Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "lade"

Nazm MATCHES FOR "lade"

Nazm

banjara-nama

Tuk hirs-o-havaa ko chho.D miyaa.n mat des bides phire maaraa
qazzaaq ajal kaa luuTe hai din raat bajaa kar naqqaaraa
kyaa badhiyaa bhai.nsaa bail shutur kyaa gaune.n pallaa sar-bhaaraa
kyaa gehuu.n chaa.nval moTh maTar kyaa aag dhu.aa.n aur a.ngaaraa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

ziyaada pas mat aana

ziyaada paas mat aanaa
mai.n vo tah-KHaana huu.n jis me.n
shikasta KHvaahisho.n ke an-ginat aaseb baste hai.n
jo aadhii shab to rote hai.n phir aadhii raat ha.nste hai.n
mirii taariikiyo.n me.n
gum-shuda sadiyo.n ke gard-aaluud naa-aasuuda KHvaabo.n ke
ka.ii ifriit baste hai.n
mirii KHushiyo.n pe rote hai.n mire ashko.n pe ha.nste hai.n
mire viiraan dil me.n re.ngtii hai.n maka.Diyaa.n Gam kii
tamannaa.o.n ke kaale naag shab-bhar sarsaraate hai.n
gunaaho.n ke jane bichchhuu
damo.n par apne apne Da.nk laade
apne apne zahr ke sho.alo.n me.n jalte hai.n
ye bichchhuu dukh nigalte aur pachhtaave ugalte hai.n

Rehman Faris
Nazm

walid ke intiqal par

vo chaaliis raato.n se soyaa na thaa
vo KHvaabo.n ko uu.nTo.n pe laade hu.e
raat ke regzaaro.n me.n chaltaa rahaa
chaandnii kii chitaa.o.n me.n jaltaa rahaa
mez par
kaa.nch ke ik pyaale me.n rakkhe hu.e
daa.nt ha.nste rahe
kaalii ainak ke shiisho.n ke piichhe se phir
motiye kii kalii sar uThaane lagii
aa.nkh me.n tiirgii muskuraane lagii
ruuh kaa haath
chhalnii hu.aa suu.ii kii nok se
KHvaahisho.n ke diye
jism me.n bujh ga.e
sabz paanii kii sayyaal parchhaa.iyaa.n
lamha lamha band me.n utarne lagii.n
ghar kii chhat me.n ja.De
das sitaaro.n ke saayo.n tale
aks dhundlaa ga.e
aks murjhaa ga.e

Adil Mansuri
Nazm

tausi-e-shahr

biis baras se kha.De the jo is gaatii nahr ke dvaar
jhuumte kheto.n kii sarhad par baa.nke pahre-daar
ghane suhaane chhaa.nv chhi.Dakte bor lade chhatnaar
biis hazaar me.n bik ga.e saare hare bhare ashjaar

Majeed Amjad
Nazm

bimar ki raat

dard be-rahm hai
jallaad hai dard
dard kuchh kahtaa nahii.n
suntaa nahii.n
dard bas hotaa hai
dard kaa maaraa hu.aa
rau.ndaa hu.aa
jism to ab haar gayaa
ruuh ziddii hai
la.De jaatii hai
haa.nptii
kaa.nptii
ghabraa.ii hu.ii
dard ke zor se
tharraa.ii hu.ii
jism se lipTii hai
kahtii hai
nahii.n chho.Duu.ngii
maut
chaukhaT pe kha.Dii hai kab se
sabr se dekh rahii hai us ko
aaj kii raat
na jaane kyaa ho

Javed Akhtar
Nazm

mardana kamzori

mere kaa.ndhe pe 'aurat ko rakkhaa gayaa
pusht par baap kaa kumba laadaa gayaa
sar pe kavve bhii bhuuke biThaa.e ga.e
mere haatho.n me.n talvaar de dii ga.ii
mujh ko mere KHudaa se Daraayaa gayaa
jab kamar jhuk ga.ii
mai.n ghisaT kar chalaa
kuhniyaa.n chhil ga.ii.n
ghuTne zaKHmii hu.e
KHuun ristaa rahaa
mai.n nahii.n ro sakaa

Shoaib Kiani
Nazm

laDkon ka zindagi-nama

kyaa zindagii hamaarii
sab kuchh hai apne bas me.n
aazaad hai.n fazaa.e.n
duniyaa hai dastaras me.n
kyaa kyaa hame.n milaa hai
kuchh vaqt kuchh baras me.n
lekin jo mu.D ke dekhe.n
thii ik ajab kahaanii
dushvaar kaisaa jiinaa
mushkil thii zindagaanii
ik aafat-e-musalsal
aalaam-e-naa-gahaanii
rozaana sub.h uThnaa
aasaan thaa na itnaa
har roz Daa.nT khaanaa
har roz kaa sisaknaa
har baat ke tamaashe
har baat par jhaga.Dnaa
abbaa vahii.n kha.De hai.n
aKHbaar pa.Dh rahe hai.n
kyaa kaam ham ko de de.n
har vaqt sochte hai.n
aulaad ko to apnii
naukar samajh rahe hai.n
ammii ke saamne to
bilkul na mu.nh ko khole.n
ham bad-tamiiz Thahre
go achchhii baat bole.n
chup-chaap hii rahe.n bas
kitnaa bhii KHvaar ho le.n
paanii baras rahaa hai
par dil taras rahaa hai
vo cycle kha.Dii hai
maa.njhaa vahii.n rakhaa hai
kanche yahaa.n pa.De hai.n
ballaa vahaa.n kha.Daa hai
lekin nahii.n hame.n kyaa
laade kamar pe basta
school jaa rahe hai.n
taariiKH kaa hai parcha
achchhaa nahii.n hu.aa to
bas band jeb KHarcha
urdu kaa kaam puuraa
kal raat kar liyaa thaa
lekin hame.n riyaazii
bilkul samajh na aayaa
allaah ke hai.n bande
ham se hai vaasta kyaa
ammii ne sirf Daa.nTaa
baalo.n me.n tel Daalaa
bhayyaa ne sirf jhi.Dkaa
baajii ne KHuub Taalaa
sab ke liye hai jii me.n
nafrat kaa ek jaalaa
bhayyaa kii cycle kii
kis ne havaa nikaalii
ham ko bhalaa KHabar kyaa
har shaKHs hai savaalii
us ne hamaarii chi.Diyaa
us din jo to.D Daalii
sach hai bahut sitam thaa
goyaa the ik khilaunaa
jaise ho sab baraabar
ghar me.n na honaa honaa
dekhaa nahii.n kisii ne
chhup chhup hamaaraa ronaa
ab ho gayaa hai apnaa har chiiz par ijaara
sab apnii zimmedaarii
sab faisle hamaare
har chiiz iKHtiyaarii
lekin vo bachpane kii hai yaad pyaarii pyaarii
kyaa zindagii hamaarii
kyaa zindagii hamaarii

Asna Badr
Nazm

hum

jo hai jo ab tak hu.aa hai jo ho rahaa hai
us se kise mafar hai
ko.ii jo chaahe
ki ahd-e-rafta se ek pal phir se lauT aa.e
kahaa hu.aa lafz an-kahaa ho sake
to is aarzuu kaa haasil vo jaantaa hai
bahut sahii iKHtiyaar-o-imkaa.n
barg-o-KHas kii taab-o-majaal kyaa hai
numu-e-Guncha me.n us kaa apnaa kamaal kyaa hai
tirii nigaaho.n me.n teraa Gam koh se giraa.n-tar hai
tuu samajhtaa hai
tere siine ke surKH laave se
shahr-o-qarya pighal rahe hai.n
KHizaa.n zamistaa.n tirii udaasii ke aa.ine hai.n
tuu mushta.il ho to zalzalo.n se zamiin kaa.npe
tujhe gumaa.n hai
ki gul khile hai.n tire tabassum kii pairvii me.n
ye phuul ko iKHtiyaar kab thaa
ki kaun sii shaaKH par khile
kaun kunj me.n muskuraa.e
aur kin fazaa.o.n me.n KHushbu.e.n bikhere

Zia Jalandhari
Nazm

subh

sub.h hone lagii hai
magar apne bistar me.n vo be-KHabar ab bhii be-sudh pa.Dii hai
use kyaa KHabar hai
ki do laakh saalo.n se chaltii hu.ii
andromeda ke kuchh suurajo.n kii shu.aa.e.n
zamii.n par pahu.nch kar hamaarii shu.aa.o.n me.n shaamil hu.ii hai.n
to is sub.h kaa chehra raushan hu.aa hai
ye do laakh saalo.n kaa lambaa safar
jis me.n ham sapiens
jangalo.n ke a.ndhero.n me.n ba.Dhte hu.e
apne cousino.n kii qismat ke rab ban ga.e
un se itnaa la.De
un kii naapaidgii kaa sabab ban ga.e
itne saalo.n me.n ham
Gaar se jho.np.Dii jho.np.Dii se qabiilo.n kii suurat baTe
aur qabiilo.n se shahro.n me.n Dhalne lage hai.n
ye do laakh saalo.n se niklii hu.ii raushnii apne suuraj me.n aa kar milii hai
to duniyaa kii ain us jagah par jahaa.n is kaa ghar hai
vahaa.n
sub.h ban.ne lagii hai
zamii.n par kisii din kii pahlii gha.Dii hai
zamii.n ghuum kar apne baabaa kii jaanib mu.Dii hai
magar apne bistar me.n vo be-KHabar ab bhii be-sudh pa.Dii hai

Sohaib Mugheera Siddiqi
Nazm

ye nur kaisa hai

raakh kaa saara.ng pahne
barf kii laash hai
laade kaa saa badan pahne
guu.ngii chaahat hai
rusvaa.ii kaa kafan pahne
har ek qatra muqaddas hai maile aa.nsuu kaa
ek hujuum apaahij hai aab-e-kausar par
ye kaisaa shor hai jo be-aavaaz phailaa hai
ro pahlii chhaa.nv me.n bad-naamiyo.n kaa Deraa hai
ye kaisii jannat hai jo chau.nk chau.nk jaatii hai
ek intizaar-e-mujassam kaa naam KHaamoshii
aur ehsaas-e-be-karaa.n pe ye sarhad kaisii
dar-o-diivaar kahaa.n kii aavaargii ke
nuur kii vaadii talak lams kaa ik safar taviil
har ek mo.D pe bas do hii naam milte hai.n
maut kah lo jo mohabbat nahii.n kahne paa.o
usii kaa naam mohabbat hai jis kaa naam hai maut

Meena Kumari Naz
Nazm

salgirah

kaun gustaaKH hai kyaa naam hai kyuu.n aayaa hai
pahre vaalo use KHanjar kii anii se roko
apnii banduuqo.n kii naalii se Daraa.o us ko
aur us par jo na maane use topo.n kii salaamii de do
jashn kaa din hai mirii saalgirah kaa din hai
aaj mahlo.n me.n jale.nge mah-o-anjum ke charaaG
aaj bujhte hu.e chehro.n kii zaruurat kyaa hai
aaj maayuus nigaaho.n kii zaruurat kyaa hai
kaun bebaak hai ba.Dhtaa hii chalaa aataa hai
pahre vaalo use KHanjar kii anii se roko
aadmii hai ki miraa vahm hai aaseb hai ye
us ke chehre pe to zaKHmo.n ke nishaa.n tak bhii nahii.n
goliyaa.n us ke siyah siine se Takraa ke chalii aatii hai.n
us ke ho.nTo.n pe tabassum hai ki mu.nh khole hu.e
azhdahaa taKHt nigalne ko chalaa aataa hai
maut kis bhes me.n aa.ii hai mujhe lene ko
aaj kyuu.n aa.ii hai kyuu.n aa.ii hai kyuu.n aa.ii hai
mai.n tujhe gauhar-o-almaas diye detaa huu.n
tere ThiThure hu.e haatho.n ko haraarat duu.ngaa
jashn kaa din hai mirii saalgirah kaa din hai
kaun ho kaun ho tum
ai Gariibo.n ke KHudaavand amiiro.n ke rafiiq
mai.n samajhtaa thaa mujhe aap na pahchaane.nge
mai.n ne a.ngrez kii jailo.n me.n javaanii kaaTii
mai.n ne ThiThure hu.e haatho.n se jalaa.e hai.n diye
jin kii lau aaj bhii tuufaano.n se Takraatii hai
jin ko a.ngrez kii phuu.nko.n ne bujhaanaa chaahaa
aur KHud un kii zabaa.n jal ke siyah-faam hu.ii
vo diye aaj bhii bar-lauu.n kii chiiKHo.n se la.De jaate hai.n
aap ko yaad na hogaa shaayad
kaun ho kaun ho tum
mai.n ne taariiKH kii lahro.n me.n ravaanii de dii
mai.n ne buu.Dho.n kii rag-o-pai me.n javaanii de dii
mai.n ne jhukte hu.e shaano.n ko tavaanaa.ii dii
kaar-KHaane mirii aavaaz se bedaar hu.e
aur ik merii hii aavaaz nahii.n guu.njii thii
saik.Do.n vaqt se haare hu.e insaan uThe
kuhra-e-vaqt pe chhaane ke liye
kaun ho kaun ho tum
auraaq me.n hii nahii.n aayaa huu.n
saik.Do.n vaqt ke maare hu.e insaan bhii hai.n
saik.Do.n vaqt pe chhaa.e hu.e insaan bhii hai.n
kaun ho kaun ho tum
aaj bhii ketiyo.n me.n bhuuk ugaa kartii hai
kaar-KHaano.n me.n dhu.e.n ke baadal
tauq aur aahanii zanjiiro.n me.n Dhal jaate hai.n
kaun ho kaun ho tum
aap insaan kii azmat pe yaqii.n rakhte hai.n
aap ke hukm ne kitno.n kii zabaane.n sii dii.n
aap kii mumlikat adl me.n kitne biimaar
qaid-e-tanhaa.ii me.n dam to.D chuke
kaun ho kaun ho tum
aap kii be.Diyaa.n afraad ko paaband banaa saktii hai.n
aap kii be.Diyaa.n insaan ko paaband nahii.n kar saktii.n
kal yahii sham.a jo siine me.n farozaa.n hai aaj
aap ke saare tilismaat jalaa Daalegii
kal unhii.n kheto.n me.n uj.De hu.e khaliyaano.n me.n
saal-haa-saal kii paamaal zamii.n
apne siine ke KHazaano.n ko luTaatii hogii
kaar-KHaane bhii siyahkaar KHudaa.o.n se rihaa.ii paa kar
laakho.n insaano.n kii taskiin kaa saamaa.n ho.nge
ik na.e ahd na.ii ziist kaa unvaa.n ho.nge
aur phir vaqt kaa bebaak mo.arriKH aa kar
surKH parcham ko salaamii degaa
kaun ho kaun ho tum
bhaardvaaj

Akhtar Payami
Nazm

pardesi

jo KHvaab paraa.e des me.n tum nahii.n dekh sake
vo phuul
jo tum ne kisii ko denaa chaahaa aur nahii.n de paa.e
vo nii.nd
jise gaTh.Dii kii tarah
palko.n par laade phirte ho
sab apne saath uThaa laanaa
is baar akele mat aanaa

Hamida Shaheen
Nazm

harf-e-aKHir

ye aadmii kii guzargaah-e-shaahraah-e-hayaat
hazaaro.n saal kaa baar-e-garaa.n uThaa.e hu.e
jabii.n pe kaatib-e-taqdiir kii jalii tahriir
gale se saik.Do.n naqsh-e-qadam lagaa.e hu.e
guzarte vaqt ke gard-o-Gubaar ke niiche
hasiin jism kii taabindagii chhupaa.e hu.e
guzishta daur kii tahziib kii manaazil ko
javaan maa.n kii tarah god me.n sulaa.e hu.e
ye aadmii kii guzargaah-e-shaahraah-e-hayaat
hazaaro.n saal kaa baar-e-garaa.n uThaa.e hu.e
idhar se guzre hai.n cha.ngez-o-naadir-o-taimuur
lahuu me.n bhiigii hu.ii mish.ale.n jalaa.e hu.e
Gulaamo.n aur kaniizo.n ke kaarvaa.n aa.e
KHud apne KHuun me.n Duube hu.e nahaa.e hu.e
shikasta dosh pe diivaar-e-chiin ko laade
saro.n pe misr ke ehraam ko uThaa.e hu.e
jalaal-e-shaiKH-o-shikoh-e-barhamanii ke juluus
havas ke siino.n me.n aatish-kade chhupaa.e hu.e
jahaalato.n kii taviil-o-ariiz parchhaa.ii.n
tavahhumaat kii taariikiyaa.n jagaa.e hu.e
safed qaum ke ayyaar taajiro.n ke giroh
fareb-o-makr se apnii dukaa.n sajaa.e hu.e
shikast-KHurda siyaasii gadaagaro.n ke hujuum
adab se TuuTii hu.ii gardane.n jhukaa.e hu.e
Gamo.n se chuur musaafir thake hu.e raahii
charaaG-e-ruuh ke dil ke ka.nval bujhaa.e hu.e
ye aadmii kii guzargaah-e-shaahraah-e-hayaat
hazaaro.n saal kaa baar-e-garaa.n uThaa.e hu.e
na.e ufuq se na.e qaafilo.n kii aamad hai
charaaG-e-vaqt kii ra.ngiin lau ba.Dhaa.e hu.e
baGaavato.n kii sipah inqalaab ke lashkar
zamii.n pe paa.nv falak pe nazar jamaa.e hu.e
Guruur-e-fat.h ke parcham havaa me.n lahraate
sabaat-o-azm ke uu.nche alam uThaa.e hu.e
hatheliyo.n pe liye aaftaab aur mahtaab
baGal me.n kurra-e-arz-e-hasii.n dabaa.e hu.e
uTho aur uTh ke inhe.n qaafilo.n me.n mil jaa.o
jo manzilo.n ko hai.n gard-e-safar banaa.e hu.e
qadam ba.Dhaa.e hu.e hai.n mujaahidaan-e-vatan
mujaahidaan-e-vatan hai.n qadam ba.Dhaa.e hu.e

Ali Sardar Jafri
Nazm

shair-e-KHush-nawa

vahii kaar-e-duniyaa
vahii kaar-e-duniyaa ke apne jhamele
vahii dil kii haalat
vahii KHvaahisho.n aarzuu.o.n ke mele
vahii zindagii se bharii bhii.D me.n chalne vaale sabhii log
apnii jagah par akele
ka.ii gard-aaluud manzar nigaaho.n kii dahliiz par jam ga.e hai.n
mujhe yuu.n lagaa jaise chalte hu.e vaqt ke qaafile tham ga.e hai.n
zaraa sii.Dhiyo.n se udhar mai.n ne dekhaa
vahii shahr hai aur vahii shahr kii be-karaamat fazaa hai
vahii KHalq hai aur vahii KHalq ke bhuul jaane kii apnii adaa hai
vahii raaste hai.n vahii be-suhuulat safar kii sazaa hai
vahii saa.ns lene ko jiine ko be-mehr aab-o-havaa hai
vahii zindagii hai vahii us ke chaaro.n taraf be-tahaffuz ridaa hai
vahii sii.Dhiyo.n se udhar raahdaarii ke baa.e.n taraf KHaalii kamra
tirii guftuguu se bharaa KHaalii kamra
tire qahqaho.n ke samundar me.n Duubaa hu.aa aa.nsu.o.n kaa jaziira
jaziire me.n u.Dtaa hu.aa ik parinda
mu.nDero.n dariicho.n daraKHto.n kii tanhaa.iyo.n kaa mudaavaa parinda
tirii chaahato.n aur vafaa-daariyo.n ke ufuq par sitaara-numaa ik parinda
tire giit gaataa
tamannaa.o.n kii baarisho.n me.n nahaataa
kisii taaza imkaan ko jagmagaataa
kahii.n duur phailii hu.ii kahkashaa.o.n me.n gum ho gayaa hai
zaraa sii.Dhiyo.n se udhar mai.n ne dekhaa
ka.ii likhne vaale
KHushaamad kaa kaasa liye apne Giibat-kade me.n kha.De hai.n
siyaasii vaDere
musaavaat kaa naam le kar hamesha Gariib aadmii kii anaa se la.De hai.n
ka.ii ahl-e-daanish
jo mazluum kii aah-o-zaarii pe dikhte the
zaalim ke dar par pa.De hai.n
yahaa.n ko.ii chhoTaa nahii.n hai
sab ik duusre se ba.De hai.n
tirii shaa.irii kaa KHamiir apne jazbo.n kii sachchaa.iyo.n se uThaa thaa
tuu apne usuulo.n ke aatish-fishaa.n par kha.Daa
zindagii kii riyaa-kaariyo.n se nabard-aazmaa thaa
tuu apne ravayyo.n kii sab haalato.n me.n
mohabbat se likkhii hu.ii ik du.aa thaa
tuu ahl-e-vafaa kaa zamiir aashnaa thaa
abhii sii.Dhiyaa.n cha.Dhte cha.Dhte mai.n ruk saa gayaa huu.n
vahaa.n kaun hai
kaun hai ab jo dastak kii pahlii kiran kii hikaayat sunegaa
na.e ratjago.n kii masaafat me.n uljhe hu.e aane vaale dino.n kii
rivaayat sunegaa
charaaGo.n kii aavaaz me.n
aa.ino.n kii tilaavat sunegaa
mire shaa.ir-e-KHush-navaa
tuu ki dushman bhii achchhaa thaa
aur dostii me.n bhii teraa yahaa.n ko.ii saanii nahii.n hai
jise ahl-e-dil bhuul jaa.e.nge
tuu vo kahaanii nahii.n hai

Saleem Kausar
Nazm

daraKHt

dhuup me.n saaya-daar daraKHt
lade-phade phaldaar daraKHt
taaza in se havaa mile
jiine kaa sab maza mile

Syed Shakeel Desnavi
Nazm

main chhoTa sa ek laDka hun

mai.n chhoTaa saa ik la.Dkaa huu.n
pur kaam karuu.ngaa ba.De ba.De
jitne bhii la.Dkii la.Dke hai.n
mai.n sab ko nek banaa.uu.ngaa
jo bikhre hu.e hai.n ham-jolii
in sab ko ek banaa.uu.ngaa
sab aapas me.n mil jaa.e.nge
jo rahte hai.n ab la.De la.De
ye ilm kii hai.n jo raushaniyaa.n
mai.n ghar ghar me.n phailaau.ngaa
ta.aliim kaa parcham lahraa kar
mai.n sir-sayyad ban jaa.uu.ngaa
be-kaar guzaaruu.n umr bhalaa
kyo.n apne ghar me.n pa.De pa.De
mai.n chaar taraf le jaa.uu.ngaa
iqbaal ne jo paiGaam diyaa
mai.n hii vo parinda huu.n jis ko
us ne shahbaaz kaa naam diyaa
ab mere paro.n par chamke.nge
sab hiire motii ja.De ja.De

Jameeluddin Aali
Nazm

apne dil mein Dar

aur isii raste par mai.n ne lohe ke halqo.n me.n
ik qaidii ko dekhaa
aahan chehra sipaahii kii jarsii kaa rag us qaidii ke ruKH par thaa
har andesha to ik kunDii hai jo dil ko apnii jaanib khii.nch ke rakhtii hai aur vo qaidii bhii
khichaa hu.aa thaa apne dil ke KHauf kii jaanib jis kii ko.ii rut nahii.n hotii
mai.n bhii apne andesho.n kaa qaidii huu.n lekin us qaidii ke andeshe to
ik mere sivaa sab ke hai.n
ik vahii apne apne dukh kii kunDii
jis ke khichaa.o se ik ik gardan apnii jaanib jhukii hu.ii hai
aise me.n ab kaun ghaTaa.o.n bharii us sub.h-e-bahaaraa.n ko dekhegaa
jo in bor lade andesho.n par yuu.n jhukii hu.ii hai aamo.n ke baaGo.n me.n
mirii ruuh ke saamne

Majeed Amjad
Nazm

chor chuhe aur bachche

gul abbaas gulaab chambelii
ge.ndaa champaa belaa huuhii
kal tak in se lade hu.e the
aaj udaas kha.De hai.n paude
chuuhe phuul kutar jaate hai.n

Muzaffar Hanfi
Nazm

yaran-e-najd

ai baad-e-sub.h-gaahii dil keii kalii khilaa de
viiraana mere dil kaa rashk-e-chaman banaa de
us bazm-e-jaa.n-fazaa kaa nazzaara phir dikhaa de
gulzaar-e-aarzuu me.n phir taaza gul khilaa de
ye kaar-zaar-e-hastii hai ranj-o-Gam keii bastii
phir yaad-e-bazm-e-jam me.n ik jaam-e-jam pilaa de
ab shaam-e-zindagii keii zulmat hai chhaane vaalii
vo sub.h-e-dil-kushaa kaa nazzaara phir dikhaa de
pastii me.n paa-ba-gil hai umr-e-ravaa.n kaa dariyaa
phir uu.nchii vaadiyo.n ke manzar use dikhaa de
vo ahd-e-shaadmaanii vo itr-e-zindagaanii
ai daur-e-aasmaanii vaapas kahii.n se laade
ai baaGbaa.n ho tujh ko taKHt-e-chaman mubaarak
mujh ko vo ham-navaa de vo meraa gho.nsla de
kin hasrato.n se 'naazir' us anjuman se nikle
melaa saa lag rahaa hai jab ham chaman se nikle
ahvaal-e-bazm-e-gulshan ai naama-bar sunaanaa
vo daastaa.n hai dilkash ra.ngii.n hai vo fasaana
us bazm-e-dil-kushaa me.n ulfat keii us fazaa me.n
taaro.n keii raushnii me.n yaaro.n kaa mil ke gaanaa
kaano.n me.n rach rahii hai koyal keii kuuk ab tak
'naazir' kaa hai vaziifa us dhun me.n gungunaanaa
collage keii sarzamii.n thii yaa naqsh-e-dil-nashii.n thii
dil se KHayaal us kaa mumkin nahii.n bhulaanaa
dariyaa me.n mil ke jaise ho.n naddiyaa.n ham-aaGosh
begaana kal jo aayaa vo aaj thaa yagaana
bahr-e-tavaaf jaanaa piir-e-muGaa.n ke dar par
aur us keii ik nigah se sarmast ho ke aanaa
us chashm-e-mast me.n thii ye turfa ik karaamat
phirtii vo jis taraf ko phirtaa udhar zamaanaa
ai vaqt-e-rafta aa jaa phir vo samaa.n dikhaa jaa
aisaa bhii kyaa thaa jaanaa phir lauT kar na aanaa
ai naaKHudaa bha.nvar se kashtii merii bachaa kar
yaaraan-e-aashnaa se bahr-e-KHudaa milaanaa
dar fasl-e-gul ki gulshan naqsh-o-nigaar bando
'naazir' KHayaal-e-KHud-raa aur bazm-e-yaar bando

Khushi Mohammad Naazir
Nazm

duniya

duniyaa ek ku.nvaarii maa.n hai
ham sab hai.n naa-jaa.ez bachche
jo apne naadiida pidar kii hirs o gunah ke pachhtaave ko
apne apne kandhe par laade phirte hai.n
marne kii dhun me.n jiite hai.n

Iftikhar Aazmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now