Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mera column mujtaba husain ebooks"

Nazm MATCHES FOR "mera column mujtaba husain ebooks"

Nazm

hubb-e-watan

qaum se jo tumhaare bartaav
socho ai mere pyaaro aur sharmaa.o
ahl-e-daulat ko hai ye istiGnaa
ki nahii.n bhaa.iyo.n kii kuchh parvaa
shahr me.n qaht kii duhaa.ii hai
jaan-e-aalam labo.n pe aa.ii hai
bachche ik ghar me.n bilbilaate hai.n
ro ke maa.n baap ko rulaate hai.n
ko.ii phirtaa hai maa.ngtaa dar dar
hai kahii.n peT se ba.ndhaa patthar
par jo hai.n un me.n saahib-e-maqduur
un me.n gintii ke ho.nge aise Gayuur
ki jinhe.n bhaa.iyo.n kaa Gam hogaa
apnii raahat kaa dhyaan kam hogaa
jitne dekhoge paa.oge be-dard
dil ke naamard aur naam ke mard
aish me.n jin ke kaTte hai.n auqaat
iid hai din to shabbaraat hai raat
qaum martii hai bhuuk se to mare
kaam unhe.n apne halve-maa.nDe se
in ko ab tak KHabar nahii.n aslan
shahr me.n bhaav kyaa hai Galle kaa
Galla arzaa.n hai in dino.n ki giraa.n
kaal hai shahr me.n pa.Daa ki samaa.n
kaal kyaa shai hai kis ko kahte hai.n bhuuk
bhuuk me.n kyuu.nki marte hai.n mafluuk
ser bhuuke kii qadr kyaa samjhe
us ke nazdiik sab hai.n peT bhare

Altaf Hussain Hali
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

abdul-karim ko bhuk bhi lagti hai

general saahab
mere bachche kyaa khaa.e.nge
national security council
Gair-jaanib-daar aur shaffaaf ehtisaab
yaa qaumii yak-jihatii council
mai.n kitnaa be-shu.uur huu.n
aap itne aziim faisle kar rahe hai.n
aur mai.n sochtaa huu.n
phuTTii kii qiimat me.n kab izaafa hogaa
ba.De ba.De faisle karne se pahle general saahab
aap ko mahsuus karnaa hogaa
abdul-kariim ko bhuuk bhii lagtii hai
is inqalaab me.n
mujhe apne bachcho.n ke phuule peT nazar aate hai.n
jab tak aap kii nazar mujh par pa.De
mai.n kitne bachche dafnaa chukaa huu.ngaa
mere hal ko za.ng lagne se pahle
agar aap kisii faisle par na pahu.nche
to mai.n apne bachcho.n ko
gandum kaa biij khilaa chukaa huu.ngaa
kheto.n me.n bhuuk ugegii
lekin gandum to dar-aamad kar lii jaa.egii
kyaa merii bhuuk ko bar-aamad nahii.n kiyaa jaa saktaa

Ziyaul Hasan
Nazm

main ghair-mahfuz raat se Darta hun

raat ke farsh par
maut kii aahaTe.n
phir ko.ii dar khulaa
kaun is ghar ke pahre pe maamuur thaa
kis ke baalo.n kii laT
kis ke kaano.n ke dur
kis ke haatho.n kaa zar, surKH dahliiz par qaasido.n ko milaa?
ko.ii pahre pe ho to gavaahii mile
ye shikasta shajar
ye shikasta shajar jis ke paa.nv me.n KHud apne saa.e kii mauhuum zanjiir hai
ye shikasta shajar to muhaafiz nahii.n
ye shikasta shajar to sipaahii nahii.n
shab se Dartaa huu.n mai.n
ek tasviir-e-be-ra.ng hai saamne jis se Dartaa huu.n mai.n
ek suurat ki jis ke KHad-o-KHaal kii merii sub.h-e-hunar
se shanaasaa.ii hai
us se Dartaa huu.n mai.n
ek sho.ala ki ab tak KHas-e-jaa.n me.n thaa, us kaa sarkash sharar
kaaGazo.n me.n, makaano.n me.n, baaGo.n me.n hai
us kii maanuus hiddat se Dartaa huu.n mai.n
ek aavaaz kohsaar-e-tafriiq par jo saf-aaraa hai.n vo apne bhaa.ii nahii.n
is sadaa ruu-ba-sahraa se Dartaa huu.n mai.n
shab se Dartaa huu.n mai.n

Akhtar Husain Jafri
Nazm

omission

kisii daraaz me.n pa.Dii ho.ngii
merii aa.nkho.n se lipTii roGnii putliyaa.n
jin pe bohtaan hai
habs-rasiida kamre kii siskiyaa.n kaaT khaane kaa
tanomand KHaatuun kii tarsiib-zada raano.n ke beach
tasaadum ke halqe me.n pa.Daa
zard siilan ke KHol me.n raKHne buntaa
shahr-e-ma.aduum kaa laasha nochte KHudaa ko ghuurtaa hu.aa mai.n
KHudaa jo surKH doshiiza ke badan par kunda bosa-gaaho.n ke maanind muqaddas
siyaah-mast mallaah kii aurat mere siine pe sar rakhte hu.e chi.nghaa.Dtii hai
vo jahaaz ke mastuul se kuud kar maraa thaa
ja.ng ke dino.n me.n purtagaalii hasiina se mulaaqaat
vo yaqiinan mujhe mubtalaa kar saktii thii
magar
ham jaziiro.n se KHaalii haath lauTne vaale qasam khaate hai.n
hamaare paas mashkiizo.n me.n saste gu.D kii sharaab hai
aur kuchh dost jo vaafar miqdaar me.n tambaakuu ugaa rahe hai.n
sartaanii rutuubato.n me.n luTh.De
hamaare TaKHne baaruud se zaKHmii hai.n
ham apne baazu.o.n se jha.Dte hu.e baal tumhe.n dikhaa sakte hai.n
nam-KHurda banduuqo.n aur naakaara jeepo.n ke alaava
hamaare qabze me.n chand la.Dkiyaa.n aur rasad-KHaane hai.n
dhajjiyaa.n aur chiith.De sameTne ko nahiif u.ngliyaa.n ziyaada nahii.n hai.n
nichlii daraaz se merii bohtaan zada aa.nkhe.n nikaal laa.o
mere bachche
kaash tumhe.n javaanii me.n maut aa jaatii

Hasan Alvi
Nazm

mera watan

dil-rubaa laala ho fazaa terii
mujh ko bhaa.ii na ik adaa terii
lutf se ba.Dh ke hai jafaa terii
vaah-re hindostaa.n vafaa terii
mai.n na maanuu.n kabhii tiraa kahnaa
mai.n na baKHshuu.n kabhii KHataa terii
bar-tar-az-KHaar hai tiraa gulshan
zahr se kam nahii.n havaa terii
KHaalii-az-kaifiyat tirii har chiiz
baat har ek be mazaa terii
dard-e-dil me.n ta.Dap ke mar jaa.uu.n
mai.n na Dhuu.nDuu.n kabhii shifaa terii
kaun sii baat terii lutf-aamez
kaun sii chiiz dil-kushaa terii
tujh ko jannat-nishaan kahte hai.n
ham jahannam kii jaan kahte hai.n
tujh ko kas baat par hai naaz bataa
kyaa nahii.n aur mulk tere sivaa
terii aab o havaa latiif sahii
tujh se ba.Dh kar spain kaa KHitta
tujh ko apnii zamiin kaa hai ghamanD
tujh se afzal kahii.n hai america
hasan par apne naaz hai tujh ko
hasan tujh se sivaa etaaliyaa kaa
tujh ko ga.ngaa kaa apnii dhokaa hai
tuu ne dekhaa nahii.n hai siin ko jaa
mausiiqii par tujhe hai naaz bahut
is me.n juz dard-o-Gam dharaa hai kyaa
falsafa teraa agle vaqto.n kaa
falsafa dekh jaa ke europe kaa
tujh me.n phir aan kyaa rahii baaqii
terii mahfil na kuchh na kuchh saaqii
haa.n muravvat kaa tujh me.n naam nahii.n
haa.n uKHuvvat kaa tujh me.n naam nahii.n
tujh se bad-naam ishq saa ustaad
aur mohabbat kaa tujh me.n naam nahii.n
aashtii siikhe tujh se aa ke ko.ii
haa.n KHusuumat kaa tujh me.n naam nahii.n
terii har baat me.n safaa.ii hai
aur kuduurat kaa tujh me.n naam nahii.n
tujh ko aur hurriyat se kyaa nisbat
is zaruurat kaa tujh me.n naam nahii.n
shaad hai.n taire apne begaane
aur shikaayat kaa tujh me.n naam nahii.n
terii tahziib tujh ko maujib-e-faKHr
haa.n jahaalat kaa tujh me.n naam nahii.n
baat duniyaa se hai judaa terii
vaah ai hindostaa.n adaa terii
tere rasm-o-rivaaj ne maaraa
is maraz ke ilaaj ne maaraa
terii Gairat nai kar diyaa barbaad
KHaandaano.n ke laaj ne maaraa
kyaa kare.n har gha.Dii yahii hai fikr
roz kii ehtiyaaj ne maaraa
aa.e din call kaa hai zikr-azkaar
ik zaraa se anaaj ne maaraa
aur sab par vabaa kaa ik turra
is anokhe KHiraaj ne maaraa
baKHt bargashta aarzu.e.n bahut
havas-e-siim-o-aaj nai maaraa
na kare.n kaam kuchh to khaa.e.n kyaa
roz ke kaam-kaaj ne maaraa
tuu to rahne kaa kuchh maqaam nahii.n
tujh me.n insaaniyat kaa naam nahii.n
qaid tuu ne kiyaa hasiino.n ko
mah-jabiino.n ko naazniino.n ko
zevar-e-ilm se rakhaa aarii
tuu ne qudrat ke in nagiino.n ko
iKHtiyaar o pasand kii ai hind
kyaa zaruurat na thii hasiino.n ko
KHuub pahchaanii tuu ne qadr in kii
KHuub samjhaa tuu in KHaziino.n ko
ku.e.n jha.nkvaa.e naazniino.n se
zahr khilvaayaa mah-jabiino.n ko
Duube jaate hai.n kaun aa ke bachaa.e
bahr-e-hastii ke in safiino.n ko
tuu makaa.n thaa makaan ho ke diyaa
KHauf-e-aaraam in makiino.n ko
tujh pe tahziib ta.an kartii hai
tujh pe ilzaam KHalq dhartii hai
aarzuu hai tujhe hukuumat kii
jaah-o-sarvat kii shaan-o-shaukat kii
kyuu.n na ho tujh me.n himmat-e-aalii
dhuum har suu hai terii jur.at kii
to ne kasb-e-funuun-e-ja.ng kiyaa
sab me.n shohrat hai terii quvvat kii
qasme.n khaate hai.n log duniyaa me.n
terii millat tirii uKHuvvat kii
mulk-daarii me.n mulk-giirii me.n
vaah kyaa paidaa qaabiliyyat kii
tuu to ustaad se bhii ba.Dh niklaa
hairat-a.ngez tuu ne mehnat kii
aap aalam me.n tuu hai apnii misaal
aadamiyyat kii aur shujaa.at kii
ham-sarii kii kasii ko taab nahii.n
tiraa aafaaq me.n javaab nahii.n
daaG dil ke kise dikhaa.e.n ham
aisaa mushfiq kahaa.n se laa.e.n ham
dil me.n hai apne ham-nashii.n ik roz
aap ro kar tujhe rulaa.e.n ham
is tabii.at ko kas tarah bahlaa.e.n
dil ko kis chiiz se lagaa.e.n ham
kab talak roz ke kahe.n sadme
kab talak aafate.n uThaa.e.n ham
zahr kyuu.n ai falak na ham khaa le.n
jii se apne guzar na jaa.e.n ham
jo shikaayat ho kyuu.n na lab par aa.e
ek dukh ho use chhupaa.e.n ham
ai tamaddun ke raahat-o-aaraam
haa.e kas tarah tum ko paa.e.n ham
log uThaate hai.n zindagii ke maze
ham uThaate hai.n naa-KHushii ke maze

Meer Syed Nazeer Husain Nashad
Nazm

zamir

mai.n kaun huu.n bataa.iye kyaa meraa naam hai
aayaa huu.n mai.n kahaa.n se kahaa.n meraa qayaam hai
hamdard huu.n rafiiq huu.n ye jaan liijiye
mai.n huu.n zamiir aap kaa pahchaan liijiye
uThe Galat qadam to bataataa huu.n aap ko
har Galat amal pe jataataa huu.n aap ko
mai.n jaagtaa huu.n KHud bhii jagaataa huu.n aap ko
jo kuchh mai.n kah rahaa huu.n ise maan liijiye
mai.n huu.n zamiir aap kaa pahchaan liijiye
jab bolte hai.n aap kabhii jhuuT barmalaa
Toktaa huu.n mai.n ki ye amal nahii.n bhalaa
us vaqt gho.nTte hai.n miraa aap hii galaa
jo kuchh mai.n kah rahaa huu.n use maan liijiye
mai.n huu.n zamiir aap kaa pahchaan liijiye
karte hai.n aap naql agar imtihaan me.n
is Dha.ng se ki aa.e na shaan-o-gumaan me.n
mai.n Toktaa huu.n aap ko dil kii zabaan me.n
jo kuchh mai.n kah rahaa huu.n use maan liijiye
mai.n huu.n zamiir aap kaa pahchaan liijiye
karte hai.n dosto.n se agar aap guftuguu
rakhte hai.n duusro.n kii kahaa.n paas-e-aabruu
Giibat kii KHuu ko aaj hii kar diije aaKH-thuu
jo kuchh mai.n kah rahaa huu.n use maan liijiye
mai.n huu.n zamiir aap kaa pahchaan liijiye

Murtaza Sahil Tasleemi
Nazm

iblis ka etiraf

tuu ne jis vaqt ye insaan banaayaa yaa-rab
us gha.Dii mujh ko to ik aa.nkh na bhaayaa yaa-rab
is liye mai.n ne sar apnaa na jhukaayaa yaa-rab
lekin ab palTii hai kuchh aisii hii kaayaa yaa-rab
aql-mandii hai isii me.n ki mai.n tauba kar luu.n
sochtaa huu.n ki ab insaan ko sajda kar luu.n
ibtidaa.an thii ba.Dii narm tabii'at is kii
qalb-o-jaa.n paak the shaffaaf thii tiinat is kii
phir ba-tadriij badalne lagii KHaslat is kii
ab to KHud mujh pe musallat hai sharaarat is kii
is se pahle ki mai.n apnaa hii tamaashaa kar luu.n
sochtaa huu.n ki ab insaan ko sajda kar luu.n
bhar diyaa tuu ne bhalaa kaun saa fitna is me.n
paktaa rahtaa hai hamesha ko.ii laavaa is me.n
ek ik saa.ns hai ab suurat-e-sho.ala is me.n
aag maujuud thii kyaa mujh se ziyaada is me.n
apnaa aatish-kada-e-zaat hii ThanDaa kar luu.n
sochtaa huu.n ki ab insaan ko sajda kar luu.n
ab to ye KHuu.n ke bhii rishto.n se aka.D jaataa hai
baap se bhaa.ii se beTe se bhii la.D jaataa hai
jab kabhii taish me.n hatthe se ukha.D jaataa hai
KHud mire shar kaa tavaazun bhii biga.D jaataa hai
ab to laazim hai ki mai.n KHud ko hii siidhaa kar luu.n
sochtaa huu.n ki ab insaan ko sajda kar luu.n
merii nazro.n me.n to bas miTTii kaa maadhav thaa bashar
mai.n samajhtaa thaa ise KHud se bahut hii kamtar
mujh pe pahle na khule is ke siyaasii jauhar
kaan mere bhii katartaa hai ye leader ban kar
shaitanat chho.D ke mai.n bhii yahii dhandaa kar luu.n
sochtaa huu.n ki ab insaan ko sajda kar luu.n
ab jhijhaktaa hai na Dartaa hai na sharmaataa hai
nit na.ii fitna-garii roz ye dikhlaataa hai
ab ye zaalim mere bahkaave me.n kab aataa hai
mai.n buraa sochtaa rahtaa huu.n ye kar jaataa hai
kyaa abhii is kii muriidii kaa iraada kar luu.n
sochtaa huu.n ki ab insaan ko sajda kar luu.n
ab jagah ko.ii nahii.n mere liye dhartii par
mere shar se bhii sivaa hai yahaa.n insaan kaa shar
ab to lagtaa hai yahii faisla mujh ko behtar
is se pahle ki pahu.nch jaa.e yaa.n superpower
mai.n kisii aur hii sayyaare pe qabza kar luu.n
sochtaa huu.n ki ab insaan ko sajda kar luu.n
zulm ke daam bichhaa.e hai.n niraale is ne
nit na.e pech 'aqaa.ed me.n bhii Daale is ne
kar diye qaid a.ndhero.n me.n ujaale is ne
kaam jitne the mire saare sa.nbhaale is ne
ab to KHud ko mai.n har ik bojh se halkaa kar luu.n
sochtaa huu.n ki ab insaan ko sajda kar luu.n
istaqaamat thii kabhii is kii musiibat mujh ko
apne Dhab par ise laanaa thaa qayaamat mujh ko
karnii pa.Dtii thii bahut is pe mashaqqat mujh ko
ab ye 'aalam hai ki din-raat hai fursat mujh ko
ab kahii.n gosha-nashiinii me.n guzaara kar luu.n
sochtaa huu.n ki ab insaan ko sajda kar luu.n
mast thaa mai.n tere insaa.n kii hiqaarat kar ke
KHud pe naazaa.n thaa bahut tujh se baGaavat kar ke
kyaa milaa mujh ko magar aisii himaaqat kar ke
ab yahii kahtaa huu.n mai.n KHud pe malaamat kar ke
kyaa ye mumkin hai ki phir terii itaa'at kar luu.n
sochtaa huu.n ki ab insaan ko sajda kar luu.n

Talib Khund Meri
Nazm

drug store

agar mai.n jism huu.n to sar se paa.nv tak mai.n jism huu.n
agar mai.n ruuh huu.n to phir tamaam-tar mai.n ruuh huu.n
KHudaa se meraa silsila vahii hai jo sabaa se hai
agar mai.n sabz pe.D huu.n
to ruuh aur jism kii
vo kaun sii hade.n hai.n faaslo.n me.n jo badal ga.ii.n
zamiin merii kaun hai
chamaktaa niil-guu.n hasiin aasmaan kaun hai
jo barg o gul me.n dhiire dhiire jazb ho rahii hai dhuup
zard dhuup kyuu.n mujhe aziiz hai
ye sochtaa huu.n sab magar mai.n taaqcho.n me.n band yuu.n
mai.n naam ko.ii Dhuu.nDhtaa huu.n aaj apne karb kaa
talaash kar rahaa huu.n ek ek pal
qataar-dar-qataar shiisho.n ke is hujuum me.n
vo aasmaan kyaa hu.aa vo sabz pe.D kyaa hu.aa
jigar me.n aag thii magar jigar sufuuf ban gayaa
jo surKH thaa kabhii miraa lahuu sapiid ho gayaa
mai.n boTiyo.n me.n kaT gayaa
mai.n dhajjiyo.n me.n nuch gayaa
yahaa.n pe merii raushnii, yahaa.n pe merii zindagii
saped, surKH, zard, niilguu.n, siyaah, lablo.n me.n baT ga.ii
sabaa kii rahguzar se duur haT ga.ii

Balraj Komal
Nazm

jangalon ki hawa

kal kii lagtii hai barso.n puraanii ye be-naam sii daastaa.n
mujhe KHuubsuurat hasii.n dosto.n kii
rifaaqat mayassar hai mai.n roz-o-shab
chachahaataa huu.n baato.n ke jangal ugaataa huu.n jin me.n mujhe
mere dushman mire KHuu.n ke pyaase ka.ii jangalii jaanvar Dhuu.nDte hai.n
juu-e-yaad-e-hasii.n kii ravaanii me.n ko.ii sulagtaa hu.aa aks hai
vo mujhe apnii jaanib
ishaaro.n se aksar bulaataa hai
maanuus hai garche lekin miraa kaun hai
aaj tahliil hotaa huu.n aks-e-ravaa.n me.n
tire jism me.n
jangalo.n kii havaa
chiiKHtii hai musalsal mire jism me.n

Balraj Komal
Nazm

nazm

safed shirt thii tum sii.Dhiyo.n pe baiThe the
mai.n jab class se niklii thii muskuraate hu.e
hamaarii pahlii mulaaqaat yaad hai naa tumhe.n
ishaare karte the tum mujh ko aate jaate hu.e
tamaam raat vo aa.nkhe.n na bhuultii thii.n mujhe
ki jin me.n mere liye 'izzat aur vaqaar dikhe
mujhe ye duniyaa bayaabaan thii magar ik din
tum ek baar dikhe aur be-shumaar dikhe
mujhe ye Dar thaa ki tum bhii kahii.n vahii to nahii.n
jo jism par hii tamanna ke daaG chho.Dte hai.n
KHudaa kaa shukr hai ki tum un se muKHtalif nikle
jo phuul to.D ke Gusse me.n baaG chho.Dte hai.n
ziyaada vaqt na guzraa thaa is ta'alluq ko
ki is ke baa'd vo lamha qarii.n qarii.n aaya
chhu.aa thaa tum ne mujhe aur mujhe mohabbat par
yaqiin aaya thaa lekin kabhii nahii.n aaya
phir us ke baa'd meraa nashsha-e-sukuut gayaa
mai.n kashmakash me.n thii tum mere kaun lagte ho
mai.n amritaa tumhe.n sochuu.n to mere saahir ho
mai.n faarehaa tumhe.n dekhuu.n to jaun lagte ho
ham ek saath rahe aur hame.n pata na chalaa
ta'alluqaat kii had-bandiyaa.n bhii hotii hai.n
mohabbato.n ke safar me.n jo raaste hai.n vahii
havas kii samt me.n pagDa.nDiyaa.n bhii hotii hai.n
tumhaare vaaste jo mere dil me.n hai 'haafii'
tumhe.n mai.n kaash ye sab kuchh kabhii bataa paatii
aur ab maziid na milne kii ko.ii vaj.h nahii.n
bas apnii maa.n se mai.n aa.nkhe.n nahii.n milaa paatii

Tahzeeb Hafi
Nazm

nannhi pari

mere ghar aa.ii ek nannhii parii
chaa.ndnii ke hasiin rath pe savaar
mere ghar aa.ii ek nannhii parii

Sahir Ludhianvi
Nazm

tu mera ishq hai haqiqat hai

tuu miraa ishq hai haqiiqat hai
mujh ko tujh se ba.Dii mohabbat hai
zikr teraa hai har fasaane me.n
KHud ko khoyaa hai tujh ko paane me.n
husn teraa shabaab teraa hai
aur rakkhaa hai kyaa zamaane me.n
bin tire zindagii adhuurii hai
pyaar teraa bahut zaruurii hai
tuu mirii zindagii kii chaahat hai
mujh ko tujh se ba.Dii mohabbat hai
merii chaahat hai justujuu tuu hai
merii hasrat hai aarzuu tuu hai
tuu mirii dha.Dkano.n me.n shaamil hai
merii nazro.n ke ruu-ba-ruu tuu hai
terii zulfo.n me.n kho gayaa huu.n mai.n
terii aa.nkho.n kaa ho gayaa huu.n mai.n
tuu vafaa kii hasiin muurat hai
mujh ko tujh se ba.Dii mohabbat hai
mai.n azal se tiraa tamannaa.ii
tere jalvo.n kaa mai.n huu.n shaidaa.ii
sach to ye hai KHudaa kii jannat se
merii qismat tujhe churaa laa.ii
kaun hai tujh saa mah-jamaalo.n me.n
tuu hii tuu hai mire KHayaalo.n me.n
tere aa.nkho.n me.n merii jannat hai

Akhtar Azad
Nazm

sadhae hue parinde

savaal bachche ne jo kiye the
javaab un kaa dabii zabaa.n se vahii diyaa hai jo mujh ko ajdaad se milaa thaa
vahii puraane savaal us ke
zamii.n agar KHaam hai to us par hamaare puKHta makaan kyuu.n hai.n?
agar gulaabo.n ko rang KHurshiid se milaa hai
to dhuup kaa husn kaun se phuul kii ataa hai?
vahii puraane savaal us ke

Akhtar Husain Jafri
Nazm

aksar shab-e-tanhai mein

vo mirii zindagii kaa afsaana
jab kabhii mujh ko yaad aataa hai
dil me.n KHushbuu sii phail jaatii hai
ko.ii KHvaabo.n me.n muskuraataa hai

Naeem Saba
Nazm

be-nam

mire KHayaal tirii rahbarii javaan rahe
tire tufail mire dil ko kuchh sukuu.n to milaa

Abid Almi
Nazm

shahr-zad nae janam mein

mai.n shahr-zaad kaa hii ko.ii janm huu.n
kaun saa
nahii.n jaantii
lekin mai.n ne apne shaah ko
hazaar raato.n se kuchh uupar baato.n me.n uljhaa.e rakhaa
qissa lambii raato.n par phailaa.e rakhaa
merii kahaanii kaa dil-daada aaKHir ik din uub gayaa
mai.n bhii qissa gha.Dte gha.Dte buu.Dhii ho ga.ii
daanaa.ii kaa suuraj mere sar ke andar bujhtaa gayaa
aur aa.nkhe.n nuur se KHaalii ho ga.ii.n
shauq bhii marte sag kii maanind qarya qarya ghuum thakaa
aavaaz merii uktaahaT kii bhe.nT cha.Dhii
mai.n us kii shiirii.n-lab malika
mu.nh me.n kaa.nTe ug aane kii biimaarii me.n guu.ngii ho ga.ii
jismo.n saa.nso.n aur aa.nkho.n kii ek kahaanii kitne zimnii qisso.n andar zinda rahtii
bas phir kyaa
mujh ko yaa'nii shahr-zaad ko maut ne gheraa
mujh me.n kahaanii marne lagii thii
lekin jaan bachaane bhaagii
aur ab
na.e des me.n na.e shaah ke mahal ke andar zinda huu.n
na.ii kahaanii shuruu' hu.ii hai
dekho kab tak chaltii hai

Shumaila Husain
Nazm

dil-e-mayus

dil-e-maayuus bataa ai dil-e-naakaam bataa
mubtalaa-e-sitam-e-gardish-e-ayyaam bataa
jii ke mai.n kyaa karuu.n duniyaa me.n miraa kaam hai kyaa
KHuun ummiid kaa hotaa hai sar-e-bazm-e-tarab
ban gayaa hausla Gam hii musiibat kaa sabab
jii ke mai.n kyaa karuu.n duniyaa me.n miraa kaam hai kyaa
dard ba.Dh jaa.e agar chaaragarii kaun kare
hai kaThin raah-e-vafaa raahbarii kaun kare
jii ke mai.n kyaa karuu.n duniyaa me.n miraa kaam hai kyaa
gulshan-e-shauq me.n kaa.nTo.n ke sivaa kuchh na milaa
haa.e duniyaa me.n vafaa.o.n kaa sila kuchh na milaa
jii ke mai.n kyaa karuu.n duniyaa me.n miraa kaam hai kyaa
justujuu kis kii hai 'naashaad' ko.ii kyaa jaane
kyo.n dil-e-zaar hai barbaad ko.ii kyaa jaane
jii ke mai.n kyaa karuu.n duniyaa me.n miraa kaam hai kyaa

Rabia Sultana Nashad
Nazm

dur ka safar

mai.n naan-e-soKHta kaa zaa.iqa
utaartaa huu.n
roz-o-shab
zabaan par
ki us kii hamdamii me.n
dostii me.n
umr ke nasheb me.n
agar mai.n Dhal sakuu.n
to fasl aaftaab kaa
vo barg-e-zard ban sakuu.n
jo daa.ere kii intihaa pe sirf
mausamo.n ke KHvaab dekhtaa huu.n
sub.h-o-shaam sochtaa huu.n
aarzuu
fareb-kaar shaahida
kahaa.n milii thii aur kaun se hasiin mo.D tak
chalegii mere saath mere saath
juu-e-aab juu-e-mai
ridaa-e-KHaak
duur ke safar ke log
bad-gumaa.n saa.ato.n ke shahr
mai.n chaluu.ngaa
mai.n dasht-o-kohsaar kii
udaas hijrato.n ko
nannhii-munnii loriyaa.n sunaa.uu.ngaa
mai.n ja.ngalo.n kii
sansanaahaTo.n ke paar jaa.uu.ngaa

Balraj Komal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now