Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gheraa"

Nazm MATCHES FOR "gheraa"

Nazm

sapna aage jata kaise

chhoTaa saa ik gaa.nv thaa jis me.n
diye the kam aur bahut a.ndheraa
bahut shajar the tho.De ghar the
jin ko thaa duurii ne gheraa
itnii ba.Dii tanhaa.ii thii jis me.n
jaagtaa rahtaa thaa dil meraa
bahut qadiim firaaq thaa jis me.n
ek muqarrar had se aage
soch na saktaa thaa dil meraa
aisii suurat me.n phir dil ko
dhyaan aataa kis KHvaab me.n teraa
raaz jo had se baahar me.n thaa
apnaa-aap dikhaataa kaise
sapne kii bhii had thii aaKHir
sapnaa aage jaataa kaise

Muneer Niyazi
Nazm

jamhuriyat

saik.Do.n hasan naasir
hai.n shikaar nafrat ke
sub.h-o-shaam luTte hai.n
qaafile mohabbat ke
jab se kaale baaGo.n ne
aadmii ko gheraa hai
mish.ale.n karo raushan
duur tak a.ndheraa hai
mere des kii dhartii
pyaar ko tarastii hai
pattharo.n kii baarish hii
is pe kyuu.n barastii hai
mulk ko bachaa.o bhii
mulk ke nigahbaano
das karo.D insaano!
bolne pe paabandii
sochne pe ta.aziire.n
paa.nv me.n Gulaamii kii
aaj bhii hai.n zanjiire.n
aaj harf-e-aaKHir hai
baat chand logo.n kii
din hai chand logo.n kaa
raat chand logo.n kii
uTh ke dard-mando.n ke
sub.h-o-shaam badlo bhii
jis me.n tum nahii.n shaamil
vo nizaam badlo bhii
dosto.n ko pahchaano
dushmano.n ko pahchaano
das karo.D insaano!

Habib Jalib
Nazm

barsat ki bahaaren

gaatii hai giit ko.ii jhuule pe kar ke pheraa
maaro jii aaj kiijiye yaa.n rain kaa baseraa
hai KHush kisii ko aa kar hai dard-o-Gam ne gheraa
mu.nh zard baal bikhre aur aa.nkho.n me.n a.ndheraa
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

man tere jaane ke baad

kaun ab mere liye dast-e-du.aa phailaa.egaa
kis tarah aafaat kaa sadqa utaaraa jaa.egaa
kaun marham zaKHm-e-jaa.n par pyaar se rakh paa.egaa
dard kii shiddat me.n merii piiTh ko sahlaa.egaa
ranj-o-Gam ne mujh ko gheraa maa.n tire jaane ke baa'd
dam ghuTaa jaataa hai meraa maa.n tire jaane ke baa'd

Shahnaz Parveen Shazi
Nazm

andheri raat ka musafir

ufuq par zindagii ke lashkar-e-zulmat kaa Deraa hai
havaadis ke qayaamat-KHez tuufaano.n ne gheraa hai
jahaa.n tak dekh saktaa huu.n a.ndheraa hii a.ndheraa hai
magar mai.n apnii manzil kii taraf ba.Dhtaa hii jaataa huu.n

Asrarul Haq Majaz
Nazm

ibn-e-maryam

tum KHudaa ho
KHudaa ke beTe ho
yaa faqat amn ke payambar ho
yaa kisii kaa hasii.n taKHayyul ho
jo bhii ho mujh ko achchhe lagte ho
mujh ko sachche lagte ho
us sitaare me.n jis me.n sadiyo.n ke
jhuuT aur kizb kaa a.ndheraa hai
us sitaare me.n jis ko har ruKH se
re.ngtii sarhado.n ne gheraa hai
us sitaare me.n jis kii aabaadii
amn botii hai ja.ng kaaTtii hai
raat piitii hai nuur mukh.Do.n kaa
sub.h siino.n kaa KHuun chaaTtii hai
tum na hote to jaane kyaa hotaa
tum na hote to us sitaare me.n
devtaa raakshash Gulaam imaam
paarsaa ri.nd raahbar rahzan
barhaman shaiKH paadrii, bhikshuu
sabhii hote magar hamaare liye
kaun cha.Dhtaa KHushii se suulii par

Kaifi Azmi
Nazm

bahrupni

aur kahtii hai jhaa.nk kar dil me.n
teraa maz.hab, tiraa aziim KHudaa
terii tahziib ke hasiin sanam
sab ko KHatre ne aaj gheraa hai
ba.ad un ke jahaa.n a.ndheraa hai

Kaifi Azmi
Nazm

aao phir se diya jalaen

aahuutii baaqii yagya adhuuraa
apno.n ke vighno.n ne gheraa
antim jai kaa vajr banaane nau dadhichii haDDiyaa.n galaa.e.n
aa.o phir se diyaa jalaa.e.n

Atal Bihari Vajpayee
Nazm

kitaben

samajhtaa hai ise saaraa zamaana
kitaabe.n ilm-o-hikmat kaa KHazaana
dilo.n kaa nuur hai.n achchhii kitaabe.n
charaaG-e-tuur hai.n achchhii kitaabe.n
hamaarii muunis o Gam-KHvaar hai.n ye
jihaad-e-ilm kii lalkaar hai.n ye
kitaabe.n kyaa hai.n ruuhaanii KHudaa hai.n
sakuu.n dil kaa davaa.o.n kii davaa hai.n
hamaarii kyuu.n na ho manzil kitaabe.n
rasuulo.n par hu.ii.n naazil kitaabe.n
kitaabo.n se hai jis kii aashnaa.ii
ba.Dii daulat jahaa.n me.n us ne paa.ii
kitaabe.n kaamyaabii kaa hai.n ziina
rakhe.n aabaad ye dil kaa madiina
kitaabo.n kii rifaaqat bhii ajab hai
ta.alluq to.Dnaa in se Gazab hai
sadaaqat kaa yahii rasta dikhaa.e.n
buro.n ko bhii yahii achchhaa banaa.e.n
sikhaatii hai.n ye jiine kaa tariiqa
bataatii hai.n hame.n kyaa hai saliiqa
kisii ne mu.nh kitaabo.n se jo pheraa
yaqiinan us ko zillat ne hai gheraa
kitaabo.n se agar KHaalii makaa.n hai
vo hai bhuuto.n kaa maskan ghar kahaa.n hai
kitaabo.n se halaavat guftuguu me.n
sharaafat kaa asar baaqii lahuu me.n
kitaabo.n se jahaa.n me.n naam zinda
hamaarii sub.h zinda shaam zinda
kitaabo.n se sadaa rishta ba.Dhaa.o
isii me.n zindagii apnii lagaa.o

Zafar Kamali
Nazm

meri bachchi

merii bachchii mai.n aa.uu.n na aa.uu.n
aane vaalaa zamaana hai teraa
tere nanhe se dil ko dukho.n ne
mai.n ne maanaa ki hai aaj gheraa
aane vaalaa zamaana hai teraa

Habib Jalib
Nazm

chaar musafir

nikle safar ko paidal vo chaar ham-safar the
sab apne raaste aur manzil se baa-KHabar the
ik falsafii thaa un me.n duusraa thaa naa.ii
phir tiisraa sipaahii ganjaa thaa jis kaa bhaa.ii
ja.ngal me.n raat aa.ii laazim thaa un ko sonaa
le kar chale the apne vo o.Dhnaa bichhaunaa
so.e kuchh is tarah vo us me.n hoshiyaarii
har ek kaa thaa pahraa do ghanTe baarii baarii
pahle sipaahii jaagaa phir aadhii raat aa.ii
vo so gayaa to pahraa dene lagaa thaa naa.ii
lambe the aur ghane the jo baal us ke sar par
naa.ii ne muu.nD Daale tez usturaa pher kar
bedaar falsafii ko kar ke ye bolaa naa.ii
baarii ab aap kii hai uTh jaa.o mere bhaa.ii
jab haath falsafii ne cha.ndiyaa pe apnii pheraa
aape se ho ke baahar naa.ii ko us ne gheraa
ye kyaa Gazab kiyaa hai naahaq use uThaayaa
baarii thii falsafii kii ganje ko kyo.n jagaayaa

Aafaque Siddiqui
Nazm

ras ki anokhi lahren

mai.n ye chaahtii huu.n ki duniyaa kii aa.nkhe.n mujhe dekhtii jaa.e.n yuu.n dekhtii jaa.e.n jaise
ko.ii pe.D kii narm Tahnii ko dekhe
lachaktii hu.ii narm Tahnii ko dekhe
magar bojh patto.n kaa utre hu.e pairahan kii tarah sach ke saath hii farsh par ek maslaa hu.aa
Dher ban kar pa.Daa ho
mai.n ye chaahtii huu.n ki jho.nke havaa ke lipaTte chale jaa.e.n mujh se
machalte hu.e chhe.D karte hu.e ha.nste ha.nste ko.ii baat kahte hu.e laaj ke bojh
se rukte rukte sambhalte hu.e ras kii ra.ngiin sargoshiyo.n me.n
mai.n ye chaahtii huu.n kabhii chalte chalte kabhii dau.Dte dau.Dte ba.Dhtii jaa.uu.n
havaa jaise nadii kii lahro.n se chhuute hu.e sarsaraate hu.e bahtii jaatii hai ruktii
nahii.n hai
agar ko.ii panchhii suhaanii sadaa me.n kahii.n giit gaa.e
to aavaaz kii garm lahre.n mire jism se aa ke Takraa.e.n aur lauT jaa.e.n Thaharne na paa.e.n
kabhii garm kirne.n kabhii narm jho.nke
kabhii miiThii miiThii fusuu.n-saaz baate.n
kabhii kuchh kabhii kuchh na.e se nayaa rang ubhre
ubharte hii tahliil ho jaa.e phailii fazaa me.n
ko.ii chiiz mere masarrat ke ghere me.n rukne na paa.e

Meeraji
Nazm

kachhwa aur KHargosh

ek kachhve ke aa ga.ii jii me.n
kiijiye sair o gasht KHushkii kii
jaa rahaa thaa chalaa hu.aa KHaamosh
us se naahaq ulajh pa.Daa KHargosh
miyaa.n kachhve! tumhaarii chaal hai ye
yaa ko.ii shaamat aur vabaal hai ye
yuu.n qadam phuu.nk phuu.nk dharte ho
goyaa uttuu zamii.n pe dharte ho
kyuu.n hu.e chal ke muft me.n bad-naam
be-chale kyaa aTak rahaa thaa kaam
tum ko ye hausla na karnaa thaa
chulluu paanii me.n Duub marnaa thaa
ye tan-o-tosh aur ye raftaar
aisii raftaar par KHudaa kii maar
bolaa kachhvaa ki ho.n KHafaa na huzuur
mai.n to huu.n aap mo'tarif ba-qusuur
agar aahistagii hai jurm-o-gunaah
to mai.n KHud apne jurm kaa huu.n gavaah
mujh ko jo saKHt sust farmaayaa
aap ne sab durust farmaayaa
mujh ko Gaafil magar na jaaniyegaa
banda-parvar buraa na maaniyegaa
yuu.n zabaanii javaab to kyaa duu.n
shart bad kar chalo to dikhlaa duu.n
tum to ho aaftaab me.n zarra
par miTaa duu.ngaa aap kaa Gurra
sun ke KHargosh ne ye talKH javaab
kahaa kachhve se yuu.n zi-ruu-e-itaab
tuu kare merii ham-sarii kaa KHayaal
terii ye taab ye sakat ye majaal
chyuu.nTii ke jo par nikal aa.e
to yaqii.n hai ki ab ajal aa.e
are bebaak! bad-zabaa.n mu.nh-phaT
tuu ne dekhii kahaa.n hai dau.D jhapaT
jab mai.n tezii se jast kartaa huu.n
shahsavaaro.n ko past kartaa huu.n
gard ko merii baad-e-paa na lage
laakh dau.De miraa pata na lage
rail huu.n barq huu.n chhalaavaa huu.n
mai.n chhalaave kaa balki baavaa huu.n
terii merii nibhegii sohbat kyaa
aasmaa.n ko zamii.n se nisbat kyaa
jis ne bhugte ho.n turkii o taazii
aaise mariyal se kyaa bade baazii
baat ko ab ziyaada kyaa duu.n tuul
KHair kartaa huu.n terii shart qubuul
hai munaasib ki imtihaa.n ho jaa.e
taaki aib o hunar ayaa.n ho jaa.e
al-Garaz ik maqaam Thahraa kar
hu.e dono.n hariif garm-e-safar
bas-ki zoro.n pe thaa cha.Dhaa KHargosh
tezii phurtii se yuu.n ba.Dhaa KHargosh
jis tarah jaa.e top kaa golaa
yaa gire aasamaan se olaa
ek do khet chauk.Dii bhar ke
apnii chustii pe aafrii.n kar ke
kisii goshe me.n so gayaa jaa kar
fikr ''kyaa hai chale.nge sustaa kar''
aur kachhvaa Gariib aahista
chalaa siine ko KHaak par ghistaa
suu.ii ghanTe kii jaise chaltii hai
yaa ba-tadriij chhaa.nv Dhaltii hai
yuu.nhii chaltaa rahaa ba-istiqlaal
na kiyaa kuchh idhar udhar kaa KHayaal
kaam kartaa rahaa jo pai-dar-pai
kar gayaa rafta rafta manzil tai
haif KHargosh rah gayaa sotaa
samra Gaflat kaa aur kyaa hotaa
jab khulii aa.nkh to saveraa thaa
saKHt sharmindagii ne gheraa thaa
sabr o mohabbat me.n hai sar-afraazii
sust kachhve ne jiit lii baazii
nahii.n qissa ye dil-lagii ke liye
balki ibrat hai aadmii ke liye
hai suKHan is hijaab me.n ruu-posh
varna kachhvaa kahaa.n kahaa.n KHargosh

Ismail Merathi
Nazm

chautha aadmi

baiThe baiThe yuu.nhii qalam le kar
mai.n ne kaaGaz ke ek kone par
apnii maa.n
apne baap ke do naam
ek gheraa banaa ke kaaT diye
aur
is gol daa.ere ke qariib
apnaa chhoTaa saa naam Taa.nk diyaa
mere uThte hii, mere bachche ne
puure kaaGaz ko le kar phaa.D diyaa!

Nida Fazli
Nazm

mohabbat

tujh ko gar merii zaruurat hai
to phir jaan-e-hayaat
apne farsuuda mohabbat ke KHayaalaat badal
hijr o Gam ra.nj-o-alam vasl o firaaq
is kaThin vaqt me.n
bejaa sii shikaayaat na kar
dekh vo sab bhii to mai.n
dekh ki pahu.nchaa huu.n yahaa.n
jis ko tuu dekh le ik baar
to terii aa.nkhe.n
umr bhar sakte ke aalam se na nikal paa.e.n
dekh mai.n is ajab maqaam pe
aane se qabl
aisii raaho.n se guzar aayaa huu.n
jahaa.n se tuu
ek pal ko bhii jo guzre
to tere zaKHm-e-paa
ban ke naasuur tujhe
dard me.n rakkhe.n har dam
dekh mai.n chaahat-o-ulfat kaa to qaa.il magar
har ek chiiz har ek rishta zamaane me.n
mohabbat hai magar....
dekh is vaqt mere des me.n
phailii hu.ii hai
har taraf KHuun kii baaruud kii
nafrat kii phuvaar
sun zaraa kone me.n rote hu.e
bachche kii pukaar
dekh baaruud ke haatho.n se ye
luth.Daa hu.aa jism
dekh rozii ko bhaTaktaa hu.aa
bachcho.n kaa vo baap
dekh phir so ga.e
is des ke bachche bhuuke
dekh us maa.n kii taraf dekh
ki jis kii aa.nkhe.n
nazre.n kho baiThii hai.n rote hu.e
us aas pe ki
lauT aa.egaa vo us kaa
javaan la.al kabhii
ghar se niklaa thaa jo
haatho.n me.n degreeyo.n ko liye...
aaj tak lauT ke aayaa nahii.n
umre.n biitii.n...
mujh ko ye dard rakhaa karte hai.n
niindo.n se pare....
soch is dard me.n
chaahat kii kise KHvaahish ho
soch is dard me.n raahat kii
kise KHvaahish ho
mujh ko jo karnaa hai
vo ab un ke liye karnaa hai
mujh ko jiinaa hai to bas
un ke liye jiinaa hai
mai.n ne maanaa ki nahii.n aur ko.ii
tujh saa hasii.n...
par mujhe soch kii
is lahr ne aa gheraa hai
jis se chhuTkaaraa merii jaan
ab mumkin hii nahii.n
tujh ko gar merii zaruurat hai
to phir jaan-e-hayaat
apne farsuuda mohabbat ke KHayaalaat badal
haath me.n haath de
aur phir tuu mere saath me.n chal...

Nadeem Gullani
Nazm

aa lagi hai ret

aa lagii hai ret diivaaro.n ke saath
saare darvaazo.n ke saath
surKH ii.nTo.n kii chhato.n par re.ngtii hai
niilii niilii khi.Dkiyo.n se jhaa.nktii hai
ret
ret ruk jaa
khel tai kar le.n
sunahre taash ke patto.n se darzo.n
rauzano.n ko band kar le.n ret
ruk jaa
sust barsaate.n ki jin par dau.D pa.Dnaa
jin ko daa.nto.n me.n chabaa lenaa
ko.ii mushkil na thaa
tuu ne vo saarii nigal Daalii hai.n raat
raat ham ha.nste rahe ai ret
tuu diivaanii billii thii jo apnii dum ke piichhe
ghuumtii jaatii thii
us ko chaaTtii jaatii thii raat
ret kii ik umr hai ik vaqt hai
lekin hame.n
KHud se judaa kartii chalii jaatii hai ret
naa-gahaa.n ham sab pe chhaa jaane kii KHaatir
ye hamaarii maut ban kar taaza kar detii hai
yaade.n duur kii yaa der kii
ret ko muTThii me.n le kar dekhte hai.n
apne poro.n se use chhante hu.e
ham dekhte hai.n
apne paa.nv me.n phisalte dekhte hai.n
ret par chalte hu.e
apne gesuu se aT jaate hai.n
bhar jaate hai.n pairaahan
hamaare baatino.n ko chiirtii jaatii hai ret
phailtii jaatii hai jism-o-jaa.n ke har-suu
ham pe gheraa Daaltii jaatii hai
ret
ret ik musbat nafii thii
ret sarhad thii kabhii
ret aarif kii aziyyat kaa badal thii
aa.nsu.o.n kii Gam kii pahnaa.ii thii ret
apnii juu.yaa.ii thii ret
ret me.n har-kas the ham
duusraa ko.ii na thaa
ret vo duniyaa thii jis par dushmano.n kii
mohr lag saktii na thii
us ko apnaa tak ko.ii saktaa na thaa
ret par ham sun rahe hai.n aaj
piiraana-sarii kii apnii tanhaa.ii
kii chaap
din ke saahil par utar kar
aane vaalii raat ke tuude lagaatii
jaa rahii hai
naa-gahaa.n kii be-nihaayat ko u.Daa laa.ii hai
ret
dil ke suune-pan me.n dar aa.ii hai
ret
ret

Noon Meem Rashid
Nazm

karachi

KHudaa.ii ke chakkar me.n aisaa ghiraa hai
ki banda KHudaa se yahaa.n be-KHabar hai

Abul Fitrat Meer Zaidi
Nazm

nazr-e-firaq

ai dil-e-kaafir ijz se munkir aaj tiraa sar KHam kyuu.n hai
terii haTelii shiryaano.n me.n ye bebas maatam kyuu.n hai
aa.nkh to ronaa bhuul ga.ii thii phir har manzar nam kyuu.n hai
mat roko bahne do aa.nsuu kisii ko karte hai.n parnaam
aap jhukaa hai jhukne do sar chhupaa thaa us me.n ko.ii salaam
shaayad us ke huzuur me.n ho tum jis ko kahte hai.n anjaam
vo hastii kii sarhad-e-aaKHir hu.aa jahaa.n har safar tamaam
bebas hai insaa.n bebas hai taktii rah ga.ii rotii shaam
uTh gayaa ko.ii bharii duniyaa se baaqii rahe KHudaa kaa naam
yaa phir kaaGaz par parchhaa.ii.n milegaa jis ko sabt-e-davaam
ye Tuk.De insaanii dil ke shaa.er aur shaa.er kaa kalaam
naaz karuu.ngii KHush-baKHtii me.n mai.n ne 'firaaq' ko dekhaa thaa
uj.De ghar me.n vo tahziibo.n ke sa.ngam par baiThaa thaa
garm ham-aaGoshii sadiyo.n kii hogii kitnii pyaar bharii
jis kii baa.nho.n me.n khelii thii us kii soch kii sundartaa
sher kaa dil shaffaaf thaa itnaa jaise aa.iina-e-taariiKH
kyaa bhar puur visaal thaa jis ne us shaa.er ko janm diyaa
gar taariiKH ne paagal ho kar KHud apnaa sar pho.Daa hai
KHuun uchhaalaa hai galiyo.n me.n apnaa hanDolaa to.Daa hai
chhii.nT na thii daaman par us ke kaun ghaaT dho baiThaa thaa
jise samajhte ho naa-mumkin vo us insaa.n jaisaa thaa
insaa.n bhii itnaa maamuulii jaise apnaa ham-saaya
apne sher sunaanaa us kaa aur KHud hairaa.n ho jaanaa
baato.n me.n maasuum mahak thii aa.nkho.n me.n bechain lapak
KHaamoshii ke vaqfe yuu.n jaise us ne kuchh dekhaa thaa
pii.D bahut jhelii thii us ne itnii baat to zaahir thii
lahja me.n shoKHii thii jaise raakh me.n chamke a.ngaara
sa.ngam ke paanii par mai.n ne dekhii thii kaisii tasviir
u.Daa lahak kar ik jal-panchhii khii.nch gayaa paanii pe lakiir
jamunaa kii niilii gahraa.ii bhed bharii chup se bojhal
ga.ngaa ke dhaare kii jumbish ujlii taaqat aur be-kal
is paanii me.n aks Daaltaa aasmaan kaa ik Tuk.Daa
miTTii ke but hare naariyal chandan lagaa ko.ii mukh.Daa
vo dhaaro.n par naav khetaa suukhaa panjar maa.njhii kaa
daan ke paise gintaa panDit taa.nba suuraj saa.njhii kaa
jamunaa par miinaar qila ke gumbad kaa tirchhaa saayaa
paaksitaan se aa.e muhaajir ge.nde kii TuuTii maalaa
paanii me.n chappuu kii shap shap baato.n ke TuuTe Tuk.De
yahii.n kahii.n par ham se ojhal sarasvatii bhii bahtii hai
jo samjhii jo aage samjhuu.n chhalak rahaa hai dil kaa jaam
vo manzar jo KHud se ba.Daa thaa us kaa gheraa tumhaare naam
ye kamre kaa maa.nd ujaalaa baahar huuk papihe kii
khi.Dkii par buu.ndo.n kii dastak saa.nse.n bhartii KHaamoshii
puurii baat nahii.n batlaataa guu.nge aa.nsuu ro denaa
terii dhartii sah na sakegii itne husn ko kho denaa
tanhaa aur apaahij buu.Dhe tujhe na marne de.nge log
abhii to jiivan baa.njh nahii.n hai phir tujh ko janme.nge log

Fahmida Riaz
Nazm

patthar

mai.n ik ma.asuum shahrii thaa
sharaafat se sabhii ke saath rahtaa thaa
mohazzab taur se jiitaa thaa
sab ke kaam aataa thaa
kabhii mai.n ne kisii kaa dil nahii.n to.Daa
kisii kaa sar nahii.n pho.Daa
kisii tarkash se ko.ii tiir kyaa tinkaa nahii.n chho.Daa
kisii kii piiTh me.n KHanjar nahii.n bho.nkaa
kisii ke jism par baaruud kaa golaa nahii.n phe.nkaa
kisii ko aag me.n mai.n ne nahii.n jho.nkaa
kisii kaa haq nahii.n maaraa
kisii kaa zar nahii.n luuTaa
ko.ii KHirman nahii.n phuu.nkaa
kisii building kisii gaa.Dii kisii mahfil me.n ko.ii bam nahii.n rakkhaa
mire haatho.n kisii kaa ghar nahii.n uj.Daa
kisii kaa dar nahii.n ukh.Daa
ko.ii kumba nahii.n bikhraa
ko.ii maathaa nahii.n siku.Daa
kisii kii raah me.n ro.Daa nahii.n aTkaa
kisii ke kaam me.n mai.n ne kabhii raKHna nahii.n Daalaa
kisii ke vaaste dil me.n kabhii kiina nahii.n paalaa
ko.ii farmaan haakim kaa kabhii mai.n ne nahii.n Taalaa
ko.ii gheraa nahii.n laa.nghaa
ko.ii aa.ngan nahii.n phaa.ndaa
magar phir bhii qayaamat mujh pe TuuTii hai
ajab Gaarat-garii kaa qahr barsaa hai
ajab saffaak KHanjar dil me.n utraa hai
ki merii ruuh ab tak tilmilaatii hai
ki meraa zehn ab bhii jhunjhunaataa hai
ki merii saa.ns ab bhii la.Dkha.Daatii hai
samajh me.n kuchh nahii.n aataa
ki mai.n ne kyaa bigaa.Daa hai
mire kis jurm kii mujh ko milii hai
ye sazaa aaKHir
ye gutthii kis tarah kholuu.n
sabab kis se yahaa.n puuchhuu.n
kidhar jaa.uu.n
kise rokuu.n
sabhii chehre yahaa.n patthar
sabhii aa.nkhe.n yahaa.n patthar
basaarat me.n bharaa patthar
samaa.at me.n basaa patthar
zabaano.n me.n ga.Daa patthar
adaalat me.n kha.Daa patthar
har ik qaanuun me.n patthar
har ik aa.iin me.n patthar
har ik insaaf me.n patthar
har ik aavaaz me.n patthar
har ik ehsaas me.n patthar
ye patthar yug ke patthar se bhii bhaarii hai
nagiine kii tarah tarshaa hu.aa hai
aur hiire kii anii kii tarah us kii tez noke.n hai.n
bahut shaffaaf hai ye aur is me.n ik tamaddun hai
mai.n is patthar se sar pho.Duu.n
ki apnii zindagii chho.Duu.n
ki apnaa raasta mo.Duu.n
ki ban jaa.uu.n mai.n KHud patthar
samajh me.n kuchh nahii.n aataa

Ghazanfar
Nazm

ism-e-ab

jo tuu tasviir kartaa hai
jo mai.n tahriir kartaa huu.n
na teraa hai na meraa hai
magar apnaa hai ye jab tak
ise pa.Dhne me.n kitnii der lagtii hai
abhii maahaul ko chaaro.n taraf se
habs ke sahraa ne gheraa hai
magar kab tak
havaa chalne me.n kitnii der lagtii hai
ko.ii zanjiir hai shaayad hamaare paa.nv me.n
aur raah me.n kaafii a.ndheraa hai
magar kab tak
diyaa jalne me.n kitnii der lagtii hai
havaa.e.n baadbaano.n se ulajhtii aur kahii.n naaqa-savaaro.n ko
ko.ii paiGaam detii shaam ke aa.nchal ko thaame
saahilo.n kii samt aatii hai.n
parinde daa.ero.n me.n u.Dte phirte
abr kii chaadar me.n lipTe
rang barsaate
fazaa.o.n me.n safar kii daastaa.n likhte
Thikaano.n kii taraf jaate hu.e
manzar ko apne aks me.n tabdiil karte hai.n
achaanak sar-phirii mauje.n
mujhe chhuu kar guzar jaatii hai.n
aur mai.n apne talvo.n se nikaltii sansanaatii riit kii sargoshiyaa.n
mahsuus kartaa huu.n
vahii mai.n huu.n vahii asbaab-e-vahshat hai.n vahii saahil
vahii tuu hai vahii ha.nstii hu.ii aa.nkhe.n
tirii aa.nkho.n me.n rango.n aur KHvaabo.n ke jaziire
jagmagaate hai.n
sar-e-mizhgaa.n rupahlii saa.ato.n ke isti.aare muskuraate hai.n
ha.nsii mahtaab bantii hai
phir is mahtaab ke chaaro.n taraf aavaaz kaa haala ubhartaa hai
aur is haale me.n terii u.ngliyaa.n
naadiida manzar ko tilism-e-KHvaab se aazaad kartii hai.n
tire haatho.n kii jumbish
dhuup chhaa.nv se dhanak tartiib de kar
KHaalii tasviiro.n me.n KHadd-o-KHaal ko aabaad kartii hai
tirii palke.n jhapaktii hai.n
sitaare se sitaara aan miltaa hai
ki jaise shaam hote hii
subuk aasaar lahro.n me.n
kinaare se kinaara aan miltaa hai
ye jo kuchh hai
bahut hii KHuubsuurat hai
magar us ke liye hai
jo ye sab mahsuus kartaa hai
tujhe maaluum bhii ho jaa.e to kyaa farq pa.Dtaa hai
abhii din kaa thakaa haaraa musaafir dhuup ke KHeme sameTe
duur paanii me.n utarne ke liye
be-taab hai dekho
ye niilaa aasmaa.n
apnii garaa.n KHvaabii me.n KHud Garqaab hai dekho
na jaane kyo.n
samundar dekhne vaalo.n ko
suuraj Duubne kaa KHauf rahtaa hai
ko.ii hai jis ko ism-e-aab aataa ho
kinaaro.n kii tarah har lamha kaT girtaa ho
zer-e-aab aataa ho
samundar aasmaa.n kii raahdaarii hai
magar is raahdaarii tak pahu.nchne kaa ko.ii rasta
ba.Dii mushkil se miltaa hai
ye ism-e-aab
saahil par kha.De nazzaara۔biino.n kii samajh me.n kis tarah aa.e
ki ye to Duubne vaalo.n pe bhii
mushkil se khultaa hai
magar kab tak
ise khulne me.n kitnii der lagtii hai

Saleem Kausar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now