Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "message"

Nazm MATCHES FOR "message"

Nazm

nazm

na jaane kitne din guzre
na ko.ii call na message
na ko.ii raabta rakhaa
tumhe.n mai.n yaad to huu.n naa
yaa mujh ko bhuul baiThe ho

Khan Janbaz
Nazm

message

khilkhilaate icon ke saath us kaa massage numuudaar hu.aa
are la.Dkii tum me.n zaraa hiss-e-mizaah nahii.n hai
mazaaq ko bhii tum ko.Dh maGz nahii.n samajhtii
ye sab az-raa.e tafannun kahaa hai

Zehra Alvi
Nazm

coffee cup reading

use message to bhejaa hai
ki coffee par milo mujh se
vo aa jaa.egii to achchhaa
mai.n pahle sirf do coffee ma.ngaauu.ngaa
mai.n cappucino piitaa huu.n
vo kaisii coffee piitii hai
is kaa andaaza to us ke aane par hogaa
hamaare paas to baate.n bhii kam hai.n
so coffee jald p le.nge
jo us ke cup me.n tho.Daa jhaag coffee kaa bachaa hogaa
mai.n us kii shape ko pa.Dh kar use future bataa.u.ngaa
bataa.uu.ngaa use mai.n
kaise vo mujh jaise ik la.Dke kii duniyaa ko badal degii
use ma.aluum hogaa kyaa ki coffee cup kii reading kaa tariiqa ye nahii.n hotaa?
mai.n cafe aa chukaa huu.n
vo bhii raste me.n kahii.n hogii
bahut se log cafe aa ke pa.Dhte likhte rahte hai.n
mohammad 'alvii kii nazme.n to mai.n bhii saath laayaa huu.n
ye hogaa to nahii.n phir bhii vo aa.ii hii nahii.n to phir
inhii.n logo.n ke jaise mai.n bhii pa.Dh kar vaqt kaaTuu.ngaa
use aane me.n derii ho rahii hai
mai.n ik coffee to tanhaa p chukaa huu.n
zaraa saa jhaag cup me.n hai jise dekho to lagtaa hai
ki ik la.Dkaa akelaa baiTh kar kuchh pa.Dh rahaa hai
tasallii de rahaa huu.n ab mai.n KHud ko
ye merii shaam kaa future nahii.n hai
ki coffee cup kii reading kaa tariiqa ye nahii.n hotaa

Swapnil Tiwari
Nazm

main bilkul Thik hun sohni

tumhaaraa ek message whatsapp par muddato.n ke baa'd aayaa thaa
ye likkhaa thaa ki
busy thaa mai.n so reply na kar paayaa
zaraa us vaqt kuchh saa.nso.n kii tuGyaanii sii barpaa thii
mujhe kuchh dha.Dkano.n ko bhii zaraa tartiib denaa thaa
mobile screen us vaqt dhundlii ho ga.ii thii kuchh
busy thaa mai.n so reply na kar paayaa
so sorry ai mirii sohnii
suno tum ne ye likkhaa thaa ki
mai.n bilkul Thiik huu.n sohnii
tumhaarii yaad hii aatii nahii.n mujh ko
so bilkul Thiik rahtaa huu.n
magar haa.n jab zaraa mai.n saa.ns letaa huu.n
zaraa jab dil dha.Daktaa hai
to phir tum yaad aatii ho
magar is ke alaava Thiik rahtaa huu.n
zaraa sar me.n tanaav kii sii kaifiyyat to rahtii hai
rago.n me.n bhii khi.nchaa.o saa zaraa rahtaa hai ab aksar
magar baaqii sabhii kuchh Thiik hai sohnii
zaraa jab saa.ns letaa huu.n to andar kuchh chubhan sii hone lagtii hai
kahii.n kuchh zaKHm saa hogaa
magar baaqii sabhii kuchh Thiik hai sohnii
zaraa bas dil dha.Daktaa hai to siine me.n kisii kii siskiyaa.n mujh ko sunaa.ii dene lagtii hai.n
magar baaqii sabhii kuchh Thiik hai sohnii
are haa.n kal mai.n aa.iine ke aage jab zaraa aayaa
vahaa.n ik ajnabii chehra nazar aayaa
bahut hii zard saa chehra
aur us kii aa.nkh ke halqe me.n gaDDhe se nazar aa.e
ajab vahshat Tapaktii thii
vahaa.n se bhaag aayaa mai.n
magar baaqii sabhii kuchh Thiik hai sohnii
suno phir bhii mai.n kal ik doctor se ehtiyaatan mil bhii aayaa huu.n
vo kahte hai.n ki ghabraane kii ko.ii baat bilkul bhii nahii.n is me.n
zaraa bas saa.ns tham jaa.e
zaraa dha.Dkan bhii jam jaa.e
to phir sab kuchh hamesha ke liye hii Thiik ho jaa.e

Khalid Mubashshir
Nazm

tumhein jaane ki jaldi hai

badan ko chiirtii tanhaa.ii par phailaa.e
jab har ek suu hogii
to us lamhe
'faraaz'-o-'faiz' kii Gazlo.n pe kis se guftuguu hogii
kise 'jagjiit' ke siskii bhare giito.n me.n Dhuu.nDoge
kise 'parviin' ke KHushbuu me.n Duube sher tum message me.n bhejoge
kise 'gulzaar' kii uljhii hu.ii nazme.n sunaa.oge
kaho phir shab ga.e
'manto' ke afsaano.n pe kis se guftuguu hogii

Arshad Malik
Nazm

tum

mujhe pata hai
meraa dukhii honaa
tum ko bhii dukh detaa hai
merii bebasii ko
tum mahsuus karte ho
merii bharraa.ii aavaaz
tum ko bhii rulaatii hai
mai.n jaantaa huu.n
ye sab tum kahte nahii.n
bas meraa phone kaaT dete ho
ye kah kar ki
ghar se phone aa rahaa hai
baa'd me.n baat karte hai.n
phir mujhe message karte ho
ki network nahii.n kaam kar rahaa
kal baat karte hai.n
par mujhe pata hai
mere aa.nsuu tumhe.n takliif dete hai.n
aur tum baato.n ka
ruKH mo.D dete ho
mujhe vahii.n par chho.D dete ho

Abul Hashim Khan
Nazm

yaad

kabhii kabhii ko.ii yaad
ko.ii bahut puraanii yaad
dil ko burii tarah jhakjhortii hai
dil ke darvaaze par
burii tarah dastak detii hai
jaise shaam ko ko.ii taara niklaa ho
jaise sub.h ko.ii phuul khilaa ho
jaise chaa.ndnii apnii kirne.n bikher rahii ho
jaise ko.ii charaaG jalaa hai abhii
jaise raushnii phailii ho har taraf
jaise rote rote ko.ii ha.ns pa.Daa ho
jaise merii or ko.ii haath ba.Dhaa.e kha.Daa ho
kabhii kabhii kisii ke bolne ka bharam hotaa ho jaise
jaise wall par kisii ka message pa.Daa ho
jaise ko.ii mere darmiyaa.n kha.Daa ho
kabhii kabhii ko.ii yaad
jhakjhortii hai dil ko

Abul Hashim Khan
Nazm

in your absence

hame.n tanhaa.ii khaatii hai
hame.n ko.ii nahii.n suntaa
hame.n bhii baat aatii hai
ka.ii message hamaare note paiDo.n me.n
pa.De bosiidgii kii shaaKH par jhuule.n
magar kab tak

Saif Ali
Nazm

ruju

message kare vo mujh se mulaaqaat ke liye
aur mai.n javaab me.n likhuu.n fursat nahii.n mujhe

Saani Araryavi
Nazm

aaKHiri message

tumhaaraa aaKHrii message mire inbox me.n rakkhaa hai
us me.n tum ne likkhaa hai
mujhe ab bhuul jaanaa tum
judaa.ii phaa.ns bhii ho to
sabr se jhuul jaanaa tum
mujhe apnii qasam dii hai
mirii to jaan le lii hai
magar mai.n jaan de kar bhii aaKHir tak nibhaa.uu.ngaa
mai.n tujh ko bhuul jaa.uu.ngaa
magar tum se faqat merii zaraa sii ye guzaarish hai
mirii aa.nkho.n me.n mat rahnaa
mire dil se utar jaanaa
bhulaane bhuul jaane me.n tujhe mai.n yaad kar luu.n to
mujhe tum yaad na aanaa
kabhii bhii yaad na aanaa

Khaleelurrahman Qamr
Nazm

talluq

are paglii
tujhe mujh se mohabbat thii
to phir mujh se kahaa hotaa
ye kyaa ki raat bhar jagnaa
yuu.nhii bechain sii rahnaa
magar sab kuchh chhupaa lenaa
kabhii jaanaa jo sakhiyo.n me.n
munaafiq ban ke ha.ns lenaa
kisii se yuu.n bhii kah denaa
ki 'daanish' mujh pe 'aashiq hai
bahut hii chaahtaa hai vo
magar mai.n kyaa karuu.n hamdam
ki mai.n majbuur sii la.Dkii
zamaane ke rivaajo.n se ba.ndhii mahbuus baiThii huu.n
mai.n kuchh bhii kar nahii.n saktii
agar vo mujh ko chaahe hai to phir us par ye laazim thaa
ki mujh ko jiit letaa aa ke maidaa.n me.n muqaabil se
vo mujh ko khii.nch letaa shauq se pahluu-e-aa'daa se
zamaane ke rivaajo.n se kabhii mujh ko churaa letaa
yaa mere zimma-daaro.n se vo mujh ko maa.ng hii letaa
magar vo kuchh nahii.n kahtaa
KHafaa saa mujh se rahtaa hai
tumhaarii ye kahaanii kal bayaa.n kii ek la.Dkii ne
to mere dil me.n bhii ik shauq kii aatish hu.ii paidaa
mai.n is se qabl tum ko jaantaa tak bhii na thaa jaanaa.n
magar ik shauq thaa ki kaun hai jo yuu.n bhii chaahe hai
ki 'aashiq KHud hai lekin mujh ko vo 'aashiq bataa.e hai
so kuchh lamho.n kii KHaatir mai.n galii me.n terii dar aayaa
tujhe dekhaa tujhe jaanaa to mai.n ne tujh ko pahchaanaa
ye achchhii baat hai ki sharm se tuu kuchh na kah paa.ii
magar jaanaa.n zaraa saa ik ishaara kar diyaa hotaa
bharam mai.n teraa rakh letaa
magar ye kyaa ki tuu ne mujh ko majnuu.n naam kar Daalaa
mujhe mahbuub kar ke haa.e kyo.n badnaam kar Daalaa
zamaana mujh se puuchhe hai ki kyo.n us se KHafaa ho tum
bataa mai.n kyaa bataa.uu.n dosto.n ko mas.ala kyaa hai
mujhe bhii to mohabbat kaa bharam rakhnaa hai naa paglii
mai.n kaise kah duu.n logo.n se ki tuu hii mujh pe 'aashiq hai
magar sun jab tuu apnaa zabt kho baiThe kabhii ro kar
to mobile uThaa kar ek message mujh ko kar denaa
mai.n tujh ko thaam bhii luu.ngaa
tujhe luTne nahii.n duu.ngaa
ki tuu mere liye ik mohtaram mahbuub hastii hai
magar ye 'ishq kaa saudaa aur aise 'ishq kaa saudaa
mai.n hargiz kar nahii.n saktaa
mujhe jab tak tirii chaahat kaa kuchh ehsaas ho hii naa
to mai.n kaise bhalaa tujh se ko.ii rishta rakhuu.n paglii
Guruur-e-husn ko taj de
to phir 'daanish' bhii teraa hai
ye lafz-o-lauh tere hai.n
zamaana bhii mohabbat bhii

Danish Asari
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

bas yunhi jite raho

bas yuu.nhii jiite raho
kuchh na kaho
sub.h jab so ke uTho
ghar ke afraad kii gintii kar lo
Taa.ng par Taa.ng rakhe roz kaa aKHbaar pa.Dho
us jagah qaht giraa
ja.ng vahaa.n par barsii
kitne mahfuuz ho tum shukr karo
radio khol ke filmo.n ke na.e giit suno
ghar se jab niklo to
shaam tak ke liye ho.nTo.n me.n tabassum sii lo
dono.n haatho.n me.n musaafe bhar lo
mu.nh me.n kuchh khokhle be-ma.anii se jumle rakh lo
muKHtalif haatho.n me.n sikko.n kii tarah ghiste raho
kuchh na kaho
ujlii poshaak
samaajii izzat
aur kyaa chaahiye jiine ke liye
rose mil jaatii hai piine ke liye
bas yuu.nhii jiite raho
kuchh na kaho

Nida Fazli
Nazm

bahana

suno
tum kyuu.n nahii.n kahte
mire aa.nsuu tumhe.n takliif dete hai.n
mire dukh sun ke tum bhii bebasii mahsuus karte ho
merii aavaaz kii larzish tumhe.n bhii KHuu.n rulaatii hai
mere lahje kii namnaakii tumhe.n bechain rakhtii hai
mujhe ma.aluum hai lekin ye sab tum kah nahii.n sakte
usii lamhe tumhe.n yaad aane lagte hai.n
ka.ii behad zaruurii kaam aur phir tum
achaanak munqata.a karte ho telephone kii line
phir ek massage me.n likhte ho
mujhe afsos hai package achaanak KHatm hone par
to phir kal baat karte hai.n
magar mai.n jaantii huu.n is bahaane ko
mujhe ma.aluum hai jaanaa.n
mire aa.nsuu tumhe.n takliif dete hai.n

Shahnaz Parveen Shazi
Nazm

talluq

vo mujh se saKHt naalaa.n thii
so is ne mujh ko likh bhejaa
ta.alluq KHatm hai naasir
mujhe ab kaal mat karnaa
ko.ii massage agar aayaa to tum ko block kar duu.ngii
agar milne kii sochoge
to phir tum soch lenaa ab

Nasir Amrohvi
Nazm

bachchon ka dinner

bataa.uu.n khaayaa hai kyaa mai.n ne aaj do thappa.D
durust kar ke ga.e hai.n mizaaj do thappa.D
hakiim nabz mirii dekh kar ye kahne lagaa
tire maraz kaa hai aslii ilaaj do thappa.D
ye gaal gore the jo aaj laal laal hu.e
ki in pe kar ga.e halkaa massage do thappa.D
vo meraa bhaa.ii hai us par bhii dhyaan do ammii
mai.n khaa.uu.n chaar to khaa.e siraaj do thappa.D
na naashta kare khaa.e na lunch aur dinner
bajaa.e khaane ke khaa.ii hai taaj do thappa.D
tamaam din nahii.n kuchh kaam piiTne ke sivaa
hamaarii ammii kaa hai kaam kaaj do thappa.D
hamaarii asl KHataa.e.n to vo bataa na sakii.n
par aapaa de ke ga.ii.n ham ko byaaj do thappa.D
bahut hii ham to hai.n be-sharm haa.n magar aksar
hamaare chehre pe laa.e hai.n laaj do thappa.D
ye Dar hai mai.n jo ba.Daa ho ke bhii rahaa jaahil
na maar de mere mu.nh par samaaj do thappa.D

Raja Mehdi Ali Khan
Nazm

insan ki fariyaad

haa.n ai masaaf-e-hastii! mat puuchh mujh se kyaa huu.n
ik arsa-e-balaa huu.n ik luqma-e-fanaa huu.n
majbuuriyo.n ne Daalaa gardan me.n merii phandaa
KHud-karda-e-vafaa huu.n jaa.n-daada-e-razaa huu.n
sayyaad haadse kaa kartaa hai meraa piichhaa
murG-e-buriida-par huu.n said-e-shikasta-paa huu.n
hai zaat merii majma.a saarii buraa.iyo.n kaa
kahne ko mai.n ba.Daa huu.n lekin bahut buraa huu.n
aazaadiyo.n kii mujh par tohmat hii hai saraasar
mai.n qaidii-e-havas huu.n mai.n banda-e-havaa huu.n
ik baat ho bataa.uu.n ik dard ho sunaa.uu.n
ro.uu.n bhalaa kahaa.n tak kab tak pa.Daa karaahuu.n
kam-baKHt dil kuchh aisaa mai.n saath le ke aayaa
ik lamha jis ke haatho.n duniyaa me.n sukh na paayaa
jo josh is me.n uTThaa haalaat ne dabaayaa
jo sho.ala is me.n bha.Dkaa taqdiir ne bujhaayaa
ummiid kaa ye Guncha khilte kabhii na dekhaa
ye aarzuu kaa paudaa phaltaa nazar na aayaa
go is me.n maujzan thii qaum o vatan kii ulfat
lekin Garaz ne is ko kuchh aur hii sikhaayaa
hotii nahii.n rasaa.ii ummiid ke ufuq tak
tuul-e-amal ne is ko ik jaal me.n pha.nsaayaa
kii rahbarii KHirad ne har-chand rahnumaa.ii
is juhd par bhii lekin khultii nahii.n sachchaa.ii
paayaa na mai.n ne ab tak maqsad kaa apne saahil
kii bahr-e-ma.arfat me.n din raat aashnaa.ii
is justujuu me.n mai.n ne kii sair-e-tuur-o-aiman
parbat ko ghar banaayaa jangal se lau lagaa.ii
mandir ko jaa ke dekhaa girjaa me.n jaa ke Dhuu.nDaa
masjid ko chhaan maaraa us kii na diid paa.ii
jogii kaa ruup dhaaraa ban me.n kiyaa guzaaraa
tan par bhabhuut mal kar dhuunii bahut ramaa.ii
jap tap me.n umr apnii mai.n ne basar kii aksar
ban ban ke piir-e-raahib jaa KHaanqaah basaa.ii
suufii bhii ban ke dekhaa aur rind-e-be-riyaa bhii
kar naara-e-anaa-al-haq ik khalbalii machaa.ii
phirtii hai.n maarii maarii mushtaaq-e-jalva aa.nkhe.n
par ik jhalak se ba.Dh kar detaa nahii.n dikhaa.ii
uTh jaa nazar se merii haa.n ai hijaab-e-hastii
husn-e-azal nihaa.n hai zer-e-naqaab-e-hastii
ye zindagii-e-insaa.n ik KHvaab hai pareshaa.n
bedaarii-e-adam hai ta.abiir-e-KHvaab-e-hastii
dekhe.n agar to kyuu.n-kar ham jalva-e-ma.aarif
tuu zulmat-e-nazar hai ai aaftaab-e-hastii
taskii.n ko zahr-e-qaatil aab-o-havaa-e-aalam
raahat kaa dushman-e-jaa.n har inqalaab-e-hastii
ai tishna-e-haqiiqat dhoke me.n tuu na aanaa
ik daam-e-pur-KHatar hai mauj-e-saraab-e-hastii
chaahe agar rihaa.ii pesh-az-fanaa fanaa ho
paadaash-e-jurm-e-hastii hai ye azaab-e-hastii

Ghulam Bhik Nairang
Nazm

jiwan mein hariyali

tel davaa.e.n aur masaalhe in se milte hai.n
rang birange phuul chaman me.n in par khilte hai.n
ham apnii dhartii ko phuulo.n se mahkaa.e.nge
ham pe.D lagaa.e.nge maahaul banaa.e.nge

Riyazat Ali Shaiq
Nazm

s m s

mai.n ne us ko massage bhejaa
jis me.n mai.n ne
pyaar mohabbat ke kuchh jumle darj kiye aur
niiche apnaa naam bhii likhaa
vo bhii ujlat me.n thii shaayad
us ne too kaa izaafa kar ke
massage mujh ko vaapas bhejaa
jaldii me.n vo apnaa naam hii bhuul ga.ii thii
us ne apnaa naam na likhaa
niiche meraa naam likhaa thaa

Imran Shanawar
Nazm

lafz paron ki tarah hote hain

tamaam din tumhaare messages mere dil kii mu.nDero.n par kabuutaro.n kii tarah utarte hai.n
safed duudhiyaa siyaah chashm sharbatii aur surma.ii maa.il ja.ngalii kabuutar jin ke siine ke baal
ka.ii rango.n me.n damakte hai.n
sabz-guu.n niilguu.n aur taabdaar tapte hu.e taa.nbe ke jaise

Janan Malik
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now