Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ujrat"

Nazm MATCHES FOR "ujrat"

Nazm

tu nahin jaanti

tere ho.nTo.n se bahtii hu.ii ye ha.nsii
do-jahaano.n pe naafiz na hone kaa baa.is
tire haath hai.n
jin ko tuu ne hamesha labo.n par rakhaa muskuraate hu.e
tuu nahii.n jaantii
nii.nd kii goliyaa.n kyo.n banaa.ii ga.ii.n
log kyo.n raat ko uTh ke rote hai.n sote nahii.n
tuu ne ab tak ko.ii shab agar jaagte bhii guzaarii
to vo barbie night thii
tujh ko kaise bataa.uu.n
ki terii sadaa ke ta'aaqub me.n
mai.n kaise dariyaa.o.n sahraa.o.n aur jangalo.n se guzartaa hu.aa
ek aisii jagah jaa giraa thaa
jahaa.n pe.D kaa suukhnaa 'aam sii baat thii
jahaa.n un charaaGo.n ko jalne kii ujrat nahii.n mil rahii thii
jahaa.n la.Dkiyo.n ke badan sirf KHushbuu banaane ke kaam aate the
jahaa.n ek maa'suum bachcha parinde paka.Dne ke saare hunar jaantaa thaa
mujh ko maa'luum thaa
teraa aise jahaa.n aisii duniyaa se ko.ii ta'alluq nahii.n
tuu nahii.n jaantii
kitnii aa.nkhe.n tujhe dekhte dekhte bujh ga.ii.n
kitne kurte tire haath se istirii ho ke jalne kii KHvaahish me.n khuu.nTii se laTke rahe
kitne lab tere maathe ko tarse
kitnii shahraahe.n is shauq me.n phaT ga.ii hai.n
ki tuu un ke siine pe paa.nv dhare
mai.n tujhe Dhuu.nDte Dhuu.nDhte thak gayaa huu.n
ab mujhe terii maujuudgii chaahiye
apne saaTan me.n sahme hu.e surKH pairo.n ko ab mere haatho.n pe rakh
mai.n ne chakhnaa hai in kaa namak

Tahzeeb Hafi
Nazm

karl marx

us kii daanaa.ii kaa haasil naaKHuun-e-uqda-kushaa
taabnaaki-e-zamiir-o-ziirakii kaa aaftaab
chaahne vaalo.n kaa us kii zikr hii kyaa kiijiye
us ke dushman bhii sirhaane rakhte hai.n us kii kitaab
maaddii taariiKH-e-aalam jis kii taaliif-e-aziim
taas kaipiTaal hai yaa ziist kaa lubb-e-lubaab
pa.Dh ke jis ke ho ga.ii.n hushyaar aqvaam-e-Gulaam
ishtiraakii falsafa kaa khul gayaa har dil me.n baab
kitne dozaKH us ke ik manshuur se jannat bane
kitne sahraa.o.n ko jis ne kar diyaa shahr-e-gulaab
marx ne science o insaa.n ko kiyaa hai ham-kanaar
zehn ko baKHshaa shu.uur-e-zindagaanii kaa nisaab
us kii biinish us kii vajdaanii-nigaah-e-haq-shanaas
kar ga.ii jo chehra-e-iflaas-e-zar ko be-naqaab
'Gasab-e-ujrat' ko diyaa 'sarmaayaa' kaa jis ne laqab
be-hisaab us kii basiirat us kii mantiq laa-javaab
aaftaab taaza kii us ne bashaarat dii hame.n
us kii har peshan-go.ii hai barafganda naqaab
ko.ii quvvat us kii sadd-e-raah ban saktii nahii.n
vaqt kaa farmaan jab aataa hai ban kar inqilaab
ahl-e-daanish kaa rajaz aur siina-e-dahqaa.n kii Dhaal
lashkar mazduur ke hai.n ham-safiir o ham-rikaab
kaaTtii hai sehr-e-sultaanii ko jab muusaa kii zarb
satvat-e-firaun ho jaatii hai az KHud Garq-e-aab
aaj kii fir.auniyat bhii kuchh isii andaaz se
rafta rafta hotii jaa.egii shikaar-e-inqilaab
la.D rahaa hai ja.ng aaKHir kiisa-e-sarmaaya-daar
jauhrii hathiyaar se kartaa nahii.n jo ijtinaab
apne mustaqbil se taaGuutii tamaddun ko hai yaas
diidanii hai dushman-e-insaaniyat kaa iztiraab
hazrat-e-iqbaal kaa ibliis-e-kochak KHauf se
larza-bar-andaam yuu.n shaitaa.n se kartaa hai KHitaab
panDit o mullaa o raahib be-zarar Thahre magar
TuuTne vaalaa hai tujh par ik yahuudii kaa itaab
vo kaliim-e-be-tajallii vo masiih-e-be-saliib
niist paiGambar o lekin dar baGal daarad kitaab

Wamiq Jaunpuri
Nazm

hama-ust

vo parvarda-e-ashva-baazii
kanakhiyo.n se yuu.n dekhtii thii
ki jaise vo un sar-niguu.n aarzuu.o.n ko pahchaantii ho
jo kartii hai.n akasr yuu.nhii ruu-shanaasii
kabhii dostii kii tamannaa
kabhii ilm kii pyaas ban kar!
vo kuulhe hilaatii thii ha.nstii thii
ik sochii samjhii hisaabii lagaavaT se
jaise vo un KHufiya sar-chashma-gaaho.n ke har raaz ko jaantii ho
vo taKHte ke piichhe kha.Dii qahqahe maartii lauTtii thii
kahaa mai.n ne KHaalid se:
bahruupiye!
is vilaayat me.n zarb-e-masal hai
''ki uu.nTo.n kii saudaa-garii kii lagan ho
to ghar un ke qaabil banaa.o
aur is shahr me.n yuu.n to ustaaniyaa.n an-ginat hai.n
magar is kii ujrat bhalaa tum kahaa.n de sakoge!''
vo phir muztarib ho ke be-iKHtiyaarii se ha.nsne lagii thii!
vo bolii ''ye sach hai
ki ujrat to ik shaahii bhar kam na hogii
magar faujiyo.n kaa bharosa hii kyaa hai
bhalaa tum kahaa.n baaz aa.oge
aaKHir zabaa.n siikhne ke bahaane
KHayaanat karoge''
vo ha.nstii hu.ii
ik na.e mushtarii kii taraf multafit ho ga.ii thii!

Noon Meem Rashid
Nazm

shikast

ye tiisrii shikast hai ikkiis saal me.n
ik aur baar mujh ko mohabbat nahii.n milii
jaise kisii ajiir ko mehnat ke baavajuud
us ke 'aziim kaam kii ujrat nahii.n milii

Areeb Usmani
Nazm

mazdur

june kii garmii ka.Daktii dhuup luu chaltii hu.ii
har gha.Dii mazduur ke sar se qazaa Taltii hu.ii
sar pe gaare kii ka.Dhaa.ii aur diivaar-e-buland
haa.nptaa vo cha.Dh rahaa hai le ke himmat kii kamand
paa.D par pahu.nchaa to ik gaalii sunii me.amaar se
jii me.n aayaa sar ko Takraa de usii diivaar se
haa.e us mazluum kii majbuuriyaa.n naa-chaariyaa.n
jaan kaa aazaar hai.n iflaas kii biimaariyaa.n
dil me.n kahtaa hai ki ye me.amaar bhii mazduur hai
phir yahii jaan-e-hazii.n kyuu.n is qadar maqhuur hai
us kii ujrat mujh se dugunii hai magar kam hai shu.uur
tamkanat kis baat par kis chiiz par itnaa Guruur
mai.n agar naadaar huu.n ye bhii nahii.n sarmaaya-daar
bhuut vo hai kis ba.Daa.ii kaa jo us par hai savaar
ii.nT gaaraa mai.n na duu.n us ko to ye kis kaam kaa
asl me.n me.amaar mai.n huu.n ye faqat hai naam kaa
merii himmat kah rahii.n hai.n kaaKH-e-diivaan-e-buland
aah is par bhii mai.n duniyaa me.n huu.n itnaa mustamand
lag gayaa phir kaam me.n ye soch kar vo bad-nasiib
ai KHudaa duniyaa me.n itnaa bhii na ho ko.ii Gariib
din Dhalaa jis vaqt maalik bhii makaa.n kaa aa gayaa
ik sukuut-e-marg saa diivaar-o-dar par chhaa gayaa
kaa.nptaa rahtaa hai har mazduur jis ke naam se
sab usii dhun me.n the vo KHush ho hamaare kaam se
us kii peshaanii pe lekin bal zaraa aane lage
phan uThaa kar tamkanat ke saa.np lahraane lage
sab se pahle us ne gaalii dii usii me.amaar ko
apnii milkiyyat jo samjhaa thaa har ik diivaar ko
josh-e-naKHvat se kahaa us ne ki ai paajii la.ii.n
kal jahaa.n tak thii ga.ii diivaar ab bhii hai vahii.n
kyaa kiyaa hai tuu ne din-bhar me.n zaraa mujh ko bataa
yuu.n takabbur me.n vo aa kar jaa.eza lene lagaa
dil me.n vo mazduur phir kahne lagaa uf re Gazab
jo bhii is duniyaa me.n hai.n fir.aun hai.n vo sab ke sab
jis kaa jis par bas chale paamaal kartaa hai use
KHud agar KHush-haal hai bad-haal kartaa hai use
kyaa kahuu.n sarmaaya-daaro.n ke sitam kii daastaa.n
diida-e-mazduur hai mazduur se bhii KHuu.nfishaa.n
jis kii laaThii us kii bhai.ns is misl ko saadiq samajh
ye samajh kar is KHudaa-e-paak ko raaziq samajh

Arsh Malsiyani
Nazm

shofer

naukar aur namak aur mazhab... in taviilo.n se baaz aa.o
mardo.n kii aisii nekii par aa jaataa hai mujh ko taav
aurat ke ho.nTo.n par Thappa ab maqbuul-e-aam nahii.n

Shaad Aarfi
Nazm

roza-KHor se inTerwiew

mai.n ne inTerview kiyaa kal ek roza-KHor se
mai.n zabaa.n se boltaa thaa vo shikam ke zor se
mai.n ne puuchhaa aap ne roza ye kyuu.n rakkhaa nahii.n
peT dikhlaane lagaa bolaa ki yuu.n rakhaa nahii.n
roza yuu.n rakkhaa nahii.n chaltii nahii.n baad-e-sabaa
mausam-e-garmaa me.n roze aa.e hai.n is martaba
job karnii hai zaruurii kaam karnaa hai mujhe
cock pizza ke sahaare shaam karnaa hai mujhe
mai.n ne lassii ke gilaaso.n me.n piyaa kuchh aur hai
dopahar me.n murG khaane kaa mazaa kuchh aur hai
din me.n khaane ke liye iqraar kar letaa huu.n mai.n
shaam ko masjid me.n bhii iftaar kar letaa huu.n mai.n
ko.ii shai khaate hu.e mai.n ne chhupaa.ii hii nahii.n
aaj tak merii hu.ii roza-kushaa.ii hii nahii.n
roza-KHorii par mirii duniyaa ko hairaanii nahii.n
roza yuu.n rakkhaa nahii.n bijlii nahii.n paanii nahii.n
mai.n jo be-roza huu.n ye bhii tajiro.n kaa zarf hai
sau ruupe ujrat hai merii sau ruupe kaa barf hai
ruuh-afzaa ke binaa duniyaa kii huure.n rah ga.ii.n
roza-daaro.n ke liye suukhii khajuure.n rah ga.ii.n
roza yuu.n rakkhaa nahii.n ho jaa.egaa khaanaa KHaraab
lunch par aa.egii kal hotel me.n rashk-e-maahtaab
mai.n huu.n shaa.er mehrbaa.n hai mujh pe KHallaaq-e-azal
pesh karnii hai mujhe mahfil me.n ik taaza Gazal
ajr-e-roza kyaa hai ye shero.n me.n batlaa.uu.ngaa mai.n
lunch mai.n iftaar kii tashriih ban jaa.uu.ngaa mai.n
bhuuk aur shaa.er kaa chuu.n-kii cholii-daaman kaa hai saath
mujh se ba.Dh ke jaantaa hai kaun roza kii sifaat
pa.ndrah ghanTe kaa roza har javaan o piir kaa
shaam karnaa sub.h kaa laanaa hai juu-e-shiir kaa

Khalid Irfan
Nazm

manafi shuur ka ek waraq

kyaa is nizaam ko jagiir-daar badlegaa?
jo
mere vote se muntaKHab hotaa hai
aur
mere KHvaabo.n par tex lagaataa hai
kyaa
is nizaam ko sarmaaya-daar badlegaa?
jo
mujh se baara ghanTe kii begaar letaa hai
magar
aaTh ghanTe kii ujrat dene par bhii tayyaar nahii.n!
kyaa daanish-var is nizaam ko badal saktaa hai?
magar vo to
ek plot yaa Gair-mulkii daure ke evaz
hukmaraano.n ke liye luGat me.n se sataa.ishii alfaaz
jam.a kartaa rahtaa hai!
taajir is nizaam ko kaise badlegaa?
vo to bajaT kii tamaam muraa.aat sameT kar
saarii mah.ngaa.ii
mere khaate me.n darj kar detaa hai
siyasat-daan is nizaam kaa muhaafiz kyuu.n na ho!
ki us kii barkat se
vo sarkaarii school aur dispensary me.n apnii bhai.ns baa.ndh saktaa hai
aur
saaya dene vaale Gair-sarkaarii daraKHt ke niiche
class lene vaale ziddii teacher ko
apnii pajero se baa.ndh kar ghasiiTe jaane kii dhamkii detaa hai
mai.n ne
sahaafii se is nizaam ko badalne kii darKHvaast kii
magar vo
thaana muharrir ke paas baiTh kar chaa.e piine aur KHabre.n likhne me.n magan thaa
ye sab jaante hu.e
mai.n agle paa.nch saal ke liye
apnaa chehraa apne halqe ke paTvaarii ko de duu.ngaa
jo use
aks-e-shajra me.n lapeT kar rakh legaa
aur
vote kii parchii par meraa a.nguuThaa KHud hii lagaa legaa

Zahid Masood
Nazm

dastak

log kaaGaz se mere KHvaab chaaTte hai.n
aur ho.nTo.n par zabaan pherte hu.e kahte hai.n
aaj bhii namak zaraa kam rah gayaa hai
yahii ek jumla merii ujrat hai
ye mai.n un logo.n kii baat kar rahaa huu.n
jo KHud KHvaab nahii.n dekh sakte
jo dekh sakte hai.n
un kaa ravayya qadre behtar hai

Ali Sahil
Nazm

yun bhi hota hai KHandan mein kya

mai.n
rozaana ek sau ruupe ujrat kaa mulaazim huu.n
meraa beTaa
tyre pa.nkchar kii duukaan par kaam kartaa hai
aur
ustaad kii gaaliyo.n aur thappa.Do.n ke alaava
tiis ruupa.e roz kamaataa hai
biivii aur nau-umr beTii
tiin chaar ba.De gharo.n me.n safaa.ii aur bartan dhotii hai.n!
mujhe yaad nahii.n
ki kabhii mere kumbe ne mil kar naashta kiyaa ho
yaa
raat ke khaane ke baa'd mil-jul kar baate.n kii ho.n
mere bachche ab
mujh se iidii nahii.n maa.ngte
aur
biivii baaliyo.n aur gajro.n kaa taqaaza nahii.n kartii
ham sab
KHuraak puurii karne ke liye marte hai.n
aur
utility bil dene ke liye zinda rahte hai.n
ham ek duusre se
ajnabiyo.n kii tarah milte hai.n
aur
aabaa.ii gharo.n me.n kiraaya-daaro.n kii tarah rahte hai.n

Zahid Masood
Nazm

bojh

mai.n dukh kaa bojh uThaa.e
ek muddat se chal rahaa huu.n
lagtaa hai
kisii bhii vaqt merii gardan TuuT jaa.egii
mai.n sustaanaa chaahtaa huu.n
ko.ii meraa bojh nahii.n baTaa saktaa
sab ke sar pe
ek vaznii Tokraa rakhaa hu.aa hai
ko.ii nafrat ke bojh tale dabaa hu.aa hai
kisii se mohabbat nahii.n sambhaalii jaa rahii
ham sab mazduur hai.n
bojh uThaanaa hamaaraa kaam hai
hame.n
sustaane kii ijaazat nahii.n miltii
bojh uThaane kii ujrat
Tokaro.n kii tabdiilii hai

Mustafa Arbab
Nazm

dehli ki saDken

aa ga.e dehlii me.n jab se aadmii paataal ke
ho ga.e maGruur maalik har KHar-e-dajjal ke
chalte chalte ho ga.e KHam paa.nv baa.nke laal ke
ham bhii ujrat me.n Take dete to hai.n Tiksaal ke
ham se lekin mil nahii.n sakte unhe.n aa.ndhii ke ber
luuTte hai.n ajnabii ko jo dikhaa kar her-pher

Syed Mohammad Jafri
Nazm

mazdur

vo ghighyaayaa
bii-bii-jii jo marzii de de.n
ye sun kar merii nas nas me.n
Gusse aur nafrat kii ik bijlii sii chamkii
o re kamiine
buzdil aur miskiin
tuu apnii jaa.ez ujrat bhii
himmat se gardan ak.Daa kar
maa.ng nahii.n saktaa

Syed Javed Akhtar
Nazm

diye aankhon ki surat bujh chuke hain

vasl ke lamho.n kii gintii karne vaale haath hiddat se tahii hai.n
mauj me.n aa.e hu.e dariyaa me.n kashtii kaun Daale
maa.njhiyo.n ke giit lahro.n kii tarah saahil kii bhiigii ret par bikhre hu.e hai.n
ab kisii bu.Dhiyaa kii gaThrii ko.ii ahl-e-dil uThaa kar bastiyo.n kaa ruKH nahii.n kartaa
kisii ham-saa.e se ahvaal-e-dil ma.aluum karnaa kaar-e-be-ujrat hu.aa hai
nafsii nafsii kii havaa.e.n zaat ke taariik jangal me.n ba.Dii aasuudgii se chal rahii hai.n
KHaana-e-dil me.n vafaa.o.n ke diye aa.nkho.n kii suurat bujh chuke hai.n
bhii.D me.n rasta nahii.n miltaa charaaGo.n kii qataaro.n me.n charaaG-e-gul nahii.n miltaa ki jis par raushnii kaa gul khilaa ho
vasl ke lamho.n me.n ra.ng-e-nuur bharne vaalii aa.nkhe.n apnii narmii se tahii hai.n
vasl ke lamho.n me.n ra.ng-e-ishq bharne vaalii pore.n apnii garmii se tahii hai.n

Najeeb Ahmad
Nazm

haalat-e-jang mein mazduri

vo aa.e
unho.n ne kahaa
miTTii khodo
ham ne
sa.ngii zamiin me.n
matluub ga.Dhaa banaa kar diyaa
us ke andar jaa.o
vo durusht lahje me.n bole
ham
gahre ga.Dhe me.n utar ga.e
unho.n ne
miTTii Daal kar
zamiin hamvaar kar lii
hame.n maut bhii
ujrat ke taur par milii hai

Mustafa Arbab
Nazm

la-makan

tamaam jism basaa hai mahak se gaare kii
gamak rahe hai.n pasiine ke itr se kap.De
ye vo hai likhtaa hai qismat jo haft taaro.n kii
ye vo hai jo ki banaataa rahaa hai taaj-mahal
KHudaa ne dii hai ise be-niyaazii ujrat me.n
makaa.n banaataa hai lekin sa.Dak pe rahtaa hai

Anwar Abbas
Nazm

magar-machh ke aansu

''naag hai apnaa mu.aavin to ko.ii baat nahii.n
kaam lenaa hai hame.n naag KHazaane pe biThaa lo apne
shahad kaa ghuu.nT samajh kar sam-e-qaatil pii jaa.o
kisii qiimat kisii ujrat pe use saath milaa milaa lo apne''
saaraa dhan jaataa hai to nisf luTaa dete hai.n
sunte hai.n bachche jo chiiKHe.n unhe.n afyuun khilaa dete hai.n

Makhmoor Jalandhari
Nazm

us basti ke rahne wale

ai chaa.ndii kii matvaalii kirno pechiida yahaa.n kii hai.n raahe.n
do haath kafan miltaa bhii nahii.n ghabraa ke jo marnaa bhii chaahe.n
puurii ujrat paatii bhii nahii.n shal ho ke Gariibo.n kii baahe.n
bevaa.o.n ke aa.nsuu be-qiimat be-kaar yatiimo.n kii aahe.n

Salam Sandelvi
Nazm

aurat ne janam diya mardon ko mardon ne use bazar diya

aurat ne janam diyaa mardo.n ko mardo.n ne use baazaar diyaa
jab jii chaahaa maslaa kuchlaa jab jii chaahaa dhutkaar diyaa
tultii hai kahii.n diinaaro.n me.n biktii hai kahii.n baazaaro.n me.n
na.ngii nachvaa.ii jaatii hai ayyaasho.n ke darbaaro.n me.n
ye vo be-izzat chiiz hai jo baT jaatii hai izzat-daaro.n me.n
aurat ne janam diyaa mardo.n ko mardo.n ne use baazaar diyaa
mardo.n ke liye har zulm ravaa aurat ke liye ronaa bhii KHataa
mardo.n ke liye har aish kaa haq aurat ke liye jiinaa bhii sazaa
mardo.n ke liye laakho.n seje.n, aurat ke liye bas ek chitaa
aurat ne janam diyaa mardo.n ko mardo.n ne use baazaar diyaa
jin siino.n ne in ko duudh diyaa un siino.n ko bevpaar kiyaa
jis kokh me.n in kaa jism Dhalaa us kokh kaa kaarobaar kiyaa
jis tan se uge ko.npal ban kar us tan ko zaliil-o-KHvaar kiyaa
sansaar kii har ik be-sharmii Gurbat kii god me.n paltii hai
chaklo.n hii me.n aa kar ruktii hai faaqo.n se jo raah nikaltii hai
mardo.n kii havas hai jo aksar aurat ke paap me.n Dhaltii hai
aurat ne janam diyaa mardo.n ko mardo.n ne use baazaar diyaa
aurat sansaar kii qismat hai phir bhii taqdiir kii heTii hai
autaar payambar jannatii hai phir bhii shaitaan kii beTii hai
ye vo bad-qismat maa.n hai jo beTo.n kii sej pe leTii hai
aurat ne janam diyaa mardo.n ko mardo.n ne use baazaar diyaa

Sahir Ludhianvi
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now