Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "laqab"

Nazm MATCHES FOR "laqab"

Nazm

karl marx

us kii daanaa.ii kaa haasil naaKHuun-e-uqda-kushaa
taabnaaki-e-zamiir-o-ziirakii kaa aaftaab
chaahne vaalo.n kaa us kii zikr hii kyaa kiijiye
us ke dushman bhii sirhaane rakhte hai.n us kii kitaab
maaddii taariiKH-e-aalam jis kii taaliif-e-aziim
taas kaipiTaal hai yaa ziist kaa lubb-e-lubaab
pa.Dh ke jis ke ho ga.ii.n hushyaar aqvaam-e-Gulaam
ishtiraakii falsafa kaa khul gayaa har dil me.n baab
kitne dozaKH us ke ik manshuur se jannat bane
kitne sahraa.o.n ko jis ne kar diyaa shahr-e-gulaab
marx ne science o insaa.n ko kiyaa hai ham-kanaar
zehn ko baKHshaa shu.uur-e-zindagaanii kaa nisaab
us kii biinish us kii vajdaanii-nigaah-e-haq-shanaas
kar ga.ii jo chehra-e-iflaas-e-zar ko be-naqaab
'Gasab-e-ujrat' ko diyaa 'sarmaayaa' kaa jis ne laqab
be-hisaab us kii basiirat us kii mantiq laa-javaab
aaftaab taaza kii us ne bashaarat dii hame.n
us kii har peshan-go.ii hai barafganda naqaab
ko.ii quvvat us kii sadd-e-raah ban saktii nahii.n
vaqt kaa farmaan jab aataa hai ban kar inqilaab
ahl-e-daanish kaa rajaz aur siina-e-dahqaa.n kii Dhaal
lashkar mazduur ke hai.n ham-safiir o ham-rikaab
kaaTtii hai sehr-e-sultaanii ko jab muusaa kii zarb
satvat-e-firaun ho jaatii hai az KHud Garq-e-aab
aaj kii fir.auniyat bhii kuchh isii andaaz se
rafta rafta hotii jaa.egii shikaar-e-inqilaab
la.D rahaa hai ja.ng aaKHir kiisa-e-sarmaaya-daar
jauhrii hathiyaar se kartaa nahii.n jo ijtinaab
apne mustaqbil se taaGuutii tamaddun ko hai yaas
diidanii hai dushman-e-insaaniyat kaa iztiraab
hazrat-e-iqbaal kaa ibliis-e-kochak KHauf se
larza-bar-andaam yuu.n shaitaa.n se kartaa hai KHitaab
panDit o mullaa o raahib be-zarar Thahre magar
TuuTne vaalaa hai tujh par ik yahuudii kaa itaab
vo kaliim-e-be-tajallii vo masiih-e-be-saliib
niist paiGambar o lekin dar baGal daarad kitaab

Wamiq Jaunpuri
Nazm

surKH sitara

tum samajhte ho ye shab aap hii Dhal jaa.egii
KHud hii ubhregaa na.ii sub.h kaa zarrii.n parcham
mai.n samajhtaa huu.n kisii sub.h-e-daraKHshaa.n ke evaz
qahr kii ek na.ii raat ko degii ye janam
aur us raat kii taariikii me.n kho jaa.e.nge
maktab o KHaanqah o dair o kaliisaa o haram
dev-e-zulmaat kii Thokar se na paa.e.nge panaah
ye shivaale, ye masaajid, ye pujaarii, ye sanam
rakh diye jaa.e.nge shamshiir ke zer-e-saaya
dast-e-maatam lab-e-fariyaad, zabaan o tanqiid
barf jam jaa.egii afkaar ke gulzaaro.n par
yaKH havaa.o.n me.n hii jam jaa.egii kisht-e-ummiid
chaa.ndnii zulmat-e-sayyaal me.n Dhal jaa.egii
raat kii maa.ng sa.nvaaregii shu.aa-e-ummiid
ahl-e-fan de.nge a.ndhero.n ko ujaalo.n kaa laqab
zahr ko qand, moharram ko kahaa jaa.egaa iid
ye miraa vahm nahii.n, novel o afsaana nahii.n
dosto! Gaur karo, aur nigaahe.n to uThaa.o
vo jo ik surKH sitaara hai ufuq ke nazdiik
kuchh tumhe.n ilm hai kis ruKH pe hai us kaa phailaa.o
kaash tum us kii haqiiqat pe nazar Daal sako
hai ye ik aatish-e-sad-barq-badaamaa.n kaa alaav
is kii kirno.n me.n hai chaltii hu.ii talvaar kii kaaT
is kii surKHii me.n hai umDe hu.e dariyaa kaa bahaav
is ke daaman me.n hai aasuuda vo fitna jis se
jism to jism mayassar nahii.n ruuho.n ko amaa.n
dil, nazar, zehn, KHayaalaat, usuul o aqdaar
sab ke sab is kii tag-o-taaz se larzaa.n tarsaa.n
is kii parchhaa.ii.n bhii pa.D jaa.e to sabza jal jaa.e
dekhte dekhte maahaul pe chhaa jaa.e dhu.aa.n
is ke sho.alo.n kaa to kyaa zikr ki sho.ale Thahre
is kii shabnam bhii gulistaa.n ke liye barq-e-tapaa.n

Amir Usmani
Nazm

sanwli

ko.ii detaa hai laqab laila-e-be-mahmil kaa
ko.ii kahtaa hai tujhe pyaar se kaalii naagin

Qateel Shifai
Nazm

naqqad

Dhaal letii hai jinhe.n shaa.er kii tarkiib-e-adab
Dhal ke go vo gauhar-e-Galtaa.n kaa paatii hai.n laqab

Josh Malihabadi
Nazm

firqa-parasti ka challenge

taaqat ho kisii me.n to miTaa.e mirii hastii
Daa.in hai miraa naam laqab firqa-parastii
mai.n ne ba.Dii chaalaakii se ik kaam kiyaa hai
pahle hii mohabbat kaa galaa ghuu.nT diyaa hai
mai.n fitne uThaa detii huu.n har uThte qadam se
is desh ke Tuk.De bhii hu.e mere hii dam se
sarmaaya-parasto.n ne janam mujh ko diyaa hai
maz.hab ke ta.assub ne mujhe god liyaa hai
hai mulk kii taqsiim la.Dakpan kii kahaanii
us vaqt to bachpan thaa miraa ab hai javaanii
ghabraataa hai shaitaa.n mirii taqriir ke fan se
mai.n zahr ugaltii huu.n zabaa.n ban ke dahan se
darkaar hu.aa jab bhii mujhe KHuun ziyaada
mai.n aa ga.ii o.Dhe hu.e maz.hab kaa libaada
mai.n desh kii qattaala huu.n aur sab se ba.Dii huu.n
bachcho.n kii bhii gardan pe chhurii ban ke chalii huu.n
golii ko sikhaa detii huu.n chalne kaa qariina
mai.n chhed ke rakh detii huu.n mazluum kaa siina
har suukhe hu.e ho.nT se letii huu.n tarii mai.n
dam to.Dne vaalo.n kii u.Daatii huu.n ha.nsii mai.n
maasuumo.n ke maa.n baap kaa sar mai.n ne liyaa hai
bachcho.n ko yatiimii kaa laqab mai.n ne diyaa hai
hinduu kaa lahuu ho ki musalmaa.n kaa lahuu ho
matlab hai lahuu se kisii insaa.n kaa lahuu ho
mil jaa.e to mai.n kis kaa lahuu pii nahii.n saktii
majbuur huu.n be KHuun piye jii nahii.n saktii
har firqe ke logo.n kaa lahuu chaaT rahii huu.n
faslo.n kii tarah sab ke gale kaaT rahii huu.n
jis vaqt jahaa.n chaahuu.n vahaa.n aag lagaa duu.n
jis bastii ko chaahuu.n use viiraana banaa duu.n
jis shahr ko phuu.nkaa na makii.n the na makaa.n thaa
uThtaa hu.aa kuchh der agar thaa to dhu.aa.n thaa
gulshan mire haatho.n yuu.nhii taaraaj rahegaa
mai.n zinda rahuu.ngii to miraa raaj rahegaa
taaqat ho kisii me.n to miTaa.e mirii hastii
Daa.in hai miraa naam laqab firqa-parastii

Nazeer Banarasi
Nazm

mirza ghaalib

maadar-e-hind ke fankaar the mirzaa 'Gaalib'
apne fan me.n ba.De hushyaar the mirzaa 'Gaalib'
aap kaa naam asadullaah thaa nau-shaah laqab
mirzaa Gaalib se hu.e baad me.n maaruuf-e-adab
aaj bhii pa.Dh ke kalaam aap kaa hairat me.n hai.n sab
zulf-e-urdu me.n giraftaar the mirzaa Gaalib
maadar-e-hind ke fankaar the mirzaa Gaalib
akbarabad me.n paidaa hu.e dehlii me.n rahe
ahd-e-tiflii hii se duniyaa ke ba.De zulm sahe
ab bhii har ahl-e-suKHan aap ko ustaad kahe
saare sho.araa ke alam-daar the mirzaa Gaalib
maadar-e-hind ke fankaar the mirzaa 'Gaalib'
ta.ng-dastii me.n bhii chho.Daa na vafaa kaa daaman
muflisii me.n bhii na apnaa.e KHushaamad ke chalan
KHuun-e-jazbaat se shaadaab kiyaa baaG-e-suKHan
fitratan shaa.er-e-KHuddaar the mirzaa 'Gaalib'
maadar-e-hind ke fankaar the mirzaa Gaalib
aap par faarsii sho.araa kaa bhii thaa KHuub asar
mas.ala KHidmat-e-urdu kaa bhii thaa pesh-e-nazar
apne ash.aar kii azmat se bhii vaaqif the magar
'miir' jii ke bhii taraf-daar the mirzaa 'Gaalib'
maadar-e-hind ke fankaar the mirzaa 'Gaalib'
KHat-naviisii kaa diyaa ek anokhaa andaaz
guu.nj uThii bazm-e-adab me.n ye niraalii aavaaz
aap maidaan-e-suKHan me.n bhii the sab se mumtaaz
saath hii ik ba.De nassaar the mirzaa 'Gaalib'
maadar-e-hind ke fankaar the mirzaa 'Gaalib'
be-niyaaz-e-Gam-o-aalaam har ik fikr se duur
ho musiibat me.n bhii rahte the hamesha masruur
aaj bhii jin ke latiife hai.n jahaa.n me.n mash.huur
muskuraate hu.e kirdaar the mirzaa 'Gaalib'
maadar-e-hind ke fankaar the mirzaa 'Gaalib'

Kaif Ahmed Siddiqui
Nazm

dua

na ko.ii 'ohda na kursii na laqab maa.ngaa hai
na kisii KHidmat-e-qaumii kii jazaa maa.ngii hai

Kaleem Aajiz
Nazm

wed

arsh se un ke liye nuur-e-KHudaa aayaa thaa
banda-e-KHaas the rishiyo.n kaa laqab paayaa thaa

Chakbast Braj Narayan
Nazm

man ki dua

tere dam se phir vatan vaalo.n me.n paidaa ho hayaat
panja-e-aGyaar se ho hind ko haasil najaat
kaam aa jaa.e vatan kii raah me.n teraa shabaab
Gairate.n zindaaniyo.n kii phir ulaT Daale.n naqaab
tuu badal Daale nizaam-e-hind ke lail-o-nahaar
ye Gulaam aabaad ho aazaad mulko.n me.n shumaar
aastiin-e-hind ho tere lahuu se laala-faam
paadshaaho.n kaa laqab paane lage.n hindii Gulaam
haDDiyaa.n pis kar bane.n Gaaza uruus-e-hind kaa
husn phir ho jaa.e kuchh taaza uruus-e-hind kaa
tere ho.nTo.n se ba-vaqt-e-marg ye nikle sadaa
naujavaanaan-e-vatan aage ba.Dho aage zaraa

Altaf Mashhadi
Nazm

chehron ki be-chehragi

jidhar nazre.n uThaataa huu.n udhar chehre hii chehre hai.n
magar in sab me.n ik be-chehragii sii dekhtaa huu.n mai.n
ko.ii suurat banaa kartii hai jis se shakl-e-insaanii
har ik chehre ko is KHuubii se aarii dekhtaa huu.n mai.n
laqab chehre kaa zebaa hai unhii.n ke vaaste yaaro
jo ehsaasaat aur jazbaat kii tafsiir hote hai.n
na maano faisla meraa KHud apne zehn se puuchho
kahii.n auraaq-e-saada bhii kabhii tasviir hote hai.n

Akhtar Bastavi
Nazm

ek tote ki fariyaad pinjre mein

haa.e taqdiir ki mai.n aan pha.nsaa pinjre me.n
ab nahii.n KHaak bhii jiine kaa maza pinjre me.n
chhuT ga.e qaid me.n mujh se mire biivii bachche
ko.ii saathii hai na Gam-KHvaar miraa pinjre me.n
ghar kii diivaare.n bhii afsos hai.n uu.nchii uu.nchii
kabhii aatii nahii.n jangal kii havaa pinjre me.n
taaze taaze hai.n kahaa.n aaj vo phal baaGo.n ke
miltii hai suukhii sa.Dii mujh ko Gizaa pinjre me.n
ko.ii amruud nahii.n aam nahii.n ber nahii.n
kabhii kelaa bhii na khaane ko milaa pinjre me.n
haa.e is shaaKH se us shaaKH pe u.D kar jaanaa
yaad aataa hai vo u.Dne kaa mazaa pinjre me.n
tiiliyo.n se miraa sar phuuTtaa hai vaa.e nasiib
choT lagtii hai jo u.Dtaa huu.n zaraa pinjre me.n
ab to sab bhuul gayaa baiTh ke Te.n Te.n karnaa
chup pa.Daa rahtaa huu.n mai.n but saa banaa pinjre me.n
kahte hai.n chhoTe ba.De ghar ke miyaa.n miTThuu sab
vaah ye KHuub laqab mujh ko milaa pinjre me.n
mai.n samajhtaa huu.n jo matlab hai miyaa.n miTThuu kaa
baavlaa jaantii hai KHalq-e-KHudaa pinjre me.n
isii haalat me.n guzar jaa.e.nge baaqii din bhii
ik din aa jaa.egii bas merii qazaa pinjre me.n
rahm kar rahm kar allaah mire haal pe tuu
mil chukii ab to mujhe KHuub sazaa pinjre me.n
terii qudrat hai ba.Dii jald chhu.Daa de mujh ko
dam miraa jiine se rahtaa hai KHafaa pinjre me.n

Wajahat Husain Wajahat
Nazm

KHwahish

mujhe mat kaho phuul baaG-e-iram kaa
ki phuulo.n ke hisse aziyyat bahut hai
sham.a bhii na kahnaa
ki jalnaa bhale hii KHushii kaa sabab ho
kisii ko jalaane me.n tohmat bahut hai
mujhe rang-o-nik.hat se yaksaaniyat kii bhii chaahat nahii.n hai
nazaakat kaa paikar kahe jaane kii bhii mire qalb-e-viiraa.n ko haajat nahii.n hai
na hai mujh ko armaa.n ki merii sataa.ish me.n duniyaa ke sab isti.aaro.n ko haaro
havaale se mere
labo.n par tumhaare
laqab aur ko.ii bhii ja.nchtaa nahii.n hai
so gar ho sake to mire Gam-shanaasaa
mujhe tum mire naam se hii pukaaro

Kainaat
Nazm

gul-e-be-ghairat

kyo.n laqab in ko diyaa logo.n ne be-Gairat kaa
tang nazro.n ne kiyaa asl me.n insaaf kaa KHuu.n
quvvat-e-faislaa kaa in me.n hai shaayad fuqdaan
aql-o-daanish kii jagah in me.n hai maujuud junuu.n

Salam Sandelvi
Nazm

qalam

ai qalam kyaa kahuu.n mai.n sehr-bayaanii terii
haal-e-dil apnaa sunaataa huu.n zabaanii terii
tuu khilaataa hai na.e gul jo ravaa.n hotaa hai
rang ye shaaKH-e-gul-e-tar me.n kahaa.n hotaa hai
terii aavaaz hai kaano.n ko sariir-e-dilkash
sau taraano.n se hai behtar ye nafiir-e-dilkash
ik jahaa.n par hai tasallut tiraa qabza teraa
har zamaane me.n chalaa kartaa hai sikka teraa
zauq hai jin ko samajhte hai.n vo tauqiir terii
chuTkiyaa.n dil me.n liyaa kartii hai tahriir terii
ba.Dh ke e.ajaaz se hai sehr-nigaarii terii
naqsh-e-dilkash me.n tire shakl hai pyaarii terii
kabhii do lafzo.n me.n roto.n ko ha.nsaa detaa hai
ha.nsne vaalo.n ko kabhii tuu hii rulaa detaa hai
ham ne bachte na sunaa ek bhii maaraa teraa
jo hai talvaar vo hai maantii lohaa teraa
terii raftaar se dil vaqf-e-alam hote hai.n
terii jumbish se sar aksar ke qalam hote hai.n
bhejtaa hai kabhii paiGaam-e-mohabbat tuu hii
dil-e-maGmuum ko hai baa.is-e-hujjat tuu hii
dushman-e-jaan-e-hazii.n iisaa-e-dauraa.n tuu hai
samm-e-qaatil hai kabhii chashma-e-haivaa.n tuu hai
ko.ii kis tarah kahe aaj se kal se tuu hai
sab ko tasliim ye hai roz-e-azal se tuu hai
KHatm taa-hashr nahii.n hogaa kabhii kaam teraa
saf.ha-e-dahr se miTne kaa nahii.n naam teraa
jitnii duniyaa me.n kitaabe.n hai.n raqam kii.n tuu ne
jalva-afroz nazar pyaare qalam kii.n tuu ne
terii jumbish kaa natiija hai.n ye daftar laakho.n
naqsh-e-KHush-rang ke mamnuun hai.n patthar laakho.n
teraa likkhaa hu.aa meraa KHat-e-taqdiir bhii hai
kyaa kahuu.n lauh-e-jabii.n par tirii tahriir bhii hai
do-jahaa.n me.n hai laqab KHaama-e-qudrat teraa
allah allaah ye hai paaya-e-rif.at teraa
terii mamnuun mirii sai.nka.Do.n tahriire.n hai.n
terii khii.nchii hu.ii KHush-rang vo tasviire.n hai.n
ai qalam rishta-e-ulfat tiraa TuuTe na kabhii
haath se 'baasit'-e-ranjuur ke chhuuTe na kabhii

Master Basit Biswani
Nazm

chand aur mahbub

ai naaqido ai daad-raso vaqt-e-du'aa hai
aafat me.n giraftaar giroh-e-shu'araa hai
jis vaqt se mahtaab pe utraa hai apollo
aur raaz-e-daruu.n chaa.nd kaa maa'luum hu.aa hai
yaa'nii ki vo maj.huul sii ik shai hai falak par
maahaul ko.ii hai na vahaa.n ko.ii fazaa hai
jaa.n-daar ko.ii jaa ke vahaa.n rah nahii.n saktaa
yaa'nii ki vo ik KHitta-e-be-aab-o-havaa hai
mu.nh khole hu.e chaar taraf Gaar pa.De hai.n
har gaam pe bad-rang chaTaano.n kii jaTaa hai
maa.nge ke ujaale pe vo kartaa hai guzaara
apnaa na ko.ii husn hai apnii na adaa hai
jab se ye KHabar 'aam hu.ii ruu-e-zamii.n par
har shaa'ir-e-bad-baKHt kaa maa'shuuq KHafaa hai
detaa rahaa mahbuub ko tashbiih qamar se
is jurm pe maa'tuub giroh-e-shu'araa hai
ash'aar ke parde me.n u.Daayaa hai tamasKHur
shaa'ir ne jo mahvash kaa laqab us ko diyaa hai
mahtaab kahaa.n aur kahaa.n paikar-e-mahbuub
ye husn pe tohmat hai ki vo maah-laqaa hai
rah rah ke jo yaad aate hai.n taz.hiik ke pahluu
mu.nh apnaa lapeTe ko.ii bistar pe pa.Daa hai
ko.ii Gazab-o-Gaiz ko siine me.n dabaa.e
u.nglii ko.ii daa.nto.n se kha.Daa kaaT rahaa hai
sunte hai.n ki daa'vaa kisii maa'shuuq ne daa.ir
haisiyyat-e-'urfii ke izaale kaa kiyaa hai
bhuule se bhii shaa'ir ko ko.ii mu.nh na lagaa.e
ye faisla-e-'aam hasiino.n kaa hu.aa hai
kuuche me.n agar aa.e to chaalaan ho us kaa
darbaa.n ke 'evaz dar pe police-man kha.Daa hai
shaa'ir ke KHilaaf un kii muhim aur hu.ii tez
mauqa' jo raqiibo.n ko KHudaa-daad milaa hai
al-qissa burii tarh se narGe me.n hai shaa'ir
tashbiih Galat de ke musiibat me.n pha.nsaa hai

Raza Naqvi Vahi
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

ai ishq hamein barbaad na kar

ai ishq KHudaaraa dekh kahii.n vo shoKH-e-hazii.n bad-naam na ho
vo maah-laqaa bad-naam na ho vo zohra-jabii.n bad-naam na ho
naamuus kaa us ke paas rahe vo parda-nashii.n bad-naam na ho

Akhtar Shirani
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

raqqasa

uTThii hai maGrib se ghaTaa
piine kaa mausam aa gayaa
hai raqs me.n ik mah-laqaa
naazuk adaa naaz-aafrii.n
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n!
teraa thiraknaa KHuub hai
terii adaa.e.n dil-nashii.n
lekin Thahar tuu kaun hai
o niim-uryaa.n naaznii.n
kyaa mashriqii aurat hai tuu
hargiz nahii.n hargiz nahii.n
terii ha.nsii bebaak hai
terii nazar chaalaak hai
uff kis qadar dil-soz hai
taqriir baazaarii tirii
kitnii havas-aamoz hai
ye saada purkaarii tirii
sharm aur izzat vaaliyaa.n
hotii hai.n iffat vaaliyaa.n
vo husn kii shahzaadiyaa.n
parde kii hai.n aabaadiyaa.n
chashm-e-falak ne aaj tak
dekhii nahii.n un kii jhalak
sarmaaya-e-sharm-o-hayaa
zevar hai un ke husn kaa
shauhar ke dukh sahtii hai.n vo
mu.nh se nahii.n kahtii hai.n vo
kab saamne aatii hai.n vo
Gairat se kaT jaatii hai.n vo
e.azaaz-e-millat un se hai
naam-e-sharaafat un se hai
iimaan par qaa.em hai.n vo
paakiiza-o-saa.em hai.n vo
tujh me.n nahii.n sharm-o-hayaa
tujh me.n nahii.n mehr-o-vafaa
sach sach bataa tuu kaun hai
o be-hayaa tuu kaun hai
ehsaas-e-izzat kyuu.n nahii.n
sharm aur Gairat kyuu.n nahii.n
ye pur-fusuu.n Gamze tire
naa-mahramo.n ke saamne
haT saamne se duur ho
marduud ho maqhuur ho
taqdiir kii heTii hai tuu
shaitaan kii beTii hai tuu
jis qaum kii aurat hai tuu
us qaum par la.anat hai tuu
lekin Thahar jaanaa zaraa
terii nahii.n ko.ii KHataa
mardo.n me.n Gairat hii nahii.n
qaumii hamiiyat hii nahii.n
vo millat-e-baizaa ki thii
saare jahaa.n kii raushnii
jam.iyyat-e-islaamiyaa.n
shaahanshah-e-hindostaa.n
ab is me.n dam kuchh bhii nahii.n
ham kyaa hai.n ham kuchh bhii nahii.n
millii siyaasat uTh ga.ii
baazuu kii taaqat uTh ga.ii
shaan-e-hijaazii ab kahaa.n
vo turktaazii ab kahaa.n
ab Gaznavii himmat ga.ii
ab baabarii shaukat ga.ii
iimaan aalamgiir kaa
muslim ke dil se uTh gayaa
qaum ab jafaa-pesha hu.ii
izzat gadaa-pesha hu.ii
ab rang hii kuchh aur hai
be-Gairatii kaa daur hai
ye qaum ab miTne ko hai
ye nard ab piTne ko hai
afsos ye hindostaa.n!
ye gulshan-e-jannat-nishaa.n!
iimaan-daaro.n kaa vatan
taa.at-guzaaro.n kaa vatan
rah jaa.egaa viiraana phir
ban jaa.egaa but-KHaana phir
lekin mujhe kyaa KHabt hai
taqriir kyuu.n be-rabt hai
aisaa bahak jaataa huu.n mai.n
mu.nh aa.ii bak jaataa huu.n mai.n
itnaa sharaabii ho gayaa
aql-o-KHirad ko kho gayaa
mujh ko zamaane se Garaz
miTne miTaane se Garaz
hindostaa.n se kaam kyaa
andesha-e-anjaam kyaa
jiine do jiine do mujhe
piine do piine do mujhe
jab hashr kaa din aa.egaa
us vaqt dekhaa jaa.egaa
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n

Hafeez Jalandhari
Nazm

abu-lahab ki shadi

shab-e-zafaaf-e-abuu-lahab thii magar KHudaayaa vo kaisii shab thii
abuu-lahab kii dulhan jab aa.ii to sar pe ii.ndhan gale me.n
saa.npo.n ke haar laa.ii na us ko mashshaatgii se matlab
na maa.ng Gaaza na rang roGan gale me.n saa.npo.n
ke haar us ke to sar pe ii.ndhan
KHudaayaa kaisii shab-e-zafaaf-e-abuu-lahab thii

Noon Meem Rashid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now