Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "daaku"

Nazm MATCHES FOR "daaku"

Nazm

intisab

aaj ke naam
aur
aaj ke Gam ke naam
aaj kaa Gam ki hai zindagii ke bhare gulsitaa.n se KHafaa
zard patto.n kaa ban
zard patto.n kaa ban jo miraa des hai
dard kii anjuman jo miraa des hai
clerko.n kii afsurda jaano.n ke naam
kirm-KHurda dilo.n aur zabaano.n ke naam
post-mano.n ke naam
taa.nge vaalo.n kaa naam
rail-baano.n ke naam
kaar-KHaano.n ke bhuuke jiyaalo.n ke naam
baadshaah-e-jahaa.n vaalii-e-maa-sivaa, naa.eb-ul-allaah fil-arz
dahqaa.n ke naam
jis ke Dhoro.n ko zaalim ha.nkaa le ga.e
jis kii beTii ko Daaku uThaa le ga.e
haath bhar khet se ek a.ngusht paTvaar ne kaaT lii hai
duusrii maaliye ke bahaane se sarkaar ne kaaT lii hai
jis kii pag zor vaalo.n ke paa.nv-tale
dhajjiyaa.n ho ga.ii hai
un dukhii maa.o.n ke naam
raat me.n jin ke bachche bilakte hai.n aur
nii.nd kii maar khaa.e hu.e baazu.o.n me.n sambhalte nahii.n
dukh bataate nahii.n
minnato.n zaariyo.n se bahalte nahii.n

Faiz Ahmad Faiz
Nazm

shishon ka masiha koi nahin

jo haath ba.Dhe yaavar hai yahaa.n
jo aa.nkh uThe vo baKHtaavar
yaa.n dhan-daulat kaa ant nahii.n
ho.n ghaat me.n Daaku laakh magar

Faiz Ahmad Faiz
Nazm

rishwat

ye hai mil vaalaa vo baniyaa hai ye saahuukaar hai
ye hai duukaa.n-daar vo hai ved ye attaar hai
vo agar Thag hai to ye Daaku hai vo baT-maar hai
aaj har gardan me.n kaalii jiit kaa ik haar hai

Josh Malihabadi
Nazm

Daku

kal raat miraa beTaa mire ghar
chehre pe mun.Dhe KHaakii kap.Daa
banduuq uThaa.e aa pahu.nchaa
nau-umrii kii surKHii se rachii us kii aa.nkhe.n
mai.n jaan ga.ii
aur bachpan ke sandal se ma.nDhaa us kaa chehra
pahchaan ga.ii
vo aayaa thaa KHud apne ghar
ghar kii chiize.n le jaane ko
an-kahii kahii manvaane ko

Zehra Nigaah
Nazm

pyare pyare

pa.Dhnaa likhnaa sikhaa.e
achchhii raah bataa.e
bad se hame.n bachaa.e
achchhaa bachcha banaa.e
bhayyaa pyaaraa pyaaraa
ghanTii KHuub bajaa.e
basta bhii laTkaa.e
maktab le kar jaa.e
jaldii se pahu.nchaa.e
rickshaw pyaaraa pyaaraa
phuulo.n par itraa.e
KHushbuu bhii bikhraa.e
ghar aa.ngan mahkaa.e
hariyaalii bhii laa.e
gamlaa pyaaraa pyaaraa
bhayyaa le kar jaa.e
circus bhii dikhlaa.e
laDDuu bhii khilvaa.e
jo chaaho mil jaa.e
mela pyaaraa pyaaraa
jab jab ye lahraa.e
sab kii shaan ba.Dhaa.e
jis ke haath ye aa.e
aage ba.Dhtaa jaa.e
jhanDaa pyaaraa pyaaraa
taariikii me.n aa.e
bistar tak pahu.nchaa.e
lorii bhii sunvaa.e
sapne bhii dikhlaa.e
sonaa pyaaraa pyaaraa
sab ko maar bhagaa.e
jo dekhe Dar jaa.e
ulTii shaamat laa.e
dushman ko.ii aa.e
Da.nDaa pyaaraa pyaaraa
baarish me.n kaam aa.e
baahar le kar jaa.e
KHud to bhiigaa jaa.e
lekin hame.n bachaa.e
chhaataa pyaaraa pyaaraa
jagmag ruup dikhaa.e
chandaa riijhaa jaa.e
rasta bhii batlaa.e
lekin haath na aa.e
taaraa pyaaraa pyaaraa
tal kar munnaa khaa.e
KHaagiina banvaa.e
saalan me.n pak jaa.e
munnii ko lalchaa.e
anDaa pyaaraa pyaaraa
jab ye mausam aa.e
sehat KHuub banaa.e
Dhero.n kap.De laa.e
phir bhii duur na jaa.e
jaa.Daa pyaaraa pyaaraa
khaanaa jab bhii aa.e
aage ba.Dh kar laa.e
ham ko sab khilvaa.e
KHud bhuukaa rah jaa.e
chamcha pyaaraa pyaaraa
baazaaro.n me.n nikle
haath me.n sab ke laTke
jo kuchh bhii ye dekhe
apne peT me.n rakhe
thailaa pyaaraa pyaaraa
miiThaa miiThaa khaa.o
munnaa bole laa.o
jaldii se pakvaa.o
saaraa chaT kar jaa.o
halva pyaaraa pyaaraa
chaahe ko.ii bulaa.e
sab kii god me.n jaa.e
dekhe to lalchaa.e
toffee biscuit chaa.e
nanhaa pyaaraa pyaaraa
paanii ThanDaa kar de
sar pe kaToraa rakhe
dau.De aa.e.n pyaare
jo chaahe vo pii le
maTkaa pyaaraa pyaaraa
suurat rang bira.ngii
haalat bhii hai achchhii
bistar kaa hai saathii
aadat me.n hai narmii
takiya pyaaraa pyaaraa
garmii duur bhagaa.e
ThanDaa mausam laa.e
tho.Dii bijlii khaa.e
behtar kaam banaa.e
pa.nkhaa pyaaraa pyaaraa
cham cham chamkaa jaa.e
bijlii saa lahraa.e
jaldii jaldii aa.e
saath me.n chaltaa jaa.e
juutaa pyaaraa pyaaraa
sab se pahle jaage
pe.D pe cha.Dh ke baiThe
diivaaro.n par bhaage
kuuk.Duu.n kuuk.Duu.n chiiKHe
murGaa pyaaraa pyaaraa
ghar me.n dau.D lagaa.e
baahar bhaag ke jaa.e
billii par Gurraa.e
nanhe ko bahlaa.e
kuttaa pyaaraa pyaaraa
piiTh pe hame.n biThaa.e
sarpaT dau.D ke jaa.e
manzil par pahu.nchaa.e
tab jaa kar sustaa.e
gho.Daa pyaaraa pyaaraa
jaldii se uTh jaa.e
chiiKHe aur chillaa.e
daana patte khaa.e
phir bhuukaa rah jaa.e
bakraa pyaaraa pyaaraa
pinjre me.n par tole
Thumak Thumak kar Dole
jab bhii mu.nh ko khole
miiThii bolii bole
totaa piyaare pyaaraa
ru.ii ko lipTaa.e
dhaagaa bantaa jaa.e
haatho.n me.n bal khaa.e
bal khaa kar lahraa.e
taklaa pyaaraa pyaaraa
choro.n se la.D jaa.e
Daaku se Takraa.e
jo bhii chaabii laa.e
us ke bas me.n aa.e
taalaa pyaaraa pyaaraa
sa.Dke.n bhii dikhlaa.e
galiyo.n me.n le jaa.e
kaun kidhar ko jaa.e
bhed ye sab batlaa.e
naqsha pyaaraa pyaaraa
kaliyo.n par manD laa.e
phuulo.n se batlaa.e
naache jhuume gaa.e
mastii me.n lahraa.e
bhau.nraa pyaaraa pyaaraa
shab ko mu.nh dikhlaa.e
suuraj se sharmaa.e
baadal me.n chhup jaa.e
raat hote hii aa.e
chandaa pyaaraa pyaaraa
jhiil ke paas hii baiThe
chhoTii machhlii pak.De
hans ho ko.ii jaise
motii khaane aa.e
bagulaa pyaaraa pyaaraa
aa.nkho.n se lag jaa.e
raahat hii pahu.nchaa.e
kaale kaale shiishe
abr ke Tuk.Do.n jaise
chashma pyaaraa pyaaraa
meraa hamdam saathii
aisaa na hogaa ko.ii
suurat bhii hai pyaarii
siirat bhii hai achchhii
basta pyaaraa pyaaraa
vaqt pe so kar uThe
vaqt pe apne khele
vaqt pe pa.Dhne jaa.e
avval number aa.e
bachcha pyaaraa pyaaraa

Aadil Aseer Dehlvi
Nazm

Daka

kaale kaale Daaku
chhat par
dham dham karte
dau.D rahe hai.n
kamro.n se sab box uThaa kar
chhat par laa kar
be-rahmii se to.D rahe hai.n
in bakso.n me.n
ek ba.Daa saa box hai merii maa.n kaa bhii
jis me.n merii
shiishe vaalii golii kii thailii rakkhii hai
is bakse ke TuuTne par
mai.n KHush hotaa huu.n
chhat par jaa kar
banduuqo.n ke saa.e me.n
apnii sab golii chuntaa huu.n
sub.h ko mere saare saathii
merii rang bharii golii ko
lalchaa.ii nazro.n se takte rahte hai.n
barbaadii kaa maatam
mujh ko
golii ke ra.ngo.n se halkaa lagtaa hai

Shakeel Azmi
Nazm

hum shair hote hain

ham paidaa karte hai.n
ham giilii miTTii ko muTThii me.n bhii.nchaa karte hai.n
to shakle.n bantii hai.n
ham un kii cho.nche.n khol ke saa.nse.n phuu.nkaa karte hai.n
jo miTTii the vo chhuu lene se taa.ir hote hai.n
ham shaa.ir hote hai.n
kan.aan me.n rahte hai.n
jab jalva karte hai.n
to shashdar a.ngushto.n ko pore.n nashtar detii hai.n
phir KHuun Tapaktaa hai jo sard nahii.n hotaa
ik sahmaa saa sakta hotaa hai dard nahii.n hotaa
yuunaan ke Daaku hai.n
ham devtaa.o.n ke mahal me.n naqab lagaayaa karte hai.n
ham aasmaan kaa niilaa shah-darvaaza to.Dte hai.n
ham aag churaate hai.n
to is duniyaa kii yaKH choTii se barf pighaltii hai
phir jame hu.e siine milte hai.n
saa.ns humaktii hai
aur shiryaano.n ke mu.nh khulte hai.n
KHuun dha.Daktaa hai
jiivan-raamaayan me.n
jab raavan istibdaadii kaarobaar chalaataa hai
ham siitaa likhte hai.n
jab rath ke pahiye jismo.n ke poshaak kuchalte hai.n
to giitaa likhte hai.n
jab ho.nTo.n ke sahme kap.Do.n par baKHiya hotaa hai
ham bolaa karte hai.n
jab manDii se ek ek taraazuu Gaa.eb hotaa hai
to jiivan ko miizaan pe rakh kar tolaa karte hai.n
mazduurii karte hai.n
ham lafzo.n ke jangal se lak.Dii kaaTaa karte hai.n
ham arkashii ke maahir hai.n ambaar lagaate hai.n
phir randa pherte hai.n phir barmaa dete hai.n
phir budh milaate hai.n phir chuul biThaate hai.n
ham tho.De tho.De hote hai.n
is bharii bharaa.ii duniyaa me.n ham kam-kam hote hai.n
jab shahr me.n jangal dar aa.e aur us kaa chalan ja.nglaa.e
to ham Gaar se aate hai.n
jab jangal shahr kii zad me.n ho aur us kaa sukuu.n shahraa.e
to bargad se nikalte hai.n
ham tho.De tho.De hote hai.n
ham kam-kam hote hai.n
ham shaa.ir hote hai.n

Waheed Ahmad
Nazm

KHwatin ka bank

sunte hai.n shahr me.n jo KHvaatiin kaa hai bank
parvez kaa nahii.n hai ye parviin kaa hai bank
rakkhii hai.n is liye yahaa.n KHaatuun manager
is mohkme ko chaahiye baatuun manager
ladies ittihaad jo begaanagii se hai
kyaa jaane KHauf kyaa unhe.n mardaangii se hai
nok-e-zabaa.n bhii chalne lagii hai zabaa.n ke saath
beTii bhii hai shariik la.Daa.ii me.n maa.n ke saath
har naaznii.n ke saamne ik beauty-box hai
baaqii rakhaa hai ghar me.n ye tho.Daa saa aks hai
baiThii hai.n apne saamne gesuu sa.nvaar ke
locker me.n rakh diyaa hai dupaTTa utaar ke
chaTKHaare hai.n zabaa.n pe nazar me.n ishaare hai.n
har maah-vash ke pars me.n imlii kaTaare hai.n
jo baat kar rahii hai.n kamaa.ii ke shobe kii
vo head hai.n lagaa.ii-bujhaa.ii ke shobe kii
kal saas se zabaan ke bal par la.Dii hai.n ye
ilm-e-lissniyaat me.n p.hd hai.n ye
khaate kii in ko fikr na ledger kii fikr hai
nando.n kii Giibate.n hai.n to devar kaa zikr hai
shaadii ke baa'd nuqta banii.n dash ho ga.ii.n
pahle jo check-book thii.n vo ab cash ho ga.ii.n
har naaznii.n kii umr bhii KHufiya account hai
kyaa jaane in kii umr me.n kitnaa amount hai
ye husn kaa KHazaana ko.ii kyaa dabochegaa
Daaku bhii Daaka Daalne se pahle sochegaa
naakaara shauharo.n ko bhii debit karaa.ii.e
nisvaaniyat yahaa.n se credit karaa.ii.e

Khalid Irfan
Nazm

ganw aur rail

mere gaa.nv me.n aa.ii rail
bachcho nahii.n ye ko.ii khel
baat hai mere bachpan kii
shaayad unniis sau pachpan kii
mere dil kii uljhan kii
gaa.nv me.n kaise aa.ii rail
bachcho nahii.n ye ko.ii khel
mere daadaa kahte the
kalkatta jo rahte the
gaa.nv vaale ha.nste the
vahaa.n sa.Dak par chalii rail
bachcho nahii.n ye ko.ii khel
kalkatta jaanaa thaa mushkil
rail to miltii chal kar paidal
tiis miil par thaa jo signal
mushkil ko sab jaate jhel
bachcho nahii.n ye ko.ii khel
ba.De log jab jaanaa sochte
raat me.n bail-gaa.Dii ko jot-te
raaste me.n jab Daaku rokte
chho.D ke gaa.Dii bhaagte bail
bachcho nahii.n ye ko.ii khel
aazaadii ne daad miTaayaa
gaa.nv ko shahro.n se milaayaa
ummiido.n kaa phuul khilaayaa
sadaa harii rahe ye bel
bachcho nahii.n ye ko.ii khel
dillii me.n anshan hu.e
rail ke tab naqshe bane
baabuu jii jab ban ga.e
markaz me.n vaziir-e-rail
bachcho nahii.n ye ko.ii khel
shahr se sab kuchh rail se laate
Dibbo.n ko nuqsaa.n pahu.nchaate
chorii karte pak.De jaate
jo pak.Daa.e jaate jail
bachcho nahii.n ye ko.ii khel
mushkil din sab kaT jaate hai.n
lekin vo din yaad aate hai.n
ab to sab collage jaate hai.n
paka.D ke bombay-mail
bachcho nahii.n ye ko.ii khel

Abul Lais Javed
Nazm

karachi ke mushaere mein Daka

ye kis ne bazm-e-adab ke sukuun ko taakaa
mushaa.eron me.n bhii pa.Dne lagaa hai ab Daaka
mushaa.ere me.n Dakaitii kaa shauq rakhte hai.n
hamaare ahd ke Daaku bhii zauq rakhte hai.n
adab-navaaz the Daaku suKHan-shanaas the vo
mire vatan kii siyaasat kaa iqtibaas the vo
ajab Dakait the jin kaa nasiib phuuTaa thaa
jinho.n ne shahr ke in mufliso.n ko luuTaa thaa
pa.Daa vo ran ki ik ustaad sher bhuul gayaa
kisii nahiif se shaa.er kaa saa.ns phuul gayaa
bayaaz apnii kisii ne uchhaal kar rakh dii
bajaa.e cash rubaa.ii nikaal kar rakh dii
udhar Dakait sambhaale the gun u.Daa.ii hu.ii
udhar vo pel rahaa thaa Gazal churaa.ii hu.ii
ye kis ne bazm-e-suKHan luuT lii KHudaa jaane
''tamaam shahr ne pahne hu.e hai.n dastaane''
mushaa.ere me.n na sonaa thaa aur na chaa.ndii thii
suKHan-varo.n kii to har chiiz hii puraanii hai
jo sab se qiimtii shai hai vo shervaanii hai
ye apne sher sunaate hii phuuT lete hai.n
mushaa.ere ko tarannum se luuT lete hai.n
hamaare sher sune.n aur sher-bii.n ho jaa.e.n
KHudaa kare ki ye Daaku bhii saama.ii.n ho jaa.e.n

Khalid Irfan
Nazm

bait-e-ankabut

ye aurat is liye paidaa hu.ii hai
ki is ko Tuk.De Tuk.De kar ke phaa.nsii par cha.Dhaayaa jaa.e
ise yuunaan ke ik mash.huur Daaku ke bistar kii zaruurat hai
(vo apne sab shikaaro.n kaa qadd-o-qaamat isii bistar ke paimaane kii nisbat se ghaTaataa kaaTtaa yaa
khii.nch kaa jabran ba.Dhaataa thaa)
KHutuut-e-lab to dekho!
kis tarah simTe hu.e hai.n, sa.ng-e-dil
aamiyaana-pan taraavish kar rahaa hai
ye kiina-tuuz aa.nkhe.n
in kii gahraa.ii ke kiicha.D me.n
sunahrii machhliyaa.n Gote lagaatii hai.n
rupahlii shaaKH tauba hai ki khultii baa.nh hai, lekin
ko.ii saaya nahii.n pa.Dtaa!

Shamsur Rahman Faruqi
Nazm

sachchi kahani

raste me.n kuchh Daaku aa.e
zulm-o-sitam har ik par Dhaa.e

Jauhar Rahmani
Nazm

qabristan mein KHud-kalami

mire paas
maut ke bahut se options hai.n
mai.n kisii bhii vaqt kahii.n bhii maaraa jaa saktaa huu.n
mobile chhiin.ne vaalaa naujavaan
mujhe TaKHne par golii maar saktaa hai
police ke naake par na rukne kii paadaash me.n
mujhe thaane ke andar maaraa jaa saktaa hai
raat ke pichhle pahar
ghar me.n ghusne vaalaa Daaku kaalii jeb hone ke jurm me.n
mujhe banduuq ke hiT-mark se halaak kar saktaa hai
jii pii fund ke husuul kii KHaatir
mai.n
a-g office kii sii.Dhiyaa.n cha.Dhte cha.Dhte
dil ke daure se bhii mar saktaa huu.n
aur
kisii gunjaan market yaa masjid me.n hone vaale dhamaake me.n baa-aasaanii
shahaadat paa saktaa huu.n
ab to
Gurbat kii lakiir se laTak kar
mere bhuuk se marne ke imkaanaat bhii paidaa hone lage hai.n
agarche ja.ng me.n kaam aane kaa zamaana guzar chukaa hai
magar ba.az muqaddas dushman
merii maut ke evaz jannat ke talabgaar hai.n
merii samaajii maut se ab kisii ko ko.ii faa.eda nahii.n
hattaa ki mujhe bhii nahii.n
magar plot mafiyaa ke alaava zaKHiira-andoz aur saTTe-baaz
merii maut ke muntazir hai.n
aur
unho.n ne mujhe be-tauqiir kar ke
sa.Dak par merii KHud-sozii kaa raasta kushaada kar diyaa hai
jamhuuriyat aur insaanii huquuq kii baazyaaft ke liye marnaa meraa KHvaab thaa
magar
bachcho.n kii feese.n adaa karne ke liye aur Time lagaane ke baa.is
mere paas aisii ayyaashii ke liye vaqt nahii.n
so
mai.n ba-qaa.emii hosh-o-havaas aise farsuuda nazriyaat ko mustarad kartaa huu.n
raat der ga.e
ghar lauTte hu.e
raah-giirii maut maare jaanaa merii hargiz tarjiih nahii.n
magar us me.n harj bhii kyaa hai
ki us ke evaz sarkaarii KHazaane se paa.nch laakh ruupa.e milte hai.n
mai.n
zinda rahne ke imkaanaat se taqriiban mahruum kiyaa jaa chukaa huu.n
magar na-jaane kyuu.n
mai.n zinda rahnaa chaahtaa huu.n

Zahid Masood
Nazm

front-page

javaa.n aurat kii galtii laash
kuu.De se milii hai
us ko tho.Daa chaT-paTaa kar do
likho sattrah baras kii gandumii la.Dkii
jise insaan ne nochaa
jise kutto.n ne khaayaa
aur police ne qabr me.n Daalaa
KHabar ye ban ga.ii hai
is KHabar ko paa.nch column chaukhaTe me.n Daal kar chhaapo
aur is ke saath sa.Dtii laash kii
tasviir bhii de do
ka.ii din se karachi KHuun kii holii nahii.n khelaa
bahut aKHbaar phiikaa hai
kahii.n se ko.ii dahshat-gard Daaku aur qaatil
Dhuu.nD kar laa.o
kahii.n ho KHauf kaa chaskaa
kahii.n ko.ii scandal ho
kahii.n par jins kii tazliil hotii ho
kahii.n par masKH laashe ho.n
kahii.n par KHuun kii buu ho

Hasan Shahnawaz Zaidi
Nazm

qarya-e-viran

panghaT aur chaupaal bhii suune raahe.n bhii sunsaan
galiyaa.n aur kuuche viiraan
jho.nke suukhe patte role.n bikhrii raakh u.Daa.ii.n
raakh aur patte ban ke baguule apnaa naach dikhaa.e.n
aur vahii.n rah jaa.e.n
ye bastii ab to.D chukii hai hastii kii zanjiir-e-giraa.n
aur quyuud-e-zamaan-o-makaa.n
vaqt ke Daaku chakkar us ko bisaat mutaabiq luuT chuke
us ke liye maahaul-o-fizaa ke saare bandhan TuuT chuke
maazii-o-haal bhii chhuuT chuke
kaun aa.e jo aa kar is me.n ziist ke rang bhare
kheto.n ko sarsabz kare
galii galii aur kuucha kuucha panghaT aur chaupaal
khelte bachcho.n ha.nstii javaanii se kar de cho.nchaal
zinda kar de maazii-o-haal

Mukhtar Siddiqui
Nazm

kala motiya

aaj ek kaale ko
mercedes me.n dekhaa
dil me.n vasvase jaage
drugs kaa ye pesha hai
aurato.n kii dallaalii
yaa hai bank kaa Daaku
ho na ho ye gaa.Dii bhii
paar kar ke laayaa hai
is dhyaan me.n meraa
paa.nv is tarah uljhaa
mercedes sar par thii
maut saamne raqsaa.n
meraa sar bachaane ko
mercedes kaale ne
apnii gaa.Dii de maarii
raaste ke khambe se
sar miraa salaamat thaa
mercedes chaknaa-chuur
kaale ne salaasat se
merii KHairiyat puuchhii
mere mu.nh se ye niklaa
merii aa.nkho.n me.n bhaa.ii
motiyaa hai kaalaa saa

Saeed Naqvi
Nazm

dan

kis kii uThii hai ye arthii
kamlaa
seTh lachhman kii pa.Dosan beva
seTh do gho.Do.n kii bagghii me.n aataa hai udhar
shahr kaa sab se ba.Daa daanii
diyaa lo
dhanvaan
jis ne sone kaa cha.Dhaayaa hai kalas mandir par
jis ne gauu-shaalaa bhii banvaa.ii thii
jis kii mil me.n abhii parso.n hii chalii thii golii
jis ke darvaaze pe mil jaatii hai bhikshaa lekin
bhuukii mar jaa.e jo ik beva pa.Dosan mar jaa.e
peT bhartaa nahii.n mazduur kaa saat aane me.n golii chal jaa.e
daan dete hai.n dayaaluu
dhanvaan
izzat-e-nafs ke Daaku
shaitaan
kap.De kii mil ke maalik aaTe kii mil ke maalik

Abdul Majeed Bhatti
Nazm

nana ki banduq

aslii jaapaanii do naalii
naanaa kii banduuq niraalii
kanda is kaa maT-mailaa saa
ruup Daraavnaa suurat kaalii
naanaa jii is ke rasiyaa the
naanii thii is kii matvaalii
lete the is se jo nishaana
jaataa thaa vo aksar KHaalii
chi.Diyo.n kaa jiinaa duubhar thaa
chhuptii thii.n vo Daalii Daalii
naanaa jii ik roz ga.e the
dekhne jab mela vaishaalii
naanii ko samjhaa ke ga.e the
karnii thii is kii rakhvaalii
saarii raat guzaarii baahar
mele kii thii shaan niraalii
ghar par raat ko Daaku aa.e
to.D ke raushan-daan kii jaalii
naanii ko pistaul dikhaa kar
le bhaage banduuq kamaalii
shor machaatii piichhe dau.Dii.n
vo thii.n diler ba.Dii dil vaalii
hallaa sun kar log bhii dau.De
le kar ballam aur bhujaalii
chor hu.e tab nau do gyaarah
chho.D ga.e banduuq misaalii
naanaa ke ghar isii KHushii me.n
agle roz manii diivaalii
naanii jii ne isii KHushii me.n
ghar ghar bhejii khiir kii thaalii

Zaki Ahmad
Nazm

shahr-e-KHamoshan ko dekh kar

nahii.n ye Dher miTTii ke sabaq-aamoz-e-ibrat hai.n
karuu.n ai ham-nashii.n kyuu.nkar na in se istifaada mai.n
nishaan-e-raftgaa.n mai.n ne har ik manzil me.n paayaa hai
isii ibrat-kade ne kyaa KHayaal un kaa jamaayaa hai
qayaas apnaa kiyaa un par jo mai.n ne ai shariif insaa.n
nazar aayaa mujhe un me.n ko.ii KHandaa.n ko.ii giryaa.n
yahaa.n mazluum hii rahte nahii.n hai.n balki zaalim bhii
nazar pahluu-ba-pahluu aate hai.n mahkuum-o-haakim bhii
na dekhaa tum ne shaayad un ko ab tak chashm-e-ibrat se
KHudaa-raa lo sabaq kuchh bhii to in alvaah-e-turbat se
humaayuu.n hai yahaa.n aasuuda vo qabr-e-halaakuu hai
sunaa hai ye ko.ii murshid hai aur vo ek Daaku hai
vo shah-zor aaj bekas hai.n jo kamzoro.n se la.Dte the
KHudaa jaane ki ahl-e-hilm se kyuu.nkar biga.Dte the
karo yaad un buzurgo.n ko sharaafat jin pe hai naazaa.n
na bhuulo un ko bhii jo the sipah-saalaar-e-sharbaazaa.n
nigaaho.n me.n unhe.n rakkho ubharnaa hai agar tum ko
KHayaalo.n me.n unhe.n parkho sa.nvarnaa hai agar tum ko

Ali Manzoor Hyderabadi
Nazm

mobile

ik jaaduu.ii khilaunaa haatho.n pe dhar liye hai.n
bachche javaan buu.Dhe sab is se khelte hai.n
aa.nkhe.n ga.Dii hu.ii hai.n aur u.ngliyaa.n hai.n raqsaa.n
duniyaa kii sair is me.n sab lutf ke hai.n saamaa.n
tasviir o film is me.n youtube radio bhii
bhaashan bhajan tilaavat naGmaat-e-radio bhii
camera-o-conferencing hai.n ehtimaam saare
har ghar me.n har galii me.n is ke Gulaam saare
sach puuchhiye to ye hai jaaduu kaa ik khilaunaa
hai is me.n sar khapaanaa umr-e-aziiz khonaa
gumraahiyo.n ke raste is me.n khule hu.e hai.n
is raah-e-ilm me.n bhii Daaku chhupe hu.e hai.n
miilo.n kii duuriyaa.n hai.n pal me.n ubuur kartaa
dil duuriyaa.n bhii achchhaa hotaa jo duur kartaa

Mohammad Asadullah
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now