Search result for "rahiin-e-naqsh-e-paa" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "rahiin-e-naqsh-e-paa"

Nazm MATCHES FOR "rahiin-e-naqsh-e-paa"

Nazm

taaruf

nahii.n mumkin miTaanaa mujh ko misl-e-naqsh-e-paa yaaro
KHalaa.o.n me.n rahuu.ngaa guu.njtaa ban kar sadaa yaaro

Sada Ambalvi

Nazm

naqsh-e-pa

ye niim-KHvaab ghaas par udaas udaas naqsh-e-paa
kuchal rahaa hai shabnamii libaas kii hayaat ko

Akhtarul Iman

Nazm

safar ka dusra marhala

chalii kab havaa kab miTaa naqsh-e-paa
kab girii ret kii vo ridaa
jis me.n chhupte hu.e tuu ne mujh se kahaa
aage ba.Dh aage ba.Dhtaa hii jaa
mu.D ke takne kaa ab faa.eda
ko.ii chehra ko.ii chaap maazii kii ko.ii sadaa kuchh nahii.n ab
ai gale ke tanhaa muhaafiz tiraa ab muhaafiz KHudaa
mere ho.nTo.n pe kaf
mere ra.asha-zada baazu.o.n se laTaktii hu.ii gosht kii dhajjiyaa.n
aur laakho.n baras kaa bu.Dhaapaa
jo mujh me.n samaa kar humakne lagaa
mujh ko maazii se kaTne kaa kuchh Dar nahii.n
apne ham-zaad ko ruu-ba-ruu paa ke mai.n Gam-zada bhii nahii.n
ye asaa jhukte shaano.n pe kaalii abaa aur gale ke chalne kaa paiham sadaa
ab yahii merii qismat yahii aasraa

Wazir Agha

Nazm

ahl-e-junun

apnaa ehsaas ye kaavish ye tafakkur ye samajh
ham se hii vaqt kii ye saarii masiihaa.ii hai
apne hii naqsh-e-qadam sang-e-nishaan-e-manzil
apne hii dam se basiirat hai ye biinaa.ii hai

Noor -e-Shama Noor

Nazm

gulha-e-aqidat

yaum-e-aazaadii ne yuu.n chhi.Dkaa fazaa.o.n me.n gulaal
gulsitaa.n se bhiinii bhiinii KHushbu.e.n aane lagii.n
titliyaa.n apne paro.n par paa ke qaabuu har taraf
sehn-e-gulshan kii ravish par raqs farmaane lagii.n

Syeda Shan-e-Meraj

Nazm

aaKHiri aadmi

bujhaa do
lahuu ke samundar ke us paar
aa.ina-KHaano.n me.n ab jhilmilaate hu.e qumqumo.n ko bujhaa do
ki dil jin se raushan thaa ab un charaaGo.n kii lau bujh chukii hai
miTaa do
munaqqash dar-o-baam ke jagmagaate
chamakte hu.e sab buto.n ko miTaa do
ki ab lauh-e-dil se har ik naqsh harf-e-Galat kii tarah miT chukaa hai
uThaa do
lahuu ke jaziire me.n
biphrii hu.ii maut ke zard panjo.n se parda uThaa do
ki ab is jaziire me.n
laasho.n ke ambaar bikhre pa.De hai.n
fazaa me.n har ik samt
jalte hu.e KHuun kii buu rachii hai
vo aa.nkhe.n jo apne badan kii tarah saaf shaffaaf thii.n
ab un daraKHto.n pe baiThe hu.e chiil kavvo.n gidho.n kii Gizaa bin chukii hai.n
ye sola december kii bujhtii hu.ii shaam hai
aur mai.n
is lahuu ke jaziire me.n jaltaa hu.aa aaKHirii aadmii huu.n

Fakhr-e-Alam Nomani

Nazm

ai mere soch-nagar ki rani

tujh se jo mai.n ne pyaar kiyaa hai tere liye? nahii.n apne liye
vaqt kii be-unvaan kahaanii kab tak be-unvaan rahe
ai mire soch-nagar kii raanii ai mire KHuld-e-KHayaal kii huur
itne dino.n jo mai.n ghultaa rahaa huu.n tere binaa yuu.nhii duur hii duur
soch to kyaa phal mujh ko milaa mai.n man se gayaa phir tan se gayaa
shahr-e-vatan me.n ajnabii Thahraa aaKHir shahr-e-vatan se gayaa
ruuh kii pyaas bujhaanii thii par yahaa.n ho.nTo.n kii pyaas bhii bujh na sakii
bachte sambhalte bhii ek sulagtaa rog banii mire jii kii lagii
duur kii baat na soch abhii mire haat me.n tuu zaraa haat to de
tujh se jo mai.n ne pyaar kiyaa hai tere liye? nahii.n apne liye
baaG me.n hai ik bele kaa taKHta bhiinii hai is bele kii sugandh
ai kaliyo kyuu.n itne dino.n tum rakkhe rahii.n ise god me.n band
kitne hii ham se ruup ke rasiyaa aa.e yahaa.n aur chal bhii diye
tum ho ki itne husn ke hote ek na daaman thaam sake
sehn-e-chaman par bhau.nro.n ke baadal ek hii pal ko chhaa.e.nge
phir na vo jaa kar lauT sake.nge phir na vo jaa kar aa.e.nge
ai mire soch-nagar kii raanii vaqt kii baate.n rang aur buu
har ko.ii saath kisii kaa Dhuu.nDe gul ho.n ki bele mai.n huu.n ki tuu
jo kuchh kahnaa hai abhii kah le jo kuchh sun.naa hai sun le
tujh se jo mai.n ne pyaar kiyaa hai tere liye? nahii.n apne liye

Ibn۔e۔Insha

Nazm

id

aap jab chaahe.n mire chulluu me.n talchhaT Daal de.n
kab kahaa thaa mahfil-e-jamshiid honii chaahiye
sajda-rezii ke liye is rahguzar me.n ai jabii.n
naqsh-e-paa-e-dost kii taqliid honii chaahiye

Maikash Akbarabadi

Nazm

apni walida ki yaad mein

ga.ii kahaa.n hai vo ab suurate.n mohabbat kii
zamaane bhar me.n kahii.n naqsh-e-paa nahii.n miltaa

JaiKrishn Chaudhry Habeeb

Nazm

wali

jis kii fayyaazii se har qatra samundar ho gayaa
jis ke naqsh-e-paa se har zarra munavvar ho gayaa

Maikash Akbarabadi

Nazm

mere sath chal

tire naqsh-e-paa kii asiir hai
tirii manzilo.n kii safiir hai
mirii fikr aur mirii nazar
mire saath chal mire saath chal

Salma Hijab

Nazm

kisan

qalb-e-aahan jis ke naqsh-e-paa se hotaa hai raqiiq
sho.ala-KHuu jho.nko.n kaa hamdam tez kirno.n kaa rafiiq

Josh Malihabadi

Nazm

Khaali lamhon ki nazm

na manzil kaa ta.ayyun na raasto.n kaa pataa
sulagtii dhuup tapte pattharo.n ke siine par
kabhii milaa na milegaa kisii kaa naqsh-e-paa

Ali Abbas Ummeed

Nazm

ai watan

naqsh-e-paa teraa rahaa manzil-numaa tahziib kaa
raahat-e-arz-o-samaa pinhaa.n tirii manzil me.n hai

Akhtar Husain Shaafi

Nazm

ek ghair-alamti nazm

adhuurii la.Dkiyo
tum apne kamro.n me.n puraane saal ke bosiida calender sajaa kar sochtii ho
ye badan umro.n kii saazish me.n na aa.e.nge
tumhe.n kis ne bataayaa hai
gha.Dii kii suu.iyo.n ko rokne se dau.Dtaa aur haa.nptaa suuraj misaal-e-naqsh-e-paa
aflaak par jam jaa.egaa
tumhe.n ma.aluum hai uryaaniyo.n ko Dhaa.np kar tum aur uryaa.n ho rahii ho
roz in aa.nkho.n kii tik.Dii me.n tumhaare jism tulte hai.n
har ik shab hostel me.n taash kii baazii me.n tum ko jiit kar ik jashn hotaa hai
hamaarii KHvaab-gaaho.n me.n tumhaare KHvaab raushan hai.n
chalii aa.o
ki baahar barf hai
aur ab hame.n tum se judaa bistar kahaa.n tasliim karte hai.n
chalii aa.o ki umre.n raa.egaa.n hone se bach jaa.e.n!

Jawayd Anwar

Nazm

haarun ki aawaz

dekho abhii hai vaadii-e-kan.aa.n nigaah me.n
taaza har ek naqsh-e-kaf-e-paa hai raah me.n
yaaquub be-basar sahii yuusuf kii chaah me.n
lahraa rahaa hai aaj bhii turra kulaah me.n

Himayat Ali Shayar

Nazm

gum-shuda

dekho
vo bhuuraa dasht-e-imkaa.n
duur tak phailaa hu.aa hai
saamne hadd-e-nazar tak
gahrii taariikii kii naagan raqs-farmaa hai
bikhartii ret par
ko.ii bhii naqsh-e-paa nahii.n hai

Abrar Azmi

Nazm

tajassus

mai.n haatho.n me.n le kar tajassus ki mish.al
bahut duur pahu.nchaa sitaaro.n se aage
mirii rahguzar kahkashaa.n ban ke chamkii
mare saath aa.ii ufuq ke kinaare
mire naqsh-e-paa ban ga.e chaa.nd suuraj
bha.Dakte rahe aarzuu ke sharaare

Rifat Sarosh

Nazm

pir-e-tasma-e-pa

mere kaa.ndhe pe baiThaa ko.ii
pa.Dhtaa rahtaa hai injiil o qur.aan o ved
makkhiyaa.n kaan me.n bhinbhinaatii hai.n
zaKHmii hai.n kaan
apnii aavaaz kaise sunuu.n
raanaa hinduu thaa akbar musalmaan thaa
sanjai vo pahlaa insaan thaa
hastinaapur me.n jis ne qabl-e-masiih
television banaayaa
aur ghar baiThe ik andhe raaja ko
yudh kaa tamaasha dikhaayaa
aadmii chaa.nd par aaj utraa to kyaa
ye taraqqii nahii.n
ab se pahle, bahut pahle
jab zarra TuuTaa na thaa
chashma jauhar kaa phuuTaa na thaa
farsh se arsh tak jaa chukaa hai ko.ii
ye aur aisii bahut sii jahaalat kii baate.n
mere kaa.ndhe pe hotii hai.n

Kaifi Azmi

Nazm

ek nazm

mai.n sard-mehr zindagii se kyaa talab karuu.n
talab to ek bahr hai
zindagii to saa.ns kii lapaktii ek lahar hai
jo aa ke phir guzar ga.ii
chand saal us ke naqsh-e-paa
yahii.n kahii.n kisii ke zehn me.n rahe

Anees Nagi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now