Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dalte"

Nazm MATCHES FOR "dalte"

Nazm

tum bilkul hum jaise nikle

tum bilkul ham jaise nikle
ab tak kahaa.n chhupe the bhaa.ii
vo muurakhtaa vo ghaama.D-pan
jis me.n ham ne sadii ga.nvaa.ii
aaKHir pahu.nchii dvaar tuhaare
are badhaa.ii bahut badhaa.ii
pret dharm kaa naach rahaa hai
qaa.em hinduu raaj karoge
saare ulTe kaaj karoge
apnaa chaman taaraaj karoge
tum bhii baiThe karoge sochaa
puurii hai vaisii tayyaarii
kaun hai hinduu kaun nahii.n hai
tum bhii karoge fatvaa jaarii
hogaa kaThin yahaa.n bhii jiinaa
daa.nto.n aa jaa.egaa pasiinaa
jaisii-taisii kaTaa karegii
yahaa.n bhii sab kii saa.ns ghuTegii
bhaa.D me.n jaa.e shikshaa-vikshaa
ab jaahil-pan ke gun gaanaa
aage ga.Dhaa hai ye mat dekho
vaapas laa.o gayaa zamaana
mashq karo tum aa jaa.egaa
ulTe paa.nv chalte jaanaa
dhyaan na duujaa man me.n aa.e
bas piichhe hii nazar jamaanaa
ek jaap saa karte jaa.o
baaram-baar yahii doharaa.o
kaisaa viir mahaan thaa bhaarat
kitnaa 'aalii-shaan thaa bhaarat
phir tum log pahu.nch jaa.oge
bas parlok pahu.nch jaa.oge
ham to hai.n pahle se vahaa.n par
tum bhii samay nikaalte rahnaa
ab jis nark me.n jaa.o vahaa.n se
chiTThii-viTThii Daalte rahnaa

Fahmida Riaz
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

buDhiya

roz hii bu.Dhiyaa uTh kar kyo.n kahtii hai
pyaas lagii hai
paanii Daalte Daalte mug se aa jaatii hai
gilaas giraa.oge tum
haath tumhaare kaa.np rahe hai.n
jaan jalaa rakhii hai is ne
KHarraaTe kyaa mai.n letaa huu.n
naak to is kii pharraatii hai
aadhii raat ko uTh kar kahtii hai ki pa.nkhaa band karo naa.n ThanD
lagtii hai
paa.nv maar ke KHud hii to chaadar phe.nkii thii
paa.nv pala.ng pe maar kar pair sujaa rakhaa hai
saarii raat dabaataa huu.n
pain-killer khaa khaa ke bhii ab uub gayaa huu.n
saarii umr jalaayaa is ne
ek baras hone ko aayaa
sii.Dhii par phislii thii to sar pho.D liyaa thaa
apne haath se aag ke uupar rakh kar aayaa thaa mai.n us ko
aur kahaa thaa tuu chal mai.n bhii aataa huu.n
par jaa.e tab naa.n
saarii raat mire bistar par karvaTe.n letii rahtii hai

Gulzar
Nazm

hathon ka tarana

in haatho.n kii taaziim karo
in haatho.n kii takriim karo
duniyaa ke chalaane vaale hai.n
in haatho.n ko tasliim karo
taariiKH ke aur mashiino.n ke pahiyo.n kii ravaanii in se hai
tahziib kii aur tamaddun kii bharpuur javaanii in se hai
duniyaa kaa fasaana in se hai, insaa.n kii kahaanii in se hai
in haatho.n kii taaziim karo
sadiyo.n se guzar kar aa.e hai.n, ye nek aur bad ko jaante hai.n
ye dost hai.n saare aalam ke, par dushman ko pahchaante hai.n
KHud shaktii kaa autaar hai.n, ye kab Gair kii shaktii maante hai.n
in haatho.n ko taaziim karo
ek zaKHm hamaare haatho.n ke, ye phuul jo hai.n gul-daano.n me.n
suukhe hu.e pyaase chulluu the, jo jaam hai.n ab mai-KHaano.n me.n
TuuTii hu.ii sau a.ng.Daa.iyo.n kii mehraabe.n hai.n aivaano.n me.n
in haatho.n kii taaziim karo
raaho.n kii sunahrii raushniyaa.n, bijlii ke jo phaile daaman me.n
faanuus hasii.n aivaano.n ke, jo rang-o-nuur ke KHirman me.n
ye haath hamaare jalte hai.n, ye haath hamaare raushan hai.n
in haatho.n kii taaziim karo
KHaamosh hai.n ye KHaamoshii se, so barbat-o-cha.ng banaate hai.n
taaro.n me.n raag sulaate hai.n, tablo.n me.n bol chhupaate hai.n
jab saaz me.n jumbish hotii hai, tab haath hamaare gaate hai.n
in haatho.n kii taaziim karo
e.ajaaz hai ye in haatho.n kaa, resham ko chhu.e.n to aa.nchal hai
patthar ko chhu.e.n to but kar de.n, kaalakh ko chhu.e.n to kaajal hai
miTTii ko chhu.e.n to sonaa hai, chaa.ndii ko chhu.e.n to paayal hai
in haatho.n kii taaziim karo
bahtii hu.ii bijlii kii lahre.n, simTe hu.e gangaa ke dhaare
dhartii ke muqaddar ke maalik, mehnat ke ufuq ke sayyaare
ye chaaragaraan-e-dard-e-jahaa.n, sadiyo.n se magar KHud bechaare
in haatho.n kii taaziim karo
taKHliiq ye soz-e-mehnat kii, aur fitrat ke shahkaar bhii hai.n
maidaan-e-amal me.n lekin KHud, ye KHaaliq bhii me.amaar bhii hai.n
phuulo.n se bharii ye shaaKH bhii hai.n aur chaltii hu.ii talvaar bhii hai.n
in haatho.n kii taaziim karo
ye haath na huu.n to mohmal sab, tahriire.n aur taqriire.n hai.n
ye haath na ho.n to be-ma.anii insaano.n kii taqriire.n hai.n
sab hikmat-o-daanish ilm-o-hunar in haatho.n kii tafsiire.n hai.n
in haatho.n kii ta.aziim karo
ye kitne subuk aur naazuk hai.n, ye kitne siDaul aur achchhe hai.n
chaalaakii me.n ustaad hai.n ye aur bhole-pan me.n bachche hai.n
is jhuuT kii gandii duniyaa me.n bas haath hamaare sachche hai.n
in haatho.n kii taaziim karo
ye sarhad sarhad ju.Dte hai.n aur mulko.n mulko.n jaate hai.n
baa.nho.n me.n baa.nhe.n Daalte hai.n aur dil se dil ko milaate hai.n
phir zulm-o-sitam ke pairo.n kii zanjiir-e-giraa.n ban jaate hai.n
in haatho.n kii ta.aziim karo
ta.amiir to in kii fitrat hai, ik aur na.ii ta.amiir sahii
ik aur na.ii tadbiir sahii, ik aur na.ii taqdiir sahii
ik shoKH o hasii.n KHvaab aur sahii ik shoKH o hasii.n ta.abiir sahii
in haatho.n kii ta.aziim karo
in haatho.n kii takriim karo
duniyaa ko chalaane vaale hai.n
in haatho.n ko tasliim karo

Ali Sardar Jafri
Nazm

sex workers

vo jin ke mai'de bhare hu.e hai.n
unhe.n bataa do
ye diin-o-duniyaa se maavaraa hai.n
inhe.n jahannum se mat Daraa.e.n
ye roz apne badan jahannum me.n Daalte hai.n

Shoaib Kiani
Nazm

subh hote hi

sub.h hote hii aaTh karo.D masKHare nikal aate hai.n sa.Dko.n par
aur shuruu.a kar dete hai.n naach
aaTh karo.D masKHare nikal aate hai.n apne ra.nge chehro.n aur lambii Topiyo.n ke saath
to.D-pho.D Daalte hai.n aasmaan
dhajjii dhajjii kar dete hai.n dhuup
uljhaa lete hai.n havaa kii Dor apne haatho.n me.n
raasta nahii.n dete mayyat-gaa.Diyo.n ko aur aag bujhaane vaale engine ko
bhar dete hai.n sayyaare ko behuuda fiqro.n se
aur shaam aatii hai
lauT jaate hai.n suuraj ke saath chorus gaate hu.e
aur raat hotii hai
aur sub.h hotii hai
sub.h hote hii aaTh karo.D masKHare nikal aate hai.n sa.Dko.n par
aur shuruu.a kar dete hai.n naach...

Sarvat Husain
Nazm

hamara farz

dekh kar kisii kaa desh ke liye upvaas
ham netaa.o.n kaa u.Daate hai.n uphaas
aur dete hai.n gaaliyaa.n
bas hamaaraa farz puuraa
jab bhii hotaa hai ko.ii aandolan
ham yaar dosto.n kaa kar ke sammelan
nigaah sarkaar pe Daalte hai.n savaaliya
bas hamaaraa farz puuraa
desh jaataa hai jahaa.n jaa.e
netaa chaahe jaise bhii desh ko chalaa.e.n
ham duty kar dete hai.n paa.nch saal
bas hamaaraa farz puuraa
paanii ho chalaa hai hamaaraa KHuun
ab kahaa.n desh-bhaktii kaa junuun
roz kahte hai.n achchhaa nahii.n hamaaraa qaanuun
bas hamaaraa farz puuraa
ham Dar se maante hai.n qaanuun-qaa.eda
aisii aazaadii kaa kyaa faa.eda
sach maante hai.n paa.nch saal vaalaa va.ada
bas hamaaraa farz puuraa
jaldii bhulaa dete hai.n uupar pa.Dii laat ko
phir kyuu.n bhunte hai.n ham binaa baat ko
jab itnaa hii bahaana banaanaa hai ham aap ko
ki bas hamaaraa farz puuraa

Madhav Awana
Nazm

34

KHudaa gar hame.n ik parinda banaataa
jahaa.n me.n ham ik aashiyaana banaate
kisii sabz vaadii me.n apnaa nasheman
yaa sehn-e-chaman ko Thikaana banaate
kabhii u.Dte baadal me.n hotaa baseraa
kabhii Daalte kunj-e-vahshat me.n Deraa
kabhii daaman-e-koh hotaa hamaaraa
kabhii bantaa ghar ik nadii kaa kinaaraa
kabhii giit gaate ghaTaa.o.n ke niiche
kabhii hote paagal havaa.o.n ke piichhe
fazaa.o.n me.n ham sub.h se shaam karte
a.ndhere se pahle zamii.n par utarte
ko.ii gulistaa.n mulk hotaa hamaaraa
ham is ke liye ik taraana banaate
KHudaa gar hame.n ik parinda banaataa
use ham parinde KHudaa na banaate

Zeeshan Sahil
Nazm

ghaalib aur aam

na the shaa.ir hii kuchh ba.De Gaalib
dil-lagii me.n bhii KHuub the Gaalib
KHuub ha.nste ha.nsaate rahte the
ba.Dii pur-lutf baat kahte the
aam un ko pasand the behad
ya.anii rasiyaa the aam ke behad
KHud bhii baazaar se ma.ngaate the
dost bhii aam un ko bhijvaate
phir bhii aamo.n se jii na bhartaa thaa
aam kaa shauq un ko itnaa thaa
un ke qisse tumhe.n sunaa.e.n ham
un kii baato.n se kuchh ha.nsaa.e.n ham
ek mahfil me.n vo bhii baiThe the
log aamo.n kaa zikr karte the
aam aisaa ho aam vaisaa ho
puuchhaa Gaalib se aam kaisaa ho
bole Gaalib ki puuchhte ho agar
sirf do KHuubiyo.n pe rakhiye nazar
baat pahlii ye hai ki miiThaa ho
duusrii baat ye bahut saa ho
ek din dost un ke ghar aa.e
aam Gaalib ne the bahut khaa.e
saamne ghar ke the pa.De chhilke
us galii me.n se kuchh gadhe guzre
un gadho.n ne na chhilke vo khaa.e
suu.ngh kar un ko ba.Dh ga.e aage
dost ne jab ye maajraa dekhaa
sochaa Gaalib ko ab hai samjhaanaa
dost bole hai shai burii sii aam
dekho khaate nahii.n gad.he bhii aam
ha.ns ke Gaalib ye dost se bole
jii haa.n be-shak gad.he nahii.n khaate
baadshah kar rahe the sair-e-baaG
KHush thaa aamo.n se un kaa qalb-o-dimaaG
baadshah ke the saath Gaalib bhii
Daalte the nazar vo lalchaa.ii
jii me.n ye thaa ki KHuub khaa.e.n aam
baadshah se jo aaj paa.e.n aam
ghuurte the jo Gaalib aamo.n ko
baadshah bole ghuurte kyaa ho
baadshah se ye bole vo ha.ns kar
muhr hotii hai daane daane par
dekhtaa huu.n yuu.n ghuur kar mai.n aam
shaayad un par likhaa ho meraa naam
maqsad un kaa jo baadshah paa.e
phir bahut aam un ko bhijvaa.e

Maftun Kotvi
Nazm

nasha baqi hai

karuu.ngaa fat.h ko.ii shaam to mai.n utruu.ngaa ulajhtii saa.ns ke kiikar se aur
KHvaabo.n se raft-o-buud ke us paar
abad ke husn-e-hariirii ke safed se phuul apnii palko.n pe chun sakuu.ngaa mai.n
mai.n ban sakuu.ngaa KHud apnaa libaas KHud apnaa taar-e-nafas
na sun sakuu.ngaa ko.ii lafz ko.ii nazm aur ko.ii aavaaz
sukuut-e-zaat me.n lamho.n kii chaap tak na aa.egii
chamakte hosh-o-havaas thak chuke.n to savaad-e-shaam me.n
so.e hu.e shajar ke tale pa.Daav Daalte hai.n
puraanii yaado.n ke ra.ngii.n parinde shajar se niiche utarte hai.n
udaas aa.nkho.n ke puraane ghar me.n KHayaal-o-KHvaab
kaa malbuus pahne aate hai.n
mai.n nanhe tifl ke maanind unhe.n paka.Dne khulii niim ujlii
vaadiyo.n me.n dau.Dtaa huu.n
kahii.n pe pair phisaltaa hai aur dha.Daam se niiche kaalii khaa.iiyo.n
me.n Duubtaa huu.n
aa.nkh khultii hai
chahaar-samt a.ndheraa hai a.ndhere me.n sapedii
ko.ii rang ko.ii libaas nahii.n
ko.ii KHushbuu ko.ii baas nahii.n
ba.Dii hii der talak ghuurte a.ndhere me.n
rafta rafta ghule hai.n siyaahii mujh me.n aur mai.n
siyaahii me.n
athaah nii.nd ke saahil pe saarii umr ke daaG
tamaam nasl ke saare gunaah dhulte hai.n
magar havaas kahaa.n chho.Dte hai.n jism ke rog
savere pahlii kiran raushnii kii jaise hii jhilmilaatii hai
KHvaabiida aa.nkh kulbulaatii hai
athaah nii.nd ke saahil pe dhuup phailtii hai
daaG ujaalo.n me.n phir chamakne lagte hai.n
saare gunaah a.ndherii ruuh ke taaqo.n pe
phir charaaG kii maanind jalne lagte hai.n
na shaam fat.h hu.ii aur na sub.h fat.h hu.ii
raat fat.h hu.ii aur na baat fat.h hu.ii
vahii huu.n mai.n vahii din raat aur vahii man-o-tuu
vahii zamaana vahii yaade.n aur vahii KHvaab
nasha utarne pe vahii maKHluuq aur vahii duniyaa
vahii.n hai.n motare.n vahii raaste vahii shahr aur vahii gaa.nv
vahii hai biivii vahii bachche vahii ghar aur vahii chhaa.nv
karuu.ngaa fat.h ko.ii shaam to mai.n utruu.ngaa
tire kinaare (mere ruu-ba-ruu) ki jahaa.n
na ko.ii sub.h na shaam aur na ko.ii nii.nd na KHvaab
na ko.ii rasta na manzil na ko.ii ghar hai na ghaaT!

Khaleel Mamoon
Nazm

mashq

barso.n baa'd bar-nok-e-zabaan rahtaa hai ko.ii sher
phir ek din
us ke jaane pahchaane hazaar martaba dohraa.e hu.e alfaaz ke andar
khul jaataa hai ma.aanii kaa ek nayaa darvaaza
aur rah jaate hai.n ham hakka-bakkaa
jis mafhuum par sar dhunte aa.e the kal tak kitnaa sat.hii kitnaa adhuuraa thaa vo
shukr karte hai.n ki nahii.n puuchh liyaa kisii ne ham se is sher kaa matlab
satya-naas kar Daalte achchhe bhale sher kaa in na.e ma.aanii ke baGair ham
yahii kuchh hotaa hai zindagii me.n pesh aane vaale
vaaqi.aat o haadsaat ke saath bhii
jo kuchh biit gayaa aur biit rahaa hai ham par
der tak raaz hii nahii.n khultaa us kii ahmiyat kaa
be-maqsad ho rahaa hai ye sab kuchh
yaa is kaa hamaare mustaqbil aur muqaddar se bhii ta'alluq hai kuchh
phir parda saa haTtaa hai aur ho jaate hai.n ham Garq-e-hairat
kitnaa mahduud thaa hamaaraa naqd-e-ilm
aur kin muGaalito.n me.n pa.De hu.e the ham
mujhe to KHuugar saa banaa diyaa hai roz-marra kii is hairaanii o pareshaanii ne
na.e se nayaa sadma sahne ko tayyaar rahtaa huu.n sub.h o shaam
apnii jahaalat ke inkishaaf par
one-day cricket to shauq se dekhte hai.n aap bhii
yuu.n samajhiye ki mashq thaa guzishta kal kaa match aaj ke match kii
mashq hai aaj kaa match aane vaale kal ke liye
aur kal jo match hogaa apnii jagah vo final hii kyuu.n na ho
mashq hogaa parso.n ke match kii
haDDiyaa.n gal ga.ii.n itnii saada sii baat samajhte samajhte
ki har din tuluu hotaa hai apne saath ek nayaa savaal ek nayaa challenge le kar
aur mutaaliba kartaa hai ham se ek na.e javaab ek na.e tarz-e-amal kaa
na to zindagii hii jaamid hai na zindagii kaa KHaaliq KHudaa
zindagii bahte dariyaa kii tarah badaltii rahtii hai har lahza qaa.em-o-daa.em rahte hu.e
aur nit-na.ii taKHliiq me.n masruuf KHudaa bhii nahii.n hotaa kabhii pahle vaalaa KHudaa
jab zindagii aur us ke KHaaliq hii kii kaayaa kalp hotii rahtii hai yuu.n
to ash.aar ho.n yaa vaaqi.aat o haadsaat badal jaataa hai hir shai kaa mafhuum
bha.ii, badal jaate hai.n ham KHud badal jaatii hai hamaarii nazar hamaaraa ehsaas
badal jaatii hai.n vo mohabbate.n
jin ke azlii o abadii hone kii qasme.n khaayaa karte the ham
badal jaatii hai.n be-badal dostiyaa.n
vo KHvaahishe.n badal jaatii hai.n jinho.n ne
ek umr paagal banaa.e rakhaa hotaa hai hame.n
aur to aur badal jaate hai.n diin aur iimaan
raaste hii nahii.n badal jaatii hai.n manzile.n
sun rahe hai.n aap
bhar to nahii.n paa.e aap bhii?
kidhar chal diye aap?
badal to nahii.n ga.e aap bhii?

Mohammad Haneef Rame
Nazm

iltija

ham vo nahii.n jo tum samajhte ho
ham vo hai.n jo tum nahii.n samajhte
ham laash ke mu.nh pe apnii nazm kii miTTii Daalte hai.n
aur chain se so jaate hai.n
sub.h uTh kar kaam kii talaash me.n nikalte hai.n
hame.n aise mat dekho
jaise suukhii ghaas baadal ko dekhtii hai
hame.n aise dekho
jaise marne vaalaa gor-kan ko dekhtaa hai

Nighat Sahiba
Nazm

tumhaare baad kya hua

tumhaare baa'd kyaa hu.aa
tumhe.n to kuchh KHabar nahii.n
Gamo.n ne zindagii ke saare zaaviye badal diye
mirii tamaam KHvaahisho.n ke hausle kuchal diye
mirii to saarii 'umr hii isii me.n kaT ke rah ga.ii
udaasiyo.n kii bhii.D me.n
safar kii tez dhuup me.n
KHushii kii ko.ii bazm ho ki Gam kaa silsila kahii.n
mai.n har jagah tumhe.n faqat tumhe.n talaashtaa rahaa
magar na jaane kyaa hu.aa
mai.n thak gayaa
mai.n thak gayaa tumhaare naqsh-e-paa talaashte hu.e
mai.n thak gayaa huu.n is badan me.n jaan Daalte hu.e
ye sochtaa huu.n
zindagii ke bojh ko mai.n ab nahii.n uThaa.uu.ngaa
bhale tumhe.n KHabar na ho
mai.n tum ko bhuul jaa.u.ngaa

Sarmad Khan
Nazm

apne nam ek nazm

use dukh ke saath byaahaa gayaa
ki jab aa.nkh khulii to sar par suuraj jaltii naa.nd me.n dhuul
ise dhuup ke saath byaahaa gayaa
ki jo shaam pa.De se din guzre tak sotii thii
use nii.nd ke saath byaahaa gayaa
ki jo aaj ke KHvaab se kal ke KHvaab kaa saudaa kartii thii
use byaah ke saath byaahaa gayaa
ki jo kashT uThaatii dhuup me.n baiThii saa.e se baate.n kartii thii
use saa.e ke saath byaahaa gayaa
mallaaho.n ne us kii aa.nkho.n kii taariif nahii.n kii
bachche us ko dekh ke ruke nahii.n
la.Dkiyaa.n us ke libaas pe chau.nkii.n nahii.n
use yuu.n dafnaayaa jaise machhliyaa.n jaal se jaal me.n Daalte hai.n
use yuu.n nahlaayaa jaise baarish aabii paudo.n ko nahlaa kar KHush hotii hai
use shaam ke saath vidaa.a kiyaa
jab chaa.nd ghane baadal me.n chhuptaa phirtaa thaa
aur aa.nkhe.n chun.ne vaalii machhliyaa.n chunii ga.ii thii.n
aur naav ne naav ke saath gunaah kiyaa thaa
miTTii paanii ke beTe ye sab kuchh dekh chuke hote to dahshat se pahle mar jaate

Mohammad Anvar Khalid
Nazm

iltija

ham vo nahii.n jo tum samajhte ho
ham vo hai.n jo tum nahii.n samajhte
ham laash ke mu.nh pe apnii nazm kii miTTii Daalte hai.n
aur chain se so jaate hai.n
sub.h uTh kar kaam kii talaash me.n nikalte hai.n
hame.n aise mat dekho
jaise suukhii ghaas baadal ko dekhtii hai
hame.n aise dekho
jaise marne vaalaa gorkan ko dekhtaa hai

Nighat Sahiba
Nazm

har roz hum apne KHwabon ki tauhin karen

ham aisii zard dopahro.n me.n
jab dukh kii raakh barastii hai
is raakh ko terii yaad ke zevar pahnaa kar
raato.n ko KHvaab pirote hai.n
aur duusrii sub.h
vo KHvaab anaa kii thaal me.n rakh
majruuh pindaar ke haatho.n
tere qadmo.n pe ham Daalte hai.n
vo KHvaab jo apne pal-pal kii is raakh se ham ta.amiir kare.n
har roz ham apne KHvaabo.n kii tauhiin kare.n

Noon Meem Danish
Nazm

hansi

maut ko itnaa qariib dekh kar bhii
un kii ha.nsii band nahii.n hotii
un ke qadam nahii.n la.Dkha.Daate
vo ha.nste hii rahte hai.n
har samt me.n be-shumaar
goliyaa.n chalaate
har diivaar har darvaaze par
bahut se suuraaKH karte
siyaah sa.Dak par insaanii KHuun se
surKH nishaan Daalte
apne piichhe tar-o-taaza phuulo.n se bharii
qabro.n kii jannat
apne piichhe
laa-ta.adaad aa.nsu.o.n se bharaa
shaffaaf dariyaa chho.Dte
ha.nste hu.e
vo guzar jaate hai.n

Zeeshan Sahil
Nazm

zeyabetis ke mariz

ye namak-KHvaaraan-e-millat jab kahii.n piite hai.n chaa.e
''aagahii daam-e-shuniidan jis qadar chaahe bichhaa.e''
Daalte hai.n ye ''sweetics'' is me.n chiinii kii bajaa.e
jis ko apnii jaan piyaarii ho shakar kas tarah khaa.e
ye hai.n vo farhaad jo shiirii.n se apnii duur hai.n
hai zeyabetis vo ba.Dhiyaa jis se ye majbuur hai.n

Syed Mohammad Jafri
Nazm

baghbani

bachcho.n ne ik baaG lagaayaa
baaG ko apne KHuub sajaayaa
karte vo kaam baarii baarii
paude lagaate kyaarii kyaarii
roz vo KHabar us kii lete
vaqt pe khaad aur paanii Daalte
ra.ng-bira.nge phuul mahakte
aa ke parinde us pe chahakte
phal bhii miiThe miiThe aate
phal bhii vo jo sab ko bhaate
jo bhii bachcha mehnat kartaa
vaqt maze se us kaa guzartaa

Mohammad Shafiuddin Nayyar
Nazm

eden garden

ye ba.ngaalii hasiinaa.o.n kii jalva-gaah hai hamdam
yahaa.n piir-o-javaa.n aa kar mataa-e-dil luTaate hai.n
junuu.n-a.ngez lai me.n narm-o-shiirii.n giit gaate hai.n
nigaaho.n me.n nigaahe.n Daalte hai.n muskuraate hai.n

Owais Ahmad Dauran
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now