بیسٹ بزم شاعری

بھری بزم میں راز کی بات کہہ دی

بڑا بے ادب ہوں سزا چاہتا ہوں

اب کے اس بزم میں کچھ اپنا پتہ بھی دینا

پاؤں پر پاؤں جو رکھنا تو دبا بھی دینا

بزم وفا سجی تو عجب سلسلے ہوئے

شکوے ہوئے نہ ان سے نہ ہم سے گلے ہوئے

دل گرفتہ ہی سہی بزم سجا لی جائے

یاد جاناں سے کوئی شام نہ خالی جائے

بزم سے دور وہ گاتا رہا تنہا تنہا

سو گیا ساز پہ سر رکھ کے سحر سے پہلے

سجاؤ بزم غزل گاؤ جام تازہ کرو

''بہت سہی غم گیتی شراب کم کیا ہے''

اول شب وہ بزم کی رونق شمع بھی تھی پروانہ بھی

رات کے آخر ہوتے ہوتے ختم تھا یہ افسانہ بھی

دور حاضر کی بزم میں بیکلؔ

کون ہے آدمی نہیں معلوم

بس یہی ہوگا کہ دیوانہ کہیں گے اہل بزم

آپ چپ کیوں ہیں مری طرز نوا لے لیجیے

ساقی کے آنے کی یہ تمنا ہے بزم میں

دست سبو بلند ہے دست دعا کے ساتھ