Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chaahat-vaahat"

Nazm MATCHES FOR "chaahat-vaahat"

Nazm

pesh-rau

jahaa.n se
hu.aa thaa
shuruu.a
safar
dekhaa vahaa.n ko.ii nahii.n thaa
saamne thaa
muntazir sahraa safar kaa
aur saa.e KHaar-daar
dekhte rukte Thiik vaise hii
jo mere aage ke paa.idaano.n par kha.De
saayo.n ne
sochaa chaahaa aur kiyaa
mai.n jo un kaa pesh-rau huu.n

Aadil Raza Mansoori
Nazm

maine jo chaha

mai.n ne jo chaahaa
vo ho gayaa
ye aur baat hai
is hone me.n kitne baras sarf hu.e
mai.n ne
us KHuubsuurat la.Dkii ke saath
kitnaa vaqt basar kiyaa
ye baat ko.ii vaq.at nahii.n rakhtii
mai.n us ke paas gayaa
use chuumaa
aur apne baazuu.o.n me.n bhar liyaa
sarshaarii kahaa.n se shuruu.a hotii hai
ye mai.n ne jaan liyaa
us kii had kahaa.n KHatm hotii hai
ye bhii ma.aluum ho gayaa
ab zinda rahne kaa ko.ii javaaz nahii.n

Mustafa Arbab
Nazm

mere dosto

mire dosto ba.De Gaur se
mai.n jo kah rahaa huu.n use suno
na vahaa.n Daro na kabhii jhuko
jahaa.n zulm ho jahaa.n KHauf ho
jahaa.n jabr ho jahaa.n ho jafaa
jahaa.n vahshiyo.n kaa hujuum ho
jahaa.n nafrato.n jahaa.n ranjisho.n
kaa nasha cha.Dhaa ho avaam par
ho agar vahaa.n bhii KHamosh tum
to ye maan lenaa ki laash ho
mire dosto ba.De Gaur se
mai.n jo kah rahaa huu.n use suno

Zohheb Farooqui Afrang
Nazm

ja maine tujhe aazad kiya

jaa mai.n ne tujhe aazaad kiyaa
jab merii mohabbat kii terii
nazro.n me.n ko.ii vaq.at hii nahii.n
iz.haar kaa mere tere liye
ma.anii hii nahii.n vaq.at hii nahii.n
jab merii hifaazat ne tujh ko
is darja hai bezaar kiyaa
ki tuu ne hii merii chaahat ko
rusvaa yuu.n sar-e-baazaar kiyaa
kyo.n be-qadre kii KHaatir yuu.n
ye vaqt apnaa barbaad kiyaa
jaa mai.n ne tujhe aazaad kiyaa

Mumtaz Malik
Nazm

makin nahin koi

isii ke paa.nv tale hai bahisht kii chaadar
isii kii chaap kii barkat se sabza-o-gul hai.n
isii ke husn-e-tamaazat se vahdat-o-kul hai.n

Nadeem Najid
Nazm

ulTa chakkar

ajiib chakkar ko.ii chalaa hai
jo shai jahaa.n se uThaanaa chaahii
uThaa na paa.e
jahaa.n jo rakkhaa vahaa.n vo rakkhaa nahii.n rahaa hai
jo likhnaa chaahaa vo likh na paa.e

Hamida Shaheen
Nazm

wahan main nahin thi

vahii.n par
munaqqash dariicho.n me.n
sarsabz bele.n sutuuno.n se lipTii hu.ii thii.n
chamakte hu.e chhat ke faanuus kii raushnii me.n
belo.n ke patto.n kii aa.nkho.n me.n Thahrii namii
jhilmilaane lagii thii!
magar sab kii nazre.n
sajii Tabalo.n par jamii thii.n
kisii ko KHabar kab hu.ii thii
vahaa.n me.n nahii.n thii

Arifa Shahzad
Nazm

reip

mai.n apne andar kisii KHalaa me.n bhaTak rahii thii
udha.D rahii thii
magar vahaa.n sirf ik badan thaa
jo naaKHuno.n se vajuud se ruuh chhiiltaa thaa
udha.Dtii saa.nso.n pe daa.nt apne chubho rahaa thaa
mai.n dard-e-zeh se bhii surKH-ruu ho ke aane vaalii
mai.n aashnaa-e-aziyyat-e-taKHliiq
ik tamasKHur se
ek taz.hiik ke gumaa.n se
KHud apnii aahaT kii siskiyo.n par
laraz rahii thii
darindagaan-e-vajuud lekin
tamaam rishto.n kii gaaliyo.n me.n
KHud apnii ta.amiir ke dho.e.n se
yaqii.n kii chaadar chabaa rahe the
vo dard-lamha
KHaraash ho kar guzar rahaa thaa
vahaa.n faqat zabt mo.ajiza thaa
KHudaa kahii.n paas hii kha.Daa thaa
use kahaa.n dard kaa pataa thaa
me.n apne andar kisii KHalaa me.n bhaTak rahii thii
udha.D rahii thii

Atif tauqeer
Nazm

faslon ki baat

tum ne faaslo.n kii baat samajh lii to tumhe.n yaad aa.egaa
ki fanaa ham sab kii taqdiir hai
tumhe.n ma.aluum hai? tumhaare
ghar kii sii.Dhiyaa.n cha.Dhte hu.e mai.n ne hazaar baar
chup-chaap
ziine kii safed diivaaro.n pe u.ngliyaa.n pherii hai.n
is ummiid me.n ki shaayad lams ke
aise zaa.iqe vahaa.n rah jaa.e.n jo tum hamesha
badan ke gunjalak aur be-lafz
zaa.iqo.n kii tarah pahchaan sako
aur yaad rakho
ab samajh me.n aane lagaa hai
ki ko.ii nazm kabhii ishq aur dard kii asl zaruuriyaat
puurii nahii.n kartii
ki ishq maut ke KHilaaf hathiyaar nahii.n
ki hamaare lafz hamaare maqaasid se naa-aashnaa hai.n
ki mujhe chaahat us shaKHs kii hai jo tum ho
ki mai.n mukammal taur pe tumhe.n
kabhii na jaan paa.uu.ngaa

Ejaaz Ahamd
Nazm

din diwangat hue

roz aa.nsuu bahe roz aahat hu.e
raat ghaayal hu.ii din diva.ngat hu.e
ham jinhe.n har gha.Dii yaad karte rahe
rikt man me.n na.ii pyaas bharte rahe
roz jin ke hirdai me.n utarte rahe
ve sabhii din chitaa kii lapaT par rakhe
roz jalte hu.e aaKHirii KHat hu.e
din diva.ngat hu.e

Kunwar Bechain
Nazm

talash-e-jannat

aa.o ab apnii gum-shuda jannat kare.n talaash
phir vaa'da-e-chinaar kii 'azmat kare.n talaash

Sada Ambalvi
Nazm

na-ashnai

ye kis ne chehro.n pe taan dii hai
naa-aashnaa.ii kii phir se chaadar
ki us kii ujlii zamii.n pe mai.n ne
brush se aa.nkho.n ke
ek paikar banaa diyaa thaa
vo ek paikar ki jis me.n apne tamaam KHvaabo.n kaa KHuu.n bharaa thaa
bahaar ban kar khilii.n thii.n us par
mirii tamanna kii saarii kaliyaa.n
magar vahaa.n ab baseraa kartii hai
naa-aashnaa.ii
vo saarii kaliyaa.n
shanaasaa huu.n jin se umr-bhar kaa
khilii.n to KHushbuu vo naa-aashnaa.ii kii mere ghar me.n
basaa ga.ii hai.n
mirii nigaaho.n ke saare manzar ko
dasht-e-viiraa.n banaa ga.ii hai.n

Aabid Jafri
Nazm

maika

mai.n ne chaahaa thaa ko.ii ujaale saa haath
merii u.nglii paka.D kar mujhe aage ba.Dhnaa sikhaa.e
madraso.n daftaro.n shaah-raaho.n makaano.n duukaano.n
talak le chale
lekin aisaa hu.aa
jis jagah aa.nkhe.n kholii thii mai.n ne
vahaa.n haath saare roTii banaane pe maamuur the
KHauf aataa thaa ghar se nikalte hu.e
Dagmagaate qadam
gu.ng alfaaz
bebas nigaahe.n liye
aage ba.Dhtii thii mai.n
chuu.nki ruknaa ko.ii hal nahii.n thaa
so mai.n apnii galii se nikal kar jahaa.n bhii ga.ii
ajnabii merii sahmii hu.ii zaat pe
Darte Darte adaa hotii har baat pe
fiqre kaste rahe
aur ha.nste rahe
tab se ab tak nahii.n yaad
kitne hii dariyaa bahe
kab gulaabii badan saa.nvlaa ho gayaa
ujlii be-daaG aa.nkho.n me.n
kab dard ke zard mausam utar aa.e
kab aa.ina dhuul se bhar gayaa

Nighat Sahiba
Nazm

bachche ki hasrat

KHudaa detaa hame.n bhii par to suu-e-asmaa.n jaate
parindo.n kii tarah u.D kar yahaa.n se ham vahaa.n jaate

Mohsin Baeshin Hasrat
Nazm

badi ka anjam

banaayaa thaa chi.Diyaa ne ik gho.nsla
ki vo ek ghar ke thaa chhat me.n banaa
hu.e ek baar us ke bachche vahaa.n
khilaatii Gizaa laa ke bachcho.n ko maa.n
vo bahr-e-Gizaa thii kisii din ga.ii
pareshaa.n hu.ii jab vo vaapas hu.ii
ki bachche to hai.n lekin aafat ye thii
ki baiThaa hai bachcho.n me.n ik saa.np bhii
pareshaan aur muztarib ho ga.ii
bahut aah-zaarii se fariyaad kii
magar saa.np bachcho.n ko khaane lagaa
to us ne bahut minnato.n se kahaa
jo tuu kar rahaa hai ye harakat burii
zaruur intiqaam is kaa luu.ngii kabhii
sunii jab ki ye saa.np ne guftuguu
lagaa kahne ha.ns kar sataa.egii tuu
vo huu.n mai.n bahaadur ki Dartaa hai sher
karegii bhalaa tuu mujhe kaise zer
Garaz dono.n bachcho.n ko vo khaa gayaa
shikam-ser ho kar vahii.n so rahaa
ye dekhaa jo chi.Diyaa ne aa.nkho.n se haal
to phir saa.np par Gussa aayaa kamaal
judaa.ii me.n bachcho.n ke rotii rahii
vo is ranj me.n jaan khotii rahii
hu.ii shab charaaGo.n me.n battii pa.Dii
to jaltii hu.ii battii le kar u.Dii
jahaa.n saa.np thaa chhat me.n soyaa hu.aa
vahaa.n us ne battii ko ab rakh diyaa
jo logo.n ne dekhaa to ghabraa ga.e
ki aisaa na ho aag chhat me.n lage
ko.ii aadmii jald chhat par cha.Dhaa
lagaa saaf karne vo jab gho.nsla
vahaa.n us ne dekhaa ki hai ek maar
to fauran hii laTh se diyaa us ko maar
hai 'faizii' ye zarbul-masal mustanad
badii kaa hamesha hai anjaam bad

Faizi Fatehabadi
Nazm

teri yaad

tere maatam me.n mujh se kahte hai.n
dha.Dkane.n dil kii jaa pahu.nchtii hai.n
jaane vaale jahaa.n pe rahte hai.n
apnii duniyaa se un kii duniyaa tak
tez dhaare asar ke bahte hai.n
sog jitnaa yahaa.n hai jin ke liye
utne hii dukh vahaa.n vo sahte hai.n
kyaa Galat thii vo merii betaabi
kyaa ye sach hai jo log kahte hai.n
mai.n ne ro-ro ke tujh ko yaad kiyaa
tujh ko muztar kiyaa ki shaad kiyaa

Ijtiba Rizvi
Nazm

ghar ki jhalak

jhalak to dekho hamaare ghar kii yahaa.n hai.n naanii yahaa.n hai.n taa.ii
hamaare maa.n baap aur chachaa hai.n yahaa.n hai.n bahne.n yahaa.n hai.n bhaa.ii
hamaaraa ghar hai hasiin gulshan KHushii kii kaliyaa.n khilii hu.ii hai.n
vafaa kii KHushbuu basii hu.ii hai hu.ii na hogii yahaa.n la.Daa.ii
hamaare abbuu kii dekho azmat har ek kurtaa hai in kii izzat
nazar me.n in kii hai.n sab baraabar inhii.n se miltii hai rahnumaa.ii
kamaa rahe hai.n halaal rozii banaa diyaa hai hame.n namaazii
inhii.n se ghar me.n hai KHair-o-barkat kisii kii karte nahii.n buraa.ii
hamaarii ammii hai.n nek siirat hame.n milii hai inhii.n se raahat
sadaa kitchen me.n hai kaam un kaa pakaa rahii hai.n chikan fry
labo.n pe un ke sadaa tabassum zabaan un kii hai KHuub shiirii.n
nahii.n hai kaamo.n se un ko fursat kabhii safaa.ii kabhii silaa.ii
hame.n hai un se dilii mohabbat unhii.n ke qadmo.n tale hai jannat
ba.Dii mohabbat se parvarish kii hai un kii fitrat me.n paarsaa.ii
ajiib shai hai.n chachaa hamaare nahii.n kisii kii samajh me.n aa.e
liye hai.n pyaale me.n murG chhole usii me.n Daalii hai ras-malaa.ii
jo muuD ho to sunaa.e.n naama Thumak Thumak kar bajaa.e.n tabla
ga.e vo ik roz chhat ke uupar vahaa.n chachaa ne pata.ng u.Daa.ii
madad vo ammii kii kar rahe hai.n tave pe chamcha chalaa rahe hai.n
savere uTh kar chachaa hamaare galii kii karte hai.n KHud safaa.ii
vo sair karne ga.e hai.n baahar pahan ke banyaan aur la.ngoTii
ba.Dii sii pag.Dii hai sar ke uupar laTak rahii hai gale se tie
ba.Dii hai.n sab se hamaarii naanii sunaatii hai.n vo hame.n kahaanii
zabaa.n pe zikr-e-KHudaa hai jaarii Thikaanaa un kaa hai chaarpaa.ii
Dakaartii hai.n hamaarii taa.ii hamesha piitii hai.n vo davaa.ii
ba.Daa saa takiya hai sar ke niiche badan ke uupar hai ik razaa.ii
ba.Dii bahan kaa hai naam raziya vo novelo.n kii bahut hai rasiyaa
kashiidakaarii me.n hai mahaarat maze se khaatii hai vo miThaa.ii
bahan surayyaa ne laayaa guDDaa bahan ruqayya ne laa.ii gu.Diyaa
saheliyo.n ko bulaa ke shaadii KHushii se daalaan me.n rachaa.ii
hamaaraa anvar hai das baras kaa musavvirii se use hai raGbat
banaa ke tasviir jab dikhaa.ii to bhaa.ii bahno.n se daad paa.ii
hai sab se chhoTaa miyaa.n munavvar magar hai ta.aliim se mohabbat
davaat le kar vo likh rahaa thaa giraa dii kap.Do.n pe raushnaa.ii
zaraa saa apnaa bhii haal kah duu.n mai.n ek collage me.n pa.Dh rahaa huu.n
kitaab se merii dostii hai kabhii na chho.Duu.ngaa mai.n pa.Dhaa.ii

Abdul Qadir
Nazm

haar-singar

tum ne dekhe hai.n kabhii haar-si.ngaar
vo dil-aavez se ma.asuum se do-ra.nge phuul
raat ko shaaKH pe khilte the sitaaro.n kii tarah
vo bhalaa din kii tamaazat ke sitam kyuu.n sahte
is liye aaKHir-e-shab apne hii husn se be-KHud ho kar
os se bhiige hu.e farsh pe kis pyaar se bichh jaate the
jaise kal raat yahaa.n
za.afaraa.n rang kii chaadar pe bikhere ho.n kisii ne motii
aur har roz savere ko.ii bachchii aa kar
farsh-e-gul par bahut aahista se chaltii thii
KHayaalo.n me.n pahu.nch jaatii thii
is paristaa.n me.n ki jis kii pariyaa.n
raat ko farsh pe ye phuul bichhaa jaatii thii.n
yaad galiyo.n se guzartii huu.n to bachpan ke kisii mo.D pe mil jaate hai
vahii ma.asuum, dil-aavez, subuk haar-si.ngaar
jaantii huu.n mai.n vahaa.n
ab mire sahn kii diivaar ke us paar nahii.n ko.ii daraKHt
ab vahaa.n ek imaarat hai bahut uu.nchii sii

Azra Naqvi
Nazm

apne jaise aashiqon ke nam

mai.n ta.Daptaa huu.n
mai.n bahut ta.Daptaa huu.n
ki vahaa.n lauT jaa.uu.n jahaa.n se merii umr shuruu.a hu.ii thii
jahaa.n mere din raat merii miTTii kii mahak se mahakte the
zamiin bhar kii dhuup me.n se mere hisse kii dhuup
mere rome rome ko se.nktii thii
sitaaro.n bhare aasmaan me.n se mere naam kaa sitaara
badan kii agnii ban ke mere hisse kii dulhan ko
nadii ke paanii se banii hu.ii sej pe utaartaa thaa
aur an-dekhii tah me.n tairtii machhliyo.n kii saa.ns ko sa.ngiit kar detaa thaa
raat me.n chhupe hu.e din ko
aur din me.n chhupii hu.ii raat ko
ek duusre ke paas laa ke KHud kahii.n chhup jaataa thaa
phir jhaag se jhaag nikaltaa thaa
aur jhaag se an-ginat muurtiyaa.n bantii thii.n
tab unhe.n puujne kii tijaarat iijaad nahii.n hu.ii thii
tab aag harii ghaas ko nahii.n jalaatii thii
sivaa.e is ke ki paa.nv par re.ngtii hu.ii chyuu.nTii haath kii paka.D me.n aa jaatii thii
kaa.enaat bhar kii bhuuk aur pyaas kii
sii.nchaa.ii karte hu.e kisaan aur khudaa.ii karte hu.e mazduur
abhii khet aur fasl aur kachche pakke ghar aur diivaaro.n aur jiivan maran
aur shamshaan bhuum aur qabro.n se pahchaane to jaate the
abhii baazaaro.n me.n ghuumte phirte na.nge paagalo.n
aur un ke hisse kii gaaliyo.n aur pattharo.n kii pahchaan se zindagii kii pahchaan to hotii thii
abhii raat ke safar me.n kisii an-dekhe jahaan se
merii duniyaa ke ja.ngalo.n me.n utarte jugnu.o.n ke jhunD chahak chahak ke
sudhaarii hu.ii ruuho.n kaa ataa pataa bataate the
afsos ab mai.n vahaa.n lauTnaa chaahuu.n bhii
to KHud par itnaa guzar chukaa huu.n ki lauT nahii.n saktaa

Ahmad Hamesh
Nazm

aql se leta na kaam agar

Topiyo.n kii ek gaThrii baa.ndh kar
kar liyaa ek shaKHs ne azm-e-safar
raasta itnaa na thaa dushvaar-tar
thak gayaa vo raah me.n phir bhii magar
pe.D dekhaa raaste me.n saaya-daar
saa.ns lenaa chaahaa us ne leT kar
saath hii bahtii thii ik nadii vahaa.n
paanii jis me.n thaa ravaa.n shaffaaf-tar
leTte hii nii.nd us ko aa ga.ii
maal se apne hu.aa vo be-KHabar
pe.D par bandar the kuchh baiThe hu.e
jab pa.Dii gaThrii pe un sab kii nazar
dhiire dhiire niiche utre aur vo
le ga.e gaThrii uThaa kar pe.D par
khol kar gaThrii pahan lii.n Topiyaa.n
jach rahe the Topiyo.n me.n jaanvar
shor karne lag ga.e bandar bahut
jaag uThaa jo so rahaa thaa be-KHabar
us ne jab gaThrii na dekhii aas-paas
dil me.n ye sochaa ga.ii gaThrii kidhar
pe.D par us ne jo dekhaa Gaur se
aa.e bandar Topiyaa.n pahne nazar
Topiyaa.n paane kii koshish us ne kii
mil na paayaa jab use ko.ii samar
apne sar se apnii Topii ko utaar
phe.nk dii Gusse me.n us ne ghaas par
sab ne phe.nkii.n apnii apnii Topiyaa.n
bandaro.n par ye hu.aa us kaa asar
jam.a kar lii.n us ne apnii Topiyaa.n
suu-e-manzil baa.ndh lii phir us ne kamar
Topiyaa.n kaise 'ufuq' miltii.n use
aql se letaa na kaam apnii agar

Ufuq Dehlvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now