Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "huvash-shaafii"

Nazm MATCHES FOR "huvash-shaafii"

Nazm

huwash-shafi

agar kabhii ye gumaan guzraa
ki zindagii talKH ho rahii hai
to is masiihaa-nafas ko Dhuu.nDaa
jo is maraz kaa tabiib haaziq hai
jis ke shiirii.n labo.n me.n
namkiin aarizo.n me.n
Gazaal aa.nkho.n kii gahrii jhiilo.n me.n
aab-e-haivaa.n chhalak rahaa hai
jo merii tanhaa.ii kaa mudaavaa
mire maraz ke liye davaa hai
ki sharbat-e-diid hii to
in talKH-kaamiyo.n ke liye shifaa hai

Sarshar Siddiqui
Nazm

shairi

hijr bhii shaa'irii vasl bhii shaa'irii
dard hai shaa'irii aur sukuu.n shaa'irii
rang bhii shaa'irii phuul bhii shaa'irii
aur maahaul me.n phailtii KHushbu.e.n shaa'irii
din kii taabindagii shaa'irii raat kaa har fusuu.n shaa'irii
aag bhii shaa'irii
aur samundar se uThtii hu.ii lahar kii har tabaahii bhii ik shaa'irii
hai havas shaa'irii
aur qanaa'at kaa husn-e-yaqii.n shaa'irii
shaa'irii kun bhii hai
aur dhunkii hu.ii ru.ii kii misl u.Dte hu.e koh bhii shaa'irii
shaa'irii hai azal shaa'irii hai abad
ye zamii.n aasmaa.n aur un ke miyaa.n
sab kaa sab shaa'irii
shaa'irii vaqt hai
shaa'irii isti'aara tavaazun kaa hai
aur ye kaa.enaat-e-basiit ik mukammal tavaazun kaa shahkaar hai

Munir Anwar
Nazm

mustaqbil ka ek din

zamiin ik din
falak ke siine me.n
ko.ii KHanjar
utaar degii
KHalaa.e.n chiiKHe.ngii
TuuT kar jab
gire.nge dhartii pe
chaa.nd-taare
idhar masarrat kaa jashn hogaa
zamii.n ke baasii
bhare.nge
apnii havas ke daaman

Shahid Mahuli
Nazm

bayan safai

raat utartii ga.ii
mujh ko KHabar hii na thii

Shamsur Rahman Faruqi
Nazm

narm aawazon ke bich

narm aavaazo.n se ik niilii KHamoshii hai ravaa.n
yak-ba-yak u.D ga.e
vo kaale parind
jin ke saayo.n se shu.aa.o.n me.n thii ik be-KHvaabii
ab vahii KHufta-mizaajii vahii be-harf KHumaar
narm aavaazo.n kii thapkii se
ye sab hosh o havaas
apne iz.haar ke bahte hu.e dariyaa kii jagah
barf kii jhiil bane

Aslam Emadi
Nazm

pyas

zamaane me.n hamesha tishnagii hii kaam aatii hai
isii se aabruu-e-mai-kada kii aab hai qaa.em
isii ke dam se sarshaarii-o-mai-KHvaarii rahe daa.im
isii se rind kii rindii bhii rangii.n jaam paatii hai
'ibaadat rang me.n aa.e sadaa tishna-labii hii se

Prem Pal Ashk
Nazm

agar yahi hai shaeri to shaeri haram hai!

agar yahii hai shaa.erii to shaa.erii haraam hai!
KHirad bhii zer-e-daam hai junuu.n bhii zer-e-daam hai

Mohsin Bhopali
Nazm

ghaalib

'Gaalib' teraa kalaam navaa-e-sarosh hai
ilhaam-e-Gaib-o-naGma-e-saaz-e-KHamosh hai

Chandar Bhan Kaifi Dehelvi
Nazm

uske nam

vahii Guncho.n kii shaadaabii vahii phuulo.n kii nik.hat hai
vahii sair-e-gulistaa.n hai vahii josh-e-masarrat hai
vahii mauj-e-tabassum hai vahii andaa-e-fitrat hai
vahii daam-e-taKHayyul hai vahii ra.ng-e-haqiiqat hai
vahii sub.h-o-masaa hotii hai lekin tum nahii.n hotii.n
ba.Dii ra.ngii.n fazaa hotii hai lekin tum nahii.n hotii.n

Shaukat Pardesi
Nazm

bulbul o parwana

giraa rahaa hai tiraa shauq sham.a par tujh ko
mujhe ye Dar hai na pahu.nche kahii.n zarar tujh ko
faroG-e-shola kahaa.n aur faroG-e-husn kahaa.n
hazaar haif ki itnii nahii.n KHabar tujh ko
ta.Dap ta.Dap ke jo be-iKHtiyaar kartaa hai
nahii.n hai aag ke shola se aah Dar tujh ko
ye nanhe nanhe par o baal ye sitam kii tapish
milaa hai aah qayaamat kaa kyaa jigar tujh ko
qariib sham.a ke aa kar jo thartharaataa hai
nahii.n hai jaan ke jaane kaa Gam magar tujh ko
milegii KHaak bhii Dhuu.nDe na terii mahfil me.n
sabaa u.Daa.e phiregii dam-e-sahar tujh ko
samajh na sham.a ko dil soz aafiyat dushman
jalaa ke aah rahegii ye musht-e-par tujh ko
nahii.n hai tuu abhii soz-o-gudaaz ke qaabil
nahii.n hai ishq kii arz o niyaaz ke qaabil
tapish ye bazm me.n faanuus par nahii.n achchhii
ki aag laag kii o be-KHabar nahii.n achchhii
ka.Dii hai aa.nch mohabbat kii sham-e-mahfil se
lagaavTe.n are tufta-jigar nahii.n achchhii
ta.Dap ta.Dap ke na diivaana-vaar sham.a pe gir
tapish ye shauq kii, o musht-e-par nahii.n achchhii
ye jaa.n-gudaazi-e-soz-e-vafaa sar-e-mahfil
kahii.n na ho tire jii kaa zarar nahii.n achchhii
la.Daa na sham.a se aa.nkhe.n ki hai uduu terii
tirii nigaah-e-mohabbat-asar nahii.n achchhii
ye nanhe nanhe paro.n kii ta.Dap ye betaabii
Hariif-e-shoKHi-e-barq-e-nazar nahii.n achchhii
ye par sameT ke faanuus par tiraa girnaa
ye be-KHudii are shoriida-sar nahii.n achchhii
chaman me.n chal ki dikhaa.uu.n bahaar-e-shaahid-e-gul
nazar fareb hai.n naqsh-o-nigaar-e-shaahid-e-gul
mai.n bul-havas nahii.n samjhaa hai tuu ne kyaa mujh ko
pasand shaahid-e-gul kii nahii.n adaa mujh ko
firaaqe-e-gul me.n mai.n minnta-kash-e-fuGaa.n huu.n dareG
ye daaG-e-soz-e-judaa.ii na de KHudaa mujh ko
Dil-e-gudaaKHta le kar azal se aayaa huu.n
banaayaa bazm me.n hai soz-aashnaa mujh ko
jale vo bazm me.n chup-chaap aur mai.n na jaluu.n
ba.iid ishq se hai ho Gam-e-fanaa mujh ko
tirii nigaah me.n jaa.n-soz hai jo ai bulbul
vo aah aag kaa shola hai jaa.n-fazaa mujh ko
khulaa hai tujh pe abhii aah raaz-e-ishq kahaa.n
tuu bul-havas hai, tujhe imtiyaaz-e-ishq kahaa.n

Suroor Jahanabadi
Nazm

mera watan

dil-rubaa laala ho fazaa terii
mujh ko bhaa.ii na ik adaa terii
lutf se ba.Dh ke hai jafaa terii
vaah-re hindostaa.n vafaa terii
mai.n na maanuu.n kabhii tiraa kahnaa
mai.n na baKHshuu.n kabhii KHataa terii
bar-tar-az-KHaar hai tiraa gulshan
zahr se kam nahii.n havaa terii
KHaalii-az-kaifiyat tirii har chiiz
baat har ek be mazaa terii
dard-e-dil me.n ta.Dap ke mar jaa.uu.n
mai.n na Dhuu.nDuu.n kabhii shifaa terii
kaun sii baat terii lutf-aamez
kaun sii chiiz dil-kushaa terii
tujh ko jannat-nishaan kahte hai.n
ham jahannam kii jaan kahte hai.n
tujh ko kas baat par hai naaz bataa
kyaa nahii.n aur mulk tere sivaa
terii aab o havaa latiif sahii
tujh se ba.Dh kar spain kaa KHitta
tujh ko apnii zamiin kaa hai ghamanD
tujh se afzal kahii.n hai america
hasan par apne naaz hai tujh ko
hasan tujh se sivaa etaaliyaa kaa
tujh ko ga.ngaa kaa apnii dhokaa hai
tuu ne dekhaa nahii.n hai siin ko jaa
mausiiqii par tujhe hai naaz bahut
is me.n juz dard-o-Gam dharaa hai kyaa
falsafa teraa agle vaqto.n kaa
falsafa dekh jaa ke europe kaa
tujh me.n phir aan kyaa rahii baaqii
terii mahfil na kuchh na kuchh saaqii
haa.n muravvat kaa tujh me.n naam nahii.n
haa.n uKHuvvat kaa tujh me.n naam nahii.n
tujh se bad-naam ishq saa ustaad
aur mohabbat kaa tujh me.n naam nahii.n
aashtii siikhe tujh se aa ke ko.ii
haa.n KHusuumat kaa tujh me.n naam nahii.n
terii har baat me.n safaa.ii hai
aur kuduurat kaa tujh me.n naam nahii.n
tujh ko aur hurriyat se kyaa nisbat
is zaruurat kaa tujh me.n naam nahii.n
shaad hai.n taire apne begaane
aur shikaayat kaa tujh me.n naam nahii.n
terii tahziib tujh ko maujib-e-faKHr
haa.n jahaalat kaa tujh me.n naam nahii.n
baat duniyaa se hai judaa terii
vaah ai hindostaa.n adaa terii
tere rasm-o-rivaaj ne maaraa
is maraz ke ilaaj ne maaraa
terii Gairat nai kar diyaa barbaad
KHaandaano.n ke laaj ne maaraa
kyaa kare.n har gha.Dii yahii hai fikr
roz kii ehtiyaaj ne maaraa
aa.e din call kaa hai zikr-azkaar
ik zaraa se anaaj ne maaraa
aur sab par vabaa kaa ik turra
is anokhe KHiraaj ne maaraa
baKHt bargashta aarzu.e.n bahut
havas-e-siim-o-aaj nai maaraa
na kare.n kaam kuchh to khaa.e.n kyaa
roz ke kaam-kaaj ne maaraa
tuu to rahne kaa kuchh maqaam nahii.n
tujh me.n insaaniyat kaa naam nahii.n
qaid tuu ne kiyaa hasiino.n ko
mah-jabiino.n ko naazniino.n ko
zevar-e-ilm se rakhaa aarii
tuu ne qudrat ke in nagiino.n ko
iKHtiyaar o pasand kii ai hind
kyaa zaruurat na thii hasiino.n ko
KHuub pahchaanii tuu ne qadr in kii
KHuub samjhaa tuu in KHaziino.n ko
ku.e.n jha.nkvaa.e naazniino.n se
zahr khilvaayaa mah-jabiino.n ko
Duube jaate hai.n kaun aa ke bachaa.e
bahr-e-hastii ke in safiino.n ko
tuu makaa.n thaa makaan ho ke diyaa
KHauf-e-aaraam in makiino.n ko
tujh pe tahziib ta.an kartii hai
tujh pe ilzaam KHalq dhartii hai
aarzuu hai tujhe hukuumat kii
jaah-o-sarvat kii shaan-o-shaukat kii
kyuu.n na ho tujh me.n himmat-e-aalii
dhuum har suu hai terii jur.at kii
to ne kasb-e-funuun-e-ja.ng kiyaa
sab me.n shohrat hai terii quvvat kii
qasme.n khaate hai.n log duniyaa me.n
terii millat tirii uKHuvvat kii
mulk-daarii me.n mulk-giirii me.n
vaah kyaa paidaa qaabiliyyat kii
tuu to ustaad se bhii ba.Dh niklaa
hairat-a.ngez tuu ne mehnat kii
aap aalam me.n tuu hai apnii misaal
aadamiyyat kii aur shujaa.at kii
ham-sarii kii kasii ko taab nahii.n
tiraa aafaaq me.n javaab nahii.n
daaG dil ke kise dikhaa.e.n ham
aisaa mushfiq kahaa.n se laa.e.n ham
dil me.n hai apne ham-nashii.n ik roz
aap ro kar tujhe rulaa.e.n ham
is tabii.at ko kas tarah bahlaa.e.n
dil ko kis chiiz se lagaa.e.n ham
kab talak roz ke kahe.n sadme
kab talak aafate.n uThaa.e.n ham
zahr kyuu.n ai falak na ham khaa le.n
jii se apne guzar na jaa.e.n ham
jo shikaayat ho kyuu.n na lab par aa.e
ek dukh ho use chhupaa.e.n ham
ai tamaddun ke raahat-o-aaraam
haa.e kas tarah tum ko paa.e.n ham
log uThaate hai.n zindagii ke maze
ham uThaate hai.n naa-KHushii ke maze

Meer Syed Nazeer Husain Nashad
Nazm

KHanjar talash karta hai

bashar rumuuz-e-muqaddar talaash kartaa hai
qazaa-o-qadr kaa mehvar talaash kartaa hai
faqiih-e-shahr sanam-KHaana-e-siyaasat me.n
siraat-e-diin kaa rahbar talaash kartaa hai
KHudaa ko chho.D ke jamhuur kaa havas-pesha
sukuun-e-qalb falak par talaash kartaa hai
mazaaq-e-adl se begaana hai magar insaan
fasaad-KHaana me.n yaavar talaash kartaa hai
pa.e najaat vatan me.n ba-faiz-e-aazaadii
shariif aadmii KHanjar talaash kartaa hai
fazaa-e-dahr me.n taKHriib kaa alam-bardaar
hayaat-saaz payambar talaash kartaa hai
taraashtaa hai baraahiim-e-asr sad-asnaam
charaaG-e-tuur par aazar talaash kartaa hai
barahna zulmat-e-tahziib me.n tan-e-maryam
masiih-e-vaqt kii chaadar talaash kartaa hai
sanam-kade me.n tafalsuf ke tiira-dil vaa.iz
uvais-o-KHaalid-o-buu-zar talaash kartaa hai
ilaaj KHaatir-e-millat kaa paasbaan-e-haram
la.iin-e-vaqt ke dar par talaash kartaa hai
KHuluus-e-diin ko ba.ad-az-KHaraabi-e-bisyaar
zamaana aaj mukarrar talaash kartaa hai
tan-e-shuyuuKH ba-zaahir galiim-posh sahii
zamiir shaahid-o-saaGar talaash kartaa hai
du.aa asiirii kii kartaa hai saahab-e-qur.aa.n
mafar Gulaamii se kaafar talaash kartaa hai
mazaaq-e-faqr hai rahmat asar zamaane me.n
azaab-e-kunz tava.ngar talaash kartaa hai
jahaan-e-shor me.n paiham yaziid kaa lashkar
husain-e-asr ko ghar ghar talaash kartaa hai
sa.nvar to saktii hai millat kii naasehaa taqdiir
lahuu zamaane kaa tevar talaash kartaa hai
miyaan-e-bahr sadaf me.n guhar to hai lekin
KHatar-pasand shanaavar talaash kartaa hai
zamaana batn-e-jahannam me.n ek muddat se
nishaat-o-kaif baraabar talaash kartaa hai
gunaahgaar hai 'bebaak' be-navaa lekin
nabii kaa gumbad-e-aKHzar talaash kartaa hai

Bebak Bhojpuri
Nazm

malik-ram

saahab-e-mulk-e-ilm maalik-raam
maalik-e-mulk-e-hilm maalik-raam
maulid-e-paak phaaliya kii zamii.n
hiir-o-raanjhaa kii sar-zamii.n ke qarii.n
shahr-e-gujraat me.n rahe hai ye muqiim
arz-e-lahore me.n hu.ii ta.aliim
nekii-o-KHair-o-KHalq me.n faiyyaz
dostii ke bahut ba.De nabbaaz
kaarvaa.n kaar-gaah-e-hikmat ke
la.al ik ma.adan-e-mohabbat ke
talabaa ke shafiiq-o-yaavar hai.n
bahr tahqiiq ke shanaavar hai.n
akmal-o-afazal-o-aliim-o-KHatiib
akram-o-aazam-o-shariif-o-nahiif
saahib-e-ifqra-o-banda-e-durvesh
dosto.n ke ba.De aqiide kesh
un ke maslak me.n be-riyaa.ii hai
un kii rindii me.n paarsaa.ii hai
nasr me.n un kii nazm kii buu-baas
nazm kii intihaa ke ramz-shanaas
kis qadar aan-baan hai un kii
be-niyaazaana shaan hai un kii
ab bhii chehre pe hai shabaab kaa nuur
sar-basar ilm kii sharaab kaa nuur
baat karne me.n phuul jha.Dte hai.n
kabhii la.Dte na ye jhaga.Dte hai.n
ilm kii justujuu pe jaan nisaar
bahar-e-tahqiiq roz-o-shab bedaar
raah-e-tahqiiq pe chale hai.n mudaam
chhaan Daale iraaq-o-misr-o-shaam
Germany ruus belgium london
har jagah dekhe ilm ke ma.adan
kaarvaa.n ilm kaa hai tez KHiraam
aur us ke amiir maalik-raam
saahab-e-ilm-o-saahab-e-iKHlaaq
dostii me.n ye fard KHalq me.n taaq
aashtii aur ilm kaa ik ganj
un se pahu.nchaa nahii.n kisii ko ra.nj
ramz-daa.n hai.n ye fikr-e-Gaalib ke
hai.n musannif ye zikr-e-Gaalib ke
mohtaram dost arsh-e-farshii ke
hai.n murattab ye nazr-e-arshii ke
hai.n ba-har-ra.ng aalimo.n ke habiib
nazr-e-zaakir unho.n ne dii tartiib
arabii faarsii ho yaa urdu
un kii baato.n me.n sab kii hai KHushbuu
un kii tasniif aurat aur islaam
paa.egii dahr me.n baqaa-e-davaam
KHuub likhaa talaazimaa kaa haal
KHaandaan-e-asad kaa husn maqaal
gul-e-ra.anaa hai nusKHa-e-arta.ng
ye bhii baa-kaif hai gul-e-sad-ra.ng
baratnaa bam ki armuGaa.n ba-daham
bas Ganiimat ki qalb-o-jaa.n ba-daham
ilm raa daada az nazar-e-tamkii.n
rahnumaa-e-ba-raah-e-ilm-o-yaqii.n
zehn farKHanda maGz taabinda
baad dar shahr-e-ilm paa.inda
ro raaz-e-hirs-o-aaz-o-tama-o-havas
nek-KHuu nek-qalb-o-nek-nafs
sahhr-e-naa-murdamaan-o-had-e-aazaad
bas hame.n mard-ast KHush-atvaar
mulk-e-ma.anii kaa baadshaah hai ye
shahr-e-inshaa kaa kaj-kulaah hai ye
KHatm hai arsh ab du.aa pe kalaam
ye rahe.n baa-muraad-o-shaad mudaam
husn-e-siirat kii sham.a jaltii rahe
shaaKH-e-ummiid aur phaltii rahe
zindagii ko mile nashaat tamaam
pur hamesha rahe suruur kaa jaam
nuur-e-KHurshiid kii tarah damke
ilm-o-tahqiiq kii ziyaa chamke
ilm kii raushnii ba.Dhaate rahe.n
ham ko bhii kuchh na kuchh sikhaate rahe.n

Arsh Malsiyani
Nazm

waqt-e-murawwat

mirii namaaz ki hai naGma-e-huval-baaqii
mirii namaaz ki hai naara-e-huval-maujuud
mirii namaaz ki hai ishq-e-naazir-o-manzuur
mirii namaaz ki hai hubb-e-shaahid-o-mash.huud

Josh Malihabadi
Nazm

mazafat

chhoTe chhoTe qasbo.n ke
dukh ajiib hote hai.n
sukh ajiib hote hai.n

Ishrat Afreen
Nazm

mazafat

chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n
aa.nsu.o.n kii bastii me.n
rasne-basne vaalo.n ko
kab ko.ii Garaz is se
kaarobaar-e-hastii me.n
naf' kyaa KHasaaraa kyaa
'umr ke KHazaane me.n
besh-o-kam kaa yaaraa kyaa
un kaa apnaa maslak hai
un kii apnii duniyaa hai
un gharo.n kii chaukhaT par
vaqt baa.ng detaa hai
mu.nh a.ndhere chakkii me.n
KHvaab piise jaate hai.n
chaa.nd sii raso.ii me.n
bartano.n ke aa.iine
dukh ko mu.nh chi.Dhaate hai.n
un gharo.n ke aangan me.n
din shuruu' hotaa hai
KHvaab kaate jaane se
zindagii kii Dorii me.n
sukh piro.e jaane se
aa.nkh ke kaToro.n me.n
Gam samo.e jaane se
mehrbaa.n mashaqqat ke
bojh Dho.e jaane se
din tuluu' hotaa hai
kyaariyo.n kii miTTii me.n
giit jab nahaate hai.n
rang chahchahaate hai.n
saath kii mu.nDero.n par
KHvaab par sukhaate hai.n
bachchiyaa.n KHayaalo.n me.n
apne ghar basaatii hai.n
mom ke gharo.ndo.n me.n
zindagii kii ha.nD-kuliyaa
dhuup se pakaatii hai.n
be-zabaan gu.Diyo.n se
jin kii aa.nkh dhaage kii
jin ke ho.nT resham ke
apne dil kii sab baate.n
baarhaa bataatii hai.n
aur rumuuz jiine ke
aap siikh jaatii hai.n
un gharo.n ke aa.ngan me.n
dopahar utartii hai
ek nannhii suu.ii kii
aa.nkh ke jharoke se
ik kiran ke mokhe se
dhuup ke hinaa.ii haath
tashtarii ba.Dhaate hai.n
chaahato.n ke miiThe rang
zaa.iqo.n ke naadiida
lams chho.D jaate hai.n
chuu.Diyaa.n khanaktii hai.n
haath baat karte hai.n
ang ang ha.nstaa hai
por por ke andar
dil dha.Dakne lagtaa hai
por por rotii hai
o.Dhnii bhigotii hai
KHvaab vo pa.Dosii hai
jis ke ujle kurte kaa
roz ik button TuuTe
dil ki vo mohalla hai
jis ke basne vaalo.n se
roz ik KHushii ruuThe
jaane kitne jismo.n ko
be-riyaa mohabbat kii
aag chaaT jaatii hai
jaane kitne nau-mauluud
KHvaab dafn hote hai.n
dil ke sard-KHaane me.n
jaane kitne rishto.n ko
dafn kar ke chupke se
vaqt ke gunaaho.n par
KHaak Daalii jaatii hai
un udaas galiyo.n me.n
sardiyo.n kii raato.n me.n
duur paar se aate
dil-navaaz giito.n ke
saa.nvle salone bol
chaa.nd ko rulaate hai.n
chaa.nd bholaa-bhaalaa hai
chaa.nd ko ye kyaa maa'luum
zindagii kii nauTankii
yuu.nhii chaltii rahtii hai
muflisii kii raqqaasa
taal par zamaane kii
jaane kitnii sadiyo.n se
ek jaise bolo.n par
raqs kartii rahtii hai
sub.h se zaraa pahle
bebasii ke bistar par
vo jo aa ke Dhahtii hai
bistaro.n ke sab paivand
us ko gudgudaate hai.n
be-sabab ha.nsaate hai.n
be-sabab rulaate hai.n
un galii mohallo.n me.n
raat jab utartii hai
maa.e.n apne bachcho.n ko
loriyaa.n sunaatii hai.n
apnii sard baa.nho.n kaa
paalnaa hilaatii hai.n
KHvaab vo dikhaatii hai.n
afsarii ke shaahii ke
KHvaab kaj-kulaahii ke
chaa.nd aur gulaab un ke
madrase jo jaate hai.n
qamchiyo.n se hotaa hai
bachpane kaa istiqbaal
phuul jaise jismo.n par
bed jab barastii hai
duur tak chaTaa.ii par
ik qataar me.n baiThe
lafz thartharaate hai.n
sab varaq kitaabo.n ke
aise pha.D.pha.Daate hai.n
jaise jaan khi.nchtii ho
un kii dars-gaaho.n me.n
qamchiyaa.n mu'allim hai.n
qamchiyaa.n mudarris hai.n
qamchiyaa.n raTaatii hai.n
sabr achchhii 'aadat hai
sabr aur qanaa'at se
zindagii sa.nvartii hai
un galii mohallo.n kaa
husn kam-suKHan bhii hai
aur bholaa-bhaalaa bhii
haa.n ye kam-suKHan la.Dkaa
bhiigtii maso.n ke saath
ghar se jab nikaltaa hai
'umr kii hade.n saarii
yuu.n phalaa.ng jaataa hai
muflisii havas-pesha
phuul jaise gaalo.n kaa
rang chuus letii hai
bholii-bhaalii baato.n se
ras nicho.D letii hai
aur phir zamaane ke
biich chho.D detii hai
peT be-hayaa dallaal
dar-ba-dar phiraataa hai
sau jatan sikhaataa hai
chhoTe chhoTe qasbo.n me.n
ghar ke saamne baiThii
siidhii-saadii ummiide.n
raah taktii rahtii hai.n
'umre.n biit jaatii hai
kuchh KHabar nahii.n miltii
Daakiyaa jab aataa hai
chaahato.n kii puu.njii me.n
ik raqam ba.Dhaataa hai
aur lauT jaataa hai
siidhii-saadii ummiide.n
ghar se jaane vaalo.n ko
ek jaise lafzo.n kii
bhejtii hai.n sauGaate.n
vaqt buu.Dhaa munshii hai
jis ko KHat kaa sab mazmuun
lafz lafz azbar hai
phir bhii puuchh letaa hai
aur kyaa likhuu.n bolo
phir se ab ke saavan me.n
saa.ibaa.n Tapaktaa hai
tan kii aur ik diivaar
Dhah ga.ii hai ab ke baar
siidhii-saadii ummiide.n
roz-o-shab kii chaukhaT par
'umr kaaT detii hai.n
jism KHaak ho jaa.e
jaan raakh ho jaa.e
peT to jahannum hai
ye javaan rahtaa hai
un kii aa.nkh kaa saavan
chaahe ko.ii mausam ho
mehrbaan rahtaa hai
chhoTe chhoTe qasbo.n ke
dukh 'ajiib hote hai.n
sukh 'ajiib hote hai.n

Ishrat Afreen
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

jamuna

dhiimii dhiimii bahne vaalii ek nahr-e-dil-nashii.n
aab-e-juu chhoTii sii ik naazuk KHiraam-o-naaznii.n
tishnagii-e-shauq ga.ngaa me.n bujhaane ke liye
jaa rahii hai apnii hastii ko miTaane ke liye
ye vo jamunaa hai ki dilkash jis kaa hai andaaz-e-husn
dekhte hai.n aah aashiq jis kaa KHvaab-e-naaz-e-husn
ye vo jamunaa hai ki gaatii hai.n suKHnavar jis ke giit
mutribaan-e-KHush-guluu kii hai.n zabaa.n par jis ke giit

Suroor Jahanabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now