Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "golaa"

Nazm MATCHES FOR "golaa"

Nazm

banjara-nama

kyaa saKHt makaa.n banvaataa hai KHam tere tan kaa hai polaa
tuu uu.nche coat uThaataa hai vaa.n gor ga.Dhe ne mu.nh kholaa
kyaa renii KHandaq rand ba.De kyaa brij ka.nguuraa anmolaa
ga.D.h coat rahakla top qila kyaa shiisha daaruu aur golaa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

mohabbat

uruus-e-shab kii zulfe.n thii.n abhii naa-aashnaa KHam se
sitaare aasmaa.n ke be-KHabar the lazzat-e-ram se
qamar apne libaas-e-nau me.n begaana saa lagtaa thaa
na thaa vaaqif abhii gardish ke aa.iin-e-musallam se
abhii imkaa.n ke zulmat-KHaane se ubhrii hii thii duniyaa
mazaaq-e-zindagii poshiida thaa pahnaa-e-aalam se
kamaal-e-nazm-e-hastii kii abhii thii ibtidaa goyaa
huvaidaa thii nagiine kii tamannaa chashm-e-KHaatam se
sunaa hai aalam-e-baalaa me.n ko.ii kiimiyaa-gar thaa
safaa thii jis kii KHaak-e-paa me.n ba.Dh kar saaGar-e-jam se
likhaa thaa arsh ke paa.e pe ik iksiir kaa nusKHa
chhupaate the farishte jis ko chashm-e-ruuh-e-aadam se
nigaahe.n taak me.n rahtii thii.n lekin kiimiyaa-gar kii
vo is nusKHe ko ba.Dh kar jaantaa thaa ism-e-aazam se
ba.Dhaa tasbiih-KHvaanii ke bahaane arsh kii jaanib
tamannaa-e-dilii aaKHir bar aa.ii sa.i-e-paiham se
phiraayaa fikr-e-ajzaa ne use maidaan-e-imkaa.n me.n
chhupegii kyaa ko.ii shai baargaah-e-haq ke mahram se
chamak taare se maa.ngii chaa.nd se daaG-e-jigar maa.ngaa
u.Daa.ii tiirgii tho.Dii sii shab kii zulf-e-barham se
ta.Dap bijlii se paa.ii huur se paakiizgii paa.ii
haraarat lii nafas-haa-e-masiih-e-ibn-e-maryam se
zaraa sii phir rubuubiyat se shaan-e-be-niyaazii lii
malak se aajizii uftaadgii taqdiir shabnam se
phir in ajzaa ko gholaa chashma-e-haivaa.n ke paanii me.n
murkkab ne mohabbat naam paayaa arsh-e-aazam se
muhavvis ne ye paanii hasti-e-nau-KHez par chhi.Dkaa
girah kholii hunar ne us ke goyaa kaar-e-aalam se
hu.ii jumbish ayaa.n zarro.n ne lutf-e-KHvaab ko chho.Daa
gale milne lage uTh uTh ke apne apne hamdam se
KHiraam-e-naaz paayaa aaftaabo.n ne sitaaro.n ne
chaTak Guncho.n ne paa.ii daaG paa.e laala-zaaro.n ne

Allama Iqbal
Nazm

mahatma-gandhi

bhalaa.ii sab kii ho jis se vo kaam us kaa hai
jahaa.n bhii jaa.o vahii.n ehtiraam us kaa hai
uThaa.e sar ko.ii kyaa sar uThaa nahii.n saktaa
muqaable ke liye aage aa nahii.n saktaa
kisii se us ko mohabbat kisii se ulfat hai
kisii ko us kii hai us ko kisii kii hasrat hai
vafaa-o-lutf tarahhum kii KHaas aadat hai
Garaz karam hai mudaaraat hai inaayat hai
kisii ko dekh hii saktaa nahii.n hai mushkil me.n
ye baat kyuu.n hai ki rakhtaa hai dard vo dil me.n
vo rashk-e-sham-e-hidaayaat hai anjuman ke liye
vo misl-e-ruuh-e-ravaa.n unsur-e-badan ke liye
vo ek saaGar-e-nau mahfil-e-kuhan ke liye
vo KHaas maslah-e-kul shaiKH-o-barahman ke liye
lagan use hai ki sab maalik-e-vatan ho jaa.e.n
qafas se chhuuT ke ziinat-dah-e-chaman ho jaa.e.n
jafaa-shi.aar se hotaa hai bar-sar-e-paikaar
na paas top na golaa na qabze me.n talvaar
zamaana taaba-e-irshaad hukm par tayyaar
vo paak shakl se paidaa hai.n josh ke aasaar
kisii KHayaal se charKHe ke bal pe la.Dtaa hai
kha.Dii hai fauj ye tanhaa magar aka.Dtaa hai
tarah tarah ke sitam dil par apne sahtaa hai
hazaar ko.ii kahe kuchh KHamosh rahtaa hai
kahaa.n shariik hai.n aa.nkho.n se KHuun bahtaa hai
suno suno ki ye ik kahne vaalaa kahtaa hai
jo aabruu tumhe.n rakhnii ho josh me.n aa.o
raho na be-KHud-o-be-hosh hosh me.n aa.o
usii ko ghere amiir-o-Gariib rahte hai.n
nadiim-o-muunish-o-yaar-o-habiib rahte hai.n
adab ke saath adab se adiib rahte hai.n
nasiib-var hai.n vo ba.De KHush-nasiib rahte hai.n
ko.ii bataa.e to yuu.n dekh-bhaal kis kii hai
jo us se baat kare ye majaal kis kii hai
rifaah-e-aam se raGbat hai aur matlab hai
anokhii baat niraalii ravish nayaa Dhab hai
yahii KHayaal thaa pahle yahii KHayaal ab hai
faqat hai diin yahii bas yahii to maz.hab hai
agar bajaa hai to 'bismil' kii arz bhii sun lo
chaman hai saamne do-chaar phuul tum chun lo

Bismil Allahabadi
Nazm

mere purkhon ki pahli dua

itnii afsurda aavaaz mere KHudaa
merii pahlii samaa.at pe likkhii ga.ii
merii pahlii hii saa.nso.n me.n gholaa gayaa
in shikasta se lahjo.n kaa zahriilaa-pan

Ishrat Afreen
Nazm

kachhwa aur KHargosh

ek kachhve ke aa ga.ii jii me.n
kiijiye sair o gasht KHushkii kii
jaa rahaa thaa chalaa hu.aa KHaamosh
us se naahaq ulajh pa.Daa KHargosh
miyaa.n kachhve! tumhaarii chaal hai ye
yaa ko.ii shaamat aur vabaal hai ye
yuu.n qadam phuu.nk phuu.nk dharte ho
goyaa uttuu zamii.n pe dharte ho
kyuu.n hu.e chal ke muft me.n bad-naam
be-chale kyaa aTak rahaa thaa kaam
tum ko ye hausla na karnaa thaa
chulluu paanii me.n Duub marnaa thaa
ye tan-o-tosh aur ye raftaar
aisii raftaar par KHudaa kii maar
bolaa kachhvaa ki ho.n KHafaa na huzuur
mai.n to huu.n aap mo'tarif ba-qusuur
agar aahistagii hai jurm-o-gunaah
to mai.n KHud apne jurm kaa huu.n gavaah
mujh ko jo saKHt sust farmaayaa
aap ne sab durust farmaayaa
mujh ko Gaafil magar na jaaniyegaa
banda-parvar buraa na maaniyegaa
yuu.n zabaanii javaab to kyaa duu.n
shart bad kar chalo to dikhlaa duu.n
tum to ho aaftaab me.n zarra
par miTaa duu.ngaa aap kaa Gurra
sun ke KHargosh ne ye talKH javaab
kahaa kachhve se yuu.n zi-ruu-e-itaab
tuu kare merii ham-sarii kaa KHayaal
terii ye taab ye sakat ye majaal
chyuu.nTii ke jo par nikal aa.e
to yaqii.n hai ki ab ajal aa.e
are bebaak! bad-zabaa.n mu.nh-phaT
tuu ne dekhii kahaa.n hai dau.D jhapaT
jab mai.n tezii se jast kartaa huu.n
shahsavaaro.n ko past kartaa huu.n
gard ko merii baad-e-paa na lage
laakh dau.De miraa pata na lage
rail huu.n barq huu.n chhalaavaa huu.n
mai.n chhalaave kaa balki baavaa huu.n
terii merii nibhegii sohbat kyaa
aasmaa.n ko zamii.n se nisbat kyaa
jis ne bhugte ho.n turkii o taazii
aaise mariyal se kyaa bade baazii
baat ko ab ziyaada kyaa duu.n tuul
KHair kartaa huu.n terii shart qubuul
hai munaasib ki imtihaa.n ho jaa.e
taaki aib o hunar ayaa.n ho jaa.e
al-Garaz ik maqaam Thahraa kar
hu.e dono.n hariif garm-e-safar
bas-ki zoro.n pe thaa cha.Dhaa KHargosh
tezii phurtii se yuu.n ba.Dhaa KHargosh
jis tarah jaa.e top kaa golaa
yaa gire aasamaan se olaa
ek do khet chauk.Dii bhar ke
apnii chustii pe aafrii.n kar ke
kisii goshe me.n so gayaa jaa kar
fikr ''kyaa hai chale.nge sustaa kar''
aur kachhvaa Gariib aahista
chalaa siine ko KHaak par ghistaa
suu.ii ghanTe kii jaise chaltii hai
yaa ba-tadriij chhaa.nv Dhaltii hai
yuu.nhii chaltaa rahaa ba-istiqlaal
na kiyaa kuchh idhar udhar kaa KHayaal
kaam kartaa rahaa jo pai-dar-pai
kar gayaa rafta rafta manzil tai
haif KHargosh rah gayaa sotaa
samra Gaflat kaa aur kyaa hotaa
jab khulii aa.nkh to saveraa thaa
saKHt sharmindagii ne gheraa thaa
sabr o mohabbat me.n hai sar-afraazii
sust kachhve ne jiit lii baazii
nahii.n qissa ye dil-lagii ke liye
balki ibrat hai aadmii ke liye
hai suKHan is hijaab me.n ruu-posh
varna kachhvaa kahaa.n kahaa.n KHargosh

Ismail Merathi
Nazm

patthar

mai.n ik ma.asuum shahrii thaa
sharaafat se sabhii ke saath rahtaa thaa
mohazzab taur se jiitaa thaa
sab ke kaam aataa thaa
kabhii mai.n ne kisii kaa dil nahii.n to.Daa
kisii kaa sar nahii.n pho.Daa
kisii tarkash se ko.ii tiir kyaa tinkaa nahii.n chho.Daa
kisii kii piiTh me.n KHanjar nahii.n bho.nkaa
kisii ke jism par baaruud kaa golaa nahii.n phe.nkaa
kisii ko aag me.n mai.n ne nahii.n jho.nkaa
kisii kaa haq nahii.n maaraa
kisii kaa zar nahii.n luuTaa
ko.ii KHirman nahii.n phuu.nkaa
kisii building kisii gaa.Dii kisii mahfil me.n ko.ii bam nahii.n rakkhaa
mire haatho.n kisii kaa ghar nahii.n uj.Daa
kisii kaa dar nahii.n ukh.Daa
ko.ii kumba nahii.n bikhraa
ko.ii maathaa nahii.n siku.Daa
kisii kii raah me.n ro.Daa nahii.n aTkaa
kisii ke kaam me.n mai.n ne kabhii raKHna nahii.n Daalaa
kisii ke vaaste dil me.n kabhii kiina nahii.n paalaa
ko.ii farmaan haakim kaa kabhii mai.n ne nahii.n Taalaa
ko.ii gheraa nahii.n laa.nghaa
ko.ii aa.ngan nahii.n phaa.ndaa
magar phir bhii qayaamat mujh pe TuuTii hai
ajab Gaarat-garii kaa qahr barsaa hai
ajab saffaak KHanjar dil me.n utraa hai
ki merii ruuh ab tak tilmilaatii hai
ki meraa zehn ab bhii jhunjhunaataa hai
ki merii saa.ns ab bhii la.Dkha.Daatii hai
samajh me.n kuchh nahii.n aataa
ki mai.n ne kyaa bigaa.Daa hai
mire kis jurm kii mujh ko milii hai
ye sazaa aaKHir
ye gutthii kis tarah kholuu.n
sabab kis se yahaa.n puuchhuu.n
kidhar jaa.uu.n
kise rokuu.n
sabhii chehre yahaa.n patthar
sabhii aa.nkhe.n yahaa.n patthar
basaarat me.n bharaa patthar
samaa.at me.n basaa patthar
zabaano.n me.n ga.Daa patthar
adaalat me.n kha.Daa patthar
har ik qaanuun me.n patthar
har ik aa.iin me.n patthar
har ik insaaf me.n patthar
har ik aavaaz me.n patthar
har ik ehsaas me.n patthar
ye patthar yug ke patthar se bhii bhaarii hai
nagiine kii tarah tarshaa hu.aa hai
aur hiire kii anii kii tarah us kii tez noke.n hai.n
bahut shaffaaf hai ye aur is me.n ik tamaddun hai
mai.n is patthar se sar pho.Duu.n
ki apnii zindagii chho.Duu.n
ki apnaa raasta mo.Duu.n
ki ban jaa.uu.n mai.n KHud patthar
samajh me.n kuchh nahii.n aataa

Ghazanfar
Nazm

mera dost abul-haul

ye duniyaa to un shola saamaan logo.n ne aapas me.n taqsiim kar lii
jo hathiyaar kii shakl me.n ranj-o-Gam Dhaalte hai.n
yaa gola-baaruud ke kaar-KHaano.n ke maalik hai.n
yaa phir sanaa-KHvaa.n hai.n un ke
hamaare liye sirf naare bache hai.n
san.atii daur ke kaj-kulaaho.n kii daad-o-dahish ruuh-parvar ho yaa jaan-levaa
magar zindaabaad, aafrii.n, marhabaa, ke sivaa kuchh nahii.n paas apne
ye sab jaantaa hai hamaarii shujaa.at kii parvaaz kyaa hai
hamaarii javaa.n-mardii ik suuba-jaatii ta.assub se
yaa firqa-vaarii fasaadaat se aage kuchh bhii nahii.n hai
futuuhaat-e-askandarii ham ne taKHtii pe likh kar miTaa dii hai.n kab kii
hamaare baa'd zamii.n ke tale so rahe hai.n
ajaa.ib-gharo.n me.n laTaktii hai.n talvaare.n un kii
aur un ke zarrii.n libaado.n ko ghun khaa gayaa hai
zira-baktaro.n par clones aa ga.ii hai
ye sab jaantaa hai hamaarii tag-o-taaz kyaa hai
hamaare shikam gar hamaare suro.n pe na hote
aur chehro.n me.n aazaa-e-jinsii
to ham achchhe insaan bante
hamaare gharo.n ke kam o besh sab aqabii darvaaze paiham khule hai.n
hamaare lahuu me.n hare laal piile bahut saare parcham khule hai.n
kahii.n se magar haq kii aavaaz aatii nahii.n hai
hamaarii zabaa.n dil kii saathii nahii.n hai
hamaare liye khokhlaa lafz-e-jamhuuriyat hai, taqaariir hai.n leadero.n kii
hamaare liye roz-naamo.n ke safhaat hai.n, ishtihaaraat hai.n niim-jinsii
hamaare liye devtaa.o.n ke but hai.n, KHudaa ke faraamiin hai.n aur uqbaa
jo bad-ra.ng hai haal kii tarah aur kore laTThe kii buu se bharii hai
hamaare liye sirf roTii kii jidd-o-johd
aurato.n ke barhana badan kii tamannaa se aage kahii.n kuchh nahii.n hai
hamaarii rago.n me.n jo tezaab hai us kii shiddat kabhii kam na hogii!

Akhtarul Iman
Nazm

qatil

diary roz bulaatii hai mujhe likhne ko
ek muddat se ko.ii sher nahii.n likkhaa hai
mire siine me.n bhii ik dard uThaa jaataa hai
terii yaade.n bhii bahut zehn me.n chillaatii hai.n
pen kaaGaz mai.n luu.n
aur ko.ii nayaa sher likhuu.n
baiTh jaataa huu.n so mai.n diary apnii le kar
misre likhtaa huu.n
miTaataa huu.n
mai.n phir likhtaa huu.n
phe.nk detaa huu.n phir un misro.n ke kaaGaz ko mai.n golaa kar ke
phir mire kamre se
aaho.n kii sadaa aatii hai
dekhtaa huu.n
to vahii saare adhuure misre
dustbin me.n pa.De dam to.D rahe hote hai.n
mai.n pas-o-pesh me.n pa.D jaataa huu.n
us lamha tab
aur samajh me.n nahii.n aataa hai mujhe itnaa bhii
mai.n ke shaa.er huu.n ko.ii
yaa ke ko.ii qaatil huu.n

Mohsin Aftab Kelapuri
Nazm

sayyaron ki mahfil

zamiin
mirii nazro.n me.n ai mirriiKH teraa darja a.alaa hai
bulandii par tuu rahtaa hai tirii qismat bhii baalaa hai
mirriiKH
bulandii aur pastii kaa kabhii dhokaa nahii.n khaa.e.n
zamii.n uupar dikhaa.ii de agar mirriiKH par aa.e.n
zamiin
tujhe maanaa hai devtaa ja.ng kaa naadaan logo.n ne
tabaahii kaa diyaa ilzaam tujh ko rome vaalo.n ne
tujhe bhaarat ke daanish-var sadaa manhuus kahte hai.n
tujhe kahte rahe ma.ngal kabhii jallaad kahte hai.n
bataa ai surKH sayyaare tire haalaat kaise hai.n
tire taalaab kaise hai.n tire baaGaat kaise hai.n
tire paakiiza daaman me.n manaazir kaise kaise hai.n
tirii aaGosh ke andar navaadir kaise kaise hai.n
mirriiKH
nahii.n mirriiKH par jhiile.n na chashma hii ubaltaa hai
samundar hai na dariyaa hai na ko.ii motii miltaa hai
na bulbul ke taraane hai.n na ko.ii gul mahaktaa hai
parinda bhii nahii.n ko.ii KHushii se jo chahaktaa hai
yahaa.n jugnuu nahii.n ko.ii jo zulmat me.n chamaktaa hai
na hiiraa aur niilam hai hamesha jo damaktaa hai
havaa kaa ko.ii jho.nkaa hai na sabza lahlahaataa hai
na battaKHo.n kii qataare.n hai.n na taa.ir chachahaataa hai
nasiim-e-sub.h chaltii hai na baadal aur paanii hai
na gulshan hai yahaa.n ko.ii na maujo.n kii ravaanii hai
mire qutbain ko dekho vahaa.n yaKH-basta paanii hai
yahii paanii yahaa.n par zindagaanii kii nishaanii hai
zamii.n ke log kahte hai.n ki nahro.n kii ravaanii hai
haqiiqat me.n nahii.n aisaa faqat jhuuTii kahaanii hai
yahaa.n suurat nazar aatii hai aabshaaro.n kii
nazar aatii hai kasrat har taraf sa.nglaaKH Gaaro.n kii
yahaa.n hai gahraa sannaaTaa KHamoshii kii hukuumat hai
fazaa bhii KHushk hai merii nahii.n ko.ii ratuubat hai
zamiin
shariik-e-bazm ho mister ataarid tum bhii kuchh bolo
zabaa.n par lag gayaa taalaa to is mahfil me.n tum kholo
ataarad
pa.Dosii huu.n mai.n suuraj kaa namuuna huu.n jahannum kaa
yahaa.n shiddat kii garmii hai to mumkin hii nahii.n jiinaa
zamiin
mire nazdiik ho zohra bahut raKHshanda sayyaara
yahaa.n sab log kahte hai.n ki tum ho sub.h kaa taara
zohra
munavvar meraa chehra hai mai.n garmii kaa maaraa huu.n
zamii.n hai mujh ko pyaarii mai.n zamii.n vaalo.n kaa pyaaraa huu.n
zamiin
aziimushshaan jussa hai hamaarii mantarii tum ho
jise zebaa hai sardaarii vo be-shak mushtarii tum ho
mushtarii
ba.Daa hai jism meraa aur ziinat kuchh nahii.n mujh me.n
ba.Daa saa gol-gappaa huu.n sabaahat kuchh nahii.n mujh me.n
zamiin
hamaarii anjuman me.n ai zuhal tum hii niraale ho
tumhaare gird halqa hai anokhii shakl vaale ho
zuhal
gale me.n tauq hai mere mirii suurat niraalii hai
agar nazdiik se dekhe.n to ye shai tez aa.ndhii hai
nazar aataa hai jo halqa vo hai.n chhoTe ba.De patthar
lagaate hai.n ba.Dii ta.adaad me.n chaaro.n taraf chakkar
zamiin
mire do bhaa.ii hai.n aage tumhaaraa haal kaisaa hai
vahaa.n hai kaifiyat kaisii vahaa.n maahaul kaisaa hai
uranus
yahaa.n shiddat kii sardii hai lihaazaa mai.n bhii ThanDaa huu.n
zaraa merii taraf dekho ba.Daa saa golaa ganDaa huu.n
neptune
mujhe neptune kahte hai.n usii kumbe kaa huu.n member
bahut duurii hai suuraj se lagaataa huu.n ba.Daa chakkar
mirriiKH
mai.n pahu.nchaa is natiije par zamii.n par KHush-numaa.ii hai
KHudaa ne phuul aur paudo.n se ye duniyaa sajaa.ii hai
zamii.n par zindagii hai husn hai aur dilrubaa.ii hai
mujhe ulfat zamii.n se hai vahii dil me.n samaa.ii hai
vahaa.n aabaad hai.n insaa.n vahaa.n shaan-e-KHudaa.ii hai
hamaarii kahkashaa.n me.n aisii qismat kis ne paa.ii hai

Abdul Qadir
Nazm

shafaq

ho ga.ii shaam aur suuraj Duubaa
pachchhim me.n hai aag kaa golaa
rang shafaq se aisaa barsaa
surKH hu.e jangal aur dariyaa
rang tiraa hai shaam kaa daaman
phuul banaa hai shaam kaa daaman
vaah shafaq kyaa rang bharii hai
surKH parii hai surKH parii hai
shaam kii godii me.n baiThii hai
laal cha.ndariyaa o.Dh rahii hai
is ko apne paas bulaa luu.n
apnii sahelii us ko banaa luu.n
aa merii rangiin shafaq aa
aa jaa merii god me.n aa jaa
rang tiraa hai kitnaa pyaaraa
jaise ho ammaa.n kaa dupaTTa
ai malika ai shaam kii beTii
rango.n kii tuu hai shahzaadii
tub me.n paanii KHuub bharaa hai
abbaa ne ye bharvaayaa hai
is me.n teraa rath utraa hai
chaa.nd tiraa rath khii.nch rahaa hai
rok le rath ko aur utar aa
aaj sahelii merii ban jaa

Saghar Nizami
Nazm

amn ka Damru Dam Dam Dam

aman kaa Damruu Dam Dam Dam
chain kii Dholak Dham Dham Dham
aa.o bajaa.e.n tum aur ham
jhuume.n naache.n chham chham chham
jab tak apne dam me.n dam
des ye chamke cham cham cham
golii golaa aur na bam
aa.nsuu aah na dard-o-alam
dahshat KHauf na ko.ii Gam
KHushiyaa.n barse.n jham jham jham
jhuum ke gaa.e.n ram pam pam
des ye chamke cham cham cham
gautam kii ta.abiir hai.n ham
KHvaaja kii tafsiir hai.n ham
naanak kii tasviir hai.n ham
gaa.ndhii jii kii jaagiir hai.n ham
ham se amn-o-amaa.n kaa dam
des ye chamke cham cham cham
sukh dukh sab me.n saathii ham
baa.nTe.n KHushiyaa.n baa.nTe.n Gam
kabhii na ko.ii aa.nkh ho nam
ham ik ik ke hai.n ham-dam
ham se KHushiyo.n kii jham jham
des ye chamke cham cham cham
aisaa ko.ii kaam kare.n
jag me.n is ko aam kare.n
mehnat sub.h-o-shaam kare.n
duniyaa bhar me.n naam kare.n
apnaa uu.nchaa ho parcham
des ye chamke cham cham cham
maulaa teraa rahm-o-karam
is dhartii par ho har dam
rahe hamesha miTTii nam
phuul khilaa.e har mausam
saa.nse.n mahke.n chahke dam
des ye chamke cham cham cham
har chehre par phuul khile
har maathe par chaa.nd uge
aa.nkh me.n ik ik diip jale
ik ik lab par giit saje
Dhal jaa.e har shaam-e-Gam
des ye chamke cham cham cham
nafrat kii diivaar gire
raste se banduuq haTe
kiina ranjish bair miTe
dahshat kaa har shor thame
ruk jaa.e ye dham dham dham
des ye chamke cham cham cham

Ghazanfar
Nazm

pahaDa

do ikam do do duunaa chaar
sab se karte rahnaa pyaar
do tiyaa.n chhe do chauko aaTh
yaad karo tum apnaa paaTh
do panje das do chhik baarah
achchhaa la.Dkaa sab ko pyaaraa
do satte chaudah do aThe sola
baato.n me.n amrit ras gholaa
do navaa aThaarah do daham biis
ban jaa.o tum dil ke ra.iis
ustaado.n ko shaad karo
apnaa pahaa.Daa yaad karo

Jauhar Rahmani
Nazm

aaj ka aKHbar

darvaaze pe khaT se hu.ii ik aavaaz
aur mai.n chau.nk ga.ii
zaruur hogaa aaj kaa aKHbaar
darvaaza khol kar dekhaa
meraa andaaza sahii nahii.n thaa
vahaa.n aKHbaar pa.Daa nahii.n thaa
vahaa.n thaa aag kaa ek golaa
us me.n lipTii thii.n
chand maslii hu.ii ma.asuum kaliyaa.n
kuchh gandii tang galiyaa.n
bhuuk kaa soz
aur kuchh zaKHiira-andoz
be-roz-gaarii kaa sannaaTaa
Gurbat kaa chaa.nTaa
suukhaa aur baazaar manda
saath me.n KHud-kushii kaa thaa phandaa
sarhado.n ke jhag.De
jang
aur ek KHatra atom-bomb
kitne jangal
ghaTtii hariyaalii
biimaarii
aspataalo.n kii bad-halii
ghoTaalo.n kaa shor
aur rishvat-KHorii kii ho.D
zulm-o-sitam kii daastaane.n
dhamaako.n kii aavaaze.n
dimaaG ghuum gayaa
phir Gaur se dekhaa
are nahii.n
vo aaj kaa aKHbaar hii thaa
larazte kaa.npte haatho.n se uThaa liyaa
uThaanaa to thaa hii naa

Iffat Faridi
Nazm

KHurd-rau dalilen

vo kyaa thaa
qahqaha thaa
chiiKH thii
chi.nghaa.D thii
yaa dahaa.D thii?
us ne samaa.at chiirtii aavaaz kaa golaa
utartii raat kii bhiigii hu.ii pahnaa.ii me.n daaGaa
to mere paa.nv ke niiche zamiin chalne lagii
ye tum ne kyaa kiyaa merii dabii aavaaz ne puuchhaa
to vo ik ghuu.nT paanii se phaTii aavaaz ko sii kar
kisii andhe ku.e.n kii tah se bolaa
mujhe jab bhii miirii bedard soche.n ta.ng kartii hai.n
zamaane kii ravish se jab mirii KHurd-rau daliile.n ja.ng kartii hai.n
kitaabe.n jab mire sar kaa nishaana baa.ndh ke apnii ibaarat sang kartii hai.n
to mujh se aur kuchh bhii ho nahii.n saktaa
mai.n ye bedard aavaazaa lagaataa huu.n
vagarna so nahii.n saktaa

Waheed Ahmad
Nazm

etiraf

ai dil-e-zinda sach bataa ki tujhe
aaKHirash intizaar kis kaa hai
kaun sii sub.h terii nazro.n me.n
ho sakii sub.h-e-intiKHaab kabhii
kaun saa lamha tere aa.ngan me.n
lamha-e-jaavedaa.n nazar aayaa
kis kiran ne tire lahuu ko chunaa
kab havaa ne taraash lii.n raahe.n
kin nigaaho.n ne tujh ko parkhaa hai
kin saliibo.n ne teraa qad naapaa
kab tiraa naGma jaan-e-mahfil thaa
kab tire saaya me.n humaa aayaa
kab tirii zulf kaa bharam TuuTaa
phir tujhe shikva kyo.n rahaa ki tujhe
zindagii raas aa sakii na kabhii
tuu ne kab zindagii se ulfat kii
kab use marham-e-vafaa jaanaa
kab fazaa.o.n me.n tuu ne ras gholaa
har taraf talKHiyo.n ke rishte hai.n
tuu ne kab un kaa zaa.iqa chho.Daa

Anees Sultana
Nazm

chup

tuu ne sard havaa.o.n kii zabaa.n siikhii hai
tere ThanDe lams se dha.Dkane.n yaKH-basta hu.ii.n aur mai.n chup huu.n
mai.n ne vaqt-e-sub.h chi.Diyo.n kii suriilii chahchahaahaT ko sunaa hai
aur mere zehn ke saagar me.n naGme bulbule ban kar uThe hai.n
tere ka.Dve bol se har-suu hai.n aavaazo.n ke laashe
aur mai.n chup huu.n
mai.n ne vo maasuum pyaare gul-badan dekhe hai.n
jin ke marmarii.n jismo.n me.n paakiiza mohabbat ke nasheman hai.n
tire in khurdure haatho.n ne ye saare nasheman noch Daale
aur mai.n chup huu.n
mai.n ne dekhe hai.n vo chehre chaa.nd jaise Guncha-suurat
jin kii aa.nkhe.n aa.ina hai.n aane vaale mausamo.n kaa
tuu ne un aa.nkho.n me.n bhii kaa.nTe chubho.e
aur mai.n chup huu.n
baa-kamaal o baa-safaa vo log bhii dekhe hai.n mai.n ne
jin ke ho.nTo.n se khile hai.n sidq o daanaa.ii ke phuul
tuu ne un ho.nTo.n ko gholaa zahr me.n
aur mai.n chup huu.n

Ejaz Farooqi
Nazm

chand

shakl hai merii jaise kaToraa
yaa ko.ii chaa.ndii kaa golaa
rang hai meraa goraa goraa
a.ndherii shab kaa mai.n huu.n ujaalaa
meraa ujaalaa har jaa phailaa
baaG ho bastii yaa ho sahraa
chaahtii hai mujh ko sab duniyaa
ghar ghar hai meraa hii charchaa
mujh se bahaltaa hai jii sab kaa
chhoTaa bachcha ho yaa buu.Dhaa
hai.n aakaash pe jitne taare
hai.n ye sab mere hii pyaare
merii chamak ke aage dekhii
raushnii hai in sab kii phiikii
haq ne itnaa rutba ba.Dhaayaa
mai.n ne uu.nchaa darja paayaa
tum ai bhole bhaale la.Dko
dekho mujh ko aur sabaq lo
faa.eda tum bhii kuchh pahu.nchaa.o
jiyo to kaam sabho.n ke aa.o
giit tumhaare gaa.egii duniyaa
hogaa tumhaaraa har-jaa charchaa
haq hai 'jauhar' kaa ye kahnaa
kaam aanaa jab tak bhii rahnaa

Banne Miyan Jauhar
Nazm

wo aur main

jab zamii.n ke pyaase ho.nT
buu.nd buu.nd ko tarse
us kii kokh ne jab bhii
sabz bachche jan.ne kii aarzuu me.n lab khole
tab shafiiq baadal ne
apnii jaa.n ke amrit se
is zamii.n ke siine me.n
qatra qatra ras gholaa
be-badan daraa.Do.n se
zindagii ugaa Daalii
haa.n ye sab hu.aa lekin
ko.ii aa ke baadal se
sirf is qadar puuchhe
terii pyaas kaa dozaKH
sard hai ki jaltaa hai

Khan Mohammad Khaleel
Nazm

keyboard actiwist

jango.n KHuun-aashaamiyo.n kii gard
chehro.n par o.Dhe
hairaa.n lab basta bachcho
saahil par siip kii maanind
au.ndhe mu.nh bikhre motii jaise bachcho
be-libaas sa.Dko.n par bhaagte
dahshat-zada suukhe bachcho
KHudaa ko is duniyaa kii shikaayat lagaane vaale
rote bilakte jaa.n se guzarte bachcho
taar-taar pairaahan jism dariida ruuh raakh badan
aziim insaanii tahziib ke
malbe tale dabe mazluum bachcho
tayyaaro.n kii ghan-garaj sun kar sahamte
gola-baarii se peT bharte bachcho
kachre se chun kar khaate be-KHaanumaa.n sayyaaro
peT kaa dozaKH bharne ko
ghaas ubaalte bachcho
ham ne tumhaare liye
kitnii hii udaas nazme.n likhii.n
nauhe gaa.e
marsiye pa.Dhe
aur tum phir bhii saakit baiThe ho
duniyaa ko shaakii nazar se takte ho
bataa.o bhalaa
keyboard activist
aur kyaa kar saktaa thaa

Sabeen Ali
Nazm

badla

chiiKHe.n sun kar dau.Daa aaya
tiin baras kaa thaa jab mai.n ne
pahlii baar ye manzar dekhaa
gaalii thappa.D ghuu.nsa dhakkaa
kamre me.n ik mard-e-vahshii
aurat ke nazdiik kha.Daa thaa
aur use baalo.n se us ke
khii.nch rahaa thaa
farsh pe baiThii aurat rotii jaatii thii
mai.n ne dekhaa
aur aurat kii jaanib lapkaa
mard ne aurat ke baalo.n ko
haatho.n se aazaad kiyaa thaa
aurat merii jaanib bhaagii
KHauf se aa.nkho.n me.n aa.nsuu the
dahshat se peshaab bhii niklaa
is se pahle mard hamaarii jaanib aataa
mai.n bhii us aurat ko bachaane
rote rote
us ke aage kha.Daa hu.aa yuu.n
jaise ik diivaar kha.Dii ho
lekin ye diivaar bahut hii chhoTii niklii
khii.nch ke baalo.n se aurat ko
mard ne kas ke Thokar maarii
aurat ko diivaar ne rokaa
aur palTaa ke farsh pe paTKHaa
dard se paagal ho ga.ii aurat
maathe se favvaara uchhlaa
KHuun se kap.De laal hu.e
aise me.n haatho.n ko uThaa kar
us ne top kaa aaKHirii golaa aise daaGaa
allaah tujh ko Gaarat kar de
TuuTe.n tere haath aur paa.nv
aur tujhe bas maut aa jaa.e

Yashab Tamanna
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now