar
dil me.n hamaare rahtaa hai har vaqt isii kaa dhyaan
pyaaraa hindustaan hamaaraa pyaaraa hindustaan
pyaaraa pyaaraa din hai is kaa pyaarii pyaarii raat
pyaaraa shaam-o-sahar kaa jalva pyaarii har ik baat
pyaare pyaare nazzaaro.n kii pyaarii pyaarii kaan
pyaaraa hindustaan hamaaraa pyaaraa hindustaan
pyaare phal pyaarii tarkaarii pyaare is ke phuul
pyaare aam aur jaamun is ke pyaare niim babuul
pyaare Galle pyaare meve pyaare pyaare dhaan
pyaaraa hindustaan hamaaraa pyaaraa hindostaan
pyaarii garmii pyaarii sardii pyaarii har barsaat
pyaarii har har baat hai is kii pyaarii har har ghaat
pyaarii hai har ik adaa pyaaraa har ek nishaan
pyaaraa hindustaan hamaaraa pyaaraa hindustaan
'iqbaal' aur 'tagore' se shaa.ir p-c-re se faazil
v-c-raaman shaah sulaimaa.n j-c-bos se kaamil
'gaa.ndhii' aur 'jinnaah' se leader 'zaakir' se vidvaan
pyaaraa hindustaan hamaaraa pyaaraa hindustaan
'jauhar' 'ansaarii' 'ajmal' 'aazaad' 'javaahar-laal'
'daadaa-bhaa.ii' 'daas' 'tilak' 'gokhel' se nek-KHisaal

Mohammad Shafiuddin Nayyar
Nazm

etiraf

kyaa kahuu.n ko.ii bhii shai asl pe qaa.em nahii.n rahtii
baat pairaa.e ke sahraa me.n nikal jaa.e to ghar lauT na paa.e
isti.aare kii zabaa.n chaaTne aa jaa.e mire ijz kii shoKHii mire jazbo.n kii haraarat mire lafzo.n kii basaarat
har kinaaya mire tapte hu.e jazbaat-e-tapaa.n raakh kii jhillii kii tarah oT me.n le le
saaf-shaffaaf tapaa.n raakh kii chaadar
haule haule mire jazbaat ke sar tak sarak aa.e
mere maulaa miraa fan bhii mirii be-jaan mohabbat kii tarah nam se tahii hai
phir bhii ai maalik-e-izzat
jaane kyuu.n mere gul-andaam murabbii mujhe chhuune pe razaa-mand nahii.n hai.n
jaane kyuu.n mere gul-andaam ko Dar hai
raakh ke Dher me.n shaayad ko.ii jazba abhii zinda ho aur is dast
hinaa-ra.ng kii pore.n na jhulas de
lafz bhobhal kii tahe.n hai.n
aatish-e-jazb kahii.n sarv-e-falak-bos kaa daaman na jalaa de

Khalid Ahmad
Nazm

subhash-chandr-bos bahadur-shah-zafar ke mazar par

assalaam ai azmat-e-hindostaa.n kii yaadgaar
ai shahanshaah-e-dayaar-e-dil faqiir-e-be-dayaar

Jagan Nath Azad
Nazm

zindagi

zindagii raahat-e-jaa.n dard dil-e-zaar bhii hai
baa.njh khetii bhii hai aur kisht-e-guhar-baar bhii hai
zindagii ek dhanak
shoKH ra.ngo.n se banii
zindagii qarz bhii hai farz bhii hai
zindagii ek saraab
zindagii jaam-e-sharaab
zindagii husn-e-shabaab
zindagii buu-e-gulaab
zindagii kyuu.n ho azaab
jis ne jis rang me.n dekhaa ye banii vaisii hii
shaad-naashaad to aabaad hai.n barbaad yahaa.n
faqr ek phuul bhii hai dhuul bhii hai
zindagii gahraa samundar ko.ii
us falak-bos bulandii se pare
log jiite hai.n ki marnaa hai unhe.n
zehn-o-maahaul kii taariikii me.n
jis tarah hogaa ba-har-taur guzar kar le.nge
log jiine se bahut pahle hii mar jaate hai.n
ik tasaahul kaa bahaana hai ye andaaz un kaa
aa.o ham ziist sajaa.e.n apnii
azmat-e-aadam-o-havvaa na ghaTaa.e.n hargiz
ham vafaa-kesh bane.n
KHidmat-e-quam-o-vatan apnaa saliiqa ban jaa.e
husn ke phuul bikhere.n KHushbuu
pyaar ke nuur se raushan ho.n fazaa.e.n saarii
dil me.n nafrat na rahe
dard miT jaa.e.n mile sabr-o-qaraar
raushnii paa.e hayaat
raat kii zulmate.n miT jaa.e.n kahii.n kho jaa.e.n
KHuugar-e-ra.nj bane.n vaaris-e-aura.ng-e-nashaat
sarKHushii paa.e hayaat
jiinaa jab tak hai saliiqe se ji.e.n
maut aa.e to qariine se mare.n
husn-e-tadbiir se gulshan me.n guhar-baarii ho
kaam kuchh aise kare.n
ziist jaaved bane

Om Parkash Bajaj
Nazm

jashn-e-masarrat

duniyaa kii nigaahe.n bhii paa-bos-e-qayaadat hai.n
is bint-e-javaahar kii allah re masiihaa.ii

Masooda Hayat
Nazm

karan-ta-karan

jo maza chaahat me.n hai
haasil me.n us ko Dhuu.nDhnaa be-kaar hai
ho kahaa.n tum kis jahaa.n me.n
kyuu.n mujhe ma.aluum ho?
dhund me.n ho KHvaab me.n
yaa aasmaa.n kii qaus me.n
yaa mauj kii gardish me.n ho
tum haath kii rekhaa ke andar ho kahii.n
yaa duur sannaaTo.n ke Takraav se paidaa
an-sunii aavaaz kii rezish me.n ho
chaahe kahii.n bhii ho
mirii chaahat ke phaile baazu.o.n ke
halqa-e-mauhuum me.n maujuud ho!
lams me.n hiddat bahut hai
aur sitaaro.n kii chubhan kaa bhii mujhe ehsaas hai
band muTThii me.n dabe motii
kii lazzat se bhii huu.n mai.n aashnaa
par bayaa.n kaise karuu.n
vo lutf jo chaahat kii phailii boss kii
mad.hosh-kun ThanDak me.n hai
chaahat ke har dam
phailte aafaaq kii larzish me.n hai!!

Wazir Agha
Nazm

mere naghme tumhaare liye hain

ai vatan ke sajiile javaano
mere naGme tumhaare liye hai.n
sarfaroshii hai iimaa.n tumhaaraa
jur.ato.n ke parastaar tum ho
jo hifaazat kare sarhado.n kii
vo falak-bos diivaar tum ho
ai shujaa.at ke zinda nishaano
mere naGme tumhaare liye hai.n
biiviyo.n maa.o.n bahno.n kii nazre.n
tum ko dekhe.n to yuu.n jagmagaa.e.n
jaise KHaamoshiyo.n kii zabaa.n se
de rahii ho.n vo tum ko du.aa.e.n
qaum ke ai jarii paasbaano
mere naGme tumhaare liye hai.n
tum pe jo kuchh likhaa shaa.iro.n ne
un me.n shaamil hai aavaaz merii
u.D ke pahu.nchoge tum jis ufuq par
saath jaa.egii aavaaz merii
chaa.nd taaro.n ke ai raaz-daano
mere naGme tumhaare liye hai.n

Jameeluddin Aali
Nazm

wajud aur ibn-e-adam

2
zamii.n kaa zamaana hai ye
ham zamii.n-bos hu.e
sabz ra.ngo.n ke saraab
niilguu.n sat.h-e-aab
ham falak-bos hu.e
aur ye bhuul ga.e
the kabhii apne badan par tere qadmo.n ke nishaa.n
sabz patto.n ke sivaa
aur bhii rang the rango.n se sivaa
kaun saa kaif thaa in chiizo.n me.n
jin kii tum ruuh the ham paikar the
nuur ho saaya ho ki taariikii ho
laakh mai.n jism se aur ruuh se aaraasta pairaasta ho kar uTThuu.n
ban bhii jaa.e ye zamii.n
merii karishma-gah-e-aalaat-garii
tuu magar aur hii kuchh chiiz hai
tuu na nuurii hai na naarii hai na KHaak-e-aabii
tuu na shamsii hai na arzii hai na hai mahtaabii
tuu na mirriiKH se zohra se na sartaan se hai
tere qadmo.n ke nishaa.n aur kahii.n dekhe the
jism qad shakl ye atvaar ye tevar tere
terii buu-baas libaas phuul ye zevar tere
KHaamushii terii ye aavaaz ye chalnaa teraa aanaa jaanaa
ye sitaaro.n kaa Gubaar
silsila hai ye adaa.o.n kaa
ki hai jism ke pardo.n pe terii ruuh ke naGmo.n kaa KHumaar
ik na.ii shaan kaa har roz nikhaar
aur phir sochtaa huu.n
tuu to kuchh aur hai in chiizo.n kaa majmuu.a nahii.n
tuu to kuchh aur hai in se bhii sivaa
in ke hone kaa na hone kaa bhii paaband nahii.n teraa vajuud
tere qadmo.n ke nishaa.n aur kahii.n dekhe the
tere qadmo.n se to hai aaj bhii shaadaab miraa saaraa vajuud
yaad rakhne kii yahii baat thii ibn-e-aadam
tum ne jab chaa.nd pe rakkhaa thaa qadam
tum kisii aur sitaare se yahaa.n aa.e the

Ghalib Ahmad
Nazm

nelson mandela

ye barr-e-aazam kii saarii balaa.e.n
sunaa hai ki ab muntashir ho rahii hai.n
falak-bos tahziib ke cactus jho.npa.Do.n kii rivaayaat ko Das rahe hai.n
magar
kam nahii.n ye ki apnii zamii.n aur apnii fazaa me.n
siyah paikaro.n kii do-dhaarii anaa aur aahan iraado.n ne
apne liye ab na.e tevaro.n ke ujaale taraashe
a.ndherii zamiino.n se mere nikaale
KHat-e-ustuvaa ke ghane ja.ngalo.n kii amal-daariyo.n me.n hai.n diipak jalaa.e
qabiilo.n kii har baahamii ja.ng ko shaaKH-e-zaituun ke zamzame hai.n sunaa.e
dahakte hu.e reg-zaaro.n ke niiche
siyah zar ke chashmo.n ko mahmez dii hai
ye tahriik ye inqalaab saare
nelson madela
tumhaarii rago.n me.n nayaa KHuu.n shab-o-roz pahu.nchaa rahe hai.n
tumhaarii hathelii ko suuraj me.n tabdiil karne lage hai.n
tumhaarii nazar me.n bhare manzaro.n kii dhanak bo rahe hai.n
salaaKHo.n ke piichhe akele nahii.n tum
siyah barr-e-aazam tumhaarii jilau me.n
nahii.n
saarii duniyaa tumhaarii jilau me.n

Ambar Bahraichi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now