Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "fir.aun"

Nazm MATCHES FOR "fir.aun"

Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

karl marx

us kii daanaa.ii kaa haasil naaKHuun-e-uqda-kushaa
taabnaaki-e-zamiir-o-ziirakii kaa aaftaab
chaahne vaalo.n kaa us kii zikr hii kyaa kiijiye
us ke dushman bhii sirhaane rakhte hai.n us kii kitaab
maaddii taariiKH-e-aalam jis kii taaliif-e-aziim
taas kaipiTaal hai yaa ziist kaa lubb-e-lubaab
pa.Dh ke jis ke ho ga.ii.n hushyaar aqvaam-e-Gulaam
ishtiraakii falsafa kaa khul gayaa har dil me.n baab
kitne dozaKH us ke ik manshuur se jannat bane
kitne sahraa.o.n ko jis ne kar diyaa shahr-e-gulaab
marx ne science o insaa.n ko kiyaa hai ham-kanaar
zehn ko baKHshaa shu.uur-e-zindagaanii kaa nisaab
us kii biinish us kii vajdaanii-nigaah-e-haq-shanaas
kar ga.ii jo chehra-e-iflaas-e-zar ko be-naqaab
'Gasab-e-ujrat' ko diyaa 'sarmaayaa' kaa jis ne laqab
be-hisaab us kii basiirat us kii mantiq laa-javaab
aaftaab taaza kii us ne bashaarat dii hame.n
us kii har peshan-go.ii hai barafganda naqaab
ko.ii quvvat us kii sadd-e-raah ban saktii nahii.n
vaqt kaa farmaan jab aataa hai ban kar inqilaab
ahl-e-daanish kaa rajaz aur siina-e-dahqaa.n kii Dhaal
lashkar mazduur ke hai.n ham-safiir o ham-rikaab
kaaTtii hai sehr-e-sultaanii ko jab muusaa kii zarb
satvat-e-firaun ho jaatii hai az KHud Garq-e-aab
aaj kii fir.auniyat bhii kuchh isii andaaz se
rafta rafta hotii jaa.egii shikaar-e-inqilaab
la.D rahaa hai ja.ng aaKHir kiisa-e-sarmaaya-daar
jauhrii hathiyaar se kartaa nahii.n jo ijtinaab
apne mustaqbil se taaGuutii tamaddun ko hai yaas
diidanii hai dushman-e-insaaniyat kaa iztiraab
hazrat-e-iqbaal kaa ibliis-e-kochak KHauf se
larza-bar-andaam yuu.n shaitaa.n se kartaa hai KHitaab
panDit o mullaa o raahib be-zarar Thahre magar
TuuTne vaalaa hai tujh par ik yahuudii kaa itaab
vo kaliim-e-be-tajallii vo masiih-e-be-saliib
niist paiGambar o lekin dar baGal daarad kitaab

Wamiq Jaunpuri
Nazm

KHwab-e-sahar

mahr sadiyo.n se chamaktaa hii rahaa aflaak par
raat hii taarii rahii insaan ke idraak par
aql ke maidaan me.n zulmat kaa Deraa hii rahaa
dil me.n taariikii dimaaGo.n me.n a.ndheraa hii rahaa
ik na ik maz.hab kii sa.ii-e-KHaam bhii hotii rahii
ahl-e-dil par baarish-e-ilhaam bhii hotii rahii
aasmaano.n se farishte bhii utarte hii rahe
nek bande bhii KHudaa kaa kaam karte hii rahe
ibn-e-maryam bhii uThe muusii-e-imraa.n bhii uThe
raam o gautam bhii uThe fir.aun o haamaa.n bhii uThe
ahl-e-saif uThte rahe ahl-e-kitaab aate rahe
ii.n janaab uThte aur aa.n-janaab aate rahe
hukmaraa.n dil par rahe sadiyo.n talak asnaam bhii
abr-e-rahmat ban ke chhaayaa dahr par islaam bhii
masjido.n me.n maulvii KHutbe sunaate hii rahe
mandiro.n me.n barhaman ashlok gaate hii rahe
aadmii minnat-kash-e-arbaab-e-irfaa.n hii rahaa
dard-e-insaanii magar mahruum-e-darmaa.n hii rahaa
ik na ik dar par jabiin-e-shauq ghistii hii rahii
aadamiyyat zulm kii chakkii me.n pastii hii rahii
rahbarii jaarii rahii paiGambarii jaarii rahii
diin ke parde me.n ja.ng-e-zargarii jaarii rahii
ahl-e-baatin ilm se siino.n ko garmaate rahe
jahl ke taariik saa.e haath phailaate rahe
ye musalsal aafate.n ye yorish ye qatl-e-aam
aadmii kab tak rahe auhaam-e-baatil kaa Gulaam
zehan-e-insaanii ne ab auhaam ke zulmaat me.n
zindagii kii saKHt tuufaanii a.ndherii raat me.n
kuchh nahii.n to kam se kam KHvaab-e-sahar dekhaa to hai
jis taraf dekhaa na thaa ab tak udhar dekhaa to hai

Asrarul Haq Majaz
Nazm

musafir

talaash karte hu.e gum-shuda KHazaano.n ko
bahut se misr ke fir.aun maqbaro.n me.n mile
zabaan-e-sa.ng me.n jo ham-kalaam hote hai.n
kuchh aise log puraane musass me.n mile
buland-baam kaliisaa me.n the vahii fankaar
jo KHasta-haal masaajid ke gumbado.n me.n mile
marii thakii hu.ii KHvaabiidgii se naalaa.n the
vo rat-jage jo masaa.il kii karvaTo.n me.n mile
ka.ii suraaG nazar aa.e daastaano.n me.n
ka.ii charaaG kitaabo.n ke haashiyo.n me.n mile

Mustafa Zaidi
Nazm

mazdur

june kii garmii ka.Daktii dhuup luu chaltii hu.ii
har gha.Dii mazduur ke sar se qazaa Taltii hu.ii
sar pe gaare kii ka.Dhaa.ii aur diivaar-e-buland
haa.nptaa vo cha.Dh rahaa hai le ke himmat kii kamand
paa.D par pahu.nchaa to ik gaalii sunii me.amaar se
jii me.n aayaa sar ko Takraa de usii diivaar se
haa.e us mazluum kii majbuuriyaa.n naa-chaariyaa.n
jaan kaa aazaar hai.n iflaas kii biimaariyaa.n
dil me.n kahtaa hai ki ye me.amaar bhii mazduur hai
phir yahii jaan-e-hazii.n kyuu.n is qadar maqhuur hai
us kii ujrat mujh se dugunii hai magar kam hai shu.uur
tamkanat kis baat par kis chiiz par itnaa Guruur
mai.n agar naadaar huu.n ye bhii nahii.n sarmaaya-daar
bhuut vo hai kis ba.Daa.ii kaa jo us par hai savaar
ii.nT gaaraa mai.n na duu.n us ko to ye kis kaam kaa
asl me.n me.amaar mai.n huu.n ye faqat hai naam kaa
merii himmat kah rahii.n hai.n kaaKH-e-diivaan-e-buland
aah is par bhii mai.n duniyaa me.n huu.n itnaa mustamand
lag gayaa phir kaam me.n ye soch kar vo bad-nasiib
ai KHudaa duniyaa me.n itnaa bhii na ho ko.ii Gariib
din Dhalaa jis vaqt maalik bhii makaa.n kaa aa gayaa
ik sukuut-e-marg saa diivaar-o-dar par chhaa gayaa
kaa.nptaa rahtaa hai har mazduur jis ke naam se
sab usii dhun me.n the vo KHush ho hamaare kaam se
us kii peshaanii pe lekin bal zaraa aane lage
phan uThaa kar tamkanat ke saa.np lahraane lage
sab se pahle us ne gaalii dii usii me.amaar ko
apnii milkiyyat jo samjhaa thaa har ik diivaar ko
josh-e-naKHvat se kahaa us ne ki ai paajii la.ii.n
kal jahaa.n tak thii ga.ii diivaar ab bhii hai vahii.n
kyaa kiyaa hai tuu ne din-bhar me.n zaraa mujh ko bataa
yuu.n takabbur me.n vo aa kar jaa.eza lene lagaa
dil me.n vo mazduur phir kahne lagaa uf re Gazab
jo bhii is duniyaa me.n hai.n fir.aun hai.n vo sab ke sab
jis kaa jis par bas chale paamaal kartaa hai use
KHud agar KHush-haal hai bad-haal kartaa hai use
kyaa kahuu.n sarmaaya-daaro.n ke sitam kii daastaa.n
diida-e-mazduur hai mazduur se bhii KHuu.nfishaa.n
jis kii laaThii us kii bhai.ns is misl ko saadiq samajh
ye samajh kar is KHudaa-e-paak ko raaziq samajh

Arsh Malsiyani
Nazm

hum ki hero nahin

ham ne fir.aun kaa qasiida likhaa
ham ne kuufe me.n marsiye beche
ham ne boso.n kaa kaarobaar kiyaa
ham ne aa.nkho.n ke aa.ine beche

Jawayd Anwar
Nazm

cigarette aur pan ka mukalima

bolaa cigarette ki bashar shikva-kunaa.n hai.n tere
dar-o-diivaar pe paiiko.n ke nishaa.n hai.n tere
jo lipstick me.n hai.n vo jalve kahaa.n hai.n tere
KHud to halkaa hai pa nuqsaan giraa.n hai.n tere
na Gizaa me.n na davaa me.n hai to phir kaun hai tuu
tuu halaakuu hai ki taimuur ki fir.aun hai tuu

Syed Mohammad Jafri
Nazm

shair-e-mashriq ki arz-dasht

par manzar-e-Guruub bahut dil-nashii.n hai kyuu.n
maGrib kii shaam apnii sahar se hasii.n hai kyuu.n
is kashmakash me.n daulat-e-uqbaa bhii chhin ga.ii
zauq-e-junuu.n se vus.at-e-sahraa bhii chhin ga.ii
sahraa-e-aarzuu me.n tag-o-dau nahii.n rahii
paa-e-talab se vaadii-e-siinaa bhii chhin ga.ii
tuu ne to qartaba me.n namaaze.n bhii kii.n adaa
apnii jabii.n se masjid-e-aqsaa bhii chhin ga.ii
kohsaar rau.nd Daale ga.e khet ho ga.e
chaTTaan ham zaruur the ab ret ho ga.e
manzil pe aa ke luT ga.e ham rahbaro.n ke saath
biimaar bhii pa.De hai.n to chaaragaro.n ke saath
Gurbat-kade me.n kaash utar aa.e kahkashaa.n
aa.nkhe.n falak kii samt hai.n bojhal saro.n ke saath
u.Dnaa muhaal lauT ke aanaa bhii hai vabaal
zaKHmii du.aa KHalaa me.n hai TuuTe paro.n ke saath
is razm-e-KHair-o-shar me.n hu.aa kaun suraKH-ruu
zarb-e-kaliim kund hai fir.aun surKH-ruu

Zaheer Siddiqui
Nazm

ek sitara aadarsh ka

la.al-o-gauhar KHazaane
shahd-o-gandum se zuruuf uble hu.e
taKHt-o-taaj-o-mohr-e-shaahii ke nigahbaa.n
harba-haa-e-aahan-o-faulaad
aur daste Gulaamaan-e-javaa.n ke
kaahino.n kii phuu.nk
haamaano.n kii tadbiir-e-siyaasat me.n zahr-e-halaahil
paasbaanii me.n magan
so rahe hai.n an-ginat fir.aun
ai baad-e-sabaa aahista chal

Shafiq Fatima Shera
Nazm

adl ka fuqdan

qaatil-o-maqtuul baraabar
zaalim-o-mazluum baraabar
qalam bhii banduuq baraabar
ma.atuub-o-mahbuub baraabar
apnii goyaa saathii kii
har ik KHaatuun baraabar
na.ii daanishvarii jo pa.Dhii
muusaa-o-qaaruun baraabar
zulm to sab par saa.njhaa thaa
banii-israa.iil-o-fir.aun baraabar
maa.n chaahe rotii rahe
shahiid bachche aur mal.uun baraabar
baloch jo ghar se Gaa.eb hai.n
sab par magar qaanuun baraabar
zulm kii andhii fikr me.n
yaziid-o-husain baraabar
na.ii na.ii pa.Dhii sahaafat
mash.al-o-hujuum baraabar
a.ndheraa bhii ujaale saa hai
zulmat-o-nuur baraabar
basiirat par parda pa.Daa
sach aur har ik jhuuT baraabar
ulTii ga.ngaa bahtii hai
madaarii-o-aflaatuun baraabar
jab tak apnaa na bahe
aab-o-KHuun baraabar
ik un kaa bhii maar giraa.o
phir kahnaa maarne vaalaa aur marhuum baraabar

Zehra Alvi
Nazm

la bhi hai ek guman

ek hai bas yahaa.n ''aalamgiir''
aur maqtal me.n akelaa 'sarmad'
ruKH-e-taariiKH badalne ko hai
us ke ash.aar hii se taKHt laraz jaataa hai
aaise advaar ka.ii baar zamii.n par guzre
kaise talvaar ne maftuuh qalam karne ko
haath kaaTe hai.n zabaa.n kaaTii hai sar kaaTe hai.n
ham ne dekhaa hai khulii aa.nkho.n se
aaj kii kaun kare ab ta.aziim
kal kii takziib nahii.n ho saktii
raakh se ghar to nahii.n ban sakte
koh me.n dar to nahii.n ban sakte
KHvaab fariyaad nahii.n kar sakte
KHvaab dekhaa hai khulii aa.nkho.n se
chaa.nd ko KHuu.n me.n nahaate ham ne
sar khule dasht ko maatam karte
aur mahallaat ko kha.nDaro.n me.n badalte dekhaa
kizb ko adl kaa har faisla karte dekhaa
taKHt ko vaqt kaa fir.aun bhii bante dekhaa
zer-e-shamshiir ye 'sarmad' ne kahaa ha.nste hu.e
''masnad-e-adl-o-musaavaat yahaa.n kuchh bhii nahii.n
''laa'' bhii hai ek gumaa.n
aur gumaa.n kuchh bhii nahii.n''

Faheem Shanas Kazmi
Nazm

haarun ki aawaz

jab yuu.n na ho sakaa to ye taariiKH hai gavaah
uTThe asaa-ba-dast Gulmaan-e-kaj-kulaah
zer-e-zamii.n kushaada hu.ii zindagii kii raah
aur kuchh na kar sakii kisii fir.aun kii sipaah

Himayat Ali Shayar
Nazm

bebasi git bunti rahti hai

KHvaab garmii kii chuTTiyo.n pe ga.e
ho ga.e band gate aa.ankho.n ke
ishq ko daaKHila milaa hii nahii.n
KHvaahishe.n lockero.n me.n qaid rahii.n
jo bike us ke daam achchhe ho.n
zindagii ho ki ko.ii titlii ho
be-sabaatii ke rang kachche hai.n
kaun batlaa.e un zamiino.n ko
ja.ngalo.n ke ghane daraKHto.n me.n
gar KHizaa.n bele-Dance kartii ho
misr ko kaun yaad kartaa hai
kam nahii.n lucknow kii umraa.o
is se behtar yahaa.n pe hai.n fir.aun
kaun saa devtaa aur kyaa ra.amiis
mirzaa-'vaajid'-alii bhii kam to nahii.n

Faheem Shanas Kazmi
Nazm

waris

nubuvvat kaa silsila KHatm ho chukaa
ra.uunat kaa silsila jaarii hai
ab ko.ii zamaana
kisii nabii kaa zamaana nahii.n
har daur
ek fir.aun kaa daur hai
jis ke qabze me.n
qaaruun kaa KHazaana hai
jis ne
ambiyaa kii miiraas par qabza kar liyaa hai
use pahchaan.naa mushkil nahii.n
us ke paas
tauhiin risaalat kii talvaar hai
jo us par iimaan na laa.e.n
vo laapataa ho jaate hai.n
jo iimaan le aa.e.n
unhe.n vo KHizr kii tarah talaash kar letaa hai
nuuh kii tarah
us kii kashtii me.n
har-nau kaa jaanvar hai
us ke mahal me.n
sulaimaan kaa taKHt bichhaa hai
muKHaalifiin ke liye
us ke qaid-KHaane me.n
iisaa kii suulii hai
farishto.n kaa lashkar use sajda kartaa hai
kyuu.nki us kii baGal me.n
muusaa kaa asaa hai

Mubashshir Ali Zaidi
Nazm

inni-kunto-minazalemin

ki in fir.aun-zaado.n se ye puuchhe.n kaun ho tum
magar ye hausla kab hai kisii me.n
log to ranjuur baiThe hai.n
ki jab qabre.n bulaa.e.ngii
to sar par KHaak o.Dhe.nge

Satyapal Anand
Nazm

KHuda se

tujh ko bhii kuchh KHabar hai duniyaa banaane vaale
ye kaar-gaah-e-hastii baazaar-e-auj-o-pastii
le dekh ho rahii hai bechainiyo.n kii bastii
tujh ko bhii kuchh KHabar hai duniyaa banaane vaale
2
phuulo.n ke chaak daamaa.n Guncho.n me.n soz-e-pinhaa.n
gulshan bahaar me.n bhii be-kaif-o-dard-saamaa.n
soz-e-daruu.n nahii.n hai josh-e-junuu.n nahii.n hai
dil hii se aashiqii thii dil hii me.n KHuu.n nahii.n hai
paimaane uTh ga.e hai.n maiKHaane uTh ga.e hai.n
viiraaniyaa.n salaamat diivaane uTh ga.e hai.n
tujh ko bhii kuchh KHabar hai duniyaa banaane vaale
3
maamuur-e-Gam hai duniyaa daar-e-alam hai duniyaa
daam-e-tava.nagrii me.n said-e-sitam hai duniyaa
aare se chal rahe hai.n naqshe badal rahe hai.n
insaa.n kaa KHuun pii kar insaan pal rahe hai.n
mafquud KHurramii hai har bazm maatamii hai
is Gam-kade kii har shai goyaa jahannamii hai
tujh ko bhii kuchh KHabar hai duniyaa banaane vaale
4
ai kaar-saaz-e-aalam ai be-niyaaz-e-aalam
ma.amuur-e-soz-e-Gam hai kab se ye saaz-e-aalam
maayuus ho chuke hai.n himmat hii kho chuke hai.n
insaa.n bhalaa.iyo.n kii qismat ko ro chuke hai.n
barbaad ho rahe hai.n naashaad ho rahe hai.n
bande tire saraapaa fariyaad ho rahe hai.n
tujh ko bhii kuchh KHabar hai duniyaa banaane vaale
5
haivaan bhii nahii.n hai.n insaan bhii nahii.n hai.n
insaa.n-numaa darinde shaitaan bhii nahii.n hai.n
ye zohd kii dukaane.n ye ma.asiyat kii kaane.n
ye vaa.izo.n ke mu.nh me.n chaltii hu.ii zabaane.n
fir.aun ho rahe hai.n mal.uun ho rahe hai.n
maz.hab-farosh mullaa qaaruun ho rahe hai.n
tujh ko bhii kuchh KHabar hai duniyaa banaane vaale
6
ai be-niyaaz-e-hastii ai kaar-saaz-e-hastii
kab tak rahegaa yuu.nhii poshiida raaz-e-hastii
ko.ii nahii.n hamaaraa ko.ii nahii.n sahaaraa
kis samt bah rahii hai ye zindagii kii dhaaraa
fikr-e-davaa nahii.n hai zikr-e-du.aa nahii.n hai
dil kah rahaa hai ab to ko.ii KHudaa nahii.n hai
tujh ko bhii kuchh KHabar hai tujh ko bhii kuchh KHabar hai

Qaisar Amravatwi
Nazm

tamashai bhi zalim hain

kisii mazluum par laaThii chalaataa hai
vo jo fir.aun ban kar KHud ko us mazluum kaa aaqaa bataataa hai
KHudaa hone kaa da.avaa hii nahii.n kartaa
KHudaa.ii kii hado.n ko chhuu ke aataa hai

Farah Shahid
Nazm

KHuni qila

ye hai alaamat-e-fistaa.iyat giraa.o se
hamaare bachcho.n ke school se haTaa.o ise
ye KHuunii-qila kaa phaaTak hai yaa dahaan-e-jahiim
fasiil-e-sa.ng ibaarat hai KHuu.n ke dhabbo.n se
diye lahuu.n ke farozaa.n kiye hu.e har taaq
hai jin ke saamne KHiira talaa o gauhar o siim
sadaa-e-raqs nikaltii hu.ii jharo.nko.n se
kisii hasiina-e-fir.aun kaa mahal jaise
sutuun marmarii.n a.ng.Daa.ii le ke nii.nd me.n chuur
libaas-e-barahnagii me.n nihaa.n qalo-patra
miyaan-e-niil ko.ii laash dekh kar ha.ns de

Wamiq Jaunpuri
Nazm

habil

bujh ga.ii sham-e-nazar miT ga.e aavaaz ke naqsh
buu-e-gul, juu-e-sabaa, najm-e-sahar kuchh na rahaa
larzish-e-mauj-e-tanaffus ke karishme the tamaam
ruu-e-jaanaa.n Gam-e-jaa.n diida-e-tar kuchh na rahaa
nasl-dar-nasl yuu.nhii mere lahuu kaa pyaasaa
naar-e-namruud bhii vo naKHvat-e-fir.aun bhii vo
jaam-e-zahraab bhii vo tesha bhii vo daar bhii vo
KHanjar-e-shimr bhii vo tarkash-e-cha.ngez bhii vo
asia me.n kabhii africa me.n KHuu.n-rez bhii vo

Zia Jalandhari
Nazm

marzi

zamii.n par shor barpaa thaa
yahaa.n sikka hamaaraa hai
kahii.n fir.aun kii marzii
kahii.n namruud haakim hai
kahii.n shaddaad kii jannat
kahii.n qaaruun kahtaa hai
yahaa.n hadd-e-nazar tak jis ko bhii jo kuchh nazar aa.e
faqat maalik hai.n ham is ke
hamaarii baargaaho.n me.n
sar-e-tasliim KHam kar do
achaanak
zalzala aaya
zamii.n kii jumbihso.n me.n sab tah-o-baalaa nazar aa.e
sukaaraa hii sukaaraa kaa ajab maahaul barpaa thaa
falak se tab sadaa guu.njii
mirii duniyaa mirii marzii

Shahid Anwar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now