Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "laa-haasil"

Nazm MATCHES FOR "laa-haasil"

Nazm

la-hasil la-hasil

sa.i-e-laa-haasil sahii
khilne de KHvaabo.n ke ka.nval
daa.ero.n me.n ghuumne vaalo.n ne dekhe hai.n
saraabo.n ke ka.nval
uu.nghte suuraj ke
piile aks ne
aa.nkho.n me.n bhar dii.n kirchiyaa.n
soz-e-mahruumii hai shah rag me.n nihaa.n
din ke chehre se ayaa.n
piile piile daa.ero.n kii mauj me.n
khilne de KHvaabo.n ke ka.nval
tishna-saraabo.n ke ka.nval
sa.i-e-laa-haasil sahii
ik sa.i-e-laa-haasil sahii

Ali Abbas Ummeed
Nazm

la-hasil

ye nauhe
ye maatam
kis liye
kis ke liye
aur kab tak
tumhe.n KHabar to thii ki tum
havaa.o.n ke piichhe
havaa ko paka.Dne
bhaagte rahe ho
kal kii is baat kaa
afsos bhii ab nahii.n hai
alamiya to ye hai ki
aaj bhii tum
havaa ke ta.aaqub me.n ho

Irfan Jafari
Nazm

la-hasil

mai.n sochtii huu.n
ki zindagii kii tamaam KHushiyaa.n
tamaam yaade.n
tamaam KHvaab apne raushnii ke
tumhaare qadmo.n me.n nazr kar duu.n
mujhe KHabar hai ye KHvaab mere
puraanii qabro.n ke
TuuTe-phuuTe shikasta katbo.n kii tarah
be-aab ho chuke hai.n
mai.n jaantii huu.n
ye KHvaab mere
hisaab rakkhuu.n to
zindagii-bhar kii daastaa.n hai.n
magar ye yaado.n ke KHushk patte
likhaa hai bas jin pe ek hii naam
hazaaro.n sadiyo.n hazaaro.n barso.n se
ek hii naam
jo pa.Dh sako to mujhe bataa do
ki mai.n bhii KHvaabo.n
kii is kahaanii ko
ko.ii achchhaa saa naam de duu.n

Naushaba Nargis
Nazm

la-hasil

vo titliyo.n ke piichhe
bhaagte bhaagte
ek din
apne maa.n-baap se bichha.D gayaa

Saleem Ansari
Nazm

la-hasil

malgaje se dhu.ndalke me.n jab tum university se
lauT rahe hote ho
vahii.n campus ke baahar
mai.n bhii to baiThii hotii huu.n
kabhii na KHatm hone vaale intizaar me.n
mai.n tumhe.n dekh rahii hotii huu.n
aur tum
paas se aise guzar jaate ho
jaise vaaqif hii na ho
mai.n vahii.n dahliiz pe baiThii rah jaatii huu.n
phir pul ke paas se jab tum guzarte hu.e
Duubte suuraj ko ek nazar dekhte ho
duur kahii.n us Duubte suuraj kii surKH taa.nbe aisii raushnii se tumhaarii dahaktii jabii.n par
jab daraa.De.n pa.Dne lagtii hai.n
mai.n tab bhii tumhe.n dekh rahii hotii huu.n
galii kaa bulb raushan karte hu.e
ek pal ke liye soch me.n pa.D jaatii huu.n
ab bhalaa mere liye mann-o-salvaa kyo.n utarne lagaa
mai.n darvaaza khole zindagii kaa intizaar kartii huu.n
magar vo mere haath nahii.n aatii

Janan Malik
Nazm

la-hasil

jaantaa huu.n ki ham tum bichha.D jaa.e.nge
jaantaa huu.n ki dono.n mile bhii kahaa.n
raat lekin
mire aasmaa.n
mai.n ne dekhaa
mirii aarzuu kaa samundar tujhe chhuu rahaa thaa

Asad Mohammad Khan
Nazm

andheri shab se ek la-hasil

a.ndherii shab ke sharmiile mo.attar kaan me.n us ne kahaa vo shaKHs
duur uftaada lekin mere dil kii tarah raushan hai

Shamsur Rahman Faruqi
Nazm

koshish raegan

kaise chhupaa.uu.n haalat apnii
har koshish laa haasil merii

Chandrabhan Khayal
Nazm

nazr-e-Khaalida

dars aisaa de ke dil aazurda-e-manzil na ho
fikr-e-laa-haasil na ho andesha-e-baatil na ho

Asrarul Haq Majaz
Nazm

DhunDte jaen kiran

jo hai laa-haasil
use haasil samajh kar kyo.n na ham
Dhuu.nDte jaa.e.n kiran isbaat kii

Sajid Hameed
Nazm

apni walida ki yaad mein

talaash un kii yahaa.n hai 'habiib' laa-haasil
ki chashm-e-tar se jo aa.nsuu giraa nahii.n miltaa

JaiKrishn Chaudhry Habeeb
Nazm

kar-e-behuda

apne hone
aur na hone me.n
KHushii kii Gam kii itmiinaan kii tahqiiq
be-masraf hai
aur ik sa.i-e-laa-haasil ke sivaa kuchh bhii nahii.n
ye zindagii
ik ja.ng-e-tahmiilii hai
aur mai.n
be-natiija ja.ng kaa sar-baaz ho.n ko.ii
jo behuuda savaalo.n se
azal se bar-sar-e-paikaar
abad-aasaar naa-paidaa

Shahram Sarmadi
Nazm

suhag ki mehndi

raqs-e-miinaa suruud-e-jaam-o-subuu
bahkii bahkii bahaar kii KHushbuu
kheltii zulmato.n ke siine me.n
marmarii.n raat ke safiine me.n
jaanib-e-saahil-e-hayaat ravaa.n
hasrato.n kii javaan a.ng.Daa.ii
muskuraatii sii kaa.enaat-e-ravaa.n
shoKHiyaa.n maa.il-e-tabassum sii
aur nabze.n yaqiin kii gum sii
sub.h-e-KHandaa.n bahaar ra.anaa.ii
aarzu.o.n kii jhurmuTo.n me.n hai
jaanib-e-saahil-e-hayaat-e-ravaa.n
terii yaado.n ke aabgiine me.n
hai mirii talKH-kaamiyo.n kaa lahuu
lag rahii hai suhaag kii meh.ndii
ye samaa.n aur aa.nkh me.n aa.nsuu
merii majbuuriyo.n pe Gaur to kar
vaqt-e-ruKHsat malaal-e-laa-haasil
ab ye dost savaal-e-laa-haasil

Afsar Azri
Nazm

guftar ke ghazi

har jaanib par-katre tote
chorii ke chakkar me.n gum hai.n
apne apne pinjro.n me.n gardan ak.Daa.e
chhan-chhan karte ghuum rahe hai.n
duniyaa ko uljhaa rakkhaa hai
apnii laa-haasil Te.n Te.n me.n

Hamida Shaheen
Nazm

maya ye sansar

allaah-huu kaa na.ara ho yaa harii harii kii taan
dil hii teraa paak nahii.n to kyaa simran kyaa dhyaan
zamzam me.n tuu Gusl kare yaa gangaa me.n ashnaan
laa-haasil sab sajde tere puujaa sab bekaar
maayaa ye sansaar re baabaa maayaa ye sansaar

Amjad Najmi
Nazm

nind ke taaqub mein

nii.nd ke ta.aaqub me.n
duur duur tak laa-haasil
der se bhaTaktaa huu.n
niilii aa.nkho.n vaalii
ja.ngalii billii
baar baar dum hilaatii hai
merii chaarpaa.ii ke niiche
niim raushan lamp ke ird-gird
kii.Do.n par jhapaTtii chhipkalii
be-KHabar hai apne ant se
kitnaa Gair-mutavaqqe hogaa
mil jaanaa anant se

Chandrabhan Khayal
Nazm

ham-zad

dopahar kii dhuup me.n
us ne kyuu.n yuu.n muzmahil nazro.n se dekhaa thaa mujhe
us kii aa.nkho.n me.n sisaktii ruuh
kyuu.n mere liye chaak-e-jigar ban kar rahii
kaash ye chaak-e-jigar chaak-e-garebaa.n ban sake
taaki merii sa.i-e-laa-haasil kaa zaKHm laa-davaa
lazzat aavaargii kaa ta.ana-e-qaatil na bin jaa.e kahii.n
shahr vaale KHush hai.n
chashm-e-rauzan-e-dil ab kisii KHisht-e-tamannaa
tuuda-e-ummiid sa.ng-e-aarzuu se band hai
ek mai.n huu.n meraa chaak-e-dil
kisii sozan se siltaa hii nahii.n
ye kisii sa.ng-e-tamannaa tuuda-e-ummiid se bhartaa nahii.n
aur jis kii justujuu me.n raat-din
barg-e-aavaara banaa phirtaa huu.n mai.n
us kaa naqsh-e-paa kahii.n miltaa nahii.n
us kaa naqsh-e-paa kahii.n miltaa nahii.n

Ahmed Shamim
Nazm

ehtisab

tanhaa.ii me.n aksar sochaa kartii huu.n
maut kyaa aur hayaat kyaa hai
haasil aur laa-haasil ke kyaa ma.anii
zindagii ke safar me.n
chalte chalte ek din
maut se Takraa.e.nge
la.Dkha.Daa.e.nge aur
kuchh vaqfe ke liye
dam le kar aage chale.nge
maut sirf ek vaqfa hai
aur phir se
hayaat kaa safar hogaa jaarii
jo aarzii nahii.n daa.imii hogaa
kabhii na KHatm hone vaalaa
yaqiinan
chalo apnaa ehtisaab kar le.n
daa.imii is safar kaa
kuchh intizaam kar le.n
chalo apnaa ehtisaab kar le.n

Zakira Shabnam
Nazm

janm din

pichhle pai.ntaaliis ka.De koso.n me.n kyaa kyaa mo.D aa.e hai.n
har chauraahaa
kyaa kyaa vahm-o-gumaa.n laayaa hai
kyaa aavaaze.n
kaano.n ke pardo.n ko aksar chhed ga.ii hai.n
kyaa kyaa manzar
dhund bharii aa.nkho.n ne dekhe
kaisii zarbe.n zehn ne khaa.ii.n
kitne kos abhii chalnaa hai
kyaa chauraahe kaisii choTe.n
vahm-o-gumaa.n aavaaze.n manzar
meraa rasta dekhe rahe hai.n
un ko ginnaa un kii fikr me.n Duube rahnaa laa-haasil hai
aslii baat bas itnii sii hai
KHatm-e-safar tak
apnii laash ko kaa.ndhaa dene kii taufiiq nahii.n hai mujh me.n
aur is se bachne kii ko.ii suurat nahii.n hai

Balraj Komal
Nazm

mohabbat jism hai mana

mohabbat jism ke chhoTe se hujre ke
kisii goshe me.n rahtii hai
yahaa.n rauzan nahii.n ko.ii
kahii.n se raushnii kii ik kiran andar nahii.n aatii
bahut gahraa a.ndheraa hai
tasavvur aur KHayaalo.n kii guzargaaho.n pe pahraa hai
mohabbat ek laa haasil safar kaa saatvaa.n parda hai
jis me.n ik samundar us kii tuGyaanii KHamoshii kaa baseraa hai
samundar shaant hotaa hai to pistaano.n se lahre.n yuu.n lipaTtii hai.n
ki jaise ghan garaj ke baa'd sarshaarii kaa lamha ho
usii lamhe me.n vaqfe me.n
mohabbat be-karaa.n hotii hai jiitii hai
mohabbat gungunaatii aur bikhartii hai
mohabbat jaavedaa.n hotii mahaktii hai

Tabassum Fatma
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now