Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "khayaabaa.n"

Nazm MATCHES FOR "khayaabaa.n"

Nazm

tariq ki dua

(undulus ke maidaan-e-ja.ng me.n)
ye Gaazii ye tere pur-asraar bande
jinhe.n tuu ne baKHshaa hai zauq-e-KHudaa.ii
do-niim un kii Thokar se sahraa o dariyaa
simaT kar pahaa.D un kii haibat se raa.ii
do-aalam se kartii hai begaana dil ko
ajab chiiz hai lazzat-e-aashnaa.ii
shahaadat hai matluub-o-maqsuud-e-momin
na maal-e-Ganiimat na kishvar-kushaa.ii
KHayaabaa.n me.n hai muntazir laala kab se
qabaa chaahiye us ko KHuun-e-arab se
kiyaa tuu ne sahraa-nashiino.n ko yaktaa
KHabar me.n nazar me.n azaan-e-sahar me.n
talab jis kii sadiyo.n se thii zindagii ko
vo soz us ne paayaa unhii.n ke jigar me.n
kushaad-e-dar-e-dil samajhte hai.n us ko
halaakat nahii.n maut un kii nazar me.n
dil-e-mard-e-momin me.n phir zinda kar de
vo bijlii ki thii naara-e-laa-tazar me.n
azaa.em ko siino.n me.n bedaar kar de
nigaah-e-musalmaa.n ko talvaar kar de

Allama Iqbal
Nazm

sochne do

ik zaraa sochne do
is KHayaabaa.n me.n
jo is lahza bayaabaa.n bhii nahii.n
kaun sii shaaKH me.n phuul aa.e the sab se pahle
kaun be-ra.ng hu.ii ra.nj-o-ta.ab se pahle
aur ab se pahle
kis gha.Dii kaun se mausam me.n yahaa.n
KHuun kaa qaht pa.Daa
gul kii shah-rag pe ka.Daa
vaqt pa.Daa
sochne do
sochne do
ik zaraa sochne do
ye bharaa shahr jo ab vaadi-e-viiraa.n bhii nahii.n
is me.n kis vaqt kahaa.n
aag lagii thii pahle
is ke saf-basta dariicho.n me.n se kis me.n avval
zah hu.ii surKH shu.aa.o.n kii kamaa.n
kis jagah jot jagii thii pahle
sochne do
ham se us des kaa tum naam o nishaa.n puuchhte ho
jis kii taariiKH na juGraafiya ab yaad aa.e
aur yaad aa.e to mahbuub-e-guzishta yaad aa.e
ruu-ba-ruu aane se jii ghabraa.e
haa.n magar jaise ko.ii
aise mahbuub yaa mahbuuba kaa dil rakhne ko
aa nikaltaa hai kabhii raat bitaane ke liye
ham ab us umr ko aa pahu.nche hai.n jab ham bhii yuu.nhii
dil se mil aate hai.n bas rasm nibhaane ke liye
dil kii kyaa puuchhte ho
sochne do

Faiz Ahmad Faiz
Nazm

ajnabi aurat

asia ke duur-uftaada shabistaano.n me.n bhii
mere KHvaabo.n kaa ko.ii ruumaa.n nahii.n!
kaash ik diivaar-e-zulm
mere un ke darmiyaa.n haa.il na ho!
ye imaaraat-e-qadiim
ye KHayaabaa.n, ye chaman, ye laala-zaar,
chaa.ndnii me.n nauha-KHvaa.n
ajnabii ke dast-e-Gaarat-gar se hai.n
zindagii ke in nihaa.n-KHaano.n me.n bhii
mere KHvaabo.n kaa ko.ii ruumaa.n nahii.n!

Noon Meem Rashid
Nazm

hama-ust

KHayaabaan-e-sa.adii me.n
ruusii kitaabo.n kii dukkaan par ham kha.De the
mujhe ruus ke chiida san.at-garo.n ke
na.e kaarnaamo.n kii ik umar se tishnagii thii!
mujhe ruusiyo.n ke siyaasii ''hama-uusat'' se ko.ii raGbat nahii.n hai
magar zarre zarre me.n
insaa.n ke jauhar kii taabindagii dekhne kii tamannaa hamesha rahii hai!
aur us shaam to mursida kii uruusii thii
us shoKH diivaanii la.Dkii kii KHaatir
mujhe ek naazuk sii sauGaat kii justujuu thii

Noon Meem Rashid
Nazm

barish ka pahla qatra

ghanghor ghaTaa tulii kha.Dii thii
par buu.nd abhii nahii.n pa.Dii thii
har qatra ke dil me.n thaa ye KHatra
naachiiz huu.n mai.n Gariib qatra
tar mujh se kisii kaa lab na hogaa
mai.n aur kii guu.n na aap jogaa
kyaa khet kii mai.n bujhaa.uu.ngaa pyaas
apnaa hii karuu.ngaa satyaanaas
KHaalii haatho.n se kyaa saKHaavat
phiikii baato.n me.n kyaa halaavat
kis birte pe mai.n karuu.n dilerii
mai.n kaun huu.n kyaa bisaat merii
har qatra ke dil me.n thaa yahii Gam
sargoshiyaa.n ho rahii thii.n baaham
khich.Dii sii ghaTaa me.n pak rahii thii
kuchh kuchh bijlii chamak rahii thii
ik qatra ki thaa ba.Daa dilaavar
himmat ke muhiit kaa shanaavar
faiyyaz o javvaad o nek-niyyat
bha.Dkii us kii rag-e-hamiyyat
bolaa lalkaar kar ki aa.o!
mere piichhe qadam ba.Dhaa.o
kar guzro jo ho sake kuchh ehsaan
Daalo murda zamiin me.n jaan
yaaro! ye hachar-machar kahaa.n tak
apnii sii karo bane jahaa.n tak
mil kar jo karoge jaa.n-fishaanii
maidaan pe pher doge paanii
kahtaa huu.n ye sab se barmalaa mai.n
aate ho to aa.o lo chalaa mai.n
ye kah ke vo ho gayaa ravaana
''dushvaar hai jii pe khel jaanaa''
har-chand ki thaa vo be-bizaa.at
kii us ne magar ba.Dii shujaa.at
dekhii jur.at jo us sakhii kii
do-chaar ne aur pairvii kii
phir ek ke baa'd ek lapkaa
qatra qatra zamii.n pe Tapkaa
aaKHir qatro.n kaa ba.ndh gayaa taar
baarish lagii hone moslaa-dhaar
paanii paanii hu.aa bayaabaa.n
sairaab hu.e chaman KHayaabaa.n
thii qaht se paa.emaal KHilqat
is me.nh se hu.ii nihaal KHilqat
jur.at qatra kii kar ga.ii kaam
baaqii hai jahaa.n me.n aaj tak naam
ai saahibo! qaum kii KHabar lo
qatro.n kaa saa ittifaaq kar lo
qatro.n hii se hogii nahr jaarii
chal nikle.ngii kashtiyaa.n tumhaarii

Ismail Merathi
Nazm

mujhe le chal

''hayaat-e-daa.imii'' likkhaa hu.aa hai jin ke aivaa.n par
iram-zaar-e-abad hai saaya-zan jin ke KHayaabaa.n par
davaamiyyat ke jalve chhaa rahe hai.n baaG-o-bustaa.n par
guzar mumkin nahii.n hai maut kaa jin ke nazaaro.n me.n
mirii 'salmaa'! mujhe le chal tuu un ra.ngii.n nazaaro.n me.n

Akhtar Shirani
Nazm

baTla house

gha.Dii kii Tik-Tik bol rahii hai raat ke shaayad ek baje hai.n
baTla house kii ek galii me.n moTe kutte bhau.nk rahe hai.n
ek kha.nDar me.n tez raushnii chaaro.n jaanib phail rahii hai
baGal me.n leTaa saathii meraa ab tak pub jii khel rahaa hai
mai.n bhii ab tak jaag rahaa huu.n aa.nkhe.n muu.nde soch rahaa huu.n
niiche jaanaa kaisaa hogaa baahar kitnii sardii hogii
qutub sitaara kidhar ko hogaa raat kii raanii kaisii hogii
sub.h kaa suuraj kahaa.n pe hogaa abhii KHudaa kyaa kartaa hogaa
sa.Dak kinaare sone vaale jo.De kaise sote ho.nge
in ko machchhar kaaTte ho.nge
naum chomsky lawn me.n baiThe bachche aaKHir kaise ho.nge
un ko kutte chaaTte ho.nge
kyaa in bhuuk-zada bachcho.n ke KHvaab me.n pariyaa.n aatii ho.ngii
kaTe-phaTe haatho.n ke takiye ke niiche kuchh rakhtii ho.ngii
kaisii baate.n karte ho jii kyaa pariyo.n kaa kaam yahii hai
mahal saraa.e chho.D ke ab vo sa.Dak kinaare aa.e.ngii kyaa
raat ke shaayad De.Dh baje hai.n baTla house kaa chauk khulaa hai
raat ko job se aane vaale raat me.n job ko jaane vaale
ek haath me.n liye chaa.e cup ek haath me.n chhoTii cigarette
sa.Dak paar kyo.n dekh rahe hai.n
biryaanii ko Dhuu.nDh rahe hai.n
un ke piichhe sa.Dak kinaare qabristaan kaa gate khulaa hai
andar kutte ghuum rahe hai.n shaayad khaanaa Dhuu.nDh rahe hai.n
baahar cigarette aur coffee hai andar kaafii taariikii hai
mai.n bhii andar jhaa.nk rahaa huu.n haule haule soch rahaa huu.n
qabristaan ke andar me.n ye latrine kis ne banvaayaa
kyo.n banvaayaa
shaayad murde raat me.n uTh kar us ke andar jaate ho.nge
haajat puurii karte ho.nge
yaa phir cigarette piine vaale la.Dke andar jaate ho.nge
KHaakii vardii ghar vaalo.n se chhup kar cigarette piite ho.nge
ek kinaare adab kii malika sab kuchh baiThii dekh rahii hai
aag kaa dariyaa chaa.ndnii begam shiishe kaa ghar likhne vaalii
ainii aapaa soch rahii hai
meraa qaarii kyo.n aayaa hai
shaayad is ko gautam shankar tal.at ne uljhaayaa hogaa
yaa phir us ko KHayaabaa.n kii champaa ne paglaayaa hogaa
yaa phir is paagal la.Dke ne shu.uur kii rau ko chhe.Daa hogaa
yaa phir is ne aag kaa dariyaa aadhaa pa.Dh kar chho.Daa hogaa
falsafyaana baate.n sun kar saare murde sochte ho.nge
ko.ii apnii KHvaab-gaah ko chho.D ke aaKHir kyo.n aayaa hai
mai.n bhii baiThaa soch rahaa huu.n
itnii raat ko kyo.n aayaa huu.n

Asim Badr
Nazm

KHwab ki tarah se yaad hai

jis tarah mahv-e-safar ho ko.ii viiraane me.n
aur raste me.n kahii.n ko.ii KHayaabaa.n aa jaa.e
chand lamho.n me.n KHayaabaa.n ke guzar jaane par
saamne phir vahii duniyaa-e-bayaabaa.n aa jaa.e
kuchh isii tarah se hai yaad ki tum aa.e the

Jagan Nath Azad
Nazm

KHargosh ki sarguzisht

is KHayaabaa.n ke aqab me.n
vo jo pur-asraar duniyaa.e.n basii hai.n
vo hame.n kyuu.n khii.nchtii hai.n?

Saqi Faruqi
Nazm

darwesh

zamistaa.n kii is shaam
niiche KHayaabaa.n me.n
mere dariiche ke paa.ii.n
jahaa.n tiirgii munjamid ho ga.ii hai
ye bhaarii yaKH-aaluud qadmo.n kii aavaaz
kyaa kah rahii hai
KHudaavand
kyaa aaj kii raat bhii
terii palko.n kii sangii.n chaTaane.n
nahii.n haT sake.ngii
KHayaabaa.n to hai duur tak gahrii zulmat kaa paataal
aur mai.n is me.n Gota-zanii kar rahaa huu.n
sadaa.o.n ke maa'nii kii siina-kushaa.ii kii KHaatir chalaa huu.n

Noon Meem Rashid
Nazm

idrak

vaqt dariyaa kii maanind bahtaa rahegaa sadaa
jagmagaate rahe.nge sitaare
yuu.nhii shab kii poshaak me.n
gul khilaatii rahegii havaa
taa-abad aab me.n, KHaak me.n
iistaada rahe.nge KHayaabaa.n KHayaabaa.n
ye sarv-o-sanobar yuu.nhii
saahilo.n par yuu.nhii
la.ngar-andaaz ho.nge jahaaz
aur bachche yuu.nhii siipiyaa.n chun.ne
aate rahe.nge sadaa
yuu.nhii mela rahegaa
zamaane ke kuucho.n me.n
baazaar me.n!
aur insaan zinda rahegaa sadaa
ek paikaar me.n
ik zamaane talak ham bhii sab kii tarah
yuu.nhii sochaa kiye
yuu.nhii samjhaa kiye
aur shab-o-roz kaa be-nishaa.n qaafila
parda-e-Gaib me.n
gum-shuda manzilo.n kii taraf
KHaamushii se rahaa gaamzan
zindagii me.n achaanak phir ik roz
ik haadsa ho gayaa
jis kii shiddat se ik umr kaa
sehar-e-fikr-o-nazar TuuT bikhraa
to aaKHir ye uqda khulaa
vaqt dariyaa hai lekin ye KHud
ik samundar me.n jaa girtaa hai
us samundar kii jaanib hai
hastii kaa saaraa safar
aa.nkh ne aaj tak jitne manzar bhii dekhe
vo sab us ke
apne taraashiida the
aur dil me.n dha.Daktaa hu.aa
tajriid-e-vahm-o-gumaa.n ke sivaa kuchh nahii.n
aarzu-e-Gam-e-aagahii aisii arzaa.n nahii.n
ziist ke duusre raasto.n kii tarah
raah-e-kaar-e-junuu.n itnii aasaa.n nahii.n
hai bulandii kii jaanib agar zindagii kaa safar
phir to kuchh aur hai.n manzile.n aadmii ke liye
jin ke har gaam par, zindagii ke liye
hai sabaat-e-abad muntazir
aap-apnii nafii ke amal se
guzarnaa pa.Degaa use
mahbas-e-aab-o-gil se
nikalnaa pa.Degaa use

Mubeen Mirza
Nazm

KHala sa kahin hai

KHayaabaan-e-daanish-gah-e-mumbai se
yahaa.n raaj-path ke safar tak
hamesha mire zer-e-paa
shaahraahe.n rahii hai.n

Shahram Sarmadi
Nazm

majaz ki maut par

ai be-niyaaz-e-shuq-e-faraavaa.n kahaa.n hai tuu
ai nig.hat-e-shamiim-e-bahaaraa.n kahaa.n hai tuu
ai baa.is-e-faroG-e-gulistaa.n kahaa.n hai tuu
ai raunaq-e-vajuud-e-KHayaabaa.n kahaa.n hai tuu
pathraa ga.ii hai.n aa.nkhe.n tire intizaar me.n
kuchh to bataa ki ai mah-e-taabaa.n kahaa.n hai tuu
vo tere shauq-e-naGma-saraa.ii ko kyaa hu.aa
ai yaar naGma-rez-o-Gazal-KHvaa.n kahaa.n hai tuu
tere baGair kuchh nahii.n lutf-e-sharaab-o-sher
ai nig.hat-e-latiif-e-KHayaabaa.n kahaa.n hai tuu
haa.n tere dam se raunaq-e-bazm-e-vajuud thii
ai raushnii-e-sham-e-farozaa.n kahaa.n hai tuu
tere baGair KHaak-basar phir rahaa huu.n mai.n
mere baGair sar-ba-garebaa.n kahaa.n hai tuu

Davarka Das Shola
Nazm

shab-charagh

shabnamistaa.n bhii vahii kunj-o-KHayaabaa.n bhii vahii
vahii dariyaa kii havaa.e.n vahii baaGo.n kii fazaa
le ke phir aa.ii hai vaadii kii vahii raqqaasa
bahke bahke se qadam phuul katarne kii adaa

Qamar Raees
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

daraKHt-e-zard

nahii.n ma.aluum 'zaryuun' ab tumhaarii umr kyaa hogii
vo kin KHvaabo.n se jaane aashnaa naa-aashnaa hogii
tumhaare dil ke is duniyaa se kaise silsile ho.nge
tumhe.n kaise gumaa.n ho.nge tumhe.n kaise gile ho.nge
tumhaarii sub.h jaane kin KHayaalo.n se nahaatii ho
tumhaarii shaam jaane kin malaalo.n se nibhaatii ho
na jaane kaun doshiiza tumhaarii zindagii hogii
na jaane us kii kyaa baayastagii shaa.istagii hogii
use tum phone karte aur KHat likhte rahe hoge
na jaane tum ne kitnii kam Galat urdu likhii hogii
ye KHat likhnaa to daqyaanuus kii pii.Dhii kaa qissa hai
ye sinf-e-nasr ham naa-baaliGo.n ke fan kaa hissa hai
vo ha.nstii ho to shaayad tum na rah paate ho haalo.n me.n
ga.Dhaa nanhaa saa pa.D jaataa ho shaayad us ke gaalo.n me.n
gumaa.n ye hai tumhaarii bhii rasaa.ii naa-rasaa.ii ho
vo aa.ii ho tumhaare paas lekin aa na paa.ii ho
vo shaayad maa.ide kii gand biryaanii na khaatii ho
vo naan-e-be-KHamiir-e-maida kam-tar hii chabaatii ho
vo doshiiza bhii shaayad daastaano.n kii ho dil-daada
use ma.aluum hogaa 'zaal' thaa 'sohraab' kaa daadaa
tahamtan ya.anii 'rustam' thaa giraamii 'saam' kaa vaaris
giraamii 'saam' thaa sulb-e-nar-e-'maanii' kaa KHush-zaada
(ye merii ek KHvaahish hai jo mushkil hai)
vo 'najm'-aafa.ndi-e-marhuum ko to jaantii hogii
vo nauho.n ke adab kaa tarz to pahchaantii hogii
use kad hogii shaayad un sabhii se jo lapaa.Dii ho.n
na ho.nge KHvaab us kaa jo gavayye aur khilaa.Dii ho.n

Jaun Eliya
Nazm

is waqt to yun lagta hai

is vaqt to yuu.n lagtaa hai ab kuchh bhii nahii.n hai
mahtaab na suuraj, na a.ndheraa na saveraa
aa.nkho.n ke dariicho.n pe kisii husn kii chilman
aur dil kii panaaho.n me.n kisii dard kaa Deraa
mumkin hai ko.ii vahm thaa, mumkin hai sunaa ho
galiyo.n me.n kisii chaap kaa ik aaKHirii pheraa
shaaKHo.n me.n KHayaalo.n ke ghane pe.D kii shaayad
ab aa ke karegaa na ko.ii KHvaab baseraa
ik bair na ik mehr na ik rabt na rishta
teraa ko.ii apnaa, na paraayaa ko.ii meraa

Faiz Ahmad Faiz
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

dard aaega dabe panw

mushta.il ho ke abhii uTThe.nge vahshii saa.e
ye chalaa jaa.egaa rah jaa.e.nge baaqii saa.e
raat-bhar jin se tiraa KHuun-KHaraabaa hogaa
ja.ng Thahrii hai ko.ii khel nahii.n hai ai dil
dushman-e-jaa.n hai.n sabhii saare ke saare qaatil
ye ka.Dii raat bhii ye saa.e bhii tanhaa.ii bhii
dard aur ja.ng me.n kuchh mel nahii.n hai ai dil
laa.o sulgaa.o ko.ii josh-e-Gazab kaa a.ngaar
taish kii aatish-e-jarraar kahaa.n hai laa.o
vo dahaktaa hu.aa gulzaar kahaa.n hai laa.o
jis me.n garmii bhii hai harkat bhii tavaanaa.ii bhii

Faiz Ahmad Faiz
Nazm

ye pichhle ishq ki baaten hain

apne be-ant KHayaalo.n me.n
har ahd nibhaane kii qasme.n

Mohsin Naqvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now