Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gaamzan"

Nazm MATCHES FOR "gaamzan"

Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

aarzu ke musafir

jin pe sab chalte hai.n
aise sab raaste chho.D ke
ek anjaan pagDanDii kii u.nglii thaame hu.e
ik sitaare se
ummiid baa.ndhe hu.e samt kii
har gumaa.n ko yaqii.n maan ke
apne dil se
ko.ii dhokaa khaate hu.e jaan ke
sahraa sahraa
samundar ko vo Dhuu.nDte
kuchh saraabo.n kii jaanib
rahe gaamzan
yuu.n nahii.n thaa
ki un ko KHabar hii na thii
ye samundar nahii.n
lekin un ko kahii.n
shaayad ehsaas thaa
ye fareb
un ko mahv-e-safar rakkhegaa
ye sabab thaa
ki thaa aur ko.ii sabab
jo liye un ko phirtaa rahaa
manzilo.n manzilo.n
raaste raaste
jaane kis vaaste
aarzuu ke musaafir bhaTakte rahe

Javed Akhtar
Nazm

fana ka safar

us kii KHvaahish kaa iz.haar
ma.asuum had tak rivaayat kii bandish me.n uljhaa hu.aa thaa
ki mai.n us ke haatho.n pe meh.ndii lagaa.uu.n
magar shaa.erii ek devii hai jis kii jalan ko
kabhii likhne vaalo.n ke haatho.n pe itnaa taras hii nahii.n aa sakaa hai
ki baaGii dimaaGo.n me.n bhii aam rasto.n kii taqliid bhartii
yaa haatho.n kii jumbish KHirad ke tasallut se aazaad kartii
mire haath bhii zehn me.n ghuumte kuchh savaalo.n ke saa.nche banaane lage
us ke haatho.n pe meh.ndii se atom ke model banaane lage
aur model bhii aise jo matruuk the
jis me.n zarra bahut duur se ghuumtaa jhuumtaa daa.era daa.era
rafta rafta kisii markaze kii taraf gaamzan
bas tasalsul se ba.Dhtii hu.ii ik kashish ke asar me.n rahe
ik yaqiinii fanaa ke safar me.n rahe
saal-haa-saal chiize.n badaltii ga.ii.n
vaqt ne dard ke jo bhii lyrics likhe un ko gaanaa pa.Daa
jaane kaise magar
us ko jaanaa pa.Daa
mai.n ne vaise to ye umr bhar sochnaa hii nahii.n thaa
magar shaa.erii ek devii jalan
nostalgic zamaano.n kii tasviir logic ke kuchh mas.ale
puuchhne lag ga.e hai.n
bhalaa aisaa jaahil kahaa.n par milegaa
ki jo kiimiyaa pa.Dh ke bhii
ik ta'alluq me.n pahle to zarra bane
aur nibhaate hu.e
dynamics ke vo hii matruuk model chune
aur tasalsul se ba.Dhtii hu.ii ik kashish ke asar me.n rahe
ik yaqiinii fanaa ke safar me.n rahe

Sohaib Mugheera Siddiqi
Nazm

kitab gumrah kar rahi hai

kitaab gumraah kar rahii hai
pa ik yaqii.n hai ki
itnii gumraahiyo.n ke piichhe
ko.ii to ik raah hogii
jo manzilo.n se nahii.n milegii
safar pe jo gaamzan rakhegii
ye shirk-e-kohna
safar kii vahdaaniyat ko majruuh kar rahaa hai
kahaa.n kii manzil
kahaa.n hai manzil
ye shirk ke hai.n saraab saare
ham aap hai.n mahv-e-KHvaab saare

Shahram Sarmadi
Nazm

jawab

suuraj ne jaate jaate ba.Dii tamkanat ke saath
zulmat me.n Duubtii hu.ii duniyaa pe kii nazar
kahne lagaa ki kaun hai ab us kaa paasbaa.n
mere sivaa hai kaun zamaane kaa raahbar
mai.n thaa to apnii raah pe thii gaamzan hayaat
ab mai.n nahii.n rahuu.ngaa to ye saarii kaa.enaat
zulmaat me.n bhaTaktii phiregii tamaam raat

Himayat Ali Shayar
Nazm

siyasat

baa.ndh ke ghu.nghruu siyaasat hii nachaatii hai hame.n
aur ham naachte rahte hai.n tavaa.if kii tarah
aur hukuumat ke ishaaro.n pe hamaare Thumke
ye bataate hai.n ki ham bhii hai.n razaa-mand yahaa.n
kaun hai.n kans yaa raavan ke taraf-daar kaho
kaun ham me.n se hai zaalim kaa taraf-daar kaho
vaqt be-vaqt mile zaKHm ke naasuur to hai.n
ham bhii iisaa pe hu.e zulm se ranjuur to hai.n
sun bhii lo hazrat-e-shabbiir pe rone vaalo
in mazaalim pe yahaa.n ashk-baar ham bhii to hai.n
hai.n agar raam hamaare to tumhaare bhii to hai.n
bas mohammad hai.n musalmaa.n ke to aisaa bhii nahii.n
gaamzan raah-e-sadaaqat pe agar hai.n ham bhii
to ye naanak pe kisii qaum kaa da.avaa kyo.n ho
ab hame.n kaun pa.Dhaataa hai ye nafrat ke sabaq
ye vahii qaum hai kahte hai.n siyaasat jis ko
baa.ndh ke ghu.nghruu siyaasat hii nachaatii hai hame.n
aur ham naachte rahte hai.n tavaa.if kii tarah

Raj Kumar Kori Raz
Nazm

jashn-e-azadi

jazba-e-abbaas se ho suu-e-manzil gaamzan
sub.h-e-aazaadii ke matvaalo.n kii hai apnii hii baat
har qadam rakkhe.n vo aazaadii ke parcham ko buland
dast-o-baazuu apne kaTvaa kar bhii vo khaa.e.n na maat

Asghar Ali Tabassum
Nazm

naya ufaq

kyaa tum ko ye pata hai
ai naa-samajh rafiiqo
roz-e-azal se jis par
tum gaamzan rahe ho
vo raasta KHalaa kii
sarhad se jaa milaa hai

Shahryar
Nazm

gul

ai gul-e-ra.ngii.n-qabaa ai Gaaza-e-ruu-e-bahaar
tuu hai KHud apne jamaal-e-husn kaa aa.iina-daar
haa.e vo tere tabassum kii adaa vaqt-e-sahar
sub.h ke taare ne apnii jaan tak kar dii nisaar
sharm ke maare gulaabii hai idhar ruu-e-shafaq
shabnam-aagii.n hai idhar peshaanii-e-sub.h-e-bahaar
yuu.n nigaar-e-mahr tere saamne aayaa to kyaa
la.Dkha.Daataa sar jhukaa.e zard ruu siimaab-vaar
KHaamushii terii adaa hai, saadgii fitrat me.n hai
phir bhii jo teraa hariif-e-husn hai, hairat me.n hai
ai gul-e-naazuk-adaa, ai KHanda-e-sub.h-e-chaman
chuumtii hai tere ho.nTo.n ko nasiim-e-mushk-e-tan
gher le.n jaise uruus-e-nau ko ham-sin la.Dkiyaa.n
yuu.n tujhe ghere hu.e hai.n nau-nihaalaan-e-chaman
vaadiyo.n me.n tuu, bayaabaano.n me.n tuu, bastii me.n tuu
raunaq-e-har-mahfil o ziinat-dah-e-har-anjuman
ye adaa-e-saadgii, mahbuubiyat, ma.asuumiyat
tuu rah-e-hastii me.n kis andaaz se hai gaamzan
josh-e-sarmastii me.n vo mauj-e-sabaa kii chhe.D-chhaa.D
vo tire aariz pe ik halke tabassum kii shikan
tuu zamiin-e-ra.ng-o-buu, tuu aasmaan-e-ra.ng-o-buu
muKHtasar ye hai ki tuu hai ik jahaan-e-ra.ng-o-buu

Moin Ahsan Jazbi
Nazm

gamzan

kabhii retiile KHushk maidaan me.n
ko.ii baadal kaa aavaara Tuk.Daa
kisii ghar se bhaage hu.e pyaare bachche kii maanind
aavaargii kartaa kartaa
zamaano.n se suukhii hu.ii ret ko pyaar se dekhtaa hai

Shahzad Ahmad
Nazm

idrak

vaqt dariyaa kii maanind bahtaa rahegaa sadaa
jagmagaate rahe.nge sitaare
yuu.nhii shab kii poshaak me.n
gul khilaatii rahegii havaa
taa-abad aab me.n, KHaak me.n
iistaada rahe.nge KHayaabaa.n KHayaabaa.n
ye sarv-o-sanobar yuu.nhii
saahilo.n par yuu.nhii
la.ngar-andaaz ho.nge jahaaz
aur bachche yuu.nhii siipiyaa.n chun.ne
aate rahe.nge sadaa
yuu.nhii mela rahegaa
zamaane ke kuucho.n me.n
baazaar me.n!
aur insaan zinda rahegaa sadaa
ek paikaar me.n
ik zamaane talak ham bhii sab kii tarah
yuu.nhii sochaa kiye
yuu.nhii samjhaa kiye
aur shab-o-roz kaa be-nishaa.n qaafila
parda-e-Gaib me.n
gum-shuda manzilo.n kii taraf
KHaamushii se rahaa gaamzan
zindagii me.n achaanak phir ik roz
ik haadsa ho gayaa
jis kii shiddat se ik umr kaa
sehar-e-fikr-o-nazar TuuT bikhraa
to aaKHir ye uqda khulaa
vaqt dariyaa hai lekin ye KHud
ik samundar me.n jaa girtaa hai
us samundar kii jaanib hai
hastii kaa saaraa safar
aa.nkh ne aaj tak jitne manzar bhii dekhe
vo sab us ke
apne taraashiida the
aur dil me.n dha.Daktaa hu.aa
tajriid-e-vahm-o-gumaa.n ke sivaa kuchh nahii.n
aarzu-e-Gam-e-aagahii aisii arzaa.n nahii.n
ziist ke duusre raasto.n kii tarah
raah-e-kaar-e-junuu.n itnii aasaa.n nahii.n
hai bulandii kii jaanib agar zindagii kaa safar
phir to kuchh aur hai.n manzile.n aadmii ke liye
jin ke har gaam par, zindagii ke liye
hai sabaat-e-abad muntazir
aap-apnii nafii ke amal se
guzarnaa pa.Degaa use
mahbas-e-aab-o-gil se
nikalnaa pa.Degaa use

Mubeen Mirza
Nazm

koi kuchh nahin?

jaane aaj kyuu.n vahii
dhaage merii shaah-rag me.n
duur tak dha.nse hu.e
vo siraa hii mai.n ne kho diyaa
jis se log
uljhe suljhe taane-baane khol kar
yuu.n alag nikal ga.e
jaise vaqt kuchh nahii.n
vo saare raaste
jin pe gaamzan rahe
vo saare ham-safar
jo saath saath chal rahe the
kuchh nahii.n
ko.ii kuchh nahii.n

Qazi Saleem
Nazm

banjh si lagne lagi hai

vaapsii par
raat ke kaale siyah jhuule me.n leTe
us ne sochaa thaa
ki vo bhii
duusro.n kii tarah
ha.nstii gungunaatii zindagii se
uns kii dahliiz par jaa kar milegaa
puuchhegaa us se
kiran suuraj kii kaise
chuumtii hai phuul ko
aur jagmagaa detii hai miTTii dhuul ko
ThanDii havaa kyaa hai
ghaTaa kyaa hai
parinde chahchahaate kis adaa se hai.n
magar kuchh bhii hu.aa aisaa nahii.n
vo aaj bhii
viiraan khi.Dkii se u.Daa kar
KHvaab kii sab raakh
jaltii dhuup ko sar par sameTe
andhe bahre guu.nge
ehsaasaat se mamluu
safar par gaamzan
phir ho gayaa hai
aur us kii soch
bilkul baa.njh sii lagne lagii hai

Jafar Sahni
Nazm

rail chalne lagi

sar-niguu.n sabz jhan.Dii kaa halkaa phareraa fazaao.n me.n lahraa gayaa
bench par os me.n bhiige patto.n kii chaadar ko jho.nke u.Daa le ga.e
rail kii pTriyo.n par udaasii kii guu.nje.n badan kii sura.ngo.n se yak-laKHt baahar nikalne lagii.n
whistle bajne lagii
rail chalne lagii
dil-girafta musaafir ka.ii manzilo.n kii aziyyat ke paikar me.n Dhalne lage
ek maa.n ne du.aa.o.n se labrez boso.n-bharii thaaliyo.n ko
kisii ja.ng par gaamzan apne beTe kii jholii me.n ulTaa diyaa
ek aurat kii chhaatii pe
sadiyo.n kii Thahrii hu.ii ik udaasii ke be-jaan pahiye guzarne lage
do baras ke farishte ke aa.nsuu gire
whistle bajne lagii
KHushnumaa zindagii ke dupaTTe javaa.n aurato.n ke saro.n se Dhalakne lage
be-ridaa ek la.Dkii ne KHaakistarii bag pak.De hu.e
duur kheto.n me.n KHaamosh logo.n ko ruKHsat kiyaa
ik na.ii mauj phir se dariida badan me.n ubharne lagii
ek rauzan se dohrii havaa.o.n ke jho.nke guzarne lage
bhii.D kii be-KHayaalii bharii rail me.n phir ubalne lagii
ek ThanDii udaasii usii bench par phir utarne lagii
whistle bajne lagii
rail chalne lagii

Irfan Shahood
Nazm

aaKHiri din nazdik hai

mujhe ye chaa.ndnii bhii ab
bahut achchhii nahii.n lagtii
kisii chehre pe
vo surKHii shafaq jaisii
nahii.n miltii
mujhe ma.asuum bachcho.n kaa humaknaa aur
uchhalnaa kuudnaa
kilkaariyaa.n lenaa
bhii sab be-kaif lagtaa hai
ki
ab ik duusre ke Gam me.n bhii
aa.nsuu bahaanaa
bhuul baiThe hai.n
ki ab to sirf
baaruudii dhamaako.n
atomii KHatro.n kii baato.n me.n
bahut saamaan-e-sarshaarii hai kyuu.n aaKHir
ye kis manzil kii jaanib gaamzan hai.n sab

Saeed Arifi
Nazm

jazbaat nafsiyat se baala-tar hain

yaado.n ke hisaar me.n jak.De vajuud pe
shab ne aaKHirii dastak dii
aa.nkh ke saatve.n parde pe ik aks
musalsal tair rahaa hai
jis ke baa.is
nii.nd ko izn-e-haazirii nahii.n milaa
hamaarii baato.n ke saare sur sun.ne vaalaa
niim kaa daraKHt
aur a.nguuThii me.n ja.Daa aqiiq
ek jaise hai.n
dil pe iztiraarii kaifiyat taarii hai
dimaaG taviil masaafat kii jaanib gaamzan hai
be-KHayaalii me.n
ham saaraa din ik duusre ke
naamo.n me.n sabz rang bharte hai.n
is surKH daa.ere me.n
chhupe raaz ko jaan.ne pe kaam jaarii hai
Dhaltii shaam ke saa.e se mere ufuq
siyaah hone lage
jazbo.n kii sadaaqat kaa daa.era
jab mukammal hu.aa to
lams kaa rang ban.ne lagaa
mirii zaat ke madaar me.n ik naam kaa raqs jaarii hai
siyaah gulaab ke jazbaat kii akkaasii
ilm-e-nafsiyaat se baalaa-tar hai

Omainuz Zahra Sayyad
Nazm

sag-e-ham-safar aur main

ek din
daf-e-aaseb o raf-e-balaa ke liye
kuchh pur-asraar fiqro.n kii gardaan kartaa hu.aa
jaada-e-KHauf par gaamzan thaa
mai.n apne shabistaa.n kii jaanib
ki ik larzish-e-naa-gahaa.n se guzarnaa pa.Daa
to andhe zamaano.n kii sahraa-navardii ke aaKHir me.n
vo ek taariik lamha thaa jab
sag-e-ham-safar aur mai.n
maa.nda o gursana
yahaa.n is ilaaqe me.n vaarid hu.e
aur a.ndhere me.n kuchh faasle par tirii raushnii dekh kar
raqs karne lage
sag-e-ham-safar aur mai.n
sag-e-ham-safar aur mai.n

Rais Farogh
Nazm

wal-asr

ujaalaa taariikii me.n muntaqil hotaa dekh kar
banjar zehn par
KHud-saaKHta uge
sumuudii daraKHt kii uj.Dii Tahniyo.n par jumbish
naqqaara-e-zaat hai
zarKHez savaal kaa paanii cho.nch me.n bhare
rangiin parinda pyaas kii vaadii me.n numuudaar hu.aa
visaal kyo.n hijr kii jaanib gaamzan hai
shabaab par zardii kaisii
naachtii KHushiyaa.n
Gam KHushbuu se lipTii
ehtimaal-aamez hai.n
zindagii kaa diyaa
siyaah saa.e tale TimTimaa rahaa hai
din-bhar re.ngte hu.e suuraj ne
aavaaza lagaayaa
val-asr
aur mujh se
innal-insaana lafii KHusr
kii tafsiir kalaam karne lagii

Omainuz Zahra Sayyad
Nazm

pasban-e-urdu

kahe.n na kyuu.n ai qavii tujhe ham ba-sidq-e-dil paasbaan-e-urdu
banaa hai terii hii sa.ii-o-kaavish se saifiya gulsitaan-e-urdu
nafas nafas me.n tire yaqiinan basii hai buu-e-zabaan-e-urdu
tirii navaa hai navaa-e-urdu tiraa bayaa.n hai bayaan-e-urdu
dikhaa.ii.n bhopal ko tire hii junuu.n ne jahd-o-amal kii raahe.n
vagarna maayuus ho chuke the yahaa.n ke chaara-garaan-e-urdu
vajuud teraa sabhii ke haq me.n hai chashma-o-aabshaar-o-dariyaa
bujhaate hai.n pyaas apnii apnii tujhii se sab tishnigaan-e-urdu
ise zamaana-shanaasii terii na ham kahe.nge to kyaa kahe.nge
banaa diyaa 'saifiya' ko tuu ne jo ek daarul-amaan-e-urdu
tujhii se shahr-e-Gazal ko iqbaaliyaat kii manzile.n milii hai.n
tire hii azm-o-amal se hai gaamzan yahaa.n kaarvaan-e-urdu
tiraa ujaalaa miTaa rahaa hai shab-e-jahaalat kii tiirgii ko
chamak rahaa hai tuu ban ke bhopal me.n mah-e-aasmaan-e-urdu
khilaa.e hai.n shaaKH shaaKH tuu ne yahaa.n pe nutq-o-navaa ke Gunche
Galat nahii.n hai jo kah rahe hai.n sabhii tujhe KHush-bayaan-e-urdu
tire azaa.em kii istaqaamat pe sar-ba-kaf hai.n hariif tere
KHushaa ki tere javaan haatho.n me.n aaj bhii hai kamaan-e-urdu
sad-aafrii.n terii himmato.n par sad-aafrii.n terii jur.ato.n par
sunaa.ii hai bazm-e-Gair me.n tuu ne baarhaa daastaan-e-urdu
ye kam nahii.n hai ki mo'tarif hai tirii basiirat kaa ye zamaana
rahaa hai sad.haa KHuluus-e-dil se tuu shaamil-e-aashiqaan-e-urdu
ravaa.n hai.n taqriir aur tahriir se tirii aagahii ke chashme
tiraa qalam hai vaqaar-e-urdu tirii zabaa.n tarjumaan-e-urdu
mujalla 'Gaalib' pe kar ke shaa.e kiyaa hai be-shak kamaal tuu ne
jahaan-e-ilm-o-adab ke haq me.n hai KHuub ye armuGaan-e-urdu
na.e na.e gul khilaa rahaa hai adab me.n tere qalam kaa jaaduu
tirii faraasat ke mo'tarif hai.n tamaam-tar nukta-daan-e-urdu
agarche raaho.n me.n terii haa.il hu.e hai.n diivaar ban ke aksar
magar tire azm-o-hausla se KHajil hai.n sab haasidaan-e-urdu
ye terii koshish hifaazato.n kii ye teraa jazba salaamtii kaa
na ho to urdu ko bech khaa.e.n zaraa me.n ye taajiraan-e-urdu
misaal-e-KHurshiid tuu ne baKHshii hai raushnii jin ko ilm-o-fan kii
chamak rahe hai.n adab ke garduu.n pe ban ke vo aKHtaraan-e-urdu
jo tere fan ke amiin ban kar fazaa-e-aalam pa chhaa ga.e hai.n
ba.Dii aqiidat se dekhte hai.n tujhe vo shaa.istagaan-e-urdu
ujaalaa karte rahe.nge yuu.nhii charaaG ban kar rah-e-talab me.n
har ik qadam par jo tuu ne chho.De hai.n jagmagaate nishaan-e-urdu
kahaa hai tuu ne bhii baarhaa KHud yahii.n palii hai yahii.n ba.Dhii hai
kisii zabaa.n kii hariif hargiz yahaa.n nahii.n hai zabaan-e-urdu
tire jihaad-o-amal ke sadqe yaqiin hai ai qavii ye ham ko
isii tarah tuu banaa rahegaa yahaa.n sadaa paasbaan-e-urdu

Rahbar Jaunpuri
Nazm

sach

mere chaaro.n taraf
daa.era daa.era
ik fusuu.n hayaat tarah-daar hai
zindagii gaamzan hai usii nahaj par
sach kii tarviij me.n
aur laTkii hu.ii
sar pe talvaar hai

Yaqoob Tasawwur
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now