Search result for "harf-e-haq" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "harf-e-haq"

Nazm MATCHES FOR "harf-e-haq"

Nazm

aaj-kal

harf-e-haq dil se zabaa.n tak laa rahaa huu.n aaj-kal
qissa-e-daar-o-rasan dohraa rahaa huu.n aaj-kal
halqa-e-zulf-e-sanam kii tiirgii se duur huu.n
zindagii ke pech-o-KHam suljhaa rahaa huu.n aaj-kal
shaaKH-e-gul par ab na paa.oge mujhe tum naGma-KHvaa.n
aa.ndhiyo.n ke paalne me.n gaa rahaa huu.n aaj-kal
ho rahegii qa.ar-e-dariyaa kii haqiiqat aashkaar
mauj-o-tuufaa.n ke thape.De khaa rahaa huu.n aaj-kal
apnii duniyaa-e-tag-o-dau apnii kisht-e-ziist par
abr-e-rahmat ban ke mai.n KHud chhaa rahaa huu.n aaj-kal
mere jabr-o-qahr kii hamd-o-sanaa ke baa'd ab
apne istiqlaal ke gun gaa rahaa huu.n aaj-kal
vaadii-e-ishq-o-junuu.n me.n rah-ravaan-e-shauq ko
ma.anii-e-harf-e-vafaa samjhaa rahaa huu.n aaj-kal
taaki anvaar-e-suKHan se jagmagaa jaa.e jahaa.n
sham.a kii maanind jaltaa jaa rahaa huu.n aaj-kal
ab ki yaaraan-e-vatan kii diid kaa imkaa.n nahii.n
'ashk' Gurbat me.n sukuu.n saa paa rahaa huu.n aaj-kal

Masoom Sharqi

Nazm

ishq ke banjh mausam

'ufuq ke zard gaalo.n par jamii hai gard sadiyo.n kii
thakan kii raakh me.n lipTii hu.ii taariik pagDanDii
kisii KHaalii kaTore me.n pa.Dii hai pyaas raadhaa kii
nafas kii dhuup me.n jal bujh ga.e hai.n vasl ke sapne
ruto.n ke baa.njh-pan se u.D rahii hai KHaak bastii me.n
na shaaKH-e-jaa.n pe ko.ii gul na ko.ii KHushbuu-e-hijraa.n
ye kaisii fasl-e-vahshat hai
ki jis me.n aarzuu ke naKHl-e-sabza-zaar suukhe hai.n
dariicho.n ke paTolo.n se lipaT kar mar ga.ii dastak
nigaaho.n ke piyaalo.n me.n ko.ii manzar nahii.n bastaa
faqat ik be-hisii kii jo.nk lipTii hai KHayaalo.n se
guzarte saa'ato.n ke reg-zaaro.n par
mohabbat ke kutub-KHaane larazte gard ke tuufaa.n
na ab vo lauh-e-dil baaqii na vo tahriir-e-jaa.n baaqii
vo jin ke lams se khilte the in be-jaan rasto.n par
Gul-e-tar kii tarah jaaduu
vo sab jaaduu vo sab qisse
isii be-mehr miTTii kii taho.n me.n jaa ke so.e hai.n
jahaa.n ab pyaar kii ko.npal nikalne se rahii saa.ii.n
'ajab ik habs hai shaam-e-tamannaa kii fazaao.n me.n
ki ab harf-e-vafaa kii raakh bhii u.Dtii nahii.n yaa.n par
ye 'ishq ke baa.njh mausam hai.n
'ishq ke baa.njh mausam hai.n

Muhammad Ijaz Ul Haq

Nazm

shab-e-hijran

havaa be-mehr thii us raat ThanDii aur kaTiilii
saa.ns lenaa sar se uu.nchii lahr se Takkar lagaanaa thaa
sadaa ko.ii nahii.n thii
samt kii ta.ayyun mushkil thii
nashebii bastiyo.n me.n raaste ik duusre me.n KHatm hote the
tujhe kyaa alam hai vo raat sar-taa-paa shab-e-hijraa.n hamaare haq me.n kaisii thii
lakiire.n haath kii naa-mehrbaa.n
maathaa ma.iishat kii tarah ta.ng aur ghar barkat se chehra nuur se aarii
gunaaho.n kaa kyaa maqduur thaa achchhaa amal bhii ho nahii.n paayaa
kisii bu.Dhiyaa kii kuTiyaa me.n diyaa jhaa.Duu
na ro.e baa-vazuu ho kar
na kuchh tartiil na tahliil
ho.nTo.n se du.aa hii phuuTtii lekin hamaarii tiira rozii raat ke har brij par
bedaar aur choukas thii
gaahe gaahe ik lalkaar aatii thii azal kii lauh se
aur ham mano.n miTTii ke niiche sahm jaate the
havaa be-mehr thii us raat ThanDii kaTiilii
saa.ns lenaa sar se uu.nchii lahr se Takkar lagaanaa thaa

Mohammad Izhar ul Haq

Nazm

december lauT aaya hai

puraanii Diary ke KHushk hote zard panno.n se
kisii bhuulii hu.ii tasviir ke dhu.ndle nuquush ab phir
mire kamre kii tanhaa.ii me.n dastak dene aa.e hai.n
havaa kii sard lahro.n me.n
tumhaarii yaad kii KHushbuu
kisii bichh.De hu.e mausam kii aahaT ban ke aa.ii hai
ga.ii rut ke tapaak-e-harf kii garmii
kivaa.Do.n kii daraazo.n se guzar kar jab bhii aatii hai
mire dil ke nihaa.n-KHaano.n me.n jaise
barf girtii hai
vo pichhle saal kaa manzar
ki jis me.n haath haatho.n me.n liye ham
phuul kii mahkaar me.n ghulte hu.e lamho.n ko ginte the
vo ab KHvaabo.n kii kirchii hai
suno vo shaam-e-ruKHsat kaa
dhu.aa.n jo ab bhii bastii kii fazaa me.n raqs kartaa hai
mirii aa.nkho.n kii be-KHvaabii kaa maatam ban ke phailaa hai
shajar ab nange paa.o.n hai.n
barahna shaaKH ke dukh par parinde bain karte hai.n
puraanii vaz' kaa suuraj
ka.ii biite hu.e lamho.n kii chaadar taan letaa hai
palaT aa.o ki is se qabl
sab raste dhu.ndlake kii ka.Dii diivaar ban jaa.e.n
palaT aa.o ki is se qabl
kisii yaKH-basta shab kii KHaamushii me.n
aaKHrii ummiid kaa saayaa bhii so jaa.e

Muhammad Ijaz Ul Haq

Nazm

ajnabi sahil

'ufuq kii god me.n lipTii hu.ii ye dhund kii chaadar
ye bikhre siip ye paa.o.n tale kuchlii hu.ii rete.n
sisaktii lahr ke siine pe ik niilaa hiraas aisaa
ki jaise vaqt kii diivaar par likkhii ko.ii tahriir-e-paariina
mai.n is anjaan saahil kii tapish me.n kis ko Dhuu.nDuu.n
yahaa.n to baad-e-saahil bhii kisii aaseb kii suurat
mirii pahchaan ke sab naqsh-e-paa paamaal kartii hai
daraKHto.n ke ja.De saa.e kha.De hai.n chup kisii guu.ngii 'ibaadat me.n
parinde ajnabii hai.n aur in kii boliyaa.n bhii ek be-maa'nii sadaa-e-baa-gasht
ye kaisii pyaas hai jo bahr ke maathe pe larzaa.n hai
ye kitnaa faasla hai mere hone aur na hone ke jaziiro.n me.n
kinaare par pa.De TuuTe hu.e taKHto.n ke ye Tuk.De
kisii gum-gashta kashtii kii kahaanii ke adhuure harf lagte hai.n
vo kashtii jis me.n shaayad mai.n bhii ik din ham-safar thaa
magar ab is kinaare kii KHamoshii mujh se kahtii hai
musaafir tuu yahaa.n ik vaahima hai ik tamaashaa hai
ye saahil teraa apnaa thaa magar sadiyo.n puraanii baat hai ab to
yahaa.n ab KHaak u.Dtii hai yahaa.n ab lahr rotii hai
tiraa chehra yahaa.n kii vus'ato.n me.n gum hu.aa kab kaa

Muhammad Ijaz Ul Haq

Nazm

salamat sabucha tera saqiya

qalam ko bachaa
harf-e-haq kii sazaa
bhugatne kii KHaatir sadaa
saaqiyaa
salaamat sabuucha tiraa

Shafiq Fatima Shera

Nazm

dua

ishq kaa sirr-e-nihaa.n jaan-e-tapaa.n hai jis se
aaj iqraar kare.n aur tapish miT jaa.e
harf-e-haq dil me.n khaTaktaa hai jo kaa.nTe kii tarah
aaj iz.haar kare.n aur KHalish miT jaa.e

Faiz Ahmad Faiz

Nazm

mujhe jaana hai ek din

abhii tahziib-e-adl-o-haq kii kashtii khe nahii.n saktii
abhii ye zindagii daad-e-sadaaqat de nahii.n saktii
abhii insaaniyat daulat se Takkar le nahii.n saktii
mujhe jaanaa hai ik din terii bazm-e-naaz se aaKHir

Asrarul Haq Majaz

Nazm

aaKHiri aadmi

bujhaa do
lahuu ke samundar ke us paar
aa.ina-KHaano.n me.n ab jhilmilaate hu.e qumqumo.n ko bujhaa do
ki dil jin se raushan thaa ab un charaaGo.n kii lau bujh chukii hai
miTaa do
munaqqash dar-o-baam ke jagmagaate
chamakte hu.e sab buto.n ko miTaa do
ki ab lauh-e-dil se har ik naqsh harf-e-Galat kii tarah miT chukaa hai
uThaa do
lahuu ke jaziire me.n
biphrii hu.ii maut ke zard panjo.n se parda uThaa do
ki ab is jaziire me.n
laasho.n ke ambaar bikhre pa.De hai.n
fazaa me.n har ik samt
jalte hu.e KHuun kii buu rachii hai
vo aa.nkhe.n jo apne badan kii tarah saaf shaffaaf thii.n
ab un daraKHto.n pe baiThe hu.e chiil kavvo.n gidho.n kii Gizaa bin chukii hai.n
ye sola december kii bujhtii hu.ii shaam hai
aur mai.n
is lahuu ke jaziire me.n jaltaa hu.aa aaKHirii aadmii huu.n

Fakhr-e-Alam Nomani

Nazm

ahl-e-junun

ham vahii ahl-e-junuu.n ahl-e-vafaa saahib-dil
ham ki har daur me.n auraaq-e-zamaana ke amii.n
vo lahuu apne hii maathe se bahaa hai jis se
aaj diivaar-e-KHirad kii hai lahuu-rang jabii.n

Noor -e-Shama Noor

Nazm

dil abhi

zindagii se uns hai
husn se lagaav hai
dha.Dkano.n me.n aaj bhii
ishq kaa alaav hai
dil abhii bujhaa nahii.n
ra.ng bhar rahaa huu.n mai.n
KHaaka-e-hayaat me.n
aaj bhii huu.n munhamik
fikr-e-kaa.enaat me.n
Gam abhii luTaa nahii.n
harf-e-haq aziiz hai
zulm naagavaar hai
ahd-e-nau se aaj bhii
ahd-e-ustuvaar hai
mai.n abhii maraa nahii.n

Sahir Ludhianvi

Nazm

ek dost ki KHush-mazaqi par

ho nahii.n saktaa tirii is ''KHush-mazaaqii'' kaa javaab
shaam kaa dilkash samaa.n aur tere haatho.n me.n kitaab
rakh bhii de ab is kitaab-e-KHushk ko baalaa-e-taaq
u.D rahaa hai ra.ng-o-buu kii bazm me.n teraa mazaaq
chhup rahaa hai parda-e-maGrib me.n mahr-e-zar-fishaa.n
diid ke qaabil hai.n baadal me.n shafaq kii surKHiyaa.n
maujzan juu-e-shafaq hai is tarah zer-e-sahaab
jis tarah ra.ngiin shiisho.n me.n jhalaktii hai sharaab
ik nigaarish-e-aatishii.n har shai pe hai chhaayaa hu.aa
jaise aariz par uruus-e-nau ke ho ra.ng-e-hayaa
shaana-e-giitii pe lahraane ko hai.n gesuu-e-shab
aasmaa.n me.n mun.aqid hone ko hai bazm-e-tarab
u.D rahe hai.n justujuu me.n aashiyaano.n ke tuyuur
aa chalaa hai aa.ine me.n chaa.nd ke halkaa saa nuur
dekh kar ye shaam ke nazzaara-haa-e-dil-nashii.n
kyaa tire dil me.n zaraa bhii gudgudii hotii nahii.n
kyaa tirii nazro.n me.n ye ra.ngiiniyaa.n bhaatii nahii.n
kyaa havaa-e-sard tere dil ko ta.Dpaatii nahii.n
kyaa nahii.n hotii tujhe mahsuus mujh ko sach bataa
tez jho.nko.n me.n havaa ke gungunaane kii sadaa
sabza-o-gul dekh kar tujh ko KHushii hotii nahii.n
uf tire ehsaas me.n itnii bhii ra.ngiinii nahii.n
husn-e-fitrat kii lataafat kaa jo tuu qaa.el nahii.n
mai.n ye kahtaa huu.n tujhe jiine kaa haq haasil nahii.n

Asrarul Haq Majaz

Nazm

hum to shair hain hum sach nahin bolte

fasl aatii hai jab hifz-e-pindaar kii
sach ke iz.haar kii
ham haqaa.eq se nazre.n churaa.e hu.e
maslahat ke janaaze uThaa.e hu.e
sar jhukaa.e hu.e
lauT jaate hai.n maazii ke sahraa.o.n me.n
baiTh kar phir Gam-e-zaat kii chhaa.nv me.n
sochte bhii nahii.n bolte bhii nahii.n
sahme sahme hu.e log milte ho.n jab
har taraf zaKHm ke phuul khilte ho.n jab
jaan-e-jaa.n kam se kam aise mausam me.n ham
harf-e-haq to kujaa lab nahii.n kholte
ham to shaa.ir hai.n ham sach nahii.n bolte

Suroor Barabankvi

Nazm

lahu pukarta hai

zamii.n ke siine se aur aastiin-e-qaatil se
guluu-e-kushta se behis zabaan-e-KHanjar se
sadaa lapaktii hai har samt harf-e-haq kii tarah
magar vo kaan jo bahre hai.n sun nahii.n sakte
magar vo qalb jo sa.ngii.n hai.n hil nahii.n sakte
ki un me.n ahl-e-havas kii sadaa kaa siisa hai
vo jhukte rahte hai.n lab-haa-e-iqtidaar kii samt
vo sunte rahte hai.n bas hukm-e-haakimaan-e-jahaa.n
tavaaf karte hai.n arbaab-e-giir-o-daar ke gird

Ali Sardar Jafri

Nazm

habib jalib

hariif-e-sunnat-e-aazar kaliim-e-jaada-e-fan
sanam-kade me.n muKHaatib buto.n ke rab se thaa
vo apne ahd kaa mansuur harf-e-haq kaa naqiib
saliib-e-vaqt pe faa.ez vo shaKHs kab se thaa

Muslim Shameem

Nazm

idhar na dekho

idhar na dekho ki jo bahaadur
qalam ke yaa teG ke dhanii the
jo azm-o-himmat ke mudda.ii the
ab un ke haatho.n me.n sidq-e-iimaa.n kii
aazmuuda puraanii talvaar mu.D ga.ii hai
jo kaj-kulah saahib-e-hasham the
jo ahl-e-dastaar mohtaram the
havas ke pur-pech raasto.n me.n
kulah kisii ne girau rakh dii
kisii ne dastaar bech dii hai
udhar bhii dekho
jo apne ruKHshaa.n lahuu ke diinaar
muft baazaar me.n luTaa kar
nazar se ojhal hu.e
aur apnii lahad me.n is vaqt tak Ganii hai.n,
udhar bhii dekho
jo harf-e-haq kii saliib par apnaa tan sajaa kar
jahaa.n se ruKHsat hu.e
aur ahl-e-jahaa.n me.n is vaqt tak nabii hai.n

Faiz Ahmad Faiz

Nazm

KHuda ko kaam karne do

KHudaa ko kaam karnaa hai
KHudaa ko kaam karne do
ye jo shaitaan kii rassii ko us ne Dhiil dii hai
ek mansuuba hai us kaa
yaqiinan aasmaa.n me.n
us ne apne apps kuchh aise
banaa.e hai.n
jinhe.n bar-vaqt download honaa hai
vo sub.h anqariib aa.egii
jab us kaa farishta suur phuu.nkegaa
abhii jo muTThiyo.n ko bhii.nch kar
taqriir karte hai.n
fazaa me.n moTe moTe haath lahraa kar
tum ik din dekh paa.oge
tumhaaraa rab
labo.n ko sii ke kin iqdaam kii taiyaariyo.n me.n thaa
vo harf-e-haq ko saabit kar ke chho.Degaa
in ahl-e-shar ke qadmo.n se zamii.n sarkegii
aur un kii moTii moTii muTThiyo.n se
dho.ns kii miTTii
ret kii maanind jha.D jaa.egii
bahut be-taab mat ho tum zaraa Thahro
vo din aa.egaa jab tum dekh paa.oge
ye sab chaupaayo.n kaa peshaab-o-gobar bechte rah jaa.e.nge
tumhaare paas shahriyat ke kaaGaz aap pahu.nche.nge
tum duudh me.n Dubkii lagaa.oge
KHudaa ko kaam karnaa hai
KHudaa ko kaam karne do

Fay Seen Ejaz

Nazm

shaer log

har ik daur me.n har zamaane me.n ham
zahr piite rahe, giit gaate rahe
jaan dete rahe zindagii ke liye
saa.at-e-vasl kii sarKHushii ke liye
diin o duniyaa kii daulat luTaate rahe
faqr-o-faaqa kaa tosha sambhaale hu.e
jo bhii rasta chunaa us pe chalte rahe
maal vaale haqaarat se takte rahe
ta.an karte rahe haath malte rahe
ham ne un par kiyaa harf-e-haq sa.ng-zan
jin kii haibat se duniyaa laraztii rahii
jin pe aa.nsuu bahaane ko ko.ii na thaa
apnii aa.nkh un ke Gam me.n barastii rahii
sab se ojhal hu.e hukm-e-haakim pe ham
qaid-KHaane sahe, taaziyaane sahe
log sunte rahe saaz-e-dil kii sadaa
apne naGme salaaKHo.n se chhante rahe
KHuu.n-chakaa.n dahr kaa KHuu.n-chakaa.n aa.iina
dukh-bharii KHalq kaa dukh-bharaa dil hai.n ham
tab.a-e-shaa.er hai ja.ngaah-e-adl-o-sitam
munsif-e-KHair-o-shar haqq-o-baatil hai.n ham

Faiz Ahmad Faiz

Nazm

gandhi

yahii dharm hai yahii asl dii.n ki ho qaul sach to amal hasii.n
haq-o-ahl-e-haq pe rahe yaqii.n ye payaam sab ko sunaa diyaa

Iqbal Sohail

Nazm

tulsidas

rahbaraan-e-raah-e-haq jab rahbarii farmaate hai.n
bhuule-bhaTke sab musaafir raah par aa jaate hai.n

Jagat Mohan Lal Ravan

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now