Search result for "tabassum-e-be-amaa.n" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tabassum-e-be-amaa.n"

Nazm MATCHES FOR "tabassum-e-be-amaa.n"

Nazm

dasht-e-be-aman

isii darmiyaa.n tasavvur tiraa baar baar aayaa
isii raaste pe jaanaa.n
ko.ii shaam phir hai aa.ii
tirii yaad nuur-paikar
tirii qurbato.n kaa saaya
kahii.n tiirgii me.n gum hai
mai.n azaan de rahaa huu.n
kisii dasht-e-be-amaa.n me.n

Khursheed Akbar

Nazm

mausam

asiir-e-aarzuu hujuum-e-be-amaa.n
sharaab roz-o-shab kii aatish-ravaa.n me.n
barhamii ke qahqaho.n kii baazgasht
ab hamaare darmiyaa.n
ajiib KHvaahisho.n ke biij bo rahii hai
mere vaaste jo ajnabii hai
us ko paas se guzartaa dekh luu.n to us kii raushnii
ko noch luu.n
jo us ke KHuun me.n utar rahii hai
us ke ek pal ko duusre se jo.Dtii hai
tairtii hai saa.ns me.n
havaa kii vo shariir mauj chhiin luu.n
vo jaanvar hamaarii nasl kaa nahii.n
vo kyuu.n ha.nse vo kyuu.n jiye
hamaare ruu-ba-ruu hamaarii aarzuu ke ruu-ba-ruu
vo is zamii.n pe kyuu.n chale
ajiib KHvaahishe.n ajab KHvaahisho.n kii ham-safar
har ek aa.ina magar hai duusre ke saamne
Galiiz suurate.n Galiiz suurato.n ke saamne

Balraj Komal

Nazm

maut

kaun aavaara havaa.o.n kaa subuk-baar hujuum
aah ehsaas kii zanjiir garaa.n TuuT ga.ii
aur sarmaaya-e-anfaas pareshaa.n na rahaa
mere siine me.n ulajhne lagii fariyaad mirii
phir nigaaho.n pe uma.nD aayaa hai taariik dhu.aa.n
TimTimaanaa hai mire saath ye maayuus charaaG
aaj miltaa nahii.n afsos pata.ngo.n kaa nishaa.n
mere siine me.n ulajhne lagii fariyaad mirii
TuuT kar rah ga.ii anfaas kii zanjiir-e-giraa.n
to.D Daalegaa ye kambaKHt makaa.n kii diivaar
aur mai.n dab ke isii Dher me.n rah jaa.uu.ngaa
jii ulajhtaa hai mirii jaan pe ban jaa.egii
thak gayaa aaj shikaarii kii kamaa.n TuuT ga.ii
lauT aayaa huu.n bahut duur se KHaalii haatho.n
aaj ummiid kaa din biit gayaa shaam hu.ii
mai.n ne chaahaa bhii magar tum se mohabbat na hu.ii
ki chuke ab to KHudaa ke liye KHaamosh raho
ek mauhuum sii KHvaahish thii falak chhuune kii
za.ng-aaluud mohabbat ko tujhe sau.np diyaa
sard haatho.n se mirii jaan mire ho.nT na sii
gar kabhii lauT ke aa jaa.e vahii saa.nvlii raat
KHushk aa.nkho.n me.n jhalak aa.e na be-suud namii
zalzala uf ye dhamaakaa ye musalsal dastak
be-amaa.n raat kabhii KHatm bhii hogii ki nahii.n
uf ye maGmuum fazaa.o.n kaa alamnaak sukuut
mere siine me.n dabii jaatii hai aavaaz mirii
tiirgii uf ye dhu.ndlakaa mire nazdiik na aa
ye mire haath pe jaltii hu.ii kyaa chiiz girii
aaj is ashk-e-nadaamat kaa ko.ii mol nahii.n
aah ehsaas kii zanjiir-e-giraa.n TuuT ga.ii
aur ye merii mohabbat bhii tujhe jo hai aziiz
kal ye maazii ke ghane bojh me.n dab jaa.egii
kaun aayaa hai zaraa ek nazar dekh to lo
kyaa KHabar vaqt dabe paa.nv chalaa aayaa ho
zalzala uf ye dhamaakaa ye musalsal dastak
khaTkhaTaataa hai ko.ii der se darvaaze ko
uf ye maGmuum fazaao.n kaa alamnaak sukuut
kaun aayaa hai zaraa ek nazar dekh to lo
to.D Daalegaa ye kambaKHt makaa.n kii diivaar
aur mai.n dab ke isii Dher me.n rah jaa.uu.ngaa

Akhtarul Iman

Nazm

apahij gaDi ka aadmi

me.n kab se zamii.n par zamii.n kii tarah chal rahaa huu.n
ye diivaana andhaa safar kab kahaa.n jaa ke chho.Degaa mujh ko?
mai.n is zindagii kii bahut sii bahaare.n Gizaa kii tarah khaa chukaa huu.n
pahan o.Dh kar pairahan kii tarah phaa.D dii hai.n
me.n resham kaa kii.Daa huu.n ko.e me.n chhap jaataa huu.n Dar ke maare
isii ko.e ko khaataa rahtaa huu.n aur kaaT kar is se aataa huu.n baahar
aur apne jiine kaa maqsad sabab jaan.naa chaahtaa huu.n
miraa dil KHudaa kii razaa Dhuu.nDhtaa phir rahaa hai
miraa jism lazzaat kii justujuu me.n lagaa hai
guzargaah-e-shaam-o-sahar par kahii.n ek din mai.n ugaa thaa
nabaataat kii tarah jiitaa huu.n is kaargaah-e-jahaa.n me.n
na ehsaas iimaan iiqaan ko.ii
na duniyaa me.n shaamil na KHud apnii pahchaan ko.ii
gunah aur jahannam savaab aur jannat?
ye kyuu.n hai ki be-muzad kuchh bhii nahii.n mil sakaa hai
na kal mil sakegaa
asaatiir farmaa.n-ravaa.on ke ahkaam aur suufiyaa kii karaamat ke qisse
payambar kii dil-soziyo.n ke mazaahir
qalam-band hai.n sab!
unhe.n ham ne ta.aviiz kii tarah apne galo.n me.n hamaa.il kiyaa hai
inhe.n ham ne tah-KHaano.n kii koTharii me.n muqaffal kiyaa hai
jahaa.n la.Dkha.Daate hai.n in kii madad le ke chalte hai.n aage
magar raasto.n kaa ta.ayyun nahii.n hai!

Akhtarul Iman

Nazm

chand sultana

jahaa.n ik saa.ns bhii lene se ghabraate the ha.ngaame
jalaal-e-be-amaa.n se Dar ke so jaate the ha.ngaame

Afsar Seemabi Ahmad Nagari

Nazm

mauzuat-e-suKHan

Gam-e-hayaat ke maaro.n pe rahm khaa khaa kar
hayaat ke sitam-e-be-amaa.n kii baat kare.n

Mansha ur Rahman Khan Mansha

Nazm

janam-kade mein na-jaez aankhen

mai.n Te.Dhii paslii kaa gustaaKH janam huu.n
jis ke halqo.n me.n bad-tahziib chiiKHo.n kaa hujuum
baGair ittilaa.a diye
naqqaara-e-be-amaa.n kaa raag alaaptaa hai
phuu.nktaa hai aa.nkh aa.nkh me.n
dhu.aa.n adh-jale ta.alluqaat kaa

Sidra Sahar Imran

Nazm

haar-jit

zindagii ke manzar me.n
haar-jiit kaa manzar
kas qadar udaasii kaa
aur be-navaa.ii kaa
ek muntazir manzar
Duub kar iraado.n me.n
TuuT kar saraabo.n me.n
dasht-e-be-amaa.n manzar
haar-jiit kaa manzar

Shaista Mufti

Nazm

mujhe KHabar hai mujhe yaqin hai

mujhe KHabar hai
ye aabnuusii chaTTaan jo duub ke sabz taKHte pe aa girii hai
na.ii subuk narm pattiyo.n kaa si.nghaar pii kar
sunahre lamho.n kii saa.ns me.n phaa.ns ban kar aTak ga.ii hai
mujhe yaqii.n hai
ki mausamo.n ke tilism ye tiirgii u.Daa kar
isii sulagtii chaTTaan par duub kii sabz zulfe.n bikher de.nge
mujhe yaqii.n hai
mire kaTe baazu.o.n kii taaqat mirii rago.n se nahii.n ga.ii hai
mire lahuu ke ye surKH dhaare na.ii hikaayat ke pesh-rau hai.n
na.ii uma.ngo.n na.e ujaalo.n na.e shafaq-zaar ke amii.n hai.n
mujhe KHabar hai
ki Gol chi.Diyo.n ke lashkar-e-abrha kii ab kuchh KHabar na le.nge
hamaarii aa.nkho.n me.n raushnii hai magar dilo.n me.n siyaahiyaa.n hai.n
udaasiyo.n ke ghane dhuve.n me.n chhupii hu.ii kaamraaniyaa.n hai.n
mujhe yaqii.n hai
ki is fazaa me.n faraaz-e-sahraa-e-be-amaa.n hai.n
hazaaro.n ma.asuum e.Diyaa.n raga.D chuke hai.n raga.D rahe hai.n
ubal pa.Degaa zaruur ko.ii hayaat-afroz aab-e-shiirii.n
sadaaqato.n ke bahaar-zaaro.n ko aaKHirash taazgii milegii
mujhe KHabar hai mujhe yaqii.n hai

Ambar Bahraichi

Nazm

traffic

ba-zaahir jo siidhe nazar aa rahe hai.n
ye sab raaste daa.ero.n kii tarah hai.n
vajuud-e-malaamat me.n phaile hu.e
be-karaa.n faaslo.n ke nishaa.n hai.n
jahaa.n KHilqat-e-be-amaa.n ke liye
roz-o-shab marg-e-paiham sazaa-vaar hone lage hai.n

Salman Sarwat

Nazm

samundar

miraa dil uchhaltaa samundar
miraa jazba-e-be-amaa.n
meraa ek ek armaa.n
uchhalte samundar kii sadiyo.n puraanii chaTTaano.n se Takraa ke yuu.n reza reza hu.aa hai
ki ghaayal samundar ke siine me.n mahshar bapaa hai
har ik mauj dard-aashnaa hai
har ik qatra-e-aab anmol hai gauhar-e-be-bahaa hai

Jameel Malik

Nazm

waqt waqt ki baat hai

vahii ham the ki us shahar-e-sukuu.n me.n
rat-jago.n kii dhuum thii ham se
vahii ham hai.n ki shahr-e-be-amaa.n kii bhii.D me.n
KHud apnii tanhaa.ii pe hairaa.n hai.n
hamaaraa jabr-e-majbuurii
hame.n jab sabr aamaada banaataa hai
to aa.nkhe.n is qadar sho.ale ugaltii hai.n
ki KHaamoshii bhii ik
shor-e-fuGaa.n ma.aluum hotii hai

Rashid Aazar

Nazm

ajab tha dasht-e-bala ka manzar

ajab thaa dasht-e-balaa kaa manzar
jahaa.n na.ii nafrato.n ke KHanjar
puraanii rasm-e-vafaa ke dil me.n utar ga.e the
jahaa.n paraayo.n kii saazish-e-be-amaa.n ke baa.is
lahuu ke rishte bhii dushman-e-jaa.n bane hu.e the
jahaa.n zamii.n par KHariif-e-aatish ugii hu.ii thii
jahaa.n fazaa me.n tuyuur-e-aahan ubhar rahe the

Zaheer Kashmiri

Nazm

malka-e-tarannum nur-e-jahan ki nazr

naGma bhii hai udaas to sar bhii hai be-amaa.n
rahne do kuchh to nuur a.ndhero.n ke darmiyaa.n
ik umr jis ne chain diyaa is jahaan ko
lene do sukh kaa saa.ns use bhii sar-e-jahaa.n
tayyaar kaun hai jo mujhe baazu.o.n me.n le
ik ye navaa na ho to kaho jaa.uu.n mai.n kahaa.n
agle jahaa.n se mujh ko yahii iKHtilaaf hai
ye suurate.n ye giit sadaa.e.n kahaa.n vahaa.n
ye hai azal se aur rahegaa ye taa-abad
tum se na jal sakegaa tarannum kaa aashiyaa.n

Habib Jalib

Nazm

alamiya

nuur-e-irfaa.n apnaa haasil apnaa haasil tiirgii
ye gurez-e-zindagii hai vo jihaad-e-zindagii
ranj-o-raahat kii kashaakash se varaa hai zindagii
ijtihaad-e-ilm-o-fan se maa-sivaa hai zindagii
ek an-dekhaa bahaa.o ek an-thak silsila
zindagii ke tajribe se maavaraa hai zindagii
ek hijr-e-be-amaa.n hai ek koh-e-aatishii.n
soz-e-jaa.n hai kyaa shu.uur-e-ziist kyaa naa-aagahii

Siddique Kaleem

Nazm

aur hawa chup rahi

shaaKH-e-zaituun par kam-suKHan faaKHtaa.o.n ke itne basere ujaa.De ga.e
aur havaa chup rahii
be-karaa.n aasmaano.n kii pihnaa.iyaa.n be-nasheman shikasta paro.n kii tag-o-taaz par bain kartii rahii.n
aur havaa chup rahii
zard parcham u.Daataa hu.aa lashkar-e-be-amaa.n gul-zamiino.n ko paamaal kartaa rahaa
aur havaa chup rahii
aarzuumand aa.nkhe.n bashaarat-talab dil du.aa.o.n ko uTThe hu.e haath sab be-samar rah ga.e
aur havaa chup rahii
aur tab habs ke qaharmaa.n mausamo.n ke azaab in zamiino.n pe bheje ga.e
aur munaadii karaa dii ga.ii
jab kabhii rang kii KHushbu.o.n kii u.Daano.n kii aavaaz kii aur KHvaabo.n kii tauhiin kii jaa.egii
ye azaab in zamiino.n pe aate rahe.nge

Iftikhar Arif

Nazm

muskuraati hui zindagi kya hui

raqs kartii hu.ii
gungunaatii hu.ii
muskuraatii hu.ii
zindagii kyaa hu.ii
jagmagaate hu.e shahr ko kyaa hu.aa
raushnii kyaa hu.ii
phuul jaise badan
rang-o-buu ke chaman
pyaar ke saahilo.n kii fazaa
phuul kii Daaliyo.n se
lipaTtii havaa
chashm-e-ehsaas ke saamne
duur tak aaj kuchh bhii nahii.n
ahd-o-paimaa.n
ke rishto.n ko kis kii nazar khaa ga.ii
dostii kyaa hu.ii
kitne gul-rang paikar
mile KHaak me.n
kitne ka.Diyal javaa.n
apne siino.n pe
zaKHmo.n ke tamGe sajaa.e
shahaadat ke
darje pe faa.ez hu.e
har taraf hai dhu.aa.n
shor-e-aah-o-fuGaa.n
vahshat-e-be-amaa.n
dasht o dar
hai.n savaalii
bataa.e ko.ii
zindagii kyaa hu.ii
raqs kartii hu.ii
gungunaatii hu.ii
muskuraatii hu.ii zindagii kyaa hu.ii

Gulnar Aafreen

Nazm

maut ke us taraf

maut ke us taraf
ko.ii sirr-e-nihaa.n hai ki baazaar hai
kyaa sitaaro.n kaa taabaa.n ko.ii qaafila
yaa buland aur taariik diivaar hai
KHaak u.Dtii hai yaa KHushbu.e.n hai.n ravaa.n
ko.ii sahraa hai yaa ik chaman-zaar hai
ko.ii apnaa bhii hai
yaa hujuum-e-balaa shahr-e-aGyaar hai
ko.ii zinda bhii hai
yaa ki har samt naasho.n kaa ambaar hai
ik KHalaa hai ki phir
baar-e-imkaan hai
raah pur-KHaar hai
ja.ng hai amn hai
faisla hai vahaa.n
jiit hai haar hai
maut ke us taraf
kuchh nahii.n hai to kyuu.n
sar pe aavezaa.n vahshat kii talvaar hai
mai.n huu.n yaa
nuqta-e-be-amaa.n
jism ke daa.ere me.n giraftaar hai
tuu hai yaa
aa.ina-saaz
val-asr kaa
mahv-e-diidaar hai

Asna Badr

Nazm

nala-e-be-asman

mai.n kaise bataa.uu.n tum bataa.o
kis tarah ye din guzar rahe hai.n
tauhiin haqaarate.n tanaffur
kis kis se nibaah kar rahaa huu.n

Aziz Qaisi

Nazm

parchhaiyan

tum aaj hazaaro.n miil yahaa.n se duur kahii.n tanhaa.ii me.n
yaa bazm-e-tarab-aaraa.ii me.n
mere sapne buntii ho.ngii baiThii aaGosh paraa.ii me.n
aur mai.n siine me.n Gam le kar din-raat mashaqqat kartaa huu.n
jiine kii KHaatir martaa huu.n
apne fan ko rusvaa kar ke aGyaar kaa daaman bhartaa huu.n
majbuur huu.n mai.n majbuur ho tum majbuur ye duniyaa saarii hai
tan kaa dukh man par bhaarii hai
is daur me.n jiine kii qiimat yaa daar-o-rasan yaa KHvaarii hai
mai.n daar-o-rasan tak jaa na sakaa tum jehd kii had tak aa na sakii.n
chaahaa to magar apnaa na sakii.n
ham to do aisii ruuhe.n hai.n jo manzil-e-taskii.n paa na sake.n
jiine ko jiye jaate hai.n magar saa.nso.n me.n chitaae.n jaltii hai.n
KHaamosh vafaa.e.n jaltii hai.n
sangiin haqaa.iq-zaaro.n me.n KHvaabo.n kii ridaa.e.n jaltii hai.n
aur aaj jab in pe.Do.n ke tale phir do saa.e lahraa.e hai.n
phir do dil milne aa.e hai.n
phir maut kii aa.ndhii uTThii hai phir ja.ng ke baadal chhaa.e hai.n
mai.n soch rahaa huu.n in kaa bhii apnii hii tarah anjaam na ho
in kaa bhii junuu.n naakaam na ho
in ke bhii muqaddar me.n likhii ik KHuun me.n lith.Dii shaam na ho
suuraj ke lahuu me.n lith.Dii hu.ii vo shaam hai ab tak yaad mujhe
chaahat ke sunahre KHvaabo.n kaa anjaam hai ab tak yaad mujhe
hamaaraa pyaar havaadis kii taab laa na sakaa
magar unhe.n to muraado.n kii raat mil jaa.e
hame.n to kashmakash-e-marg-e-be-amaa.n hii milii
unhe.n to jhuumtii gaatii hayaat mil jaa.e
bahut dino.n se hai ye mashGala siyaasat kaa
ki jab javaan ho.n bachche to qatl ho jaa.e.n
bahut dino.n se ye hai KHabt hukmaraano.n kaa
ki duur duur ke mulko.n me.n qaht bo jaa.e.n
bahut dino.n se javaanii ke KHvaab viiraa.n hai.n
bahut dino.n se sitam-diida shaah-raaho.n me.n
nigaar-e-ziist kii ismat panaah Dhuu.nDhtii hai
chalo ki aaj sabhii paa.emaal ruuho.n se
kahe.n ki apne har ik zaKHm ko zabaa.n kar le.n
hamaaraa raaz hamaaraa nahii.n sabhii kaa hai
chalo ki saare zamaane ko raaz-daa.n kar le.n
chalo ki chal ke siyaasii muqaamiro.n se kahe.n
ki ham ko jang-o-jadal ke chalan se nafrat hai
jise lahuu ke sivaa ko.ii rang raas na aa.e
hame.n hayaat ke us pairahan se nafrat hai
kaho ki ab ko.ii qaatil agar idhar aayaa
to har qadam pe zamii.n tang hotii jaa.egii
har ek mauj-e-havaa ruKH badal ke jhapTegii
har ek shaaKH rag-e-sa.ng hotii jaa.egii
uTho ki aaj har ik jang-juu se ye kah de.n
ki ham ko kaam kii KHaatir kalo.n kii haajat hai
hame.n kisii kii zamii.n chhiin.ne kaa shauq nahii.n
hame.n to apnii zamii.n par halo.n kii haajat hai
kaho ki ab ko.ii taajir idhar kaa ruKH na kare
ab is jagah ko.ii ku.nvaarii na bechii jaa.egii
ye khet jaag pa.De uTh kha.Dii hu.ii.n fasle.n
ab is jagah ko.ii kyaarii na bechii jaa.egii
ye sar-zamiin hai gautam kii aur naanak kii
is arz-e-paak pe vahshii na chal sake.nge kabhii
hamaaraa KHuun amaanat hai nasl-e-nau ke liye
hamaare KHuun pe lashkar na pal sake.nge kabhii
kaho ki aaj bhii ham sab agar KHamosh rahe
to is damakte hu.e KHaak-daa.n kii KHair nahii.n
junuu.n kii Dhaalii hu.ii atomii balaa.o.n se
zamii.n kii KHair nahii.n aasmaa.n kii KHair nahii.n
guzishta jang me.n ghar hii jale magar is baar
ajab nahii.n ki ye tanhaa.iyaa.n bhii jal jaa.e.n
guzishta ja.ng me.n paikar jale magar is baar
ajab nahii.n ki ye parchhaa.iyaa.n bhii jal jaa.e.n
tasavvuraat kii parchhaa.iyaa.n ubhartii hai.n

Sahir Ludhianvi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now