چائے پر اشعار

اک ہاتھ میں میرے چائے کا کپ اک ہاتھ میں میرے ہاتھ ترا

ہاتھوں کو طلب ہے ہاتھوں کی اور دل کو طلب ہے ساتھ ترا

چھوڑ آیا تھا میز پر چائے

یہ جدائی کا استعارا تھا

آج پھر چائے بناتے ہوئے وہ یاد آیا

آج پھر چائے میں پتی نہیں ڈالی میں نے

تیرے ہاتھ کی چائے تو پی تھی

دل کا رنج تو دل میں رہا تھا

شعر جیسا بھی ہو اس شہر میں پڑھ سکتے ہو

چائے جیسی بھی ہو آسام میں بک جاتی ہے

شام کی چائے ان کے ساتھ پیوں

دل کی حسرت بہت پرانی ہے

گرم موسم میں گرم چائے بھی

بد مزاجوں کا پیار لگتی ہے

چائے کی پیالی میں نیلی ٹیبلٹ گھولی

سہمے سہمے ہاتھوں نے اک کتاب پھر کھولی

ہنس پڑی شام کی اداس فضا

اس طرح چائے کی پیالی ہنسی

آ ترے سنگ ذرا پینگ بڑھائی جائے

زندگی بیٹھ تجھے چائے پلائی جائے

نہیں ہے گھر میں تری یاد کے علاوہ کچھ

تو کس کے سامنے چائے بنا کے رکھتی ہوں

چائے میں ڈال کر عشاق اسے پی جاتے

در حقیقت لب معشوق جو شکر ہوتا

میں نے پوچھا ہے کہ چائے کے لیے وقت کوئی

ہنس کے بولی ہے اشارے سے گھڑی ٹھیک نہیں

ایسی چائے کبھی نہ پی میں نے

سچ بتا تو نے اس میں کیا ڈالا

سستے میں ان کو بھولنا اچھا لگا ہے آج

چائے کا ایک گھونٹ بھی کافی رہا ہے آج

سامنے رکھ کے چائے کی پیالی

چسکی چسکی تری کمی چکھی

ہم جہاں چائے پینے جاتے تھے

کیا وہاں اب بھی آیا کرتے تھے

چائے کی برکت سے خالی ہیں

دیر میں اکثر اٹھنے والے

میں اس کی چائے کی پیالی تھی لیکن

اسے پینے کی جرأت ہی نہیں تھی

ٹھنڈی چائے کی پیالی پی کے

رات کی پیاس بجھائی ہے

آپ اخبار دیکھیے تب تک

میں ابھی چائے لے کر آتی ہوں

تھوڑی دیر میں ٹرین نکلنے والی ہے

سن تھوڑی ہی دیر میں چائے آتی ہے

پھر کہیں بیٹھ کے پی جائے اکٹھے چائے

پھر کوئی شام کا پل ساتھ گزارا جائے

تیری ٹینشن میں پینا بھول گئی

چائے تو سامنے رکھی ہوئی تھی

کبھی تو بیٹھ کے یاروں کے ساتھ چائے پی

کبھی تو بیٹھ کے فرصت سے دن گزارا کر

آ میرے ساتھ بیٹھ مرے ساتھ چائے پی

آ میرے ساتھ میرے دلائل پہ بات کر

چائے کے ایک کپ کا یہی ہے معاوضہ

یاروں کو عہد رفتہ کے قصے سنائیے

لو چائے میں بھی چائے کی پتی نہیں ڈالی

تم کو تو محبت کے سوا کچھ نہیں آتا

شاعری چائے تری یاد چمکتے جگنو

بس یہی چار طلب روز مری شام کے ہیں

چائے پینا تو اک بہانہ تھا

آرزو دل کی ترجمانی تھی

پھر چائے میں بسکٹ کی طرح بھوکی سی یہ شام

کھا جائے گی سورج کو سمندر میں ڈبا کر

روز ہم چائے ساتھ پیتے تھے

بات آگے کبھی بڑھی ہی نہیں

نام میرا یاد کرکے چسکیوں کے بیچ میں

کیا ہوئی ہے چائے کے کپ میں ترے ہلچل کبھی

وہ چائے پی رہا تھا کسی دوسرے کے ساتھ

مجھ پر نگاہ پڑتے ہی کچھ جھینپ سا گیا

ایک چائے کیا جان دیتی میں

شکریہ ایسے کہہ رہا تھا وہ

اس کا خیال دل میں گھڑی دو گھڑی رہے

پھر اس کے بعد میز پہ چائے پڑی رہے

چائے میں مت ملائیے شکر کہ ہے ضرر رساں

شامل مٹھاس واسطے اپنا لعاب کیجیے

بھاپ اڑاڑ کے میری چائے سے

اس کا پیکر بناتی رہتی ہے

شام کی چائے کا وعدہ وہ ادھر بھول گئے

ہم ادھر صبح سے تیار ہوئے بیٹھے ہیں

ہیں دسترس میں ابھی بھی طاہرؔ اٹھا کے اب اس کو پی بھی ڈالو

مشاہدوں میں ہی ہو گئی گر یہ ٹھنڈی چائے تو کیا کرو گے

کپ میں گرمی دکھا رہی تھی بہت

چائے ساسر میں ڈال دی میں نے

دھیان اک بیتے ملن کے دوار

لب چائے کی پیالی پر

چائے کے تلخ گھونٹ سے اٹھتا ہوا غبار

وہ انتظار شام وہ منظر کہاں گیا

چائے میں اس کے پستاں تھے

میرا بدن پانی میں تھا

شب ڈھلی اٹھنے لگے ہوٹل سے لوگ

چائے کا یہ دور اس کے نام پر

گرم چائے پی ہے تیری یاد کی

تشنہ لب ہوں شربت دیدار کا

چائے میرے ہاتھ سے گرنے والی تھی

اس نے اس انداز سے گھورا توبہ ہے

چائے کے کپ میں ابلی

اخباروں کی سرخی دھوپ

میں نے چائے جو پیش کی تھی اسے

اک تکلف میں پڑ گیا تھا وہ