Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "zzi"

Nazm MATCHES FOR "zzi"

Nazm

mere hamdam mere dost!

gar mujhe is kaa yaqii.n ho mire hamdam mire dost
gar mujhe is kaa yaqii.n ho ki tire dil kii thakan
tirii aa.nkho.n kii udaasii tere siine kii jalan
merii dil-juu.ii mire pyaar se miT jaa.egii
gar miraa harf-e-tasallii vo davaa ho jis se
jii uThe phir tiraa uj.Daa hu.aa be-nuur dimaaG
terii peshaanii se Dhal jaa.e.n ye tazliil ke daaG
terii biimaar javaanii ko shifaa ho jaa.e
gar mujhe is kaa yaqii.n ho mire hamdam mare dost
roz o shab shaam o sahar mai.n tujhe bahlaataa rahuu.n
mai.n tujhe giit sunaataa rahuu.n halke shiirii.n
aabshaaro.n ke bahaaro.n ke chaman-zaaro.n ke giit
aamad-e-sub.h ke, mahtaab ke, sayyaaro.n ke giit
tujh se mai.n husn-o-mohabbat kii hikaayaat kahuu.n
kaise maGruur hasiinaa.o.n ke barfaab se jism
garm haatho.n kii haraarat me.n pighal jaate hai.n
kaise ik chehre ke Thahre hu.e maanuus nuquush
dekhte dekhte yak-laKHt badal jaate hai.n
kis tarah aariz-e-mahbuub kaa shaffaaf bilor
yak-ba-yak baada-e-ahmar se dahak jaataa hai
kaise gulchii.n ke liye jhuktii hai KHud shaaKH-e-gulaab
kis tarah raat kaa aivaan mahak jaataa hai
yuu.nhii gaataa rahuu.n gaataa rahuu.n terii KHaatir
giit buntaa rahuu.n baiThaa rahuu.n terii KHaatir
par mire giit tire dukh kaa mudaavaa hii nahii.n
naGma jarraah nahii.n muunis-o-Gam KHvaar sahii
giit nashtar to nahii.n marham-e-aazaar sahii
tere aazaar kaa chaara nahii.n nashtar ke sivaa
aur ye saffaak masiihaa mire qabze me.n nahii.n
is jahaa.n ke kisii zii-ruuh ke qabze me.n nahii.n
haa.n magar tere sivaa tere sivaa tere sivaa

Faiz Ahmad Faiz
Nazm

apni malka-e-suKHan se

tere labo.n se chashma-e-haivaa.n miraa kalaam
terii laTo.n se mauja-e-tuufaa.n miraa kalaam
terii nazar se tuur-e-ba-daamaa.n miraa kalaam
tere suKHan se naGma-e-yazdaa.n miraa kalaam
tuu hai payaam-e-aalam-e-baalaa mire liye
ik vahii-e-zii-hayaat hai goyaa mire liye

Josh Malihabadi
Nazm

ek tarana mujahidin-e-filistin ke liye

ham jiite.nge
haqqaa ham ik din jiite.nge
bil-aaKHir ik din jiite.nge
kyaa KHauf zii-yalGaar-e-a.adaa
hai siina sipar har Gaazii kaa
kyaa KHauf zii-yuurish-e-jaish-e-qazaa
saf-basta hai.n arvaah-u-shshuhadaa
Dar kaahe kaa

Faiz Ahmad Faiz
Nazm

tum ye kahte ho ab koi chaara nahin

apne bas kaa nahii.n baar-e-sa.ng-e-sitam
baar-e-sa.ng-e-sitam, baar-e-kohsaar-e-Gam
jis ko chhuu kar sabhii ik taraf ho ga.e
baat kii baat me.n zii-sharaf ho ga.e

Faiz Ahmad Faiz
Nazm

sab jaante hain ilm se hai zindagi ki ruh

sab jaante hai.n ilm se hai zindagii kii ruuh
be-ilm hai agar to vo insaa.n hai naa tamaam
be-ilm-o-be-hunar hai jo duniyaa me.n ko.ii qaum
nature kaa iqtizaa hai rahe ban ke vo Gulaam
ta.aliim agar nahii.n hai zamaane ke hasb-o-haal
phir kyaa umiid-e-daulat-o-aaraam-o-ihteraam
sayyad ke dil me.n naqsh ho is KHayaal kaa
Daalii binaa-e-madrasa le kar KHudaa kaa naam
sadme uThaa.e ranj sahe gaaliyaa.n sunii.n
lekin na chho.Daa qaum ke KHaadim ne ye kaam
dikhlaa diyaa zamaane ko zor-e-dil-o-dimaaG
batlaa diyaa vo karte hai.n karne vaale kaam
niyyat jo thii ba-KHair to barkat KHudaa ne dii
collage hu.aa durust ba-sad shaan-o-ehtishaam
sarmaa.e me.n kamii thii sahaaraa ko.ii na thaa
sayyad kaa dil thaa darpai takmiil-e-intizaam
aaKHir uThaa safar ko vo mard KHasta paye
ahbaab chand saath the zii-ilm-o-KHush-kalaam
qismat ki rahbarii se milii manzil-e-muraad
farmaa.n-ravaa-e-mulk-e-dakan ko kiyaa salaam
haalat dikhaa.ii aur zaruurat bayaan kii
KHuubii se iltimaas kiyaa qaum kaa payaam
rahm aa gayaa huzuur ko haalat pe qaum kii
phir kyaa thaa maujzan hu.aa dariyaa-e-faiz-e-aam
maahaana do hazaar kiyaa ik hazaar se
ummiid se ziyaada ataa thii ye laa-kalaam
'akbar' kii ye du.aa hai KHudaa kii janaab me.n
taa-hashr is ra.iis-o-riyaasat ko ho qayaam
kyaa vaqt par hu.ii hai ki be-ehtijjaj-e-fikr
taariik apnii aap hai fayyazii-e-nizaam

Akbar Allahabadi
Nazm

zalzala

ek shab halkii sii jumbish mujhe mahsuus hu.ii
mai.n ye samjhaa mire shaano.n ko hilaataa hai ko.ii
aa.nkh uThaa.ii to ye dekhaa ki zamii.n hiltii hai
jis jagah shai ko.ii rakkhii hai vahii.n hiltii hai
sahn-o-diivaar kii jumbish hai to dar hilte hai.n
baahar aayaa to ye dekhaa ki shajar hilte hai.n
ko.ii shai jumbish-e-paiham se nahii.n hai mahruum
ek taaqat hai pas-e-parda magar naa-maaluum
chand lamhe bhii ye naira.ngii-e-aalam na rahii
zalzala KHatm hu.aa jumbish-e-paiham na rahii
hairat-e-diid se a.ngusht-ba-dandaa.n thaa mai.n
shaahid-e-jalva-e-qahhaarii-e-yazdaa.n thaa mai.n
daf.atan ek sadaa aah-o-fuGaa.n kii aa.ii
mere allaah ye gha.Dii kis pe musiibat laa.ii
gul kiyaa zalzala-e-qahr ne kis ghar kaa charaaG
kis pe Dhaayaa ye sitam kis ko diyaa hijr kaa daaG
jaa ke nazdiik ye nazzaara-e-hirmaa.n dekhaa
ek hasiina ko ba-sad haal-e-pareshaa.n dekhaa
baizavii shakl me.n the husn ke jalve pinhaa.n
aa.nkh me.n sehr bharaa thaa magar aa.nsuu the ravaa.n
mai.n ne ghabraa ke ye puuchhaa ki ye haalat kyuu.n hai
terii hastii hadaf-e-ra.nj-o-musiibat kyuu.n hai
bolii ai shaa.er-e-ra.ngiin-tabii.at mat puuchh
roz-o-shab dil pe guzartii hai qayaamat mat puuchh
log duniyaa ko tirii mujh ko zamii.n kahte hai.n
ahl-e-zar mujh ko mohabbat me.n hasii.n kahte hai.n
mai.n unhii.n husn-parasto.n kii huu.n ta.Dpaa.ii hu.ii
tujh se kahne ko ye raaz aa.ii huu.n ghabraa.ii hu.ii
zar-parasto.n se hai.n bad-dil mirii duniyaa ke Gariib
hai.n giraftaar-e-salaasil mirii duniyaa ke Gariib
mujh se ye taaza balaa.e.n nahii.n dekhii jaatii
zaalimo.n kii ye jafaa.e.n nahii.n dekhii jaatii.n
chaahtii huu.n mire ushshaaq me.n kuchh farq na ho
muft me.n kashtii-e-ehsaas-e-vafaa Garq na ho
ek vo jis ko mayassar ho.n imaaraat-o-naqiib
ek vo jis ko na ho phuu.ns kaa chhappar bhii nasiib
saahab-e-daulat-o-zii-rutba-o-zardaar ho ek
be-navaa Gam-zada-o-bekas-o-laachaar ho ek
ek muKHtaar ho, aura.ng-e-jahaa.nbaanii kaa
ik muraqqa.a ho Gam-o-ra.nj-o-pareshaanii kaa
saKHt nafrat hai mujhe apne parastaaro.n se
chhiin lete hai.n mujhe mere talab-gaaro.n se
chiira-dastii kaa miTaa detii hai.n sab jaah-o-jalaal
haif-sad-haif ki haa.il hai Gariibo.n kaa KHayaal
ye na hote to dikhaatii mai.n qayaamat kaa samaa.n
ye na hote to miTaatii mai.n Guruur-e-insaa.n
ek karvaT me.n badal detii nizaam-e-aalam
ik ishaare hii me.n ho jaatii hai ye mahfil barham
ik tabassum se jahaa.n barq-ba-daamaa.n hotaa
na ye aaraa.ishe.n hotii.n na ye saamaa.n hotaa
har adaa puuchhtii sarmaaya-parasto.n ke mizaaj
kuchh to farmaa.iye hazrat ki hai.n kis haal me.n aaj
lakh-pati sa.nkh-patii be-sar-o-saamaa.n hote
jaan bach jaa.e bas is baat ke KHvaahaa.n hote
barsar-e-KHaak nazar aate hai.n qasr-o-aivaa.n
ashk-e-KHuunii.n se mire aur bhii uThte tuufaa.n
merii aaGosh me.n sab ahl-e-sitam aa jaate
mere bartaav se bas naak me.n dam aa jaate
ba.az ke mu.nh Gam-e-aalaam se kaale kartii
ba.az ko maut kii devii ke havaale kartii
KHuun-e-zardaar hii mazduur kii mazduurii hai
mai.n jo KHaamosh huu.n ye baa.is-e-majbuurii hai
merii aaGosh me.n jaabir bhii hai.n majbuur bhii hai.n
mere daaman hii se vaabasta ye mazduur bhii hai.n
zabt kartii huu.n jo Gam aataa hai sah jaatii huu.n
josh aataa hai magar kaa.np ke rah jaatii huu.n

Shakeel Badayuni
Nazm

ilm ki zarurat

jahaa.n me.n har taraf hai ilm hii kii garm-baazaarii
zamii.n se aasmaa.n tak bas isii kaa faiz hai jaarii
yahii sar-chashma-e-aslii hai tahziib-o-tamaddun kaa
baGair is ke bashar honaa bhii hai ik saKHt biimaarii
banaataa hai yahii insaan ko kaamil-tariin insaa.n
sikhaataa hai yahii aKHlaaq o iisaar o ravaa-daarii
yahii qaumo.n ko pahu.nchaataa hai baam-e-auj-o-rif.at par
yahii mulko.n ke andar phuu.nktaa hai ruuh-e-bedaarii
isii ke naam kaa chaltaa hai sikka saare aalam me.n
isii ke sar pe rahtaa hai hamesha taaj-e-sardaarii
isii ke sab karishme ye nazar aate hai.n duniyaa me.n
isii ke dam se raunaq aalam-e-imkaa.n kii hai saarii
ye laa-silkii, ye telephone ye raile.n, ye tayyaare
ye zer-e-aab o baalaa-e-falak insaa.n kii tarraarii
huduud-e-istavaa qutbain se yuu.n ho ga.e mudGam
ki hai ab rub.a masko.n jaise ghar kii chaar-diivaarii
samundar ho ga.e paayaab sahraa bin ga.e gulshan
kiyaa science ne bhii e.ataraaf-e-ijz-o-naachaarii
buKHaar o barq kaa jarraar lashkar hai ab aamaada
ugalvaa le zamiin o aasmaa.n kii daulate.n saarii
Garaz chaaro.n taraf ab ilm hii kii baadshaahii hai
ki us ke baazuu.o.n me.n quvvat-e-dast-e-ilaahii hai
nigaah-e-Gaur se dekho agar haalaat-e-insaanii
to ho saktaa hai hal ye uqda-e-mushkil ba-aasaanii
vahii qaume.n taraqqii ke madaarij par hai.n faa.eq-tar
ki hai jin me.n tamaddun aur siyaasat kii faraavaanii
isii ke zo.am me.n hai germany charKH-e-tafaaKHur par
isii ke zor par mirriiKH kaa ham-sar hai jaapaanii
isii kii quvvat-e-baazuu pe hai maGruur america
isii ke bil par la.Dkii ho rahii hai rustam-e-saanii
ishaare par isii ke naql-o-harakat hai sab italy kii
isii ke taaba-e-farmaan hai.n ruusii o iiraanii
isii ke jumbish-e-abruu pe hai england kaa Garra
isii ke hai.n sab aavurde francisi o albaanii
ko.ii mulk ab nahii.n jin me.n ye jauhar ho na raKHshanda
na Gaafil is se chiinii hai.n na shaamii hai.n na afGaanii
baGair is ke jo rahnaa chaahte hai.n is zamaane me.n
samajh rakkhe.n fanaa un ke liye hai hukm-e-rabbaanii
zamaana phe.nk degaa KHud unhe.n qa.ar-e-halaakat me.n
vo apne haath se ho.nge KHud apnii qabr ke baanii
zamaane me.n jise ho saahib-e-fat.h-o-zafar honaa
zaruurii hai use ilm-o-hunar se bahra-var honaa
taraqqii kii khulii hai.n shaahraahe.n dahr me.n har suu
nazar aataa hai tahziib-o-tamaddun se jahaa.n mamluu
chale jaate hai.n u.Dte shahsavaaraan-e-falak-paimaa
KHiraaj-e-tahniyat lete hu.e karte hu.e jaaduu
guzarte jaa rahe hai.n duusro.n ko chho.Dte piichhe
kabhii hotaa hai sahraa mustaqar un kaa kabhii Taapu
kamar baa.ndhe hu.e din raat chalne par hai.n aamaada
dimaaG afkaar se aur dil vufuur-e-shauq se maluul
alag rah kar KHayaal-e-zahmat o ehsaas-e-raahat se
lage hai.n apnii apnii fikr me.n baa-KHaatir-e-yaksuu
magar ham hai.n ki aslan his nahii.n ham ko ko.ii is kii
hamaare paa-e-himmat in maraahil me.n hai.n be-qaabuu
jahaa.n pahlaa qadam rakkhaa thaa roz-e-avvalii.n ham ne
nahii.n sarke is apne aslii markaz se ba-qadr-e-muu
ye haalat hai ki ham par band hai har ek darvaaza
nazar aataa nahii.n hargiz ko.ii ummiid kaa pahluu
magar vaa-hasrataa phir bhii ham apne zo.am-e-baatil me.n
samajhte hai.n zamaane bhar se aage KHud ko manzil me.n
zaruurat hai ki ham me.n raushnii ho ilm kii paidaa
nazar aa.e hame.n bhii taaki asl-e-haalat-e-duniyaa
hame.n ma.aluum ho haalaat ab kyaa hai.n zamaane ke
hamaare saath kaa jo qaafila thaa vo kahaa.n pahu.nchaa
jo pastii me.n the ab vo jalva-gar hai.n baam-e-rif.at par
jo baalak be-nishaa.n the aaj hai in kaa alam barpaa
hamaarii KHuubiyaa.n sab duusro.n ne chhiin lii.n ham se
zamaane ne hame.n itnaa jhi.njho.Daa kar diyaa na.ngaa
ravaa-daarii, uKHuvvat, dostii, iisaar, hamdardii
KHayaal-e-mulk-o-millat dard-e-qaum, andesha-e-fardaa
ye sab jauhar hamaare the kabhii ai vaa.e-mahruumii
bane hai.n KHuubii-e-qismat se jo ab Gair kaa hissaa
agar ho jaa.e.n raaGib ab bhii ham ta.aliim kii jaanib
to kar sakte hai.n ab bhii mulk me.n ham zindagii paidaa
bahut kuchh vaqt ham ne kho diyaa hai lekin is par bhii
agar chaahe.n to kar de.n pesh-rau ko apne ham paspaa
nikammaa kar diyaa hai kaahilii ne go hame.n lekin
rago.n me.n hai hamaarii KHuun abhii tak dau.Dtaa phirtaa
ko.ii maKHfii haraarat gar hamaare dil ko garmaa de
hamaare jism me.n phir zindagii kii ruuh dau.Daa de
vatan vaalo bahut Gaafil rahe ab hosh me.n aa.o
uTho be-daar ho aql-o-KHirad ko kaam me.n laa.o
tumhaare qaum ke bachcho.n me.n hai ta.aliim kaa fuqdaa.n
ye gutthii saKHt pechiida hai is ko jald suljhaa.o
yahii bachche bil-aaKHir tum sabho.n ke jaa-nashii.n ho.nge
tum apne saamne jaisaa unhe.n chaaho banaa jaa.o
bahut hii ra.nj-dah ho jaa.egii us vaqt kii Gaflat
kahii.n aisaa na ho mauqa.a nikal jaane pe pachhtaa.o
ye hai kaar-e-aham do chaar is ko kar nahii.n sakte
KHudaa-raa tum bhii apne farz kaa ehsaas farmaa.o
ye bojh aisaa nahii.n jis ko uThaa le.n chaar chhe mil kar
sahaaraa do, sahaaraa duusro.n se is me.n dilvaa.o
jo zii-ehsaas hai.n haasil karo tum KHidmate.n un kii
jo zii-parvaa hai.n un ko jis tarah ho us taraf laa.o
Garaz jaise bhii ho jis shakl se bhii ho ye laazim hai
tum apne qaum ke bachcho.n ko ab ta.aliim dilvaa.o
agar tum musta.iddii ko banaa loge shi.aar apnaa
yaqii.n jaano ki mustaqbil hai behad shaandaar apnaa
KHudaavandaa! du.aa.o.n me.n hamaarii ho asar paidaa
shab-e-Gaflat hamaarii phir kare nuur-e-sahar paidaa
hamaare saare KHvaabiida qavaa be-daar ho jaa.e.n
sar-e-nau ho phir in me.n zindagii kii karr-o-farr paidaa
hame.n ehsaas ho ham kaun the aur aaj ham kyaa hai.n
kare.n maahaul-e-mulkii ke liye gahrii nazar paidaa
milaa rakkhaa hai apne jauhar-e-kaamil ko miTTii me.n
ham ab bhii KHaak se kar sakte hai.n la.al-o-guhar paidaa
agar chaahe.n to ham mushkil vatan kii dam me.n hal kar de.n
hazaaro.n suurate.n kar sakte hai.n ham kaargar paidaa
ba-zaahir go ham ik tuuda hai.n bilkul raakh kaa lekin
agar chaahe.n to KHaakistar se kar de.n sau sharar paidaa
vatan kaa nakbat o aflaas kho de.n ham ishaare me.n
jahaa.n Thokar lagaa de.n ho vahii.n se kaan-e-zar paidaa
ham is manzil ke aaKHir par pahu.nch kar bil-yaqii.n dam le.n
agar kuchh taaza-dam ho jaa.e.n apne ham-safar paidaa
jo koshish muttahid ho kar kahii.n ik baar ho jaa.e
yaqii.n hai mulk kii qismat kaa be.Daa paar ho jaa.e

Ahmaq Phaphoondvi
Nazm

hum

vo be-KHabar hai
ki shaatir-e-vaqt kii nazar me.n
ko.ii ikaa.ii
shajar hajar ho ki zii-nafas ho
nizaam-e-kul se alag nahii.n hai
vo ye nahii.n jaantii ki hastii ke kaar-KHaane me.n
us kaa honaa na honaa be-naam haadisa hai
aur us ke hisse kaa kul asaasa
vo chand lamhe vo chand saa.nse.n hai.n
jin me.n vo KHvaab dekhtii hai
saliiqa-e-zaat se chaman ko sa.nvaarne kaa
bahaar-e-jaa.n ko nikhaarne kaa
2
bajaa ki naa-paa.edaar hai ye vajuud meraa
mai.n Gair-faanii hayaat ke silsile me.n
ik biich kii ka.Dii huu.n
rahiin-e-gardish bhii markaz-e-kaa.enaat bhii huu.n
jo mai.n ne dekhaa hai vo mire KHuu.n me.n rach gayaa hai
jo mai.n ne sochaa hai mujh me.n zinda hai
aur jo kuchh sunaa hai mujh me.n samaa gayaa hai
havaa kii suurat har ek ehsaas
merii saa.nso.n me.n jii rahaa hai
har ek manzar mire tasavvur me.n bas gayaa hai
mai.n zaat-e-mahduud apnii pahnaa.iyo.n me.n
ik kaa.enaat bhii huu.n
mirii rago.n me.n vo joshash-e-jaavedaa.n ravaa.n hai
jo shaaKH me.n phuul kii numuu hai
jo bahr me.n mauj kii ta.Dap hai
par-e-kabuutar me.n taab-e-parvaaz hai
sitaaro.n me.n raushnii hai
mai.n apne hone ke sab havaalo.n me.n ruunumaa huu.n
mai.n jaa-ba-jaa suurat-e-sabaa huu.n
Gazaal-e-KHush-chashm kii kaliyo.n me.n kheltaa huu.n
humakte bachche kii muskuraahaT huu.n
piir-e-shab-KHez kii du.aa huu.n
mai.n mehr me.n maahtaab me.n huu.n
ye kaisii chaahat hai jis se mai.n
ek mustaqil iztiraab me.n huu.n
vo kaun sii manzil talab thii
ki raa.njhaa raa.njhaa pukaartii hiir
aap hii raa.njhaa ho ga.ii thii

Zia Jalandhari
Nazm

zaifa

mujh ko hairat hai ki tujh ko dekh kar zaar-o-nizaar
ga.D nahii.n jaate hayaa se haakimaan-e-zii-vaqaar

Josh Malihabadi
Nazm

kachhwa aur KHargosh

ek kachhve ke aa ga.ii jii me.n
kiijiye sair o gasht KHushkii kii
jaa rahaa thaa chalaa hu.aa KHaamosh
us se naahaq ulajh pa.Daa KHargosh
miyaa.n kachhve! tumhaarii chaal hai ye
yaa ko.ii shaamat aur vabaal hai ye
yuu.n qadam phuu.nk phuu.nk dharte ho
goyaa uttuu zamii.n pe dharte ho
kyuu.n hu.e chal ke muft me.n bad-naam
be-chale kyaa aTak rahaa thaa kaam
tum ko ye hausla na karnaa thaa
chulluu paanii me.n Duub marnaa thaa
ye tan-o-tosh aur ye raftaar
aisii raftaar par KHudaa kii maar
bolaa kachhvaa ki ho.n KHafaa na huzuur
mai.n to huu.n aap mo'tarif ba-qusuur
agar aahistagii hai jurm-o-gunaah
to mai.n KHud apne jurm kaa huu.n gavaah
mujh ko jo saKHt sust farmaayaa
aap ne sab durust farmaayaa
mujh ko Gaafil magar na jaaniyegaa
banda-parvar buraa na maaniyegaa
yuu.n zabaanii javaab to kyaa duu.n
shart bad kar chalo to dikhlaa duu.n
tum to ho aaftaab me.n zarra
par miTaa duu.ngaa aap kaa Gurra
sun ke KHargosh ne ye talKH javaab
kahaa kachhve se yuu.n zi-ruu-e-itaab
tuu kare merii ham-sarii kaa KHayaal
terii ye taab ye sakat ye majaal
chyuu.nTii ke jo par nikal aa.e
to yaqii.n hai ki ab ajal aa.e
are bebaak! bad-zabaa.n mu.nh-phaT
tuu ne dekhii kahaa.n hai dau.D jhapaT
jab mai.n tezii se jast kartaa huu.n
shahsavaaro.n ko past kartaa huu.n
gard ko merii baad-e-paa na lage
laakh dau.De miraa pata na lage
rail huu.n barq huu.n chhalaavaa huu.n
mai.n chhalaave kaa balki baavaa huu.n
terii merii nibhegii sohbat kyaa
aasmaa.n ko zamii.n se nisbat kyaa
jis ne bhugte ho.n turkii o taazii
aaise mariyal se kyaa bade baazii
baat ko ab ziyaada kyaa duu.n tuul
KHair kartaa huu.n terii shart qubuul
hai munaasib ki imtihaa.n ho jaa.e
taaki aib o hunar ayaa.n ho jaa.e
al-Garaz ik maqaam Thahraa kar
hu.e dono.n hariif garm-e-safar
bas-ki zoro.n pe thaa cha.Dhaa KHargosh
tezii phurtii se yuu.n ba.Dhaa KHargosh
jis tarah jaa.e top kaa golaa
yaa gire aasamaan se olaa
ek do khet chauk.Dii bhar ke
apnii chustii pe aafrii.n kar ke
kisii goshe me.n so gayaa jaa kar
fikr ''kyaa hai chale.nge sustaa kar''
aur kachhvaa Gariib aahista
chalaa siine ko KHaak par ghistaa
suu.ii ghanTe kii jaise chaltii hai
yaa ba-tadriij chhaa.nv Dhaltii hai
yuu.nhii chaltaa rahaa ba-istiqlaal
na kiyaa kuchh idhar udhar kaa KHayaal
kaam kartaa rahaa jo pai-dar-pai
kar gayaa rafta rafta manzil tai
haif KHargosh rah gayaa sotaa
samra Gaflat kaa aur kyaa hotaa
jab khulii aa.nkh to saveraa thaa
saKHt sharmindagii ne gheraa thaa
sabr o mohabbat me.n hai sar-afraazii
sust kachhve ne jiit lii baazii
nahii.n qissa ye dil-lagii ke liye
balki ibrat hai aadmii ke liye
hai suKHan is hijaab me.n ruu-posh
varna kachhvaa kahaa.n kahaa.n KHargosh

Ismail Merathi
Nazm

aadhi gawahi

aziim munsif!!
hamaarii qismat kii har adaalat kaa faisla hai
ki apnii be-hurmatii kii farmaan le ke jaa.e.n
to apnaa ko.ii gavaah laa.e.n
gavaah
rishto.n ke mohtaram ku.nDliyo.n me.n baiThe
sa.npoliyo.n kaa
gavaah aisii haveliyo.n kaa
ki jin me.n qaanuun paa.o.n dharne se kapkapaa.e
ku.nvaarii chiiKHe.n
bilak bilak ke sadaa.e.n kartii
in hii a.ndhero.n me.n Duub jaa.e.n
magar vo is be basii kaa apnii
na ek ko.ii gavaah paa.e.n
kahaa.n se laa.e.n
gavaah in bhe.Diyo.n kaa
jo apnii shahvato.n par
ibaadato.n kii muqaddas-o-mohtaram ebaa.e.n
sajaa.e baiThe ho.n taak me.n
sau.ndhe kachche jismo.n ke
jin ke bajro.n ke uud me.n
siskiyaa.n sulagtii ho.n raat ko
aur din tilaavat ke lahn se
jagmagaa.e jaa.e.n
ye mohtaram bhe.Diye
ham un kii KHabaasato.n kaa gavaah laa.e.n
kahaa.n se laa.e.n
hame.n ko.ii aisaa mo.ajaza de
ki guu.ngii andhii siyaah shab ko
gavaahiyo.n kaa hunar sikhaa.e.n
KHabiir hai to
basiir hai to
tuu jaantaa hai
ki aaj tak maut ke alaava
ko.ii na apnaa gavaah paayaa
hamii.n pe TuuTii.n qayaamate.n bhii
hamii.n ne zillat kaa baar uThaayaa
kitaab-e-insaaf ke musannif
tire sahiife to kah rahe hai.n
ki saare insaan zii-sharaf hai.n
fahiim hai.n
baaliGun-nazar hai.n
sab apnii apnii kitaab kii ruu se apne baare me.n baa-KHabar hai.n
to phir hamaare hii pusht par haath kyuu.n ba.ndhe hai.n
hamaarii hii sab gavaahiyo.n par ye be-yaqiinii kii mohr kyuu.n hai
sabhii sahiifo.n me.n ye likhaa hai
tire taraazuu kaa
ko.ii pal.Daa jhukaa nahii.n hai
to kyaa ye samjhe.n
hamaaraa ko.ii KHudaa nahii.n hai

Naseem Syed
Nazm

1

ye ehsaas
ki ik zii-ruuh
mirii aavaaz ke shole se
jal saktaa hai
KHaamoshii ke resham se
kaT saktaa hai
itnaa jaa.n-parvar hai ki aa.nkhe.n
band hu.ii jaatii hai.n KHushii se
bhiigii jaatii hai.n

Saqi Faruqi
Nazm

baz-gasht

naGma-zaar-e-dard kii jaanib chale ham
ek bhii zarra na kuchlaa jaa.e is raftaar se
naGma-zaar-e-dard kii jaanib chale ham
kunj me.n pe.Do.n ke suuraj jhaa.nktaa thaa
kohsaaro.n sabza-zaaro.n me.n jhamaktii raushnii kaa jashn thaa
jashn jaarii hii rahegaa taa-abad
jaarii rahe
naGma-zaar-e-dard kii jaanib chale ham
laal-o-marmar se gu.ndhaa qaalib
aur is ke mehvar us ke qariib
bijliyo.n jaisaa musaffaa ik vajuud
chaar-suu bikhre hu.e KHaamosh suune aasmaa.n
ham kahaa.n hai.n ham kahaa.n naGma-zaar-e-dard hai ye ham kahaa.n
itnaa be-aavaaz jaise
aatmaa apnii shu.aa.e.n
reshe reshe se badan ke khii.nch le
aahistagii se be-gazand
aur duurii be-fuGaa.n ho jism kii aur ruuh kii
kyaa subuk-raftaar kar detii hai ham ko be-dilii be-haasilii
jaise ik baadal kaa Tuk.Daa
apnii chhaagal phe.nk de uu.nchii fazaa me.n
pyaase zarro.n kii taraf
phir halke-phulke pa.nkh phailaa.e u.De
halkore le
ik miTtii bantii rang kii tahriir sii
sairaab zarre us ko dekhe.n
aur pukaar uTThe.n
vo kafuurii saa sho.ala azmat-e-naa-ras
davaam-e-dard hai vo surKH nirmal raushnii
lo saa.ns ke sar-chashme suukhe har shikaayat miT ga.ii
kyaa shikaayat saa.ns ke sar-chashma se un ko rahii
jo saa.ns lete hai.n yahaa.n
mauj-e-be-ha.ngaam KHanda
kaise phuuTii mere lab se
ko.ii shaktii ham me.n hai
jo yuu.n hame.n paamaal kar ha.ns sake
ye hame.n aaGaaz hii se KHatm karne par tulii thii
chaahe phir KHud hii mujaavir ban sake anjaam-kaar
ehtijaaj us kaa jo ik shaktii hai mujh me.n
kis qadar pur-shor hai
kis qadar pur-zor hai
naGma-zaar-e-dard se aage liye jaataa mujh ko
in fazaa.o.n me.n jahaa.n
baazgasht ik giit ban jaatii hai us kii
jaise sab Tiile chaTaane.n aur kuhistaa.n
saa.ns ke chashme me.n shaamil hai.n
dha.Dakte zii-nafas aur ham-navaa

Shafiq Fatima Shera
Nazm

gandhi

shahiido.n kaa sartaaj jannat-maqaam
mohabbat kii me.araaj zii-ehtiraam
Gulaamaan-e-aalam kii pusht-o-panaah
ahinsaa ke bando.n kii ummiid-gaah
vo Gam bhii vatan kaa thaa Gam-KHvaar bhii
razaakaar bhii aur saalaar bhii
ahinsaa kaa pairav magar sher-e-mard
mohabbat me.n yaktaa sadaaqat me.n fard
hu.aa jis ke dam se ba-sad ehtishaam
siyaasat se uu.nchaa sadaaqat kaa naam
vo aadam kii azmat kaa aa.iina-daar
vo zarra ki chamkaa thaa KHurshiid-daar
vo jis ne diyaa aadamiyat ko auj
vo jis ne la.Daa.ii ahinsaa kii fauj
qafas hai ko.ii ab na sayyaad hai
vatan jis kii hikmat se aazaad hai
vo nuur-e-ziyaa-baar siimaa-e-KHair
vo juuyaa-e-KHair-o-shanaasaa-e-KHair
farishta-KHisaal-o-farishta-siyar
malak dar-haqiiqat ba-zaahir bashar
mohabbat kii vo ik shabiih-e-hasii.n
uKHuvvat kaa vo ek maah-e-mubii.n
vo haq aagahii kii kachhaaro.n kaa sher
sadaaqat ke maidaa.n kaa mard-e-diler
falak-aafrii.n aur garduu.n-taraaz
mariizaan-e-pastii kaa vo chaarasaaz
vo kotaah-biino.n kii sham-e-shu.uur
vo gumraahiyo.n me.n hidaayat kaa nuur
vo jis ne uThaayaa zamaane kaa baar
kiyaa jis ne jaabir ko be-iKHtiyaar
vo be-misl qaa.id mu.assar KHatiib
vo lashkar me.n jis ke amiir-o-Gariib
vo jis ne karo.Do.n ke kaaTe hai.n band
vo arfa.a vo a.alaa vo sab se buland
vo jis kii ataa hai niraalii ataa
vo jis ne diyaa ik nayaa falsafa
zamii.n par bahaa us jarii kaa lahuu
tafuubar tuu ai charKH-e-gardaa.n tafuu

Arsh Malsiyani
Nazm

aaj-kal

har sar me.n imtihaan kaa saudaa hai aaj-kal
har dil me.n fail hone kaa dha.Dkaa hai aaj-kal
parcho.n ke out hone kaa charchaa hai aaj-kal
ko.ii nahii.n kisii kii bhii suntaa hai aaj-kal
munnii kii aa.nkh nam hai to munnaa ke dil me.n Gam
bechainiyo.n me.n ko.ii kisii se nahii.n hai kam
diimak kii tarah chaaT rahaa hai ko.ii kitaab
ko.ii ye sochtaa hai ki ab aa.egaa itaab
pa.Dhtaa hai raat bhar ko.ii juGraafiya kaa baab
pencil se soKHta pe hai likhtaa ko.ii javaab
har zii-shu.uur khel ke maidaa.n se duur hai
pa.Dhne se ko.ii aur ko.ii likhne se chuur hai
anjum kii aa.nkh nam hai to firdaus hai.n udaas
'mohsin' ye sochte hai.n ki ho.nge ye kaise paas
azraa kii ye du.aa hai ki aa jaa.e raTnaa raas
har zehn me.n hai KHauf to har dil me.n hai hiraas
ko.ii nazar me.n maut kaa naqsha liye hu.e
baiThaa hai ko.ii haath me.n basta liye hu.e
khaane kii fikr hai na hai footbaal kaa KHayaal
chehre pe har nafas ke hai tahriir dil kaa haal
is baar fail gar hu.e jiinaa hu.aa muhaal
abbuu ke maar-piiT se utregii merii khaal
yaaro.n ko kis tarah se mu.nh apnaa dikhaa.e.nge
aur kis tarah se manzil-e-ummiid paa.e.nge
baaqii kuchh aise log bhii hai.n is jahaan me.n
jo farq aane dete nahii.n apnii aan me.n
siine phulaa phulaa ke nikalte hai.n shaan me.n
jaise ki ko.ii KHatra na ho imtihaan me.n
ye log zinda-dil hai.n bahaadur hai.n sher hai.n
jo fail ho ke hote hai.n KHush vo diler hai.n
pa.Dhne kaa Gam hai in ko na hai in ko fikr-e-dosh
har vaqt khelte hai.n pa.Dhaa.ii kaa kis ko hosh
aapas me.n la.D bhii lete hai.n jab aa.e in ko josh
ha.nste hai.n imtihaan ke din ye kutub-farosh
in ke liye zamaane me.n ko.ii bhii Gam nahii.n
chikne gha.De hai.n ye inhe.n ko.ii alam nahii.n

Parwana Rudaulvi
Nazm

ibn-e-qabil ki dua

ai arz-o-samaa ke KHaaliq
be-aib-o-daanaa rahiim-o-maalik
na jaane kitnii hai maKHluuq terii
hisaab kaise tuu rakhtaa hogaa
kahii.n pe insaa.n kahii.n pe shaitaa.n
farishte jin aur tuyuur-o-haivaa.n
bahr-o-bar me.n zamii.n ke bhiitar
sa.ng-o-chob aur fazaa ke andar
hai.n aur bhii to karo.Do.n zii-ruuh
hai.n sab ke sab jo mutii.a-o-qaa.el
magar vo aalam fahiim jis ko
ki to ne ahsan-tarii.n banaayaa
ashraf-ul-KHalq zakii banaayaa
vahii jo ham hai.n ki ya.anii insaa.n
hai da.avaa jis ko payambarii kaa
malaa.ik-o-jin pe bartarii kaa
hai jis kii KHidmat me.n chaa.nd-suuraj
hu.aa samundar pahaa.D baadal
zamii.n kaa madfan fazaa kii vus.at
na jaane phir kyaa hu.aa ye ham ko
raziil bante chale ga.e ham
bachcho.n buu.Dho.n pe qahr Dhaa kar
KHabiis bante chale ga.e ham
KHud apnii beTii bahan ko apne
havas kaa luqma banaa rahe hai.n
apnii maa.n ko bahuu ko apnii
ashko.n me.n ham Dubo rahe hai.n
amn kii jag.ho.n ko rau.nd Daalaa
tumhe.n bhii hisso.n me.n baa.nT Daalaa
KHudaayaa ko.ii KHataa hu.ii hai
yaa shaayad ham se yaa shaayad tujh se
hisaab me.n tere kamii hai shaayad
yaa merii fitrat badal ga.ii hai
ai KHaaliq-e-kaa.enaat-o-bartar
bas ek fariyaad aur sun le
hisaab apnaa tuu Thiik kar le
yaa phir se fitrat badal de merii

Abu Bakr Abbad
Nazm

sawari unT ki hai

KHudaavandaa vo kaisaa marhala thaa!
ab ye kaisaa marhala hai!
ek sunsaanii kaa aalam hai
galii chup hai
kisii zii-ruuh kii aahaT nahii.n aatii
ye kaisii saa.at-e-manhuus hai
jis me.n abhii tak
ko.ii nanhaa saa parinda yaa pati.ngaa
yaa ko.ii mauhuum chyuu.nTii hii nahii.n guzrii
kisii bhii mard o zan kii
mai.n ne suurat hii nahii.n dekhii
savaarii uu.nT kii hai
aur mai.n shahr-e-shikasta kii
kisii sunsaa.n galii me.n sar jhukaa.e
haath me.n bad-ra.ng cham.De kii mahaare.n thaam kar
us ghar kii jaanib jaa rahaa huu.n
yaa kisii mahshar
KHamoshii ke kisii mahshar kii jaanib jaa rahaa huu.n
hichkiyo.n aur siskiyo.n ke baa'd kaa mahshar
ko.ii manzar
ko.ii manzar ki jis me.n ik galii hai
ek bhuuraa uu.nT hai
aur ek buzdil shaKHs kii Dhiilii rifaaqat hai
safar naa-muKHtatam
jaise abad tak kii ko.ii lambii masaafat hai!

Rafiq Sandelvi
Nazm

mehman-e-KHosusi

ek din hazrat-e-haafiz ne ye dekhaa manzar
tauq-e-zarrii.n se muzayyan hai hama gardan-e-KHar
aur chhak.De me.n jutaa re.ng rahaa hai taazii
zaKHm hii zaKHm hai ko.De kaa zi-sar taa-ba-kamar
the jau marhuum ba.De saada-dil o nek-mizaaj
''ii.n-che shoriist'' kahaa aur gire chakraa kar
vo to is Gam ko liye KHuld-e-barii.n me.n pahu.nche
ka.ii sadiyo.n kaa zamaane ne lagaayaa chakkar
aaj ham par bhii magar jabr-e-nazaara hai vahii
vahii naira.ng-e-tamaashaa vahii naira.ng-e-nazar
vo charaa-gaah-e-siyaasat ho ki maidaan-e-adab
tauq-e-zarrii.n hai vahii aur vahii gardan-e-KHar
iKHtiyaaraat kii kursii pe KHraan-e-farba
mutamakkin nazar aate hai.n ba-sad karr-o-farr
ek kursii pe kisii tarah uchak kar pahu.nche
aur phir dha.D se khule kashf-o-karaamaat ke dar
phir to 'buqraat' aur 'arastuu'-e-zamaana hai.n vo
ilm o hikmat me.n nahii.n phir ko.ii un kaa ham-sar
phir to sahraa-e-jahaalat bhii hai dariyaa-e-uluum
phir to is be-hunarii me.n bhii hai.n sau sau jauhar
KHvaah do harf bhii ta.aliim na haasil kii ho
tauq-e-zarrii.n ke karishme se bane daanish-var
ko.ii jalsa ho vo ''mehmaan-e-KHosuusii'' ho.nge
ko.ii mauqa.a ho dha.Dalle se vo de.nge lecture
vo zamii.n ke ho.n masaa.il ke KHalaa kii baate.n
misl-e-miqraaz zabaa.n chaltii rahegii far-far
aalim o faazil o daanish-var o ahl-e-hikmat
sab nazar aa.e.nge qadmo.n pe jhukaa.e hu.e sar
tauq-e-zarrii.n kaa jo is ko na karishma kahiye
naatiqa sar-ba-girebaa.n ki ise kyaa kahiye

Raza Naqvi Vahi
Nazm

talash

zii-fahm daanish-var
apne ehsaas pe lage zaKHmo.n ko
maah-o-anjum banaa.e
kisii jadiid suuraj ke tuluu.a hone ke manzar

Afroz Alam
Nazm

KHud-kashi

zamii.n ab chalte chalte thak chukii hai
samundar KHushk hotaa jaa rahaa hai
falak bhii kitnaa buu.Dhaa ho chukaa hai
sitaare raushnii khone lage hai.n
ye sayyaare jo gardish kar rahe hai.n
ye sayyaare zamii.n par aa ga.e hai.n
bikhar jaa.egaa ye shiiraaza ik din
sabhii zii-ruuh saare jaanvar insaa.n
ye ik ik saa.ns maa.nge.nge zamii.n par
biga.D jaa.egaa jis din bhii tavaazun
hamaarii kaa.enaat-e-ra.ng-o-buu kaa
zamii.n par husn-e-fitrat ko na kuchlo
ye puurii nasl aadam ke liye ik KHud-kushii hai

Naseem Ansari
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now