Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "yudh"

Nazm MATCHES FOR "yudh"

Nazm

jang na hone denge

ham jang na hone de.n
vishva-shaantii ke ham saadhak hai.n jang na hone de.nge
kabhii na kheto.n me.n phir KHuunii khaad phalegii
khaliyaano.n me.n nahii.n maut kii fasl khulegii
aasmaan phir kabhii na angaare uglegaa
atom se nagasaki phir nahii.n jalegaa
yuddh-vihiin vishv kaa sapnaa bhang na hone de.nge
jang na hone de.nge
hathiyaaro.n ke Dhero.n par jin kaa hai Deraa
mu.nh me.n shaantii baGal me.n bam dhoke kaa pheraa
kafan bechne vaalo.n se kah do chillaa kar
duniyaa jaan ga.ii hai un kaa aslii chehra
kaamyaab ho un kii chaale.n Dhang na hone de.nge
jang na hone de.nge
hame.n chaahiye shaantii zindagii ham ko pyaarii
hame.n chaahiye shaantii srijan kii hai tayyaarii
ham ne chhe.Dii jang bhuuk se biimaarii se
aage aa kar haath baTaa.e duniyaa saarii
harii-bharii dhartii ko KHuunii rang na lene de.nge
jang na hone de.nge
bhaarat paakistaan pa.Dosii saath saath rahnaa hai
pyaar kare.n yaa vaar kare.n dono.n ko hii sahnaa hai
tiin baar la.D chuke la.Daa.ii kitnaa mah.ngaa saudaa
ruusii bam ho yaa amerikii KHuun ek bahnaa hai
jo ham par guzrii bachcho.n ke sang na hone de.nge
jang na hone de.nge

Atal Bihari Vajpayee
Nazm

pir-e-tasma-e-pa

mere kaa.ndhe pe baiThaa ko.ii
pa.Dhtaa rahtaa hai injiil o qur.aan o ved
makkhiyaa.n kaan me.n bhinbhinaatii hai.n
zaKHmii hai.n kaan
apnii aavaaz kaise sunuu.n
raanaa hinduu thaa akbar musalmaan thaa
sanjai vo pahlaa insaan thaa
hastinaapur me.n jis ne qabl-e-masiih
television banaayaa
aur ghar baiThe ik andhe raaja ko
yudh kaa tamaasha dikhaayaa
aadmii chaa.nd par aaj utraa to kyaa
ye taraqqii nahii.n
ab se pahle, bahut pahle
jab zarra TuuTaa na thaa
chashma jauhar kaa phuuTaa na thaa
farsh se arsh tak jaa chukaa hai ko.ii
ye aur aisii bahut sii jahaalat kii baate.n
mere kaa.ndhe pe hotii hai.n

Kaifi Azmi
Nazm

purwanchal

mashriqii UP curfew me.n
ye dhartii kitnii sundar hai
ye sundar aur dukhii dhartii
ye dhaanii aa.nchal puurab kaa
tez raftaar rail ke saath
havaa me.n u.Dtaa jaataa hai
pa.Daa jhil-mil lahraataa hai
duur tak hare khet khaliyaan
ye dhartii aurat ko.ii kisaan
sambhaale sar par bhaarii bojh
chalii hai khet se ghar kii or
vahii ghar jis kii chhat par aaj
krodh kaa gidh ma.nDraataa hai
jhapaT kar par phailaataa hai
os se giilaa hai sabza
ki giile hai.n mere do nain
pa.De maaTii patthar ke Dher
vahii masjid mandir ke pher
tane logo.n ke tevar dekh
isii dhartii par soyaa puut
jaag kar tumhe.n manaataa hai
'kabiiraa' kuchh samjhaataa hai
jahaa.n ho.n nafrat ke ghamsaan
nahii.n rahte us jaa bhagvaan
nahii.n kartaa hai nazar rahiim
nahii.n karte hai.n pheraa raam
tumhaarii minnat kartaa hai
KHaak par siis jhukaataa hai
'Kabiiraa' kuchh samjhaataa hai
isii sarjuu nadiyaa ke paar
kamal-kunjo.n par jahaa.n bahaar
kha.De hai.n hare baa.ns ke jhunD
ga.Daa hai gautam kaa sandesh
khile hai.n jahaa.n basantii phuul
khudaa hai patthar par updesh
a.De jab do firqo.n kii aan
tule ho.n de dene par jaan
hai aslii jiit kii bas ye riit
ki dono.n jaa.e.n baraabar jiit
natiija-KHez yahii anjaam
na samjho varna ja.ng tamaam
hu.ii jis yudh me.n ik kii haar
vo hotaa rahegaa baaram-baar
na dono.n jab tak miT jaa.e.n
na dono.n jaa.e.n baraabar haar
yahii Takraa.o kaa hai qaanuun
yahii gautam kaa uttam gyaan
ki jis ke aage ek jahaan
adab se siis jhukaataa hai
tumhii to vaaris the is ke
tumhe.n kyuu.n bisraa jaataa hai
saje rahnumaa ke sar dastaar
pa.De.n paa.nDav ke gale me.n haar
jale hai.n jin ke chuulhe roz
bhare hai.n jin ke sadaa bhanDaar
are tuu muurakh kyuu.n har baar
jaan kar dhokaa khaataa hai
lahuu me.n aap nahaataa hai

Fahmida Riaz
Nazm

tere KHushbu mein base KHat

tere ruumaal tire KHat tire chhalle bhii ga.e
terii tasviire.n tire shoKH lifaafe bhii ga.e
ek yug KHatm hu.aa yug ke fasaane bhii ga.e
tere KHat aaj mai.n ga.ngaa me.n bahaa aayaa huu.n
aag bahte hu.e paanii me.n lagaa aayaa huu.n

Rajendra Nath Rahbar
Nazm

hindostani bachche

rah na sake ab is duniyaa me.n yug sarmaaya-daarii kaa
tum ko jhanDaa lahraanaa hai mehnat kii sardaarii kaa

Sahir Ludhianvi
Nazm

jap

aa mere andar aa
pavitra mahraan ke paanii
ThanDe miiThe maTyaale paanii
maTiyaale jiivan rang jal
dho de saaraa krodh kapaT
shahro.n kii dishaa.o.n kaa sab chhal
yuu.n sii.nch mujhe kar de merii miTTii jal-thal
tire tal kii kaalii chiknii miTTii se
maathe par tilak lagaa.uu.n
haath jo.D Da.nDvat karuu.n
o man ke bhed se gahre
haule haule saa.ns khii.nchte
om samaan amar
o mahaan saagar
mai.n utrii tere ThanDe jal me.n kamar kamar
tere ThanDe miiThe mehrbaan paanii se mu.nh dho luu.n
aur dho luu.n aa.nsuu
khaare aa.nsuu
tere miiThe paanii se dho luu.n
o mahaan maTiyaale saagar aa
sun mirii kathaa
mai.n ba.Dii abhaagan bhaag meraa
bedard haath me.n rahaa sadaa
TuuTaa meraa miTTii se naata
kaise TuuTaa
ik aa.ndhii ba.Dii bhayaanak laal chu.Dail
mujhe le u.Dii
uThaa kar paTkaa us ne kahaa.n se kahaa.n
tere charno.n me.n siis jhukaatii ek akelii jaan
mere saath meraa ko.ii miit nahii.n
ko.ii rang ruup ko.ii priit nahii.n
mirii an-ga.Dh phiikii murjhaatii bolii me.n ko.ii sa.ngiit nahii.n
mirii pii.Dhiyo.n ke biite yug mere saath nahii.n
bas ik nirda.ii dharam hai
jis kaa bharam nahii.n
vo dharam jo kahtaa hai miTTii mirii bairan hai
jo mujhe sikhaataa hai saagar meraa dushman hai
haa.n duur kahii.n
aakaash kii uu.nchaa.ii se pare
rahtaa hai KHudaa
itnaa ruukhaa
miTTii se jo.D nahii.n jis kaa
sab naate priit aur bair ke us kii kaaran mai.n kaise jo.Duu.n
mai.n miTTii meraa janam miTTii
mai.n miTTii ko kaise chho.Duu.n
o maTiyaale balvaan mahaa-saagar
mai.n ukh.Dii dhartii se
bhagvaan miraa ras suukh gayaa
phir bhii suntii huu.n apne lahuu me.n biite samay kii narm dhamak
vo samay jo mere janam se pahle biit gayaa
mere kaano.n me.n
ik shor hai jhar-jhar bahte naddii naalo.n kaa
aur ko.ii mahak ba.Dii be-kal hai
jo guu.nj banii mirii chhaatii se Takraatii hai
o mahaan saagar
jiivan-ras de
apne tal me.n jal-paudaa ban kar ja.D lene de
sadaa jiye
o mahaan saagar sindhuu
tuu sadaa jiye
aur ji.e.n tire paanii me.n phisaltii machhliyaa.n
shaant sukhii yuu.nhii
tire paanii me.n naav khete
tire baalak sadaa ji.e.n
o paalan-haar hamaare
dhartii ke rakhvaale
ann-daataa
tirii dhartii
narm retiilii mehrbaan sindh kii dhartii
sadaa jiye

Fahmida Riaz
Nazm

silsile sawalon ke

hazaaro.n sadiyaa.n guzar chukii hai.n
kisii samay me.n vo thii satvantii
kahii.n saavitrii
kahii.n thii miiraa
har ek yug me.n
aqiidato.n kii lahar me.n bhiigii
tapasyaa ke sehr me.n gum-sum
rivaayato.n ke nashe me.n Duubii
tumhaare qadmo.n kii gard ko vo tilak banaatii
diye jalaatii thii naqsh-e-paa par
janam janam kaa aTuuT rishta
nibaahe jaatii
hazaaro.n sadiyo.n safar kiyaa hai
nazar jamaa.e
tumhaare piichhe
tumhaare dukh par dukhii hu.ii hai
tumhaare sukh par sukhii hu.ii hai
magar bataa.o
hazaaro.n sadiyo.n ke darmiyaa.n ko.ii aisaa lamha
jo tum ne is ke liye jiyaa ho
sivaa.e aa.nsuu ke ko.ii jugnuu
kabhii jo aa.nchal me.n ja.D diyaa ho
puraane bargad pe ek dhaagaa
kahii.n to us ke bhii naam kaa ho
a.ndherii taaqo.n pe us kii KHaatir
rakhaa hu.aa bhii to ik diyaa ho
nahii.n hai kuchh bhii
kahii.n nahii.n hai
vo apnii taariiKH me.n tumhaaraa
likhe bhii gar naam
kis tarah se

Kahkashan Tabassum
Nazm

patthar

mai.n ik ma.asuum shahrii thaa
sharaafat se sabhii ke saath rahtaa thaa
mohazzab taur se jiitaa thaa
sab ke kaam aataa thaa
kabhii mai.n ne kisii kaa dil nahii.n to.Daa
kisii kaa sar nahii.n pho.Daa
kisii tarkash se ko.ii tiir kyaa tinkaa nahii.n chho.Daa
kisii kii piiTh me.n KHanjar nahii.n bho.nkaa
kisii ke jism par baaruud kaa golaa nahii.n phe.nkaa
kisii ko aag me.n mai.n ne nahii.n jho.nkaa
kisii kaa haq nahii.n maaraa
kisii kaa zar nahii.n luuTaa
ko.ii KHirman nahii.n phuu.nkaa
kisii building kisii gaa.Dii kisii mahfil me.n ko.ii bam nahii.n rakkhaa
mire haatho.n kisii kaa ghar nahii.n uj.Daa
kisii kaa dar nahii.n ukh.Daa
ko.ii kumba nahii.n bikhraa
ko.ii maathaa nahii.n siku.Daa
kisii kii raah me.n ro.Daa nahii.n aTkaa
kisii ke kaam me.n mai.n ne kabhii raKHna nahii.n Daalaa
kisii ke vaaste dil me.n kabhii kiina nahii.n paalaa
ko.ii farmaan haakim kaa kabhii mai.n ne nahii.n Taalaa
ko.ii gheraa nahii.n laa.nghaa
ko.ii aa.ngan nahii.n phaa.ndaa
magar phir bhii qayaamat mujh pe TuuTii hai
ajab Gaarat-garii kaa qahr barsaa hai
ajab saffaak KHanjar dil me.n utraa hai
ki merii ruuh ab tak tilmilaatii hai
ki meraa zehn ab bhii jhunjhunaataa hai
ki merii saa.ns ab bhii la.Dkha.Daatii hai
samajh me.n kuchh nahii.n aataa
ki mai.n ne kyaa bigaa.Daa hai
mire kis jurm kii mujh ko milii hai
ye sazaa aaKHir
ye gutthii kis tarah kholuu.n
sabab kis se yahaa.n puuchhuu.n
kidhar jaa.uu.n
kise rokuu.n
sabhii chehre yahaa.n patthar
sabhii aa.nkhe.n yahaa.n patthar
basaarat me.n bharaa patthar
samaa.at me.n basaa patthar
zabaano.n me.n ga.Daa patthar
adaalat me.n kha.Daa patthar
har ik qaanuun me.n patthar
har ik aa.iin me.n patthar
har ik insaaf me.n patthar
har ik aavaaz me.n patthar
har ik ehsaas me.n patthar
ye patthar yug ke patthar se bhii bhaarii hai
nagiine kii tarah tarshaa hu.aa hai
aur hiire kii anii kii tarah us kii tez noke.n hai.n
bahut shaffaaf hai ye aur is me.n ik tamaddun hai
mai.n is patthar se sar pho.Duu.n
ki apnii zindagii chho.Duu.n
ki apnaa raasta mo.Duu.n
ki ban jaa.uu.n mai.n KHud patthar
samajh me.n kuchh nahii.n aataa

Ghazanfar
Nazm

ibn-ul-waqt

aag ke sho.ale utaaro halq me.n
gaa.D do kiile.n dha.Daktii chhaatiyo.n me.n
Daal do gardan me.n phande rassiyo.n ke
qatl kar lo KHuun kii nadiyaa.n bahaa lo
ho nihattaa ko.ii to golii chalaa lo
phir bhii ho ko.ii kasar to puurii kar lo
jiit kaa elaan kar do
phir bhii tum Darte rahoge
aur har yug me.n tumhaarii haar hii hotii rahegii
phir bhii tum chehre badal kar har zamaane me.n rahoge
aur sadiyo.n tak
yahii ik silsila chaltaa rahegaa

Aabid Adeeb
Nazm

shaKH-e-adam

suno ye nazm kabhii nahii.n ho saktii
aur tum jaante ho
jab jazbe adhuure rah jaa.e.n
to zamiine.n banjar ho jaatii hai.n
vaqt guzraa kahaa.n
zaKHm vaise hii abhii riste hai.n
dil bhar aayaa us jagah
jahaa.n mohabbat naa-mohabbat se milii
jab vajuud ek savaal banaa
jab ruuh ne jism kaa saath chho.D diyaa
jab du.aa.o.n me.n taasiir na rahii
qadam ba.Dhe to bahut KHuluus se the
jaante the ki raah kaThin hai
safar dushvaar hai
bas ik aas thii
ki ye safar raa.egaa.n to nahii.n
ham akele to nahii.n
hamaare saath chalne kii chaah me.n
hamaaraa safar bhii hai
magar nahii.n jaante the
ki ham to apne aap se judaa ho ga.e
ham na jaan sake
ki miTTii se vo mahak hii uTh ga.ii
jo dil ko dil se milaatii hai
so ab tak likhii ga.ii har nazm
naa-mukammal hii to hai
kisii piir-daanaa ne kahaa thaa
bahut sii naagavaar aavaaze.n
tumhaare dhyaan ko bhaTkaa.egii.n
magar tum piichhe mu.D ke mat dekhnaa
varna patthar ke ho jaa.oge
so ai piir-daanaa
mai.n nahii.n dekhtii piichhe mu.D ke
jab aavaaze.n mere dil ko hadaf banaatii hai.n
mai.n jaantii huu.n
ye aavaaze.n mujhe ta.ng karne ke liye hai.n
ye mujhe roknaa chaahtii hai.n aage ba.Dhne se
duniyaa ke har bure maqsad ke aa.De aatii hai.n
ye aavaaze.n
ye kaa.nTo.n bharii aavaaze.n
jo lahuuluhaan kar detii hai.n KHuluus bhare dil ko
jaise kholtaa hu.aa paanii jalaa detaa hai khaal ko
aise hii jalaayaa hai in aavaazo.n ne
duniyaa se har ehsaas ko
lekin
mai.n ne bachaayaa apne sach ko
aur chaltii jaa rahii huu.n
sab se alag
sun ke anjaan rahne kaa amal kuchh itnaa aasaan to nahii.n
bas ek diivaangii hai
jo mujhe bechain kiye hu.e hai
ek ajab sii khoj hai
jo ghuTan ban ga.e hai.n saa.ns lene ke amal me.n
magar tuu kahaa.n hai piir-daanaa
to jo rahnumaa thaa
musiibat ke maaro.n kaa
kahaa.n bhaTak rahaa hai
to kyaa kal yug kii vo gha.Dii aa ga.ii
ki piir-daanaa ko shikaar kar le ga.ii.n
naa-gavaar aavaaze.n
afsos-sad-afsos

Injila Hamesh
Nazm

nirwan ki talash

yashodhraa thak ke so ga.ii thii
aur raahul bistar par jaagtaa thaa
magar siddhaarth
mahal se baahar nikal chukaa thaa
us kaa hirdai badal chukaa thaa
badan pe geru.a libaas Daale
vo siidhaa jangal ko jaa rahaa thaa
ye man hii man vo vichaartaa thaa
ye dhan ye daulat
ye aish-o-ishrat
ye praan kaayaa
ye moh maayaa
hai sab paraayaa
kahii.n nahii.n shaa.ntii kii chhaayaa
kahii.n nahii.n shaa.ntii kii chhaayaa
prabhuu ye kyo.n tuu ne jag banaayaa
ye jag jahaa.n jug jugaantar se
anant praanii asankh maanav
kaamnaa vaasnaa kii agnii me.n jal rahaa hai
vo mirgtirishnaa ko jal samajh kar
KHud aap apne ko chhal rahaa hai
dukho.n ke sahraa me.n chal rahaa hai
yahaa.n pe jiivan maran bhii dukh hai
birah bhii dukh hai milan bhii dukh hai
shariir aur aatmaa bhii dukh hai
triptii aur tirishnaa bhii dukh hai
magar kahii.n moksh kaa ko.ii raasta nahii.n hai
kahii.n bhii nirvaan kaa ko.ii silsila nahii.n hai
mere bhagvaan
mai.n yug ke andhe vishaal ban me.n
kab se nirvaan Dhuu.nDhtaa huu.n
manush kaa kalyaan Dhuu.nDhtaa huu.n
mai.n apnii pahchaan Dhuu.nDhtaa huu.n

Raza Ashk
Nazm

koi basti ki mujh mein basti hai

mai.n aaKHir kis kii jaagat jaagtaa huu.n
papoTo.n me.n ye kis paanii kaa namkin zaa.iqa hai
mirii putlii me.n kis kii raat hai
aur qarniya me.n kaun se yug kaa saveraa hai
ye din bhar kaun
mizhgaanii kivaa.Do.n ko musalsal kholtaa aur band kartaa hai
mirii taar-e-nazar par baiTh kar
aaKHir zamaane me.n nazar kis kii utartii hai
mai.n aa.nkho.n se ye kis manzar ke andar bhaagtaa huu.n
mai.n aaKHir kis kii jaagat jaagtaa huu.n?
bhalaa mai.n kis kaa sonaa so rahaa huu.n
ye reg-KHvaab par bante biga.Dte kyaa nishaa.n hai.n
mire andar to jitne qaafile chalte hai.n
saare ajnabii hai.n
mai.n har ik KHvaab me.n ko.ii shanaasaa Dhuu.nDtaa huu.n
ye kaisii aurte.n hai.n
jo sar me.n ret kaa afshaa.n bhare
mujh ko jaka.Dtii hai.n
jo baad-az-iKHtalaat aaho.n se chiiKHo.n se pighal kar
ret ho jaatii hai.n giilii ret me.n!!
ye bachche kis sadii ke hai.n
jo apne qahqaha-aavar khilaune mere haatho.n me.n
thamaa kar bhaag jaate hai.n
ye kis maabad ke jogii hai.n
sahiifo.n kii zabaa.n me.n bolte hai.n
in ke farGul pha.D.pha.Daate hai.n
havaa me.n riish u.Dtii hai
ye mai.n kis kii KHushii ko ha.ns rahaa huu.n
kis kaa ronaa ro rahaa huu.n
bhalaa mai.n kis kaa sonaa so rahaa huu.n?

Waheed Ahmad
Nazm

dipawali

jab se aa.ii hai diipaavalii
har taraf chhaa.ii hai raushnii
har jagah chaahato.n ke diye
shaam hote hii jalne lage
phul-jha.Diyo.n kaa baazaar hai
ye paTaaKHo.n kaa tehvaar hai
diipo.n kaa hai suhaanaa samaa.n
jin se dhartii banii kahkashaa.n
jitne rocket paTaaKHe chale
aasmaa.n par lage hai.n bhale
ho ga.ii.n duur taariikiyaa.n
ab hai.n raushan zamii.n aasmaa.n
jab se aa.ii hai.n diipaavalii
har taraf chhaa.ii hai raushnii
ek mauqa hai pahchaan kaa
dil milaatii hai insaan kaa
chaahato.n kii ye tasviir hai
ik na.e yug kii ta.abiir hai

Adil Hayat
Nazm

sagar manthan

ye merii muskaan faqat merii hii nahii.n hai
ye sab kii hai
is duniyaa kii saarii ka.Dvii ka.Dvii baate.n
saare dukh
saarii ka.DvaahaT
jiivan kii zahriilii dukh bharii kahaanii
KHud kahtaa
KHud hii suntaa huu.n
KHushiyaa.n sab kii dukh mere hai.n
har har yug me.n
janm liyaa hai
mai.n har yug me.n paidaa huu.ngaa
amrit duu.ngaa zahr piyuu.ngaa
mai.n is yug kaa shiiv-shankar huu.n

Saghar Mehdi
Nazm

afsar aur ghoDa

muddat se yahii duniyaa kahtii chalii aa.ii hai
bachte raho har lamha
afsar kii agaa.Dii se gho.De kii pichhaa.Dii se
lekin ye nayaa yug hai
is daur me.n batlaa.o
kaise ko.ii bach paa.e
afsar kabhii gho.Daa hai
gho.Daa kabhii afsar hai

Mohammad Yusuf Papa
Nazm

aawaz ke moti

shor bharii duniyaa kii dukhii tanhaa.ii me.n
umr kii jis manzil pe jis jiivan kii Dagar par
jazbo.n kii jis raahguzar par
dil kaa musaafir pal-do-pal ko Thahregaa
us kii sadaa ke hamdam haath
bujhii hu.ii bezaar samaa.at ke shaane thapke.nge
man kaa dukh baa.nTe.nge
ra.nj KHushii mausam tyauhaar
vasl judaa.ii dard qaraar
ummiido.n kii mastii TuuTe KHvaabo.n kii uljhan
zulm baGaavat gaa.nv vatan
ahd-e-kuhan ke ramz na.e yug kii tafsiire.n
ishq ibaadat aa.iina-KHaane tanviire.n

Abdul Ahad Saaz
Nazm

rag-yug ki nazmen

haashiya-e-diivaar kii suurat
Dher sunahraa
piile suukhe patto.n kaa
charmaraa kartaa zarar se aarii
KHaak me.n rultii charmar us kii suntaa hu.aa
khi.Dkii se chipkaa thaa kha.Daa vo be-parvaa
har aahaT ke har aavaaz ke Dhaa.nche me.n
re.ng rahaa berii bhedii
gahnaa itnaa por por sunahraa laade
Tahnii Tahnii jogan pairaagan
chup kii daad kamaanaa chaahe.n
som lataa.e.n
raagniyaa.n sab
kyaa diipak kyaa megh
raag-yug biitaa
kab biitaa raag-yug
tire gaa.nv kii chhaa.nv
teraa singhaasan u.Dan-khaTolaa
kin Tiilo.n ke tale

Shafiq Fatima Shera
Nazm

shahr-e-nawa

sab chaman chaman gul hauz labaalab saa.e ghane
jho.nko.n kii suurat kii ravaa.n-davaa.n
uftaada ba-zaahir sab raahe.n
rahtii hai.n paiham sargardaa.n
sab agle pichhle yug
sab baste uja.Dte gaa.nv nagar
sharnaathii nirvaasii
paiham dohraate hu.e
vo biitii baate.n
jin kaa ko.ii ant nahii.n

Shafiq Fatima Shera
Nazm

dadi amman

daadii ammaa.n hame.n sunaa.o ab ik na.ii kahaanii
jis me.n zaalim raaja na ho na hii zaalim raanii
jis me.n bhuut pret dev aur jinnaato.n kii baat na ho
jis me.n shahzaadii kii KHaatir shahzaade kii maat na ho
jis me.n ko.ii lobhii luTeraa saat samundar se na aa.e
jis me.n sone kii chi.Diyaa ke pa.nkho.n ko nochaa na jaa.e
aaj ke yug me.n in qisso.n kii baat hu.ii puraanii
daadii ammaa.n hame.n sunaa.o ab ik na.ii kahaanii
na.ii kahaanii jis me.n dahqaa.n jhuum rahe ho.n kheto.n me.n
na.ii kahaanii jis me.n koyal magan ho sukh ke giito.n me.n
na.ii kahaanii jis me.n dhartii ugal rahii ho sonaa
amn-o-mohabbat ke giito.n se guu.nj rahaa ho har konaa
na.ii kahaanii jis me.n ham chandaa maamaa tak jaa.e.n
aur chandaa-nagrii se jhuulaa jhuul ke vaapas aa.e.n
na.ii kahaanii kitnii sundar kitnii bhalii suhaanii
daadii ammaa.n hame.n sunaa.o ab ik na.ii kahaanii

Sayyad Safdar Raza Khandvi
Nazm

mujhse puchho

mai.n har daur me.n janmaa
baate.n har yug kii
dohraa saktaa huu.n

Mushtaq Ali Shahid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now