Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "rokne"

Nazm MATCHES FOR "rokne"

Nazm

lahu nazr de rahi hai hayat

fasiil-e-aatish-o-aahan bahut buland sahii
badalte vaqt kii raftaar kaun rokegaa
na.e KHayaal kii parvaaz rokne vaalo
na.e avaam kii talvaar kaun rokegaa

Sahir Ludhianvi
Nazm

ajnabi

tujh se ik dard kaa rishta bhii hai bas pyaar nahii.n
apne aa.nchal pe mujhe ashk bahaa lene de
tuu jahaa.n jaatii hai jaa, rokne vaalaa mai.n kaun
apne raste me.n magar sham.a jalaa lene de

Kaifi Azmi
Nazm

shabab-e-gurezan

tire aasmaa.n kaa,
mai.n ik taaza vaarid sitaaraa sahii
jaantaa huu.n ki, is aasmaa.n par
bahut chaa.nd, suuraj, sitaare ubhar kar
jo ik baar Duube to ubhre nahii.n hai.n
faraamosh-gaarii ke niile ufuq se,
unhii kii tarah mai.n bhii
naa-tajarba-kaar insaa.n kii himmat se aage ba.Dhaa huu.n,
jo aage ba.Dhaa huu.n,
to dil me.n havas ye nahii.n hai
ki ab se hazaaro.n baras baa'd kii daastaano.n me.n
zinda ho ik baar phir naam meraa!
ye shaam-e-dil-aavez to ik bahaana hai,
ik koshish-e-naa-tavaa.n hai
shabaab-e-gurezaa.n ko jaate hu.e rokne kii
vagarna hai kaafii mujhe ek pal kaa sahaaraa,
huu.n ik taaza vaarid, musiibat kaa maaraa
mai.n kar luu.ngaa durd-e-tah-e-jaam pii kar guzaaraa!

Noon Meem Rashid
Nazm

be-faiz mausam ki rafaqat mein

KHudaavandaa
tujhe ma.aluum hai mai.n ne
ye apnii umr
kis be-faiz mausam kii rifaaqat me.n guzaarii hai
yaqiin-o-be-yaqiinii kii aziyyat me.n guzaarii hai
KHudaavandaa
tujhe ma.aluum hai mere
har ik jaanib tirii sau ne.amate.n
bikhrii hu.ii thii.n
hazaaro.n raaste the
manzile.n thii.n
raushnii thii
ra.ng the KHushbuu thii
phuulo.n se ladii shaaKHe.n thii.n KHvaahish kii
tamannaa.e.n labo.n par muskuraahaT ke
ka.ii naGme sajaa.e raqs kartii thii.n
ka.ii jugnuu mirii shaamo.n ke aa.ngan se guzarte the
mirii har aarzuu kii apnii peshaanii thii aur un se
ka.ii suuraj ubharte the
ka.ii mahtaab chehre
jhiil sii aa.nkhe.n liye mere ta.aaqub me.n nikalte the
mujhe aavaaz de kar
rokne kii koshishe.n karte na thakte the
ka.ii dildaar mausam the
ki jin me.n titliyaa.n baarish ke ra.ngo.n me.n nahaatii
haath phailaatii
mare qurb-o-javaar diida-o-dil se guzartii thii.n
magar mai.n ne
KHudaavandaa
tujhe ma.aluum hai mai.n ne
tirii saarii inaayat ko
tirii un ne.amato.n ko aa.nkh bhar kar bhii nahii.n dekhaa
KHudaavandaa
tujhe ma.aluum hai
tuu jaantaa hai
ki mire dil aur mirii aa.nkho.n me.n bas vo
mausam-e-dil-daar bastaa thaa
isii mausam kii chaahat
aur mohabbat kaa kahii.n
iqraar bastaa thaa
isii mausam ko dil ne apnii sub.h-shaam jaanaa thaa
agarche raah me.n aayaa hu.aa saaraa zamaana thaa
KHudaavandaa tujhe ma.aluum hai
tuu jaantaa hai
dilo.n ke zaKHm
aur aa.nkho.n kii saarii kaifiyat pahchaantaa hai
magar mai.n ne
use jaanaana pahchaanaa
mujhe jo bhii kahaa us ne
usii ko zindagii jaanaa
usii ko raushnii jaanaa
KHudaavandaa
tujhe ma.aluum hai us ne
basar kii zindagii merii
churaa lii raushnii merii
tujhe ma.aluum hai sab kuchh
KHudaavandaa tujhe ma.aluum hai sab kuchh
mirii umr-e-guzishta kaa
mirii umr-e-ravaa.n kaa
ek ik lamha
usii be-faiz mausam kii rifaaqat ke hii kaam aayaa
magar ab mai.n
KHudaavandaa
magar ab mai.n mohabbat ke
usii be-faiz mausam kii rifaaqat ke
azaabo.n
aur KHvaabo.n se
thakaa-haaraa hu.aa insaan
rihaa.ii chaahtaa huu.n
tirii sau ne.amate.n hai.n
un se tanhaa.ii kii ne.amat chaahtaa huu.n
KHudaavandaa tujhe ma.aluum hai mai.n ne
ye apnii umr kas be-faiz mausam kii rifaaqat me.n guzaarii hai
yaqiin-o-be-yaqiinii kii aziyyat me.n guzaarii hai
KHudaavandaa
mujhe tanhaa.ii kii ne.amat ataa kar de

Munawwar Jameel
Nazm

ek ghair-alamti nazm

adhuurii la.Dkiyo
tum apne kamro.n me.n puraane saal ke bosiida calender sajaa kar sochtii ho
ye badan umro.n kii saazish me.n na aa.e.nge
tumhe.n kis ne bataayaa hai
gha.Dii kii suu.iyo.n ko rokne se dau.Dtaa aur haa.nptaa suuraj misaal-e-naqsh-e-paa
aflaak par jam jaa.egaa
tumhe.n ma.aluum hai uryaaniyo.n ko Dhaa.np kar tum aur uryaa.n ho rahii ho
roz in aa.nkho.n kii tik.Dii me.n tumhaare jism tulte hai.n
har ik shab hostel me.n taash kii baazii me.n tum ko jiit kar ik jashn hotaa hai
hamaarii KHvaab-gaaho.n me.n tumhaare KHvaab raushan hai.n
chalii aa.o
ki baahar barf hai
aur ab hame.n tum se judaa bistar kahaa.n tasliim karte hai.n
chalii aa.o ki umre.n raa.egaa.n hone se bach jaa.e.n!

Jawayd Anwar
Nazm

ali-mohsin MBA, Khaalid-bin-walid road

ali-mohsin police ke rokne ke vaqt se pahle
ka.Daahii khaa ke aur yaaro.n se ruKHsat le ke apne ghar pahu.nchtaa thaa
pahu.nchte hii vo T.v par kisii channel se aatii
inDian picture lagaataa thaa
magar phir bhuul kar sab
maayera kii KHushbu.o.n me.n Duub jaaataa thaa

Harris Khalique
Nazm

sharab-o-saqi

rind ye kah rahaa thaa vaa.iz se
kaun hai mujh ko rokne vaalaa

Dharmpal Aaqil
Nazm

irfan KHan ke liye

is bad-numaa sub.h kaa
zaa.iqa abhii tak
mere taaluu se chimTaa hai
jab tumhaarii maut kii KHabar ne
dil ko aisii udaasii se bhar diyaa thaa
jise jhelne ke liye
ek vajuud tho.Daa pa.D jaataa hai
tab mai.n ne pahlii baar
use gale lagaane kaa sochaa thaa
jo ab kahii.n bhii nahii.n hai
shaayad
mushtarka mohabbate.n bhii
kuchh logo.n ko rokne ke liye
kaafii nahii.n hotii.n

Ehtisham Ali
Nazm

samay ko aTka diya

kalaa.ii kii gha.Dii ko
aaj ba.De pyaar se utaaraa
aur us kii kunjii ko khii.nch kar
ek asafal paryaas kiyaa
gha.Dii ko rokne kaa

Kamal Upadhyay
Nazm

do mashware

sumuum tez hai mauj-e-sabaa ko aam karo
KHizaa.n ke ruKH ko palaTne kaa ehtimaam karo
bikhar rahe ho mazaamiin-e-shaa.erii kii tarah
kisii maqaam pe jam jaa.o ko.ii kaam karo
sabaq milaa hai ye taariiKH ke navishto.n se
ki teG-e-haidar-e-karraar be-niyaam karo
jabii.n pe KHaak hai kis aastaan-e-daulat kii
kabhii to apnii aanaa kaa bhii ehtiraam karo
ye mashvare hai.n ka.ii din se qasr-e-shaahii me.n
kisii tariiq se daanishvaro.n ko raam karo
qalam kii shoKH-nigaarii ko rokne ke liye
zabaa.n-daraaz adiibo.n ko zer-e-daam karo
jhukaa ke sar kisii farmaa.n-ravaa kii chaukhaT par
zabaan-e-tohmat-o-ilzaam be-lagaam karo
'zafar' alii kii zabaa.n me.n hai mashvara meraa
mirii taraf se ise dosto.n me.n aam karo
is ibtilaa se KHudaa kii hazaar-baar panaah
ki jhuk ke tum kisii naa-ahl ko salaam karo

Shorish kashmiri
Nazm

safed ghoDe par sawar ajnabi

safed gho.De par savaar ajnabii
dar-e-makaan par kha.Daa thaa chup magar
mujhe hisaar-e-jaa.n ke paas bhii
kha.Daa dikhaa.ii de rahaa thaa aur mai.n
ek chiiKH rokne kii justujuu me.n
sad-hazaar chiiKH mujtam.a kiye
aab-e-teG-e-jism kho chukaa thaa
aur ek sirf ek surKH buu.nd kaa nishaan thaa
safed gho.De par savaar ajnabii chalaa gayaa

Sultan Subhani
Nazm

kallan

ye cockroach gandagii ko kyuu.n pasand karte hai.n
mai.n ne use rokne ke bahut jatan kiye
magar vo naalii me.n utar gayaa
aur kuchh der baa'd mujh se duur baiTh kar apne hasse chaaTne lagaa

Tabassum Zia
Nazm

dard ke saffak hathon se chura kar ek din

dard ke saffaak haatho.n se churaa kar ek din
phir usii shaadaab vaadii me.n chale.n
duur tak phaile hu.e
chaa.e ke baaGaat me.n
haath le kar haath me.n
der tak chalte rahe.n
aur ko.ii rokne vaalaa na ho
aur liichii ke daraKHto.n kii ghanerii chhaa.nv me.n
zaafraanii o.Dhnii par leT kar
der tak baate.n kare.n
yak-ba-yak baadal uThe.n aur bhiig jaa.e.n tan-badan
aur dhul jaa.e.n sabhii mahjuuriyaa.n
aur jab giile daraKHt
jugnuu.o.n kii aag se jalne lage.n
lauT kar aa.e.n to ko.ii Tokne vaalaa na ho

Jalees Najeebabadi
Nazm

baatuni miyan

rahte hai.n qasbe me.n mere ek baatuunii miyaa.n
rokne se bhii nahii.n ruktii kabhii un kii zabaa.n
dhun yahii har dam hai un kii qaum kaa leader banuu.n
qaum piichhe ho mire mai.n qaum ke aage rahuu.n
farq kuchh tazkiir aur taaniis me.n karte nahii.n
guftuguu me.n phir bhii vo laate hai.n alfaaz-e-hasii.n
ek din bole ki mai.n jaataa huu.n pa.Dhne ke liye
ghuumtii hai ye zamii.n is ko samajhne ke liye
murGiyaa.n dete hai.n anDe murG kyo.n detii nahii.n
is se ba.Dh kar zulm duniyaa me.n nahii.n ko.ii nahii.n
sun ke baate.n un kii mujh ko aa ga.ii fauran ha.nsii
ye kahaa mai.n ne mubaarak aap ko ho leaderii
mai.n ha.nsaa merii ha.nsii par un ko taish aa hii gayaa
mere sar ko ek hii patthar me.n zaKHmii kar diyaa
hai.n haqiiqat me.n mire qasbe ke vo ruuh-e-ravaa.n
dekh kar bachche unhe.n kahte hai.n ai buddhuu miyaa.n

Shabnam Kamali
Nazm

sitaron ki aawaz

chalte chalte mirii nii.nd TuuTii to dekhaa
har ik samt taariik asraar
patthar kii maanind
raste kii diivaar the
phir sitaaro.n ne paiGaam-e-rif.at diyaa
aur KHvaabo.n ke jho.nke
mere zehn-e-ma.asuum me.n lahlahaane lage
mere par pha.Dpha.Daane lage
phir bhii parvaaz ke vaaste mai.n ne jumbish jo kii
mai.n ne dekhaa ki bechaargii
mere qadmo.n kii zanjiir ban.ne lagii
mai.n faqat ek be-baal-o-par
tang-o-taariik Gaaro.n kaa insaan thaa
phir sitaaro.n ne aavaaz dii
ye sitaare jo insaa.n kii aavaaz hai.n
ye sitaare jo insaan kii ruuh-e-parvaaz hai.n
un kii aavaaz par mai.n ne jumbish jo kii
merii zanjiir TuuTii
mire devtaa mujh se sahme hu.e
mujh se kuchh duur par dast-basta kha.De the
mai.n aage ba.Dhaa
merii yalGaar se bahr-o-dasht-o-jabal zar ugalne lage
mai.n bahut KHush hu.aa
aur is zar se ik aasmaa.n tak pahu.nchne kii sii.Dhii banaane lagaa
ek zarrii.n chamaktaa hu.aa ziina-e-aasmaanii
aur aage ba.Dhaa
ab mire haath dhartii se uupar fazaa.o.n me.n lahraa rahe the
magar vo sitaare bahut duur the meraa ziina bahut muKHtasar thaa
to phir
mai.n ne inkaar ke par lagaa kar jo parvaaz kii
meraa ziina hii mujh se ulajhne lagaa
aur Gaaro.n ke vo devtaa
tanz se muskuraane lage
phir sitaaro.n ne aavaaz dii
apne haatho.n se KHud apne ziine ko niiche giraa kar ba.Dhaa
mai.n fazaa me.n u.Daa
aur vo vaqt bhii aa gayaa
jab huduud-e-havaa
merii parvaaz kii raah me.n ek diivaar sii ban ga.ii
devtaa muskuraane lage
phir sitaaro.n ne aavaaz dii
merii himmat ba.Dhii
apne KHvaabo.n kii duniyaa sameTe hu.e
mai.n ba.De azm ke saath dhartii par utraa
KHalaa.o.n me.n parvaaz kii
aaj pahlaa qadam chaa.nd par hai magar
hai.n sitaare abhii duur taariikiyo.n me.n kahii.n jalva-gar
un kii aavaaz giito.n ke sargam me.n bhar lii magar
ab vahii mere paa.nv kii zanjiir hai.n
ek ziddii sii zanjiir hai.n
devtaa.o.n ne jis ko banaayaa mujhe rokne ke liye
aur sitaaro.n ne aavaaz dii hai sadaa
mere KHvaabo.n kaa lashkar umiido.n kaa suuraj liye
mere giito.n kii duniyaa me.n naGmo.n ke baadal
par u.Dne lagaa
aur ye baadal chamakne lage kahkashaa.n kii tarah
aur ab devtaa
tang-o-taariik Gaaro.n me.n KHud ko chhupaane lage

Paigham Aafaqi
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

daraKHt-e-zard

hamaaraa faKHr thaa faqr aur daanish apnii puu.njii thii
nasab-naamo.n ke ham ne kitne hii parcham lapeTe hai.n
mire ham-shahr 'zaryuun' ik fusuu.n hai nasl ham, dono.n
faqat aadam ke beTe hai.n faqat aadam ke beTe hai.n
mai.n jab ausaan apne khone lagtaa huu.n to ha.nstaa huu.n
mai.n tum ko yaad kar ke rone lagtaa huu.n to ha.nstaa huu.n
hamesha mai.n KHudaa haafiz hamesha mai.n KHudaa haafiz
KHudaa haafiz
KHudaa haafiz

Jaun Eliya
Nazm

magar zulm ke KHilaf

ham amn chaahte hai.n magar zulm ke KHilaaf
gar ja.ng laazmii hai to phir ja.ng hii sahii
zaalim ko jo na roke vo shaamil hai zulm me.n
qaatil ko jo na Toke vo qaatil ke saath hai
ham sar-ba-kaf uThe hai.n ki haq fata.h-yaab ho
kah do use jo lashkar-e-baatil ke saath hai
is Dha.ng par hai zor to ye Dha.ng hii sahii
zaalim kii ko.ii zaat na maz.hab na ko.ii qaum
zaalim ke lab pe zikr bhii in kaa gunaah hai
phaltii nahii.n hai shaaKH-e-sitam is zamiin par
taariiKH jaantii hai zamaana gavaah hai
kuchh kor-baatino.n kii nazar ta.ng hii sahii
ye zar kii ja.ng hai na zamiino.n kii ja.ng hai
ye ja.ng hai baqaa ke usuulo.n ke vaaste
jo KHuun ham ne nazr diyaa hai zamiin ko
vo KHuun hai gulaab ke phuulo.n ke vaaste
phuuTegii sub.h-e-amn lahuu-ra.ng hii sahii

Sahir Ludhianvi
Nazm

jamhuriyat

ye mile.n ye jaagiire.n
kis kaa KHuun piitii hai.n
baracko.n me.n ye fauje.n
kis ke bal pe jiitii hai.n
kis kii mehnato.n kaa phal
daashtaa.e.n khaatii hai.n
jho.npa.Do.n se rone kii
kyuu.n sadaa.e.n aatii hai.n
jab shabaab par aa kar
khet lahlahaataa hai
kis ke nain rote hai.n
kaun muskuraataa hai
kaash tum kabhii samjho
kaash tum kabhii samjho
kaash tum kabhii jaano
das karo.D insaano!
ilm-o-fan ke raste me.n
laaThiyo.n kii ye baa.De.n
collego.n ke la.Dko.n par
goliyo.n kii bauchhaa.De.n
ye kiraa.e ke GunDe
yaadgaar-e-shab dekho
kis qadar bhayaanak hai
zulm kaa ye Dhab dekho
raqs-e-aatish-o-aahan
dekhte hii jaa.oge
dekhte hii jaa.oge
hosh me.n na aa.oge
hosh me.n na aa.oge
ai KHamosh tuufaano!
das karo.D insaano!

Habib Jalib
Nazm

mohabbat ka janm-din

aaj mohabbat kaa janm-din hai
aaj ham udaasii kii chhurii se
apne dil ko kaaTe.nge
aaj ham apnii palko.n par
jaltii hu.ii mom-battii rakh ke
ek taar par se guzre.nge
hame.n ko.ii nahii.n dekhegaa
magar ham har band khi.Dkii kii taraf
dekhe.nge
har darvaaze ke saamne phuul rakhe.nge
kisii na kisii baat par
ham ro.e.nge aur apne rone par
ham ha.nse.nge
aaj mohabbat kaa janm-din hai
aaj ham har daraKHt ke saamne se
guzarte hu.e
Topii utaar kar use salaam kare.nge
har baadal ko dekh ke
haath hilaa.e.nge
har sitaare kaa shukriya adaa kare.nge
hamaare aa.nsu.o.n ne
hamaare hatheliyo.n ko chhalnii kar diyaa hai
aaj ham apne dono.n haath
jebo.n me.n Daal kar chale.nge
aur agle baras tak chalte rahe.nge

Zeeshan Sahil
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now