Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "khuraafaat"

Nazm MATCHES FOR "khuraafaat"

Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal
Nazm

suqraat ki biwi

aise me.n kahaa.n falsafa suujhe hai kisii ko
chaltaa rahe har vaqt jahaa.n daur-e-KHuraafaat

Ameer Chand Bahar
Nazm

teri aawaz

soch kar zehn pareshaan rahaa der talak
shahr ke shor-e-KHuraafaat ke ha.ngaamo.n me.n

Rashid Anwar Rashid
Nazm

tajdid-e-amal

uTh az-sar-e-nau dahr ke haalaat badal Daal
tadbiir se taqdiir ke din-raat badal Daal
phir dars-e-musaavaat kii haajat hai jahaa.n ko
aaqaa.ii-o-KHidmat ke KHitaabaat badal Daal
kaalaa ho ki goraa ho KHudaa ek hai sab kaa
qaumiyyat-e-bejaa kii rivaayaat badal Daal
chiinii ho ki hindii ho baraabar ke hai.n bhaa.ii
vataniyyat-e-mahduud ke vahmaat badal Daal
kul chhoTe-ba.De aadam-e-KHaakii ke hai.n farzand
har nasl se bezaar ho har zaat badal Daal
aKHlaaq me.n taaqat hai fuzuu.n teG-o-sinaa.n se
paikaar ke ye aahanii aalaat badal Daal
kyaa zulm hai insaan ho insaan kaa dushman
mardaan-e-havas-kaar kii aadaat badal Daal
mehnat se bhii mazduur ko roTii nahii.n miltii
is banda-e-majbuur ke auqaat badal Daal
aapas me.n ye har roz kii KHuu.n-reziyaa.n kab tak
KHud-saaKHta maz.hab kii rusuumaat badal Daal
hurriyat-e-kaamil kaa vo e.ajaaz dikhaa tuu
duniyaa-e-Gulaamii ke tilismaat badal Daal
KHilqat ko bulaa shirk se tauhiid kii jaanib
piiro.n kii faqiiro.n kii karaamaat badal Daal
ta.aliim pe mauquuf hai raanaa.i-e-afkaar
behuuda kitaabo.n kii KHuraafaat badal Daal
kar fikr-e-amal zikr-e-KHat-o-KHaal abas hai
ai 'faiz' zaraa apne KHayaalaat badal Daal

Faiz Ludhianvi
Nazm

talash

Darii aur sahmii magar phir bhii jaarii ye aavaaz dil chiirtii hai
hamaare vatan me.n bhii hogaa
hamaare vatan me.n bhii hogaa
mai.n darbaariyo.n me.n to kyaa naukaro.n ke jilau me.n bahut duur baiThaa
libaas-e-shaahii kaa madah-KHvaa.n to ab bhii nahii.n
ishaaro.n kinaayo.n
alaamaat se yaa KHuraafaat se
kuchh na kuchh nazm me.n kuchh na kuchh nasr me.n ba.Dba.Daataa rahaa huu.n
magar vaa.n bhii yaa.n kaa ye afsaana sab ko sunaataa rahaa huu.n
vo 'Gaalib' na ho aur 'jaalib' rahe phir bhii aisaa hii bachcha
hamaare vatan me.n bhii hai
aur rahegaa

Jameeluddin Aali
Nazm

idrak

vo merii ruuh kaa maqsuud-o-faKHr-e-maujuudaat
usii ke nuur se raushan hai jalva-gaah-e-sifaat
sikhaa rahii hai KHirad tujh ko fann-e-shiisha-garii
ajab nahii.n jo pareshaa.n ho kaarobaar-e-hayaat
har ek zarre me.n hai.n laakh bijliyaa.n ai dost
nigaah-e-shauq na ho jaa.e markaz-e-aafaat
sun ai farefta-e-qissa-haa-e-hijr-o-visaal
amiiq-tar hai.n samundar se zindagii ke nikaat
KHudii me.n Duub ke hangaama aazmaa ho jaa
KHudii na ho to na soz-e-yaqii.n na soz-e-hayaat
mirii nigaah KHuraafaat-e-maaddii pe nahii.n
KHirad hai past haqiiqat hai arfa.a'ud-darajaat
nazar milaa ki bataa.uu.n ye zindagii kyaa hai
na ho KHumaar to ba.Dhtaa nahii.n mazaaq-e-hayaat
zamiin-e-shor me.n baaG-e-hayaat kar ta.amiir
yaqiin-o-azm se haasil hai aadmii ko sabaat
sukuun-e-diida-e-tishna hai.n mauja-haa-e-saraab
KHudaa kare ki na TuuTe tilism-e-laat-o-manaat

Afsar Seemabi Ahmad Nagari
Nazm

dasht hi kafi hai

saa.ns lene ke liye
qasr-o-kaashaana zaruurii to nahii.n
ko.ii viiraana ko.ii dasht hii kaafii hai
jahaa.n
aasmaa.n aur zamii.n roz gale milte hai.n
sub.h-dam baad-e-sabaa
shaaKH-dar-shaaKH luTaatii hai namii
KHushbuu phailaatii hai aa.nchal apnaa
khilkhilaatii hu.ii doshiiza kalii ke ruKHsaar
shoKH bha.nvre kii nigaaho.n se shafaq hote hai.n
maKHmalii.n paa.nv tale
sabza-e-baaliida ko.ii
chhamchhamaatii hu.ii baarish me.n nahaa jaataa hai
shaam
darmaa.nda parindo.n kii panah-gaaho.n me.n
qumqume kirmak-e-shab-taab ke raushan kar ke
shab kii aaGosh me.n so jaatii hai
an-ginat hiiro.n kii nannhii kaniyaa.n
jagmagaa uThtii hai.n taaro.n ke hasii.n maatho.n par
chaa.nd duudh kaToraa le kar
buu.Dhii naanii kii kahaanii me.n samaa jaatii hai
ko.ii aavaaz na saaz
ko.ii naGma na alaap
na ko.ii bahas na tamhiis na takraar ko.ii
na siyaasat na KHabaasat na shamaatat ko.ii
iKHtilaafaat se duur
saare mafaadaat se duur
sab KHuraafaat se duur
chhal kapaT jhuuT na dhokaa na fareb
ko.ii uljhan ko.ii fitna na ko.ii jhu.njhlaahaT
ko.ii shikva na gila
fikr-e-fardaa na hii andesha-e-imroz ko.ii
ek anjaan masarrat kii kiran
an-chhu.e KHvaabo.n kii ThanDii bauchhaar
ajnabii sii kisii KHvaahish kaa KHumaar
kisii be-naam se ehsaas kaa lams
arsa-e-jaa.n me.n utar jaataa hai
zinda rahne kaa amal
kitnaa jaa.n-baKHsh nazar aataa hai
saa.ns lene ke liye
qasr-o-kaashaana zaruurii to nahii.n
ko.ii viiraana
ko.ii dasht hii kaafii hai
magar
dasht
vo dasht
jise dekh ke ghar yaad na aa.e

Rafia Shabnam Abidi
Nazm

ashnan

jab nuur ke parde se haTaa parda-e-zulmaat
jab sub.h ke maathe se miTii gard-e-KHuraafaat
pau phuuTne vaalii thii to mashriq thaa hinaa.ii
milne ko thii duniyaa ko shu.aa.o.n kii badhaa.ii
sahmii hu.ii utrii to thii aakaash se shabnam
Guncho.n ko tabassum kaa vo paiGaam thii taaham
kaliyo.n ko jo badmast havaa chuum rahii thii
is chhe.D par har shaaKH-e-chaman jhuum rahii thii
chi.Diyo.n kii chahak duur se detii thii sunaa.ii
u.Dne kii jasaarat abhii un me.n na thii aa.ii
sabza kahii.n chup-chaap guhar rol rahaa thaa
gul ha.ns ke kahii.n band-e-qabaa khol rahaa thaa
fitrat ke pujaarii bhii bahut jaag chuke the
sairo.n ke liye log bhii kuchh bhaag chuke the
taqdiis ke paaband bhii gangaa ke kinaare
jaate the kahii.n tez kahii.n sust bechaare
puujaa ko.ii kartaa thaa tilak ko.ii banaataa
jal haath me.n letaa ko.ii maathe pe lagaataa
itne me.n numaayaa.n hu.aa ik paikar-e-nuurii
qadmo.n me.n shafaq jis ke pa.Dii bahr-e-huzuurii
saa.nche me.n Dhale jaise ki andaam the saare
lapke vo qadam chuumne bahte hu.e dhaare
bojhal thii palak nii.nd ke be-saaKHta-pan se
chhuTtii thii kiran jaise ki har muu-e-badan se
thaalii jo uThaa.e thii to dil vaalo.n ko mahmez
mahjuub hu.aa dekh ke KHurshiid-e-sahar-KHez
saarii kii sa.nbhaale hu.e chuTkii se thii chuunan
ba.Dhtii thii use dekh ke har qalb kii dha.Dkan
dariyaa me.n dhare paa.nv ba.De naaz-o-adaa se
pariyaa.n sii lapakne lagii.n paanii kii ridaa se
ruk ruk ke jo do-chaar qadam aur ba.Dhaa.e
chuunan ko sa.nbhaale hu.e thaalii ko uThaa.e
nazraana diyaa phuul kaa amvaaj ko us ne
thaalii ko liyaa KHaadima-e-KHaas ne ba.Dh ke
phir aab-e-muqaddas me.n jo Dubkii sii lagaa.ii
badlii sii zaraa der ko mahtaab pe chhaa.ii
paanii se parii par ko jhaTaktii hu.ii niklii
andaam-e-gul-andaam se lipTii hu.ii saarii
motii se baraste the har ik muu-e-siyah se
shabnam ke vo qatre the ka.nval par jo pa.De the
vo mast-e-KHiraam aa.ii usii taur ga.ii bhii
par barq-e-tapaa.n KHirman-e-hastii par girii bhii

Rizwanullah
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

daraKHt-e-zard

na jaane aariba kyuu.n aa.e kyuu.n musta.araba aa.e
muzir ke log to chhaane hii vaale the so vo chhaa.e
mire jad haashim-e-aalii ga.e gazza me.n dafnaa.e
mai.n naaqe ko pilaa.uu.ngaa mujhe vaa.n tak vo le jaa.e
liduu lilmauti vabnuu lilhizaabi san KHaraabaatii
vo mard-e-uus kahtaa hai haqiiqat hai KHuraafaatii
ye zaalim tiisraa paig ik aqaaniimii bidaayat hai
uluuhii harzaa-farmaa.ii kaa sirr-e-tuur-e-luknat hai
bhalaa huurab kii jhaa.Dii kaa vo ramz-e-aatishii.n kyaa thaa
magar huurab kii jhaa.Dii kyaa ye kis se kis kii nisbat hai
ye nisbat ke bahut se qaafiye hai.n hai gilaa is kaa
magar tujh ko to yaaraa! qaafiyo.n kii be-tarah lat hai
gumaa.n ye hai ki shaayad bahr se KHaarij nahii.n huu.n mai.n
zaraa bhii haal ke aaha.ng me.n haarij nahii.n huu.n
tanaa-tan tan tanaa-tan tan tanaa-tan tan tanaa-tan tan
tanaa-tan tan nahii.n mehnat-kasho.n kaa tan na pairaahan
na pairaahan na puurii aadhii roTii ab rahaa saalan
ye saale kuchh bhii khaane ko na paa.e.n gaaliyaa.n khaa.e.n
hai in kii be-hisii me.n to muqaddas-tar haraamii-pan

Jaun Eliya
Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal
Nazm

jaan beTa KHilafat pe de do

bolii.n amaa.n 'mohammad-alii' kii
jaan beTaa KHilaafat pe de do
saath tere hai.n 'shaukat-alii' bhii
jaan beTaa KHilaafat pe de do
gar zaraa sust dekhuu.ngii tum ko
duudh hargiz na baKHsuu.ngii tum ko
mai.n dilaavar na samjhuu.ngii tum ko
jaan beTaa KHilaafat pe de do
Gaib se merii imdaad hogii
ab hukuumat ye barbaad hogii
hashr tak ab na aabaad hogii
jaan beTaa KHilaafat pe de do
khaa.nsii aa.e agar tum ko jaanii
maa.ngnaa mat hukuumat se paanii
buu.Dhii amaa.n kaa kuchh Gam na karnaa
kalma pa.Dh pa.Dh KHilaafat pe marnaa
puure us imtihaa.n me.n utarnaa
jaan beTaa KHilaafat pe de do
hote mere agar saat beTe
kartii sab ko KHilaafat pe sadqe
hai.n yahii diin-e-ahmad ke raste
jaan beTaa KHilaafat pe de do
hashr me.n hashr barpaa karuu.ngii
pesh-e-haq tum ko le ke chaluu.ngii
is hukuumat pe da.avaa karuu.ngii
jaan beTaa KHilaafat pe de do
chain ham ne 'shafiiq' ab na paayaa
jaan beTaa KHilaafat pe de do

Shafiq Rampuri
Nazm

adl-e-faruqi ka ek namuna

ek din hazrat-e-faaruuq ne mimbar pe kahaa
kyaa tumhe.n hukm jo kuchh duu.n to karoge manzuur
ek ne uTh ke kahaa ye ki na maane.nge kabhii
ki tire adl me.n ham ko nazar aataa hai futuur
chaadare.n maal-e-Ganiimat me.n jo ab ke aa.ii.n
sehan-e-masjid me.n vo taqsiim hu.ii.n sab ke huzuur
un me.n har ek ke hisse me.n faqat ik aa.ii
thaa tumhaaraa bhii vahii haq ki yahii hai dastuur
ab jo ye jism pe tere nazar aataa hai libaas
ye usii luuT kii chaadar se banaa hogaa zaruur
muKHtasar thii vo ridaa aur tiraa qad hai daraaz
ek chaadar me.n tiraa jism na hogaa mastuur
apne hisse se ziyaada jo liyaa tuu ne to ab
tuu KHilaafat ke na qaabil hai na ham hai.n maamuur
garche vo had-e-manaasib se ba.Dhaa jaataa thaa
sab ke sab mohr-ba-lab the che inaas o che zakuur
rok de ko.ii kisii ko ye na rakhtaa thaa majaal
nashsha-e-adl-o-masaavaat se sab the maKHmuur
apne farzand se faaruuq-e-mo.azzam ne kahaa
tum ko hai haalat-e-aslii kii haqiiqat pe ubuur
tumhii.n de sakte ho is kaa mirii jaanib se javaab
ki na pak.De mujhe mahshar me.n miraa rabb-e-Gafuur
bole ye ibn-e-umar sab se muKHaatib ho kar
is me.n kuchh vaalid-e-maajid kaa nahii.n jurm o qusuur
ek chaadar me.n jo puuraa na hu.aa un kaa libaas
kar sakii is ko gavaaraa na mirii tab-e-Gayuur
apne hisse kii bhii mai.n ne unhe.n chaadar de dii
vaaqi.a kii ye haqiiqat hai ki jo thii mastuur
nukta-chii.n ne ye kahaa uTh ke ki haa.n ai faaruuq
hukm de ham ko ki ab ham use maane.nge zaruur

Shibli Nomani
Nazm

daruza-e-KHilafat

اگر ملک ہاتھوں سے جاتا ہے، جائے
تو احکام حق سے نہ کر بے وفائي
نہيں تجھ کو تاريخ سے آگہي کيا
خلافت کي کرنے لگا تو گدائي
خريديں نہ جس کو ہم اپنے لہو سے
مسلماں کو ہے ننگ وہ پادشائي
''مرا از شکستن چناں عار نايد
کہ از ديگراں خواستن موميائي''

Allama Iqbal
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

dua

kyaa yahii zindagii hai ki ham
apne hone kii KHushiyaa.n manaate rahe.n
jism kii lazzato.n nafs kii shahvato.n me.n bhaTakte rahe.n
saare be-aasraa Gam-gaziido.n ko ibrat kaa zariya samajh kar
apnii aasaa.isho.n ne.amato.n ke liye sajda-e-shukr me.n apne sar ko jhukaate rahe.n
kyaa yahii zindagii hai
kyaa yahii zindagii hai ki ham
Gaasibo.n zar-parasto.n se nazre.n churaa kar
be-kaso.n be-sahaaro.n ko sabr-o-qanaa.at kii talqiin karte rahe.n
gar yahii zindagii hai to mere KHudaa
chhiin le ham se apnii KHilaafat kaa mansab
ki ham vaaqa.ii is ke laa.eq nahii.n
varna ai mere rab rahm kar rahm kar
zindagii dii hai ham ko to phir
zindagii kaa saliiqa sikhaa de

Aarif Akhtar Naqvi
Nazm

wo baat

mai.n chaahtaa huu.n
ki mashvara bhii karuu.n kisii se
pe aql-e-insaan
(aql-e-nsaqis)
har ek pahluu pe Gaur
KHud ek maz.haka hai
yahaa.n se aage jo marhala hai
vo fahm-e-insaa.n se maavaraa hai
KHayaal aataa hai akasr akasr
KHaliifatul-arz huu.n
isii sat.h par jo suljhaa.uu.n baat ko mai.n
magar KHilaafat ko kyaa vilaayat milii hu.ii hai
maziid ye kyaa avaam o ashraaf kii himaayat milii hu.ii hai
agar nahii.n to ye juzv-e-afkaar kis liye hai
ye fikr-e-be-kaar kis liye hai

Shahram Sarmadi
Nazm

jahan-e-nau

mujhe KHudaa ne KHilaafat kaa sharaf baKHshaa hai
mire hii zer-e-nagii.n is jahaa.n ko rakkhaa hai

Naim Siddiqi
Nazm

jab kabhi bhi fursat ho

jab kabhii bhii fursat ho
mai-kade me.n aa jaa.o
ham yahaa.n farishto.n ko
aadmii banaate hai.n
mausam-e-bahaaraa.n ho
yaa fasl-e-abr-o-baaraa.n ho
dhuup chilchilaatii ho
yaa havaa ho barfiilii
saath ham-safar le kar
shoKH ho yaa sharmiilii
jab kabhii bhii fursat ho
mai-kade me.n aa jaa.o
ham yahaa.n farishto.n ko
aadmii banaate hai.n
bhuul kar bhii vo bastii
jis jagah siyaasat ho
bhuul kar bhii vo nagrii
jis jagah jahaalat ho
laakh tum ko de.n daavat
bhuul kar bhii mat jaanaa
haa.n agar mile fursat
mai-kade me.n aa jaanaa
ham yahaa.n farishto.n ko
aadmii banaate hai.n
siikh aql kii baate.n
chho.D sab KHuraafaate.n
jhuuT aur nafrat se
kab talak guzar hogii
baat sab se kar siidhii
pyaar aur mohabbat kii
jab KHushii mile us se
jashn hii manaane ko
mai-kade me.n aa jaanaa
ham yahaa.n farishto.n ko
aadmii banaate hai.n
zehn gar pareshaa.n ho
nii.nd gar nahii.n aatii
husn aur javaanii bhii
gar tujhe nahii.n bhaatii
gar nashe kii aadat hai
aur vo nahii.n jaatii
sun to Gaur se bhaa.ii
kyo.n banaa hai balvaa.ii
gar tujhe shikaayat hai
bevafaa zamaane se
Gam Galat hii karne ko
mai-kade me.n aa jaa.o
ham yahaa.n farishto.n ko
aadmii banaate hai.n

Professor Mahmood Alam
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now