Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "lahad"

Nazm MATCHES FOR "lahad"

Nazm

banjara-nama

Tuk hirs-o-havaa ko chho.D miyaa.n mat des bides phire maaraa
qazzaaq ajal kaa luuTe hai din raat bajaa kar naqqaaraa
kyaa badhiyaa bhai.nsaa bail shutur kyaa gaune.n pallaa sar-bhaaraa
kyaa gehuu.n chaa.nval moTh maTar kyaa aag dhu.aa.n aur a.ngaaraa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

ek laDka

ma.iishat duusro.n ke haath me.n hai mere qabze me.n
juz ik zehn-e-rasaa kuchh bhii nahii.n phir bhii magar mujh ko
KHarosh-e-umr ke itmaam tak ik baar uThaanaa hai
anaasir muntashir ho jaane nabze.n Duub jaane tak
navaa-e-sub.h ho yaa naala-e-shab kuchh bhii gaanaa hai
zafar-mando.n ke aage rizq kii tahsiil kii KHaatir
kabhii apnaa hii naGma un kaa kah kar muskuraanaa hai
vo KHaama-sozii shab-bedaariyo.n kaa jo natiija ho
use ik khoTe sikke kii tarah sab ko dikhaanaa hai
kabhii jab sochtaa huu.n apne baare me.n to kahtaa huu.n
ki tuu ik aabla hai jis ko aaKHir phuuT jaanaa hai
Garaz gardaa.n huu.n baad-e-sub.h-gaahii kii tarah lekin
sahar kii aarzuu me.n shab kaa daaman thaamtaa huu.n jab
ye la.Dkaa puuchhtaa hai aKHtar-ul-iimaan tum hii ho
ye la.Dkaa puuchhtaa hai jab to mai.n jhallaa ke kahtaa huu.n
vo aashufta-mizaaj andoh-parvar iztiraab-aasaa
jise tum puuchhte rahte ho kab kaa mar chukaa zaalim
use KHud apne haatho.n se kafan de kar farebo.n kaa
isii kii aarzuu.o.n kii lahad me.n phe.nk aayaa huu.n
mai.n us la.Dke se kahtaa huu.n vo sho.ala mar chukaa jis ne
kabhii chaahaa thaa ik KHaashaak-e-aalam phuu.nk Daalegaa
ye la.Dkaa muskuraataa hai ye aahista se kahtaa hai
ye kizb-o-iftiraa hai jhuuT hai dekho mai.n zinda huu.n

Akhtarul Iman
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

iltija-e-musafir

farishte pa.Dhte hai.n jis ko vo naam hai teraa
ba.Dii janaab tirii faiz aam hai teraa
sitaare ishq ke terii kashish se hai.n qaa.em
nizaam-e-mehr kii suurat nizaam hai teraa
tirii lahad kii ziyaarat hai zindagii dil kii
masiih o KHizr se uu.nchaa maqaam hai teraa
nihaa.n hai terii mohabbat me.n ra.ng-e-mahbuubii
ba.Dii hai shaan ba.Daa ehtiraam hai teraa
agar siyaah dilam daaG-e-laala-zaar-e-tavaam
digar kushaada jabiinam gul-e-bahaar-e-tavaam
chaman ko chho.D ke niklaa huu.n misl-e-nik.hat-e-gul
hu.aa hai sabr kaa manzuur imtihaa.n mujh ko
chalii hai le ke vatan ke nigaar-KHaane se
sharaab-e-ilm kii lazzat kashaa.n kashaa.n mujh ko
nazar hai abr-e-karam par daraKHt-e-sahraa huu.n
kiyaa KHudaa ne na mohtaaj-e-baaGbaa.n mujh ko
falak-nashii.n sifat-e-mehr huu.n zamaane me.n
tirii du.aa se ataa ho vo nardbaa.n mujh ko
maqaam ham-safaro.n se ho is qadar aage
ki samjhe manzil-e-maqsuud kaarvaa.n mujh ko
mirii zabaan-e-qalam se kisii kaa dil na dukhe
kisii se shikva na ho zer-e-aasmaa.n mujh ko
dilo.n ko chaak kare misl-e-shaana jis kaa asar
tirii janaab se aisii mile fuGaa.n mujh ko
banaayaa thaa jise chun chun ke KHaar o KHas mai.n ne
chaman me.n phir nazar aa.e vo aashiyaa.n mujh ko
phir aa rakhuu.n qadam-e-maadar-o-pidar pe jabii.n
kiyaa jinho.n ne mohabbat kaa raaz-daa.n mujh ko
vo sham-e-baargah-e-KHaandaan-e-murtazvii
rahegaa misl-e-haram jis kaa aastaa.n mujh ko
nafas se jis ke khilii merii aarzuu kii kalii
banaayaa jis kii muravvat ne nukta-daa.n mujh ko
du.aa ye kar ki KHudaavand-e-aasmaan-o-zamii.n
kare phir us kii ziyaarat se shaadmaa.n mujh ko
vo meraa yuusuf-e-saanii vo sham-e-mahfil-e-ishq
hu.ii hai jis kii uKHuvvat qaraar-e-jaa.n mujh ko
jalaa ke jis kii mohabbat ne daftar-e-man-o-tuu
havaa-e-aish me.n paalaa kiyaa javaa.n mujh ko
riyaaz-e-dahr me.n maanind-e-gul rahe KHandaa.n
ki hai aziiz-tar az-jaa.n vo jaan-e-jaa.n mujh ko
shagufta ho ke kalii dil kii phuul ho jaa.e
ye iltijaa-e-musaafir qubuul ho jaa.e

Allama Iqbal
Nazm

shor-e-barbat-o-nai

pahlii aavaaz
ab sa.ii kaa imkaa.n aur nahii.n parvaaz kaa mazmuu.n ho bhii chukaa
taaro.n pe kamande.n phe.nk chuke mahtaab pe shab-KHuu.n ho bhii chukaa
ab aur kisii fardaa ke liye un aa.nkho.n se kyaa paimaa.n kiije
kis KHvaab ke jhuuTe afsuu.n se taskiin-e-dil-e-naadaa.n kiije
shiiriinii-e-lab KHushbuu-e-dahan ab shauq kaa unvaa.n ko.ii nahii.n
shaadaabii-e-dil tafriih-e-nazar ab ziist kaa darmaa.n ko.ii nahii.n
jiine ke fasaane rahne do ab in me.n ulajh kar kyaa le.nge
ik maut kaa dhandaa baaqii hai jab chaahe.nge nipTaa le.nge
ye teraa kafan vo meraa kafan ye merii lahad vo terii hai

Faiz Ahmad Faiz
Nazm

man tere jaane ke baad

maGfirat kii tujh pe maulaa ab faraavaanii kare
jannat-ul-firdaus me.n bhii rahmat arzaanii kare
sabza-e-naurasta us ghar kii nigahbaanii kare
aasmaa.n terii lahad par shabnam afshaanii kare
haq adaa kar paa.nv teraa maa.n tire jaane ke baa'd
dam ghuTaa jaataa hai meraa maa.n tire jaane ke baa'd

Shahnaz Parveen Shazi
Nazm

KHak-e-dil

lucknow mere vatan mere chaman-zaar vatan
tere gahvaara-e-aaGosh me.n ai jaan-e-bahaar
apnii duniyaa-e-hasii.n dafn kiye jaataa huu.n
tuu ne jis dil ko dha.Dakne kii adaa baKHshii thii
aaj vo dil bhii yahii.n dafn kiye jaataa huu.n
dafn hai dekh miraa ahd-e-bahaaraa.n tujh me.n
dafn hai dekh mirii ruuh-e-gulistaa.n tujh me.n
merii gul-posh javaa.n-saal uma.ngo.n kaa suhaag
merii shaadaab tamannaa ke mahakte hu.e KHvaab
merii bedaar javaanii ke firozaa.n mah o saal
merii shaamo.n kii malaahat mirii sub.ho.n kaa jamaal
merii mahfil kaa fasaana mirii KHalvat kaa fusuu.n
merii diivaangii-e-shauq miraa naaz-e-junuu.n
mere marne kaa saliiqa mire jiine kaa shu.uur
meraa naamuus-e-vafaa merii mohabbat kaa Guruur
merii nabzo.n kaa tarannum mire naGmo.n kii pukaar
mere shero.n kii sajaavaT mire giito.n kaa si.ngaar
lucknow apnaa jahaa.n sau.np chalaa huu.n tujh ko
apnaa har KHvaab-e-javaa.n sau.np chalaa huu.n tujh ko
apnaa sarmaaya-e-jaa.n sau.np chalaa huu.n tujh ko
lucknow mere vatan mere chaman-zaar vatan
ye mire pyaar kaa madfan hii nahii.n hai tanhaa
dafn hai.n is me.n mohabbat ke KHazaane kitne
ek unvaan me.n muzmar hai.n fasaane kitne
ik bahan apnii rifaaqat kii qasam khaa.e hu.e
ek maa.n mar ke bhii siine me.n liye maa.n kaa gudaaz
apne bachcho.n ke la.Dakpan ko kaleje se lagaa.e
apne khilte hu.e ma.asuum shaguufo.n ke liye
band aa.nkho.n me.n bahaaro.n ke javaa.n KHvaab basaa.e
ye mire pyaar kaa madfan hii nahii.n hai tanhaa
ek saathii bhii tah-e-KHaak yahaa.n sotii hai
arsa-e-dahr kii be-rahm kashaakash kaa shikaar
jaan de kar bhii zamaane se na maane hu.e haar
apne tevar me.n vahii azm-e-javaa.n-saal liye
ye mire pyaar kaa madfan hii nahii.n hai tanhaa
dekh ik sham-e-sar-e-raah-guzar chaltii hai
jagmagaataa hai agar ko.ii nishaan-e-manzil
zindagii aur bhii kuchh tez qadam chaltii hai
lucknow mere vatan mere chaman-zaar vatan
dekh is KHvaab-gah-e-naaz pe kal mauj-e-sabaa
le ke nau-roz-e-bahaaraa.n kii KHabar aa.egii
surKH phuulo.n kaa ba.De naaz se guu.ndhe hu.e haar
kal isii KHaak pe gul-ra.ng sahar aa.egii
kal isii KHaak ke zarro.n me.n samaa jaa.egaa ra.ng
kal mire pyaar kii tasviir ubhar aa.egii
ai mirii ruuh-e-chaman KHaak-e-lahad se terii
aaj bhii mujh ko tire pyaar kii buu aatii hai
zaKHm siine ke mahakte hai.n tirii KHushbuu se
vo mahak hai ki mirii saa.ns ghuTii jaatii hai
mujh se kyaa baat banaa.egii zamaane kii jafaa
maut KHud aa.nkh milaate hu.e sharmaatii hai
mai.n aur in aa.nkho.n se dekhuu.n tujhe paivand-e-zamii.n
is qadar zulm nahii.n haa.e nahii.n haa.e nahii.n
ko.ii ai kaash bujhaa de mirii aa.nkho.n ke diye
chhiin le mujh se ko.ii kaash nigaahe.n merii
ai mirii sham-e-vafaa ai mirii manzil ke charaaG
aaj taariik hu.ii jaatii hai.n raahe.n merii
tujh ko ro.uu.n bhii to kyaa ro.uu.n ki in aa.nkho.n me.n
ashk patthar kii tarah jam se ga.e hai.n mere
zindagii arsa-gah-e-johd-e-musalsal hii sahii
ek lamhe ko qadam tham se ga.e hai.n mere
phir bhii is arsa-gah-e-johd-e-musalsal se mujhe
ko.ii aavaaz pe aavaaz diye jaataa hai
aaj sotaa hii tujhe chho.D ke jaanaa hogaa
naaz ye bhii Gam-e-dauraa.n kaa uThaanaa hogaa
zindagii dekh mujhe hukm-e-safar detii hai
ik dil-e-shola-ba-jaa.n saath liye jaataa huu.n
har qadam tuu ne kabhii azm-e-javaa.n baKHshaa thaa!
mai.n vahii azm-e-javaa.n saath liye jaataa huu.n
chuum kar aaj tirii KHaak-e-lahad ke zarre
an-ginat phuul mohabbat ke cha.Dhaataa jaa.uu.n
jaane is samt kabhii meraa guzar ho ki na ho
aaKHirii baar gale tujh ko lagaataa jaa.uu.n
lucknow mere vatan mere chaman-zaar vatan
dekh is KHaak ko aa.nkho.n me.n basaa kar rakhnaa
is amaanat ko kaleje se lagaa kar rakhnaa

Jan Nisar Akhtar
Nazm

na mera makan hi badal gaya na tera pata koi aur hai

pas-e-marg KHaak hu.e badan vo kafan me.n ho.n ki ho.n be-kafan
na mirii lahad ko.ii aur hai na tirii chitaa ko.ii aur hai

Dilawar Figar
Nazm

idhar na dekho

idhar na dekho ki jo bahaadur
qalam ke yaa teG ke dhanii the
jo azm-o-himmat ke mudda.ii the
ab un ke haatho.n me.n sidq-e-iimaa.n kii
aazmuuda puraanii talvaar mu.D ga.ii hai
jo kaj-kulah saahib-e-hasham the
jo ahl-e-dastaar mohtaram the
havas ke pur-pech raasto.n me.n
kulah kisii ne girau rakh dii
kisii ne dastaar bech dii hai
udhar bhii dekho
jo apne ruKHshaa.n lahuu ke diinaar
muft baazaar me.n luTaa kar
nazar se ojhal hu.e
aur apnii lahad me.n is vaqt tak Ganii hai.n,
udhar bhii dekho
jo harf-e-haq kii saliib par apnaa tan sajaa kar
jahaa.n se ruKHsat hu.e
aur ahl-e-jahaa.n me.n is vaqt tak nabii hai.n

Faiz Ahmad Faiz
Nazm

iqbaal ke mazar par

lahad me.n so rahii hai aaj be-shak musht-e-KHaak us kii
magar garm-e-amal hai jaagtii hai jaan-e-paak us kii
vo ik faanii bashar thaa mai.n ye baavar kar nahii.n saktaa
bashar iqbaal ho jaa.e to hargiz mar nahii.n saktaa
ba-zer-e-saaya-e-diivaar-e-masjid hai jo aasuuda
ye KHaakii jism hai sattar baras kaa raah paimuuda
ye KHaakii jism bhii us kaa bahut hii besh-qiimat thaa
jise ham-jalva samjhe the vo parda bhii Ganiimat thaa
use ham naapte the le ke aa.nkho.n hii kaa paimaanaa
Gazal-KHvaa.n us ko jaanaa ham ne shaa.ir us ko gardaanaa
faqat suurat hii dekhii us ke ma.anii ham nahii.n samjhe
na dekhaa ra.ng-e-tasviir aa.ine ko dil-nashii.n samjhe
hame.n zof-e-basaarat se kahaa.n thii taab-e-nazzaaraa
sikhaa.e us ke parde ne hame.n aadaab-e-nazzaaraa
ye naGma kyaa hai zer-e-parda-haa-e-saaz kam samjhe
rahe sab gosh-bar-aavaaz lekin raaz kam samjhe
shikast-e-paikar-e-mahsuus ne to.Daa hijaab aaKHir
tuluu-e-sub.h-e-mahshar ban ke chamkaa aaftaab aaKHir
muqayyad ab nahii.n 'iqbaal' apne jism-e-faanii me.n
nahii.n vo band haa.il aaj dariyaa kii ravaanii me.n
vajuud-e-marg kii qaa.el nahii.n thii zindagii us kii
ta.aalaa allaah ab dekhe ko.ii paa.indagii us kii
jise ham murda samjhe zinda tar paa.inda tar niklaa
mah o KHurshiid se zarre kaa dil taabinda tar niklaa
abhii andaaza ho saktaa nahii.n us kii bulandii kaa
abhii duniyaa kii aa.nkho.n par hai parda firqa-bandii kaa
magar merii nigaaho.n me.n hai.n chehre un javaano.n ke
jinhe.n 'iqbaal' ne baKHshe hai.n baazuu qahar-maano.n ke

Hafeez Jalandhari
Nazm

nur-jahan ka mazar

ta.aviiz-e-lahad hai zabar o zer ye andher
ye daur-e-zamaana ke ulaT pher ye andher
aa.ngan me.n pa.De gard ke hai.n Dher ye andher
ai gardish-e-ayyaam ye andher! ye andher

Tilok Chand Mahroom
Nazm

kaise Tahalta hai chand

kaise Tahaltaa hai chaa.nd aasmaan pe
jaise zabt kii pahlii manzil
aavaaz ke alaava bhii insaan hai
aa.nkho.n ko chhuu lene kii qiimat pe udaas mat ho
qabr kii sharm abhii baaqii hai
ha.nsii hamaarii maut kii shahaadat hai
lahad me.n paidaa hone vaale bachche
hamaarii maa.n aa.nkh hai
qabr to miTTii kaa makr hai
phir parinde suuraj se pahle kisii kaa zikr karte hai.n
aavaaz ke alaava bhii insaan hai
TuuTe ho
zaraa aur lahuu a.ngaar karo
ki mai.n ek be-libaas aurat huu.n
aur jitnii chaahuu.n aa.nkhe.n rakhtii huu.n
mai.n ne aavaaz ko taraashaa hai
hai ko.ii meraa mujassama banaane vaalaa
apnii qismat pe udaas mat ho
maut kii sharm abhii baaqii hai
mujhe chaadar dene vaale
tujhe hayaa tak dukh lag jaa.e.n
mujhe lafz dene vaale
kaash aurat bhii janaaze ko kaa.ndhaa de saktii
har qadam zanjiir ma.aluum ho rahaa hai aur meraa dil tah kar ke rakh diyaa
gayaa hai shor mujhe lahuuluhaan kar rahaa hai mai.n
apnii qaid kaaT rahii huu.n aur is qaid me.n kabhii
haath kaaT kar phe.nk detii huu.n kabhii
aavaaz kaaT kaaT kar phe.nk rahii huu.n
meraa dil daldal me.n rahne vaalaa kii.Daa hai aur mai.n qabr se
dhutkaarii hu.ii laash
sa.Daa.ndii hii sa.Daa.nd se merii aa.nkho.n kaa
zaa.iqa bad-ruuh ho rahaa hai
aur mai.n insaan kii pahlii aur aaKHirii Galatii par dum hilaa.e
bhau.nktii jaa rahii huu.n
mai.n jab insaan thii to chor kii aas tak na thii mai.n
aa.nkho.n me.n saliib aur dil me.n apnii laash
liye phirtii huu.n
sachchaa.iyo.n ke zahr se marii huu.n
lekin duniyaa gorkan ko Dhuu.nDhne ga.ii hu.ii hai
vo mujhe aabaad kartaa hai aur aabaad kahtaa hai
mai.n harii-bharii pyaas se zarKHez ho jaatii huu.n
aur phuulo.n ko miTTii me.n dabaane lagtii huu.n
dard mere azhdahe kaa naam hai
aur saa.np kii bhuuk meraa ghar hai

Sara Shagufta
Nazm

abhi uski zarurat thi

saf-e-maatam bichhii hai
suKHan kaa aaKHirii dar band hone kii KHabar ne
khi.Dkiyo.n ke paar baiThe Gamgusaaro.n ko
ye kaisii chup lagaa dii hai
ye kis kii naa-gahaanii maut par sargoshiyo.n kii aag raushan hai
kisii ke kunj-e-lab se ko.ii taaraa mere dil par aan pa.Dtaa hai
buraa ho maut kaa jis ne mire fariyaad-ras kii jaan le lii hai
abhii us kii zaruurat thii
mai.n is duniyaa ke ik goshe me.n baiThaa sochtaa huu.n
aaj is viiraan ma.nDlii me.n
mai.n kis ko pursa dene ke liye aayaa huu.n
mujh ko ta.aziyat to KHud se karnaa thii
abhii is ghar se ik mayyat sidhaarii hai
dam-e-ruKHsat
kisii ne nik.hat-e-zulf-e-pareshaa.n kaa nahii.n puuchaa
kisii ne dukh ke andar raushnii kii chhab nahii.n dekhii
makaa.n se phuuTne vaalii ravish par
ek bachcha ro rahaa hai
aaj us ke aa.n.su.o.n ko kaun po.nchhegaa
ki us ke saath jo shatranj kii baazii lagaataa thaa
vo ab zer-e-zamii.n ik chaadar-e-saada kii KHushbuu hai
yahaa.n sub.he.n bhii aa.e.ngii
yahaa.n shaame.n bhii utre.ngii
magar ik hichkiyaa.n letaa hu.aa bachcha
charaaG-e-aarzuu ban kar
sar-e-taaq-e-lahad guu.ngii zamii.n kii lab-kushaa.ii tak pukaare gaa
buraa ho maut kaa jis ne mire fariyaad-ras kii jaan le lii hai

Abbas Tabish
Nazm

badal gae ho

badal ga.e ho
zaraa se arse me.n aah kaise badal ga.e ho
tumhe.n KHabar hai
vo haath dhartii ne khaa liye hai.n
jinho.n ne apnii hatheliyo.n me.n
hamaarii KHaatir faqat du.aa.e.n bharii hu.ii thii.n
tumhe.n pata hai
vo ho.nT miTTii me.n jha.D rahe hai.n
hamaare chehro.n pe jin ke bose ju.De hu.e hai.n
vo aa.nkhe.n andhii lahad me.n shaayad bikhar chukii ho.n
vo shab ga.e tak
hamaarii raaho.n me.n apnii kirne.n bikhertii thii.n
hamaare nam ko numuud de kar
zamii.n ko apnaa vajuud de kar
kahaa.n ga.e ho
zamii.n ke nam me.n hamaare paikar pighal ga.e hai.n
badal ga.e ho to aa.o dekho
ki ham bhii kitne badal ga.e hai.n

Syed Mubarak Shah
Nazm

maut

lahad me.n bhii yahii Gaib-o-huzuur rahtaa hai
agar ho zinda to dil naa-subuur rahtaa hai
mah-o-sitaara misaal-e-sharaara yak-do-nafas
mai-e-KHudii kaa abad tak suruur rahtaa hai
farishta maut kaa chhuutaa hai go badan teraa
tire vujuud ke markaz se duur rahtaa hai

Allama Iqbal
Nazm

azal-abad

apnaa to abad hai kunj-e-marqad
jab jism supurd-e-KHaak ho jaa.e
marqad bhii nahii.n vo aaKHirii saa.ns
jab qissa-e-ziist paak ho jaa.e
vo saa.ns nahii.n shikast-e-ummiid
jab daaman-e-dil hii chaak ho jaa.e
ummiid nahii.n bas ek lamha
jo aatish-e-Gam se KHaak ho jaa.e
hastii kii abad-gah-e-qazaa me.n
kuchh farq nahii.n fanaa baqaa me.n
KHaakistar-e-KHvaab shola-e-KHvaab
ye apnaa azal hai vo abad hai
vo shola to kab kaa mar chukaa hai
ye jism ik naash-e-be-lahad hai
martii hai hayaat lamha lamha
har saa.ns ik zindagii kii had hai

Aziz Qaisi
Nazm

irtiqa

ye raastaa kab hai ik lahad hai
lahad ke andar to ik janaaza hii baar paa.egaa ye bhii socho
to kyaa mashiyyat ke faisle se haTe haTe re.ngte rahoge
janaaze rakkhe hu.e hai.n in ko uThaa.o jaa.o
lahad khulii hai
lahad hai aise ki jaise bhuuke kaa laalchii kaa mu.nh khulaa hu.aa ho
magar ko.ii taaza aur taaza na ho mayassar to baasii luqma bhii us ke
andar na jaane paa.e
khulaa dahan yuu.n khulaa rahe jaise ik KHalaa ho
uThaa.o jaldii uThaa.o aa.nkho.n ke saamne kuchh janaaze rakkhe
hu.e hai.n in ko uThaa.o jaa.o

Meeraji
Nazm

pyari man

pyaarii maa.n
ik baat bataa
jis shahar me.n ab tuu jaa ke basii hai us kaa mausam kaisaa hai
kyaa us bastii me.n din hotaa hai
vaa.n pe raat utartii hai
kyaa qabr kii tanhaa.ii me.n leTaa vaqt samay kuchh kahtaa hai
yaa din aur raat kii qaid se aarii ant zamaana bahtaa hai
kyaa suuraj gole kii chand kirne.n andar jaa ke girtii hai.n
kyaa chhat ke niile ambar uupar chaa.nd sitaara rahtaa hai
kyaa jugnuu baate.n karte hai.n
kyaa titlii milne aatii hai
kyaa qabr sirhaane pe.D ke niiche
bulbul naGme gaatii hai
kyaa lahad kii daa.e.n jaanib se jannat kii havaa.e.n aatii hai.n
kyaa raushan khi.Dkii ke raste tibtum kii sadaa.e.n aatii hai.n
kyaa ahl-e-jannat mil-jul ke aapas me.n baate.n karte hai.n
kyaa ibraahiim kii raushan peshaanii pe nuur utarte hai.n
kyaa 'yahyaa'-bin-'zakariyaa' ke zaKHmo.n se phuul bikharte hai.n
'yuusuf' kii savaarii aatii hai
yaaquub vahaa.n kyaa karte hai.n
khi.Dkii ke raste chupke se
beTe se milne jaatii hai
baaho.n me.n use le ke apnii
tuu aksar lorii gaatii hai
yaa us ko lagaa kar siine se
jab haule se muskaatii hai
tab tujh ko mirii yaad aatii hai

Najma Saqib
Nazm

irshad ki yaad mein

ik baar phir vatan me.n gayaa jaa ke aa gayaa
laKHt-e-jigar ko KHaak me.n dafnaa ke aa gayaa
har ham-safar pe KHizr kaa dhokaa hu.aa mujhe
aab-e-baqaa kii raah se katraa ke aa gayaa
huur-e-lahad ne chhiin liyaa tujh ko aur mai.n
apnaa saa mu.nh liye hu.e sharmaa ke aa gayaa
dil le gayaa mujhe tirii turbat pe baar baar
aavaaz de ke baiTh ke uktaa ke aa gayaa
royaa ki thaa jahez tiraa vaajib-ul-adaa
me.nh motiyo.n kaa qabr pe barsaa ke aa gayaa
merii bisaat kyaa thii huzuur-e-razaa-e-dost
tinkaa saa ek saamne dariyaa ke aa gayaa
ab ke bhii raas aa.ii na hubb-e-vatan 'hafiiz'
ab ke bhii ek tiir-e-qazaa khaa ke aa gayaa

Hafeez Jalandhari
Nazm

maulwi jannat mein

ik sharaabii kii lahad par raat bhar hanDe jale
bar mazaar-e-maa Gariibaa.n nai charaaGe nai gule

Syed Hashmat Sohail
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now