Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "khuda bakhsh"

Nazm MATCHES FOR "khuda bakhsh"

Nazm

hamare baad

ye raahe.n KHud-baKHud puuchhe.ngii tum se
kahaa.n tum jaa.oge jab ham na ho.nge
ishaare kaun samjhegaa tumhaare
kise samjhaa.oge jab ham na ho.nge
abhii ashko.n me.n pinhaa.n hai tabassum
KHushii kyaa paa.oge jab ham na ho.nge
zamaana to.D degaa shiisha-e-dil
bahut ghabraa.oge jab ham na ho.nge
taGaaful kii sazaa tum ko milegii
bahut pachhtaa.oge jab ham na ho.nge

Baqar Mehdi
Nazm

dua

daulat jahaa.n kii mujh ko tuu mere KHudaa na de
puurii ho.n bas zaruurate.n is ke sivaa na de

Sada Ambalvi
Nazm

dua

ai KHudaa mere KHudaa
maalik-e-arz-o-samaa
KHaaliq-e-kaun-o-makaa.n
chhiin le mujh se bas ab
mere ehsaas kii vaamaa.nda magar tund tapish
baKHsh de mujh ko sukuu.n
kar ataa cha.nd KHushii ke lamhe
ko.ii pal mai.n bhii jiyuu.n
nik.hat-o-nuur ke saa.nche me.n Dhalii
terii is duniyaa me.n

Azeem Akhtar
Nazm

KHuda zamin par kab aaega

kaa.enaat jis kii baage.n
kisii haadse ke haath me.n de kar
KHudaa-vand-e-kariim ibaadate.n baTor rahaa hai
kyaa use sirf yahii Garaz hai
ki vo pahchaanaa jaa.e yaa
us ke hone kii
kuchh aur bhii haqiiqat hai
is mulk me.n jahaa.n ba-zaahir aazaadii hai
Gulaamii ke tauq pahne hu.e e.Diyaa.n raga.Dtii dil masostii jaa.n-ba-lab zindagii
umr kaa taviil safar tai karne kahaa.n jaa.egii
kyaa ko.ii aur zindagii-baKHsh sayyaara daryaaft ho chukaa hai
kyaa ko.ii aur zamiin Dhuu.nD lii ga.ii hai
itnii ba.Dii duniyaa me.n kyaa chhoTe-pan ko dafn karne kii ko.ii jagah baaqii nahii.n
kyaa samundaro.n ne iqraar kar liyaa hai ki vo murdaar nigle.nge
aur kashtiyo.n ko bandar-gaaho.n ke kinaaro.n par pahu.nchaa kar qazzaaqo.n ke havaale kar de.nge
aa.nkh jab patthar barsaane lagegii to aa.nsuu-bhar KHajaalat
maathe se numuudaar ho kar apne hone kaa ehsaas dilaa.e.n ge
is aazaad mulk me.n jahaa.n Gulaamii ke tauq pahne
e.Diyaa.n raga.Dtii dil masostii jaa.n-ba-lab zindagii intizaar me.n hai
ki ibaadate.n baTortaa KHudaa kaa.enaat kii sii.Dhiyo.n tak to aa.e

Sidra Afzal
Nazm

mere baad

ko.ii bhii aa.egaa turbat pe bhalaa mere baad
KHaak aa aa ke u.Daa.egii sabaa mere baad
jiite jii qadr kisii ne bhii na jaanii afsos
yaad me.n ro.egaa phir kaun bhalaa mere baad
sab ye mu.nh dekhe kii baate.n hai.n kahaa.n kii ulfat
yaad karne ke nahii.n ahl-e-jafaa mere baad
qaum ne qadr na kii rah ga.ii hasrat dil me.n
merii turbat se ye aa.egii sadaa mere baad
faatiha pa.Dhne ko aaya to bahut ro ro kar
baKHsh de us ko KHudaa us ne kahaa mere baad
zindagii me.n to sila mai.n ne na paayaa hargiz
kaam sab mere ho.n maqbuul-e-KHudaa mere baad
ye vasiyyat hai ki jis ko hai mohabbat mujh se
phuul turbat pe cha.Dhaa jaa.e zaraa mere baad
puuchhtii tum se hayaa hai ye bataa do mujh ko
ab nahii.n aate ho phir aa.oge kyaa mere baad

Sughra Humaun Mirza
Nazm

ek din yun KHizan aa gai

un kii shaaKHo.n se KHvaabo.n ke sab naGma-gar
jin kii aavaaz gardan kaa phandaa banii
apne naGmo.n se jab naashanaa ho ga.e
aap hii aap sab KHaak me.n aa gire
aur sayyaad ne gumaa.n bhii na kii
ai KHudaa-e-bahaaraa.n zaraa rahm kar
un kii murda rago.n ko numuu baKHsh de
un ke tishna dilo.n ko lahuu baKHsh de
ko.ii ik pe.D phir lahlahaane lage
ko.ii ik naGma-gar chahchahaane lage

Faiz Ahmad Faiz
Nazm

jab kabhi she’r ho nahin pate

phir na puuchho ki bas KHudaa baKHshe
ik 'ajab vaardaat hotii hai
isti'aaro.n ke baab khulte hai.n
tere ho.nTo.n kii baat hotii hai

Kazim Rizvi
Nazm

qawwali

sabaq bas khelne khaane kaa jis ko yaad hotaa hai
ba.Daa ho kar vo la.Dkaa ek din ustaad hotaa hai
na aa.e master jis din pa.Dhaane mere darje me.n
zaraa sii der ko us din meraa dil shaad hotaa hai
jo maulaa-baKHsh se vo piiTte hai.n mujh ko maktab me.n
ko.ii samjhaa.e un ko vaqt bhii barbaad hotaa hai
banaayaa jaataa huu.n murGaa mai.n jis din apne maktab me.n
to us din dard se ye dil bahut naashaad hotaa hai
samajh me.n kuchh nahii.n aataa ki maqsad kyaa hai pa.Dhne kaa
maza bhii kuchh nahii.n hai vaqt bhii barbaad hotaa hai
KHudaa ke fazl se jis din buKHaar aataa hai teacher ko
to us din apnaa maktab bhii bahut aabaad hotaa hai
jo halva rakh ke almaarii me.n aapii band kartii hai.n
khilaatii hai.n na khaatii hai.n pa.Daa barbaad hotaa hai
agar ho.n mehrbaa.n teacher to tum dekhoge ai 'nuurii'
sabaq jis ko nahii.n ho yaad vo bhii shaad hotaa hai

Mushtaq Ahmad Noori
Nazm

ghar

pyaare beTe tuu ne ii.nT gaare cement aur sariye vaalaa makaan to banaa liyaa hai
merii du.aa hai ki ye mohabbat amn KHushii aur KHush-haal se bharaa ghar ban jaa.e
is ke darvaaze se ko.ii badii aur buraa.ii daaKHil hii na hone paa.e
khi.Dkiyo.n se zindagii-baKHsh havaa to zaruur andar aa.e lekin har tuufaan baahar hii rah jaa.e
teraa ye ghar vo kashtii ban jaa.e jo tujhe har bha.nvar se ba-KHair nikaal le jaa.e
garmiyaa.n aa.e.n to ghar qurbato.n kii garmii se damak uTThe
KHizaa.n aa.e to diivaaro.n par saje fan-paaro.n se bahaar sharmaa jaa.e
bahaar aa.e to mahsuus ho ki teraa ghar hii is kaa mamba.a hai
baahar kitnaa hii shor-o-GauGaa ho tere ghar me.n sukuun-o-raahat ho
baahar kitnaa hii a.ndheraa ho tere ghar me.n na.e hauslo.n ke charaaG raushan ho.n
tere ghar kii chaar-diivaarii is qile kii fasiil ban jaa.e
jis me.n nafrat naqb na lagaa sake
mohabbat jis ke andar mahfuuz ho
ek duusre kii mohabbat
insaan kii mohabbat
KHudaa kii mohabbat
ghar kar jaa.e
ghar

Mohammad Haneef Rame
Nazm

mushir

mai.n ne us se ye kahaa
ye jo das karo.D hai.n
jahl kaa nicho.D hai.n
un kii fikr so ga.ii
har umiid kii kiran
zulmato.n me.n kho ga.ii
ye KHabar durust hai
un kii maut ho ga.ii
be-shu.uur log hai.n
zindagii kaa rog hai.n
aur tere paas hai
un ke dard kii davaa
mai.n ne us se ye kahaa
tuu KHudaa kaa nuur hai
aql hai shu.uur hai
qaum tere saath hai
tere hii vajuud se
mulk kii najaat hai
tuu hai mahr-e-sub.h-e-nau
tere baa'd raat hai
bolte jo chand hai.n
sab ye shar-pasand hai.n
un kii khii.nch le zabaa.n
un kaa gho.nT de galaa
mai.n ne us se ye kahaa
jin ko thaa zabaa.n pe naaz
chup hai.n vo zabaa.n-daraaz
chain hai samaaj me.n
be-misaal farq hai
kal me.n aur aaj me.n
apne KHarch par hai.n qaid
log tere raaj me.n
aadmii hai vo ba.Daa
dar pe jo rahe pa.Daa
jo panaah maa.ng le
us kii baKHsh de KHataa

Habib Jalib
Nazm

jila

zainab mai.n terii baa.ndii
tuu aisii baa-hausla
is shaan se jaltii zamiin par chalii
ki sach ko zaruurat na rahii kisii hiil hujjat kii
tere liye aasmaano.n se ko.ii mo.ajiza nahii.n utraa
uj.Daa hu.aa ghar be-bizaa.atii zmiin-o-aasmaan kii saKHtiyaa.n
aur terii istaqaamat
ki is qadar KHuu.n-rezii ke baa'd bhii yaziidii fat.h kaa KHat na le sake
kisii ek fard-e-vaahid se nahii.n
to ek puure Galat nizaam ke muqaabil thii
ye vo maqaam thaa ki taariiKH-daano.n o mohaqqiqiin ne haar jiit ke nazriyaat ko alag andaaz se dekhaa
terii maamtaa ko salaam zainab apne jigar gosho.n kaa Gam uThaa kar KHud ko TuuTne nahii.n diyaa
aivaano.n me.n sar jo.De baiThe ahl-e-siyaasat
kisii natiije par nahii.n pahu.nch paate
ki bachcho.n ko zab.h karne vaale
insaan hai.n musalmaan hai.n
zainab
ma.asuum alii asGar ko zab.h karne vaalo.n ko
tuu ne KHudaa kaa ye farmaan baavar karaayaa thaa
allaah zaalimo.n ko dost nahii.n rakhtaa
karbalaa ek raah-e-hidaayat
raushnii zaraa sii darz kisii jhurrii se daaKHil ho kar
phaile hu.e a.ndhere par Gaalib aa jaatii hai
aur taariikii ko savere me.n badal dene vaale rab ko ma.aluum hai
ki ishq ko baaqii rakhne ke liye lahuu se aabiyaarii kii ga.ii
lahuu bahtaa hai
to zamii.n zar-KHez hotii hai
vo taa.ef ho kuufa ho yaa merii bad-nasiib zamiin
andhaa hujuum haatho.n me.n patthar liye
jilaa ko bujhaa detaa chaahtaa hai
jilaa jo du.aa-go hai
ma.abuud unhe.n baKHsh de ye nahii.n jaante ye kyaa kar rahe hai.n
jilaa baatil ke haatho.n me.n bai.at nahii.n kartii
jilaa masiihaa hai
mujhe masluub karne vaalo shaqii-ul-qalb hukmaraano
bhalaa phuuTtii kirno.n ko bhii ko.ii saliib de sakaa
jilaa zainab hai
jo jale hu.e a.ndhero.n ke ba.ad
hone vaalii uj.Dii sub.h se
us kaThin masaafat ko tai kartii hai
ki bahut sii ghuTan aur hazaar sa.uubato.n ke ba.ad
ek vo maqaam aataa hai
jo taKHt ko nishaan-e-ibrat banaa de

Injila Hamesh
Nazm

trahdar kahan se laun

jhuuT kii garmii-e-baazaar kahaa.n se laa.uu.n
raqs-e-be-ma.anii kii jhankaar kahaa.n se laa.uu.n
Dhuu.nD ke hiila-e-takziib baraa.e-insaaf
be-muhaabaa sar-e-darbaar kahaa.n se laa.uu.n
be-KHabar ishq se hai.n aaj riyaa-kaar shuyuuKH
jazb-e-mansuur sar-e-daar kahaa.n se laa.uu.n
bech kar chaadar-e-zahraa ko sajaataa firdaus
reshmii makr kii dastaar kahaa.n se laa.uu.n
maut kii god me.n hai aarif-o-daanaa kaa vajuud
dil-rubaa fikr-e-sahar-kaar kahaa.n se laa.uu.n
me.n vo fankaar huu.n iKHlaas hai jis kaa shahkaar
makr-o-tarviiz kii guftaar kahaa.n se laa.uu.n
KHaanqaaho.n me.n bhii raa.ij hai havas kii tadriis
baa-KHudaa shaiKH-e-nigah-daar kahaa.n se laa.uu.n
maktab-e-nau kaa moallim hai fara.ngii baqqaal
buuzar-o-KHaalid-o-karraar kahaa.n se laa.uu.n
ruuh-e-tauhiid kii qaatil hai siyaasii ta.aliim
sar-faroshaan-e-vafaadaar kahaa.n se laa.uu.n
KHuub vaaqif huu.n hadiis-e-mai-o-miinaa se magar
aalam-e-hashr me.n dildaar kahaa.n se laa.uu.n
saaz-e-fitrat pe Gazal-KHvaa.n hai shu.uur-e-tanqiid
kaaGzii kaakul-o-ruKHsaar kahaa.n se laa.uu.n
shola-zan daaman-e-giitii hai to mazmuun ko.ii
jinsiyat-baKHsh trahdaar kahaa.n se laa.uu.n
dil kaa paimaana hai zahraab-e-alam se labrez
bulbul-e-zamzama-aasaar kahaa.n se laa.uu.n
tazkire hai.n qad-o-gesuu ke bahar-taur aziiz
muflisii me.n dil-e-gulbaar kahaa.n se laa.uu.n
tishnagii saahab-e-naama kii bujhaane vaalo
aabruu-baaKHta shahkaar kahaa.n se laa.uu.n
arsa-e-dahr kaa har zarra hai aatish-ba-kanaar
ramish-o-ra.ng ke ash.aar kahaa.n se laa.uu.n
jannatii hone kii maanaa ki sanad biktii hai
ganj-e-qaaruun kaa ambaar kahaa.n se laa.uu.n
zeb-e-tan vaqt kaa pairaahan-e-sho.ala hai abhii
kaif-a.ngez mai.n afkaar kahaa.n se laa.uu.n
KHair-aagaah miraa fikr hai masruuf-e-amal
bahs-o-takraar kii talvaar kahaa.n se laa.uu.n
jaan pa.D saktii hai 'bebaak' tan-e-murda me.n
mard-e-'faaruuq' saa kirdaar kahaa.n se laa.uu.n

Bebak Bhojpuri
Nazm

inKHila

qulir-ruuho min amr-e-rabbii
un logo.n se jo ye samajhte hai.n ki har baat lafz se shuruu.a hotii hai
mai.n aaj un ko chho.Dne aayaa huu.n
Thiik us jagah pe jahaa.n se ko.ii lafz shuruu.a nahii.n hotaa
sirf chand aa.nkhe.n hotii hai.n in aa.nkho.n aa.nkho.n ko rakhne ke kai havaa havaa mai.n Doltii hai.n
sirf chand aa.nkhe.n hotii hai.n aasmaan ke chhoTe se Tuk.De ko utaar kar der tak guu.njtii rahii
sirf chand aa.nkhe.n hotii hai.n jo intizaar kartii hai.n ki ko.ii un me.n utre
aur in se kahe ki chalo ham tumhe.n phir se pe.Do.n aur parindo.n se aabaad kar de.n
chalo phir se tumhe.n be-laus mohabbat kii jalvate.n aur KHalvate.n baKHsh de
so ye meraa qissa hai ki mai.n ne utarne kii rivaayat kaa ba.Daa ehtiraam kiyaa
KHud ko bhuul duusro.n kaa kaam kiyaa
ye abhaag un kaa thaa ki unho.n ne mujhe pahchaanaa nahii.n
mai.n ko.ii aur raah ho letaa par dil maanaa nahii.n
mai.n bahut paas se guzraa thaa
dil hii dil me.n jo umr bhar lahraatii hai zabaan par kabhii nahii.n aatii
is mausiiqii kaa lams ban ke mai.n bahut paas se guzraa thaa
mai.n bahut paas se guzraa thaa
aur merii aamad ke arsa me.n zamiin kii aab-o-havaa
nekii-o-badii KHuubsuurtii-o-bad-suurtii sab se be-niyaaz thii saraapaa raaz thii
aur gyaan ek jaage hu.e dil kaa naam thaa
savaalo.n se be be-niyaaz javaab naa-tamaam thaa
KHudaa se miltii jaltii aadmii kii mohabbat
bichh.Dii hu.ii azal kii ne.amat
har-chand ki haasil-e-abad hai
aur be-niyaaz nek-o-bad hai
phir bhii nazar me.n aadmii kii auqaat
aur duniyaa jo jism-o-jaa.n kii had hai
aur ke haqiir raasto.n me.n tum mujh se shaa.irii kaa matlab puuchhte ho
mai.n nahii.n bataa saktaa mai.n kyuu.n bataa.uu.n mai.n nahii.n bataataa
ye qissa merii dehaatii aa.nkho.n mere dehaatii dil kaa hai
jab bahut bahut ghanii raat me.n musaafir ke paa.nv tale raasta nahii.n hotaa
tab vo kis anokhe sitaare se raasta puuchhtaa hai
tab kaun saa ishaara musaafir ke paa.nv ko taariik kar dene kii shart bataataa hai
pe.D kii phala.ngii par mahokhaa boltaa hai
paanii kii zabaan jaan.ne vaalii TiTihrii kii cho.nch se din nikaltaa hai
tum nahii.n bataa sakte tum ne kabhii nahii.n bataayaa tum kabhii nahii.n bataa.oge
tumhaarii aabaadiyaa.n akaal me.n mare hu.e logo.n kii bad-du.aa.e.n hai.n
maazii haal mustaqbil tiin andhe faqiiro.n kii sadaa.e.n hai.n
mai.n tum me.n shaamil-e-safar huu.n magar panaah maa.ngtaa apnii ajal ko Dhuu.nDhtaa huu.n
aur jo apnii ajal ko Dhuu.nDhtaa hai
tumhaarii duniyaa us kaa kuchh nahii.n bigaa.D saktii
magar mai.n aise ahd-e-baa-asar me.n huu.n
ki jis kii har sadaa sadaa-e-be-asar hai
aur guftuguu kaa pe.D be-samar hai
KHudaa se kar chuke hai.n jo kalaam vo kaliim apnii baazgasht chho.D ke chale ga.e
aur KHaak-e-baaz-gasht aaj
u.D rahii hai iltibaas me.n
aur vo KHaamushii thii jo mahaan aatmaa kaa ramz thii
aur us kii aa.nkh sabz thii
phir bhii soch ke jii Dartaa hai
phir bhii soch ke jii Dartaa hai
jaane vaale aane vaalo.n ko aisii hii aas ba.ndhaate hai.n
haath nahii.n aatii hai amar-lataa
yahaa.n pahu.nch kar mai.n sochtaa huu.n
yahaa.n pahu.nch kar mai.n sochtaa huu.n
mujhe aa.nsuu kis ne diye
aur kaun saa aa.nsuu mere virsa kaa baatin hai
kis se bichha.D kar miTTii paanii bantii hai
nadii akelii bahtii hai
duniyaa chho.D ke kaun samundar kii tah me.n baiTh ke likhtaa hai aur apnaa qalam Dubotaa hai
jis pul par chal ke kahne vaalaa sun.ne vaale tak pahu.nchtaa hai
vo ek aisaa sach hai jise maut zindagii se chhup kar boltii hai
insaanii dil kii shakl se milte-julte KHeme ab bhii jalte hai.n

Ahmad Hamesh
Nazm

gandhi

vo hadiis-e-ruuh payaam-e-jaa.n jise ham ne sun ke bhulaa diyaa
vo hariim-e-Gaib kaa armuGaa.n jise paa ke ham ne ga.nvaa diyaa

Iqbal Sohail
Nazm

fasana-e-adam

mai.n thaa zamiir-e-mashiyyat me.n ek azm-e-jaliil
hanuuz shauq kii karvaT bhii lii na thii mai.n ne
ki daf.atan mut.harrik hu.e lab-e-taKHliiq
paka.D lii suurat-e-zaahir vajuud kii mai.n ne
vo sub.h-e-aalam-e-hairat vo jalva-zaar-e-bahisht
havaa chaman kii lagii aa.nkh khol dii mai.n ne
vo tarbiyat-gah-zauq-e-nazar, vo vaadii-e-nuur
jahaa.n se paa.ii mohabbat kii raushnii mai.n ne
vo unfuvaan-e-tamannaa vo ibtidaa-e-junuun
vo ik KHalish jise samjhaa thaa zindagii mai.n ne
kiyaa suruur ne ik aalam-e-digar paidaa
churaa ke pii jo mai-e-sarkash-e-KHudiii mai.n ne
KHudii ke nashshe me.n allaah re be-KHudii merii
badan se chaadar-e-ismat bhii phe.nk dii mai.n ne
hu.aa huduud-e-nazar se nikal ke aavaara
havaa-e-shauq me.n jannat bhii chho.D dii mai.n ne
farishte rah ga.e hairat se dekhte mujh ko
na kii qubuul mashiyyat kii rahbarii mai.n ne
daliil-e-raah banii apnii garmii-e-parvaaz
ki taaqat-e-par-e-jibriil chhiin lii mai.n ne
ba.Dhii.n sitaaro.n kii duniyaa.e.n mere lene ko
utar ke arsh se niiche nazar jo kii mai.n ne
magar zamii.n kii kashish ne suu-e-zamii.n khii.nchaa
kiyaa pasand ye zindaan-e-unsurii mai.n ne
jagah milii jo ta.Dapne kii be-qaraarii ko
to phir huduud me.n vus.at kii daad dii mai.n ne
hu.aa talaatum-e-hastii ba-aalam-e-zarraat
chhi.Dak dii KHaak-e-bayaabaa.n pe zindagii mai.n ne
numuu ke josh se saudaa-e-ra.ng-o-buu niklaa
zamii.n ke dil kii tamannaa nikaal dii mai.n ne
hu.ii.n jahaan-e-amal me.n sharii.ate.n paidaa
KHudaa ke naam pe barpaa jo kii KHudii mai.n ne
kabhii jalaa.ii a.ndhere me.n sham.a-e-ilm-o-amal
kabhii bujhaa dii hidaayat kii raushnii mai.n ne
kabhii bigaa.D ke rakh dii.n savaab kii shakle.n
kabhii badal dii haqiiqat gunaah kii mai.n ne
ba.Dhaa to rah gayaa piichhe mire zamaana-e-haal
rukaa to vaqt kii rafta rok dii mai.n ne
zamii.n pe shauq ke fitne bichhaa diye har suu
fazaa me.n nii.nd kii mastii bikher dii mai.n ne
kabhii jagaa dii qayaamat nafas kii Thokar se
uThaa ke suur-e-saraafiil-e-zindagii mai.n ne
junuu.n ke josh me.n parde nazar ke chaak kiye
naqaab noch ke fitrat kii phe.nk dii mai.n ne
qabaa-e-laila-e-tahziib chaak kar Daalii
ridaa-e-maryam-e-ismat utaar lii mai.n ne
mizaaj-e-aatish-e-sozaa.n ko kar diyaa ThanDaa
machaa dii bazm-e-anaasir me.n khalbalii mai.n ne
liyaa shahanshah-e-KHaavar se raushnii kaa KHiraaj
kiyaa asiir tabii.at ko barq kii mai.n ne
ba-inqalaab-e-tabii.at mizaaj-e-aahan ko
havaa kii garmii-e-parvaaz baKHsh dii mai.n ne
bulandiyo.n kaa tasavvur bhii rah gayaa piichhe
pahu.nch ke itnii bulandii pe saa.ns lii mai.n ne
ThiThuk ga.ii.n jo nigaahe.n qariib hujla-e-quds
pas-e-hijaab-e-adab ye sadaa sunii mai.n ne
ki ai hariif-e-mashiyyat ba-va.ada-gaah-e-azal
Thahar Thahar tirii parvaaz dekh lii mai.n ne

Jameel Mazhari
Nazm

meri shaeri aur naqqad

ai mire sher ke naqqaad tujhe hai ye gila
ki nahii.n hai mire ehsaas me.n sarmastii o kaif
ki nahii.n hai mire anfaas me.n buu-e-mai-e-jaam
chaman-e-dahr kii taqdiir ki mai.n huu.n vo ghaTaa
jis ne siikhaa hii nahii.n abr-e-bahaarii kaa KHiraam
raat taariik hai aur mai.n huu.n vo ik sham-e-hazii.n
jis ke sho.ale me.n nahii.n sub.h-e-daraKHshaa.n kaa payaam
mere phuulo.n me.n sabaa.on na bahaaro.n kaa guzar
merii raato.n me.n sitaaro.n na sharaaro.n kaa guzar
merii mahfil me.n na mutrib na muGannii kaa suruud
mere mai-KHaane me.n mauj-e-mai-e-ummiid haraam
mai.n vo naqqaash huu.n khoyaa hu.aa bhaTkaa naqqaash
jis ke har naqsh me.n taKH.iil ke har paikar me.n
muskuraatii hai ba.De naaz se ruuh-e-aalaam

Moin Ahsan Jazbi
Nazm

taaruf

mire daadaa jo british fauj ke naamii bhago.De the
na jaane kitnii jailo.n ke unho.n ne qufl to.De the
charas kaa aur gaa.nje kaa vo kaarobaar karte the
KHudaa se bhii nahii.n Darte the bas begam se Darte the
mire taa.e bhii apne vaqt ke mash.huur cheater the
ka.ii jailo.n ke to vo half-yearly bhii visitor the
har ik Gunda unhe.n ghar baiThe Gunda-tex detaa thaa
tijorii to.Dne kaa fan unhii.n se mai.n ne siikhaa thaa
chachaa marhuum naasik jail se jab vaapas aa.e the
to mash.huur-e-zamaana ik tavaa.if saath laa.e the
vo Thumrii daadraa aur bhairvii.n me.n baat kartii thii
tarannum me.n surayyaa aur lataa ko maat kartii thii
mire vaalid KHudaa baKHshe kahii.n aate na jaate the
sahar se shaam tak amaa.n ke aage dum hilaate the
thii ik bakre numaa burraaq daa.Dhii un ke chehre par
magar phir bhii kabaDDii khelte the raat ko aksar
mai.n apne baap daadaa ke hii naqsh-e-paa pe chaltaa huu.n
magar bas farq itnaa hai vo GunDe the mai.n netaa huu.n
police piichhe thii un ke third-degree kii ziyaafat ko
mire piichhe bhii rahtii hai magar merii hifaazat ko
nahii.n parvaa ki leader kaun achchhaa kaun ganda hai
siyaasat merii rozii hai election meraa dhanda hai
siyaasat me.n qadam rakh kar haqiiqat mai.n ne ye jaanii
churaa kaare kunad aaqil ki baaz aayad pashemaanii

Nashtar Amrohvi
Nazm

pachhtawa

KHuda-e-har-do-jahaa.n ne jab aadmii ko pahle-pahal sazaa dii
bahisht se jab use nikaalaa
to us ko baKHshaa gayaa ye saathii
ye aisaa saathii hai jo hamesha hii aadmii ke qarii.n rahaa hai
tamaam advaar chhaan Daalo
rivaayato.n me.n hikaayato.n me.n
azal se taariiKH kah rahii hai
ki aadmii kii jabii.n hamesha nadaamato.n se araq rahii hai
vo vaqt jab se ki aadmii ne
KHudaa kii jannat me.n shajr-e-mamnuu.a chakh liyaa
aur
sarkashii kii
tabhii se is phal kaa ye kasiilaa zaa.iqa
aadmii ke kaam-o-dahan me.n hir-phir ke aa rahaa hai

Fahmida Riaz
Nazm

tadwin-o-tajsim

uzv ik ik kar ke jo.De
dil diyaa
fikr pahle de chuke the
ya.anii sab kuchh le chuke the
putliyaa.n dii.n raushnii baKHshii
jigar gosho.n ko gurde de diye
phepha.Do.n ko taazgii paivand-kaarii se milii
gene se paude ugaa.e
gene se phal phuul bhii
gene se insaa.n banaa.e
gene se mor-o-magas
KHud-kushii kaa haq milaa
tajsiim-e-KHud kaa haq milaa
jo ataa qudrat kii thii vo KHud-baKHud karne lage
KHud-baKHud jiine lage aur KHud-baKHud marne lage

Rizwanullah
Nazm

bad-tamiz

kyaa tujhe ilm hai
barf-baarii hu.ii hai
shumaalii ilaaqo.n me.n darja-e-haraarat nafii kii ka.ii sii.Dhiyaa.n cha.Dh chukaa
kyaa tujhe ilm hai
gas kamyaab hai
aur bijlii kii qillat ne sarmaa ke din kitne yaKH kar diye
par tujhe kyaa
ki tuu apnii jhuggii ke dar par ba.Dii be-niyaazii se pasrii hu.ii
muft kaa kuu.Daa-karkaT jalaatii hu.ii
ik bha.Daktaa bhabhaktaa alaav banaa.e hu.e
zindagii-baKHsh hiddat kaa saamaa.n kiye
gande naale se uThtii hu.ii dhund kaa luuTtii hai maza
mai.n ne dekhaa abhii
qiimtii jacketo.n aur coato.n me.n malfuuf kuchh be-kaso.n ko ThiThurte hu.e
aur tujhe un pe ha.nste hu.e

Hamida Shaheen
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now