Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tuutne"

Nazm MATCHES FOR "tuutne"

Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

karl marx

us kii daanaa.ii kaa haasil naaKHuun-e-uqda-kushaa
taabnaaki-e-zamiir-o-ziirakii kaa aaftaab
chaahne vaalo.n kaa us kii zikr hii kyaa kiijiye
us ke dushman bhii sirhaane rakhte hai.n us kii kitaab
maaddii taariiKH-e-aalam jis kii taaliif-e-aziim
taas kaipiTaal hai yaa ziist kaa lubb-e-lubaab
pa.Dh ke jis ke ho ga.ii.n hushyaar aqvaam-e-Gulaam
ishtiraakii falsafa kaa khul gayaa har dil me.n baab
kitne dozaKH us ke ik manshuur se jannat bane
kitne sahraa.o.n ko jis ne kar diyaa shahr-e-gulaab
marx ne science o insaa.n ko kiyaa hai ham-kanaar
zehn ko baKHshaa shu.uur-e-zindagaanii kaa nisaab
us kii biinish us kii vajdaanii-nigaah-e-haq-shanaas
kar ga.ii jo chehra-e-iflaas-e-zar ko be-naqaab
'Gasab-e-ujrat' ko diyaa 'sarmaayaa' kaa jis ne laqab
be-hisaab us kii basiirat us kii mantiq laa-javaab
aaftaab taaza kii us ne bashaarat dii hame.n
us kii har peshan-go.ii hai barafganda naqaab
ko.ii quvvat us kii sadd-e-raah ban saktii nahii.n
vaqt kaa farmaan jab aataa hai ban kar inqilaab
ahl-e-daanish kaa rajaz aur siina-e-dahqaa.n kii Dhaal
lashkar mazduur ke hai.n ham-safiir o ham-rikaab
kaaTtii hai sehr-e-sultaanii ko jab muusaa kii zarb
satvat-e-firaun ho jaatii hai az KHud Garq-e-aab
aaj kii fir.auniyat bhii kuchh isii andaaz se
rafta rafta hotii jaa.egii shikaar-e-inqilaab
la.D rahaa hai ja.ng aaKHir kiisa-e-sarmaaya-daar
jauhrii hathiyaar se kartaa nahii.n jo ijtinaab
apne mustaqbil se taaGuutii tamaddun ko hai yaas
diidanii hai dushman-e-insaaniyat kaa iztiraab
hazrat-e-iqbaal kaa ibliis-e-kochak KHauf se
larza-bar-andaam yuu.n shaitaa.n se kartaa hai KHitaab
panDit o mullaa o raahib be-zarar Thahre magar
TuuTne vaalaa hai tujh par ik yahuudii kaa itaab
vo kaliim-e-be-tajallii vo masiih-e-be-saliib
niist paiGambar o lekin dar baGal daarad kitaab

Wamiq Jaunpuri
Nazm

achchha ishq

bure logo.n ke paas
vo sab kuchh hotaa hai
jis se paidaa kiyaa jaa sake
achchhe aur sachche ishq kaa
kabhii na TuuTne vaalaa bharam

Nomaan Shauque
Nazm

maut ki talashi mat lo

baadalo.n me.n hii merii to baarish mar ga.ii
abhii abhii bahut KHush libaas thaa vo
merii KHataa kar baiThaa
ko.ii jaa.e to chalii jaa.uu.n
ko.ii aa.e to ruKHsat ho jaa.uu.n
mere haatho.n me.n ko.ii dil mar gayaa hai
maut kii talaashii mat lo
insaan se pahle maut zinda thii
TuuTne vaale zamiin par rah ga.e
mai.n pe.D se giraa saaya huu.n
aavaaz se pahle ghaT nahii.n saktii
merii aa.nkho.n me.n ko.ii dil mar gayaa hai…

Sara Shagufta
Nazm

aaKHiri khilaune ka matam

mai.n sautelaa beTaa
apne baap kii tiisrii biivii kaa
in tiino.n me.n
pahle merii maa.n aa.ii
phir mai.n aayaa
leTaa baiThaa
kha.Daa hu.aa diivaar paka.D kar
chalnaa jab aayaa to maa.n ko rog lagaa
mere khilaune
saste aur miTTii ke the
sab TuuT ga.e
baarii baarii sab kii KHaatir royaa mai.n
lekin maa.n ke marne par
mai.n royaa nahii.n
TuuTaa thaa
aur bikhraa thaa
jaise mere khilaune TuuTe bikhre the
meraa bachpan
meraa aaKHirii khilaunaa thaa
jis kii kirche.n
ab bhii mujh me.n chubhtii hai.n
aur TuuTne kii aavaaze.n
guu.njtii hai.n

Shakeel Azmi
Nazm

main hun kya waishya

jaante ho mai.n huu.n kyaa mai.n huu.n vaishyaa
pataa hai mai.n ne hai kyaa kyaa kiyaa
mai.n naachtii huu.n koTho.n par KHush hotii huu.n bus noTo.n par
har raat har raat mai.n apnaa jism bechtii huu.n
itnaa dard mai.n bus paiso.n ke liye to sahtii huu.n
mai.n logo.n kii raate.n ra.ngiin kartii huu.n
har raat ye apraadh sa.ngiin kartii huu.n
meraa naam aam me.n lene nahii.n
note ke alaava merii zindagii kaa ko.ii naayak nahii.n
zindagii me.n meraa na hai asitiv na ko.ii iimaan
samaaj ke liye to mai.n huu.n hii nahii.n insaan
agar hai to bas hai ek pahchaan
huu.n ek koThe vaalii kartii huu.n apnaa hii jism niilaam
har raat merii ek na.e geraahak ke saath hotii hai
har raat merii aatmaa apnii pahchaan khotii hai
merii maa.n kaa bhii to yahii kaam thaa nahii.n jaantii mere pitaa kaa kyaa naam thaa
jaan kar bhii kyaa kar letii vo bhii ek vaishyaa thii
kaam un kaa logo.n ko sukh denaa thaa chintaa nahii.n
viraasat me.n un se bas yahii ek kaam milaa
jis ke kaaran hii shaayad mujhe jiivan me.n kuchh na milaa
nahii.n nahii.n galtii un kii nahii.n unho.nne to pa.Dhaanaa chaahaa thaa
par kyaa kare.n maalkin ko ye bilkul naagavaar thaa
na jaa.e diyaa mujhe is narak se baahar na ban.ne dii ko.ii pahchaan
un ke dabaav me.n hii to mujhe khonaa pa.Daa meraa iimaan
ab logo.n ko bhii kyaa dosh duu.n jo mujh par thuuk kar jaate hai.n
nahii.n jaante vo meraa sach bas kuchh bhii kah jaate hai.n
dukh to KHuub hotaa hai par ab aadat sii ho ga.ii hai
sochtii huu.n kabhii kyaa merii ye aadat vaaqa.ii sahii hai
kyaa mujhe jiine kaa ko.ii maukaa milegaa
kyaa mere jiivan me.n bhii pyaar kaa phuul khilegaa
ham-safar nahii.n bas ek hamdard hii chaahiye
pahchaan nahii.n tho.Daa saa bas pyaar hii chaahiye
iimaan nahii.n tho.Dii sii bas izzat hii chaahiye
armaan hai bas ek ko.ii vaishyaa nahii.n nahii.n vaishnavii kar bulaa.e
paise dekh kar nahii.n pyaar de kar gale se lagaa.e
kisii ke ghar TuuTne kaa nahii.n ju.Dne kaa kaaran ban.naa chaahtii huu.n
bas ek baar kisii ke dikh kaa nivaaran ban.naa chaahtii huu.n
kisii kii biivii na sahii bahan ban.naa chaahtii huu.n
har baar kii tarah vaishyaa nahii.n ek insaan ban.naa chaahtii huu.n

Ankita Garg
Nazm

do ajnabi

ik pattii ke
TuuTne girne kii aavaaz se
sihar uThaa hai
sahemtaa
pe.D

Aadil Raza Mansoori
Nazm

Daka

kaale kaale Daaku
chhat par
dham dham karte
dau.D rahe hai.n
kamro.n se sab box uThaa kar
chhat par laa kar
be-rahmii se to.D rahe hai.n
in bakso.n me.n
ek ba.Daa saa box hai merii maa.n kaa bhii
jis me.n merii
shiishe vaalii golii kii thailii rakkhii hai
is bakse ke TuuTne par
mai.n KHush hotaa huu.n
chhat par jaa kar
banduuqo.n ke saa.e me.n
apnii sab golii chuntaa huu.n
sub.h ko mere saare saathii
merii rang bharii golii ko
lalchaa.ii nazro.n se takte rahte hai.n
barbaadii kaa maatam
mujh ko
golii ke ra.ngo.n se halkaa lagtaa hai

Shakeel Azmi
Nazm

mera raj-kumar

phir achaanak ek dard ne jaise tamaacha maaraa
na jaane kahaa.n se himmat kaa sailaab aaya
himmat jo dil TuuTne kii thii
himmat jo KHvaab ruuThne kii thii
himmat jo bhaag phuuTne kii thii
himmat jis kii zaruurat na jaane kitnii thii

Ankita Garg
Nazm

jila

zainab mai.n terii baa.ndii
tuu aisii baa-hausla
is shaan se jaltii zamiin par chalii
ki sach ko zaruurat na rahii kisii hiil hujjat kii
tere liye aasmaano.n se ko.ii mo.ajiza nahii.n utraa
uj.Daa hu.aa ghar be-bizaa.atii zmiin-o-aasmaan kii saKHtiyaa.n
aur terii istaqaamat
ki is qadar KHuu.n-rezii ke baa'd bhii yaziidii fat.h kaa KHat na le sake
kisii ek fard-e-vaahid se nahii.n
to ek puure Galat nizaam ke muqaabil thii
ye vo maqaam thaa ki taariiKH-daano.n o mohaqqiqiin ne haar jiit ke nazriyaat ko alag andaaz se dekhaa
terii maamtaa ko salaam zainab apne jigar gosho.n kaa Gam uThaa kar KHud ko TuuTne nahii.n diyaa
aivaano.n me.n sar jo.De baiThe ahl-e-siyaasat
kisii natiije par nahii.n pahu.nch paate
ki bachcho.n ko zab.h karne vaale
insaan hai.n musalmaan hai.n
zainab
ma.asuum alii asGar ko zab.h karne vaalo.n ko
tuu ne KHudaa kaa ye farmaan baavar karaayaa thaa
allaah zaalimo.n ko dost nahii.n rakhtaa
karbalaa ek raah-e-hidaayat
raushnii zaraa sii darz kisii jhurrii se daaKHil ho kar
phaile hu.e a.ndhere par Gaalib aa jaatii hai
aur taariikii ko savere me.n badal dene vaale rab ko ma.aluum hai
ki ishq ko baaqii rakhne ke liye lahuu se aabiyaarii kii ga.ii
lahuu bahtaa hai
to zamii.n zar-KHez hotii hai
vo taa.ef ho kuufa ho yaa merii bad-nasiib zamiin
andhaa hujuum haatho.n me.n patthar liye
jilaa ko bujhaa detaa chaahtaa hai
jilaa jo du.aa-go hai
ma.abuud unhe.n baKHsh de ye nahii.n jaante ye kyaa kar rahe hai.n
jilaa baatil ke haatho.n me.n bai.at nahii.n kartii
jilaa masiihaa hai
mujhe masluub karne vaalo shaqii-ul-qalb hukmaraano
bhalaa phuuTtii kirno.n ko bhii ko.ii saliib de sakaa
jilaa zainab hai
jo jale hu.e a.ndhero.n ke ba.ad
hone vaalii uj.Dii sub.h se
us kaThin masaafat ko tai kartii hai
ki bahut sii ghuTan aur hazaar sa.uubato.n ke ba.ad
ek vo maqaam aataa hai
jo taKHt ko nishaan-e-ibrat banaa de

Injila Hamesh
Nazm

kiraya-dar

are aa.o
be-fikr ho ke aa.o
merii zindagii me.n
ghabraa.o nahii.n
ko.ii TuuT-phuuT nahii.n hogii tum se
aa.o to
dar-asl yahaa.n kuchh baaqii hii nahii.n TuuTne ko
haa.n kuchh puraane KHvaabo.n kii kirche.n hai.n
tumhaare aane tak saaf ho jaa.e.ngii
us ke baa'd jo hogaa sab tumhaaraa hii hogaa
jaate vaqt jo kuchh salaamat bache
le jaanaa
KHvaabo.n kii kirche.n gar rah ga.ii.n tumhaare baa'd to sameT ke rakh denaa mere ho.nTho.n pe
muskuraahaTo.n me.n baa.ndh ke

Geetanjali Rai
Nazm

koi baat karo

mu.nh basore ye shaam khi.Dkii par
aan baiThii hai dopahar hii se
dil ki jaise KHizaa.n-zada patta
TuuTne ko hai
ko.ii baat karo

Tarannum Riyaz
Nazm

kali-andhi

vo to ko.npal jaisii thii
mai.n ne use kyuu.n to.D diyaa
ye ko.npal kii marzii thii
par ko.npal kii marzii aisii kyuu.n hotii hai
TuuTne me.n lazzat kaisii hai
haath aur ko.npal me.n ye guu.ngaa rishta kyaa hai
paagal haath nahii.n bolegaa
mai.n ko.npal se puuchhuu.ngaa
ko.npal ko.npal kaun pukaare ko.npal raanii duur
vo ab paas nahii.n aa.egii
yaad nahii.n kyaa ho.nTo.n ne ho.nTo.n se kahaa thaa
ham to TuuTne aa.e the so TuuT chale
ab KHvaabo.n kii chhaa.nv se baahar jaane do
vo raftaar kii kaalii aa.ndhii baahar naach rahii hogii
us aa.ndhii me.n vaapas aanaa mushkil hai
us aa.ndhii me.n chhupaa hu.aa ko.ii haath hamaaraa saahil hai
vo jo kahii.n kisii an-dekhe saahil se jaa Takraa.ii
yaad mujhe kyuu.n aatii hai
jism me.n ruuh kahaa.n shaamil thii
pairo.n se shabnam kyuu.n lipTii
mai.n to ghaas pe dau.Daa thaa

Saqi Faruqi
Nazm

kyon shama jalai aaKHir-e-shab

tumhaare ruKH pe hai aa.iina TuuTne kaa nishaa.n
mahak mashaam me.n suukhe hu.e gulaab kii hai

Qaisarul Jafri
Nazm

do ghunT pyas aur

bhuuk ke chhuune se vo bedaar hu.ii
Tahniyo.n ke TuuTne kii sadaa pe
do ghuu.nT pyaas aur
KHudaa bhuuk ke bhii kitne zaa.iqe rakhtaa hai
maalii vo phuul merii gu.Diyaa ke rang kaa hai
aur suuraj-mukhii me.n to tuu ne mere baal bo rakhe hai.n
kaale gulaab jaise mere juute hai.n
aur ye safed phuul merii roTii ke rang kaa hai

Sara Shagufta
Nazm

karam karta hai wo jis par

muhaafiz hai KHudaa teraa
nahii.n vo TuuTne degaa
rakhegaa hausla jo tuu
tujhe in.aam baKHshegaa

Alok Yadav
Nazm

dukh

dukh
bichha.Dne kaa nahii.n hotaa
balki
in rishto.n ke TuuTne kaa hotaa hai
jo
barso.n kii rifaaqat ke ba.ad
ik pal me.n TuuT jaate hai.n
aur
ham tahii-daamaa.n rah jaate hai.n

Tahira Jabeen Tara
Nazm

kal hi ki baat nahin hoti

dahliiz par jo KHvaab TuuTaa hai
vo kal kaa to nahii.n thaa
vo to na-jaane kitne saalo.n se
naaniyo.n daadiyo.n ne alha.D aa.nkho.n me.n jagaa rakkhaa thaa
ye jo diivaar par lagii tasviir achaanak dha.Daam se niiche gir ga.ii hai
ye kal hii to nahii.n Taa.ngii ga.ii thii
ye to us aa.iine me.n saalo.n se nazar aa rahii thii jo la.Dkiyaa.n takiye ke niiche
is ummiid par rakh kar sotii thii.n ki
is raat ke KHvaab me.n un ke duulhaa kii shabiih ubhregii
ye jo tasviir gir kar TuuT ga.ii hai ye sadiyo.n kii shabiih ko bhii to.D ga.ii hai
ye jo kal dekhte hii dekhte aasmaan par ek baadal kaa rang kaalaa siyaah pa.D gayaa thaa
ye baadal sirf kal hii to nahii.n aasmaan par aayaa thaa
ye collage ke aasmaan par niile rang me.n na-jaane kitne saalo.n se rukaa hu.aa thaa
ye jo kal mohabbat aur e'timaad kii tahriir dekhte hii dekhte kaaGaz se Gaa.eb ho ga.ii
vo sirf kal hii to nahii.n likhii ga.ii thii
na-jaane kab se mohabbat kii kahaaniyaa.n likhne vaale use safhaat par utaar rahe the
kal jo mere darvaaze ke saamne kha.Dii sa.Dak yakaayak kahii.n aur mu.D ga.ii
aur phir nazro.n se ojhal ho ga.ii ye saaneha sirf kal kaa to nahii.n
us sa.Dak ne to saalo.n se raasta badalne aur Gaa.eb hone kii Thaan rakhii thii
KHvaab tasviir tahriir baadal aur sa.Dak un ke TuuTne aur badalne kii baat
kal hii kii baat nahii.n hotii

Rubina Faisal
Nazm

bhuk mein dabe bachpan

shariir me.n ko.ii ta.Dap sii hogii
yaa ko.ii aadat sii pa.Dii hogii
ka.ii dino kii ka.ii chiizo kii bhuuk to hogii
ko.ii maqsad hogaa yaa yuu.n hii
zindagii na.nge paa.nv kii dau.D hogii
dhuup ko pardo.n se vaapas bhej diyaa amiiro.n ne
vo jaa kar ka.ii aa.nkho.n me.n a.ndhere bhar rahii hogii
kuchh hai nahii.n Takraane ko kyaa usii kaaran
maayuusii me.n lipTii niinde.n phail ke so rahii hogii
KHvaabo.n me.n pariyaa.n khii.nch ke laa.ii jaatii ho.ngii
bebasii chand nivaalo.n se gale utaarii hogii
mahfilo.n me.n kaun sii KHaasiyat baTtii hogii
kitnii uu.nchaa.ii pe sapne rakhe jaate ho.nge
kyaa KHvaabo.n kii pariibhaashaa bhii pa.Dhaa.ii jaatii hogii
aa.nkho.n se bahtii zid se haasil kyaa hotaa hogaa
kyaa TuuTne pe phuuT phuuT ke rotii ho.ngii
kaun se qisse ho.nge jo KHaalii peT ha.nsii nikaltii hogii
buKHaar me.n aaraam ke liye kaun se bahaane dharte ho.nge
gaa.Diyo.n ke tyre ke nishaan siine pe pa.Dte ho.nge
sa.Dko.n pe ka.ii bachpan bhuuk me.n dab ke marte ho.nge

Darshika wasani
Nazm

aaKHiri harba

mai.n ne ek bahaadur kii maanind
ochhaa hathiyaar istimaal na karne kaa faisla kiyaa thaa
lekin juu.nhii mere gird hisaar ta.ng hone lagtaa hai
merii zirah-baktar ke halqe TuuTne lagte hai.n
aur bachaa.o ke har raaste par
TikTikii dikhaa.ii detii hai
to mai.n ko.ii na ko.ii ochhaa hathiyaar
istimaal karne par majbuur ho jaataa huu.n
kisii sarkash KHayaal ke peT me.n
chupke se KHanjar utaar detaa huu.n
kisii gustaaKH jazbe ko
mufaahamat ke bahaane bulaa kar
diivaar me.n chun detaa huu.n

Javed Shaheen
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now