Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "roGan"

Nazm MATCHES FOR "roGan"

Nazm

hasan kuza-gar (1)

jahaan-zaad niiche galii me.n tire dar ke aage
ye mai.n soKHtaa-sar hasan-kuuzaa-gar huu.n!
tujhe sub.h baazaar me.n buu.Dhe attaar yuusuf
kii dukkaan par mai.n ne dekhaa
to terii nigaaho.n me.n vo taabnaakii
thii mai.n jis kii hasrat me.n nau saal diivaana phirtaa rahaa huu.n
jahaa.n-zaad nau saal diivaana phirtaa rahaa huu.n!
ye vo daur thaa jis me.n mai.n ne
kabhii apne ranjuur kuuzo.n kii jaanib
palaT kar na dekhaa
vo kuuze mere dast-e-chaabuk ke putle
gil-o-ra.ng-o-roGan kii maKHluuq-e-be-jaa.n
vo sar-goshiy.n me.n ye kahte
hasan kuuza-gar ab kahaa.n hai?
vo ham se KHud apne amal se
KHudaa-vand ban kar KHudaa.o.n ke maanind hai ruu-e-gardaa.n!
jahaa.n-zaad nau saal kaa daur yuu.n mujh pe guzraa
ki jaise kisii shahr-e-madfuun par vaqt guzre
taGaaro.n me.n miTTii
kabhii jis kii KHushbuu se vaarafta hotaa thaa mai.n
sa.ng-basta pa.Dii thii
suraahii-o-miinaa-o-jaam-o-subuu aur faanuus o gul-daa.n
mirii hech-maayaa ma.iishat ke iz.haar-e-fan ke sahaare
shikasta pa.De the
mai.n KHud mai.n hasan kuuza-gar paa-ba-gil KHaak-bar-sar barhana
sar-e-chaak zholiidaa-muu sar-ba-zaanuu
kisii Gam-zada devtaa kii tarah vaahima ke
gil-o-laa se KHvaabo.n ke sayyaal kuuze banaataa rahaa thaa
jahaa.n-zaad nau saal pahle
tuu naadaa.n thii lekin tujhe ye KHabar thii
ki mai.n ne hasan kuuza-gar ne
tirii qaaf kii sii ufuq-taab aa.nkho.n
me.n dekhii hai vo taabnaakii
ki jis se mere jism o jaa.n abr o mahtaab kaa
rah-guzar ban ga.e the
jahaa.n-zaad baGdaad kii KHvaab-guu.n raat
vo ruud-e-dajlaa kaa saahil
vo kashtii vo mallaah kii band aa.nkhe.n
kisii KHasta-jaa.n ra.nj-bar kuuza-gar ke liye
ek hii raat vo kohrbaa thii
ki jis se abhii tak hai paivast us kaa vajuud
us kii jaa.n us kaa paikar
magar ek hii raat kaa zauq dariyaa kii vo lahr niklaa
hasan kuuza-gar jis me.n Duubaa to ubhraa nahii.n hai!

Noon Meem Rashid
Nazm

hasan kuza-gar (4)

jahaa.n-zaad kaise hazaaro.n baras ba.ad
ik shahr-e-madfuun kii har galii me.n
mere jaam o miinaa o gul-daa.n ke reze mile hai.n
ki jaise vo is shahr-e-barbaad kaa haafiza ho.n
hasan naam kaa ik javaa.n kuuza-gar ik na.e shahr me.n
apne kuuze banaataa hu.aa ishq kartaa hu.aa
apne maazii ke taaro.n me.n ham se piroyaa gayaa hai
hamii.n me.n ki jaise hamii.n ho.n samoyaa gayaa hai
ki ham tum vo baarish ke qatre the jo raat bhar se
hazaaro.n baras re.ngtii raat bhar
ik dariiche ke shiisho.n pe girte hu.e saa.np lahre.n
banaate rahe hai.n
aur ab is jagah vaqt kii sub.h hone se pahle
ye ham aur ye naujavaa.n kuuza-gar
ek ruuyaa me.n phir se piro.e ga.e hai.n
jahaa.n-zaad
ye kaisaa kohna-parasto.n kaa amboh
kuuzo.n kii laasho.n me.n utraa hai
dekho
ye vo log hai.n jin kii aa.nkhe.n
kabhii jaam o miinaa kii lim tak na pahu.nchii.n
yahii aaj is rang o roGan kii maKHluuq-e-be-jaa.n
ko phir se ulaTne palaTne lage hai.n
ye un ke tale Gam kii chi.ngaariyaa.n paa sake.nge
jo taariiKH ko khaa ga.ii thii.n
vo tuufaan vo aa.ndhiyaa.n paa sake.nge
jo har chiiKH ko khaa ga.ii thii.n
unhe.n kyaa KHabar kis dhanak se mere rang aa.e
mere aur is naujavaa.n kuuza-gar ke
unhe.n kyaa KHabar kaun sii titliyo.n ke paro.n se
unhe.n kyaa KHabar kaun se husn se
kaun sii zaat se kis KHadd-o-KHaal se
mai.n ne kuuzo.n ke chehre utaare
ye sab log apne asiiro.n me.n hai.n
zamaana jahaa.n-zaad afsuu.n-zada burj hai
aur ye log us ke asiiro.n me.n hai.n
javaa.n kuuza-gar ha.ns rahaa hai
ye maasuum vahshii ki apne hii qaamat se zholiida-daaman
hai.n juuyaa kisii azmat-e-naa-rasaa ke
unhe.n kyaa KHabar kaisaa aaseb-e-mubram mere Gaar siine pe thaa
jis ne mujh se aur us kuuza-gar se kahaa
ai hasan kuuza-gar jaag
dard-e-risaalat kaa roz-e-bashaarat tire jaam o miinaa
kii tishna-labii tak pahu.nchne lagaa hai
yahii vo nidaa ke piichhe hasan naam kaa
ye javaa.n kuuza-gar bhii
pyaape ravaa.n hai zamaa.n se zamaa.n tak
KHizaa.n se KHizaa.n tak

Noon Meem Rashid
Nazm

zindagi

zindagii kahne ko be-maaya sahii
Gam kaa sarmaaya sahii
mai.n ne is ke liye kyaa kyaa na kiyaa
kabhii aasaanii se ik saa.ns bhii yamraaj ko apnaa na diyaa
aaj se pahle bahut pahle
isii aa.ngan me.n
dhuup-bhare daaman me.n
mai.n kha.Daa thaa mire talvo.n se dhu.aa.n uThtaa thaa
ek be-naam saa be-ra.ng saa KHauf
kachche ehsaas pe chhaayaa thaa ki jal jaa.uu.ngaa
mai.n pighal jaa.uu.ngaa
aur pighal kar miraa kamzor saa ''mai.n''
qatra qatra mire maathe se Tapak jaa.egaa
ro rahaa thaa magar ashko.n ke baGair
chiiKHtaa thaa magar aavaaz na thii
maut lahraatii thii sau shaklo.n me.n
mai.n ne har shakl ko ghabraa ke KHudaa maan liyaa
kaaT ke rakh diye sandal ke pur-asraar daraKHt
aur patthar se nikaalaa sho.ala
aur raushan kiyaa apne se ba.Daa ek alaav
jaanvar zab.h kiye itne ki KHuu.n kii lahre.n
paa.nv se uTh ke kamar tak aa.ii.n
aur kamar se mire sar tak aa.ii.n

Kaifi Azmi
Nazm

ban-bas

mere shahr ke saare raste band hai.n logo
mai.n is shahr kaa naGma-gar
jo do ik mausam Gurbat ke dukh jhel ke aayaa
taaki apne ghar kii diivaaro.n se
apnii thakii hu.ii aur tarsii hu.ii
aa.nkhe.n sahlaa.uu.n
apne darvaaze ke utarte roGan ko
apne ashko.n se saiqal kar luu.n
apne chaman ke jale hu.e paudo.n
aur gard-aaluud daraKHto.n kii
murda shaaKHo.n par bain karuu.n
har mahjuur sutuun ko itnaa TuuT ke chuumuu.n
mere labo.n ke KHuun se
un ke naqsh-o-nigaar sabhii jii uThe.n
galii ke logo.n ko itnaa dekhuu.n
itnaa dekhuu.n
merii aa.nkhe.n
barso.n kii tarsii hu.ii aa.nkhe.n
chehro.n ke aa.ngan ban jaa.e.n
phir mai.n apnaa saaz uThaa.uu.n
aa.nsu.o.n aur muskaano.n se jhilmil jhilmil
nazme.n Gazle.n giit sunaa.uu.n
apne pyaaro.n
dard ke maaro.n kaa darmaa.n ban jaa.uu.n
lekin mere shahr ke saare rasto.n par
ab baa.D hai lohe ke kaa.nTo.n kii
shah darvaaze par kuchh pahre-daar kha.De hai.n
jo mujh se aur mujh jaise dil vaalo.n kii
pahchaan se aarii
mere saaz se
sa.ngiino.n se baat kare.n
mai.n un se kahtaa huu.n
dekho
mai.n is shahr kaa naGma-gar huu.n
barso.n baa'd ka.Dii raaho.n kii
saarii aziyyat jhel ke ab vaapas aayaa huu.n
us miTTii kii KHaatir
jis kii KHushbu.e.n
duniyaa bhar kii do-shiizaa.o.n ke jismo.n kii mahko.n se
aur saare jahaa.n ke
sabhii gulaabo.n se
ba.Dh kar hai
mujh ko shahr me.n
mere shahr me.n jaane do
lekin tane hu.e nezo.n ne
mere jism ko yuu.n barmaayaa
mere saaz ko yuu.n rezaayaa
meraa humaktaa KHuun aur mere sisakte naGme
shah-darvaaze kii dahliiz se
riste riste
shahr ke andar jaa pahu.nche hai.n
aur mai.n apne jism kaa malba
saaz kaa laasha
apne shahr ke shah-darvaaze
kii dahliiz pe chho.D ke
phir anjaane shahro.n kii shahraaho.n par
majbuur-e-safar huu.n
jin ko taj kar ghar aayaa thaa
jin ko taj kar ghar aayaa thaa

Ahmad Faraz
Nazm

tujhe KHud se alag kaise karun main

rago.n me.n ab ''merii teraa lahuu hai
mirii suurat bhii tujh sii huu-ba-huu hai
bahut arse se KHud me.n mai.n huu.n Gaa.eb
saraapaa jism me.n ab tuu hii tuu hai
makaa.n huu.n mai.n tuu baam-o-dar hai meraa
tuu KHadd-o-KHaal hai paikar hai meraa
ye tere ishq kaa har suu asar hai
jamaal-o-ra.ng sab behtar hai meraa
vajuud aksar mai.n apnaa bhuultaa huu.n
bharam me.n tere KHud ko chuumtaa huu.n
tirii vahshat me.n hii paa.nv sukuu.n mai.n
tujhe KHud se alag kaise karuu.n mai.n

Chandra Shekhar Varma
Nazm

abu-lahab ki shadi

shab-e-zafaaf-e-abuu-lahab thii magar KHudaayaa vo kaisii shab thii
abuu-lahab kii dulhan jab aa.ii to sar pe ii.ndhan gale me.n
saa.npo.n ke haar laa.ii na us ko mashshaatgii se matlab
na maa.ng Gaaza na rang roGan gale me.n saa.npo.n
ke haar us ke to sar pe ii.ndhan
KHudaayaa kaisii shab-e-zafaaf-e-abuu-lahab thii

Noon Meem Rashid
Nazm

shafaq

roz saahil pe kha.De ho ke yahii dekhaa hai
shaam kaa pighlaa hu.aa surKH sunahrii roGan
roz maTiyaale se paanii me.n ye ghul jaataa hai

Gulzar
Nazm

jahan zad

ai hasan kuuza-gar
tuu ne jaanaa ki mai.n
jism-o-jaa.n ke ta'alluq kii raushan guzargaah se
ik jahaa.n kaa safar jhel kar us
rifaaqat kii dahliiz tak aa.ii huu.n

Ishrat Afreen
Nazm

nae sur ki tamsil

kaamanii KHvaab kii lau me.n ha.nstii hu.ii kaamanii
sola baras kii taqviim me.n fasl-e-gul kaa ko.ii tazkira
tak na thaa
mai.n ne battiis battiis jha.D rute.n kaaT dii.n
ab jo tamsiil ke ek vaqfe me.n tum se milaa huu.n
to saa.nso.n me.n nam chaal me.n un zamaano.n kaa rum
jii uThaa hai
jo ahd-e-zamistaa.n me.n yaKH the
saqar saa saqar
kaamanii KHanda-e-gul kii kul zindagii
ek gulchii.n kii vahshat bharii aa.nkh hai
ye chaTaknaa ye khulnaa
bahut sehar-aavar sahii jaagne aur sone me.n ik
KHvaab-e-mauhuum se kuchh ziyaada nahii.n
KHvaab-o-KHvaahish ajab silsila hai
bahut duur bahtii hu.ii aabshaaro.n kaa ik silsila
jis me.n koh-e-tazabzub kii KHushbuu bhii hai
ahd-o-paimaa.n kaa jaaduu bhii
KHuu.n se suro.n tak
suro.n se us ik lafz tak
jis me.n raago.n kaa jauhar ba.ndhaa hai
kahii.n aimanii ras kahii.n maarvaa ThaaTh bhageshirii
bhairvii.n aur pahaa.Dii
vo sab kuchh jo apne lahuu me.n dahaktaa chahaktaa hai
jis ke tanaazur me.n ham biist-o-shash-saal
pahle ba.ndhe the
unhii aabshaaro.n se mujh ko sadaa aa rahii hai
so mai.n jaa rahaa huu.n
na.e sur uThaane
ki sargam kii farsuudgii diida-o-dil bujhaane lagii hai
nayaa sur jise lafz tartiib dete hai.n
pahu.nche to jaano ki saan.e.a ke lafzo.n se uThtii namii tum
tak aa.ii

Akhtar Usman
Nazm

diwali

dosto kyaa kyaa divaalii me.n nashaat-o-aish hai
sab muhayyaa hai jo is ha.ngaam ke shaayaan hai
is tarah hai.n kuucha-o-baazaar par naqsh-o-nigaar
ho ayaa.n husn-e-nigaarisataa.n kii jin se KHuub re
garm-joshii apnii baa-jaam-e-charaaGaa.n lutf se
kyaa hii raushan kar rahii hai har taraf roGan kii mai
maa.il-e-sair-e-charaaGaa.n naKHl har jaa dam-ba-dam
haasil-e-nazzaaraa husn-e-sham-e-ruuyaa.n pai-ba-pai
aashiqaa.n kahte hai.n maashuuqo.n se baa-ijz-o-niyaaz
hai agar manzuur kuchh lenaa to haazir hai.n ruupe
gar mukarrar arz karte hai.n to kahte hai.n vo shoKH
ham se lete ho miyaa.n takraar-o-hujjat taa-ba-kai
kahte hai.n ahl-e-qimaar aap me.n garm iKHtilaat
ham to Dab me.n sau rupe rakhte hai.n tum rakhte ho kai
jiit kaa pa.Dtaa hai jis kaa daano.n vo kahtaa hai yuu.n
suu-e-dast-e-raast hai mere ko.ii farKHanda-pai
hai dasahre me.n bhii yuu.n go farhat-o-ziinat 'naziir'
par diivaalii bhii ajab paakiiza-tar tyauhaar hai

Nazeer Akbarabadi
Nazm

accident

mujh se roz yahii kahtaa hai pakkii sa.Dak par vo kaalaa saa daaG jo kuchh din pahle
surKH lahuu kaa thaa ik chhii.nTaa chiknaa giilaa chamkiilaa chamkiilaa
miTTii us pe girii aur mailii sii ik pii.Dhii us par se utrii
aur phir sinduurii saa ik KHaaka ubhraa
jo ab pakkii sa.Dak par kaalaa saa dhabba hai
pisii hu.ii bajrii me.n jazb aur jaamid an-miT
mujh se roz yahii kahtaa hai pakkii sa.Dak par maslaa hu.aa vo daaG lahuu kaa
mai.n ne to pahlii baar us din
apnii ra.ng-bira.ngii qaasho.n vaalii ge.nd ke piichhe
yuu.n hii zaraa ik jast-bharii thii
abhii to meraa roGan bhii kachchhaa thaa
kis ne u.nDel diyaa yuu.n mujh ko is miTTii par
uu.n uu.n mai.n nahii.n miTtaa mai.n to huu.n ab bhii huu.n
mai.n ye sun kar Dar jaataa huu.n
kaalii bajrii ke roGan me.n jiine vaale is ma.asuum lahuu kii kaun sunegaa
mamtaa bik bhii chukii hai chand Tako.n me.n
qaanuun aa.nkhe.n miiche hu.e hai
qaatil pahiye be-pahraa hai.n

Majeed Amjad
Nazm

shararat

ik baks kahii.n se laa.e.nge roGan se use chamkaa.e.nge
ik Dabbe me.n baasii phulko.n kaa ik ambaar lagaa.e.nge
la.Dko.n se kahe.nge aa.o gramophone phone tumhe.n sunvaa.e.nge
sanduuq aur Dabbaa khol ke phir naache.nge shor machaa.e.nge
aaj apne har ham-jolii ko ham ulluu KHuub banaa.e.nge

Ahmad Nadeem Qasmi
Nazm

jahan-zad

ai hasan-kuuzaa-gar
tuu ne jaanaa ki mai.n
jism-o-jaa.n ke ta'alluq kii raushan guzargaah se
ik jahaa.n kaa safar jhel kar
is rifaaqat kii dahliiz tak aa.ii huu.n
ai hasan kaash tuu jaan saktaa
ki is sahn-e-KHaana se dahliiz tak ke safar me.n
jahaa.n-zaad ko kyo.n zamaane lage hai.n
hasan
is safar me.n jahaa.n-zaad ko ek ik gaam par
vaqt ke taaziyaane lage hai.n
hasan
vaqt maalik bhii hai devtaa bhii
muhaafiz bhii hai aur KHvaaja-saraa bhii
ye dekhaa hai mai.n ne
ki jab bhii dariicho.n me.n taaza shaguufa khilaa hai
havaa se vo ha.ns kar zaraa saa gale bhii milaa hai
to KHvaaja-saraa kii nazar se kahaa.n bach sakaa hai
magar dekh mujh ko
ki mai.n ne yahaa.n Thiik nau saal tak
phuul kaa.Dhe hai.n KHvaabo.n ke bistar pe lekin
abhii tak ko.ii in pe soyaa nahii.n
phuul taaza shagufta aur aazurda hai.n
mai.n ne nau saal suurat-garii kii hai tere har ik lams kii
raat bhar mai.n ne aa.nkhe.n bhigo.ii hai.n kuuzo.n me.n aur sub.h-dam
halq ko tar kiyaa aa.nsu.o.n se bahut
ye masaafat
ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai
nigaahe.n uThaa
dekh to mai.n jahaa.n-zaad terii tire saamne huu.n
magar tuu ne sach hii kahaa thaa
zamaana jahaa.n-zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n
so ab ham jo sadiyo.n kii lambii masaafat se lauTe hai.n
tuu apne ranjuur kuuzo.n me.n juujhaa hu.aa hai
ye teraa qusuur aur na merii KHataa hai
ko.ii kuuza-gar to hamaaraa bhii hogaa
so ye us kii hikmat
ki us ne hame.n chaak par Dhaalte vaqt
lamho.n kaa pher is nazaakat se rakkhaa
ki ham apnii apnii jagah sirf shashdar kha.De the
ka.ii dast-e-chaabuk ke be-jaan putle
mire aur tire darmiyaa.n saj ga.e the
so ye us kii hikmat
magar vaqt is darja saffaak kyo.n hai
ye mashshaata-e-zindagii itnii chaalaak kyo.n hai
mire aur tire darmiyaa.n nau baras jis ne laa kar bichhaa.e
ye nau saal kis tarh mai.n ne bitaa.e
ki saahil se kashtii tak aate hu.e
jaise taKHte ke hamraah dil Dagmagaa.e
vahii nau baras
jo mire aur tire darmiyaa.n vaqt kii kirchiyaa.n hai.n
zamaana bhii kaisii 'ajab kahkashaa.n hai
ye duniyaa-e-sayyaargaa.n hai ki jis me.n
hazaaro.n kavaakib
musalsal kisii chaak par ghuumte hai.n
ye ajsaam ke gird ajsaam kaa raqs hii zindagii hai mirii jaa.n
mirii jaan tuu chaak ke saath miTTii ke rishte ko pahchaantaa thaa
hasan tuu ne miTTii ke be-jaan putlo.n se
taKHliiq ke jaa.n-gusil marhalo.n me.n
sadaa guftuguu
sau tarah guftuguu kii
zihaanat ke putle mohabbat ke KHaaliq
faqat ye bataa de
ki tere 'anaasir ke ajzaa-e-tarkiibii me.n
vaahima kaise aayaa
hasan tuu vahaa.n jho.npa.De me.n
akelaa gale mil ke royaa thaa kis se
labiib aur tuu aur mai.n
aur haqiiqat me.n ko.ii nahii.n thaa
tiraa vaahima
mere lab mere gesuu se lipTaa rahaa thaa
labiib ek saayaa
jise tuu ne rog apnii jaa.n kaa banaayaa
ye saayaa kahii.n gar haqiiqat bhii hotaa
to aaKHir ko tuu is haqiiqat se kyo.n be-KHabar thaa
ki har jism ke saath ik aaftaab aur mahtaab laazim
ye tasliis qaa.em hai qaa.em rahegii
hasan mai.n tire saamne aa.ina thii
tire hijr aur vasl kaa aa.ina
inhimaak-o-ta'alluq kii miTTii se guu.ndhe hu.e jism ko
terii aa.nkho.n kii hiddat ne chamkaayaa thaa
terii KHalvat kii hairat ne vo rang-o-roGan kiye the
ki aa.iine shashdar kha.De rah ga.e the
magar terii KHalvat kii hairat me.n vahshat kaa jo shaa.iba thaa
nigaaho.n se merii kahaa.n chhup sakaa thaa
mire aur tire darmiyaa.n vasl kii har gha.Dii me.n
na jaane kahaa.n se
vahii soKHta-baKHt terii
ki jo jaa.n-fishaanii ke sho'lo.n se dahke hu.e
zindagii ke abad-taab tannuur par
u.ngliyaa.n tere bachcho.n kii thaame kha.Dii
bhuuk se barsar-e-jang thii
jis ke nazdiik ye
tere kuuze tiraa fan tirii aag sab
merii aa.nkhe.n mire phuul aur KHvaab sab
zindagii ke abad-taab tannuur kii raakh the
terii is soKHta-baKHt ko kyaa KHabar
jab zamii.n apne mehvar kii tajdiid me.n
harf-e-laa se guzar jaa.egii
to hazaaro.n baras baa'd bhii
ye azal ke gharo.ndo.n kii miTTii me.n madfuun
phuul aur buuTe ye kuuze
aur un me.n unhii qaaf aa.nkho.n se chhalke hu.e
surKH paanii kii talchhaT
kisii kuuza-gar ke javaa.n lams se jii uThe to
jahaa.n-zaad us ke liye phir janam legii
aur nau baras raqs karte guzar jaa.e.nge
terii is soKHta-baKHt ko kyaa KHabar
vo raat
vo halab kii kaarvaa.n-saraa kaa hauz
jis ko mai.n ne jism-o-jaa.n kii KHushbu.e.n kashiid kar ke
qatra-qatra nau baras me.n aa.nsu.o.n se pur kiyaa
vo ek raat sirf ek raat me.n
tamaam KHushk ho gayaa
ham apne vasl kii tamaazato.n me.n aise jal-bujhe
ki raakh tak nahii.n bachii
ye ek jaa.n kii tishnagii
mujhe tujhe ba-yak-zamaa.n
bhalaa kahaa.n kahaa.n na khii.nchtii phirii
magar ye tuu ne kyaa kahaa
ki tere jaisii 'aurate.n jahaan-zaad
aisii uljhane.n hai.n jin ko aaj tak ko.ii nahii.n suljhaa sakaa
ki 'aurato.n kii saaKHt hai vo tanz apne aap par
javaab jin kaa ham nahii.n
to phir ye jaam-o-miinaa-o-subuu-o-hauz-o-ruud-e-niil
is zamii.n kii god me.n
azal ke harf-giir taabnaak KHvaab ke liye
kahii.n bhii kuchh raqam nahii.n
ai hasan
chaak par se zaraa apnii nazre.n haTaa
tuu mire nau baras tak banaa.e ga.e phuul to dekh le
phuul taaza shagufta aur aazurda hai.n
yuu.n na ho ki inhe.n
bhuuk aur muflisii ke sataa.e hu.e
mere bachche bhii niilaam kar aa.e.n jaa kar kahii.n
tere kuuzo.n ke maanind baGdaad me.n
ai hasan
daaman-e-vaqt par jitne phuul aur buuTe saje hai.n
jahaa.n-zaad kii zaKHmii poro.n ne
rang un me.n apne junuu.n ke bhare hai.n
ye taavaan hai.n champa.ii u.ngliyo.n kaa
tire jaam-o-miinaa pe
jis KHaal-o-KHad kii nazaakat kii parchhaa.iiyaa.n thii.n
tujhe kyaa KHabar ye kin aa.nkho.n kii biinaa.iyaa.n thii.n
hasan ye mohabbat
ki jis ko tirii soKHta-baKHt gardaantii hai
amiiro.n kii baazii
to mere ta.ii.n ye amiiro.n kii baazii kahaa.n
sirf baaziigarii thii
mohabbat hamesha se muflis kaa sarmaaya-e-jaa.n rahii hai
yahii to vo puu.njii hai
jis tak amiiro.n ke haath ab bhii pahu.nche nahii.n hai.n
tujhe ye gumaa.n thaa
ki 'aurat mohabbat kii baazii me.n be-jaan patte kii suurat
kisii dast-e-chaabuk kii marhuun-e-minnat
vo is khel me.n ek mohre kii suurat
ki jab jis ne chaahaa
ise ek ghar se uThaa kar
kisii duusre ghar kaa maalik banaayaa
ki 'aurat faqat ek patthar kii muurat
ye tasviir-e-hairat
yuu.nhii chup kha.Dii hai
yuu.nhii chup rahegii
magar yuu.n nahii.n hai
hasan tuu ne dekhaa
ki mai.n qaid-e-auhaam o band-e-rivaayaat me.n
buu.Dhe 'attaar yuusuf kii dukkaan par
apnii aa.nkhe.n tujhe nazr kartii rahii
buu.Dhaa 'attaar vo kiimiyaa-gar
ki jis ne zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan
mere ek ik dariiche pe
kohna rivaayaat o zaalim 'aqaa.ed kaa jangal ugaa thaa
hasan
kaash tuu merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke
kaT kaT ke girtaa rahaa thaa

Ishrat Afreen
Nazm

mushkil

KHudaa ko yaad kartaa huu.n to maa.n kii yaad aatii hai
abhii azalo.n se gardaa.n chaak kii miTTii kaa nam aa.ankho.n me.n raushan thaa ki mai.n ne maa.n ko dekhaa thaa
mujhe muskaan kaa pahlaa sahiifa yaad hai ab tak
ki dil jis kii tilaavat se sakuu.n ke ghuu.nT bhartaa thaa
ki jis kii lau, agarche vo na sharqii thii na Garbii thii
magar do nain ke billor me.n kuchh yuu.n bha.Daktii thii
ki mere sharq o Garb ik nuur ke haale me.n aiman the
(KHudaa gar nuur hai to maa.n kii aa.ankho.n ke sivaa kin taaqcho.n ko zeb detaa hai)
KHudaa gar radd na kar detaa to mai.n aa.ankho.n se zau kartii isii lau kii qasam khaataa
mohabbat ke muqaddas roGan-e-zaituu.n se jo KHud me.n bha.Daktii thii
mujhe bhuulaa nahii.n ab tak
vo pahlaa lams jis se merii qismat kii lakiiro.n me.n abhii tak taabnaakii hai
mohabbat kaa vo jibraa.iil mujh se baat kartaa thaa to mai.n sarshaar hotaa thaa
mai.n Dartaa huu.n KHudaa ke rizq kaa kufraan karne se
magar vo chaashnii jo rizq me.n us lams kii shirkat se thii ab KHvaab lagtii hai
so maa.n ke baa'd ik gambhiir mushkil me.n pa.Daa huu.n mai.n
kuchh aisaa hai ki mujh ko rabt kuchh baaqii nahii.n ab nuuriyaan-e-lams-o-KHanda kii hikaayat se
so mai.n ab lams o KHanda ke sahiifo.n ke binaa aajiz huu.n rab ko bhii samajhne se
kuchh aisaa hai
ki jaise mai.n kisii bhuulii hu.ii ummat ke ik matruuk maabad me.n abas fariyaad kartaa huu.n
KHudaa ko yaad kartaa huu.n

Bilal Ahmad
Nazm

apni apni raushni

vaise us taariik jangal ke safar ke qabl bhii
haath me.n us ke
yahii ik TimTimaataa kaa.nptaa nanhaa diyaa thaa
kuchh to shohrat kii havas ne
aur kuchh ahmaq bahii-KHvaaho.n ne
is kii saada-lauhii ko sazaa dii
us ke tiflaana iraada ko havaa dii
laa ke sarhad par KHudaa-haafiz kahaa
us ke KHizaab-aaluuda sar ko ye sa.aadat dii
dhu.aa.n khaa.ii hu.ii
bad-ra.ng dastaar-e-qayaadat dii
to vo siina phulaa.e
apnii dastaar-e-qayaamat ko sambhaale
kaa.npte nanhe diye ko
ek mash.al kii tarah uu.nchaa uThaa.e
chal pa.Daa thaa
Gaaliban vo do-qadam hii jaa sakaa hogaa
ki piilii aa.ndhiyo.n ne
dast-e-larzaa.n me.n larazte us diye ko
naza.a kii hichkii ataa kii
us pe teraa
chhiin lii dastaar us kii
us ne aaGaaz-e-safar kii saarii KHush-fahmii
bikhartii dekh kar
jab lauTnaa chaahaa
to ye mumkin nahii.n thaa
har taraf taariikiyaa.n thii.n
daf.atan kuchh duur piichhe
us ne dekhaa
aasmaa.n se baat kartii dhuul kii diivaar
ba.Dhtii aa rahii hai
aur kuchh qurbat hu.ii to us ne dekhaa
vo ka.ii the
un ke haatho.n me.n bha.Daktii mish.ale.n thii.n
kaasa-e-namnaak se us ne
Garaz kii gandagii
jo us ko fitrat me.n milii thii
po.nchh Daalii
aur fauran Gaaza-e-maasuum
ye us kii aadat ban chukii thii
apne chehre par cha.Dhaayaa
ek hii maqsad thaa ya.anii
dhuul u.Daate qaafile se
ek mash.al le sake vo
Gaaza-e-maasuumiyat phir kaam aayaa
qaafila vaalo.n ne us ko
ek mash.al de ke
apne saath chalne ko kahaa
lekin kahaa.n tak
vo nihaayat tez-rau aur yak-qadam the
us ke naaz paa.o.n
suukhii haDDiyo.n ke zor par kyaa saath dete
ek qadam yaa do-qadam
phir thak gayaa vo
rafta rafta
us kii vo maa.ngii hu.ii mash.al
KHud apne ra.ng-o-roGan khaa rahii thii
ab faqat bhe.nchii hu.ii mohtaat muTThii me.n
a.ndhere kii chha.Dii thii
baad-o-baaraa.n tez tuufaa.n
zehn-e-tiflak me.n safar ke qabl
un dushvaariyo.n kaa
ek halkaa saa tasavvur bhii nahii.n thaa
ab jo ye bar-aks suurat ho ga.ii thii
ro pa.Daa vo
us kii paspaa.ii me.n lekin hausla thaa
daaman-e-ummiid ab bhii haath me.n thaa
daf.atan us ne ye dekhaa
dhundlii gahrii raushniyo.n ke ka.ii haalo.n me.n
kuchh ba.Dhte qadam nazdiik hote jaa rahe the
un ke ho.nTo.n se KHamoshii chhin rahii thii
sust-rau the
phir bhii un kii chaal me.n ik tamkanat thii
us ne sochaa
un na.e logo.n kii tarah tez nahii.n hai
un kii hamraahii me.n
qadmo.n kii naqaahat be-asar hai
aur manzil ek sa.ii-e-muKHtasar hai
ik na.ii ummiid le kar
pusht par murda diye taariik mash.al ko chhupaa kar
guftuguu me.n maslahat aamez narmii ghol kar
us ne na.e logo.n se ik mash.al talab kii

Zaheer Siddiqui
Nazm

apne dil ki shahzadi

lekin rangiin tasavvur se kab zulf-e-shauq sa.nvartii hai
tadbiir ke sundar sapno.n par taqdiir tabassum kartii hai
tuu aish-o-tarab kii parvarda mujh par bad-baKHtii kaa saaya
tuu hai ik duKHtar-e-ahl-e-zar mai.n huu.n ik shaa.ir-e-be-maaya
mere liye ik TuuTaa chhappar KHud apnii musalsal mehnat kaa
tere liye ik piilii koThii aa.iina saraapaa rishvat kaa
teraa kaashaana hotaa hai bijlii ke taaro.n se raushan
aur mere taaq me.n rakkhaa hai bas ek charaaG-e-be-roGan
tujh ko hai shikaayat phuulo.n ke bistar par nii.nd na aane kii
aur kankriilii sa.Dko.n par bhii aadat hai mirii so jaane kii
tere to dastarKHvaan pe hai har ik ne.amat kii arzaanii
mai.n kuchh suukhe Tuk.De khaa kar pii letaa huu.n tho.Daa paanii
tuu aksar naa-KHush rahtii hai resham atlas baanaat me.n bhii
mai.n ek phaTe kurte me.n KHush jaa.Daa garmii barsaat me.n bhii
terii to daulat ke baa.is begaane tujhe apnaate hai.n
aur merii Gurbat ke baa.is apne bhii mujhe Thukraate hai.n
terii qismat me.n sab kuchh hai ashko.n ke sivaa ai maah-jabii.n
merii qismat me.n shaayad hai ashko.n ke sivaa aur kuchh bhii nahii.n
kis tarah 'salaam' mai.n to.Duu.n phir tafriiq kii in diivaaro.n ko
zarre kaise paa sakte hai.n aflaak ke uu.nche taaro.n ko
ai kaash kisii suurat palla dono.n kaa baraabar ho jaataa
yaa tuu hii muflis ho jaatii yaa mai.n hii tavangar ho jaataa

Salam Sandelvi
Nazm

main nahin hun magar

mai.n nahii.n huu.n magar
ab bhii khilte hai.n khi.Dkii ke daa.e.n taraf
phuul bal khaa.ii uljhii hu.ii bel par
zindagii ke kisii faisle kii
gha.Dii se ulajhte hu.e
mai.n khurachtaa rahaa thaa ye roGan
jamii hai yahaa.n aaj tak
nanhe dhabbe me.n ik
be-kalii mere ehsaas kii
aur qaaliin par
merii pyaalii se chhalkii hu.ii
chaa.e kaa ik puraanaa nishaa.n
ab bhii taktaa hai maTyaalii aa.nkho.n se
chhat kii taraf
aaj bhii hai.n pa.Dii shelf par
jo kitaabe.n KHariidii thii.n
mai.n ne bahut pyaar se
aaj bhii hai.n ju.De
kaaGazo.n ke hasii.n aa.iino.n me.n
mirii suukhii poro.n se phuuTe hu.e
kaale harfo.n ke chehre ajab shaan se
mai.n to hairaan huu.n
mujh se mansuub har ek shai
juu.n kii tuu.n hai to kyaa
ek mai.n hii thaa jo
ek mai.n hii thaa paanii ke
siine pe rakhaa hu.aa naqsh jo
pal do pal ko banaa aur miT bhii gayaa

Gulnaz Kausar
Nazm

sham

charKH-e-barii.n par chamke taare
be-roGan hai.n raushan saare

Munshi Jwala Parshad Barq
Nazm

world-bank

chalo aa.o
ham in jismo.n se
ek ik rag bhii khii.nche.n
aur rago.n ko wiring ke kaam me.n laa.e.n
phir in jismo.n ke sab a.azaa nicho.De.n
aur lahuu se is imaarat kaa
chamaktaa rang aur roGan banaa.e.n
imaarat jab mukammal ho chuke to
inhii.n jismo.n se kuchh ke maGz le kar
inhe.n sarmaa.e kii hiddat se pighlaa.e.n
asaase aur ba.Dh jaa.e.n

Harris Khalique
Nazm

dilip-kumar ki aaKHiri KHwahish

le chalo dosto
le chalo qissa-KHvaanii ke baazaar me.n
us mohalle KHudaa-daad kii ik shikasta galii ke muqaffal makaa.n me.n
ki muddat se viiraa.n ku.e.n kii zamii.n chaaTtii pyaas ko dekh kar apnii tishna-labii bhuul jaa.uu.n
GuTarGuu.n kii aavaaz Darbo.n se aatii hu.ii sun ke
koThe pe jaa.uu.n kabuutar u.Daa.uu.n
kisii baaG se KHushk mevo.n kii sauGaat le kar sadaa.e.n lagaa.uu.n
zabaano.n ke roGan ko zaituun ke zaa.iqe se milaa.uu.n
jamii sardiyo.n me.n galii ke usii taKHt par narm kirno.n se chehre pe surKHii sajaa.uu.n
ki yaaro.n kii un Toliyo.n me.n na.ii daastaane.n sunaa.uu.n
unhii paan-daano.n se laalii churaa.uu.n
mujhe un puraanii sii raaho.n me.n phir le chalo dosto
haa.n mujhe le chalo us basantii dulaarii madhu kii galii me.n
ki KHvaabo.n kii vo raushnii aaj bhii merii aa.nkho.n me.n aabaad hai
mere kaano.n me.n us ke tarannum kii ghanTii
sahiifo.n kii suurat utaarii ga.ii hai
sabhii ko bulaa.o ki naGma-saraa.ii kaa ye marhala aaKHirii hai
bulaa.o mire raaj ko
aaKHirii shab hai
phir se hasiino.n ke jhurmuT me.n bas aaKHirii ghuu.nT pii ke
fanaa ghaaTiyo.n me.n
mai.n yuu.n phail jaa.uu.n ki vaapas na aa.uu.n
suno dosto

Irfan Shahood
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now