Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "calender"

Nazm MATCHES FOR "calender"

Nazm

mazdur

use kyaa farq pa.Dtaa hai
december biit jaane se
yakum taariiKH aane se
kisii bhii saal-e-nau ke KHair-maqdam par KHushii ke shaadyaane se
suruur-o-kaif-o-mastii me.n mohabbat ke taraane se
club aur hoTalo.n me.n vahshiyaana raqs par saudaa.iyo.n ke thartharaane se
use kyaa farq pa.Dtaa hai
use to har guzartaa saal ik jaisaa hii lagtaa hai
vo ik mazduur he jis kii
musalsal bhuuk aur iflaas se arse se lambii ja.ng jaarii hai
ki jis ke saamne har sub.h pai-dar-pai mashaqqat ke taqaaze hai.n
ka.Dii mehnat riyaazat jehd-e-paiham us kaa maslak hai
use kyaa farq pa.Dtaa hai
calender par na.e hindso.n kii ik taariiKH aane se
december biit jaane se
nayaa ik saal aane se

Shahnaz Parveen Shazi
Nazm

parinda kamre mein rah gaya

ek aadmii puraane calender par nishaan lagaa rahaa thaa
duusraa nayaa calender haath me.n maro.D rahaa thaa
tiisare kaa chehra chauthe aadmii ke chehre par lag gayaa thaa
aadmii tiin the
ye tiin samte.n chaukor kamre ke KHaalii kone ko
dekh rahii thii.n
inhii tiin samto.n ko kal saaraa shahr ban.naa thaa
vo tiino.n
kamre ke tiino.n kono.n me.n jaa kar kha.De ho ga.e
aur sochne lage
kis kaa konaa hai jo KHaalii rah gayaa hai
achaanak parda hilaa
aur ek parinda
is kone me.n aa kar baiTh gayaa
tiino.n ke mu.nh se niklaa
ma.asuum
unhe.n pataa chalaa ki vo tiino.n vaqt kii qaid me.n the
tiino.n ne aag jalaa.ii
aur bole
aag jalne tak ye samte.n hamaarii rahe.ngii
aag chauthe kone me.n lagaa.ii ga.ii thii
zindagii ke ruKH ba.Dhte jaa rahe the
suuraj ne chaar kirne.n kamre ke andar phe.nkii.n
unho.n ne paa.nch paa.nch gaz kaa sunahrii-pan apne gird lapeTaa
suuraj kii tiin baa.nhe.n TuuT ga.ii.n
unho.n ne apnii ek ek u.nglii kaaTii
aur bole
''ham ne apnii u.ngliyo.n se zindagii kaa sukuut to.Daa
parinda kamre me.n rah gayaa

Sara Shagufta
Nazm

bachchon ki sarkar

ba.Do.n kaa raaj to sadiyo.n se hai zamaane me.n
kabhii hu.aa nahii.n duniyaa me.n raaj chhoTo.n kaa
agar hame.n bhii mile iKHtiyaar ai logo
to ham dikhaa.e.n tumhe.n kaam-kaaj chhoTo.n kaa
mulk me.n bachcho.n kii gar sarkaar ho
zindagii ik jashn ik tehvaar ho
hukm de.n aise calender ke liye
jis me.n do din baad ik itvaar ho
sab ko de.n school jaisaa uniform
ek sii har panT har shalvaar ho
hostel ta.amiir ho sab ke liye
ko.ii bhii insaa.n na be-ghar-baar ho
raashtra bhaashaa ham ishaaro.n ko banaa.e.n
dakhkhin uttar me.n na phir takraar ho
ham minister ho.n to vo system bane
jis me.n muflis ho na saahuukaar ho
qaumii daulat ke KHazaane ho.n bhare
KHud hii le le jis ko jo darkaar ho
iid diivaalii sabhii mil kar manaa.e.n
aadmii ko aadmii se pyaar ho
mulk me.n bachcho.n kii gar sarkaar ho

Sahir Ludhianvi
Nazm

ek ghair-alamti nazm

adhuurii la.Dkiyo
tum apne kamro.n me.n puraane saal ke bosiida calender sajaa kar sochtii ho
ye badan umro.n kii saazish me.n na aa.e.nge
tumhe.n kis ne bataayaa hai
gha.Dii kii suu.iyo.n ko rokne se dau.Dtaa aur haa.nptaa suuraj misaal-e-naqsh-e-paa
aflaak par jam jaa.egaa
tumhe.n ma.aluum hai uryaaniyo.n ko Dhaa.np kar tum aur uryaa.n ho rahii ho
roz in aa.nkho.n kii tik.Dii me.n tumhaare jism tulte hai.n
har ik shab hostel me.n taash kii baazii me.n tum ko jiit kar ik jashn hotaa hai
hamaarii KHvaab-gaaho.n me.n tumhaare KHvaab raushan hai.n
chalii aa.o
ki baahar barf hai
aur ab hame.n tum se judaa bistar kahaa.n tasliim karte hai.n
chalii aa.o ki umre.n raa.egaa.n hone se bach jaa.e.n!

Jawayd Anwar
Nazm

nae sal ki aamad par

phir na.e saal kii aamad hai nayaa jaam chale
phir barahman ne kahaa hai ki ye saal achchhaa hai
mere kamre me.n calender jo na.e saal kaa aavezaa.n hai
nazar aataa hai guzishta kii tarah
vahii uljhe hu.e haalaat vahii mah.ngaa.ii
hai vahii tishna-labii aur vahii tanhaa.ii
na mohabbat na muravvat na vafaa ke aasaar
aadamiyyat ke taqaaze na sadaaqat kii phaban
jis tarah aatish-e-imroz me.n jaltii tasviir
jaise kajlaa.ii hu.ii dast-e-hinaa.ii kii lakiir
mere kamre me.n calender jo na.e saal kaa aavezaa.n hai
nazar aataa hai guzishta kii tarah
ek manzar jo suhaanaa hai vo phaile to sahii
raaj KHushiyo.n kaa ho chehro.n pe masarrat chamke
ghar ke aa.ngan me.n mohabbat kaa ko.ii gul mahke
aur shaa.ir kaa qalam ek qasiida likkhe
jis kaa har lafz ho aaGaaz-e-masarrat kii naved
Thiik hai ham bhii na.e saal kaa naqsha dekhe.n
baab-dar-baab ko.ii KHvaab-e-tamannaa dekhe.n
mere kamre me.n calender jo na.e saal kaa aavezaa.n hai
KHud tamaasha hai tamaashaa.ii bhii

Momin Khan Shauq
Nazm

qaht

mai.n apne band kamre me.n pa.Daa huu.n
ki raushnii bhii ujaalo.n kii muntazir hai
vo kone me.n lagaa jaalaa bhii thak gayaa hai
niilii diivaare.n jo ummiid kaa ik zaaviya banaatii thii.n
KHud ko parde se chhupaatii hai.n
ki khi.Dkii se nazar aataa
baarish kaa KHuubsuurat manzar
mahzuuz kun thaa
calender ke palaTne par
ab ram nazm bhii sunaa.ii nahii.n detii
magar khi.Dkii par rasta banaataa hu.aa paanii
vo bhii be-taab hai ki jhaa.nk le andar
ki pahro.n kaun hai jo chup kii sham.a jalaa.e
khi.Dkii par pa.De paanii ke qatro.n ko
muqaddas se muqaddas jaantaa hai
ki ek ek qatra aa.nsuu se shabiih hai
ki barse to bahut barse vagarna qaht vaajib hai

Saira Iqbal
Nazm

khoj

mai.n apnaa naam aur paidaa.ish
khoj rahii huu.n
ek aisii KHurdbiin se
jis me.n
pachchiisvii.n sadii kii aa.nkhe.n
lagii hu.ii hai.n
vo aa.nkhe.n jin kii putlii safed
aur sakliiraa siyaah hai
vo aa.nkhe.n jo duur tak
dekh saktii hai.n aur
aaTHvaa.n rang pahchaan saktii hai.n
jinhe.n baa.isvii.n sadii ne
daryaaft karne kaa da.avaa kiyaa thaa
magar ye alamiya
jis kii kokh
vaqt ke vajuud se KHaalii hai
merii paidaa.ish ke lamhe ko
kisii calender me.n
nishaan-zad karne se qaasir hai
shaayad meraa janm
tiin sau sa.DsaThve.n din ke
kisii Gair-matbuu.a lamhe me.n hu.aa thaa
jise tash.hiir karte hu.e
KHudaa-e-aslii
apnii laa-mahduudiat kii duhaa.ii detaa rahaa
aur KHiraaj letaa rahaa

Sidra Afzal
Nazm

naya sal

pichhle saal ke calender ke pahluu me.n
saal-e-nau kaa calender yuu.n lagtaa hai
jaise nau-mauluud ko.ii
maa.n kii baGal me.n leTaa ho

Aleem Jahangir
Nazm

be-masraf rishton ki faraghat

sab se achchhaa khel hai
ajnabiyyat ko kurednaa
sab se achchhaa khel hai
vaqt-guzaarii
vaqt bahut hai hamaare paas
ku.Dhte rahne ke liye aur
baate.n karne ke liye
diivaaro.n se KHud-kalaamii ke andaaz me.n
diivaare.n kahaa.n suntii hai.n
diivaare.n to bas diivaare.n hai.n
jo haa.il rahtii hai.n rishto.n ke darmiyaan
jin par laTkaa.e jaa sakte hai.n rishte!
matruuk jazbo.n ke make-up me.n lipTe lipTaa.e
be-chehra poster
puraane calender kii tarah utaar phe.nkne ke liye
vaqt kii qaashe.n!

Anjum Saleemi
Nazm

be-abaad gharon ka nauha

be-aabaad gharo.n me.n aisaa hotaa hai
duur ke des ko jaane vaalaa kolhuu kaa ek bail banaa hai
har pahlii ko harkaare ke haath me.n ek money-order kaa rasta taktii
baap kii aa.nkhe.n KHushii KHushii tasbiih ke daane jaldii jaldii pher rahii hai.n
bahne.n dollar ke ta.aviiz banaa kar gale me.n Daale ghuum rahii hai.n
bhaa.ii apne yaaro.n me.n pardes ke qisse rang-birangii aavaazo.n me.n haa.nk rahe hai.n
KHush-fahmii kii maarii biivii apnii javaanii umr ke calender me.n rakh kar kaamo.n me.n lag jaatii hai
maa.n diivaar pe baiThe kavve kii aavaaz ko sun kar KHush hotii hai
duur ke des me.n
kolhuu kaa vo bail bechaara
raat ko thak kar so jaataa hai
be-aabaad gharo.n me.n aksar
aisaa ho jaataa hai

Zaeem Rasheed
Nazm

maslub

mere kamre kii
bistar ke saamne vaalii diivaar
jis par khi.Dkii hai na ko.ii darvaaza
is KHaalii diivaar par
mujhe apne andar kaa KHalaa mujassam dikhaa.ii detaa hai
is liye mai.n ne us KHalaa ko
kisii painting calender yaa tasviir se bharne kii koshish nahii.n kii
is diivaar ke ain vast me.n
chhat se andaazan De.Dh foot ke faasle par
ek duudhiyaa bulb lagaa hai
jise aksar raat bhar bujhnaa nasiib nahii.n hotaa
aur bulb ke niiche
chand inch ke faasle par
gha.Dii laTkaane ke liye ek kiil Tho.nkii ga.ii hai
magar ab us kiil par gha.Dii maujuud nahii.n
balki vaqt KHud laTkaa hu.aa hai

Neelam Malik
Nazm

aao bachcho hum sab banaen

apnaa apnaa bhuul calender
jitnaa kuchh ham bhuul ga.e hai.n
jo jo ham se bhuul hu.ii hai
vo sab likkhe.n
vo bhii jo ham bhuulnaa chaahte hai.n
vo bhii jo ham bhuul nahii.n paate hai.n
vo sab chehre jo yaado.n kii bhuul-bhulayyo.n me.n sote hai.n
unhe.n jagaa de.n
bhuul calender me.n un kii tasviir lagaa de.n
aur rozaana bhuul calender dekh ke nikle.n
us din pichhle baras me.n ham ne kyaa boyaa thaa kyaa paayaa thaa
kyaa paane se kyaa khoyaa thaa
kyaa khone se kyaa paayaa thaa
mushkil ke kis kis lamhe me.n
kis ne apnaa haath chhu.Daayaa
aur kaun kitnaa kaam aaya thaa
bhuul na jaanaa bhuul calender
ab rozaana bhuul calender

Imran Shamshad Narmi
Nazm

ayaz chup hai

ayaaz chup hai
ayaaz chup hai ki ab asiiraan-e-shab bhii
KHvaabiida aks le kar
thakii thakii KHvaahisho.n ke siino.n pe so ga.e hai.n
vo din ki jis din
jale hu.e taaqcho.n pe harfo.n kii be-kafan laash
dafn hogii
vo din calender kii sabz tah se sarak gayaa hai

Farrukh Yar
Nazm

mazarat

mere KHvaab gharau.nde me.n mere saath hai.n
murda lamho.n ke be rut baasii calender
guzrii kal ke bhiige bhiige se pachhtaave
aane vaalii kal ke be kal se andeshe
suukhe phuulo.n kii Tahnii par
patjha.D ke jho.nko.n se u.Dtii be-ghar titlii
piile patto.n kii murjhaa.ii bel se lipTii
sahmii chi.Diyaa
is kii aa.nkho.n ke gahre viiraan samundar
kamre ke kone me.n sa.nvarii guu.ngii gu.Diyaa
shelf me.n rakkhii sajii-sajaa.ii sard kitaabe.n
rasta Dhuu.nDhtii bhaTkii bhaTkii sub.he.n shaame.n
KHud hii socho
aise pur-aavaaz hujuum me.n
aise ghar me.n
tum ko laa ke kahaa.n biThaa.uu.n

Mansoora Ahmad
Nazm

aalam-e-arwah ka ek manzar

raushniyo.n se ghire
ek bahut ba.De maidaan me.n
kisii ne
ek puraanaa calender laTkaa kar
vahaa.n maujuud
tamaam afraad se
ye kahaa hai
ki vo
is me.n
aaj kaa din aur aaj kii taariiKH talaash kare.n
log is calender kaa
ek aur varq ulaTte hu.e
maayuusii ke samundar me.n Garq ho rahe hai.n
un kii ye koshish
aisii hii hai
ki jaise ko.ii
kisii band gha.Diyaal se
sahii vaqt kii tavaqqo kar rahaa ho

Ghayas Mateen
Nazm

taghayyur

calender ke badalne se kahaa.n maazii badaltaa hai
puraane zaKHm bharte hai.n bhalaa aa.nkho.n ko bharne se
jo dil pe vaar ho jaa.e
achaanak haar ho jaa.e
anaa ko Thes jo pahu.nche
dil-o-hosh-o-KHirad pe bad-havaasii ho
ba.Dii gahrii udaasii ho
use jitnaa bhii jhuTlaa.o
nahii.n mumkin KHalaasii ho
suno haatho.n me.n tum jitne calender thaam sakte ho
unhe.n tum saamne rakh lo
hazaaro.n maah tum palTo
hazaaro.n saal se guzro
magar jo saaneha guzraa
tum us ko bhuul paa.oge
calender ko badalne se puraane Gam nahii.n miTte
hazaaro.n marhamo.n se bhii ye zaKHm-e-jaa.n nahii.n bharte
calender shauq se palTo
magar guzre hu.e lamhe na lauTe.nge
calender ko badalne se
muqaddar to na badle.nge

Ali Ejaz Tamimi
Nazm

KHauf

ye calender
is ko chhupaa do kahii.n
is gha.Dii ko kahii.n dafn kar do
ye Tik-Tik

Mushaf Iqbal Tausifi
Nazm

surKH suraj

saal-e-nau ke calender kii
tasviir bhii
hai na.e zaaviye se taraashii hu.ii
kuchh na.e rang KHaako.n me.n
ubhre hu.e dekh kar
talKHii-e-ziist hairaa.n hu.ii
un kii shaadaabiyaa.n dekh kar
muskuraane lagii
KHud hii ye soch kar
kitne pal aur Thahre.ngii shaadaabiyaa.n
kitne din rang Thahre rahe.nge yahaa.n
kyuu.nki un kaa muhaafiz bhii hogaa vahii
jis ke raushan ujaalo.n se
har rang phiikaa pa.Daa
ab na.e saal kaa
surKH suuraj ubharne to do
vo ba.Dii shaan se
is calender kii tasviir ke
KHushnumaa rang saare nigal jaa.egaa
aur anjaan saa
phir se ubhregaa
agle baras
jaise kuchh jaantaa hii nahii.n

Salma Hijab
Nazm

maut ka sal

ye ahd-e-nau kaa chalan hai yaa ye shauq tumhaaraa azalii hai
tum calender taariiKHo.n ko
kisii aur hii naam se jaante ho
yaa.n jazbe rishte fikr aur fard ayyaam se hai.n mansuub sabhii
kabhii darmaa.n karnaa chaahaa kuchh amraaz kaa de kar din kaa KHiraaj
jange.n bhii tumhaarii hii iijaad
aur yaum-e-aman kaa Dho.ng bhii tum
tum vo jo suurat-e-qahr gire
is ruu-e-zamii.n ke shahro.n par
phir un shahro.n ke naam se din mansuub bhii karne vaale tum
haa.n bhuul ga.e us hastii ko
maKHsuus ko.ii bhii yaum nahii.n hai us ke jashn-e-charaaGaa.n ko
ho jis kii siyah-zulfo.n ke asiir avval din se
kyaa kyaa nahii.n hiile tum ne kiye
merii hii talab kii unglii thaame atom bam iijaad kiyaa
kabhii zer-e-zamii.n raah-e-aatish hamvaar kiyaa
kabhii dekhaa chashm-e-falak ne manzar jab
tum thaam ke baahe.n merii the masruur bahut
ik ahd-e-hajar se masnuu.ii fataanat tak
jab bhii ko.ii KHuu.n-aashaam sadaa Takraa.ii mere kaano.n se
mai.n pair me.n ghu.nghruu baa.ndh uThii

Qamar Jahan Naseer
Nazm

hum apni tariKH ka lahu pi ke ji rahe hain

guzishta barso.n ke zaKHm-KHurda calendaro.n ne
hame.n 'ajab raaz-e-dil sunaa.e
havaa thii saakit
udaas mausam kii pattiyo.n se
fazaa ke aa.nsuu chhalak rahe the
puraanii taariiKH ke maqaabir se
kuchh fasurda KHamosh saa.e lapak rahe the
vo shab havelii ke sadr darvaaze par kha.Dii thii
jahaa.n shabiiho.n kaa raqs jaarii thaa
isti'aare tajalliyo.n se chamak rahe the
to un mu'ammar calendaro.n me.n se
ek ne yuu.n zabaan kholii
havaa pe ye jo sukuut taarii hai
sirf ik vaahima hai
aur ye fazaa ke aa.nsuu guzishtanii hai.n
shikastnii hai.n ye saare manzar
jo in ujaa.Dii hu.ii bahaaro.n me.n jaagte hai.n
muGaalate hai.n ye dard-e-dil ke
bache-khuche iztiraab-aasaa ye log
saa.e hai.n ik tamaashaa-e-munfa'il ke
kahii.n bhii ko.ii bachaa nahii.n hai
shikastagii kii bahut puraanii kahaaniyo.n par
sisakne vaale bhii mar chuke hai.n
guzarne vaalo.n kii yaad me.n sar paTakne vaale bhii
us galii se guzar chuke hai.n
ham aise aashufta-jaa.n calender
ki ik mu'amma hai ab hame.n zaKHm-KHurdgii bhii
ham apnii taariiKH kaa lahuu pii ke jii rahe hai.n

Ain Tabish
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now