Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "maaruuf"

Nazm MATCHES FOR "maaruuf"

Nazm

last call

kal hamesha kii tarah us ne kahaa ye phone par
mai.n bahut masruuf huu.n mujh ko bahut se kaam hai.n
is liye tum aa.o milne mai.n to aa saktii nahii.n
har rivaayat to.D kar is baar mai.n ne kah diyaa
tum jo ho masruuf to mai.n bhii bahut masruuf huu.n
tum jo ho mash.huur to mai.n bhii bahut ma.aruuf huu.n
tum agar Gamgiin ho mai.n bhii bahut ranjuur huu.n
tum thakan se chuur to mai.n bhii thakan se chuur huu.n
jaan-e-man hai vaqt meraa bhii bahut hii qiimtii
kuchh puraane dosto.n ne milne aanaa hai abhii
mai.n bhii ab faariG nahii.n mujh ko bhii laakho.n kaam hai.n
varna kahne ko to sab lamhe tumhaare naam hai.n
merii aa.nkhe.n bhii bahut bojhal hai.n sonaa hai mujhe
ratjago.n ke baa'd ab nii.ndo.n me.n khonaa hai mujhe
mai.n lahuu apnii anaa.o.n kaa bahaa saktaa nahii.n
tum nahii.n aatii.n to milne mai.n bhii aa saktaa nahii.n
us ko ye kah ke 'vasii' mai.n ne receiver rakh diyaa
aur phir apnii anaa ke paa.nv pe sar rakh diyaa

Wasi Shah
Nazm

id kab hogi

sunaa thaa chaa.nd niklegaa
sunaa thaa eid aa.egii
sunaa thaa ek raunaq kuucha-o-baazaar me.n hogii
sunaa thaa tum bhii aa.oge

Maroof Raebarelvi
Nazm

mirza ghaalib

maadar-e-hind ke fankaar the mirzaa 'Gaalib'
apne fan me.n ba.De hushyaar the mirzaa 'Gaalib'
aap kaa naam asadullaah thaa nau-shaah laqab
mirzaa Gaalib se hu.e baad me.n maaruuf-e-adab
aaj bhii pa.Dh ke kalaam aap kaa hairat me.n hai.n sab
zulf-e-urdu me.n giraftaar the mirzaa Gaalib
maadar-e-hind ke fankaar the mirzaa Gaalib
akbarabad me.n paidaa hu.e dehlii me.n rahe
ahd-e-tiflii hii se duniyaa ke ba.De zulm sahe
ab bhii har ahl-e-suKHan aap ko ustaad kahe
saare sho.araa ke alam-daar the mirzaa Gaalib
maadar-e-hind ke fankaar the mirzaa 'Gaalib'
ta.ng-dastii me.n bhii chho.Daa na vafaa kaa daaman
muflisii me.n bhii na apnaa.e KHushaamad ke chalan
KHuun-e-jazbaat se shaadaab kiyaa baaG-e-suKHan
fitratan shaa.er-e-KHuddaar the mirzaa 'Gaalib'
maadar-e-hind ke fankaar the mirzaa Gaalib
aap par faarsii sho.araa kaa bhii thaa KHuub asar
mas.ala KHidmat-e-urdu kaa bhii thaa pesh-e-nazar
apne ash.aar kii azmat se bhii vaaqif the magar
'miir' jii ke bhii taraf-daar the mirzaa 'Gaalib'
maadar-e-hind ke fankaar the mirzaa 'Gaalib'
KHat-naviisii kaa diyaa ek anokhaa andaaz
guu.nj uThii bazm-e-adab me.n ye niraalii aavaaz
aap maidaan-e-suKHan me.n bhii the sab se mumtaaz
saath hii ik ba.De nassaar the mirzaa 'Gaalib'
maadar-e-hind ke fankaar the mirzaa 'Gaalib'
be-niyaaz-e-Gam-o-aalaam har ik fikr se duur
ho musiibat me.n bhii rahte the hamesha masruur
aaj bhii jin ke latiife hai.n jahaa.n me.n mash.huur
muskuraate hu.e kirdaar the mirzaa 'Gaalib'
maadar-e-hind ke fankaar the mirzaa 'Gaalib'

Kaif Ahmed Siddiqui
Nazm

ek KHayal

taariiKH ke bune hu.e thailo.n me.n hamesha
ko.ii be-had aham chiiz rah jaatii hai
be-shak havaa.e.n aziim-tariin san.na.a hai.n
un KHaraabo.n kii jo naqsh hai.n be-ra.ngii ke saath
ek pur-asraar Gair-maaruuf a.ndhere kii dabiiz diivaaro.n par
lekin aa.nkhe.n
aise pechiida manzar ko
sehhat aur saqaahat ke saath
naql nahii.n kar saktii.n
KHvaah biinaa.ii kii kisii bhii qabiil se
ilaaqa rakhtii ho.n
ab bilkul nayaa tanaazur zaruurii hai
is naa-diidanii se ohda-baraa hone ke liye
varnaa dekhnaa ek ahmaqaana tasavvur hai jise
bas aa.nkhe.n hii maantii hai.n

Ahmad Javaid
Nazm

baad-e-KHizan ko kya parwa hai

october hai
kohre kii ik mailii chaadar tanii hu.ii hai
apne ghar me.n baiThaa mai.n khi.Dkii se baahar dekh rahaa huu.n
baahar saare pe.D
dariida piile yarqaanii patto.n ke
maT-maile malbuus me.n lipTe nisf barahna
baad-e-KHizaa.n se ulajh rahe hai.n
harf harf patto.n kaa abjad
patjha.D kii be-rahm havaa ko sau.np rahe hai.n
mai.n bhii alif se chaltaa chaltaa
ab yaa-e-maaruuf pe paa.nv Tikaa kar baiThaa
ek qadam aage maj.huul ko dekh rahaa huu.n
na.nge bachche diimak chaaTe
umr rasiida pe.D bhii apnaa abjad kho kar
barf kaa bojh nahii.n sah paate gir jaate hai.n

Satyapal Anand
Nazm

zindagi

aa.iiye ham aap ko batlaa.e.n kyaa hai zindagii
mauj-e-Gam hai ek tuufaan-e-balaa hai zindagii

Maroof Raebarelvi
Nazm

udas shaera

ye un dino.n kii baat hai
ki jab vo chaa.nd-raat me.n
baraa-e-fikr-e-shaa.irii
jo chhat pe jaa ke baiThtii
to maahtaab se
sitaare
saare jaa ke puuchhte
ye shaa.era hai
yaa ko.ii
Gazal
udaas udaas hai
ye un dino.n kii baat hai

Maroof Raebarelvi
Nazm

reKHta

ye kutub-KHaana-e-maaruuf adab kaa 'barqii'
aisii ik jalva-gah-e-aam hai kyaa arz karuu.n

Barqi Azmi
Nazm

kal jab tariKH raqam hogi

aaj ba.De ma.aruuf sahii par
kal in par thuukaa jaa.egaa
in par charchaa laazim hogii
in par harf zaruur aa.egaa

Sada Ambalvi
Nazm

wahm

na jaane kyo.n ye lagtaa hai
vo vaapas lauT aa.egaa
mire ho.nTo.n ko chuumegaa
mujhe siine lagaa.egaa
paka.D kar haath vo meraa
vo apne haath me.n ik din
kahegaa sab gile shikve bhulaa kar
aage ba.Dhte hai.n
chalo ham saath chalte hai.n
kahii.n ham duur jaa kar ke
na.ii duniyaa basaate hai.n
mohabbat kaa ko.ii naGma
baham ham gungunaate hai.n
magar sach aur hii kuchh hai
vo bilkul bhii nahii.n aisaa
ki na hargiz vo aa.egaa
na mere ho.nT chuumegaa
na siine se lagaa.egaa
faqat ye vahm meraa hai
vo vaapas lauT aa.egaa

Meem Maroof Ashraf
Nazm

pagli

batlaatii hai aaj kii a.alaa tahziibo.n kii azmat
dillii station par baiThii talKH sii ek haqiiqat
qaum ke Theke-daaro.n kaa maz.haka u.Daatii paglii
phaTe hu.e kap.Do.n me.n lipTii juuThan khaatii paglii

Maroof Raebarelvi
Nazm

sarae

zindagii kyaa saraa.e thii ki jahaa.n
log aa.e musaafiro.n kii tarah
aur kuchh vaqt tak qiyaam kiyaa
shaa.erii bhii hu.ii latiife bhii
kaif-o-mastii kii mahfile.n bhii sajii.n
aur phir ek ek kar ke sabhii
bazm se uTh ke chal diye ki unhe.n
apnii manzil kii samt jaanaa thaa
aur ham is saraa.e me.n baiThe
aane vaalo.n ke saath ha.nste hu.e
jaane vaalo.n kaa Gam bhulaate rahe

Maroof Raebarelvi
Nazm

suqut-e-shadmani

masarrat ke us lamha-e-be-karaa.n me.n ki ham dono.n leTe hu.e ghaas par niile aakaash ko dekhte the
tumhe.n yaad hogaa ki tum ne kahaa thaa
KHushii shaadmaanii kii kitnii ba.Dii aur hasii.n saltanat mere zer-e-nagii.n hai
ye maKHmal saa toshak-numaa sabza
havaa kaa ye kaif-e-KHumaarii.n
chamaktii hu.ii dhuup ke garm paivast bose
falak kii faraaKHii
fazaa.o.n kaa ye mehrbaana ravayya
aur in sab se ba.Dh kar tumhaarii mohabbat kaa sar-shaar-o-pur-shor ehsaas
KHudaayaa masarrat kaa ye lamha-e-be-karaa.n mujh ko paagal na kar de
magar aaj jab ham vahii.n apne maanuus goshe me.n pinhaa.n
usii ghaas taKHte pe leTe hu.e niile aakaash ko dekhte hai.n
to mahsuus hotaa hai jaise
zamiin sirf kaa.nTe ugaatii hai
chamaktii hu.ii dhuup par tiir hii tiir hai.n
aasmaa.n ek patthar kii sil kii tarah siine par bojh hai
havaa.o.n se dam ghuT rahaa hai
KHushii shaadmaanii kii vo saltanat luT chukii hai
aur ham dono.n dehlii se bhaage hu.e do muGal shaahzaade
kisii ajnabii Gair-maaruuf bastii kii kohna saraa.e me.n
be-KHvaab karvaT badalte
bas is taak me.n hai.n ki kab aa.nkh jhapke aur ham apne saathii ke siine me.n KHanjar utaare.n

Partav Rohila
Nazm

kuchh ishq kiya kuchh kaam kiya

kuchh ishq kiyaa kuchh kaam kiyaa
vo log bahut KHush-qismat the
jo ishq ko kaam samajhte the
yaa kaam se aashiqii karte the
ham jiite-jii masruuf rahe
kuchh ishq kiyaa kuchh kaam kiyaa
kaam ishq ke aa.De aataa rahaa
aur ishq se kaam ulajhtaa rahaa
phir aaKHir ta.ng aa kar ham ne
dono.n ko adhuuraa chho.D diyaa

Faiz Ahmad Faiz
Nazm

main pal do pal ka shair hun

mai.n pal do pal kaa shaa'ir huu.n pal do pal mirii kahaanii hai
pal do pal merii hastii hai pal do pal mirii javaanii hai
mujh se pahle kitne shaa'ir aa.e aur aa kar chale ga.e
kuchh aahe.n bhar kar lauT ga.e kuchh naGme gaa kar chale ga.e
vo bhii ik pal kaa qissa the mai.n bhii ik pal kaa qissa huu.n
kal tum se judaa ho jaa.uu.ngaa go aaj tumhaaraa hissa huu.n
pal do pal me.n kuchh kah paayaa itnii hii sa'aadat kaafii hai
pal do pal tum ne mujh ko sunaa itnii hii ‘inaayat kaafii hai
kal aur aa.e.nge naGmo.n kii khiltii kaliyaa.n chun.ne vaale
mujh se behtar kahne vaale tum se behtar sun.ne vaale
har nasl ik fasl hai dhartii kii aaj ugtii hai kal kaTtii hai
jiivan vo mah.ngii madiraa hai jo qatra qatra baTtii hai
saagar se ubhrii lahar huu.n mai.n saagar me.n phir kho jaa.uu.ngaa
miTTii kii ruuh kaa sapnaa huu.n miTTii me.n phir so jaa.uu.ngaa
kal ko.ii mujh ko yaad kare kyuu.n ko.ii mujh ko yaad kare
masruuf zamaana mere liye kyuu.n vaqt apnaa barbaad kare

Sahir Ludhianvi
Nazm

daraKHt-e-zard

tumhaarii arjumand ammii ko mai.n bhuulaa bahut din me.n
mai.n un kii rang kii taskiin se nimTaa bahut din me.n
vahii to hai.n jinho.n ne mujh ko paiham rang thukvaayaa
vo kis rag kaa lahuu hai jo miyaa.n mai.n ne nahii.n thuukaa
lahuu aur thuuknaa us kaa hai kaarobaar bhii meraa
yahii hai saakh bhii merii yahii me.aar bhii meraa
mai.n vo huu.n jis ne apne KHuun se mausam khilaa.e hai.n
na-jaane vaqt ke kitne hii aalam aazmaa.e hai.n
mai.n ik taariiKH huu.n aur merii jaane kitnii fasle.n hai.n
mirii kitnii hii fare.n hai.n mirii kitnii hii asle.n hai.n
havaadis maajraa hii ham rahe hai.n ik zamaane se
shadaa.ed saaneha hii ham rahe hai.n ik zamaane se
hamesha se bapaa ik ja.ng hai ham us me.n qaa.em hai.n
hamaarii ja.ng KHair o shar ke bistar kii hai zaa.ida
ye charKH-e-jabr ke davvaar-e-mumkin kii hai girviida
la.Daa.ii ke liye maidaan aur lashkar nahii.n laazim
sinaan o gurz o shamshiir o tabar KHanjar nahii.n laazim
bas ik ehsaas laazim hai ki ham bu.adain hai.n dono.n
ki nafi-e-ain-e-ain o sar-ba-sar ziddain hai.n dono.n
luis-urbina ne merii ajab kuchh Gam-gusaarii kii
ba-sad dil daanishii guzraan apnii mujh pe taarii kii
bahut us ne pilaa.ii aur piine hii na dii mujh ko
palak tak us ne marne ke liye jiine na dii mujh ko
''mai.n tere ishq me.n ranjiida huu.n haa.n ab bhii kuchh kuchh huu.n
mujhe terii KHayaanat ne Gazab majruuh kar Daalaa
magar taish-e-shadiidaana ke baa'd aaKHir zamaane me.n
razaa kii jaavidaana jabr kii naubat bhii aa pahu.nchii''

Jaun Eliya
Nazm

ai sharif insano

jang vahshat se barbariyyat se
amn tahziib-o-irtiqaa ke liye
jang marg-aafrii.n siyaasat se
amn insaan kii baqaa ke liye

Sahir Ludhianvi
Nazm

etiraf

kyaa sunogii mirii majruuh javaanii kii pukaar
merii fariyaad-e-jigar-doz miraa naala-e-zaar
shiddat-e-karb me.n Duubii hu.ii merii guftaar
mai.n ki KHud apne mazaaq-e-tarab-aagii.n kaa shikaar

Asrarul Haq Majaz
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

dosti ka hath

sitam to ye hai ki dono.n ke marG-zaaro.n se
havaa-e-fitna o buu-e-fasaad aatii hai
alam to ye hai ki dono.n ko vahm hai ki bahaar
aduu ke KHuu.n me.n nahaane ke baa'd aatii hai

Ahmad Faraz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now