Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chhe"

Nazm MATCHES FOR "chhe"

Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

dusra ban-bas

raam ban-baas se jab lauT ke ghar me.n aa.e
yaad jangal bahut aayaa jo nagar me.n aa.e
raqs-e-diivaangii aa.ngan me.n jo dekhaa hogaa
chhe december ko shrii raam ne sochaa hogaa
itne diivaane kahaa.n se mire ghar me.n aa.e
jagmagaate the jahaa.n raam ke qadmo.n ke nishaa.n
pyaar kii kaahkashaa.n letii thii a.ng.Daa.ii jahaa.n
mo.D nafrat ke usii raahguzar me.n aa.e
dharm kyaa un kaa thaa, kyaa zaat thii, ye jaantaa kaun
ghar na jaltaa to unhe.n raat me.n pahchaantaa kaun
ghar jalaane ko miraa log jo ghar me.n aa.e
shaakaahaarii the mere dost tumhaare KHanjar
tum ne baabar kii taraf phe.nke the saare patthar
hai mire sar kii KHataa, zaKHm jo sar me.n aa.e
paa.nv sarjuu me.n abhii raam ne dho.e bhii na the
ki nazar aa.e vahaa.n KHuun ke gahre dhabbe
paa.nv dho.e binaa sarjuu ke kinaare se uThe
raam ye kahte hu.e apne dvaare se uThe
raajdhaanii kii fazaa aa.ii nahii.n raas mujhe
chhe december ko milaa duusraa ban-baas mujhe

Kaifi Azmi
Nazm

raaten sachchi hain din jhuTe hain

aisii yaKH-basta taabiiro.n ke har din se achchhii hai.n aur sachchii bhii hai.n
jis me.n dhundlaa chakkar khaataa chamkiilaa-pan chhe atraaf kaa rog banaa hai

Jaun Eliya
Nazm

billu ka basta

chhoTii sii billuu
chhoTaa saa basta
Thuu.nsaa hai jis me.n
kaaGaz kaa dasta
lak.Dii kaa gho.Daa
ru.ii kaa bhaaluu
chuuran kii shiishii
aaluu kachaaluu
billuu kaa basta
jin kii piTaarii
jab is ko dekho
pahle se bhaarii
laTTuu bhii is me.n
rassii bhii is me.n
Da.nDaa bhii is me.n
gillii bhii is me.n
ai pyaarii billuu
ye to bataa.o
kyaa kaam karne
school jaa.o
urdu na jaano
english na jaano
kahtii ho KHud ko
bilqiis baano
umr kii itnii
kachchii nahii.n ho
chhe saal kii ho
bachchii nahii.n ho
baahar nikaalo
lak.Dii kaa gho.Daa
ye laTTuu rassii
ye gillii Da.nDaa
gu.Diyaa ke juute
jampar juraabe.n
baste me.n rakkho
apnii kitaabe.n
mu.nh na banaa.o
school jaa.o
ai pyaarii billuu
ai pyaarii billuu

Ibn۔e۔Insha
Nazm

mujrim

chand bad-zeb se shohrat-zada insaa.n aksar
apnii daulat o saKHaavat kii numaa.ish ke liye
yaa kabhii rahm ke jazbe se haraarat paa kar
chaar chhe paise unhe.n baKHsh diyaa karte hai.n

Shakeb Jalali
Nazm

sher aur KHargosh

chalaa dhiime dhiime se kachhve kii chaal
pahu.nchte pahu.nchte use Gaar tak shaam hone lagii
use dekh kar sher bhannaa gayaa
chhaTa.nkii baraabar ye KHuraak bhejii hai jangal ne
aur is qadar der se
miTaa duu.ngaa KHargosh kii zaat ko
mai.n jangal kaa jangal hii khaa jaa.uu.ngaa
sunaa aur KHargosh rone lagaa
gi.Dgi.Daane lagaa
huzuur is me.n merii nahii.n hai KHataa
na jangal sabhaa kaa ko.ii dosh hai
ki jangal ne to saat KHargosh bheje magar
magar kyaa
magar sir
magar kyaa kyuu.n haklaa rahe ho bataa.o mujhe
magar magar magar sir
kahaa.n hai.n tumhaare chhe Gaddaar saathii
vo KHargosh phir se sisakne lagaa
hame.n raaste me.n huzuur ek
zaalim ne rokaa thaa
aur bahut gaaliyaa.n aap ko dii.n
kahaa mai.n dohraa.uu.n kaise vo sab kuchh huzuur
kahaa jaa.o kah do mire saathiyo.n ko vahii khaa gayaa
ye sun.naa thaa ki sher Gurraayaa mo.nchho.n me.n bal aa ga.e
aka.Dne lagii us kii hunTerii puu.nchh
aur aa.nkho.n me.n bas KHuun utarne lagaa
kahaa.n hai kidhar hai bataa kaun hai
mire hote kis kaa hu.aa hausla
ki merii re.aayaa pe ko.ii zulm kar sake

Gulzar
Nazm

adl-e-faruqi ka ek namuna

ek din hazrat-e-faaruuq ne mimbar pe kahaa
kyaa tumhe.n hukm jo kuchh duu.n to karoge manzuur
ek ne uTh ke kahaa ye ki na maane.nge kabhii
ki tire adl me.n ham ko nazar aataa hai futuur
chaadare.n maal-e-Ganiimat me.n jo ab ke aa.ii.n
sehan-e-masjid me.n vo taqsiim hu.ii.n sab ke huzuur
un me.n har ek ke hisse me.n faqat ik aa.ii
thaa tumhaaraa bhii vahii haq ki yahii hai dastuur
ab jo ye jism pe tere nazar aataa hai libaas
ye usii luuT kii chaadar se banaa hogaa zaruur
muKHtasar thii vo ridaa aur tiraa qad hai daraaz
ek chaadar me.n tiraa jism na hogaa mastuur
apne hisse se ziyaada jo liyaa tuu ne to ab
tuu KHilaafat ke na qaabil hai na ham hai.n maamuur
garche vo had-e-manaasib se ba.Dhaa jaataa thaa
sab ke sab mohr-ba-lab the che inaas o che zakuur
rok de ko.ii kisii ko ye na rakhtaa thaa majaal
nashsha-e-adl-o-masaavaat se sab the maKHmuur
apne farzand se faaruuq-e-mo.azzam ne kahaa
tum ko hai haalat-e-aslii kii haqiiqat pe ubuur
tumhii.n de sakte ho is kaa mirii jaanib se javaab
ki na pak.De mujhe mahshar me.n miraa rabb-e-Gafuur
bole ye ibn-e-umar sab se muKHaatib ho kar
is me.n kuchh vaalid-e-maajid kaa nahii.n jurm o qusuur
ek chaadar me.n jo puuraa na hu.aa un kaa libaas
kar sakii is ko gavaaraa na mirii tab-e-Gayuur
apne hisse kii bhii mai.n ne unhe.n chaadar de dii
vaaqi.a kii ye haqiiqat hai ki jo thii mastuur
nukta-chii.n ne ye kahaa uTh ke ki haa.n ai faaruuq
hukm de ham ko ki ab ham use maane.nge zaruur

Shibli Nomani
Nazm

ilm ki zarurat

jahaa.n me.n har taraf hai ilm hii kii garm-baazaarii
zamii.n se aasmaa.n tak bas isii kaa faiz hai jaarii
yahii sar-chashma-e-aslii hai tahziib-o-tamaddun kaa
baGair is ke bashar honaa bhii hai ik saKHt biimaarii
banaataa hai yahii insaan ko kaamil-tariin insaa.n
sikhaataa hai yahii aKHlaaq o iisaar o ravaa-daarii
yahii qaumo.n ko pahu.nchaataa hai baam-e-auj-o-rif.at par
yahii mulko.n ke andar phuu.nktaa hai ruuh-e-bedaarii
isii ke naam kaa chaltaa hai sikka saare aalam me.n
isii ke sar pe rahtaa hai hamesha taaj-e-sardaarii
isii ke sab karishme ye nazar aate hai.n duniyaa me.n
isii ke dam se raunaq aalam-e-imkaa.n kii hai saarii
ye laa-silkii, ye telephone ye raile.n, ye tayyaare
ye zer-e-aab o baalaa-e-falak insaa.n kii tarraarii
huduud-e-istavaa qutbain se yuu.n ho ga.e mudGam
ki hai ab rub.a masko.n jaise ghar kii chaar-diivaarii
samundar ho ga.e paayaab sahraa bin ga.e gulshan
kiyaa science ne bhii e.ataraaf-e-ijz-o-naachaarii
buKHaar o barq kaa jarraar lashkar hai ab aamaada
ugalvaa le zamiin o aasmaa.n kii daulate.n saarii
Garaz chaaro.n taraf ab ilm hii kii baadshaahii hai
ki us ke baazuu.o.n me.n quvvat-e-dast-e-ilaahii hai
nigaah-e-Gaur se dekho agar haalaat-e-insaanii
to ho saktaa hai hal ye uqda-e-mushkil ba-aasaanii
vahii qaume.n taraqqii ke madaarij par hai.n faa.eq-tar
ki hai jin me.n tamaddun aur siyaasat kii faraavaanii
isii ke zo.am me.n hai germany charKH-e-tafaaKHur par
isii ke zor par mirriiKH kaa ham-sar hai jaapaanii
isii kii quvvat-e-baazuu pe hai maGruur america
isii ke bil par la.Dkii ho rahii hai rustam-e-saanii
ishaare par isii ke naql-o-harakat hai sab italy kii
isii ke taaba-e-farmaan hai.n ruusii o iiraanii
isii ke jumbish-e-abruu pe hai england kaa Garra
isii ke hai.n sab aavurde francisi o albaanii
ko.ii mulk ab nahii.n jin me.n ye jauhar ho na raKHshanda
na Gaafil is se chiinii hai.n na shaamii hai.n na afGaanii
baGair is ke jo rahnaa chaahte hai.n is zamaane me.n
samajh rakkhe.n fanaa un ke liye hai hukm-e-rabbaanii
zamaana phe.nk degaa KHud unhe.n qa.ar-e-halaakat me.n
vo apne haath se ho.nge KHud apnii qabr ke baanii
zamaane me.n jise ho saahib-e-fat.h-o-zafar honaa
zaruurii hai use ilm-o-hunar se bahra-var honaa
taraqqii kii khulii hai.n shaahraahe.n dahr me.n har suu
nazar aataa hai tahziib-o-tamaddun se jahaa.n mamluu
chale jaate hai.n u.Dte shahsavaaraan-e-falak-paimaa
KHiraaj-e-tahniyat lete hu.e karte hu.e jaaduu
guzarte jaa rahe hai.n duusro.n ko chho.Dte piichhe
kabhii hotaa hai sahraa mustaqar un kaa kabhii Taapu
kamar baa.ndhe hu.e din raat chalne par hai.n aamaada
dimaaG afkaar se aur dil vufuur-e-shauq se maluul
alag rah kar KHayaal-e-zahmat o ehsaas-e-raahat se
lage hai.n apnii apnii fikr me.n baa-KHaatir-e-yaksuu
magar ham hai.n ki aslan his nahii.n ham ko ko.ii is kii
hamaare paa-e-himmat in maraahil me.n hai.n be-qaabuu
jahaa.n pahlaa qadam rakkhaa thaa roz-e-avvalii.n ham ne
nahii.n sarke is apne aslii markaz se ba-qadr-e-muu
ye haalat hai ki ham par band hai har ek darvaaza
nazar aataa nahii.n hargiz ko.ii ummiid kaa pahluu
magar vaa-hasrataa phir bhii ham apne zo.am-e-baatil me.n
samajhte hai.n zamaane bhar se aage KHud ko manzil me.n
zaruurat hai ki ham me.n raushnii ho ilm kii paidaa
nazar aa.e hame.n bhii taaki asl-e-haalat-e-duniyaa
hame.n ma.aluum ho haalaat ab kyaa hai.n zamaane ke
hamaare saath kaa jo qaafila thaa vo kahaa.n pahu.nchaa
jo pastii me.n the ab vo jalva-gar hai.n baam-e-rif.at par
jo baalak be-nishaa.n the aaj hai in kaa alam barpaa
hamaarii KHuubiyaa.n sab duusro.n ne chhiin lii.n ham se
zamaane ne hame.n itnaa jhi.njho.Daa kar diyaa na.ngaa
ravaa-daarii, uKHuvvat, dostii, iisaar, hamdardii
KHayaal-e-mulk-o-millat dard-e-qaum, andesha-e-fardaa
ye sab jauhar hamaare the kabhii ai vaa.e-mahruumii
bane hai.n KHuubii-e-qismat se jo ab Gair kaa hissaa
agar ho jaa.e.n raaGib ab bhii ham ta.aliim kii jaanib
to kar sakte hai.n ab bhii mulk me.n ham zindagii paidaa
bahut kuchh vaqt ham ne kho diyaa hai lekin is par bhii
agar chaahe.n to kar de.n pesh-rau ko apne ham paspaa
nikammaa kar diyaa hai kaahilii ne go hame.n lekin
rago.n me.n hai hamaarii KHuun abhii tak dau.Dtaa phirtaa
ko.ii maKHfii haraarat gar hamaare dil ko garmaa de
hamaare jism me.n phir zindagii kii ruuh dau.Daa de
vatan vaalo bahut Gaafil rahe ab hosh me.n aa.o
uTho be-daar ho aql-o-KHirad ko kaam me.n laa.o
tumhaare qaum ke bachcho.n me.n hai ta.aliim kaa fuqdaa.n
ye gutthii saKHt pechiida hai is ko jald suljhaa.o
yahii bachche bil-aaKHir tum sabho.n ke jaa-nashii.n ho.nge
tum apne saamne jaisaa unhe.n chaaho banaa jaa.o
bahut hii ra.nj-dah ho jaa.egii us vaqt kii Gaflat
kahii.n aisaa na ho mauqa.a nikal jaane pe pachhtaa.o
ye hai kaar-e-aham do chaar is ko kar nahii.n sakte
KHudaa-raa tum bhii apne farz kaa ehsaas farmaa.o
ye bojh aisaa nahii.n jis ko uThaa le.n chaar chhe mil kar
sahaaraa do, sahaaraa duusro.n se is me.n dilvaa.o
jo zii-ehsaas hai.n haasil karo tum KHidmate.n un kii
jo zii-parvaa hai.n un ko jis tarah ho us taraf laa.o
Garaz jaise bhii ho jis shakl se bhii ho ye laazim hai
tum apne qaum ke bachcho.n ko ab ta.aliim dilvaa.o
agar tum musta.iddii ko banaa loge shi.aar apnaa
yaqii.n jaano ki mustaqbil hai behad shaandaar apnaa
KHudaavandaa! du.aa.o.n me.n hamaarii ho asar paidaa
shab-e-Gaflat hamaarii phir kare nuur-e-sahar paidaa
hamaare saare KHvaabiida qavaa be-daar ho jaa.e.n
sar-e-nau ho phir in me.n zindagii kii karr-o-farr paidaa
hame.n ehsaas ho ham kaun the aur aaj ham kyaa hai.n
kare.n maahaul-e-mulkii ke liye gahrii nazar paidaa
milaa rakkhaa hai apne jauhar-e-kaamil ko miTTii me.n
ham ab bhii KHaak se kar sakte hai.n la.al-o-guhar paidaa
agar chaahe.n to ham mushkil vatan kii dam me.n hal kar de.n
hazaaro.n suurate.n kar sakte hai.n ham kaargar paidaa
ba-zaahir go ham ik tuuda hai.n bilkul raakh kaa lekin
agar chaahe.n to KHaakistar se kar de.n sau sharar paidaa
vatan kaa nakbat o aflaas kho de.n ham ishaare me.n
jahaa.n Thokar lagaa de.n ho vahii.n se kaan-e-zar paidaa
ham is manzil ke aaKHir par pahu.nch kar bil-yaqii.n dam le.n
agar kuchh taaza-dam ho jaa.e.n apne ham-safar paidaa
jo koshish muttahid ho kar kahii.n ik baar ho jaa.e
yaqii.n hai mulk kii qismat kaa be.Daa paar ho jaa.e

Ahmaq Phaphoondvi
Nazm

alif se ye tak

alif jo aaluu khaa.egaa
vo moTaa ho jaa.egaa
be baarish jab aatii hai
koyal shor machaatii hai
pe paalii mai.n ne billii
chal dii chho.D ke vo dillii
te titlii hai zinda phuul
jo na maane naa-maaquul
Te TaTTuu par cha.Dh bhayyaa
Dar mat aage ba.Dh bhayyaa
se saabit hai ye laTTuu
chunnuu jaa le aa paTTuu
jiim mai.n juute khaa.uu.ngaa
ro kar chup ho jaa.uu.ngaa
che chunnuu hai ik la.Dkaa
nanhaa munnaa chhoTaa saa
he vo haa tuu aayaa hai
hii.ng aur paTTuu laayaa hai
KHe KHachchar mai.n laa.uu.ngaa
apne ghar me.n nachau.ngaa
daal na daal pakaa ammii
barfii mujhe khilaa ammii
Daal Daruu.n mai.n bhaaluu se
mai.n nahii.n Dartaa KHaaluu se
re ronaa mujhe aataa hai
jab miraa bhayyaa gaataa hai
siin sarautaa laa ammii
mujh ko paan khilaa ammii
bas bhaa.ii aage mat jaa
ittii bas nazm na hogaa

Raja Mehdi Ali Khan
Nazm

ek alamat

har payambar pe ha.nsaa hai ye zamaana lekin
har payambar ne jhukaa.ii hai zamaane kii jabii.n
apne ham-asr se KHaa.if na ho ai vaqt kii aa.nch
is kii miTTii me.n sitaaro.n kaa dhu.aa.n hai ki nahii.n
isii miTTii se damaktii hai ye dhartii varna
durd-e-yak-saaGar-e-Gaflat hai che duniyaa o che-dii.n

Mustafa Zaidi
Nazm

bahut se bachchon ka ghar

abbaa to chale ga.e hai.n daftar
ammii ko buKHaar aa rahaa hai
chhamman to gayaa hu.aa hai baazaar
jumman khaanaa pakaa rahaa hai
zaibun ko usii kaa taaza bachcha
pakkaa gaanaa sunaa rahaa hai
amjad sofe par ko.ele se
kaalaa totaa banaa rahaa hai
aslam daadii kii le ke tasviir
us kii mo.nchhe.n ugaa rahaa hai
tauqiir blade ke kamaalaat
qaaliin pe aazmaa rahaa hai
chhe saat tipaa.iyaa.n milaa kar
akbar gaa.Dii chalaa rahaa hai
tasniim banii hu.ii hai gho.Daa
jo mez pe bhaagaa jaa rahaa hai
'aKHtar' parde kii jhaalro.n se
billii ko dulhan banaa rahaa hai
nanhaa iqbaal leTe leTe
nadii naale bahaa rahaa hai
sunte hai.n ki anqariib in kaa
ek aur bhii bhaa.ii aa rahaa hai

Ahmad Nadeem Qasmi
Nazm

adl-e-jahangiri

qasr-e-shaahii me.n ki mumkin nahii.n Gairo.n kaa guzar
ek din nuur-jahaa.n baam pe thii jalva-figan
ko.ii shaamat-zada rahgiir udhar aa niklaa
garche thii qasr me.n har chaar taraf se qadGan
Gairat-e-husn se begam ne tamancha maaraa
KHaak par Dher thaa ik kushta-e-be-gor-o-kafan
saath hii shah-e-jahaa.ngiir ko pahu.nchii jo KHabar
Gaiz se aa ga.ii abruu-e-adaalat pe shikan
hukm bhejaa ki kaniizaan-e-shabistaan-e-shahii
jaa ke puuchh aa.e.n ki sach yaa ki Galat hai ye suKHan
naKHvat-e-husn se begam ne ba-sad-naaz kahaa
merii jaanib se karo arz ba-aa.iin-e-hasan
haa.n mujhe vaaq.ea-e-qatl se inkaar nahii.n
mujh se naamuus-e-hayaa ne ye kahaa thaa ki bazan
us kii gustaaKH-nigaahii ne kiyaa us ko halaak
kishvar-e-husn me.n jaarii hai yahii shara-e-kuhan
mufti-e-dii.n se jahaa.ngiir ne fatvaa puuchhaa
ki sharii.at me.n kisii ko nahii.n kuchh jaa-e-suKHan
mufti-e-diin ne be-KHauf-o-KHatar saaf kahaa
shar.a kahtii hai ki qaatil kii u.Daa do gardan
log darbaar me.n is hukm se tharraa uTThe
par jahaa.ngiir ke abruu pe na bal thaa na shikan
tarkasho.n ko ye diyaa hukm ki andar jaa kar
pahle begam ko kare.n basta-e-zanjiir-o-rasan
phir usii tarah use khii.nch ke baahar laa.e.n
aur jallaad ko de.n hukm ki haa.n teG bazan
ye vahii nuur-jahaa.n hai ki haqiiqat me.n yahii
thii jahaa.ngiir ke parde me.n shahanshaah-e-zaman
us kii peshaani-e-naazuk pe jo pa.Dtii thii girah
jaa ke ban jaatii thii auraaq-e-hukuumat pe shikan
ab na vo nuur-jahaa.n hai na vo andaaz-e-Guruur
na vo Gamze hai.n na vo arbada-e-sabr-shikan
ab vahii paa.nv har ik gaam pe tharraate hai.n
jin kii raftaar se paamaal the murGaan-e-chaman
ek mujrim hai ki jis kaa ko.ii haamii na shafii
ek bekas hai ki jis kaa na ko.ii ghar na vatan
KHidmat-e-shaah me.n begam ne ye bhejaa paiGaam
KHuu.n-bahaa bhii to sharii.at me.n ik amr-e-ahsan
mufti-e-sharaa se phir shaah ne fatvaa puuchhaa
bole jaa.ez hai razaa-mand huu.n gar bachcha o zan
vaariso.n ko jo diye laakh diram begam ne
sab ne darbaar me.n kii arz ki ai shaah-e-zaman
ham ko maqtuul kaa lenaa nahii.n manzuur qisaas
qatl kaa hukm jo ruk jaa.e to hai mustahsan
ho chukaa jab ki shahanshaah ko puuraa ye yaqiin
ki nahii.n is me.n ko.ii shaa.eba-e-hiila-o-fan
uTh ke darbaar se aahista chalaa suu-e-haram
thii jahaa.n nuur-jahaa.n mo'takif-e-bait-e-KHazan
daf.atan paa.nv pe begam ke giraa aur ye kahaa
tuu agar kushta shudii aah che mii kardam man

Shibli Nomani
Nazm

machhli ki bu

bistar me.n leTe leTe
us ne sochaa
''mai.n moTaa hotaa jaataa huu.n
kal mai.n apne niile suiT ko
alter karne
darzii ke haa.n de aa.uu.ngaa
nayaa suiT do-chaar mahiine baa'd sahii!
darzii kii duukaan se lag kar
jo hotel hai
us hotel kii
machhlii testy hotii hai
kal khaa.uu.ngaa
lekin machhlii kii buu saalii
haatho.n me.n bas jaatii hai
kal saabun bhii laanaa hai
ghar aate
letaa aa.uu.ngaa
ab ke ''yardley'' laa.uu.ngaa
office me.n kal kaam bahut hai
boss agar naaraaz hu.aa to
do din kii chhuTTii le luu.ngaa
aur agar mood hu.aa to
chhe ke show me.n
''raam-aur-shyaam'' bhii dekh aa.uu.n gaa
picture achchhii hai saalii
nau se baara
club ramii
do din se luck achchhaa hai
kal bhii saaTh ruupe jiitaa thaa
aaj bhii tiis ruupe jiitaa huu.n
aur ummiid hai
kal bhii jiit ke aa.uu.ngaa
bas ab nii.nd aa.e to achchhaa
kal bhii
jiit ke
nii.nd aa.e to
ikkaa-dukkii nahla-dahla
ii.nT kii begam
machhlii kii buu
taash ke patte
joker joker
suiT pahan kar
moTaa-tag.Daa joker....
itnaa bahut saa soch ke vo
soyaa thaa magar
phir na uThaa!!
duusre din jab
us kaa janaaza
darzii kii duukaan ke paas se guzraa to
hotel se machhlii kii buu
duur duur tak aa.ii thii!!!

Mohammad Alvi
Nazm

naya maktab

ham chaa.nd nagar par jaate hii khole.nge ek nayaa maktab
ta.aliim na hogii jis me.n kabhii sab aazaadii se ghuume.nge
ustaad pa.Dhe.nge darjo.n me.n ham log KHushii se ghuume.nge
school na jaa kar baaGo.n me.n tafriih kare.nge be-matlab
ham chaa.nd nagar par jaate hii khole.nge ek nayaa maktab
pa.Dhne ke liye bachcho.n ko jahaa.n murGaa na banaayaa jaa.egaa
chaa.nTe na jamaa.e jaa.e.nge DanDo.n se na piiTaa jaa.egaa
ustaad ke maulaa-baKHsh jahaa.n dikhlaa na sake.nge kuchh kartab
ham chaa.nd nagar par jaate hii khole.nge ek nayaa maktab
jo yaad karegaa KHuub sabaq taa-umr na hogaa paas vahii
jo khel me.n legaa dilchaspii pa.Dhne me.n na hogaa fail kabhii
dar-asl hamaare maktab kaa hogaa har ik dastuur ajab
ham chaa.nd nagar par jaate hii khole.nge ek nayaa maktab
jis din bhii pa.Daa biimaar ko.ii school me.n hogaa holiday
do buu.nd bhii paanii barsaa to ho jaa.egaa fauran rainy day
hafte me.n to kam se kam chhe din itvaar manaae.nge ham sab
ham chaa.nd nagar par jaate hii khole.nge ek nayaa maktab
khele.nge kabhii jab ham cricket to KHuub u.Daa.e.nge chhakke
hockey me.n dikhaa.e.nge vo hunar rah jaa.e.nge sab hakke-bakke
har team se matche.n jiitegaa ham logo.n kaa footbaal club
ham chaa.nd nagar par jaate hii khole.nge ek nayaa maktab

Kaif Ahmed Siddiqui
Nazm

buddhu si ek bachchi

siimaa ne mujh se puuchhaa
ai mere pyaare chachaa
ye roz aap mujh ko
dete the kaisaa Gachchaa
kahte the kar rahaa huu.n
va.ada mai.n tum se sachchaa
ja.ngal ke pe.D par se
bandar kaa ek bachchaa
laa.uu.ngaa to.D kar mai.n
lekin abhii hai kachchaa
samjhe the aap hai ye
buddhuu sii ek bachchii
chhe saal kii hai hogii
kuchh aql kii bhii kachchii
lekin samajh ga.ii huu.n
mai.n saarii Gachchaa Gachchii
bilkul buraa na maane.n
mai.n baat kah duu.n sachchii
bas ho ga.ii hai chachaa
ab aap kii bhii kachchii
mujh ko bataa chukii hai.n
kal raat merii chachchii
ugte nahii.n shajar par
yuu.n bandaro.n ke bachche
hote nahii.n vo hargiz
hargiz bhii pakke kachche
mai.n aap ke to va.ade
maanuu.n kabhii na sachche
mat diijiye aap mujh ko
ab aise vaise Gachche
chachchii ne KHud hai.n dekhe
bandar ke anDe bachche
bandariyaa anDe de de
jab gho.nslo.n ke andar
bante hai.n pahle chuuze
phir pyaare pyaare bandar

Ahmad Hatib Siddiqi
Nazm

waqt-e-murawwat

''dahaan-e-yaar ki darmaan-e-dard-e-'haafiz' daasht
fuGaa.n ki vaqt-e-muravvat che ta.ng hausla buud''

Josh Malihabadi
Nazm

nazm

vo ek lamha
jo sar paTaktaa hai pattharo.n par
pa.Daa hu.aa hai jo shaam ke phailte dhuve.n me.n lahuu me.n lat-pat
vo ek lamha
ki jis kii KHaatir hazaaro.n sadiyaa.n karo.Do.n barso.n se aabla-paa
magar vo lamha
safar kii piilii udaasiyo.n ke kabuutaro.n ke paro.n se uljhaa
savaad-e-manzil kii mish.alo.n me.n
pighal pighal kar ayaa.n hu.aa hai
vo ek lamha
sulagte shabdo.n kii u.ngliyo.n se giraa jo niiche
to dha.ns gayaa phir aTal ma.aanii kii daldalo.n me.n
magar ye achchhaa hu.aa ki us dam
khajuur bhar kar jahaaz aa.e
tamaam nazre.n khajuur kii guThliyo.n me.n inzaal Dhuu.nDtii thii.n
vo chhe mahiine hamal uThaa.e hamaare ghar kii qadiim ziinat
na sii.Dhiyo.n par
na khi.Dkiyo.n me.n
na chaa.e kii pyaaliyo.n se uThte dhuve.n ke piichhe
tamannaa kaaGaz pe phail jaa.e to us kii shiddat kaa naam TuuTe
safed bakrii kii aa.nkh se kaun jhaa.nktaa hai
tumhe.n KHabar hai
tumhe.n KHabar ho to mujh se kah do
mai.n apne vaalid kii qabr kaa raasta talaashuu.n
idhar bhii suuraj me.n saaraa manzar lahuu lahuu hai
udhar bhii saayo.n me.n saarii aa.nhke.n dhu.aa.n dhu.aa.n hai.n
ye band aa.nkho.n me.n kaun chhup kar
badan ke andar ko jhaa.nktaa hai
KHamoshiyo.n ke kha.nDar me.n guu.njii
KHamoshiyo.n ke kha.nDar me.n guu.njii azaa.n fajar kii
vazuu ke paanii ke saath saare gunaah Tapke
du.aa me.n us ne sharaab maa.ngii to
tishnagii ke saraab chhalke
sitaare niiche utar ke aa.e
vo ek lamha
shikastagii ke badan ke andar
vo ek lamha
shikastagii ke badan se baahar
vo ek lamha hazaar sadiyo.n ke bandhano.n se nikal kar aayaa
vo ek lamha jo dastaras ke vasii.a halqo.n se duur rah kar
rutuubato.n me.n ba.Dii tamaazat se muskuraayaa
muqaddaro.n me.n hazaar lamho.n ke darmiyaa.n jis kaa taKHt KHaalii
lahuu me.n lat-pat vo ek lamha
vo ek lamha jo sar paTaktaa hai pattharo.n par!

Adil Mansuri
Nazm

bujh gae nil-gagan

ab kahii.n ko.ii nahii.n
jal ga.e saare farishto.n ke badan
bujh ga.e niil-gagan
TuuTtaa chaa.nd bikhartaa suuraj
ko.ii nekii na badii
ab kahii.n ko.ii nahii.n
aag ke sho.ale ba.Dhe
aasmaano.n kaa KHudaa
Dar ke zamii.n par utraa
chaar chhe gaam chalaa TuuT gayaa
aadmii apnii hii diivaaro.n se patthar le kar
phir guphaa.o.n kii taraf lauT gayaa
ab kahii.n ko.ii nahii.n

Nida Fazli
Nazm

safir-e-laila-2

nazar uThaa.o safiir-e-lailaa bure tamaasho.n kaa shahr dekho
ye meraa qarya ye vahshato.n kaa amiin qarya
tumhe.n dikhaa.uu.n
ye sehan-e-masjid thaa yaa.n pe aayat-farosh baiThe du.aa.e.n KHilqat ko bechte the
yahaa.n adaalat thii aur qaazii amaan dete the rahzano.n ko
aur is jagah par vo KHaan-qaahe.n thii.n aab o aatish kii manDiyaa.n thii.n
jahaa.n pe amrad-parast baiThe safaa-e-dil kii namaaze.n pa.Dh kar
KHayaal-e-duniyaa se jaa.n haTaate
safiir-e-lailaa mai.n kyaa bataa.uu.n ki ab to sadiyaa.n guzar chukii hai.n
magar suno ai Gariib-e-saaya ki tum shariifo.n ke raaz-daa.n ho
yahii vo din the mai.n bhuul jaa.uu.n to mujh pe laanat
yahii vo din the safiir-e-lailaa hamaarii bastii me.n chhe taraf se fareb utre
daro.n se aage gharo.n ke biicho.n phir us se chuulho.n kii haa.nDiyo.n me.n
javaan-o-piir-o-zanaan-e-qarya KHushii se raqsaa.n
tamaam raqsaa.n
hujuum-e-tiflaa.n thaa yaa tamaashe the bozno.n ke
ki ko.ii diivaar-o-dar na chho.Daa
vo un pe cha.Dh kar shariif chehro.n kii gardano.n ko phalaa.ngte the
Daraaz-qaamat lahiim baune
razaa-e-baaham se kolhu.o.n me.n jute hu.e the
KHraaste the vo zard Galla to us ke pisne se KHuun bahtaa thaa pattharo.n se
magar na aa.nkhe.n ki dekh paa.ii.n na un kii naake.n ki suu.nghte vo
faqat vo bailo.n kii chakkiyaa.n thii.n saro.n se KHaalii
fareb khaate the KHuun piite the aur niinde.n thii.n bajju.o.n kii
safiir-e-lailaa ye daastaa.n hai isii kha.nDar kii
isii kha.nDar ke tamaash-biino.n fareb-KHurdo.n kii daastaa.n hai
magar suno ajnabii shanaasaa
kabhii na kahnaa ki mai.n ne qarno.n ke faaslo.n ko nahii.n sameTaa
fasiil-e-qarya ke sar pe phe.nkii ga.ii kamande.n nahii.n utaarii.n
tumhe.n dikhaa.uu.n tabaah bastii ke ek jaanib buland Tiila
buland Tiile pe baiThe baiThe havannaqo.n-saa
kabhii to rotaa thaa apnii aa.nkho.n pe haath rakh kar kabhii musalsal mai.n uu.nghtaa thaa
mai.n uu.nghtaa thaa ki saa.ns le luu.n
magar vo chuulho.n pe haa.nDiyo.n me.n fareb pakte
siyaah saa.npo.n kii aisii kaayaa-kalap hu.ii thii ki merii aa.nkho.n pe jam ga.e the
so yaa.n pe baiThaa mai.n aane vaale dhu.e.n kii talKHii bataa rahaa thaa
KHabar ke aa.nsuu bahaa rahaa thaa
magar mai.n tanhaa safiir-e-lailaa
faqat KHayaalo.n kii baadshaahii mirii viraasat
tamaam qarye kaa ek shaa.ir tamaam qarye kaa ik la.ii.n thaa
yahii sabab hai safiir-e-lailaa mai.n yaa.n se niklaa to kaise ghuTno.n ke bal uThaa thaa
nasiib-e-hijrat ko dekhtaa thaa
safar kii saKHtii ko jaantaa thaa
ye sabz qariyo.n se sadiyo.n piichhe kii manzilo.n kaa safar thaa mujh ko
jo gard-e-sahraa me.n lipTe KHaaro.n kii tez noko.n pe jald karnaa thaa aur
vo aisaa safar nahii.n thaa jahaa.n pe saa.e kaa rizq hotaa
jahaa.n havaa.o.n kaa lams miltaa
farishte aavaaz-e-al-amaa.n me.n mire liye hii
ajal kii rahmat ko maa.ngte the
yahii vo lamhe the jab shafaq ke taviil Tiilo.n pe chalte chalte
mai.n dil ke zaKHmo.n ko saath le kar
safar ke parbat se paar utraa

Ali Akbar Natiq
Nazm

nazm ko nazm ke haal par chhoD do

ibtidaa se kabhii nazm hotii nahii.n
aur kabhii ibtidaa se bhii pahle kahii.n
nazm hone ke aasaar milte hai.n
jaise kahii.n qabl az zindagii
zindagii ke tasavvur se pahle
magar zindagii se bhii behtar
baraamad hu.ii ko.ii tahziib
tahziib miltii to hai
par kabhii ibtidaa us kii miltii nahii.n
ibtidaa se bhii pahle
talak zehn jaataa nahii.n
aur tahziib se lenaa-denaa bhii kyaa
nazm kii ibtidaa nuun se
nuun legii nahii.n
ye huruuf-e-tahajjii kaa ik rukn hai
jiim se jism
che se chamak
Daal se DaalDaa
scene se siin uupar ke tiin
vaav se vahm
jo kis qadar aham hai
nazm ke vast me.n
jo ki hotaa nahii.n
daa.era to nahii.n
triangle nahii.n
hexagonal nahii.n
KHat nahii.n wave hai
ya.anii aavaaz jaisii ko.ii chiiz hai
magnet kii tarah ko.ii shai hai
havaa saa ko.ii mo.aamla hai
ko.ii current hai
jis ke lagne se bhii
nazm martii nahii.n
nazm kii intihaa kyo.n ki hotii nahii.n
KHatm ho jaatii hai beach me.n hii kahii.n
jis tarah kuchh javaa.n-marg
yaa intihaa par pahu.nch kar bhii tishna hii rahtii hai
jaise
vo sab zinda laashe.n ki jo maut kii date ke baad bhii jii rahii hai.n
davaa apnii muddat mukammal kiye ek biimaar gaahak kii rah dekhtii hai
ye paanii kii laalach bahut ba.Dh ga.ii hai jo tanki ko bhar kar labaalab baqaayaa diivaaro.n kii buniyaad me.n chho.D dete hai.n
bijlii ke aane kaa vaqt aa bhii jaa.e magar in kii apnii gha.Dii hai
nijii daftaro.n ke mulaazim kii chhuTTii ke auqaat hote hai.n lekin use der tak baiThne aur biThaane me.n ko.ii qabaahat nahii.n hai
sitaaro.n se aage jahaa.n aur bhii hai.n

Bilal Aswad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now