Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sisak"

Nazm MATCHES FOR "sisak"

Nazm

bangal

ye shaahraahe.n isii vaaste banii thii.n kyaa
ki in pe des kii jantaa sisak sisak ke mare

Sahir Ludhianvi
Nazm

man

tamaam lafzo.n me.n raushan har ik baab me.n maa.n
junuu.n ke shelf me.n hai ishq kii kitaab me.n maa.n
ai maa.n to KHushbuu kaa naayaab isti.aara hai
ai maa.n tuu uud me.n ambar me.n tuu gulaab me.n maa.n
KHud apnii mamtaa me.n hii nuur kaa samundar hai
nahii.n hai aur kisii raushnii kii taab me.n maa.n
vo jism kho ke badal sii ga.ii hai kuchh mujh me.n
thii pahle sirf savaal ab hai har javaab me.n maa.n
mire savaalo.n ke saare javaab le aa.ii
chalii ga.ii thii magar lauTii phir se KHvaab me.n maa.n
mai.n jab bhii zab.h hu.ii zindagii ke KHanjar se
dukhii hai KHvaabo.n me.n ik dasht-e-iztiraab me.n maa.n
ga.nvaa ke jism vo fursat se i mere paas
sisak sisak ke sunaayaa thii kis azaab me.n maa.n
mai.n maa.n kii zinda nigaaho.n ko KHud me.n jiitii huu.n
har inqalaab me.n har dam har aab-o-taab me.n maa.n
mire uruuj kaa vo silsila in.aam-o-sazaa
mire zavaal me.n har zinda inqalaab me.n maa.n
tujhe lubhaane ko mai.n satra.ngii banii thii maa.n
ye jaa chhupii hai tuu kis parda-e-Gayaab me.n maa.n
ba.ndhii hai.n aa.nkhe.n mirii ab bhii maut ke pul se
hai har sukuut me.n KHaamosh iztiraab me.n maa.n
umaD rahe hai.n har ik pal se maut ke ThaTThe
vo jaa rahii hai mirii panja-e-uqaab me.n maa.n
vo jism haar ga.ii maut se magar mujh me.n
vo jii ke goyaa hai phir maut se javaab me.n maa.n

Azra Parveen
Nazm

kal jab daraKHt na honge

kal ham ko
sab aaraam mayassar ho.nge
lekin
ham KHush-baKHt na ho.nge
shaayad
jiine kii sarsabz tamannaa
Daalii Daalii
sisak sisak kar
mar jaa.egii
ye taaj aur taKHt na ho.nge
shaayad
viiraan samay
baarish ko tarse.nge
har-suu aag ke sho.ale ho.nge
tab ham par
dhu.e.n kaalak
aur
carbon ke ajzaa barse.nge
jiinaa hai to baahar aa.o
apne liye
aur aane vaalii naslo.n kii
KHaatir
daraKHt lagaa.o
baahar aa.o
aaj parinde aur jaanvar
mushkil me.n hai.n
jald hamaarii baarii hai
dekho
sar pe maut kha.Dii hai
aur ban par
vahshat taarii hai
pahle
jahaa.n nadii bahtii thii
ab ke vahaa.n par
KHuun kaa dariyaa jaarii hai
fasle.n Galla aur
daraKHt hai.n
sab kii zaruurat
kisaan hai
yaa ko.ii haarii hai
maa.ng sabhii kii
gosht hai
duudh aur phal hai.n
sabzii aur tarkaarii hai
vo ghar bhii
kyaa ghar hai jahaa.n par
phal phuul hai.n
na phulvaarii hai
kal jab daraKHt nahii.n ho.nge
ham KHush-baKHt nahii.n ho.nge

Ashraf Jawed Malik
Nazm

farozan sitara

siyaanaa bahut aur tho.Daa saa naadaa.n
anaa jaise parvat thii muskaan maidaa.n
hathelii pe merii jo sau baar soyaa
mire saamne thaa sisak kar vo royaa
yahii baat mujh se vo kahtaa thaa aksar
parii apsaraa yaa ho tum huur-paikar
parastish ho merii tumhii.n shaa.erii ho
mohabbat sanam tum mirii aaKHirii ho

Hema Kandpal Hiya
Nazm

zindagi ki talash

sii.Dhiyaa.n aasmaan kii cha.Dh ke
chaa.nd ke ek ek kone me.n
zindagii ko
talaash karte hai.n
aur somalia ke sahraa me.n
ek muTThii anaaj kii KHaatir
zindagii
e.Diyaa.n raga.Dtii hai
bhuuke bachche
sisak ke marte hai.n

Naseem Syed
Nazm

rihai

hamaare jismo.n ke qaid-KHaano.n me.n
saik.Do.n be-qaraar jism
aur udaas ruuhe.n sisak rahii hai.n
vo ziina ziina bhaTak rahii hai.n
ham in ko aazaad kab kare.nge
hamaaraa honaa
hamaarii in aane vaalii naslo.n ke vaaste hai
ham in ke maqruuz hai.n
jo ham se vajuud le.nge numuud le.nge

Ishrat Afreen
Nazm

diwar qahqaha

idhar na aa.o
ki ye mahal ab shikast-e-shaukat kii daastaa.n hai
ki ye mahal ab shikast-e-aqdaar kaa nishaa.n hai
ki ye mahal ab shikast-e-afkaar kii fuGaa.n hai
udhar na dekho
ki ye kha.nDar hai jinno.n kaa bhuuto.n kaa aastaa.n hai
ki ye uma.ngo.n kii be-basii ki ba.Dii taviil ek daastaa.n hai
ki ye hai maskan siyaah raato.n kaa har taraf bas dhu.aa.n dhu.aa. Hai
udhar jhaa.nko
shikastaa ii.nTo.n kii in daraazo.n me.n chaa.ndnii bhii sisak rahii hai
a.ndherii raato.n kii kaalii naagin siyaahiyo.n me.n chamak rahii hai
kiran kiran ka lahuu pi.e hai to mast hai aur bahakr rahii hai
jo pahle tum us mahal me.n aate
to rang o naGmaa ke sail pur nuur se guzarte
to aarzuu kii sharaab me.n Duubte ubharte
rasiilii baa.nho.n me.n miiThe sapno.n kii Duub kar kis sukuu.n se marte
jo pahle us samt se guzarte
to aarzu.o.n ke naGma-e-dil nashii.n ko sunte
bahut hii rote aur aa.nsu.o.n se ka.ii na.e KHvaab apne bunte
aur ek be-naam kaif-e-mastii me.n Duu bkar apne sar ko dhunte
jo pahle us dard ko khaTkaate
hasii.n ummiido.n ke paasbaa.n tum ko rang o buu kaa payaam dete
hare bhare sarv tum ko pariyo.n ke shaazaade kaa naam dete
ya baam o dar ha.ns ke tum ko pariyo.n ke shaahzaade kaa naam dete
aur ab jo aa.e. ho kyaa milegaa
nigaar KHaana uja.D chukaa hai vo saarii mahfil uKHa.D ga.ii hai
vo nik.hat aarzuu bhii diivaanaa vaar har-suu bhaTak rahii hai
amii.n thii jo dard-e-bekaraa.n ki vo aah ghaT ghaT ke mar chukii hai
aur ab yahaa.n kis ko Dhu.nDte ho
yahaa.n pe tum chiiKHte rahoge javaab ko.ii nahii.n milega
yahaa.n pe Dhuu.nDte rahoge ye KHvaab ko.ii nahii.n milegaa
yahaa.n pe sher o sharaab o cha.ng o raubaab ko.ii nahii.n milegaa
yahaa.n pe kis ko bulaa rahe ho
yahaa.n tumhaarii sadaa.o. ke KHol guu.nj ban kar u.Daa kare.nge
vo khokhlii guu.nj tum se puuchegaii aap yaa.n aa ke kyaa kare.nge
Daro ge KHud apne saaye se tum to bhut tum par ha.nsaa kare.nge
udhar na aa.o
udhar na aa.o yahaa.n pe tum aa ke kyaa karoge
yahaa.n pe bhuuto.n kaa raqs dekhoge aur phir aap hii Daroge
Daroge aa kaale kaa kaale saayo.n kaa raqs
diivaar kii daraazo.n se dekh kar tum bahut ha.nsoge
bahut ha.nsoge
ye ek diivaar-e-qahqahaa

Sajjad Baqar Rizvi
Nazm

nazm

aaj bahut se lafz jo rah ga.e the
aur vo ThiThurte hu.e harf
jin ko yakjaa karnaa ba-mushkil thaa
kuchh jazbaat jo dil ke
daaman se lag kar sisak rahe the
socho.n kaa be-ha.ngam hujuum
jo dimaaG kii huduud se musalsal Takraa rahaa thaa
ehsaasaat jin kii kokh me.n
udaasii bechaargii past KHaalii ne janm liyaa thaa
un me.n ka.ii jazbe bhii the
jin kii dauraan-e-hamal hii maut ho ga.ii
kuchh Tuk.De bhii the siyaah-baKHtii ke
kuchh rahzan bhii jo KHayaalaat kii aabruu
luuT liyaa karte the
aaj un rahzano.n ko suulii par cha.Dhaa diyaa gayaa
insaaf hu.aa aur insaaf ye hu.aa ki
tum duur baiThe dekh rahii thii bahut KHaamoshii
aur dilchaspii kaa mojid banaa khel khel ke liye
aaj in sab lafzo.n haruufo.n ehsaasaat
jazbaat aur socho.n ko
tere KHayaal se Gusl diyaa
araq-e-gulaab jo terii suujii aa.nkho.n
se bah rahaa thaa
is araq ko laashe par chhi.Dakte hu.e
aaj unhe.n dafnaa diyaa gayaa

Zeef Zia
Nazm

islam-abaad ki ek sham

zamii.n pe patte bikhar rahe hai.n
KHunuk hu.aa ke udaas jho.nke
ga.ii ruto.n kii talaash me.n hai.n
KHizaa.n-zada baaG-e-be-bahaaraa.n
ye kah rahaa hai ki mujh ko dekho
ajiib din hai.n ajiib raate.n
shikasta-paa be-nishaa.n savere
miraa muqaddar hai.n bas a.ndhere
na ab parinde shajar pe gaate hai.n giit ko.ii
bas ek be-naam faasla hai
jo kohna pe.Do.n ke darmiyaa.n hai
ye girte patto.n kii daastaa.n hai
buland-o-baalaa daraKHt tanhaa
fasurda jangal ke darmiyaa.n ab luTe kha.De hai.n
ki saare manzar sisak rahe hai.n
tamaam jangal sukuut-e-Gam ke hisaar me.n hai
hamaare haatho.n se mish.al-e-KHvaab kis ne chhiinii
havaa nahii.n hai to kaun mujrim hai, kuchh bataa.o
ye shaam patjha.D kii daa.imii to nahii.n hai 'naazish'
bahaar kii sub.h aane vaalii hai Gam na karnaa
ummiid kaa jo diyaa jalaayaa hai, us kii lau ko
havaa.o.n ke Dar se kam na karnaa
jo kulfate.n hai.n jo vahshate.n hai.n
ye zindagii kii haqiiqate.n hai.n

Naseem Nazish
Nazm

KHizan ke git

uThaa.o saaz ki abr-e-bahaar baaqii hai
abhii to bazm me.n kaif-o-KHumaar baaqii hai
abhii abhii to fazaa muskuraa ke jaagii hai
abhii to shauq-e-dil-exbaada-KHvaar baaqii hai
abhii na jaa.o bahaare.n bhii lauT jaa.e.ngii
abhii to sehn-e-chaman kaa nikhaar baaqii hai
abhii to anjuman-e-mehr-o-maah bikne do
abhii naqaab-e-ruKH-e-husn-e-yaar baaqii hai
abhii na sham.a bujhaa.o mire shabistaan kii
thakii sii aas sar-e-rahguzaar baaqii hai
abhii to jaag rahii hai nigaah-e-afsurda
abhii kisii kaa use intizaar baaqii hai
abhii to duur kahii.n baj rahii hai shahnaa.ii
kisii hasiin dulhan kaa si.nghaar baaqii hai
abhii to saaz hai sargam hai raat apnii hai
fazaa hasii.n hai jahaa.n naGma-baar baaqii hai
abhii mujhe na kaho daastaan-e-Gam ai dost
ki zindagii pe abhii e'tibaar baaqii hai
kisii ne chhe.D diye aah phir KHizaa.n ke giit
sisak rahii hai tamannaa ta.Dap uThaa sa.ngiit

Razia Rana
Nazm

KHwabon ka murda ghar

tanhaa.ii ko KHvaab kii dastak dete dekhaa
dekhaa ik gumbad ke niiche
kha.Daa hu.aa huu.n
suntaa huu.n KHud kii aavaaze.n
ye aavaaze.n
mujh ko vaapas le jaatii hai.n
KHvaabo.n ke us murda-ghar me.n
jo bilkul taariik pa.Daa hai
jis me.n mere maazii ke kirdaaro.n ke
kuchh kafan pa.De hai.n
un logo.n ke
jo ziinat the in KHvaabo.n kii
lekin un kirdaaro.n kii ab shakl nahii.n hai
ik taariikii hai badbuu hai KHaamoshii hai
murda-ghar ke pardo.n se
merii aavaaze.n jhuul rahii hai.n
jin se ik chamgaada.D kaa nanhaa saa bachcha
khel rahaa hai
sa.Dko.n par kohraam machaa hai
kuchh to hu.aa hai
log mare hai.n
lahuu bahaa hai
aur ye chamgaada.D kaa bachcha
merii tanhaa.ii kaa vaaris
merii aavaazo.n kii larzaa.n u.nglii thaame
mujh ko us manzar kii jaanib khii.nch rahaa hai
jahaa.n kisii nanhe bachche kii
laash pa.Dii hai
aur vo chamgaada.D kaa bachcha
mere zehn kii suukhii parto.n me.n
ehsaas kaa resha Dhuu.nD rahaa hai
aur is ThanDii laash pe baiThaa
sisak rahaa hai

Jagdish Prakash
Nazm

purani diwar

puraanii bahut puraanii kaa.ii lagii diivaar
lakhorii ii.nTo.n kii
itihaas ne apne lambe lambe haatho.n se jo.Do.n ko jis ke baa.ndhaa hai
aur gulaabii bhuure sabz mile-jule dhabbo.n se jis par laakh kahaanii
likh Daalii hai
albelii kirne.n roz sub.h chupke se us par cha.Dh jaatii hai.n
idhar udhar phir jhaa.nktii hai.n
aur ek ek karke dabe paa.nv
kono.n me.n is ke luk jaatii hai.n
dau.D dau.D kar aa.nkh-michaulii kheltii hai.n
lajjaa se chuur lataa nihu.Daa.e sar muskaatii hai
halke se us ke daaman se do-chaar phuul Tapak jaate hai.n
sahar uThtaa hai sabza
aasmaan ne aaj use phir
rang lataafat KHushbuu kaa ye komal tohfa
bhe.nT kiyaa hai
man us kaa ye daulat
paa kar bhii bhar aataa hai
ye aanand anant nahii.n hai
magar yahii sparsh
hazaaro.n taaro.n me.n jiivan duniyaa ke
ras bhartaa hai
aur phir is se aise raag nikalte hai.n
jo kabhii nahii.n marte
is diivaar ke saa.e me.n
is upvan me.n
sard kha.De hai.n bilkul siidhe
saakit chup
ashok ba.Dii gambhiir soch me.n gum
puraane mandir jaise
ka.nval kii kaliyaa.n
harii harii saarii phailaa.e
tair rahii hai.n
aur favvaara halke halke yuu.n chaltaa hai
jaise sub.h ko baalak
so.ii maa.n ke Dar se
sisak sisak kar bilke

Sajjad Zaheer
Nazm

KHamushi

KHizaa.n kii dastak
dhund me.n lipTe raste
sard havaa ke thape.Do.n se
nabard-aazmaa hai.n
alaav ke paas
shaal o.Dhe
kaaGaz ke Tuk.Do.n me.n
mataa-e-hayaat jalaatii hu.ii la.Dkii
daastaan-e-dil sunaate hu.e
aa.nsuu.o.n ke chand qatre gire
aag sisak uThii
sannaaTe kii dahshat
kisii tuufaa.n kaa pesh-KHema ho saktii hai
Tik Tik Tik
gha.Dii kii kuuk sunte
samaa.ate.n saath chho.Dne lagii.n
manzar dhu.ndlaa ga.e
vajuud ke sahraa me.n
ret u.Dne lagii
aur KHaamushii
us ke labo.n pe jaa kar so ga.ii

Omainuz Zahra Sayyad
Nazm

nazm

laa.o zaraa pahan luu.n tumhe.n
tanhaa.ii utaar dii mai.n ne
baahar corridor me.n pa.Dii sisak rahii hai
apne dhiime lahje me.n
vo saarii daastaane.n sunaatii
jinhe.n sun kar mai.n dhiimii aa.nch par
pahro.n sulagtii thii
laa.o zaraa pahan luu.n tumhe.n
vo key-hole se jhaa.nk rahii hai
jaise ham mauqa paate hii
apne asal me.n jhaa.nkte hai.n
is se pahle ki vo
mujhe na.ngaa dekh paa.e
laa.o ek duusre kii asl me.n
shaamil ho jaa.e.n
mai.n apnii saarii shabnam
tumhaarii palko.n pe giraatii huu.n
tum merii saa.nso.n kii pagDanDii se
mere andar utar aa.o
mai.n Dhak jaa.uu.ngii
apnii asl kii amaa.n paa.uu.ngii
laa.o zaraa pahan luu.n tumhe.n

Shabnam Ashai
Nazm

nadani

ThanDe lafzo.n ke chhii.nTo.n se
ba.Dii samajhdaarii se aa.o
is janjaal se
apnaa daaman khii.nch ke
ham achchhe ban jaa.e.n
paak saaf aur nek
bujhaa de.n dil bhaTTii
apne haatho.n
apnii raah me.n kaa.nTe bonaa
apnaa hii KHud dushman ban.naa
apne KHuun ke pyaase honaa
sisak sisak kar marnaa
apnii qabr khodnaa
pyaar ke piichhe paagal ban.naa
jaan hathelii par le kar
yuu.n phirnaa
jaise us kaa ko.ii mol nahii.n hai
ye to ba.Dii naadaanii hai
sachchaa.ii ko tah karke sanduuq me.n rakh do
KHvaab hai husn bhulaa do is ko
phuul kii KHushbuu
taaro.n kii zau
bahkaatii hai
in ko chho.Do
chaa.nd chor hai
apne dil ko is se bachaa.o
aasmaan kii niilii chaadar phaa.D ke phe.nko
phuu.nk do har us chiiz ko jis se
ranj-o-Gam yaa dard-o-alam kii duur duur se
parchhaa.ii.n bhii pa.D jaane kaa andesha ho
lahuu me.n jo tuufaan uThaa.e
man ko aise bhak se jalaa de
jaise jeTh kii dhuup me.n jangal
aanan-faanan jal uThte hai.n
pyaare
pyaar bahut hii dukh detaa hai
aa.o ise dafnaa de.n

Sajjad Zaheer
Nazm

buland peDon ke sabz patton mein sath-e-dariya ki silwaTon par

kahii.n bahut duur chho.D aa.e hai.n aaj behis imaarato.n ko
jo apne siine me.n tiirgii kaa dhu.aa.n dabaa.e sisak rahii thii.n

Zia Jalandhari
Nazm

samjhauta

vahii theater hai corner kii vahii do seate.n
hai film parde pe comedy ik
sabhii tamaashaa.ii ek lai me.n KHushii me.n Duube hu.e Thahaake lagaa rahe hai.n
jagah pe us kii
hamaare pahluu me.n shaKHs baiThaa hu.aa hai ko.ii
hamaare kaa.ndhe pe us kaa sar hai
ham apne andar sisak rahe hai.n

Siraj Faisal Khan
Nazm

be-hisi

sisak sisak ke abhii so gayaa hai
ik bachcha
lipaT ke maa.n se ye ma.asuum
jab bilaktaa thaa
pa.Dosiyo.n ne bahut naak-bhau.n cha.Dhaa.ii thii
aur is pe tanz ki ziddii bahut hai ye bachcha
magar kisii ne na puuchhaa ki zid ye kaisii thii
use talaash khilaune kii thii
na kap.Do.n kii
bilak rahaa thaa lagii thii jo us ke peT me.n aag
zaruurat us ko thii roTii kii sirf roTii kii
ab is ko aap
zaruurat kahe.n ki zid kah de.n
hamaare daur ke ma.asuum kii
ye KHvaahish thii

Malika Naseem
Nazm

nazm

taht-e-shu.uur kii
taariikii me.n
ik pazh-murda
gul-e-laala ke
surKH o siyah
pankhu.Diyo.n ke reze
pichhle aThaarah barso.n se
sisak rahe hai.n

Abrar Azmi
Nazm

qaid-e-hasti

mai.n qaid-e-hastii me.n
dukh kaa baar-e-garaa.n liye
ta.Dap rahaa huu.n
sisak rahaa huu.n
ye gumrahii hai
ki
raushnii
ye aagahii hai
ki tiirgii
mai.n raste se bahak rahaa huu.n
bhaTak rahaa huu.n
ye kin vaadiyo.n me.n
jaa rahaa huu.n
nahii.n nahii.n
ufuq pe
chamak rahaa huu.n
damak rahaa huu.n
isii ko samjho
bahaar-e-hastii
shabaab-e-hastii
yahii.n se
TuuTe
sharaar-hastii
mai.n dil ke athaah saagar me.n
habaab aur mauj kii mastiyo.n me.n
bha.nvar ko Dhuu.nD rahaa huu.n
bha.nvar hii zindagii hai
bha.nvar me.n
azal ke aur abad ke
charaaG jalte hai.n

Raheemullah Shad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now