Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "qabiila"

Nazm MATCHES FOR "qabiila"

Nazm

sarhaden

kis se Darte ho ki sab log tumhaarii hii tarah
ek se hai.n vahii aa.nkhe.n vahii chehre vahii dil
kis pe shak karte ho jitne bhii musaafir hai.n yahaa.n
ek hii sab kaa qabiila vahii paikar vahii gil

Ahmad Faraz
Nazm

ai mere watan ke KHush-nawao

ik umr ke baa'd tum mile ho
ai mere vatan ke KHush-navaa.o
har hijr kaa din thaa hashr kaa din
dozaKH the firaaq ke alaa.o
ro.uu.n ki ha.nsuu.n samajh na aa.e
haatho.n me.n hai.n phuul dil me.n ghaa.o
tum aa.e to saath hii tumhaare
bichh.De hu.e yaar yaad aa.e
ik zaKHm pe tum ne haath rakkhaa
aur mujh ko hazaar yaad aa.e
vo saare rafiiq paa-ba-jaulaa.n
sab kushta-e-daar yaad aa.e
ham sab kaa hai ek hii qabiila
ik dasht ke saare ham-safar hai.n
kuchh vo hai.n jo duusro.n kii KHaatir
aashufta-nasiib o dar-ba-dar hai.n
kuchh vo hai.n jo KHil.at-o-qabaa se
aivaan-e-shahii me.n mo'tabar hai.n
suqraat o masiih ke fasaane
tum bhii to bahut sunaa rahe the
mansuur o husain se aqiidat
tum bhii to bahut jataa rahe the
kahte the sadaaqate.n amar hai.n
auro.n ko yahii bataa rahe the
aur ab jo hai.n jaa-ba-jaa saliibe.n
tum baa.nsuriyaa.n bajaa rahe ho
aur ab jo hai karbalaa kaa naqsha
tum mad.h-e-yaziid gaa rahe ho
jab sach tah-e-teG ho rahaa hai
tum sach se nazar churaa rahe ho
jii chaahtaa hai ki tum se puuchhuu.n
kyaa raaz is ijtinaab me.n hai
tum itne kaThor to nahii.n the
ye be-hisii kisii hisaab me.n hai
tum chup ho to kis tarah se chup ho
jab KHalq-e-KHudaa azaab me.n hai
socho to tumhe.n milaa bhii kyaa hai
ik luqma-e-tar qalam kii qiimat
Gairat ko faroKHt karne vaalo
ik kaasa-e-zar qalam kii qiimat
pindaar ke taajiro bataa.o
darbaan kaa dar qalam kii qiimat
naadaa.n to nahii.n ho tum ki samjhuu.n
Gaflat se ye zahr gholte ho
thaame hu.e maslahat kii miizaan
har sher kaa vazn taulte ho
aise me.n sukuut, chashm-poshii
aisaa hai ki jhuuT bolte ho
ik umr se adl o sidq kii laash
Gaasib kii saliib par ja.Dii hai
is vaqt bhii tum Gazal-saraa ho
jab zulm kii har gha.Dii ka.Dii hai
ja.ngal pe lapak rahe hai.n shole
taa.uus ko raqs kii pa.Dii hai
hai sab ko aziiz kuu-e-jaanaa.n
is raah me.n sab jiye mare hai.n
haa.n merii bayaaz-e-sher me.n bhii
barbaadi-e-dil ke marsiye hai.n
mai.n ne bhii kiyaa hai TuuT kar ishq
aur ek nahii.n ka.ii kiye hai.n
lekin Gam-e-aashiqii nahii.n hai
aisaa jo subuk-sarii sikhaa.e
ye Gam to vo KHush-ma.aal Gam hai
jo koh se juu-e-shiir laa.e
teshe kaa hunar qalam ko baKHshe
jo qais ko kohkan banaa.e
ai hiila-garaan-e-shahr-e-shiirii.n
aayaa huu.n pahaa.D kaaT kar mai.n
hai be-vatanii gavaah merii
har-chand phiraa huu.n dar-ba-dar mai.n
bechaa na Guruur-e-nai-navaazii
aisaa bhii na thaa subuk hunar me.n
tum bhii kabhii ham-navaa the mere
phir aaj tumhe.n ye kyaa hu.aa hai
miTTii ke vaqaar ko na becho
ye ahd-e-sitam jihaad kaa hai
daryuuza-garii ke maqbaro.n se
zindaa.n kii fasiil KHushnumaa hai
kab ek hii rut rahii hamesha
ye zulm kii fasl bhii kaTegii
jab harf kahegaa qum-be-iznii
martii hu.ii KHaak jii uThegii
lailaa-e-vatan ke pairahan me.n
baaruud kii buu nahii.n rahegii
phir baa.ndhe.nge abru.o.n ke dohe
phir mad.h-e-ruKH-o-dahan kahe.nge
Thahraa.e.nge un labo.n ko matlaa
jaanaa.n ke liye suKHan kahe.nge
afsaana-e-yaar o qissa-e-dil
phir anjuman anjuman kahe.nge

Ahmad Faraz
Nazm

safed chhaDiyan

janam kaa andhaa
jo soch aur sach ke raasto.n par
kabhii kabhii ko.ii KHvaab dekhe
to KHvaab me.n bhii
azaab dekhe
ye shaahraah-e-hayat jis par
hazaar-haa qaafile ravaa.n hai.n
sabhii kii aa.nkhe.n
har ek kaa dil
sabhii ke raste
sabhii kii manzil
isii hujuum-e-kashaa.n-kashaa.n me.n
tamaam chehro.n kii daastaa.n me.n
na naam meraa
na zaat merii
miraa qabiila
safed chha.Diyaa.n

Ahmad Faraz
Nazm

elan nama

mai.n laakh buzdil sahii magar mai.n usii qabiile kaa aadmii huu.n ki jis ke beTo.n ne
jo kahaa us pe jaan de dii
mai.n jaantaa thaa mire qabiile kii KHema-gaahe.n jalaa.ii jaa.e.ngii aur tamaashaa.ii
raqs-e-sho.ala-fishaa.n par israar hii kare.nge
mai.n jaantaa thaa miraa qabiila buriida aur be-ridaa saro.n kii gavaahiyaa.n
le ke aa.egaa phir bhii log inkaar hii kare.nge
so mai.n kamii.n-gaah-e-aafiyat me.n chalaa gayaa thaa
so mai.n amaa.n-gaah-e-maslahat me.n chalaa gayaa thaa
aur ab mujhe mere shahsavaaro.n kaa KHuun aavaaz de rahaa hai
to nazr-e-sar le ke aa gayaa huu.n
tabaah hone ko ek ghar le ke aa gayaa huu.n
mai.n laakh buzdil sahii magar mai.n usii qabiile kaa aadmii huu.n!

Iftikhar Arif
Nazm

aurat ki haisiyat

mai.n aurat huu.n taKHliiq-e-jahaa.n kaa ik sabab bhii huu.n
mai.n bilkul be-talab huu.n aur zamaane kii talab bhii huu.n
mai.n devii pyaar kii huu.n husn hii meraa vasiila hai
KHuluus-o-saadgii zevar vafaa meraa qabiila hai
hunar jiine kaa baKHshaa ilm kaa parcham bhii lahraayaa
pale hai.n god me.n merii jinho.n ne martaba paayaa
vafaadaarii mohabbat hii faqat meraa havaala hai
mirii aqdaar kaa ham-sar faqat koh-e-himaala hai
pa.Dhaa hai 'miir'-o-'Gaalib' 'ismat'-o-'manto' ko bhii mai.n ne
ye rango.n me.n basii har daastaa.n goyaa likhii mai.n ne
bahut farsuuda rasmo.n par jalaa.ii bhii ga.ii huu.n mai.n
qadaamat ke tariiqo.n se sataa.ii bhii ga.ii huu.n mai.n
tijaarat bhii mirii hotii rahii tohmat sahii mai.n ne
guzaarii hai bahut marmar ke goyaa zindagii mai.n ne
anaa kii bhe.nT cha.Dh kar aag ke sho.alo.n me.n jaltii huu.n
zamii.n me.n dafn ho jaatii huu.n aur be-maut martii huu.n
byaahii jaatii huu.n qur.aan se bhii mai.n yahaa.n ab tak
ki zinda hai yahaa.n par kaarobaarii kaa jahaa.n ab tak
bahut hii past huu.n aur laa.eq-e-dushnaam huu.n mai.n hii
zinaa bil-jabr me.n bhii morid-e-ilzaam huu.n mai.n hii
mai.n insaa.n huu.n farishta aur valii mai.n bhii nahii.n ko.ii
KHataa kartii huu.n gangaa kii dhulii mai.n bhii nahii.n ko.ii
ki sabr-o-shukr se maamuur hai iisaar se bhii dil
magar aaKHir ko thak jaataa hai yuu.n aazaar se bhii dil
nahii.n darkaar ko.ii martaba daulat na zar mujh ko
KHudaavandaa mirii qurbaaniyo.n kaa de ajr mujh ko

Zebunnisaa Zaibii
Nazm

dukh se Khaali Khaali rona

mai.n huu.n yaa tum ho
ye sach hai
apne andar ek qabiila har ko.ii hai
jis ko shaayad
raat ko sahraa ke rone kaa raaz pata hai
aisaa ronaa
duur kahii.n jaise kuchh bachche
sadiyo.n pahle ham ne jin ko qatl kiyaa ho
aur vo apne qatl se pahle
ro.e chale jaate ho.n
yaa phir
ye un ruuho.n kaa ronaa ho
jo insaanii ruup me.n zaahir ho na sakii huu.n
ret ke Tiilo.n ko chhuu chhuu kar
misl-e-havaa
ro.e jaatii huu.n
aur qabiile ke baashinde
ham
apne KHemo.n me.n leTe
apne aap se baate.n karte
raat ko sahraa kii tanhaa.ii kaa ronaa sunte rahte hai.n
saara.ngii kii sur kii tarah sisaktaa sahraa
ham sab me.n hai
lekin phir bhii
meraa ronaa
teraa ronaa
dukh se KHaalii KHaalii kyuu.n hai

Manmohan Talkh
Nazm

ajib log hain

ajiib log the
suuraj kii raushnii ke tale
KHud apne-aap ko pahchaan bhii rahe the
aur
labo.n pe da.avaa-e-inkaar-e-aaftaab bhii thaa
vo jaante the ki suuraj kii raushnii ke sivaa
ko.ii charaaG mayassar nahii.n hai aisaa jo
talaash-e-asl-e-haqiiqat ke ziine cha.Dhte hu.e
be-imtiyaazii me.n is aaftaab jaisaa ho
ajiib log the
suuraj ke nuur-KHaane me.n
kiraa.e-daar bhii the aur sar-niguu.n nahii.n the
kisii sharaar-e-munaafiq ne un ke siino.n me.n
zabaa.n-daraazii kii us aag ko havaa dii thii
jise qabiila-e-Gaflat ke KHushk logo.n ne
anaa ke KHabt pe aflaak se nikaale hu.e
kisii darinda-e-be-shakl kii tasallii par
baraa.e-nashsha-e-haivaaniyat uThaa liyaa thaa
magar ye kyaa
ki phir aaj is hamaarii bastii me.n
ajiib log hai.n
suuraj kii raushnii ke tale
KHud apne-aap ko pahchaan bhii rahe hai.n
aur
labo.n pe da.avaa-e-inkaar-e-aaftaab bhii hai
ajiib log hai.n
suuraj ke nuur-KHaane me.n
kiraa.e-daar bhii hai.n
aur sar-niguu.n nahii.n hai.n

Sarfraz Arish
Nazm

azm

ba.Daa ajiib thaa manzar
ajiib raat thii vo
havaa.e.n sahmii hu.ii thii.n charaaG chup chup the
har ek samt vahii be-karaa.n sii KHaamoshii
fazaa udaas
vahii niim-jaa.n sii KHaamoshii
sukuut-e-shab me.n bhii aahaT thii inqilaabo.n kii
sajii thii bazm vahaa.n aasmaa.n-janaabo.n kii
bahut sii baate.n thii.n aur ko.ii baat thii hii nahii.n
phir us ke baa'd ko.ii raat
raat thii hii nahii.n
vo raat jab bhii kabhii yaad aane lagtii hai
to raushnii hame.n rasta dikhaane lagtii hai
us ek shab me.n murattab hu.aa nisaab-e-vafaa
likhii ga.ii thii usii raat me.n kitaab-e-vafaa
us ek raat ko tahriir ko.ii kaise kare
KHayaal-o-fikr ko zanjiir ko.ii kaise kare
lahuu ke KHvaab kii ta.abiir ko.ii kaise kare
safar thaa kaisaa vo kaisii masaafat-e-shab thii
ko.ii bataa.e to
kaisii vo saa.at-e-shab thii
mutaalibaat-e-sharii.at bahut ziyaada the
aur us ke paas faqat ek shab kii mohlat thii
us ek shab me.n use kitne kaam karne the
use sikhaanaa thaa insaa.n ko bandagii kaa shu.uur
tilaavato.n kaa qariina suKHanvarii kaa shu.uur
vo ek raat thii aisii
ki qadr-o-israa ne
nazar jo apnii jamaa.ii to phir haTaa.ii nahii.n
vo regzaar ke siine pe nasb ik KHema
lahuu se sabr kii taariiKH likhne vaalaa thaa
bujhaa bujhaa saa kha.Daa thaa vo paasbaan-e-charaaG
magar daruun me.n is ke bahut ujaalaa thaa
vo jaantaa thaa vafaadaar hai.n sabhii naasir
vo sar kaTaa.e.nge lekin na saath chho.De.nge
charaag-e-KHema bujhaane kaa ye na thaa maqsad
ki us ko yaavar-e-ansaar ko parakhnaa thaa
vo raushnii me.n unhe.n laanaa chaahtaa thaa faqat
samajh rahaa thaa vo qudrat ke har ishaare ko
sadaa.e.n detii rahii us ko daulat-e-duniyaa
kahaa.n vo sabr kahaa.n jabr-o-shaukat-e-duniyaa
magar vo ek sadaa
aasmaa.n se aatii hu.ii
bataa rahii thii
ki kyaa aasmaan chaahtaa hai
KHudaa-e-paak ko.ii imtihaan chaahtaa hai
isii liye ko.ii sahraa kii samt ba.Dhtaa rahaa
lahuu lahuu kisii dariyaa kii samt ba.Dhtaa rahaa
vo raushnii kii alaamat
vo baaniyaan-e-charaaG
samajh rahaa thaa bujhegaa ye KHaandaan-e-charaaG
ajiib log the vo KHaandaan-e-nuur ke log
the sab ke ek se lahje
kalaam yaksaa.n the
KHilaaf-e-zulm sabhii ke payaam yaksaa.n the
bahut hii Gaur se har chehra pa.Dh rahe the husain
ki aane vaalaa har ik lamha pa.Dh rahe the husain
vo ek raat bhii dekho guzar hii jaatii hai
savere ma.arka hotaa hai haqq-o-baatil me.n
ajiib josh hai jazba hai jaa.n-nisaaro.n me.n
vaqaar-e-tishna-labii ko gale lagaa.e hu.e
guzar rahaa hai qabiila lahuu ke dariyaa se
ba-vaqt-e-asr azaa.n guu.njtii hai sahraa me.n
namaaz KHud hii musallaa bichhaane aa.ii hai
sar-e-husain adaa kar rahaa hai sajda-e-shukr
guluu-e-KHushk pe KHanjar kii dhaar chaltii hai
pa.Dhaa thaa jis ne kabhii
kullu man alaihaa faan
lahuu se us ne likhaa
laa-ilaaha il-lallaah

Tariq Qamar
Nazm

dastur sazi ki koshish

yuu.n to har shaa.ir kii fitrat me.n hai kuchh diivaangii
Gair zimmedaariyaa.n hai.n us kii juzv-e-zindagii
arz-e-sheristaan me.n ye shaa.iraana KHaasiyat
cancer kii tarah se jab phailne ba.Dhne lagii
muKHtalif school jab ja.ngii akhaa.De ban ga.e
fikr-o-fan me.n jab niraajii kaifiyat paidaa hu.ii
mumlikat me.n zaabta ko.ii na jab baaqii rahaa
har jagah qaanuun kii hone lagii be-hurmatii
ek ik tuk-band ustaado.n ke mu.nh aane lagaa
likh ke sub.h-o-shaam nazme.n be-tukii se be-tukii
kuu.De-karkaT kii tarah har suu nazar aane lage.n
Dheriyaa.n hii Dheriyaa.n diivaan-e-KHaas-o-aam kii
had to ye hai ahl-e-machhlii-shahr bhii karne lage
maahii-giirii chho.D kar din raat fikr-e-shaa.irii
jin se bohraan-e-Gizaa state me.n paidaa hu.aa
qaht-e-maahii se ba.Dhii har chaar jaanib bhuk-marii
chand qaumii dard rakhne vaale ahlurraa.e se
qaum kii naa-gufta-ba-haalat na jab dekhii ga.ii
ek dastuur-ul-amal tayyaar karne ke liye
ik kametii 'amn'-saahab kii sadaarat me.n banii
taaki is par chal ke nazm-o-zabt aa.e qaum me.n
taaki kuchh to mo.atadil ho shaa.iro.n kii zindagii
duusre kaamo.n me.n bhii qaumii energy sarf ho
tuk faroshii ke alaava bhii to maqsad ho ko.ii
daur-e-'aflaatuun'-o-'tulsii-das' se 'iqbaal' tak
history kal shaa.iro.n kii is kametii ne pa.Dhii
duusre mulko.n ke aa.iin-o-zavaabit me.n jahaa.n
jo munaasib baat thii vo chhaa.nT kar rakh lii ga.ii
raat din kii saKHt mehnat aur jaa.n-sozii ke ba.ad
is kametii ne report apnii bil-aaKHir pesh kii
KHaaka-e-dastuur-e-qaumii ya.anii vo she.rii report
'amn'-saahab ne raqam kii thii ba-sinf-e-masnavii
is pe raa.e-aamma ma.aluum karne ke liye
shaa.iro.n ko naql dastaavez kii bhejii ga.ii
muKHtalif ahl-e-suKHan ne apne apne taur par
raa.e dii dastuur me.n tarmiim yaa tansiiKH kii
masnavii me.n KHaamiyaa.n Dhuu.nDe.n zabaa.n kii jaa-ba-jaa
ek shaa.ir ne jo the shaagird-e-nuuh-naarvii
saik.Do.n misre badal kar rakh diye kuchh is tarah
nafs-e-mazmuu.n nazr ho kar rah gayaa islaah kii
un kaa kahnaa thaa ki bandish chust honii chaahiye
sher ke andar balaa se ho na fikrii taazgii
na.at-go hazraat kaa kahnaa thaa shaa.ir ke liye
shart avval hai ki ho jaa.e vo kaTTar maz.habii
aaqibat kii baat soche aur munaajaate.n likhe
us ke jan me.n kaar-aamad shaa.irii hai bas vahii
aise shaa.ir jo ki haamii the taraqqii-vaad ke
in kaa kahnaa thaa ki shaa.ir kaa suKHan ho maqsadii
ya.anii pahle se muqarrar-karda mauzuaat par
mumlikat me.n aam kii jaa.e shu.uurii shaa.irii
KHvaah sheristaan me.n is kaa na ho ko.ii vajuud
laaziman dikhlaa.ii jaa.e kashmakash tabqaat kii
ik qabiila jo muKHaalif thaa shu.uurii fikr kaa
thaa taraqqii-vaadiyo.n se jis ko buGz-e-lillaahii
is qabiile kaa ye kahnaa thaa ki shaa.ir kaa kalaam
laaziman ho ik mu.amma qaid-e-ma.anii se barii
jis ko shaa.ir KHud na samjhe nazm kar lene ke ba.ad
jis ko pa.Dh kar gum ho aql-e-maulvii-e-ma.anavii
dekh kar dastuur me.n nazm-o-nasq kaa tazkira
saKHt barham ho ga.e kul shaa.iraan-e-naksalii
in kaa nukta thaa ki shaa.ir fitratan aazaad hai
us pe lag saktii nahii.n paabandiyaa.n tanziim kii
zindagii me.n zaabta laane ke bilkul the KHilaaf
saath naksal-vaadiyo.n ke duusre hazraat bhii
muKHtasar ye hai ki sab ne rad kiyaa dastuur ko
saarii mehnat 'amn'-saahab kii akaarat ho ga.ii
dekh kar naa-aaqibat andeshii-e-ahl-e-suKHan
is tarah goyaa hu.ii un kii mohazzab KHaamushii
me.nDako.n ko taulnaa aasaa.n nahii.n hai jis tarah
shaa.iro.n ko bhii munazzam karnaa mushkil hai yuu.nhii

Raza Naqvi Vahi
Nazm

wo jo kahin nahin hai

teraa ko.ii din nahii.n
teraa ko.ii ruup nahii.n
abuu-suifyaan kii hi.nda
is ra.ng-manch me.n
terii ko.ii jagah nahii.n
ajdaad ke intiqaam me.n
tuu kahaa.n hai
naslo.n kii KHuun-aashaam ja.ng me.n
tuu jaltii rahii
kaleja chabaane se husain kaa KHuun bahaane tak
zamiin-o-aasmaan tujhe malaamat karte rahe
bad-baKHt-o-shikast-KHurda
hi.nda bint-e-atba
teraa qabiila terii vahshat se pahchaanaa gayaa
teraa paagal-pan
terii vaj.h-e-shohrat hai
kisii faisle kisii raa.e me.n teraa ko.ii havaala nahii.n
tujhe vahshii banaane vaale tere adh mare aslaaf
terii kokh zahr-aaluud kar ke
tujhe be vajuud kar ke
zamiin par musallat rahe aaseb ban kar
bad-baKHt hi.nda
jo itnaa shu.uur tujhe hotaa
to samajh paatii
jabrii nizaam raa.ij karne ke liye
har baar kokh barbaad kii ga.ii

Injila Hamesh
Nazm

nasab-nama

mai.n aur aadam
vahaa.n puraane pe.D ke niiche
roz ikaTThaa hote the
vo lak.Dii se
pahiye aur shahtiir banaayaa kartaa thaa
mai.n pe.Do.n aur phuulo.n se
ra.ng kashiid kiyaa kartii thii
phir ham dono.n ne mil kar
ik pesha iijaad kiyaa
aur ek qabiila janam diyaa
jab se ab tak
ham ko ek nasab-naame kii zaruurat hai

Ishrat Afreen
Nazm

hawa se baat karo

sadaa se baat karo
yahii ki jin ko sar-e-dasht-o-bar pukaaraa gayaa
vo sar-kashiida qabaa.il kii sar-phirii aulaad
kis zamii.n me.n khapii
kis falak kaa rizq hu.ii

Ehsan Akbar
Nazm

baad ke baad

sahiife utarne se pahle aur nabiyo.n ke nuzuul ke ba.ad
haath se gire hu.e nivaalo.n kii tarah hame.n kutto.n ke aage Daal diyaa jaataa rahaa
is darmiyaan, aa.nkho.n ke niiche ham ne apne haath rakhe
ki vo paa.o.n par na gir pa.De.n aur kaa.nch kaa e'tibaar jaataa rahe
mujhe aag se likh aur paanii se ugaa
miTTii ke saath insaaf mai.n KHud karuu.ngii
vo to qadam qadam kaa.nTo.n kii baa.D tak KHud chal kar ga.e
aag pahnaavaa karte the jo log
aur jo akelaa thaa us ne sargoshii iijaad kii
aur jis ne qabiila chaahaa us ne chiiKHe.n banaa.ii.n aur raat ke parindo.n me.n baa.nT dii.n
pardesii hu.e haath kuu.nje.n paka.Dte rah ga.e
havaa kaa bichhaunaa judaa.ii kii u.ngliyo.n ne bunaa aur mohabbat karne vaale dil ne sameTaa
kyaa paa.nv juuto.n ke liye bane the yaa manzilo.n ke liye?
phir thakan ne kis ke paa.nv to.De
aur kaun asiir kiyaa ki us se juuto.n kii qiimat puuchhe aur insaan ke bhaav bataa.e
phir e'tibaar ne kis ke TaKHne kaaTe ki vo aasmaan samet zamiin par aa rahe
KHudaavand! bhiil qabiile ke log gosht khaanaa kab siikhe
jab un ke mu.nh ko KHuun aur dil ko KHauf-e-KHudaa lag gayaa
phir is ke baa'd vo sar na uThaa sake
aazaadii sirf ek ThanDii saa.ns thii maqduur-bhar
aur Gulaamii! umr bhar kii roTiyaa.n!!

Nasreen Anjum Bhatti
Nazm

nazm ki shaera

jis ke shero.n kii la.Diyaa.n...
mohabbat ke maathe kaa si.nghaar thii.n
jis ke be-taab jazbo.n kii miiThii kasak
lutf kii daastaano.n kaa unvaan thii
jo gulaabii ruto.n kaa mahaktaa hu.aa surKH paimaan thii
aaj KHaamosh hai...
nafrato.n ke alaav se uThtaa dhu.aa.n
zard shaamo.n ke is maatamii ahd ko...
de gayaa hai sulagte lahuu kii humak
phuul kaa ishq pesha gulaabii badan
qabr ke zard katbe kaa darbaan hai
titliyaa.n mar chukii.n!
chaa.nd KHaamosh hai...
jugnu.o.n kaa qabiila siyah-posh hai
nazm kii shaa.era!
marsiye maa.ngtii, be-gunaahii kaa taaza lahuu thuuktii
u.Dte baaruud ke zahr se khaa.nstii
haa.nptii-kaa.nptii nazm kaise likhe

Masoom Sheerazi
Nazm

dajla ke KHwab

ye adaa.e.n raqs ke ha.ngaam kitnii raqs-KHez
vo javaanaan-e-qabiila hosh se baahar chale
kaakulo.n ke sumbulistaa.n aarizo.n par aks-rez
jaise saahil kaa nazaaraa aab-e-dariyaa par chale
ik ta.assur hai ki raqsaa.n ho rahaa hai har taraf
sham.e.n raushan hai.n charaaGaa.n ho rahaa hai har taraf
aag ke atraaf raushan jaise ik faanuus-e-raqs
raqs kartii la.Dkiyaa.n kuchh aag ke atraaf yuu.n
jaise sat.h-e-aab par mahtaab ke haale kaa aks
jis ko jhuule me.n jhulaa.e.n mauj-haa-e-siimguu.n
mil ke jab jhuktii hai.n lagtii hai.n kalii mu.nh-band sii
aur jab tantii hai.n kis darja bhalii dil-band sii
ik taraf vo surKH mish.al haath me.n le kar chale
kuchh hasii.n kuchh naaznii.n kuchh sarv-qad kuchh siim-tan
jaise kuchh phuulo.n ke naazuk narm-rau lashkar chale
narm-raftaarii me.n dajla ke tamavvuj kii phaban
jaise sahraa.o.n ke aahuu mahv-e-gul-gasht-e-chaman
ye hasii.n aahuu-qadam aahuu-nafas aahuu-mizaaj
le rahe hai.n nau-javaanan-e-qabiila se KHiraaj
jalva-pairaa jalva-saamaa.n kitne dilkash maahtaab
kitne afsaano.n ke paikar kitne ra.ng-o-buu ke KHvaab
vo jabiino.n ke araq me.n jaise sho.alo.n ke saraab
jaise sandal me.n sharaaro.n ke tabassum mahv-e-KHvaab
sho.ala-afshaa.n kaakulo.n me.n surKH phuulo.n ke charaaG
jaise taariikii me.n mil jaa.e.n ujaale ke suraaG
aarizo.n kii chaa.ndnii phailii hu.ii sii har taraf
har taraf hai ek tarkash ek aahuu har qadam
kar rahe hai.n raqs daf par mahvishaan-e-jalva-taab
har taraf bikhre hu.e hai.n vaadi-e-dajla ke KHvaab
kuchh ka.nval kuchh nastaran kuchh sumbulistaa.n kuchh gulaab

Qamar Jameel
Nazm

charagh ugne ke din nahin hain

zamaa.n kii gardish
KHutuut jitne bhii amn-o-ulfat ke tum ne ham ko diye hai.n ab tak
zaraa ruko to
hame.n bataa.o
tumhaare lafzo.n kii aastiino.n me.n kyaa chhupaa hai
vo koh-e-kaafii qabiila jis ne
na.e zamaano.n ko surKH chaadar se Dhaa.np lene kaa
hukm saadir kiyaa hai phir se
vo nochtaa hai un aa.ino.n ko
ki jin pe suuraj kaa aks chhalke to raushnii ho
KHudaa ke ghar me.n
KHaraab haalo.n ne dars dene kii Thaan lii hai
hamaare aa.nsuu bhii kuchh KHasaaro.n ko jazb kar ke
hazaaro.n sajdo.n pe jam ga.e hai.n
har ik galii me.n hai shor itnaa
azaane.n ghar tak pahu.nch na paa.e.n
hamaarii tahziib aur rivaayat mirii pa.Dii hai
har ek gumbad pe sard lahje saje hu.e hai.n
hai darj un par
ye log saare jahannamii hai.n
hamaare bachche namaaz pa.Dhne se Dar rahe hai.n
nigaahe.n sab kii tamaash-biino.n ne baa.nT lii hai.n
hiraa se aatii hu.ii havaa.o.n ko bosa dene kii aarzuu me.n
bahut se rasto.n ne dhuul phuu.nkii
bahut se gho.Do.n ne jaa.n ga.nvaa dii
zamaa.n kii gardish
hai yaad ham ko
arab kii miTTii pe dhuup barsii to aag bha.Dkii
falak se utrii thii.n aabshaare.n
bahut se fitne bhii jal bujhe the
vahii dhu.aa.n phir se uTh rahaa hai
zamii.n pe jin ne baqaa kaa parcham uThaa rakhaa hai
shariir bachche hai.n kuufiyo.n ke
zamaa.n kii gardish
zaraa suno to
bahut hai.n tuufaa.n zamii.n hai banjar
mirii sadaa ke nahiif sho.ale gavaah rahnaa
gavaah rahnaa
charaaG ugne ke din nahii.n hai.n charaaG ugne ke din nahii.n hai.n

nawed malik
Nazm

kufa-mizaj

ruko mohabbat ke KHaanvaade ke shaahzaade
ruko kahaa.n ujlato.n me.n jaane.n luTaa rahe ho
kahaa.n lahuu se charaaG raushan kiye kha.De ho
ye kaise logo.n se ‘ahd-e-ulfat nibhaa rahe ho
ye log vo hai.n jo tere zaKHmo.n ko ghaav kar ke
havaa.e.n de.nge sharar ko KHud hii alaav kar ke
tirii vafaa kaa junuu.n salaamat ho taa-qayaamat
ye log lekin vafaa.e.n beche.nge bhaav kar ke
suno mohabbat ke KHaanvaade ke shaahzaade
ye dhyaan rakhnaa ki tum se pahle hame.n junuu.n thaa
hame.n junuu.n thaa ki is qabiile me.n jaa.n luTaa.e.n
hame.n junuu.n thaa ki vahshato.n se sukuu.n banaa.e.n
vo ham the sahraa ko jo samundar banaa rahe the
vo ham the jo pattharo.n ko dha.Dkan sikhaa rahe the
magar ye kuufa-mizaaj logo.n kii 'aadate.n hai.n
imaam un kii vafaa kii KHaatir 'alam uThaa.e
imaam apne lahuu se sahraa me.n rang laa.e
to ye qabiila yaziid kii saf me.n jaa rukegaa
tumhii Galat the tumhii Galat ho tumhe.n kahegaa
suno mohabbat ke KHaanvaade ke shaahzaade
ye bevafaa.ii kaa silsila hai nahii.n rukegaa

Noman Badr
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

log aurat ko faqat jism samajh lete hain

log aurat kii har ik chiiKH ko naGma samjhe
vo qabiilo.n kaa zamaana ho ki shahro.n kaa rivaaj

Sahir Ludhianvi
Nazm

dard aaega dabe panw

ho na ho apne qabiile kaa bhii ko.ii lashkar
muntazir hogaa a.ndhere kii fasiilo.n ke udhar
un ko sholo.n ke rajaz apnaa pataa to de.nge
KHair ham tak vo na pahu.nche bhii sadaa to de.nge
duur kitnii hai abhii sub.h bataa to de.nge

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now