Search result for "gi.dgi.daa.ii" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gi.dgi.daa.ii"

Nazm MATCHES FOR "gi.dgi.daa.ii"

Nazm

aadat

muddato.n mai.n ik andhe ku.e.n me.n asiir
sar paTaktaa rahaa gi.Dgi.Daataa rahaa
raushnii chaahiye، chaa.ndnii chaahiye، zindagii chaahiye
raushnii pyaar kii, chaa.ndnii yaar kii, zindagii daar kii
apnii aavaaz suntaa rahaa raat din
dhiire dhiire yaqii.n dil ko aataa rahaa
suune sansaar me.n
bevafaa yaar me.n
daamn-e-daar me.n
raushnii bhii nahii.n
chaa.ndnii bhii nahii.n
zindagii bhii nahii.n
zindagii ek raat
vaahima kaa.enaat
aadmii be-bisaat
log kotaah-qad
shahr shahr-e-hasad
gaa.nv in se bhii bad
in a.ndhero.n ne jab piis Daalaa mujhe
phir achaanak ku.e.n ne uchhaalaa mujhe
apne siine se baahar nikaalaa mujhe
saik.Do.n misr the saamne
saik.Do.n us ke baazaar the
ek buu.Dhii zuleKHaa nahii.n
jaane kitne KHariidaar the
ba.Dhtaa jaataa thaa yuusuf kaa mol
log bikne ko tayyaar the

Kaifi Azmi

Nazm

judai

shajar hajar pe hai.n Gam kii ghaTaa.e.n chhaa.ii hu.ii
subuk-KHiraam havaa.o.n ko nii.nd aa.ii hu.ii
rage.n zamii.n ke manaazir kii pa.D chalii.n Dhiilii
ye KHasta-haalii ye darmaandagii ye sannaaTaa
fazaa-e-niim-shabii bhii hai sansanaaii hu.ii
dhu.aa.n dhu.aa.n se manaazir hai.n shabnamistaa.n ke
sayyaara raat kii zulfe.n hai.n rasmasaa.ii hu.ii
ye rang taaro.n bharii raat ke tanaffus kaa
ki buu-e-dard me.n har saa.ns hai basaa.ii hu.ii
KHunuk udaas fazaa.o.n kii aa.nkho.n me.n aa.nsuu
tire firaaq kii ye Tiis hai uThaa.ii hu.ii
sukuut-e-niim-shabii gahraa hotaa jaataa hai
rage.n hai.n siina-e-hastii kii tilmilaa.ii hu.ii
hai aaj saaz-e-navaa-haa-e-KHuu.n-chakaa.n ai dost
hayaat terii judaa.ii kii choT khaa.ii hu.ii
mirii in aa.nkho.n se ab nii.nd parda kartii hai
jo tere panja-e-ra.ngii.n kii thii.n jagaa.ii hu.ii
sarishk paale hu.e tere narm daaman ke
nashaat tere tabassum se jagmagaa.ii hu.ii
laTak vo gesu.o.n kii jaise pech-o-taab-e-kamand
lachak bhavo.n kii vo jaise kamaa.n jhukaa.ii hu.ii
sahar kaa jaise tabassum damak vo maathe kii
kiran suhaag kii bi.ndii kii lahlahaa.ii hu.ii
vo a.nkh.Diyo.n kaa fusuu.n ruup kii vo deviyyat
vo siina ruuh-e-numuu jis me.n kanmanaa.ii hu.ii
vo sej saa.ns kii KHushbuu ko jis pe nii.nd aa.e
vo qad gulaab kii ik shaaKH lahlahaa.ii hu.ii
vo jhilmilaate sitaare tire pasiine ke
jabiin-e-shaam-e-javaanii thii jagmagaa.ii hu.ii
ho jaise but-kada aazar kaa bol uThne ko
vo ko.ii baat sii goyaa labo.n tak aa.ii hu.ii
vo dhaj vo dilbarii vo kaam-ruup aa.nkho.n kaa
sajal adaa.o.n me.n vo raagnii rachaa.ii hu.ii
ho KHvaab-gaah me.n sho.alo.n kii karvaTe.n dam-e-sub.h
vo bhairvii.n tirii bedaariyo.n kii gaa.ii hu.ii
vo muskuraatii hu.ii lutf-e-diid kii sub.he.n
tirii nazar kii shu.aa.o.n kii gudgudaa.ii hu.ii
lagii jo tere tasavvur ke narm sho.alo.n se
hayaat-e-ishq se us aa.nch kii tipaa.ii hu.ii
hanuuz vaqt ke kaano.n me.n chahchahaahaT hai
vo chaap tere qadam kii sunii-sunaa.ii hu.ii
hanuuz siina-e-maazii me.n jagmagaahaT hai
damakte ruup kii diipaavlii jalaa.ii hu.ii
lahuu me.n Duubii uma.ngo.n kii maut rok zaraa
hariim-e-dil me.n chalii aatii hai DhiTaa.ii hu.ii
rahegii yaad javaa.n-bevgii mohabbat kii
suhaag raat kii vo chuu.Diyaa.n ba.Dhaa.ii hu.ii
ye merii pahlii mohabbat na thii magar ai dost
ubhar ga.ii hai.n vo choTe.n dabii-dabaa.ii hu.ii
supurdagii o KHuluus-e-nihaa.n ke parde me.n
jo terii narm-nigaahii kii thii.n bi.Thaa.ii hu.ii
uThaa chukaa huu.n mai.n pahle bhii hijr ke sadme
vo saa.ns dukhtii hu.ii aa.nkh DabDabaa.ii hu.ii
ye haadsa hai ajab tujh ko paa ke kho denaa
ye saaneha hai Gazab terii yaad aa.ii hu.ii
ajiib dard se ko.ii pukaartaa hai tujhe
galaa rundhaa hu.aa aavaaz thar tharraa.ii hu.ii
kahaa.n hai aaj tuu ai ra.ng-o-nuur kii devii
a.ndherii hai mirii duniyaa luTii-luTaa.ii hu.ii
pahu.nch sakegii bhii tujh tak mirii navaa-e-firaaq
jo kaa.enaat ke ashko.n me.n hai nahaa.ii hu.ii

Firaq Gorakhpuri

Nazm

sher aur KHargosh

chalaa dhiime dhiime se kachhve kii chaal
pahu.nchte pahu.nchte use Gaar tak shaam hone lagii
use dekh kar sher bhannaa gayaa
chhaTa.nkii baraabar ye KHuraak bhejii hai jangal ne
aur is qadar der se
miTaa duu.ngaa KHargosh kii zaat ko
mai.n jangal kaa jangal hii khaa jaa.uu.ngaa
sunaa aur KHargosh rone lagaa
gi.Dgi.Daane lagaa
huzuur is me.n merii nahii.n hai KHataa
na jangal sabhaa kaa ko.ii dosh hai
ki jangal ne to saat KHargosh bheje magar
magar kyaa
magar sir
magar kyaa kyuu.n haklaa rahe ho bataa.o mujhe
magar magar magar sir
kahaa.n hai.n tumhaare chhe Gaddaar saathii
vo KHargosh phir se sisakne lagaa
hame.n raaste me.n huzuur ek
zaalim ne rokaa thaa
aur bahut gaaliyaa.n aap ko dii.n
kahaa mai.n dohraa.uu.n kaise vo sab kuchh huzuur
kahaa jaa.o kah do mire saathiyo.n ko vahii khaa gayaa
ye sun.naa thaa ki sher Gurraayaa mo.nchho.n me.n bal aa ga.e
aka.Dne lagii us kii hunTerii puu.nchh
aur aa.nkho.n me.n bas KHuun utarne lagaa
kahaa.n hai kidhar hai bataa kaun hai
mire hote kis kaa hu.aa hausla
ki merii re.aayaa pe ko.ii zulm kar sake

Gulzar

Nazm

sarhad-par ka ek KHat paDh kar

davaa kii shiishii me.n
suuraj
udaas kamre me.n chaa.nd
ukha.Dtii saa.nso.n me.n rah rah ke
ek naam kii guu.nj....!
tumhaare KHat ko ka.ii baar pa.Dh chukaa huu.n mai.n
ko.ii faqiir kha.Daa gi.Dgi.Daa rahaa thaa abhii
binaa uThe use dhutkaar kar bhagaa bhii chukaa

Nida Fazli

Nazm

raat

mai.n dekhtaa huu.n
viiraan shaah-raaho.n par re.ngtii KHaamoshii
suuraj ke ghar lauTte hii
be-libaas ho kar naachne lagtii hai
aur talaash kartii hai kuchh muskuraate chehre
a.ndheraa chhaane lagtaa hai
viiraanii daalaan me.n baiThii bain kartii aur
apnii mahruumii kaa iz.haar kartii hai
kiraa.e ke qabristaan me.n dafn murde
raat-bhar ehtijaaj karte hai.n
apnii naa-mukammal KHvaahisho.n ko sa.Dko.n par jalaate hai.n
jis ke dhu.e.n se aasmaan kaa
rang kaalaa pa.D jaataa hai
raat kii taariikii manhuus aavaaze.n nikaaltii hai
viiraan sa.Dak ke ek taraf kha.Dii buu.Dhii tavaa.if
apne gaahak ke ravayye se KHaufzada hai
ulluu aur chamgaada.D bhii raat se KHafaa ho kar
ab din me.n safar karte hai.n
murda raat gahrii ho jaatii hai
jaa.De kii ThiThuraatii sardii me.n
footpath par baiThii ek nannhii kalii
ek roTii ke liye KHudaa ke signature kii muntazir hai
mah.ngii gaa.Diyo.n ke saamne
gi.Dgi.Daatii tavaa.if kaa ek aa.nsuu
mere zehn me.n
be-shumaar savaalaat chho.D gayaa hai

Manzar Latif

Nazm

taqwa

bahut ayyaar the vo log
vo saaraa din KHudaa ko yaad karte
masjido.n me.n jaate
rote gi.Dgi.Daate aur tasbiihe.n pa.Dhaa karte
zamaana mo'taqid thaa is qadar un kaa
vo jab baahar nikalte
log un ke raaste kii gard ko
apne amaamo.n se haTaate the
un kii KHaatir KHvaan par nemat sajaate the

Nomaan Shauque

Nazm

takmil

''tumhe.n saabit karnaa hogaa ki tum ho''! us ne mujhe jhinjho.Daa
''magar mai.n ye saabit nahii.n kar saktii'' mai.n ne ehtijaaj kiyaa
us ne mujhe muTThii me.n bhar kar zamii.n par bikher diyaa aur KHushii se chillaayaa! ''tum sabza hii sabza ho, rang hii rang ho''
''Thahro! zaraa socho! mujhe jald KHizaa.n ke naadiida haath ma.aduum kar de.nge...... tum ye saabit nahii.n kar sakoge ki mai.n huu.n''
us ne ghabraa kar mujhe phir sameT liyaa aur zaraa tavaqquf ke baa'd fazaa me.n uchhaal diyaa aur pur-josh ho kar bolaa
''dekhaa tum raushnii hii raushnii ho''
''haa.n magar taariikii mujhe nigalne ko betaab hai! mai.n ne kahaa thaa naa mai.n KHud ko saabit karne se qaasir huu.n''
us ne hiraasaa.n ho kar mujhe muTThii me.n jaka.D liyaa....... naa-tamaamii ke dard se merii aa.nkhe.n chhalak pa.Dii.n
us ne mujhe bahne ke liye nasheb me.n chho.D diyaa aur muskuraayaa
''dekhaa tum maaya hii maaya ho''
''mujhe vaqt kii tez dhuup jald KHushk kar degii'' mai.n ne duhaa.ii dii
vo Gusse se kaa.npne lagaa.... phir mujhe saamne rakh kar gi.Dgi.Daayaa
''KHud ko saabit karo KHudaa-raa nahii.n to mai.n miT jaa.uu.ngaa!
hamaarii takmiil zaruurii hai''
''naa-guziir hai! mai.n ne taa.iid kii
aa.o mai.n tumhe.n zeb-e-tan kar luu.n! nahii.n to ham tasdiiq ke haq se mahruum ho jaa.e.nge, ham kabhii saabit na ho sake.nge''
''haa.n hame.n apnii tasdiiq karnii hogii'' us ne mujh me.n zam hote hu.e kahaa
......aur phir ham ne dekhaa... ra.ng... roshnii... sabza... maya... husn aur hairat sab hamaare butuun kii jaagiire.n thii.n
baahar to sirf dhu.aa.n thaa

Naina Adil

Nazm

yahan likhna mana hai

mai.n likh duu.n vahaa.n
vo lafz
jo mere andar mar rahe hai.n
par likh nahii.n saktaa
diivaare.n roktii hai.n mujhe
roktii hai.n
mere andar
diivaaro.n ko girne se
ek jeneral kahtaa hai
yaa avaam kaa numaa.inda kahtaa hai
chup raho
gi.Dgi.Daate hu.e bolo
mai.n likh duu.n
merii maa.n ko merii mahbuuba honaa chaahiye thaa
aur mere baap ko
merii aa.nkho.n se duur

Ahmad Azad

Nazm

nirwan

mirii saa.ns kaa silsila
yuu.n na TuuTe ki ik tund jho.nke ke maanind u.Dtii hu.ii umr merii
kisii band uj.De hu.e shahr me.n daf.atan KHud ko paa.e
bhayaanak KHamoshii kaa ik Doltaa qahqaha
us kii rag rag me.n utre to vo baukhlaa.e
qataaro.n me.n leTii hu.ii murda galiyo.n me.n bhaTke
makaano.n me.n utre mu.nDero.n pe aa.e
siyah chhoTii ii.nTo.n kii farsuuda diivaar ko apnii poro.n se chhuu kar
ko.ii dar Dhuu.nDe ko.ii raah maa.nge
achaanak kisii sard khambe kii be-nuur aa.nkho.n se jhaa.nke
ba.De karb se gi.Dgi.Daa.e
KHudaaraa ko.ii mujh ko baahar nikalne kaa rasta bataa.e
KHudaaraa ko.ii mujh ko baahar nikalne kaa rasta bataa.e

Wazir Agha

Nazm

woTon ke gadagar

dar pe aa.e hai.n jii voTo.n ke gadaagar dekho
maa.ngte hai.n bhiik kaise gi.Dgi.Daa kar dekho

Sada Ambalvi

Nazm

KHud-kushi

vo raat gahrii
us par TuuTte jismo.n kaa bojh
jho.npa.Do.n me.n uu.nghte nange charaaGo.n kii bha.Dak
karb kaa elaan taaza
yak-ba-yak
masjido.n me.n jal uThii na.aro.n kii bosiida zabaa.n
thartharaa kar gir pa.De sajdo.n me.n log
goliyo.n kii ta.Dta.DaahaT
KHuun mash.al zulm maut
KHanjaro.n ke paa.nv se rau.ndii hu.ii doshiizgii
kuchh nahii.n kuchh bhii nahii.n hai
KHauf se larzaa.n sharaafat KHud-kushii kaa naam hai
bandagii puujaa ibaadat is liye badnaam hai
sab ga.nvaa kar gaa.nv vaale gi.Dgi.Daate rah ga.e
gaa.nv kii sab beTiyaa.n Daaku uThaa kar le ga.e
paasbaa.n KHaamosh hai.n ahl-e-siyaasat bhii KHamosh
rishvato.n par bikne vaalii har adaalat bhii KHamosh

Sagheer Riyaz

Nazm

aabnusi KHayal

ham us masiihaa kii aamad ke aasaar ke muntazir hii rahe
phir sa.Dko.n par chand tavaa.ife.n nazar aa.ii.n
shaayad vo nazar aa gayaa hai
haa.n haa.n tavaa.ifo.n ne lalchaa.ii aavaaz me.n kahaa
chalo hame.n apnii gaa.Diyo.n me.n le chalo
daraKHt aabnuusii KHayaalo.n me.n mudGam rahe
jab us ne gale se laTakte micro phone par ka.ii din tak chiiKH chiiKH kar kahaa mai.n masiihaa huu.n
to idaara-e-imdaad-e-baahamii vaalo.n ne use khaane par bulaayaa
khaa pii kar us ne taqriir kii
gi.Dgi.Daa kar kahaa mai.n masiihaa huu.n mujhe saliib par laTkaa do
logo.n ne vaapsii kaa kiraaya de kar use ruKHsat kar diyaa

Ain Rashid

Nazm

agar

agar kabhii use merii yaad aa.e
merii tarah apnii
har anaa
dafn kar aa.e
merii KHaatir jahaa.n se la.D jaa.e
Dhuu.nDe mujhe
diivaana-vaar nazro.n se
mahfil me.n to
kabhii tanhaa.ii me.n
qarya qarya phire
sahraa sahraa jaa.e
phire jangalo.n me.n
duniyaa ke
maaraa-maaraa
rakhe dil pe haath
shaam-o-sahar
bhare sard aah
kabhii jo Dhuu.nDne mujh ko samundaro.n ke safar pe nikle
chaa.nd kaa 'aks jab paanii me.n dekhe
be-iKHtiyaar chau.nke
kabhii KHud se lipaTtii havaa se pata meraa vo puuchhe
na miluu.n jab is jahaa.n me.n use
musalle pe jaa ke dard apnaa sunaa.e
aur hichkiyaa.n baa.ndh kar gi.Dgi.Daa.e
phir use apnii har be-ruKHii yaad aa.e
ta.Dap ta.Dap ke vo naam meraa dohraa.e
shaayad
kabhii aisaa ho jaa.e

Muazzama Naqwi

Nazm

sab ki KHair

KHair kaa dars ham tak
pahaa.Do.n me.n bahte hu.e paaniyo.n me.n se hotaa hu.aa
ek KHaamosh lamhe me.n miltaa rahaa
naa-KHudaa apnii kashtii kaa chappuu paka.Dte hu.e
gi.Dgi.Daate hu.e us KHudaa se
zamaan-o-makaa.n ke safar tak
kaa ik raasta chaahtaa hai
aise rasto.n kii KHair
jin pe chalte hu.e sab ke sab
be-KHatar hai.n aur un ke qadam Dagmagaate nahii.n
un parindo.n kii KHair
gho.nslo.n me.n jo tez aa.ndhiy.o.n me.n kabhii pha.D.pha.Daate nahii.n
un buzurgo.n kii KHair
jo musiibat me.n bhii vird-rabb-e-ta'aalaa se Gaafil nahii.n
un makaano.n kii KHair
jin me.n raushan diye aaKHirii saa.ns lete hu.e
bujh ga.e
KHair sayyaaro.n kii
jo KHudaa ke bataa.e hu.e raasto.n par safar karte karte nahii.n thak rahe
aisii bahno.n kii KHair
jin kii 'izzat ko vahshii u.Daa le ga.e
aisii maa.o.n kii KHair
apne bachcho.n ko jo KHair kaa dars detii rahii.n
jaane vaalo.n kii KHair aane vaalo.n kii KHair
sab zamaano.n kii KHair
muskuraate hu.e aise logo.n kii KHair
jin ke dil Gam kii dahshat se larzaa.n ga.e
un sitaaro.n kii KHair
gum-shuda qaafilo.n ko jo raste bataate hu.e
bujh ga.e
chaak par rakkhe aise vajuudo.n kii KHair
apne KHaaliq kii KHvaahish pe
jaise banaa.e ga.e ban ga.e
mai.n kahaa.n tak izaala karuu.n
aisii ruuho.n kii KHair
jo KHudaa se ta'alluq nibhaate hu.e
apnii parvaaz se thak ke girtii nahii.n

Zahid Khan

Nazm

shajar

tum kisii shajar ko bhii
yuu.n fuzuul mat kaaTo
is kii ahmiyyat kyaa hai kaash jaan jaa.o to
is ko tum ugaa.ogay
sii.nch kar lahuu se bhii
kyuu.nki is ke dam se hii is jahaa.n me.n raunaq hai
ye KHudaa-e-bartar kii ik hasiin ne'mat hai
aur in ke dam se hii
saa.ns lene vaalo.n kii zindagii salaamat hai
ye agar nahii.n hote ko.ii bhii nahii.n jiitaa
is liye sabhii mil kar baargaah-e-yazdaa.n me.n
kyo.n na gi.Dgi.Daa.e.n ham
phuul phal anaajo.n se
lahlahaate kheto.n ko aur in daraKHto.n ko
ai KHudaa salaamat rakh

Ashraf Ali Ashraf

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now