Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "nek-baKHt"

Nazm MATCHES FOR "nek-baKHt"

Nazm

naqsh-e-faryaadi

naqsh-e-faryaadii
banaa phirtaa huu.n mai.n baazaar me.n
kaaGazii ik pairahan
bas Dhuu.nDhtaa-phirtaa huu.n mai.n
par vo miltaa hii nahii.n
kis tarah apnii shikaayat ke liye pahu.nchuu.n
baadshaah-e-vaqt ke darbaar me.n
baadshaah bad-baKHt hai
har-vaqt rahtaa hai madiraa me.n asiir
ye madiraa vo hai us ke zehn me.n hai jo bharii
is madiraa ke hii kaaran
us ne apne des ke logo.n ke
hulquum tak hai.n kaaT Daale
aur sachche nek logo.n aur valiyo.n ke maqaabir to.D ke
naaliyaa.n sa.Dke.n banaa dii.n
ab nihaayat faKHr se kahtaa hai vo
mai.n KHudaa huu.n is zamaane kaa
aur sab ko maar ke
zinda rahuu.ngaa mai.n sadaa
naam is kaa mai.n kyaa luu.n
sab jaante hai.n us kaa naam
ai asadullaah Gaalib tum bataa.o
kyaa karuu.n

Salahuddin Parvez
Nazm

nazm

biibiyo
jannatii hai vo biivii jo shauhar ke aane se pahle
saje aur sa.nvre
muu-ba-muu motiyo.n ko piro.e
ishtihaa-KHez KHushbuu bhare qaab khaano.n ke tayyaar rakkhe
roTiyaa.n garm aur narm bistar kaa ho ehtimaam
aaftaabe
sard aur garm paanii ke maujuud ho.n
vahaa.n na jaane use sard paanii kii KHvaahish ho yaa garm kii
us kii KHvaahish kaa ko.ii bharosaa nahii.n
taaki us kaa majaazii KHudaa us kaa maalik jo aa.e
zaruurat kii har chiiz bin maa.nge paa.e
aur haa.n biibiyo
ik chha.Dii bed kii KHuub mazbuut sii
vo bhii rakhnaa na bhuule
kaun jaane sa'uubat ke maidaa.n kaa haaraa thakaa vo sipaahii
shomii-e-baKHt se
naa-muraadii ke zaKHmo.n se lith.Daa hu.aa aa rahaa ho
jo aa.e Dhuu.nDne kii na zahmat uThaa.e
nek biibii ke bechaara shaano.n se resham kaa rangii.n labaada
us chha.Dii se haTaa kar
apnii naakaamiyo.n kaa lahuu us ke shaffaaf naazuk badan par chhi.Dak de
taaki phir chain kii nii.nd vo so sake
haa.n majaazii KHudaa hai hotaa sajda KHudaa ke sivaa gar kisii ko ravaa to
usii ko ravaa hai usii ne to tum ko bachaa ke zamaane kii
dhuupo.n se ghar ke hisaaro.n me.n mahfuuz rakkhaa us kii mehnat
ke paa.e hu.e rizq se hii to daaman tumhaaraa bharaa
so mirii biibiyo jannatii hai vo biivii
jo shauhar kii KHvaahish pe jiitii rahii
din ko us ne kahaa raat to us ne bhii raat samjhaa
us kii KHaatir vo mar-mar ke zinda rahii
us kii KHaatir marii
siidhii jannat sidhaaregii pursish na hogii gunaaho.n kii
sab mu'aaf ho.nge
vaa'z me.n
kahne vaalii ne itnaa kahaa aur chup ho ga.ii
nek biibii kii baKHshish kaa muzhda sunaayaa
magar aisaa shauhar kahaa.n jaa.egaa us kii baabat kisii ko na kuchh bhii bataayaa
KHudaayaa KHudaayaa
saf-ba-saf nasl-dar-nasl be-mol kii ye kaniize.n
inhe.n un ke hone kaa ehsaas
tuu hii 'ataa kar

Bilqis Zafirul Hasan
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

tahniyat

kitne baKHt vaale ho
zindagii me.n jo chaahaa
tum ne paa liyaa aaKHir
azm aur himmat se
fahm se zakaavat se
hai tumhaare daaman me.n
phuul kaamraanii kaa
aur tumhaare maathe par
faKHr kaa sitaara hai
ab tumhaare chehre par
aisii shaadmaanii hai
ko.ii kah nahii.n saktaa
dard se bhii vaaqif ho
aur tumhaare paa.nv me.n
der se khaTaktaa hai
aarzuu kaa ik kaa.nTaa
jis se KHuun ristaa hai
laala-zaar raaho.n par
is lahuu kii surKHii kii
kaa.nptii lakiire.n hai.n
in lahuu ke dhabbo.n me.n
naa-tamaam mub.ham sii
ek baat likhii hai

Fahmida Riaz
Nazm

ai azal se

ai azal se taa-abad saahib-faroG
ai jamaal-e-be-hijaab
uun kohre se
dhuup se zar-baft
aur resham chaa.ndnii se
baar-haa lene ko mai.n ne le liyaa
lafz sur ra.ngo.n kaa pairaahan magar
phir bhii na mujh se sil sakaa
tuu ta.ayyun kii hado.n me.n kyuu.n na mujh ko mil sakaa

Ameeq Hanafi
Nazm

lafzon ki dukan mein

kaalii billii ne ye bhii nahii.n sochaa ki mai.n kisii nii.nd me.n KHalal ho rahii huu.n
us ko to chuuho.n se matlab hai
aur ye kam-baKHt apnii bilo.n me.n chhupe kyuu.n nahii.n rahte
azal se yahii ho rahaa hai
gha.Dii ne shaayad baara bajaa diye hai.n
ye KHudaa ke aaraam kaa vaqt hai
aur vo shab bedaar use sone nahii.n dete
apne burte par gunaah karte to du.aa.o.n kii naubat hii kyuu.n aatii
lekin ye baat un kii samajh me.n nahii.n aa.egii
baato.n ke pher ne hii ham ko janam diyaa hai
varna zamii.n ke kokh kahaa.n thii
phir ham ne jannat banaa.ii aur use jahannam me.n jho.nk diyaa
ab ye pahchaan.naa ba.Daa mushkil hai ki kaun kahaa.n se shuruu.a hotaa hai aur kaun kahaa.n KHatm hotii hai
pahle daa.ero.n se zaaviye nikalte the
ab zaaviye daa.ere banaate hai.n
muKHtasar ye ki daliilo.n ne apnaa kaam chho.D diyaa hai

Mughni Tabassum
Nazm

dil-awez

teraa chehra mire vaaste saarii duniyaa ke phuulo.n se afzal hu.aa
kyaa hu.aa jo ko.ii duusraa
us kii KHushbuu se maanuus ho kar use le u.Daa
phuul KHushbuu to sab ke liye ek jaise magar
un se mahzuuz hote har ik shaKHs kaa
rang bhii muKHtalif Dhang bhii muKHtalif
tum hasii.n ho aur apnii nau.iyat kii vaahid hasii.n
dil-nashii.n
be-zarar
be-takalluf sii ma.asuum sii baKHt-var
baKHt-var kyaa tumhe.n ilm hai
mere dil me.n banii ik imaarat jise ham ne mil kar banaayaa larazne lagii hai
sutuuno.n me.n KHam aa rahaa hai
mujhe is imaarat ke bosiida hone kaa dukh hai
aur is dukh kii baabat mirii aa.nkh kii putliyo.n me.n zaruurat se zyaada namii hai
mirii zindagii me.n KHudaa kaa diyaa sab hai
bas ik tumhaarii kamii hai
jo shaayad hamesha rahegii

Ali Ul-Hasnain
Nazm

shahr-e-viran ke aaseb ka sae

magar
shahr-e-viiraa.n
tumhaare gharo.n maqbaro.n kii mu.nDero.n chhato.n par
jo buu.Dhe parindo.n kii sargoshiyaa.n hai.n
bhaTaktii hai.n din raat mere sirhaane
ko.ii ajnabii
Gair-maanuus aavaaz kahtii hai
KHudaa jab zamiino.n pe utraa thaa
buu.Dhe parindo.n ko maut aa ga.ii thii
jabhii shahr-e-viiraa.n kii behad puraanii
fasiilo.n me.n guu.ngii daraa.De.n pa.Dii thii.n
daraa.De.n jo khii.nche.n naso.n se haraarat
aur aise me.n shahr-e-hazii.n ke sabhii
baasiyo.n ne panaah maa.ng lii thii
daraa.Do.n ke shar se
puraane shahr se
na.e mausamo.n kii
haraarat naso.n me.n palaT aa.ii
kirno.n ne suuraj ko paidaa kiyaa
aur suuraj ne rango.n ko taqsiim kar ke
jo naqshe jane
un se chehre bane
chehro.n ne guu.ngii daraa.Do.n ko aavaaz dii
aur sajaa.e ba.De hii jatan se
galii aur mahalle
khurach kar nishaa.n saare maazii ke tere badan se
namak-paash chehro.n ne Tisve bahaa.e
masaajid madaaris me.n taariiKH-naamo.n ke pahre biThaa.e
magar shahr-e-viiraa.n
mai.n vo shor baKHt huu.n
jo buu.Dhe parindo.n kii sargoshiyo.n me.n
tumhaare batn kii KHaamushii sun rahii huu.n
ra.ngaa-rang pardo.n ke piichhe kii viiraaniyaa.n
chun rahii huu.n

Komal Raja
Nazm

wo moD

phir tirii titlii-numaa suurat mujhe yaad aa ga.ii
mujh ko vo lamha abhii bhuulaa nahii.n
ek kone me.n ka.ii logo.n ke saath
guftuguu me.n munhamik khoyaa hu.aa
merii aa.ankho.n ne kabhii tujh saa ko.ii dekhaa na thaa
mai.n tujhe takne lagaa
der tak taktaa rahaa
aa.nkh se kaano.n se ho.nTo.n se tujhe taktaa rahaa
kyaa ajab diivaangii thii
rashk aayaa baKHt pe apne mujhe
lafz ke asraar mujh pe vaa hu.e
ghanTiyaa.n sii mere kaano.n me.n bajii.n
nuur ke sailaab me.n Duubii hu.ii is shaam kii
ek ik saa.at tire ham-raah hai
ruk gayaa hai vaqt is ik mo.D par
mai.n judaa.ii ke liye majbuur thaa
tuu judaa.ii par jahaa.n masruur thaa

Shahryar
Nazm

chiDiyon ki shikayat

chi.Diyo.n ne be-tarah sataayaa hai
mere kamre ko ghar banaayaa hai
chhat pe un ko jahaa.n milii hai jagah
ik na ik gho.nsla banaayaa hai
ain mere pala.ng ke uupar
hai jo hissa vo un ko bhaayaa hai
taar bijlii kaa hai jo chhat pe lagaa
vo to miiraas hii me.n paayaa hai
ko.ii khuu.nTii ho taaq ho dar ho
un kii jaagiir me.n vo aayaa hai
sar pe biiTo.n kaa me.nh barastaa hai
be-Dhab aisaa ye abr chhaayaa hai
takiya par mez par kitaabo.n par
mohr kaa saa nishaa.n banaayaa hai
hissa mujh ko bhii kuchh milaa hai zaruur
jab chi.Daa tinke le kar aayaa hai
un kii chuu.n chuu.n kaa raag sun kar dil
gaanaa sun.ne se ta.ng aayaa hai
sab ke sar par KHudaa kaa hai saaya
mujh pe un ke paro.n kaa saaya hai
is qadar biiT kartii hai.n kam-baKHt
naak me.n dam har ek kaa aayaa hai
sub.h se la.D rahii hai.n aapas me.n
sar pe saaraa makaan uThaayaa hai
pa.Dh nahii.n saktaa likh nahii.n saktaa
is qadar shor-o-Gul machaayaa hai
aisaa maaluum hotaa hai goyaa
meraa kamra nahii.n paraayaa hai

Akhtar Shirani
Nazm

radd-e-tashkil

ek din achaanak
ka.ii lafz
munkir-nakiir kii tarah
jhapaak se merii qabr me.n ghus aa.e
aksar kii peshaanii par savaalaat ke achambhe the
pareshaanii kii baat to thii hii
mai.n ne fauran google aur wikipedia ke vaaste dene shuruu' kiye
bas phir kyaa thaa
saare lafz
mere saamne raqs karte hu.e
jhaT-paT ra.ng-bira.ngii aavaaze.n pahan kar
ek duusre se lipaT ga.e
zaraa sii der me.n
saare rang aapas me.n ulajh ga.e
aur ek buDDhaa ulluu
ye aahanii taKHtii mere gale me.n Daal gayaa
jis par be-rang KHat me.n kunda hai
aaj se ye bad-baKHt dariida-dimaaG
lafzo.n par cha.Dhe rang khurchaa karegaa
ki yahii is kii sazaa hai
tab se mai.n isii mashaqqat me.n lagaa huu.n
aur muntazir huu.n ki gale me.n pa.Dii hu.ii taKHtii par lagaa zang mujhe kab nazar aa.egaa

Abid Raza
Nazm

maine ek chiz bacha rakhi hai

ye KHaraaba
ki ko.ii gumbad-e-taariik hai ye
ko.ii suuraaKH nahii.n
koh-e-siyah ke us paar aa.nkh dekhe ko.ii taaraa jugnuu
is KHaraabe kii sahar bhii kyaa hai
bevgii
sub.h kii chaukhaT thaame
apnii peshaanii kii kho.ii hu.ii bi.ndii me.n gum
surKH ugte hu.e suuraj ko kha.Dii ghuurtii hai

Anwar Shamim
Nazm

sar-e-rahguzar ek manzar

qafas kaa dar khulaa ik niim-jaa.n kam-sin
parinda chand KHasta zaa.icho.n par raqs ke andaaz me.n aage
ba.Dhaa, phir cho.nch se apnaa pasandiida
musavvar zaa.icha us ne uThaayaa aur apne hii
hidaayat-kaar ke aage
adab se rakh diyaa jhuk kar
hidaayat-kaar garche nuur se thaa bad-gumaa.n mahruum naa-KHvaa.nda
sar-e-sail-e-ravaa.n ik barg-e-be-maaya
navisht-e-baKHt ke asraar se vaaqif thaa vo shaayad
nazar ke ruu-ba-ruu us ne
mataa-e-be-nihaayat ke fasaane se mujhe KHush-haal kar Daalaa
mujhe paamaal kar Daalaa
sabhii mauj-e-ziyaa me.n the
sabhii ke chashm o dil me.n ek shola thaa
sabhii KHaamosh gum-sum hai.n
yahaa.n se kaun jaa.egaa
yahaa.n par kaun aa.egaa
parinda niim-jaa.n kam-sin
qafas me.n jaa chukaa kab kaa
hidaayat-kaar kii aa.nkho.n me.n lauT aa.ii hai viiraanii
jo kal KHaalii thaa vo dast-e-talab hai aaj bhii KHaalii
labo.n par lutf-e-andaam-e-nihaa.n kii an-sunii gaalii

Balraj Komal
Nazm

naqsh-e-mohabbat

vo parda ruu-e-pur-anvaar se uThaa na sake
ham apne so.e hu.e baKHt ko jagaa na sake
ta.Dap ta.Dap ke to bismil ne jaan tak de dii
vo aab-e-teG ke do ghuu.nT bhii pilaa na sake
hamaarii un kii mohabbat rahii isii suurat
udhar ba.Dhaa na sake ham idhar ghaTaa na sake
hazaar valvale maujuud the tabii.at me.n
magar jab un se milii aa.nkh bhii milaa na sake
nazar milaate hii saaqii ne kar diyaa be-KHud
pilaa.ii aisii ki phir hosh me.n ham aa na sake
na puuchh qissa-e-be-chaargii-e-ishq na puuchh
ye raaz vo hai kisii ko jo ham bataa na sake
janaab-e-'nuur' hame.n to miTaa diyaa lekin
hamaare naqsh-e-mohabbat ko vo miTaa na sake

Noor Ludhiyanwi
Nazm

mukafat

lo aa ga.ii hai.n vo ban kar muhiib tasviire.n
vo aarzu.e.n ke jin kaa kiyaa thaa KHuu.n mai.n ne
lo aa ga.e hai.n vahii pairvaan-e-ahraman
kiyaa thaa jin ko siyaasat se sar-niguu.n mai.n ne
kabhii na jaan pe dekhaa thaa ye azaab-e-aliim
kabhii nahii.n ai mere baKHt-e-vaazhguu.n mai.n ne
magar ye jitnii aziyyat bhii de.n mujhe kam hai
kiyaa hai ruuh ko apnii bahut zubuu.n mai.n ne
ise na hone diyaa mai.n ne ham-navaa-e-shabaab
na is pe chalne diyaa shauq kaa fusuu.n mai.n ne
ai kaash chhup ke kahii.n ik gunaah kar letaa
halaavato.n se javaanii ko apnii bhar letaa
gunaah ek bhii ab tak kiyaa na kyuu.n mai.n ne

Noon Meem Rashid
Nazm

ajnabi wadiyon mein

ai KHushaa-azm parvaaz kaa ye safar
jhilmilaa.ii jahaan-e-digar kii sahar
vaa hu.ii aadmii par na.ii rahguzar
raqs kar zindagii zindagii raqs kar

Hurmatul Ikaram
Nazm

ain-mumkin hai

'ain-mumkin hai Duub jaa.e.n ham
ham jo kachche makaa.n ke baasii hai.n
dasht-e-be-aasmaa.n ke baasii hai.n
ham jo daaman me.n kuchh nahii.n rakhte
bebasii aur be-kasii ke sivaa
apne aa.ngan me.n kuchh nahii.n rakhte
saKHtii-e-'umr-o-muflisii ke sivaa
ham ki vo dard-aashnaa jin par
'umr-bhar vaqt mehrbaa.n na hu.aa
aaj tak baKHt mehrbaa.n na hu.aa
ham jinhe.n ziist ke gulistaa.n se
raahato.n kii havaa nahii.n aa.ii
ham jinhe.n kuucha-haa-e-yaaraa.n se
hamdamii kii sadaa nahii.n aa.ii
ham jinhe.n ulfato.n ke raste me.n
apnii hii saadgii ne luuTaa hai
har na.ii dostii ne luuTaa hai
ham jinhe.n zindagii kaa paas to hai
par jinhe.n zindagii se pyaar nahii.n
ham jo har lahza muskuraate hai.n
par jinhe.n ek pal qaraar nahii.n
ab tire KHvaab ko vafaa karne
suu-e-saahil chale to hai.n lekin
'ain-mumkin hai Duub jaa.e.n ham

Arslan Abbas
Nazm

daraKHt

vo ek daraKHt
kha.Daa hii rahtaa thaa
hamesha hamesha se

Harshlata
Nazm

shikayat

KHudaayaa sab ko judaa tuu ne zindagii baKHshii
kalii ko loch diyaa phuul ko ha.nsii baKHshii
ja.De hazaaro.n guhar kahkashaa.n kii zulfo.n me.n
sahar ko nuur diyaa shab ko chaa.ndnii baKHshii
ru-pahlii sub.h ke lab ko ataa kiye naGme
sunahrii shaam ke ho.nTo.n ko baa.nsurii baKHshii
zamii.n pe Guncha-o-gul ko mahak inaayat kii
falak pe maah-o-surayyaa ko raushnii baKHshii
har ek zarra-e-sahraa ko dii jilaa tuu ne
har ek qatra-e-shabnam ko aarsii baKHshii
taraa.iyo.n me.n maveshii charaane vaalo.n ko
galaa suriilaa diyaa raag raagnii baKHshii
kisaan menD pe baiThe jo dhuup khaate hai.n
unhe.n zamiin kii daulat harii-bharii baKHshii
shabaab-o-husn kii saaGar-ba-kaf hasiina ko
labo.n kii naazukii zulfo.n kii barhamii baKHshii
javaaniyo.n kii hasii.n niim baaz aa.nkho.n ko
sharaab tho.Dii sii dii kuchh Gunuudgii baKHshii
jo mutriba ko ataa kii sadaa-e-daa.uudii
to rind-e-mast ko miinaa-e-ahmarii baKHshii
jo shaa.iro.n pe suKHan kii kitaab naazil kii
to vaa.izo.n ko zamii.n kii payambarii baKHshii
vo jin kaa jhuuT hai pesha fareb-e-maz.hab hai
tirii KHudaa.ii ne un ko tavangarii baKHshii
hazaaro.n murtashiyo.n ko tirii mashiyyat ne
tilaa.ii baKHt diyaa ziist nuqra.ii baKHshii
buland-o-surKH makaano.n me.n rahne vaalo.n ko
suruur-o-kaif inaayat kiyaa KHushii baKHshii
magar azal me.n KHataa kyaa 'salaam' ne kii thii
ki is Gariib kii qismat ko muflisii baKHshii

Salam Sandelvi
Nazm

daricha khula hai

sunahraa parinda
jo chaaro.n anaasir kii yakjaa.ii se
ik anokhaa saa maanuus manzar banaa.e
zamaano.n ke qisse sune aur sunaa.e
ki jab mai.n ne suuraj ko dekhaa nahii.n thaa
vahii.n thaa vahii.n thaa
vo zar-baft kirno.n kaa paalaa
dariiche me.n hai saa.ato.n kaa ujaalaa
kabhii shaam kii aaKHirii raushnii hai
kabhii sub.h-e-raushan kaa hai vo sapiida

Arifa Shahzad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now